Երեկվա դրությամբ Հայաստանի գլխավոր դատախազ Գևորգ Կոստանյանը Գյումրիի սպանդի հիմնական կասկածյալ Վալերի Պերմյակովին հայկական կողմին հանձնելու հարցով Ռուսաստանի Դաշնության գլխավոր դատախազություն չի դիմել:

Եվ ընդհանրապես չկա որևէ նշան, որ հայ–ռուսական բանակցությունների ընթացքում նման հարց ընդհանրապես քննարկվում է: Հայաստանի իշխանությունները կարծես թե համակերպվել են այն մտքի հետ, որ Պերմյակովը պետք է մնա ռուսական ռազմաբազայի տարածքում, և գոհ են նրանից, որ մեր քննիչները ժամանակ առ ժամանակ նրան հարցաքննելու հնարավորություն կունենան: Նշենք, սակայն, որ հայաստանցի քննիչները Պերմյակովին կարող են տեսնել միայն ռուսական կողմի թույլտվությունն ունենալու պարագայում: Երեկ, ի դեպ, տեղի է ունեցել առաջին այդպիսի շփումը:

Հայկական Ժամանակ

Առաջիկա գարունը, մեծ հավանականությամբ, թեժ է լինելու Տավուշի, Լոռու և Սյունիքի մարզի մոտ 20 համայնքներում: Կառավարությունը մտադիր է մոտ ապագայում հանրաքվեներ անցկացնել այդ համայնքների խոշորացման հարցով:

Բոլոր հիմքերը կան մտածելու, որ հանրաքվեների ընթացքում գործադրվելու են իշխանական, վարչական լծակները դրական արդյունք ապահովելու համար, չնայած համայնքների հիմնական մասի բնակիչները բացասաբար են տրամադրված իրենց համայնքները խոշորացնելու հեռանկարին: Բայց խոշորացման քաղաքական որոշումը կարծես թե կայացվել է։

Հայկական Ժամանակ

Դեռ անցյալ տարեվերջին գրել էինք, որ Լիսկան կադրային ջարդ է սկսել և աշխատանքից ազատել է տալիս բազմաթիվ նման մարդկանց: Գորիսի հիվանդանոցի տնտեսական մասի այլևս նախկին վարիչ Վրեժ Հովսեփյանը, ով ևս այդ մարդկանց շարքում է հայտնվել, երեկ մեզ պատմել է, թե ինչ է կատարվում Գորիսի հիվանդանոցում:

Պարոն Հովսեփյան, ի՞նչ պատճառաբանությամբ են ձեզ ազատել աշխատանքից:

Ոչ մի պատճառաբանությամբ, մարզպետը հրահանգել է՝ ազատել, ասել է՝ կգրեք անվստահություն:

Այսինքն՝ անվստահությունը ո՞րն է:

Երևի կա, մեր մարզում կա անվստահություն, ես 92-ից աշխատում եմ հիվանդանոցում՝ մասնակցելով պատերազմին, մեկ վայրկյան Գորիսը չեմ թողել, նույնն էլ իմ տնօրենը՝ Սլավիկ Ամիրյանը. հիմա ազատել են: Ես էլ, մտածելով, որ խնդիր կարող եմ ունենալ, որովհետև ես այդքան ուժեղ չեմ, դիմումս գրել եմ, դուրս եկել: Ու մինչև իմ դիմում գրելը՝ արդեն իմ տեղում մարդ էին նշանակել:

Ո՞ւմ են նշանակել:

Լիսկայի նախկին վարորդի տղային:

Սլավիկ Ամիրյանին ինչի՞ համար են հեռացրել:

Երևի իրեն էլ անվստահության համար:

Քանի՞ հոգու են ազատել:

Կադրային ջարդը մեծ է: Մեր հիվանդանոցի դեղատան վարիչին են ազատել աշխատանքից, որ դեղագործ է, նշանակել են իրենց հարսին: Ատամնաբույժին՝ Արտակ Զաքարյանին են ազատել…։

