Թերթը գրում է, որ ոստիկանապետ Վովա Գասպարյանի հրամանով` երեկ աշխատանքից ազատվել է ոստիկանության ՔԳՎ Երեւանի քննչական վարչության բաժնի պետ Մուշեղ Բաբայանը, նրա փոխարեն այդ պաշտոնում նշանակվել է ՀՔԾ քննիչ Գեւորգ Գեւորգյանը: «Այս քննիչի վարույթում էին գտնվում Հայ ազգային կոնգրեսի երիտասարդ յոթ ակտիվիստների, ինչպես նաեւ Սյունիքի մարզպետ Սուրիկ Խաչատրյանի եւ գործարար Սիլվա Համբարձումյանի միջեւ տեղի ունեցած միջադեպի վերաբերյալ քրեական գործերը»,- գրում է «Հայկական ժամանակ»-ը:

Թերթը գրում է, որ իր տեղեկություններով` օրերս զբաղեցրած պաշտոնից ազատվել եւ կադրերի տրամադրության տակ է ուղարկվել ՀՀ ԱԱԾ սահմանադրական կարգի պահպանության եւ ահաբեկչության դեմ պայքարի գլխավոր վարչության պետ Տիգրան Բարսեղյանը:

«Բարսեղյանի ղեկավարած վարչության հետ են կապվում ԱԱԾ-ի կողմից ընդդիմադիր գործիչներին գաղտնալսելու, նրանց վերաբերյալ դոսյեներ հավաքելու մասին լուրերը: Ըստ որոշ տեղեկությունների` Բարսեղյանը պաշտոնանկ է արվել, քանի որ տեղյակ է եղել ներիշխանական խմորումների` պալատական հեղաշրջում նախապատրաստելու մասին, բայց չի զեկուցել իր ղեկավարությանը:

Մեկ այլ տարբերակով, Բարսեղյանն այս պատմության մեջ «քավության նոխազ» է, քանի որ տեղեկացրել է ԱԱԾ տնօրեն Գորիկ Հակոբյանին, իսկ նա չի զեկուցել Սերժ Սարգսյանին: ՀՀ ԱԱԾ մամուլի քարտուղար Արծվին Բաղրամյանը մեր թղթակցի հետ զրույցում չի հերքել Բարսեղյանին ազատելու մասին լուրը: Բարսեղյանը, տեղեկանալով, որ վերը նշված լուրի վերաբերյալ «ՀԺ» թղթակիցը ցանկանում է հարց տալ, առանց մինչև վերջ լսելու պատասխանել է. «Ներքին կադրային փոփոխությունները ենթակա չեն հրապարակման ու մեկնաբանման», -գրում է «Հայկական ժամանակ»-ը:

Թերթը գրում է, որ ՃՈ նախկին պետ, կալանքի տակ գտնվող Մարգար Օհանյանի վերաբերյալ գործով նախաքննությունը գտնվում է ավարտական փուլում և շուտով կուղարկվի դատարան: Այս մասին երեկ թերթին հայտնել է պաշտպան Մկրտիչ Վասակյանը:

«Մարգար Օհանյանը մեղադրվում է պաշտոնեական դիրքի չարաշահման եւ գույքի առանձնապես խոշոր չափերով հափշտակություն կատարելու համար, անազատության մեջ է արդեն շուրջ երեք ամիս՝ օգոստոսի 30-ից: Վասակյանը դժվարացավ պատասխանել մեր այն հարցին, թե տվյալ գործում այլ մեղադրյալներ կա՞ն ներգրավված: Նա ասաց, որ չի կարող պատասխանել այդ հարցին, քանի որ գործի նյութերին չի ծանոթացել: Մեղավոր ճանաչվելու դեպքում Մարգար Օհանյանը կարող է դատապարտվել մինչև 12 տարվա ազատազրկման:

Պաշտպան Վասակյանը  մեր թղթակցի հետ զրույցում ասել է, որ Օհանյանն իրեն մեղավոր չի ճանաչել և ցուցմունքներ չի տվել»,- գրում է «Հայկական ժամանակ»-ը:

Թերթը գրում է, որ Հատուկ քննչական ծառայությունը դիմել է դատարան` ՀՀ ոստիկանության  քրեական հետախուզության գլխավոր վարչության նախկին պետ Հովհաննես Թամամյանի խափանման միջոց կալանքը եւս երկու ամսով երկարացնելու միջնորդությամբ:

«Դատարանն այս միջնորդությանը դեռեւս չի արձագանքել: Թամամյանը անազատության մեջ է արդեն 8 ամիս` այս տարվա մարտի 24-ից: Թամամյանը մեղադրվում է ՀՀ քրեական օրենսգրքի 308-րդ հոդվածի 2-րդ մասով (պաշտոնեական լիազորությունները չարաշահելը, որն առաջացրել է ծանր հետեւանքներ)»,- գրում է «Հայկական ժամանակ»-ը:

Թերթը գրում է, որ նորաթուխ ոստիկանապետ Վովա Գասպարյանը շարունակում է կադրային փոփոխություններ իրականացնել ոստիկանությունում: Լուրեր կան, որ նա կհասնի նաեւ համակարգի «խոշոր» դեմքերին եւ առաջիկայում կազատվի ՔՀԳՎ պետ Աշոտ Կարապետյանից:

«Մեր տեղեկություններով` Կարապետյանը, որը նախկինում Կենտրոնի ոստիկանապետն էր, կզրկվի պաշտոնից՝ այժմ իր ղեկավարած վարչության ու 6-րդ վարչության միավորման հետեւանքով եւ կուղարկվի վերապատրաստման: Երեկ Գասպարանը մի շարք հրամաններ էլ է ստորագրել, որոնցով ՀՀ-ում Ինտերպոլի ազգային կենտրոնական բյուրոյի պետ է նշանակվել Արա Սիդանյանը:

Մինչ այդ նա բյուրոյի բաժնի պետ էր»,-գրել է «ՀԺ»-ն եւ հավելել, որ Կարեն Բաբակեխյանը ազատվել Է ոստիկանության կազմակերպված հանցավորության դեմ պայքարի գլխավոր վարչության պետի տեղակալի պաշտոնից եւ նշանակվել Շիրակի մարզային վարչության պետ:

Թերթը գրում է, որ ԼՂՀ պաշտպանության նախկին նախարար Սամվել Բաբայանի գտնվելու վայրը փաստացի անհայտ է:

«Երեկ մեզ այդպես էլ չհաջողվեց նրա մասին որևէ կոնկրետ տեղեկություն ճշտել: Նախկինում գոյություն ունեցած «Դաշինք» կուսակցության նախկին խոսնակ Գնել Ղլեչյանն ասաց, որ չի կարող տեղեկություն տալ Սամվել Բաբայանի գտնվելու վայրի մասին: Նրա մասին տեղեկություն չուներ նաև ՀՌԱԿ ատենապետ Հարություն Առաքելյանը, որի ղեկավարած կուսակցության հետ սերտորեն համագործակցում էր Սամվել Բաբայանը: Մեր ձեռքի տակ եղած հեռախոսահամարներով նույնպես Բաբայանի հետ կապ հաստատել չհաջողվեց: ԼՂՀ ՊՆ նախկին նախարարի մասին այլազան լուրեր են պտտվում, ըստ որոնց՝ նա հայտնվել է բավական տհաճ իրավիճակում: Ստույգ հայտնի է, որ Բաբայանը ինչ-որ նախագիծ իրականացնելու համար մեծ վարկեր է վերցրել մի քանի բանկերից եւ դրա համար գրավադրել մի շարք մարդկանց բնակարաններ, վերջիններիս համաձայնությամբ՝ իհարկե: Այդ մարդկանց թվում է նաեւ Երեւանի նախկին քաղաքապետ Ալբերտ Բազեյանը, որի երեւանյան բնակարանը կարող են մոտ ապագայում բռնագրավել, եթե Սամվել Բաբայանը չհայտնվի եւ չփակի այն վարկը, որ վերցրել է «Արդշինինվեստբանկից»: Համենայնդեպս՝ Բազեյանն ինքը, մեր ունեցած հավաստի տեղեկություններով, ֆինանսապես ի վիճակի չէ ինքնուրույն փակել այդ վարկը: Թե կոնկրետ, երբ է լրանում Բազեյանի տան դիմաց վերցված վարկը մարելու ժամկետը, պարզել չհաջողվեց: Լավատեղյակ մարդիկ պնդում են, թե խոսքը մի քանի ամսվա մասին է:
Ըստ ամենայնի, դա տեղի է ունեցել այն շրջանում, երբ Բազեյանն ու Բաբայանը որոշել էին համատեղ քաղաքական գործունեություն ծավալել՝ Հայաստանի ռամկավար-ազատական կուսակցության շրջանակներում: Այդ ծրագիրը, սակայն, չիրականացավ, փոխարենը երկու քաղաքական գործընկերները հայտնվեցին բավական տհաճ վիճակում: Այս պահին իրավիճակը կարող են պարզաբանել երկու հոգի: Ալբերտ Բազեյանը երեկ չցանկացավ այս կապակցությամբ որեւէ մեկնաբանություն անել»,- գրում է «Հայկական ժամանակ»-ը:

«Հայկական ժամանակ» օրաթերթը գրում է. «ՀՀ ոստիկանապետի պաշտոնում նշանակվելուց հետո ոստիկանական ստորաբաժանումների ղեկավար ներկայացուցիչների հետ առաջին հանդիպման մեկնարկին Վովա Գասպարյանը լարված մթնոլորտը փորձել է լիցքաթափել բավական յուրօրինակ ձևով: Երբ բոլորը ոստիկանության կոլեգիայի նիստերի դահլիճում լուռ սպասելիս են եղել նոր պետին, Գասպարյանը ներս է մտել և ներկաններին ողջունել հետևյալ կերպ. «Բարև ձեզ, միլիցա-պեպելնիցաներ», ինչից հետո սկսել է ծիծաղել: Դահլիճում նախ խուճապային լռություն է տիրել, ինչից հետո արագ կողմնորոշվողները նույնպես սկսել են ծիծաղել, սրանց հետևել են ուշ կողմնորոշվողները»:

Թերթը գրում է, որ երեկ տարածվեց հերթական հրաժարականի մասին տեղեկությունը, որը, սակայն, դեռ պաշտոնապես չի հաստատվել: «Իշխանական շրջանակներից արտահոսք եղավ, որ հրաժարական է տվել քրեակատարողական վարչության պետ Հայկ Հարությունյանը: ՀՀ նախկին ոստիկանապետը, ըստ նույն աղբյուրների, պետք է նշանակվի Գեղարքունիքի մարզպետ:  ՀՀ մի շարք մարզպետների պաշտոնանկությունների շարքում նշվում է նաեւ ԲՀԿ-ական երկու մարզպետների` Գեղարքունիքի մարզպետ Նվեր Պողոսյանի եւ Վայոց ձորի մարզպետ Սերգեյ Բագրատյանի անունները:

Արդարադատության նախարարի մամուլի խոսնակ Կարինե Քալանթարյանը Հայկ Հարությունյանի հրաժարականի լուրը ճշտելու համար առաջարկել է դիմել Սերժ Սարգսյանի խոսնակին: Վերջինս թերթի զանգերին չի պատասխանել, փոխարենը ՔԿՎ խոսնակ Գոռ Ղլեչյանը հերքել է լուրը:

Ըստ որոշ տեղեկությունների` հրաժարականների հաջորդ խմբաքանակի մասին հայտարարվելու է մի փոքր ուշ»,- գրում է «Հայկական ժամանակ»-ը:

Հայաստանում գործող մի շարք օտարերկրյա դեսպանատների ներկայացուցիչներ վերջին օրերին ամեն առավոտը զանգահարում են ՀՀ «կասկածելի» նախարարություններ և հետաքրքրվում, թե արդյո՞ք գործող նախարարը շարունակում է պաշտոնավարել։ Տարբեր նախարարությունների աշխատակիցներ մասնավոր զրույցներում խոստովանում են նաև, որ իրենք և իրենց գործընկերները ձեռքի հետ զբաղված են նոր աշխատանքի փնտրտուքով։ Նախարարություններում ոչ ոք չգիտի, թե վաղն ինչ է տեղի ունենալու, իրենք կշարունակեն աշխատե՞լ, թե կհայտնվեն փողոցում։ Որոշ նախարարներ առավոտյան աշխատավայր մտնելիս կեսկատակ-կեսլուրջ հետաքրքրվում են դռնապաններից՝ դեռևս նախարա՞ր են, թե՝ ոչ։