ՀՀ տնտեսական մրցակցության պաշտպանության պետական հանձնաժողովը երեկ հրապարակել է երշիկեղեն արտադրող 21 ընկերությունների անուններ, որոնց արտադրանքի մեջ մեծ քանակությամբ սոյա, օսլա, ալյուր, սպիտակաձավար և այլ նյութեր կան: Ընկերությունները տուգանվել են անցած տարվա իրենց ընդհանուր հասույթի մեկ տոկոսի չափով: Ամանորից առաջ երշիկեղեն արտադրողների արտադրանքն անորակ կամ վատորակ հայտարարելը արդեն իսկ տարօրինակ է: Աոավել տարօրինակ է, որ դրանց բաղադրությունը ստուգվել է ոչ թե հատուկ լաբորատորիայում, այլ ընկերությունների` հումքի գնման փաստաթղթերի հիման վրա իրականացված տնտեսագիտական հաշվարկներով: Այսինքն, եթե ընկերություններն իրենց փաստաթղթերում չեն նշել գնված մսի ողջ ծավալը, ապա ՏՄՊՊՀ-ն ավտոմատ կերպով ենթադրում է, որ երշիկի մեջ, մսի փոխարեն, սոյա է օգտագործված:

Հայկական ժամանակ

Երեկ «Հժ»-ին հայտնի է դարձել, որ երկու օր առաջ կրկին վիրահատության է ենթարկվել ՀԺԿ նախագահ, Աժ Հայ ազգային կոնգրես խմբակցության պատգամավոր Ստեփան Դեմիրճյանը: ՀԺԿ նախագահին վիրահատել են Գերմանիայի Մյունխեն քաղաքում:
Ըստ Դեմիրճյանի մերձավորների, վիրահատությունը լավ է անցել, իսկ թե ՀԺԿ նախագահը երբ կվերադառնա Հայաստան, դեռ հայտնի չէ: Մինչ այդ նա վիրահատվել էր Երևանում` «Սբ. Գրիգոր Լուսավորիչ» բժշկական կենտրոնում, սեպտեմբերի 8-ին:

Հայկական ժամանակ

Երեկ, ՀՀ վարչապետի որոշմամբ, ՀՀ աշխատանքի և սոցիալական հարցերի նախարարի տեղակալ է նշանակվել Շամամ Հարությունյանը: Մինչ այդ նա նույն նախարարության «Զբաղվածության պետական ծառայություն» գործակալության պետն էր:
Այս նշանակման ողջ հմայքն այն է, որ տիկին Շամամը, որն ավելի հաճախ հանդես է գալիս Սոնա անունով, ՀՀ Սահմանադրական դատարանի նախագահ Գագիկ Հարությունյանի հարազատ քույրն է: Նախագահական ընտրություններից առաջ Շամամ (Սոնա) Հարությունյանի այս առաջխաղացումը հայ իրականության մեջ չպետք է արտառոց երևույթ համարել: Շամամ Հարությունյանի կենսագրության ուշագրավ հատվածներից կարելի է համարել այն, որ նա 13-ից մինչև 16 տարեկանը հարազատ Գեղաշեն գյուղում կոլտնտեսական է եղել, իսկ 1986 թվականին նշանակվել է նույն գյուղի կոմերիտական կազմակերպության քարտուղար: Հարազատ պարտիայի ղեկավարած ԽՍՀՄ-ի փլուզումից հետո` 1991 թվականին պաշտոն է ստացել Կոտայքի շրջխորհրդի գործկոմում, որտեղից էլ սկսվել է նրա կարիերան արդեն նոր` կապիտալիստական Հայաստանում:

«Հայկական ժամանակ».

ՀՀ ԿԳ նախարարության անձնակազմի կառավարման վարչությունից երեկ «ՀԺ»-ն տեղեկացել է, որ Երևանի Մխիթար Հերացու անվան պետական բժշկական համալսարանի ռեկտորի թափուր պաշտոնի մրցույթին մասնակցելու համար մեկ դիմում են ստացել: Այդ օրը հայտ է ներկայացրել նույն բուհի ռեկտորի ժամանակավոր պաշտոնակատար Միքայել Նարիմանյանը: Մինչ պաշտոնակատար նշանակվելը, նա ԲՈԻՀ-ում աշխատում էր որպես պրոռեկտոր: Նարիմանյանը նաև Ամենայն Հայոց կաթողիկոսի անձնական բժիշկն է: Թափուր պաշտոնի մրցույթին մասնակցելու համար դիմումների ընդունման վերջնաժամկետն այսօր է: Կարելի է ենթադրել, որ այլ դիմող չի լինի: Համենայնդեպս, արդեն այդպիսի ավանդույթ է ձևավորվել: Ռեկտորի թափուր պաշտոնի մրցույթին մասնակցող թեկնածուների միջև ընտրություն պետք է կատարի ԲՈԻՀ-ի խորհուրդը, որը նախատեսված է դեկտեմբերի 17-ին:

«Հայկական ժամանակ».

«Էժանագին բամբասանք է, որին չարժե անդրադառնալ»,-  «Հայկական ժամանակ» թերթի թղթակցի հետ զրույցում «Ժառանգություն» խմբակցության ղեկավար Ռուբեն Հակոբյանն այսպես է որակել այն լուրը, ըստ որի ինքը մանդատը վայր է դնելու։

«Վերջին օրերին տարածվել էր, որ Հակոբյանը պետք է հրաժարվի իր պատգամավորական մանդատից՝ ԱԺ-ում տեղը զիջելով Ստյոպա Սաֆարյանին: Հակոբյանը երեկ հավաստիացրել է, որ դրա մասին ինքն առաջին անգամ մամուլից է լսել՝ հասկանալով, որ դա ընդամենը պատվեր է»,- մեջբերում է «Հայկական ժամանակը»։

«Հայկական ժամանակ».

«Հնարավոր է, Ամանորից առաջ որոշ պատգամավորներ իրենց վերջին ամսվա աշխատավարձն ամբողջությամբ չստանան։ Խորհրդարանից երեկ հաստատել են մեր տեղեկություններն այն մասին, որ ԱԺ նախագահ Հովիկ Աբրահամյանը ԱԺ մշտական հանձնաժողովների նախագահներից պահանջել է հանձնաժողովների անդամ պատգամավորների բացակայությունների ցուցակը։ Պետաիրավական հանձնաժողովի նախագահ Դավիթ Հարությունյանը մեր թղթակցի հարցին, թե ինչու է նման ցուցակ պահանջել ԱԺ նախագահը, պատասխանել է՝ դա օրենքի պահանջ է։ «Օրենքով մենք ունենք պարտականություն՝ հանձնել դա յուրաքանչյուր ամսվա վերջում»,– ասել է Հարությունյանը։ Բայց ԱԺ նախագահն առաջին անգամն է նման ցուցակ պահանջում՝ մեր թղթակցի նկատառմանը Դավիթ Հարությունյանը պատասխանել է. «Բայց մեր պարտականությունն է՝ հանձնել»։ Գյուղատնտեսության հանձնաժողովի նախագահ, ԲՀԿ-ական Մարտուն Գրիգորյանը մեր թղթակցին հայտնել է, որ հանձնաժողովի նիստերից բացակա պատգամավորների ցուցակը ԱԺ նախագահի անունից բանավոր կարգով են պահանջել և չեն նշել, թե նպատակը որն է։ Գրիգորյանը, սակայն, հիշեցրել է ԱԺ կանոնակարգ օրենքի 6-րդ հոդվածը, որի համաձայն՝ ԱԺ նիստերից, հանձնաժողովների և ենթահանձնաժողովների նիստերից անհարգելի բացակայած պատգամավորներին աշխատավարձ չի վճարվում բացակա օրերի համար»,- գրում է թերթը։

«Հայկական ժամանակ».

«Նոյեմբերի 29-ին հեռախոսազրույց է տեղի ունեցել Ռուսաստանի և Ադրբեջանի նախագահների միջև։Պաշտոնական հաղորդագրությունների համաձայն, նախագահները քննարկել են երկկողմ հարաբերություններին առնչվող օրակարգային հարցեր։ Ըստ որոշ տեղեկությունների, հեռախոսազրույցի հիմնական թեմաներից մեկը Գաբալայի ռադիոտեղորոշիչ կայանի՝ Ռուսաստանի կողմից հետագա վարձակալության հարցն է եղել։ Այդ հարցը ներկայումս ռուս-ադրբեջանական հարաբերություններում խորը լարվածության առիթ է դարձել։ ՌՏԿ-ի վարձակալության տասնամյա ժամկետը լրանում է դեկտեմբերին, իսկ դրա երկարաձգման համար Բաքուն տարեկան 7 միլիոն դոլարի փոխարեն 300 միլիոն դոլար է պահանջում, ինչը Մոսկվայում անընդունելի են համարում»,– գրում է թերթը։

«Հայկական ժամանակ».

«…Առաջին օրվանից ես նշել եմ, պնդել եմ, որ ծեծ, ջարդ ոստիկանությունում ես կատեգորիկ արգելում եմ…. ստորացնել մարդուն… էդ աշխատաոճը ես չեմ հանդուրժի այս համակարգում։ Ծեծել չի կարելի։ Դա քրեորեն հետապնդելի է»։

Հոկտեմբերի 12-ին հնչած այս խոսքի հեղինակը ոստիկանապետ Վովա Գասպարյանն է։ Երեկ հայտնի դարձավ, որ նոյեմբերի 15-ին ոստիկանության Նոր Նորքի բաժնում՝ 7 ոստիկանների կողմից առանձնակի դաժանությամբ ծեծի է ենթարկվել 31-ամյա Մհեր Անդրեասյանը, որը բերման էր ենթարկվել կողոպուտ կատարելու կասկածանքով։ Այս դեպքի մասին տեղեկացրել են Անդրեասյանի հարազատները և փաստաբանը։ Պահանջելով, որ Անդրեասյանն ընդունի իր մեղքը և ցուցմունք գրի, ոստիկանները նրան ոտքերով ու բռուցքներով ծեծի են ենթարկել, ապա սկսել են հարվածներ հասցնել աթոռով։ Մհեր Անդրեասյանն այժմ կալանավորված է և շարունակում է պնդել, որ կողոպուտի հետ որևէ առնչություն չունի։ Կատարվածից կարելի է մեկ եզրակացություն անել. Վովա Գասպարյանը տեսախցիկների առաջ վերռնշյալ ելույթից հետո իր ենթականերին թաքուն «աչքով է արել», թե հանկարծ լուրջ չընդունեք։ Այլ բացատրություն չի կարող ունենալ մեկ ամիս անց կատարված այս գազանությունը։

«Հայկական ժամանակ».

«ՊՊՎ ավտոմեքենայի վրա կրակելու մեղադրանքով ձերբակալված Էջմիածնի բնակիչ Աշոտ Կ.–ն երեկ երեկոյան կալանավորվել է։ Արդեն հայտնել ենք, որ նոյեմբերի 21-ին, ժամը 1-ի սահմաններում, անհայտ անձը Երևանի Ծովակալ Իսակովի պողոտայում «Օպել Վեկտրա» մակնիշի ավտոմեքենայով դեպի Հրազդանի կիրճ ընթանալիս, կրակոց է արձակել իր երթևեկելի գոտով ընթացող «ՎԱԶ 2121» մակնիշի ավտոմեքենայի վարորդի ուղղությամբ, բայց գնդակը, դիպչելով ավտոմեքենայի դիմապակուն, անդրադարձ էր կատարել։ Ըստ ոստիկանության, այս փաստի առթիվ ոստիկանության Մալաթիայի քննչական բաժնում հարուցվել է քրգործ ՀՀ քրօրի 34-104– րդ հոդվածի 1-ին մասով (սպանության փորձ) և 235-րդ հոդվածի 1– ին մասով (ապօրինի զենք, զինամթերք պահելը)։ Նշված հանցագործությունը կատարելու կասկածանքով բերման էր ենթարկվել Էջմիածին քաղաքի բնակիչ, 1963թ. ծնված Աշոտ Կ.–ն, որի ձախ ոտքի շրջանում հայտնաբերվել էր հրազենային վնասվածք։ Դեպքից հետո Աշոտ Կ.–ն ոստիկանների հսկողության տակ «Մալաթիա» բժշկական կենտրոնի վնասվածքաբանության բաժնում էր»,– գրում է թերթը։

«Հայկական ժամանակ».

«Երեկ «ՀԺ»–ին հայտնի է դարձել, որ Հայաստանում Ամերիկայի Միացյալ Նահանգների դեսպան Ջոն Հեֆերնը այս շաբաթվա վերջին մեկնում է իր հայրենի երկիր։ Ընդ որում՝ մեկնում է զգալիորեն երկար ժամանակով, նա Հայաստան կվերադառնա 2013-ի հունվարի առաջին տասնօրյակում, հավանաբար՝ հենց հունվարի 10-ին։ Իհարկե, ՀՀ-ում ԱՄՆ դեսպանները միշտ էլ այդ շրջանում մեկնել են՝ իրենց երկրում դիմավորելու Ծննդյան տոները։ Այս տարի, սակայն, իրավիճակը բոլորովին այլ է. Հայաստանում երկուսուկես ամսից նախագահական ընտրություններ են, և այդ շրջանը պետք է որ հետաքրքրեր այդ երկրին։ Առավել ևս, որ Հայաստանում ընթանում են քաղաքական, այսպես կոչված, խմորումներ քաղաքական կոնսուլտացիաների անվան տակ, և ԱԱՆ-ի դեսպանը պետք է որ բաց չթողներ դրանց մոտիկից հետևելու, իր ղեկավարությանն առաջին ձեռքից ինֆորմացիա փոխանցելու հնարավորությունը։ Այն, որ դեսպանն, այնուամենայնիվ, մեկնում է, երկու բան կարող է նշանակել, կամ՝ զեկուցելու ենթակա բան Հայաստանում չի կատարվում, կամ՝ ինչ-որ պետք է զեկուցեր, արդեն զեկուցել է, և վստահ է, որ առաջիկա մեկուկես ամսվա ընթացքում ոչինչ չի փոխվելու։ Ավելի հավանական է երկրորդ տարբերակը»,–գրում է թերթը։

«Հայկական ժամանակ».