Ընդհանուր ի՞նչ մթնոլորտ է մարզում։

Իսկ Ձեր կարծիքով ի՞նչ պետք է լինի՝ սարսափոլի լարված, վախենում են մարդիկ խոսել։ Ես ուղղակի ճարահատյալ խոսում եմ։ Միայն մեր մարզում կարող է լինի, որ գիտությունների դոկտոր, պրոֆեսորին գլխավոր բժշկի պաշտոնից հանեն, տեղը ադիբուդի ծախողի դնեն…

Հյակական Ժամանակ

Հունվարի 18-ին ՌԴ նախագահ Վլադիմիր Պուտինի հետ Սերժ Սարգսյանի ունեցած հեռախոսազրույցի մասին պաշտոնական հաղորդագրությունը մի հետաքրքիր դրվագ է պարունակում. «Այսօր հեռախոսազրույց է տեղի ունեցել ՀՀ Նախագահ Սերժ Սարգսյանի և ՌԴ Նախագահ Վլադիմիր Պուտինի միջև: Ռուսաստանի Նախագահը ևս մեկ անգամ ցավակցություն է հայտնել Գյումրիում տեղի ունեցած ողբերգության զոհերի հարազատներին և ամբողջ հայ ժողովրդին»,- ասվում է այդ հաղորդագրության մեջ:

Եվս մեկ անգամ ցավակցություն է հայտնել Գյումրիում տեղի ունեցած ողբերգության զոհերի հարազատներին և ամբողջ հայ ժողովրդի՞ն:

Կարծում ենք, այս ձևակերպումը անակնկալ է հայաստանցիների համար, որովհետև դա նշանակում է, որ Ռուսաստանի Դաշնության նախագահը հունվարի 18-ից առաջ էլ է Գյումրիում տեղի ունեցած ողբերգության կապակցությամբ ցավակցություն հայտնել: Նման տեղեկատվություն, սակայն, հայ հանրությունը չունի: Մենք «քրքրեցինք» ողջ համացանցը և ոչ ռուսական, ոչ հայկական աղբյուրներում ոչինչ չգտանք այդ ցավակցության կապակցությամբ: Ի՞նչ է, ուրեմն, այդ ձևակերպումը նշանակում: Վարկածները մի քանիսը կարող են լինել, առաջին տարբերակը վրիպակն է նախագահականի լրատվական ծառայության կողմից: Բայց այս վարկածը կարելի է բացառել, որովհետև նույն ձևակերպումը տեղ է գտել նաև Ռուսաստանի նախագահի պաշտոնական կայքում:

Հաջորդ տարբերակն այն է, որ նման ձևակերոյմամբ փորձ է արվել շտկել բացթողումը, որ մինչև հունվարի 18-ը ՌԴ նախագահը ցավակցություն չի հայտնել Գյումրիի դեպքերի կապակցությամբ: Նման բան տեսականորեն հնարավոր է, բայց այդ դեպքում հարց է ծագում, ինչո՞ւ երկու երկրների նախագահական մամլո ծառայությունները այդ լուրը չեն հաղորդել: Կա, իհարկե, տարբերակ, որ նման խոսակցություն ընդհանրապես չի եղել, և տվյալ ձևակերպման խնդիրն ընդամենը ետին թվով ցավակցություն հայտնելն է եղել:

Բայց կա նաև ուրիշ տարբերակ՝ Սերժ Սարգսյանի և Վլադիմիր Պուտինի նախորդ հեռախոսային խոսակցության մասին չի հաղորդվել այն հույսով, թե Ավետիսյանների հուղարկավորության արարողությունը անաղմուկ կանցնի-կգնա, և այդ իրադարձության վրա «ավելորդ» ուշադրություն հրավիրելու անհրաժեշտություն չկա: Եթե այդպես է, նշանակում է այդ խոսակցությունը կարող էր տեղի ունեցած լինել սպանության հայտնի դառնալու օրը մինչև Պերմյակովին հայտնաբերելը: Եվ ա՛յս խոսակցության մեջ չի բացառվում քննարկվել, է նաև Պերմյակովի գործի ընդդատության հարցը: Չի բացառվում հենց այդ խոսակցության ժամանակ է որոշվել, որ նախաքննությունը վարելու է ռուսական կողմը և Սարգսյանն ու Պուտինը իրար մեջ որոշել են ամեն ինչ: Սրանից հետո Պերմյակովը անխոչընդոտ հայկական տարածքով տեղափոխվել է ռուսական ռազմաբազա, որից հետո արդեն տեղի են ունեցել հայտնի իրադարձությունները։

