Երևան քաղաքի դատախազ Արթուր Դավթյանը Բարձրաստիճան պաշտոնատար անձանց էթիկայի հանձնաժողովին ներկայացրած` պաշտոնը ստանձնելու (2013 թ.) հայտարարագրում նշել է երեք հողամաս, երկու անհատական բնակելի տուն, ինչպես նաև մեկ բնակարան` բազմաբնակարան շենքում:

Դավթյանը հայտարարագրել է նաև «VOKSWAGEN TOUAREG 3.2» մակնիշի ավտոմեքենա:

Հայտարարագիրը ներկայացնելու օրվա դրությամբ Երևան քաղաքի դատախազն ունեցել է 8 միլիոն դրամի չափով դրամական ունեցվածք: Արթուր Դավթյանը 2013 թ.ստացել է 14 միլիոն 986 հազար դրամի չափով եկամուտ, որից 2 միլիոնը` գույքի օտարումից ստացված, 4 միլիոն 850 հազարը նշված է «այլ եկամուտներ», մնացածը` 6 տարբեր տեղերից ստացված աշխատավարձ:

Դատախազի կինը հայտարարագրել է 10 միլիոն դրամի չափով դրամական միջոցներ:

Արթուր Դավթյանը համարվում է գլխավոր դատախազ Գևորգ Կոստանյանի կադրերից։ Նա մինչև Երևան քաղաքի դատախազի պաշտոնում նշանակվելը Շենգավիթ վարչական շրջանի դատախազն էր:

Հայկական ժամանակ

Լավատեղյակ աղբյուրներից հայտնի դարձավ, որ Ղազախստանի ԱԳՆ ներկայացուցիչները Հայաստանի և Ռուսաստանի ներկայացուցիչներին դիվանագիտական խողովակներով տեղյակ են պահել, թե հնարավոր է իրենք մինչև հոկտեմբերի 10-ին Մինսկում կայանալիք հանդիպումը չհասցնեն վերջնական եզրակացության հանգել ԵՏՄ-ին Հայաստանի միանալու փաթեթի վերաբերյալ:

Ըստ մեր տեղեկությունների՝ Ղազախստանի ԱԳՆ ներկայացուցիչներն ասել են, որ դրա համար իրենց հարկավոր կլինի ևս հինգ օր, այսինքն՝ իրենց վերջնական եզրակացությունը պատրաստ կլինի հոկտեմբերի 15-ին:

Ղազախստանի նման դիրքորոշումը նշանակում է, որ նրանք մտադիր են հոկտեմբերի 10-ին ևս տապալել Հայաստանի անդամակցությունը ԵՏՄ-ին:

Մեր աղբյուրները փոխանցում են, որ այս հարցով Հայաստանի դիվանագետները խորհրդակցություններ են սկսել ՌԴ ԱԳՆ և նախագահի աշխատակազմի ներկայացուցիչների հետ: Վերջիններս տեղեկացրել են, որ իրենք զայրացած են Ղազախստանի նախագահ Նորսուլթան Նազարբաևի պահվածքից և ՌԴ ղեկավարությունը վճռական է տրամադրված՝ հոկտեմբերի 10-ին Հայաստանի անդամակցությունը ԵՏՄ-ին ապահովելու համար:

Հայկական ժամանակ

Երեկվա միջադեպը, երբ շփման գծի հարավային մասում ադրբեջանցի դիպուկահարը սպանել է ԼՂՀ ԶՈՒ ավագ լեյտենանտ, 1990թ.-ին ծնված Մհեր Հակոբյանին՝ Բաքվի պատասխանն է ԵԱՀԿ Մինսկի խմբի ամերկացի համանախագահ Ջեյմս Ուորլիքին:

Այս մասին «Հայկական ժամանակ» թերթի թղթակցին ասել է ԼՂՀ նախագահի մամուլի խոսնակ Դավիթ Բաբայանը:

Նախօրեին Երևանում Ջեյմս Ուորլիքը խոսել էր բանակցային նոր փուլ սկսելու մասին: «Բոլորը խոսում են բանակցային նոր պատուհանի բացման մասին: Պատուհանը բացվում է, բայց Ադրբեջանն այդ պատուհանին կրակում է: Մենք պետք է ամեն ինչ անենք, որ կա՛մ բաց պատուհանի վրա չկրակեն, կա՛մ այդ պատուհանները փակվեն»,-ասել է Բաբայանը:

Հայկական ժամանակ

Գյուղատնտեսության նախկին նախարար, դաշնակցական Դավիթ Լոքյանի որդին՝ Սերգեյ Լոքյանը, ով Հովիկ Աբրահամյանի խորհրդականն ու աջ ձեռքն էր ԱԺ-ում, Աբրահամյանի վարչապետ նշանակվելուց և ԱԺ աշխատակազմում տեղի ունեցած կադրային փոփոխություններից հետո անգործ էր մնացել ընդամենը մի քանի օր։ Աշխատանքից ազատվելուց հաշված օրեր անց՝ մայիսին, նա նշանակվեց վարչապետի խորհրդական։ Լոքյանն այն երիտասարդ բարձրաստիճան պաշտոնյաներից է, որ Բարձրաստիճան պաշտոնատար անձանց էթիկայի հանձնաժողովի հայտարարագրերի ռեեստրի համաձայն, աչքի են ընկնում մեծ շահաբաժիններով։

Այսպես, 2013 թ. տարեկան հայտարարագրի համաձայն, Սերգեյ Լոքյանը բաժնեմաս ունի երկու տարբեր ընկերություններում, համապատասխանաբար 63 միլիոն 400 հազար 140 և 8 միլիոն 65 հազար դրամի չափով: Տարեսկզբին նա ունեցել է 17 միլիոն 300 հազար դրամ դրամական միջոցներ, իսկ արդեն տարեվերջին` 4 միլիոն դրամ: Սերգեյ Լոքյանի տարեկան եկամուտը կազմել է 44 միլիոն 570 հազար դրամ: Դրանից աշխատավարձը ընդամենը 3 միլիոն 590 հազար դրամն է: 33 միլիոն 780 հազար դրամի չափով եկամուտ Լոքյանը ստացել է շահաբաժնից: Եվս 7 միլիոն 200 հազար դրամ էլ` վարձակալության դիմաց ստացվող վճարից:

Հայկական ժամանակ

Սեպտեմբերի 24-ին Սերժ Սարգսյանը դասախոսություն է կարդալու Նյու Յորքի Կոլումբիայի համալսարանում` Հայաստանի և արտաքին քաղաքականության թեմայով: Այս մասին տեղեկությունը տեղադրված է Կոլումբիայի համալսարանի կայքում: Քննարկումը, ըստ նույն աղբյուրի, վարելու է Միջազգային և հանրային կապերի դպրոցի դեկան, Միջազգային հարաբերությունների պրոֆեսոր Մերիթ Ե. Ջեյնոուն: Միջոցառումը տեղի է ունենալու Հարիմանի ինստիտուտի հովանավորությամբ:

Սերժ Սարգսյանն ԱՄՆ-ում է գտնվելու ՄԱԿ-ի գլխավոր ասամբլեայի 69-րդ նստաշրջանի շրջանակներում: Նստաշրջանը բացվել է երեկ: Ըստ ՄԱԿ-ի պաշտոնական կայքում տեղադրված տեղեկատվության` ամենամյա քննարկումները սկսվելու են սեպտեմբերի 24-ին, ելույթ է ունենալու նաև Սերժ Սարգսյանը: Պաշտոնական աղբյուրը հայտնում է, որ այդ օրը նախատեսված են ԱՄՆ-ի, Բրազիլիայի, Ուգանդայի, Չիլիի, Կորեայի Հանրապետության, Հայաստանի, Լիբերիայի, Ֆրանսիայի, Արգենտինայի, Ֆինլանդիայի, Թուրքիայի և Էստոնիայի նախագահների, Մեծ Բրիտանիայի, Դանիայի, Իսպանիայի և Ավստրալիայի վարչապետների ելույթները: Քննարկումները, որոնց մեկնարկից առաջ ՄԱԿ-ի գլխավոր քարտուղարը կազմակերպության անդամ երկրներին է ներկայացնելու ՄԱԿ-ի աշխատանքի մասին իր ամենամյա զեկույցը, նախատեսված են մինչև հոկտեմբերի 1-ը:

Հայկական ժամանակ

Այսօր ժամը 11:00-ին Ազգային ժողովի ԲՀԿ խմբակցությունում տեղի կունենա ոչ իշխանական Քառյակի հանդիպումը, որի ընթացքում էլ կորոշվի համատեղ հանրահավաքի օրը:

Քառյակը պետք է բավական նուրբ մի հարց լուծի՝ առաջիկա հանրահավաքի հետ կապված: Բանն այն է, որ ՀՅԴ-ն կողմ է սահմանադրական փոփոխություններին, իսկ ՀԱԿ-ը քաղաքական պրոցեսի առանցքում տեսնում է սահմանադրական փոփոխությունների տապալումը: Այսօրվա քննարկման ընթացքում Քառյակի ուժերը պետք է փորձեն լուծում գտնել այս հարցին. ինչպե՞ս անել, որ հանրահավաքի հարթակը լինի միասնական և հնարավոր լինի գործողությունների միասնական-ռազմավարական հեռանկար գծագրել: Սա, իհարկե, դժվար, բայց և լուծելի խնդիր է:

Հայկական ժամանակ

«Բարգավաճ Հայաստան» կուսակցությունում, որտեղ մի քանի ամիս է կտրականապեդ դեմ են արտահայտվում սահմանադրական փոփոխություններին, թերևս մոռացել են իրենց ծրագրի մասին։ Իսկ ծրագրում, որով ԲՀԿ-ն մասնակցել է 2012-ի խորհրդարանական ընտրություններին և որն առայսօր տեղադրված է նաև կուսակցության պաշտոնական կայքում, «Քաղաքական կայունություն» բաժնում գրված է. «Օրենսդիր, գործադիր և դատական իշխանությունների բաժանման և հավասարակշռման սկզբունքների վրա խարսխված քաղաքական կայունության ապահովման նպատակով «Բարգավաճ Հայաստան» կուսակցության գործունեության հիմնական ուղղություններն են`

