Թերթը գրում է, որ արդեն մի քանի օր է՝ շատերը խոսում են այն մասին, որ սիրված հումորիստներ Հայկ Մարությանի (Հայկո) և Մկրտիչ Արզումանյանի (Մկո) նույնքան սիրված դուետը փլուզվել է, որ «Արմենիա» հեռուստաընկերությամբ հեռարձակվող «Կարգին սերիալ» նախագծի ավարտից հետո այս երկու հումորիստները չեն լինելու նոր նախագծում և ավելին, մեկ ուրիշ նախագծում Էլ նրանք միասին հանդես չեն գալու։ Առաջացած անջրպետի պատճառը համարվում էր Հայկոյի քաղաքացիական ակտիվությունը, ինչը նա իր հարցազրույցներից մեկում հերքել է՝ միևնույն ժամանակ չխոսելով իրական պատճառների մասին։ Խնդրի վերաբերյալ երեկ թերթը փորձեցինք զրուցել Մկրտիչ Արզումանյանի հետ։

— Մկրտիչ, ինչո՞ւ բաժանվեցին ձեր ճանապարհները։ Նախաձեռնությունը ձե՞րն էր։

— Արդեն այնքան տարբեր բաներ են ասում։ Երևի թերթերին ինչ-որ նոր թեմա է պետք գրելու։ Ես չեմ ուզում մեկնաբանել ընդհանրապես որևէ բան։ ժամանակը ցույց կտա՝ ով ինչով է զբաղվում, ով ինչով է զբաղվելու ու միասին անելո՞ւ ենք հետագա պրոյեկտներ, թե չէ։ Ես հիմա չեմ ուզում ոչ մի թեմայով մեկնաբանություններ տալ ու ընդհանրապես ոչ մեկին մեկնաբանություն չեմ տալիս։ Ով որ գտնում է՝ ճիշտ է, կամ ուզում է տալ, թող տա, ես զբաղվում եմ իմ գործերով։ Ճիշտն ասած՝ ուրիշ գործով չեմ ուզում զբաղվել։

— Դուք ինքներդ էլ գիտեք, որ հանրության կողմից շատ սիրված եք և մարդկանց հետաքրքրում է ձեր բաժանման պատճառը։ Դրա համար չե՞ք կարծում, որ ճիշտ կլինի՝ մեկնաբանել ստեղծված իրավիճակը։

— Չէ, ես չեմ ուզում մեկնաբանել ընդհանրապես ոչ մի բան։ Նորից եմ կրկնում, ժամանակը ցույց կտա, դրանից ելնելով մարդիկ կհասկանան՝ ով ինչ է անելու և դա օբյեկտի՞վ է, թե՞ ոչ։

— Ամեն դեպքում դո՞ւք եք ցանկացել որ բաժանվեք։ Հայկոյի հարցազրույցներից մեկում կարդացի… (նա ասել էր, որ կոնֆլիկտի համար երկու կողմ է հարկավոր, իսկ ինքը պատրաստ է Մկոյի հետ համագործակցել)։

— Այնպիսի հարցեր եք տալիս, ես չեմ ուզում ձեր հարցերին պատասխանել։ Չեմ ուզում ընդհանրապես որևէ թեմայով խոսել՝ ոչ այդ, ոչ ուրիշ։ Ընդհանրապես ոչ մի հարցազրույց չեմ ուզում տալ։

— Նեղացա՞ծ եք ինչ-որ մեկից։

— Ոչ մեկից չեմ նեղացած։ Կարծում եմ իմ իրավունքն է դա՝ ես չեմ ուզում ոչ մեկին հարցազրույց տալ։ Ինձ համար որոշել եմ է դա անել ու այդպես էլ անում եմ։ Ես զբաղված եմ իմ գործով, իսկ իմ գործերը շատ են, ես ծանրաբեռնված եմ։

Հայկական ժամանակ

«Այս օրերին համացանցում ակտիվ քննարկվում է Կոմիտաս 5 հասցեում տեղի ունեցած ակցիայի ժամանակ ավագ սերժանտ Հակոբ Խաչատրյանի արարքը, ով «համբուրել» էր ակտիվիստի պարանոցը:

Բարձրացված աղմուկը հանգեցրեց ոստիկանի ծառայության կասեցմանը։ Երեկ մեր թերթի հետ զրույցում Հակոբ Խաչատրյանն արձագանքեց տեսանյութին ու այդ առնչությամբ հնչած մեկնաբանություններին։ «էնպիսի տպավորություն ա ստեղծվել, որ ես, ինչ-որ մեկին չճանաչելով, մոտենամ ու վզից համբուրեմ, որ չեմ էլ իմանում էդ անձնավորությունն ով ա, ու մինչև էդ ես իրա համար շատ բան եմ արել, ինքը վատ էր զգում, ջուր եմ մոտեցրել, լավ եմ վերաբերվել՝ որպես ոստիկան քաղաքացու հանդեպ, ու քաղաքացին իմ հանդեպ տենց բան անի՞, դա՞ ա ճիշտը»։ «Ես ամուսնացած եմ, ունեմ երեխա, ո՞նց կարող էի թույլ տալ նման քայլ անել, էն էլ ակցիայի ժամանակ։

Ես եթե նույնիսկ ճանաչեի, կամ իմ ծանոթը լիներ, ինչ-որ տեղ նման ենթադրություններ կարող էին անել, բայց անծանոթի հանդեպ ես ո՞նց նման ոտնձգություն կանեմ։ Բոլորը գիտեն, որ ես էդ անձնավորությունը չեմ, ես ամբողջ կյանքում սաղի համար լավություն եմ արել, ու ոչ մեկի հանդեպ ոտնձգություն իմ ամբողջ կյանքում չի եղել»,–բորբոքված ասաց «կրքոտ» համազգեստավորը։ Մեր դիտարկմանը, թե, այնուամենայնիվ, տեսանյութում նկատելի էր իր ջերմ վերաբերմունքն ակտիվիստի նկատմամբ, նա այդ ջերմությունը բացատրեց հետևյալ կերպ. «Եթե ուշադիր լինեք, նա դիմացի ոստիկաններից մեկից կախված էր, ես ընդամենը հետևից բռնել ու հետ եմ քաշել, ես չէի կարա նրան մատների ծայրով բռնեի, հետ քաշեի, ես հետևից մոտեցա ու հետ քաշեցի, ընդամենը դա է եղել, ուրիշ ոչ մի բան։ Ես հույս ունեմ, որ ուսումնասիրություններից հետո կպարզվի ճշմարտությունը, ու ես պատիվ եմ պահանջելու, սա ի լուր աշխարհի թող տարածվի»,– սպառնաց նա։

Մանրամասները՝ «Հայկական ժամանակ»-ի այսօրվա համարում:

Սեպտեմբերի 13-ին լրանում է ՀՀ գլխավոր դատախազ Աղվան Հովսեփյանի պաշտոնավարման վերջնաժամկետը։ Հովսեփյանն արդեն տևական ժամանակ է, պատրաստվում է իր հեռացմանը. պաշտոնազրկությունից հետո ավելորդ խնդիրներ չունենալու համար։

ՀՀ գործող օրենսդրության համաձայն, Սերժ Սարգսյանն իհարկե կարող է երկրորդ անգամ Հովսեփյանին առաջադրել նույն պաշտոնում, իշխանական շրջանակներում, սակայն, տևական ժամանակ է, ՀՀ գլխավոր դատախազի բոլորովին այլ թեկնածուների անուններ են շրջանառվում և Գառնիկիչի վերընտրությունը գոնե այս պահին գրեթե անհնար է գնահատվում։ Բայց պաշտոնապես երկրի գլխավոր դատախազի անունը հայտնի կդառնա միայն սեպտեմբերի վերջին, երբ Սերժ Սարգսյանն ԱԺ-ին կներկայացնի նրա անունը։

Այս պահի դրությամբ ՀՀ գլխավոր դատախազի ամենահավանական թեկնածուին իշխանական շրջանակներում համարում են ՀՀ զինվորական դատախազ Գևորգ Կոստանյանին։ Երբ 2011 թվականի հունվարին Սերժ Սարգսյանի օգնական Գևորգ Կոստանյանը Սարգսյանի հրամանագրով նշանակվեց ՀՀ զինդատախազ և ՀՀ գլխավոր դատախազի տեղակալ, դատախազության ներսում սույն նշանակումը ընկալում էին որպես ապագա ՀՀ գլխավոր դատախազի գործուղում՝ իրենց մոտ։ Այս ընթացքում Կոստանյանի և Հովսեփյանի հարաբերությունները բավական լարված են եղել, քանի որ Կոստանյանը փորձել է սահուն կերպով դատախազության ողջ համակարգը մտցնել իր ազդեցության տակ, ինչը, բնականաբար, դուր չէր գալիս Աղվան Հովսեփյանին։ Վերջինիս, սակայն, չի հաջողվել լուրջ դիմադրություն ցույց տալ Կոստանյանին։ Իսկ Կոստանյանը որպես գլխավոր դատախազ, ինչպես նշում են իշխանական շրջանակներում, ձեռնտու է Սերժ Սարգսյանին, քանի որ նա չի կարող լուրջ խաղացող դառնալ:

Մանրամասները՝ «Հայկական ժամանակ»-ի այսօրվա համարում:

Օրաթերթի աղբյուրները հայտ­նում են, որ շաբաթներ առաջ Սերժ Սարգսյանը վիրահատության է են­թարկվել «Նաիրի» բժշկա­կան կենտրոնում: Նա տևական ժամանակ աղիքնե­րի հետ կապված խնդիր­ներ ուներ և պարբերաբար լինում էր «Նաիրի» բ/կ-ում:

Նույն աղբյուրները հայտնում են, որ Սարգսյանը թութ­քի (հեմորոյ) վիրահատության է ենթարկվել: Նրա մա­մուլի խոսնակ Արման Սաղաթելյանը երեկ ոչ հաստա­տել և ոչ էլ հերքել է վիրահատության վերաբերյալ տե­ղեկությունը:

Թերթի թղթակցի հարցին, ճի՞շտ է, որ Սերժ Սարգսյանը վիրահատության է ենթարկվել, խոսնա­կը պատասխանել է.  «Ես նման տեղեկություն չունեմ»:

Հոդվածն ամբողջությամբ՝ կարդացեք «Հայկական ժամանակ»-ի այսօրվա համարում:

«Ֆրանսիա-Հայաստան» բարեկամության խմբի նախագահ, սենատոր Ֆիլիպ Կատցենբախը հայ և ադրբեջանցի խորհրդարանականներին հրավիրում է հանդիպել և երկխոսել ղարաբաղյան հակամարտության կարգավորման շուրջ։ Այդ նպատակով Կատցենբախը հրավեր է ուղարկել «Հայաստան–Ֆրանսիա» բարեկամության խմբի ղեկավար Արա Բաբլոյանին և «Ադրբեջան-Ֆրանսիա» խմբի նախագահ Մեհրիբան Ալիևային։ Նամակում ասվում է. «Նոյեմբերի 29-ին հայ խորհրդարանականների Ֆրանսիա այցի շրջանակներում ես կցանկանայի Լեռնային Ղարաբաղի իրավիճակի վերաբերյալ կլոր սեղան կազմակերպել։ Այդ հանդիպմանը ես նույնպես կցանկանայի հրավիրել ԵԱՀԿ Մինսկի խմբի ֆրանսիացի նախկին համանախագահին»:

Մանրամասները՝ «Հայկական ժամանակ» օրաթերթում:

Թերթը նշում է, որ ՀՀ Ազգային վիճակագրական ծառայությունը երեկ հրապարակեց 2011թ. հոկտեմբերի 12-21-ը իրականացրած մարդահամարի արդյունքները՝ ըստ առանձին համայնքների։ Ըստ թերթի՝ դրանով հանրությունը այսուհետ  ձեռքի տակ ունի ևս մեկ ապացույց, թե որքան էին ուռճացված ընտրացուցակները անցած նախագահական ընտրությունների ժամանակ:

Ուսումնասիրելով փաստաթղթի մի փոքր մասը միայն, հայտնաբերել ենք, որ հատկապես փոքր համայնքներում բնակչության իրական թվերի և մինչ օրս մեզ հրամցված պաշտոնական թվերի միջև սարուձորի տարբերություն կա։ Հայաստանի տասնյակ, կամ միգուցե հարյուրավոր գյուղական համայնքներում առկա բնակչության թիվը որոշ դեպքերում կրկնակի ու եռակի փոքր է տվյալ գյուղերում Սերժ Սարգսյանի «ստացած» քվեից։ Ամենատիպիկ օրինակներից է Գեղարքունիքի մարզի Վերին Շորժա գյուղը, որտեղ ըստ ԱՎԾ-ի, առկա է 23 բնակիչ, այս թվի մեջ, ուշադրություն դարձրեք մտնում են նաև 0-18 տարեկան ընտրելու իրավունք չունեցող բնակիչները, սակայն գյուղը ընտրությունների օրն «ունեցել է» 55 ընտրող։ Ըստ ԿԸՀ-ի, այդ 55–ից ընտրություններին մասնակցել էր 52-ը, և բոլորն էլ քվեարկել էին Սերժ Սարգսյանի օգտին։ 278 առկա բնակիչ ունեցող Անտառամուտի 94,9 տոկոսը ընտրացուցակում է։ Որևէ օրինաչափության մեջ չտեղավորվող այսպիսի արդյունքների ես բախվում համեմատելով մարդահամարի և ընտրության պաշտոնական արդյունքների տվյալները։
Հոդվածն ամբողջությամբ՝ «Հայկական ժամանակ»-ի այսօրվա համարում։