Սրանք, իհարկե, վարկածներ են, միայն վարկածներ: Բայց պաշտոնական հաղորդագրությունում պաշտոնապես ասվել է, որ Վլադիմիր Պուտինը հունվարի 18-ին ցավակցություն է հայտնել «ևս մեկ անգամ»։ Պատասխանի կարիք է զգում, ուրեմն, հետևյալ հարցը, որտե՞ղ, ի՞նչ հանգամանքներում, ի՞նչ տեքստով և ո՞ւմ միջոցով է ՌԴ նախագահը նախորդ անգամ ցավակցություն հայտնել: Ինչո՞ւ այդ ցավակցության մասին հանրությունը պատշաճ կարգով չի ծանուցվել: Եթե ցավակցությունը Վ. Պուտինը հայտնել է կրկին Սարգսյանի հետ հեռախոսային խոսակցության ժամանակ (հունվարի 18-ի պաշտոնական հաղորդագրության տեքստից դա կարծես թե ենթադրվում է), ինչո՞ւ այդ հեռախոսազրույցի մասին հաղորդագրություն չի տարածվել և ի՞նչ է քննարկվել ընդհանրապես այդ հեռախոսազրույցի ընթացքում: Սրանք հարցեր են, որոնց պատասխանը պետք է տա, թերևս, Սերժ Սարգսյանի մամուլի խոսնակը:

Հայկական Ժամանակ

Վերակառուցման և զարգացման եվրոպական բանկը նվազեցրել է Հայաստանի տնտեսական աճի վերաբերյալ իր կանխատեսումները: Ընթացիկ՝ 2015 թվականին մեր տնտեսությանը, ըստ Եվրոպական բանկի կանխատեսման, ունենալու 0 տոկոս աճ:

Սա այս պահին որևէ միջազգային ֆինանսական կառույցի արած վատթարագույն կանխատեսումն է Հայաստանի այս տարվա տնտեսական աճի վերաբերյալ: Ընդամենը երեք ամիս առաջ Եվրոբանկի կանխատեսումները բավականին լավատեսական էին՝ 3.5 տոկոս 2015 թվականի համար: Եվրոբանկի փորձագետները ՀՀ տնտեսության սպասվող զրոյական աճը ամբողջությամբ պայմանավորում են Ռուսաստանի տնտեսության խորացող ճգնաժամի ազդեցությամբ, որն էլ, իր հերթին, պայմանավորված է նավթի գների անկմամբ: ՌԴ տնտեսության վերաբերյալ Եվրոբանկի կանխատեսումները ավելի հոռետեսական են 4.8 տոկոս տնտեսական անկում այն դեպքում, երբ սեպտեմբերին կանխատեսվում էր 0.4 տոկոս աճ:

Հետսովետական տարածքում տնտեսական աճի կանխատեսումները բարձրացվել են միայն Վրաստանի և Ուզբեկստանի դեպքում: ՀՀ տնտեսական աճի կանխատեսման նման կտրուկ նվազում Եվրոբանկի փորձագետները տվել էին նաև 2013–ին իջեցնելով աճի կանխատեսումը 5 տոկոսից մինչև 2.5 տոկոս: Այդ կանխատեսումը իրականացավ մեկ տոկոսի շեղմամբ արձանագրվեց 3.5 տոկոս աճ: 2015 թվականի ՀՀ պետական բյուջեով այս տարի կառավարությունը կանխատեսում է 4.1 տոկոսի աճ:

Հայկական Ժամանակ

ՀՀ ամենաաղքատ մարզի մարզկենտրոնում՝ Գյումրիում, փոքր ու միջին խանութներում մարդիկ ունեն մեծ թվով պարտքեր՝ կուտակված հիմնականում սնունդ գնելու արդյունքում։ Խանութների մեծամասնությունը չի մերժում այդպիսի քաղաքացիներին, քանի որ, իրենց խոսքերով, ըմբռնումով են մոտենում։

