Գործարար Արա Կարապետյանը «Երևան-Կենտրոն»-ից երեկ, հունիսի 3-ին տեղափոխվել է «Նուբարաշեն» ՔԿՀ: Նա 15 տարվա ազատազրկման է դատապարտվել Արմեն Ավետիսյանի տան վրա ավազակային հարձակում կազմակերպելու մեղադրանքով: Կարապետյանի տեղափոխումից հետո գործարարի հարազատները մտահոգված են նրա անվտանգության համար:

Մայիսի 24-ին` վերջին դատական նիստից հետո, Կարապետյանը հայտարարել էր, որ պատրաստվում է լրագրողներին փաստեր ներկայացնել որոշ օլիգարխների իրական կերպարի վերաբերյալ: ՀՀ ՔՎ մամուլի խոսնակ Արսեն Բաբայանը թերթի թղթակցի հետ զրույցում բացառել է, որ «Նուբարաշեն» ՔԿՀ-ում գործարարի անվտանգության հետ կապված խնդիրներ կարող են լինել: «Իսկ եթե Կարապետյանի հարազատները կոնկրետ տեղեկություններ և տվյալներ ունեն, ապա կարող են դիմել քրեակատարողական վարչություն, և մենք համապատասխան միջոցներ կձեռնարկենք»,- ասել է Բաբայանը:

Ո՞վ է իշխանությունից երկխոսելու ընդդիմության հետ

Երեկ երեկոյան Իտալիայից վերադառնալուց հետո Սերժ Սարգսյանը ՀՀԿ գրասենյակում աշխատւանքային հանդիպում է ունեցել ՀՀԿ ղեկավար կազմի հետ, գրում է «Հայկական ժամանակ» օրաթերթը.

«Երեկ առավոտվանից տեղեկություններ կային, որ նիստի ընթացքում պետք է քննարկվի ընդդիմության հետ երկխոսության իշխանական պատվիրակության կազմը: ՀՀԿ մամուլի խոսնակ Էդուարդ Շարմազանովը, սակայն, մեզ փոխանցեց, թե այդ հարցը նիստի ընթացքում չի քննարկվել: Այնինչ, մեզ հայտնի դարձավ, որ իշխանության մեջ արդեն քննարկվում է Կոնգրեսի հետ երկխոսության պատվիրակության հետևյալ կազմը՝ Սերժ Սարգսյանի աշխատակազմի ղեկավար Կարեն Կարապետյան, ԱԽՔ Արթուր Բաղդասարյան, Հանրային խորհրդի նախագահ Վազգեն Մանուկյան, Սերժ Սարգսյանի աշխատակազմի ղեկավարի տեղակալ, փեսա Միքայել Մինասյան, Հայաստանի քրիստոնյա-դեմոկրատների միության նախագահ Խոսրով Հարությունյան: Երեկ Վազգեն Մանուկյանին հարցրինք՝ եթե իրեն առաջարկվի դառնալ ընդդիմության հետ երկխոսության իշխանական պատվիրակության անդամ, կհամաձայնվի՞, թե՞ ոչ: «Բայց ես ի՞նչ կապ ունեմ: Դուք անիմաստ հարց եք տալիս: Այդպիսի բան լինել չի կարող», – պատասխանեց Մանուկյանը: Նույն հարցը ուղղեցինք Խոսրով Հարությունյանին: «Հարցը շատ անսպասելի է ինձ համար: Կարծում եմ, դա շատ պատասխանատու միսիա կլինի որևէ մեկի համար թե’ մի կողմից, թե’ մյուս կողմից: Այնպես որ, մտածելու տեղիք կա», պատասխանեց Խոսրով Հարությունյանը: Թե երբ պաշտոնապես կհայտարարվի իշխանական պատվիրակության կազմը՝ դեռ հստակ չէ»:

