Տակավին մշուշոտ է ԲՀԿ խմբակցության նախկին քարտուղար Արամ Սարգսյանի ճակատագիրը: Այդ մասին գրում է «Հայկական ժամանակ» թերթը:

«Ընտրություններից հետո, երբ դեռ ընթանում էին ԲՀԿ-ի հետ կոալիցիա կազմելու շուրջ բանակցությունները, տեղեկություն տարածվեց, թե Սաֆարյանը կոալիցիայի ձւավորումից հետո դեսպան է նշանակվելու ԱՊՀ երկրներից մեկում: Կոալիցիա չձեւավորվեց, իսկ Սաֆարյանը որեւէ տեղ չի երեւում. Նա արդեն տեւական ժամանակ է հեռախոսազանգերին էլ չի պատասխանում եւ խուսափում է լրագրողների հետ շփումներից: Չի բացառվում, որ որոշ ժամանակ անց նա,  այնուամենայնիվ,որեւէ պաշտոն ստանա: Մշուշոտ է նաեւ ԲՀԿ խմբակցության մեկ այլ նախկին պատգամավորի` Վարդան Բոստանջյանի ճակատագիրը: Վերջինս, ի դեպ, երեկ այցելել էր Ազգային ժողով եւ ՀՀԿ խմբակցության ղեկավար Գալուստ Սահակյանի աշխատասենյակում էր»,- գրում է «Հայկական ժամանակը»:

««Օրինաց երկիր» կուսակցությունը նոր կառավարությունում երեք-չորս փոխնախարարի պորտֆել է ունենալու: Այս մասին ««Հայկական ժամանակ»-ին հայտնել են ՀՀԿ-ական իրազեկ աղբյուրները: Իսկ ՕԵԿ-ական աղբյուրները հայտնում են, որ ՕԵԿ նախագահ Արթուր Բաղդասարյանն այդ պաշտոնների համար «մրցույթ» է հայտարարել` բառի բոլորիս հասկանալի իմաստով: Փոխնախարար կդառնան նրանք, ովքեր կառաջարկեն լավագույն «պայմանները»` կրկին բառի բոլորիս հասկանալի իմաստով: Նշենք, որ առայժմ վերջնականապես հստակեցված չէ, թե հատկապես որ նախարարություններում կարող են ՕԵԿ-ի թեկնածուները փոխնախարար աշխատել: Հիշեցնենք, կոալիցիոն քվոտայով «Օրինաց երկրին» նաև երեք նախարարական պորտֆել է բաժին ընկնելու: Ի դեպ, երեկ ՕԵԿ քաղխորհրդի ներկայացուցիչները և ՀՀԿ խորհրդի ներկայացուցիչները հանդիպում են ունեցել ՀՀ վարչապետ Տիգրան Սարգսյանի հետ, որի ժամանակ, ըստ ՕԵԿ-ի տարածած հաղորդագրության, քննարկել են նոր կառավարության ծրագրի հիմնադրույթները, որոնք մշակվել են ՀՀԿ-ի և ՕԵԿ-ի նախընտրական ծրագրերի հիման վրա: Այդ հանդիպումները շարունակվելու են` ամփոփ փաստաթուղթ ձևավորելու համար:»

ԲՀԿ-ականներն այս օրերին հայտարարում էին, թե ԱՍՆ պետքարտուղար Հիլարի Քլինթոնը իր այցի ընթացքում հանդիպելու է նաև ԲՀԿ նախագահ Գագիկ Ծառուկյանի հետ: Նման հանդիպում տեղի ունեցե՞լ է` երեկ Ծառուկյանի խոսնակ Խաչիկ Գալստյանը թերթի թղթակցի այս հարցին պատասխանել է. «Ոչ կարող եմ հերքել, ոչ հաստատել»: Այսպիսով, ԲՀԿ-ն փորձում է ինտրիգ մտցնել քաղաքական կյանքում: Ի դեպ, երեկ պատկան որևէ մարմնից այս լուրի հաստատում «Հայկական ժամանակ» թերթը չի ստացել:

«Հայկական ժամանակ».  Երեկ հայտնի է դարձել, որ առաջիկա շաբաթվա սկզբին ԱԺ աշխատակազմում բավական հետաքրքիր փոփոխություններ են սպասվում: Ըստ խորհրդարանի թերթի աղբյուրների, աշխատանքից կազատվեն մի քանի առանցքային պաշտոն զբաղեցնող դեմքեր:
Խոսքը, մասնավորապես, ԱԺ աշխատակազմի ներկայիս ղեկավար Վրեժ Գասպարյանի մասին է, որին այդ պաշտոնում նշանակել է ԱԺ նախկին նախագահ Սամվել Նիկոյանը` ԱԺ աշխատակազմի նախկին ղեկավար Գեղամ Ղարիբջանյանի փոխարեն, որն այժմ ՀՀ դեսպանն է Արաբական միացյալ Էմիրություններում: Երեկ խորհրդարանի միջանցքներում աշխատակազմի ղեկավարի երկու հավանական թեկնածուի անուններ էին շրջում. Մեկը` կապի և տրանսպորտի նախարարի պաշտոնակատար, ՕԵԿ-ական Մանուկ Վարդանյանն էր, մյուսը` Սերժ Սարգսյանի վերահսկողական ծառայության պետ Հովհաննես Հովսեփյանը, որը բավական մտերիմ է ԱԺ նորընտիր նախագահ Հովիկ Աբրահամյանի հետ: Թե նրանցից ով կդառնա ԱԺ աշխատակազմի ղեկավար, հավանաբար հայտնի կդառնա երկուշաբթի: Ըստ ԱԺ թերթի աղբյուրների, աշխատանքից ազատվելու է նաև լրատվության և հասարակայնության վարչության պետ Հրայր Զորյանը:

«Հայկական ժամանակ». Նոր խորհրդարանի միջանցքներում երեկ քննարկվում էին նաև նոր կառավարության կազմի հետ կապված հարցեր: Որևէ նշանակում կամ թեկնածություն, սակայն, դեռ վերջնական չէ, և հնարավոր է` անսպասելի որոշումներ կայացվեն:
Եթե նախօրեին իշխանական կուլիսներում որպես Գեղարքունիքի մարզպետի թեկնածու քննարկվում էր նախկին ոստիկանապետ Հայկ Հարությունյանի անունը, երեկ արդեն շատերը վստահաբար պնդում էին, որ այս մարզի մարզպետ է նշանակվելու ՀՀԿ-ական պատգամավոր Ռաֆիկ Գրիգորյանը: Առողջապահության նախարարի պաշտոնի համար քննարկվում է երկու թեկնածություն` բժշկական համալսարանի ռեկտոր Դերենիկ Դումանյանի և ԱԺ պատգամավոր Արա Բաբլոյանի: Երեկ, երբ թերթի թղթակիցը փորձել է Բաբլոյանից ճշտել իր նշանակման հետ կապված հարցը, նա պատասխանել է, որ նախօրեին է Ֆրանսիայից եկել և դեռ ոչինչ չգիտի: Գործադիրում, ինչպես գրել է թերթը, պաշտոն է ստանալու նաև ԱԺ նախկին նախագահ Սամվել Նիկոյանը: Նոր կառավարության կազմը, թերևս, որոշվի եկող շաբաթ կայանալիք ՀՀԿ գործադիր մարմնի նիստի ժամանակ:

«Հայկական ժամանակ».  Այս օրերին քաղաքական կուլիսներում չեն բացառում, որ խորհրդարանական մի քանի ուժեր փորձեն տապալել նոր ձևավորվելիք կառավարության ծրագիրը: Ինչպես հայտնի է, ըստ Սահմանադրության, մայիսի 31-ին գործող կառավարությունը պետք է հրաժարական տա, որից հետո 10 օրվա ընթացքում Սերժ Սարգսյանը, խորհրդակցելով խորհրդարանական խմբակցությունների հետ, պետք է նոր վարչապետ նշանակի, 20 օրվա ընթացքում պետք է ձևավորվի նոր կառավարություն, որն էլ իր ծրագիրը պետք է ներկայացնի նոր խորհրդարանի հաստատմանը: Նախօրեին թերթի թղթակիցը ՀՅԴ խմբակցության պատգամավոր Արծվիկ Սինասյանին հարցրել է` հնարավո՞ր է, որ այդ օրը անակնկալներ լինեն: «Դժվար է ասել, նախ պետք է տեսնել` ինչ կառավարություն է լինելու, ինչ ծրագիր է բերելու: Այս պահի դրությամբ ոչինչ չեմ կարող բացառել այդ հարցի շրջանակներում, քանի որ ոչ կառավարությունն ենք մենք ձևավորողը, ոչ էլ, ըստ էության, վստահություն հայտնողը»,- ասել է Մինասյանը: Իսկ եթե վարչապետ մնա Տիգրան Սարգսյանը, ինչպես պնդում են ՀՀԿ կուլիսներում, իսկ կառավարության կազմն էլ էական փոփոխությունների չենթարկվի, օրինակ, ՀՅԴ-ն «կողմ» կքվեարկի՞ այդ կառավարության ծրագրին` հարցրել է թերթի թղթակիցը: «Դժվար է ասել, այս պահի դրությամբ որևէ նման բան չենք կարող ասել, մի բան պարզ է, որ եթե կառավարությունը նույն վարքագիծն է պահելու, արդեն ակնհայտ է, որ մենք արտահայտել ենք մեր դիրքորոշումը, որ դեմ ենք նման վարքագծին և նման կազմին»,-պատասխանել է Արծվիկ Մինասյանը: Իսկ հավանական համարո՞ւմ եք, որ ՀՅԴ-ն էլ, ԲՀԿ-ն էլ, Հայ ազգային Կոնգրեսն էլ հավանության չարժանացնեն այդ ծրագիրը և փորձեն տապալել դրա ընդունումը: «Եկեք չշտապենք, պետք է մանրամասն քննարկենք, որպեսզի կարողանանք վերջնական դիրքորոշում ձևավորել ովքեր են կողմ լինելու, ովքեր են դեմ լինելու»,- պատասխանել է դաշնակցական պատգամավորը:

«Հայկական ժամանակ». «Փակ շուկայի» շինության մեջ  պետք է տեղակայվի Երեւանի ամենամեծ «Երեւան -Սիթի» սուպերմարկետը, որը պետք է ունենա չորս հարկ: Այդ մասին գրում է «Հայկական ժամանակ» թերթը` վկայակոչելով սեփական աղբյուրը:

«Մեր ունեցած տեղեկություններով, շուկայի վրա նախատեսվում է կառուցել եւս չորս հարկ, սակայն, շուկայի տանիքը չի կարող դիմանալ նման ծանրության, այդ իսկ պատճառով` տանիքը «չեզոքացվում է»,- գրում է  «Հայկական ժամանակ»-ը:

«Հայկական ժամանակ». Թերթն անդրադառնում է ԲՀԿ-ի քվոտայով ազատ մնացած ԱԺ փոխնախագահի պաշտոնը ՕԵԿ-ին տալու խնդրին, ինչին ՀՀԿ վերնախավի մի ներկայացուցիչ «ՀԺ»-ի թղթակցի հետ զրույցում այսպես է արձագանքել. «Ինչո՞ւ պիտի 5-6 հոգի ունեցող խմբակցությանը ԱԺ փոխնախագահի պաշտոն տանք»:

«Այնուհանդերձ, այս հարցը դեռ որոշված չէ: ըստ իշխող վերնախավում շրջանառվող լուրերի, եթե ԱԺ փոխնախագահներից մեկի պաշտոնը տրվի «Օրինաց երկրին», ապա այդ պաշտոնում կին կնշանակվի: Իսկ այդ կինը, բնականաբար, պետք է լինի Հեղինե Բիշարյանը, եւ եթե Բիշարյանը, որն ի սկզբանե կայացրած որոշմամբ, պետք է ղեկավարեր ԱԺ ՕԵԿ խմբակցությունը, ստանձնի ԱԺ փոխնախագահի պաշտոնը, ապա ՕԵԿ խմբակցությունը կղեկավարի Մհեր Շահգեդլյանը»,- գրել է «ՀԺ»-ն:

«Հայկական ժամանակ». Համացանցամ հայտնված աղջիկների ծեծի վերաբերյալ ոստիկանությունը շարունակում է քննություն իրականացնել, ինչը տեսագրություններից մեկի մեջ ծեծի ենթարկվող մի աղջկա համար խնդիրներ է հարուցել:
Թերթի ունեցած տեղեկություններով, այն բանից հետո, երբ տեսանյութերը մեծ աղմուկ են բարձրացրել, և ոստիկանությունը սկսել է հետաքրքրվել դրանցում երևացող երիտասարդներով ու աղջիկներով, ծեծի հեղինակ աղջիկներից մեկը զանգահարել է իր «զոհին», սպառնալիքներ հնչեցրել և ասել, որ եթե նրան ոստիկանություն կանչեն, անպայման ասի, որ այդ ամենը անցյալում է, որևէ խնդիր այլևս չկա, բոլոր խնդիրները հարթվել են:
Ավելի ուշ նույն աղջկան է զանգահարել նաև գործով քննիչը և ասել, որ շտապ ներկայանա ոստիկանություն և գրի, որ ամեն ինչ անցել-գնացել է, և ինքը ոչ մի բողոք չունի: Դրանից բացի, քննիչն ասել է, որ քրեական գործը գտնվում է նախագահականի վերահսկողության վարչության աչալուրջ ուշադրության կենտրոնում, հետևաբար` գործը պետք է շատ արագ քննվի ու «ջրվի»: Եվ ահա տուժած աղջիկը գնացել է ոստիկանության բաժին և գրել այն ամենը, ինչ իրեն թելադրել են: Այսպիսով, հարց է ծագում, թե ինչ իմաստ ուներ քննության իրականացումը, եթե դեպքերը պետք է զարգանային նման մեթոդներով:
Ի դեպ, թերթի ունեցած տեղեկություններով, այն աղջիկը, որը տեսագրության մեջ ծեծում է «ընկերուհուն», ոստիկանությունում բացատրություն է տվել` որպես ծեծի պատճառ նշելով. «Ինքը իմ սրբությանն ա կպել»: Ըստ նրա, ինքն ինչ-որ զրույցի ժամանակ երդվել է «հոր արև», իսկ դիմացինը ասել է` սուտ ես ասում, ինչն էլ իրեն հունից հանել է: «Տուժած» աղջիկը այժմ սովորում է երևանյան քոլեջներից մեկում, դպրոցից հեռացել էր միջադեպից կարճ ժամանակ անց:

«Հայկական ժամանակ».  ՀՀ կենտրոնական բանկի` օրերս հրապարակած «2012 թ. մայիս ամսվա վերաֆինանսավորման տոկոսադրույքի վերաբերյալ» տեղեկանքում մի չափազանց հետաքրքիր փաստ է արձանագրված: Ըստ այդմ, համաշխարհային շուկայում շաքարի գինը այս տարվա ապրիլին, անցած տարվա ապրիլի համեմատ, նվազել է 7 տոկոսով: Իսկ ի՞նչ է տեղի ունեցել Հայաստանում: Ըստ ՀՀ ազգային վիճակագրական ծառայության պաշտոնական տնյալների, այս տարվա ապրիլին Հայաստանի խանութներում մեկ կիլոգրամ շաքարավազի մեծածախ միջին գինը կազմել է 455 դրամ, իսկ անցած տարվա ապրիլին` 388 դրամ: Այսինքն` այն դեպքում, երբ համաշխարհային շուկայում շաքարը էժանացել է 7 տոկոսով, Հայաստանում թանկացել է 18 տոկոսով: Իհարկե, այդ ընթացքում 6 տոկոսով էլ դրամն է արժեզրկվել, բայց դոլարով արտահայտված շաքարի գինը Հայաստանում թանկացել է 11 տոկոսով: Մի խոսքով, եթե Հայաստանում շաքարավազի գինը ենթարկվեր համաշխարհային շուկայի միտումներին, ապա ապրիլին մեր խանութներում պետք է արժենար 384 դրամ, ոչ թե 455 դրամ, ինչպես եղել է: Այսինքն` յուրաքանչյուր կիլոգրամի գինը ուռճացված է 70 դրամով: Մնացածն արդեն պարզ թվաբանություն է. ամեն տարի, ըստ պաշտոնական վիճակագրության, Հայաստանում սպառվում է մոտ 100 հազար տոննա շաքարավազ: Յուրաքանչյուր կիլոգրամի մեջ 70 դրամ լրացուցիչ եկամուտը շաքարավազի ներկրմամբ զբաղվող միակ գործարարին բերում է տարեկան լրացուցիչ, ուշադրություն դարձրեք` լրացուցիչ, 18 միլիոն դոլարի եկամուտ: Իսկ Հայաստան շաքարավազ միակ ներկրողն ու արտադրողը, ինչպես հայտնի է դարձել վերջերս, ՀՀ ԱԺ պատգամավոր Սամվել Ալեքսանյանի կինն է: