Արարատի մարզպետ Ռուբիկ Աբրահամյանի ընտանիքի անդամները երջանիկ աստղի տակ են ծնվել: Մարզպետի կինը և երկու զավակները նախորդ տարի նվիրատվության կարգով գումար են ստացել և աշխատավարձի հետ կապ չունեցող եկամուտներ գրանցել:

Մարզպետի կնոջ՝ Նաիրա Ներսիսյանի միջոցները 2014-ին աճել են 12 միլիոնից հասնելով 15 մլն դրամի, 18 հազար ԱՄՆ դոլարից 21 հազարի, և 8000 եվրոյից 16 հազարի: Մարզպետի որդիներից Էմինը 10 մլն դրամ նվեր է ստացել, իսկ Գոռը 11 հազար դոլար նույնպես նվեր, ինչպես նաև 4 մլն դրամ՝ ձեռնարկատիրական գործունեությունից: Ինքը մարզպետը, 2014-ին ստացել է միայն հալալ քրտինքով վաստակած եկամուտ ընդամենը 3,3 մլն դրամ աշխատավարձ:

Հարց է ծագում, եթե առանց որևէ աշխատանք ունենալու հնարավոր է նման նվերներ ու եկամուտներ ստանալ, Աբրահամյանի ինչի՞ն է պետք մարզպետի խեղճուկրակ պաշտոնը:

Հայկական Ժամանակ

«Հայաստանի էլեկտրական ցանցեր» ընկերությունը, Հանրային ծառայությունները կարգավորող հանձնաժողովին ներկայացրած հայտի համաձայն, մտադիր է 1 կվտ/ժամ էլէներգիայի մատակարարման մարժան բարձրացնել ավելի քան 65 տոկոսով:

Այսինքն եթե ներկայումս մեկ կվտ/ժամ էլէներգիան ՀԷՑ-ը արտադրողից սպառողին հասցնելու համար ստանում է 12.46 դրամ եկամուտ, ապա մտադիր է այդ գումարը հասցնել 20.66 դրամի: Սա հենց մարժան է, որը ոչ մի կապ չունի էլէներգիայի արտադրության գների հետ: Անկախ նրանից, թե ՀԷՑ-ը արտադրողներից ինչ գնով կգնի մեկ կվտ/ժամը, սպառողին վաճառելու է դրանից 20.66 դրամ վերադիրով: Սա խոսում է այս ընկերության ունեցած չափազանց մեծ ախորժակի մասին:

Սրա շնորհիվ ՀԷՑ-ը նախատեսում է սակագնի բարձրացումից հետո ստանալ տարեկան մոտ 15 միլիարդ դրամի շահույթ: Եվ դա այն դեպքում, երբ հենց իր ներկայացրած փաստաթղթերով մտադիր է մեծացնել կորուստները՝ նախատեսված 11.2 տոկոսից հասցնելով 12.4 տոկոսի: Նկատենք, որ 2014թ. նոյեմբերին էներգետիկայի նախարարությունում տեղի ունեցած խորհրդակցության ժամանակ նախարար Երվանդ Զախարյանը հայտարարել է, որ կորուստների 1 տոկոսի իջեցումը հանգեցնում է 5.1 միլիարդ դրամի հավելյալ եկամուտի:

Հայկական Ժամանակ

Մայիսի 2-ին Սուրիկ Խաչատրյանի որդու՝ Տիգրան Խաչատրյանի մասնակցությամբ տեղի ունեցած ծեծկռտուքից տուժած Հարություն Զաքարյանի աչքը երեկ հեռացրել են: Այս մասին երեկ ՀԺ-ի լրագրողին հայտնել է տղայի մայրը՝ Անահիտ Գալստյանը: Հարություն Զաքարյանը, մի քանի օր Մալայանի անվան ակնաբուժական կենտրոնում բուժում ստանալուց հետո, հոր հետ մեկնել էր Մոսկվա հույսով, որ այնտեղ կկարողանան վերականգնել աչքի տեսողությունը:

Ի դեպ, շաբաթ օրը մայիսի 16-ին, Տիգրան Խաչատրյանը «ինքնակամ» ներկայացել է իրավապահներին, հարցաքննվել և շուտով ազատ արձակվել պահպանելով իր վկայի կարգավիճակը:

Հայկական Ժամանակ

Հայաստանի տարբեր մարզերից ահազանգեր են ստացվում, որ կաթ մթերող ընկերությունները նվազեցրել են գյուղացիներից գնվող կաթի գները: Ըստ ստացված ահազանգերի, մեկ լիտր կաթի գնման գինը նվազել է միջինը 10-20 դրամով:

Մեզ հետ ունեցած հեռախոսազրույցներում մի քանի գյուղապետեր, մասնավորապես՝ Գեղարքունիքի մարզից, հաստատեցին տեղեկությունը, սակայն դժվարացան բացատրել պատճառները: Բերդկունքի գյուղապետ Բաբկեն Դադիկյանը մեզ վարկած ներկայացրեց, թե դա կարող է պայմանավորված լինել կաթի արտադրության սեզոնային աճով: Թե ո՞րն է կաթի մթերման գնի նվազման իրական պատճառը և ինչո՞ւ են բոլոր մթերողները միաժամանակ նվազեցրել գինը կփորձենք պարզել առաջիկայում: Միայն նշենք, որ կաթնամթերքի գինը ՀՀ-ում, ըստ պաշտոնական վիճակագրության, անցած տարվա համեմատ աճել է ավելի քան 10 տոկոսով:

Հայկական Ժամանակ

Երեկ ՀՀ ֆոնդային բորսայում մեկ դոլարի փակման գինը կազմել է 483 դրամ 75 լումա: Ուղիղ մեկ ամիս առաջ դոլարի բորսայական գինը կազմում էր 473 դրամ: Այս մեկ ամսվա ընթացքում դրամը արժեզրկվել է ավելի քան 2 տոկոսով: Լավատեսական սպասումների համաձայն, դրամի արժեզրկումը կդադարի զբոսաշրջային սեզոնի սկսվելուց՝ հունիսի կեսերից սկսած:

Հայկական Ժամանակ

Երեկ ՀՀ քննչական կոմիտեն պաշտոնապես հայտարարել է որ Սյունիքի մարզպետ Սուրիկ Խաչատրյանի որդին՝ Տիգրան Խաչատրյանը, ում հայտնի ծեծկռտուքի գործով որպես վկա բերման ենթարկելու որոշում էր կայացվել հեռացել է հանրապետությունից:

«ՀՀ ոստիկանությունից ստացվել է գրավոր պատասխան, որ այն անձինք, որոնց հարկադիր բերման ենթարկելու մասին որոշում է կայացվել քննիչի կողմից, չեն կարող ներկայացվել վարույթն իրականացնող մարմնին, քանի որ մայիսի 8-ից բացակայում են հանրապետությունից…»,- նշված է Քննչական կոմիտեի տարածած հաղորդագրության մեջ: Ընդամենը նշենք, որ խնդրո առարկա ծեծկռտուքը, որի ընթացքում մարմնական ծանր վնասվածքներ են ստացել երկու երիտասարդներ, տեղի է ունեցել մայիսի 2-ին:

Հենց հաջորդ օրը բագմաթիվ ԶԼՄ-ներում տեղեկություն է հրապարակվել, որ նշված ծեծկռտուքի հիմնական մասնակիցներից մեկը եղել է հենց վկայի որդին՝ Տիգրան Խաչատրյանը: Սակայն մեր իրավապահները Տիգրան Խաչատրյանին սկսել են փնտրել միայն 10 օր անց։ Նրան բերման ենթարկելու որոշումը կայացվել է մայիսի 12-ին:

Ակնհայտ է, որ իրավապահների նման դանդաղկոտության նպատակը եղել է այդ անձին Հայաստանից Ճողոպրելու հնարավորություն տալը, ինչից էլ վերջինս, բնականաբար, օգտվել է։

Հայկական Ժամանակ

Մեր տեղեկություններով, ԲՀԿ նախկին նախագահ Գագիկ Ծառուկյանը Սերժ Սարգսյանին խոստացել է, որ բոլոր ջանքերը կներդնի և կաջակցի իշխանություններին՝ սահմանադրական հանրաքվեն Կոտայքի մարզում բարեհաջող անցկացնելու համար:

Հենց սրա դիմաց էլ Ծառուկյանի փեսան՝ Աբովյանի նախկին քաղաքապետ Կարապետ Գուլոյանը նշանակվել է Կոտայքի մարզպետ: Սույն պայմանավորվածության շրջանակներում էլ երեկ ՀՀԿ շարքերից հեռացվել է Աբովյանի քաղաքապետի թեկնածու Արթուր Հարությունյանը՝ Պալաչը, ով ՀՀԿ-ԲՀԿ լարվածության շրջանում մարզում մեծապես աջակցել է ՀՀԿ-ին:

Հայկական Ժամանակ

Դիվանագիտական մեր աղբյուրները հայտնում են, որ Սերժ Սարգսյանը մայիսի 21-22-ին կմասնակցի Ռիգայի ԵՄ–Արևելյան գործընկերության գագաթաժողովին, որի ժամանակ փաստաթուղթ է ստորագրվելու ՀՀ-ԵՄ բանակցությունները վերսկսելու մասին:

Տեղեկության պաշտոնական հաստատումը, սակայն, դեռ չկա: Ս.Սարգսյանի մամուլի խոսնակը մեր հեռախոսազանգերին չէր պատասխանում: Հիշեցնենք, օրեր առաջ ՀՀ փոխարտգործնախարար Շավարշ Քոչարյանը հայտարարել էր, որ եթե Ս.Սարգսյանի աշխատանքային գրաֆիկը թույլ տա, նա կգնա Ռիգա: Ամեն դեպքում, հրավեր Ս.Սարգսյանին ուղարկվել է: Մեր աղբյուրները հայտնում են նաև, որ գագաթաժողովից հետո՝ մայիսի 25–ին, Լատվիայի խորհրդարանում ԱԼԳ կոմպոնենտ երկրների ներկայացուցիչների հետ քննարկվելու են գագաթաժողովի արդյունքները: Սույն քննարկումներին հայ խորհրդարանականներ էլ են մասնակցելու:

Հայկական Ժամանակ

Ըստ լավատեղյակ աղբյուրներից տեղեկացել է, որ այսօր առավոտյան ոստիկանների օպերատիվ խումբ է մեկնելու Սյունիքի մարզպետ Սուրիկ Խաչատրյանենց տուն՝ վերջինիս որդուն բերման ենթարկելու: Նման հանձնարարական տվել է դատախազը:

Նույն աղբյուրները կարծում են նաև, որ մեծ հավանականությամբ մարզպետի որդին Տիգրան Խաչատրյանը, տանը չի լինելու, և ոստիկանները կվերադառնան ձեռնունայն: Սոցիալական ցանցերում արդեն իսկ լուրեր կան, թե նա հեռացել է Հայաստանից: Այս լուրը հաստատող փաստեր, սակայն, դեռևս չկան:

Հայկական Ժամանակ

Սպասվում է, որ առաջիկա շաբաթներին Երևանի կրկեսի մոտ կառուցված բարձրահարկ շենքի տանիքին կհայտնվի աշխարհահռչակ «Հիլթոն» ապրանքանշանը և այսպիսով՝ Երևանում պաշտոնապես կբացվի «Հիլթոն» 5 աստղանի հյուրանոցը:

Մեր աղբյուրների վկայությամբ, ներկայումս «Հիլթոնը» աշխատակիցների հավաքագրման ակտիվ գործընթաց է սկսել: Նախատեսվում էր, որ հյուրանոցը կբացվի ապրիլի 24-ից առաջ, բայց շինարարությունը ինչ-ինչ պատճառներով հետաձգվեց, և ապրիլի 24-ին պատրաստ էին միայն առաջին մի քանի հարկերը: Նշենք, որ հյուրանոցային համաշխարհային թոփ բրենդներից այս պահին Երևանում գործում է միայն «Մարիոթը»: «Հիլթոնի» մուտքը էականորեն կփոխի Հայաստանի հյուրանոցային շուկան, եթե, իհարկե, նրա մուտքը նույնպես «Քարֆուրի» նման անընդհատ չձգձգվի:

Հայկական Ժամանակ