ՀՀ կառավարության երեկվա նիստը Ռ. Քոչարյանի և ՀՅԴ-ի համար ոչ նպաստավոր ընթացք ունեցավ, գրում է «ՀԺ»-ն՝ հավելելով, որ աշխատանքի և սոցիալական հարցերի նախարար Արթուր Գրիգորյանը ներկայացրել է իրենց նախարարության կողմից 2005-2007 թթ. վարկային միջոցների ծախսման արդյունավետությունը ուսումնասիրելու նպատակով կատարված ծառայողական  քննության արդյունքները: Ըստ Գրիգորյանի տվյալների` 3 տարիների ընթացքում վարկային միջոցներից անիմաստ` այդպես էլ պետք չեկած օրենքների և իրավական ակտերի նախագծեր մշակելու, խորհրդատվական ծառայություններ ձեռք բերելու նպատակով ծախսվել է ավելի քան 300 հազար դոլար  վարկային միջոցներ: Կառավարության նիստից հետո հրավիրված ասուլիսում Գրիգորյանը չի կարողացել պատասխանել «ՀԺ»-ի թղթակցի այն հարցին, թե ովքեր են պատասխանատու վարկային միջոցների վատնման  համար, և ում գրպանն են մտել այդ գումարները: Թերթը հիշեցնում է, որ այդ տարիների աշխատանքի և սոցիալական հարցերի նախարարությունը ղեկավարել է դաշնակցական Աղվան Վարդանյանը:

Երեկ գիշեր` ժամը 4.35-ի սահմաններում «Լինսի» հիմնադրամի բարձրաստիճան պաշտոնյաներից մեկին պատկանող Երևանի Ավան թաղամասի Աճառյան փողոցում գտնվող տներից մեկի վրա ավազակային հարձակում է տեղի ունեցել, գրում է «ՀԺ»-ն: Տան պարսպի վրայով ներս ցատկելով տան բակ, 5 դիմակավորված անձինք բացել են զուգարանի պատուհանը, այնտեղից մուտք գործել տուն, պարանով կապել այդ պահին տանը եղած 4 մարդկանց և զենքի գործադրմամբ պահանջել տանը պահվող գումարն ու ոսկեղենը: Պարզելով, որ դրանք պահվում են չհրկիզվող պահարանում, ավազակները հենց այդ պահարանը տեղափոխել են տանտերերին պատկանող Nissan Patrol մեքենայի բեռնախցիկը և նույն մեքենայով հեռացել: Առավոտյան ժամը 9.40-ի սահմաններում նշված ավտոմեքենան հայտնաբերվել է Շենգավիթում: Ոստիկանությունում հաստատել են թերթի այս տեղեկությունները` հայտնելով, որ հարձակման ենթարկվածներից երկուսը մարմնական վնասվածքներով տեղափոխվել են «Սուրբ Գրիգոր Լուսավորիչ» բժշկական կենտրոն:

Հրաժարվել է պետի պաշտոնից

Ըստ թերթի տեղեկությունների, ՀՀ ֆինանսների նախարարության  ֆինանսական վերահսկողության  տեսչության պետ Սոնա Դարբինյանը  հրաժարվել է  ՀՀ կառավարությանն առընթեր  պետգույքի կառավարման  վարչության պետի թափուր պաշտոնը զբաղեցնելու  առաջարկությունից: Այդ պաշտոնը նրան առաջարկվել էր  այլևս նախկին պետ Կարինե Կիրակոսյանի «սեփական դիմումից» հետո:

Հայաստանում վաճառվող սուրճի մանրածախ գինը մոտ 20 տոկոսով թանկացել է, տեղեկացնում է «ՀԺ»-ն և հավելում՝ չնայած գները 10 օր առաջ են սկսել բարձրանալ, բայց խանութներում նոր է արտահայտվում։ 100 գրամ սուրճի միջինը թանկացել է 50-60 դրամով։

Ներկրողների խոսքով, արդեն մոտ մեկ ամիս է միջազգային շուկայում սուրճի գինը պարբերաբար բարձրանում է։ Գների բարձրացման պատճառներն առայժմ հայտնի չեն, և երաշխիք չկա, որ չի շարունակվի բարձրանալ։ Սուրճ արտադրող երկրներում բերքահավաքը նոր է սկսվել։ Արդեն իսկ հայտնի է, որ միջին և փոքր չափի տեսակի սուրճերի բերքի հետ կապված որևէ խնդիր չկա, և դրանց ծավալներն անցած տարվան չեն զիջում, բայց, միևնույն է, գները բարձրանում են։ Հայաստան սուրճ ներկրող ընկերություններն արդեն սպառել են էժան ներկրած խմբաքանակների պաշարները և այժմ սկսել են վաճառել նոր գներով ներկրած ապրանքը, գրում է թերթը։

Սայաթին նոր գործ են տվել

ՀՀ ոստիկանության հասարակայնության հետ կապերի և լրատվության վարչության պետ Սայաթ Շիրինյանին, որը մեկ տարի առաջ ազատվել էր իր պաշտոնից և մնացել ոստիկանության կադրերի տրամադրության տակ, նոր աշխատանք են տվել, գրում է «ՀԺ»-ն և հիշեցնում, որ Շիրինյանը հանրությանն առավել լավ հայտնի է մարտի 1-ի իրադարձություններից հետո իր արած հայտարարություններով: Մարտի 1-ի վերաբերյալ սուտ տեղեկությունների մի զգալի մասը, որոնք հետագայում հերքվել են, հրապարակվել են հենց նրա շուրթերով: Շիրինյանն արդեն մոտ մեկ ամիս է աշխատում է Սերժ Սարգսյանի աշխատակազմին կից ստեղծված հանրային կապերի և տեղեկատվության կենտրոնում՝ որպես փորձագետ: Այս տեղեկությունը թերթի թղթակցի հետ զրույցում հաստատել է նաև նշված կենտրոնի տնօրեն Արա Սաղաթելյանը:

Կարինեին կփոխարինի Սոնա՞ն

Թերթի տեղեկություններով, անցած շաբաթ «իր դիմումի համաձայն» պաշտոնանկ արված Պետական գույքի կառավարման  վարչության պետ Կարինե Կիրակոսյանին այդ պաշտոնում փոխարինելու է ներկայումս ֆինանսների նախարարության ֆինանսական վերահսկողության տեսչության պետ Սոնա  Դարբինյանը: Ըստ թերթի աղբյուրների, ՊԳԿ  վարչության պետի  պարտականությունները ներկայումս ոչ ոք չի կատարում` նշանակված չէ ժամանակավոր պաշտոնակատար, և  տեղակալներից ոչ մեկին չի տրվել համապատասխան  լիազորություն:

Մեր թերթի  տեղեկություններով, վերջին երկու ամիսներին խիստ լարվել են դատական համակարգի ղեկավարության և ՀՀ գլխավոր դատախազ Աղվան Հովսեփյանի հարաբերությունները: Դատավորները փորձում են հասնել Հավսեփյանի պաշտոնանկությանը: «Միայն ընթացիկ շաբաթում, որպես Հովսեփյանի բողոքի «ակցիա» դատավորները 2 մեղադրական եզրակացություն են «մերժել»:

Մի դեպքում Շենգավիթի վարչական շրջանի ընդհանուր իրավասության դատարանն է արդարացման դատավճիռ կայացրել, իսկ վերաքննիչ քրեական դատարանն էլ մեկ այլ գործով մեղադրական դատավճիռը բեկանել և ուղարկել է նոր քննության: Մեր տեղեկություններով, դատավորների կողմից Հովսեփյանի դեմ սկսված արշավի թիկունքում կանգնած է գլխավոր դատախազի տեղակալ Գևորգ Կոստանյանը, որը սակայն, աշխատում է մնալ աննկատ, ձևացնելով, թե ինքը ոչ մի առնչություն չունի այդ ամենի հետ, պարզապես Հովսեփյանն այլևս ի վիճակի չէ վերահսկել դատավորներին:

Ֆրանսիայի Դովիլ քաղաքում երեկ տեղի ունեցած Մեծ ութնյակի գագաթնաժողովում ԵԱՀԿ Մինսկի խմբի համանախագահող երկրների նախագահները` Դմիտրի Մեդվեդևը, Բարաք Օբաման և Նիկոլա Սարկոզին, ղարաբաղյան հակամարտության կարգավորման  վերաբերյալ  համատեղ հայտարարություն են տարածել: Ըստ թերթի՝ հայտարարության մեջ մասնավորապես ասված է. «Մենք ԵԱՀԿ Մինսկի խմբում համանախագահող երկրների` Ռուսաստանի ԱՄՆ-ի և Ֆրանսիայի նախագահներս, համոզված ենք` ժամանակն է, որ ղարաբաղյան հակամարտության բոլոր կողմերը վճռական քայլ կատարեն խաղաղ կարգավորման ուղղությամբ: Մենք վերահաստատում ենք, որ միայն բանակցությունների միջոցով կարգավորումը կարող է տանել խաղաղության, կայունության և հաշտության` հնարավորություններ բացելով տարածաշրջանային զարգացման ու համագործակցության համար: Ուժի կիրառումը հանգեցրել է առճակատման ու անկայունության ներկայիս վիճակին: Դրա կրկնակի կիրառումը միայն նոր տառապանքների ու ավերածությունների կհանգեցնի և կդատապարտվի միջազգային հանրության կողմից: Մենք կողմերի առաջնորդներին համառորեն կոչ ենք անում ազգաբնակչությանը նախապատրաստել խաղաղության, այլ ոչ թե պատերազմի: Կողմերի, ինչպես նաև համանախագահող երկրների` բոլոր մակարդակներով ձեռնարկված ջանքերի արդյունքում ձեռք է բերվել նշանակալի առաջընթաց»…

«ՀԺ»-ի թղթակիցը մարտի 1-ի դեպքերը քննելու նպատակով ՀՀ հատուկ քննչական ծառայությունում ստեղծված քննչական խմբի ղեկավար Վահագն Հարությունյանից հետաքրքրվել է, թե նա որպես քննիչ բացառո՞ւմ է, որ իրեն մի օր մեղադրանք առաջադրեն: Ասենք, իր ղեկավարած քննչական խմբի իրականացրած նախաքննության նյութերը դիտարկելիս բացառո՞ւմ է արդյոք, որ մի օր դրանց հիման վրա կարող են իրեն մեղադրանք առաջադրել: Ի վերջո, կարող է լինել այնպես, ինչպես ՀՀ ոստիկանության քրեական հետախուզության գլխավոր վարչության նախկին պետ Հովհաննես Թամամյանի դեպքում, որը մեղադրվում է քրեական գործի նյութեր կեղծելու համար:

Վահագն Հարությունյանն այս պատասխանն է տվել թերթի թղթակցին. «Թամամյանին մեղադրանք առաջադրելու հետ, նախ, կարծում եմ, որ չարժի զուգահեռ տանել: Երկրորդ` գոյություն ունի անմեղության կանխավարկածի սկզբունքը: Եթե նույն հարցը ձեզ կամ ձեր մտերիմի վերաբերյալ լիներ, դուք անպայման անմեղության կանխավարկածը մեջ կբերեիք և երկու հատ էլ լավ հոդված կտպեիք ձեր թերթում»: Այսինքն, գրում է թերթը, Հարությունյանը չի բացառել իր` Թամամյանի պես մեղադրյալի աթոռին մի օր հայտնվելու տարբերակը:

«Հայոց արծիվներ» հասարակական կազմակերպության Արմավիրի մարզային կառույցի ղեկավար Դավիթ Կիրակոսյանը երկու շաբաթ առաջ կալանավորվել է մաքսանենգ ճանապարհով (ծանրոցով) Հայաստան թմրանյութ ներկրելու մեղադրանքով, գրում է թերթը: Հանցագործությունը բացահայտել են ՀՀ ՊԵԿ մաքսային ծառայության աշխատակիցները:

ՊԵԿ-ից «ՀԺ»-ի թղթակցին հայտնել են, որ դեպքը տեղի է ունեցել մայիսի 2-ին, իսկ Կիրակոսյանը կալանավորվել է մայիսի 12-ին: Արմավիրի «արծիվը» մեղադրվում է Սուբոտեքս տեսակի թմրամիջոց պարունակող 210 հատ դեղահաբ ներկրելու համար, որը նրան ուղարկվել է ծանրոցով` Ֆրանսիայից: Թերթը հիշեցնում է, որ «Հայոց արծիվներ»-ը ստեղծվել է 2010 թվականին, որի նախագահն է ՀՀ սպորտի եւ երիտասարդության հարցերով փոխնախարար Խաչիկ Ասրյանը:

«Հայկական ժամանակ» օրաթերթի առաջին էջում լուսանկար է հրապարակվել, որտեղ հստակ երևում է, թե ինչպես է ԱԺ «Բարգավաճ Հայաստան» խմբակցության պատգամավոր Ռոբերտ Զաքարյանը քվեարկում  իր կուսակից պատգամավոր Վահագն Մախսուդյանի փոխարեն։ Զաքարյանը Մախսուդյանի փոխարեն երեկ քվեարկել է մի քանի անգամ։ Սա ոչ առաջին ու ոչ էլ, բնականաբար, վերջին նման դեպքն է, գրումէ թերթը և նկատում, որ խորհրդարանի նոր տեխնիկան տեղադրելուց հետո ԱԺ ղեկավարությունը, մասնավորապես՝ ԱԺ աշխատակազմի ղեկավար Գեղամ Ղարիբջանյանը, լրագրողներին վստահեցնում էր, թե նոր համակարգով պատգամավորները զրկվում են մեկը մյուսի փոխարեն քվեարկելու հնարավորությունից։ «Բացի այն, որ քարտերը կոդավորված են, և այլ պատգամավորի մոնիտոր դրանով հնարավոր չէ միացնել, նաև քվեարկության վրա է բավական ժամանակ ծախսվելու, և նրանք չեն հասցնելու մեկը մյուսի փոխարեն քվեարկել»,- բացատրում էր Գեղամ Ղարիբջանյանը՝ նշելով նաև, որ դրա համար կա մեկ այլ խոչընդոտ՝ լրագրողները վերևից հսկելու են քվեարկության ընթացքը:

Երևանի քաղաքապետարանի կրթության վարչության պետ Գայանե Սողոմոնանը երեկ մեր թղթակցի հետ զրույցում հաստատել է, որ քաղաքապետարանին ենթակա բոլոր դպրոցների արտաբյուջետային հաշիվները «Առեքսիմբանկում» են։

Սա ուշագրավ է նրանով, որ այդ բանկը պատկանում է ռուսական «Գազպրոմին»։ Այն «Գազպրոմին», որին պատկանում է նաև «Հայռուսգազարդը»։ Իսկ Երևանի ներկայիս քաղաքապետ Կարեն Կարապետյանը «Հայռուսգազարդի» նախկին գլխավոր տնօրենն էր և հիմա էլ համարվում է «Հայռուսգազարդի» ստվերային ղեկավարը։ Այլ կերպ ասած, քաղաքապետարանի ենթակայության դպրոցերի արտաբյուջետային հաշիվները այնքան էլ պատահականորեն չեն հայտնվել «Առեքսիմբանկում», և Երևանի գործող քաղաքապետը այդ հարցում շահագրգռվածություն ունի։