Գյումրու Բուլվարային թաղամասում գտնվող քարե կրպակներից մեկը, որը շատ փոքր է ու վաճառում է հիմնականում սնունդ, 2 մլն դրամի «նիսյայով» ապրանք ունի տված։ Ինչպես մեր զրույցում պատմեց կրպակի սեփականատերը, իրենք ճանաչում են թաղի մարդկանց ու այդ պատճառով էլ տալիս են պարտքով։ Ըստ խանութպանի, մարդիկ պարտքերը փակում են, երբ ստանում են թոշակ, նպաստ, աշխատավարձ կամ փող խոպանից։ «Մարդիկ կան, որ թասիբով են, կբերեն ու կփակվեն փողը, մի քիչ էլ իրենց նեղություն կտան, որ հանկարծ շրջապատի մոտ վատ անուն չթողնեն։ Փառք Աստծո, էդ կողմից լենինականցիները շատ թասիբով են»,- նշեց խանութպանը։

«Անի թաղամասում գտնվող միջին մեծության խանութի աշխատակիցներից մեկը մեզ փոխանցեց, որ ունեն մոտ 1,5 մլն դրամի տված ապրանք։ Աշխատակցի խոսքով՝ եթե նախկինում պարտքերը կազմում էին 3 մլն դրամ, ապա հիմա միլիոն ու կես են, քանի որ շատերը գնացել են երկրից ու առևտուր չեն անում։ «Մեր թաղերից լիքը մարդ գնացել է Ռուսաստան աշխատելու. Իրենց մեջ մարդիկ կային, որ լրիվ պարտքերը փակեցին ու գնացին»,- ասում է խանութի աշխատակիցը:

Հայկական Ժամանակ

Լավատեղյակ աղբյուրներից հայտնի է դարձել, որ Հայաստանի և Ռուսաստանի քննչական մարմիններն առաջիկա օրերին պատրաստվամ են Գյումրիի սպանդի կասկածյալ Վալերի Պերմյակովի մասնակցությամբ քննչկան փորձարարություն իրականացել:

Կասկածյալը, ըստ այդմ, պետք է բերվի դեպքի վայր Գյումրիի Մյասնիկյան 188 հասցեում գտնվող Ավետիսյանների տուն, և ներկայացնի դեպքի մանրամասները ինչպես է մուտք գործել, ինչպես է սպանել, և այլն: Իրավապահները, սակայն, մտադիր են այս գործողությունն իրականացնել խիստ գաղտնիության պայմաններում և անվտանգության հատուկ միջոցառումներ ձեռնարկել, որովհետև մտավախություն ունեն, թե գյումրեցիները կհարձակվեն և ինքնադատաստանի կենթարկեն կասկածյալին:

Հայկական Ժամանակ

Չնայած Գյումրիի սպանդի հիմնական կասկածյալ Վալերի Պերմյակովի ռուսական 102-րդ ռազմաբազայի տարածքում գտնվելը էականը խոչընդոտներ է ստեղծում նախաքննության համար, հայաստանյան քննչական մարմինները ունեն բավարար նյութեր մի քանի առանցքային հարցերի պատասխանելու համար: Հիմնական հարցերից մեկը, որ հենց սպանության առաջին օրից շրջանառվում է հանրության շրջանում, հետևյալն է. արդյո՞ք Պերմյակովը միայնակ է գործել, այսինքն մենա՞կ է սպանել Ավետիսյանների ընտանիքի վեց անդամներին:

Հայաստանի իրավապահ մարմինները ձեռքի տակ բավարար նյութեր ունեն այս ուղղությամբ առաջ շարժվելու համար: Նրանք դեպքի վայրում հայտնաբերել և առգրավվել են սպանության ենթադրյալ գործիքը Կալաշնիկովի ավտոմատը, որն ըստ ամենայնի պատկանում է Պերմյակովին: Եվ ուրեմն, դատաձգաբանական փորձաքննությունը կարող է պատասխանել մի շատ կարևոր հարցի. Ավետիսյանների ընտանիքի բոլոր անդամները սպանվել են այդ նո՞ւյն ավտոմատից, թե ոչ: Եթե այո, դա կդառնա ևս մեկ հիմնավորում այն բանի, որ մարդասպանը միայնակ է գործել, եթե ոչ սա արդեն 180 աստիճանով կփոխի քննության տրամաբանությունը և կնշանակի, որ Պերմյակովի հետ եղել են այլ մարդիկ նույնպես: Նախօրեին Քննչական կոմիտեի տարածած հաղորդագրության մեջ ասվում է, որ այլոց շարքում նշանակվել է դատաձգաբանական համալիր փորձաքննություն: Սա նշանակում է, որ առաջիկայում մենք կունենանք այդ շատ կարևոր հարցի պատասխանը, բոլորը սպանվել են նո՞ւյն զենքից, թե տարբեր:

Շաբաթ օրը Քննչական կոմիտեի տարածած հաղորդագրության մեջ ևս մեկ հետաքրքիր դրվագ կա. այնտեղ ասվում է, որ նախաքննության մարմինը բջջային օպերատորներից պահանջել է Ավետիսյանների ընտանիքի անդամների ելքային և մուտքային զանգերը, որովհետև տվյալներ կան, որ հանցագործությունից հետո Պերմյակովը կարող է օգտագործած լինել նրանց հեռախոսները: Ուսումնասիրվում են նաև Ավետիսյանների տան մերձակա փողոցներում տեսանկարահանող սարքերի առկայությունը և այլն: Այս ամենը նշում ենք ընդգծելու համար, որ Պերմյակովի բացակայությունը, չնայած մեծ խոչընդոտ է հայաստանյան իրավապահների համար, բայց քննչական աշխատանք իրականացնելու հսկայական դաշտ կա, և այս ուղղությունները կարող են բազմաթիվ կարևոր հարցերի պատասխաններ տալ: Այս ամենը, սակայն, չի նսեմացնում Պերմյակովին Հայաստանի իրավապահ մարմիններին հանձնելու հարցի հրատապությունը:

Հայկական Ժամանակ

Երեկ երեկոյան՝ 21:30-ի սահմաններում, Գյումրիում ՌԴ հյուպատոսարանի մոտ էր ոստիկանապետ Վլադիմիր Գասպարյանը: Նա ակտիվ ցուցումներ էր տալիս տարածքը հսկող ոստիկաններին: Ոստիկանապետը պատասխանեց  «ՀԺ»-ի, «Սիվիլնեթի» և «Նյուսլայնի» հարցերին.

Պարոն Գասպարյան, քիչ առաջ ոստիկանական նոր ուժեր են բերվելԳյումրի: Ինչի՞ հետ է կապված այդ ամենը, ինչու են բերվել:

Ոչ մի զորքեր էլ չեն գալիս, նորմալ ծառայություն ենք ուզում ապահովել Գյումրիում, ու ոչ մի կասկած չունեմ, որ ժողովուրդը… հասկացող ու զգոն է ժողովուրդը, այնպես որ՝ պետք չէ աժիոտաժ ստեղծել, դա մեր ծառայությունն է, մի քիչ ուժեղացված ծառայություն է լինելու:

Կա տեղեկատվություն, որ ռուսները խուճապի մեջ են և առհասարակդուրս չեն գալիս բազայից:

Չկա այդպիսի բան, չկա: Եթե դուք դրանից հաճույք եք ստանում, ես դրանից հաճույք չեմ ստանում:

Ռուսական կողմի հետ բանակցություններում ի՞նչ եք քննարկել:
Զգոնության և ուշադրության կոչ եմ անում, որ ուշադիր լինեն, զինվորականների հետ պատշաճ աշխատանք տանեն, որպեսզի զինվորականները քաղաքում չափ ու ձևի մեջ լինեն:

Եթե դուք անձամբ եք եկել այստեղ, դա չի՞ նշանակում, որ Գյումրիումինչ-որ վտանգ կա:

Ինչու, որ ես Երևանում եմ, ուրեմն Երևանում վտա՞նգ կա: Ես հրամանատար եմ, ես անձնակազմի հետ պետք է լինեմ:

Երեխայի հուղարկավորությունն է լինելու, ու վտանգ կա, որհանրահավաքներ պիտի լինեն…

Թող առաջինը քարը նետի էն մարդը մյուսի ուղղությամբ, եթե ինձանից շատ է ցավում: Ես մանուկի մահը չեմ կարող տանել, էդքան խիզախ չեմ:

Ձեր կարծիքով՝ ո՞վ պետք է այդ գործը քննի:

Դա իմ կարծիքը լինել չի կարող, կա օրենք, ու դա ոստիկանության դիրքորոշումը չի: ՌԴ քննչական կոմիտեի ղեկավարն է եկել, ու մեր քննչական ղեկավարի հետ աշխատում են, վաղը հայտարարություն կանեն:

Դուք ինչպե՞ս կպատժեիք Պերմյակովին:

Ես՝ պատժե՞լ: Ես նույնիսկ չգիտեմ, հաստատ չէի սպանի

Վստահ ե՞ք, որ Պերմյակովը մենակ է եղել:

Ես երբեք ոչնչի վրա վստահ չեմ լինում մեր մեջ ասած: Մենք մեր օպերատիվ գործողություններն ենք իրականացրել:

Պերմյակովը քաղաքի մի ծայրից, զենքով քայլելով,հասել է մյուսծայրը: Ինչպե՞ս է հասել, պարեկային ծառայություն չի՞ եղել:

Դուք գիտե՞ք ժամը քանիսին է եղել, գիտե՞ք ինչ կա, երբ ես զենքը ձեռքիս գնում եմ, ես շատ ուշադիր եմ լինում, որ գոնե մի հոգու չտեսնեմ այդ ժամին, և ես կանցնեմ բակերով, մեքենա տեսնելուց կզգուշանամ:

Մարդկանց զայրույթը՝ թեկուզ քար նետելը արդա՞ր եք համարում:

Երբեք: Բորբոքված էին, թող գնային եկեղեցի մոմ վառեին, աղոթեին, խաղաղվեին: Թող հասկանային, որ իրենց առաջ կանգնած է իրենցից շատ ավելի հայ, որը պատրաստ է իր քաղաքացու համար զոհվել:

Անդրադառնալով այն հարցին, որ ակտիվիստ Վիլեն Գաբրիելյանը իր ծեծի մեջ մեղադրում է ոստիկանապետին՝ Գասպարյանը նշեց. «Եթե իմ մեջ չար լինի, ես այնքան հնարավորություններ ունեմ, ես նմա՞ն եմ պրիմիտիվ մարդու: Տխմարություն ու տգիտություն է, այլանդակություն է ուղղակի, գարշելի է»։

Հայկական Ժամանակ

Լավատեղյակ աղբյուրներից հայտնի դարձավ, որ ՀՀ գլխավոր դատախազ Գևորգ Կոստանյանը դիմել է ՌԴ գլխ. դատախազ Յուրի Չայկային, որպեսզի Հայաստանի քննչական կոմիտեի քննիչներին հնարավորություն տրվի հարցաքննել Վալերի Պերմյակովին:

Երեկվա դրությամբ Հայաստանի քննչական մարմինների ներկայացուցիչները Պերմյակովին հարցաքննելու, նրան տեսնելու հնարավորություն չեն ունեցել: Նշենք, որ հունվարի 12-ի սպանդի գործի քննությունը վարում է ՀՀ քննչական կոմիտեի ՀԿԳ քննության գլխավոր վարչությունը: Ձևավորվել է քննչական խումբ, որում ընդգրկվել են ՀԿԳ քննության գլխավոր վարչության և Շիրակի մարզային քննչական վարչության քննիչները: Քննչական խումբը ղեկավարում է ՀԿԳ գլխավոր վարչության ՀԿԳ քննիչ Գևորգ Աղաբաբյանը՞

Հայկական Ժամանակ