1. սահմանադրական փոփոխությունների համատեքստում համապատասխան օրենքների և այլ իրավական ակտերի ընդունմամբ իշխանության թևերի գործունեության հստակ կանոնակարգումը,

2. ժողովրդավարության զարգացման անհրաժեշտությամբ, ինչպես նաև ժամանակի պահանջով և պետության առջև ծառացած հիմնախնդիրների լիարժեք լուծմամբ պայմանավորված սահմանադրական հետագա բարեփոխումների իրականացումը»։

ԲՀԿ-ն ներկայումս դեմ է սահմանադրական փոփոխություններին, իսկ Սերժ Սարգսյանը, որր սահմանադրական փոփոխությունների նախաձեռնողն է, փաստորեն ինքն է իրականացնում ԲՀԿ նախընտրական խոստումը:

Հայկական ժամանակ

ՀՀ ազգային վիճակագրական ծառայության՝ օրերս հրապարակած պաշտոնական տվյալների համաձայն՝ 2013թ. ընթացքում Հայաստանում ազատազրկման է դատապարտվել 239 կին, ինչը 13 տոկոսով գերազանցում է 2012 թվականի ցուցանիշը։

2008թ. համեմատ՝ դատապարտված կանանց թիվը 2013-ին աճել է 41 տոկոսով։ Անցած հինգ տարիների ընթացքում դատապարտված կանանց թվով ռեկորդային էր եղել 2009 թվականը՝ 353 կին։ 2013-ի ցուցանիշն այս տխուր ցանկում երկրորդն է:

Հայկական ժամանակ

ՀՀ գյուղատնտեսության նախարար Սերգո Կարապետյանն օրերս Ազգային ժողովում հավակնոտ հայտարարություն արեց: Նա ասաց, թե 2020 թ. Հայաստանը պետք է հասնի հացահատիկի ինքնաբավության 60 տոկոսի: Այսինքն` Հայաստանում պետք է ցորենի այնքան բերք ստացվի, որ ապահովի մեր երկրի ներքին պահանջարկի 60 տոկոսը: Այս հայտարարությամբ Կարապետյանն ինքն իրեն դրել է բավական երկիմաստ վիճակում: Բանն այն է, որ գյուղատնտեսության նախարարի մամլո խոսնակ Անի Սմբատյանը մեր թղթակցին ասել է, թե այս տարի Հայաստանում սպասվում է ցորենի 340 հազար տոննա բերք:

Իսկ ՀՀ գյուղատնտեսության նախարարության գյուղատնտեսական ծրագրերի զարգացման վարչության պետ Հրաչ Ծպնեցյանը մեր թղթակցին ասել է, որ Հայաստանում սպառվում է միջինը 500 հազար տոննա ցորեն (ներառյալ` ալյուր, հացամթերք, անասնակեր): Այսպիսով, ստացվում է, որ հիմա արդեն Հայաստանը հատել է ցորենի ինքնաբավության 60 տոկոսանոց սահմանագիծը, որովհետեւ 340 հազարը 500 հազարի ուղիղ 68 տոկոսն է: Ուրեմն` կամ Սերգո Կարապետյանը նկատի է ունեցել, որ առաջիկա վեց տարիներին անհրաժեշտ է կտրուկ կրճատել ցորենի ցանքատարածքներն ու բերքատվությունը, կամ էլ ուղղակի թվերն իրար է խառնել սաղ:

Նշենք, որ պատկերը շատ ավելի տպավորիչ է ստացվում, եթե առաջնորդվում ենք ոչ թե գյուղնախարարության, այլ` փորձագիտական տվյալներով:

Փորձագետները կարծում են, որ Հայաստանում տարեկան ցորենի սպառումը ոչ թե 500, այլ 400 հազար տոննա է: Այս պարագայում ստացվում է, որ այս տարի ցորենի ինքնաբավության առումով հասել ենք 85 տոկոսի:

Հայկական ժամանակ

Բուհական ընդունելության քննությունների արդյունքում, ինչպես հայտնի է, հազարավոր տեղեր թափուր էին մնացել: Այդ առումով առաջատարը Հայաստանի պետական ճարտարագիտական (Պոլիտեխնիկ) եւ Հայաստանի ազգային ագրարային համալսարաններն են:

Պոլիտեխնիկում ընդհանուր առմամբ հատկացված 1365 վճարովի տեղերից թափուր է մնացել 805 տեղ` տարբեր մասնագիտությունների գծով: Ագրարային համալսարանում 1340 վճարովի տեղերից չի համալրվել 488-ը, որից 446-ը` միայն ագրոպարենային համակարգի տնտեսագիտական մասնագիտությունների դեպքում: Ճարտարագիտական համալսարանի պրոռեկտոր Միքայել Հարությունյանը երեկ մեր զրույցում նշեց, որ չհամալրված տեղերի պատճառով առաջացած խնդիրները կարող են լինել, թերեւս, միայն ֆինանսական: Այդուհանդերձ, ըստ նրա, դասախոսները չեն կրճատվել:

Հայկական ժամանակ