Թերթը գրում է, որ Պետեկամուտների կոմիտեն հրաժարվում է գործարարներին տրամադրել ապրանքագրերի բլանկներ: Ըստ գործարարների, նրանք կատարել են համապատասխան վճարումները դրանց համար, բայց չեն կա¬րողանում ստանալ: նրանց ասել են, թե չտրամադրելու ինչ-որ գաղտնի հրաման կա: Գործարարները ստիպված են լինելու առաքումները չփաստաթղթավորել:

Մանրամասները` «Հայկական ժամանակ»-ի այսօրվա համարում:

Թերթը գրում է, որ օգոստոսի 1-ից Դիլիջանի ներքաղաքային տրանսպորտի ուղեվարձի գինը կբարձրանա շուրջ հիսուն տոկոսով: 70-ի փոխարեն քաղաքացիները կվճարեն 100 դրամ: Լուրը բնակիչներն ընդունել են դժգոհությամբ: Ավտոբուսները գտնվում են անմխիթար վիճակում:

Մանրամասները` «Հայկական ժամանակ»-ի այսօրվա համարում:

Օրերս սարսափելի դեպք է տեղի ունեցել Տավուշի մարզում։ Ըստ մեր հավաստի տեղեկությունների, Իջևան քաղաքում 5– ամյա մի երեխա փորձել է ինքնասպան լինել կախվելու միջոցով։ Ոստիկանությունում դեպքը, սակայն, չի արձանագրվել։

Ոստիկանության հասարակայնության հետ կապերի և լրատվության վարչությունից մեր թղթակցին հայտնել են, որ նման բան իրենց հայտնի չէ։ Ըստ մեր տեղեկությունների, փոքրիկ երեխան իր գործողությունը բացատրել է նրանով, որ հայրը մեկնել է Ռուսաստան և իրեն հետը չի տարել. ուրեմն չի սիրում իրեն:

Հայկական ժամանակ

Մայրաքաղաքում ուղեվարձի 50 տոկոս թանկացման դեմ սկսված քաղաքացիական հզոր արշավն ուղղակի անկյուն է գցել իշխանություններին և նրանց դրել պատային վիճակի մեջ։ Ներկայումս լրջորեն է քննարկվում ուղեվարձը նախկին մակարդակի իջեցնելու հարցը։ Քաղաքացիական ճնշումը այս հարցում այնքան մեծ է, որ թե քաղաքային իշխանությունները, և թե կառավարությունը հոգեբանորեն արդեն տեղի են տվել և ուղղակի առիթի են սպասում ուղեվարձը իջեցնելու համար։ Սակայն մեր ունեցած տեղեկություններով, դրան խանգարող միայն մի հանգամանք կա։ Ինչպես հայտնի է՝ Հայաստան ներկրվող գազի գինը ռուսական կողմը 180 դոլարից բարձրացրեց 270 դոլարի (1000 խմ-ը)։

Սակայն վարչապետ Տիգրան Սարգսյանը հայտարարեց, որ ՀՀ կառավարությունը սուբսիդավորելու է գազի գնի 30 տոկոսը և ստացվեց, որ սահմանի վրա ներկրվող գազի գինը սուբսիդավորման արդյունքում պետք է դառնա 189 դոլար և ոչ թե 270։ Իսկ սուբսիդավորման համար անհրաժեշտ գումարը, տարեկան մոտ 150 միլիոն դոլար, պարզվեց, որ կառավարությունը ակնկալում է ստանալ նույն Ռուսաստանից։ Սուբսիդավորման համար որևէ այլ աղբյուր կառավարությունը դեռ չի նշել, և այդպիսի աղբյուր չկա։ Թե ինչ նախնական պայմանավորվածություն է եղել Ռուսաստանի հետ նշված գումարի հարցով, անհայտ է։ Անհայտ է նաև, թե հանուն ինչի պետք է Ռուսաստանը ՀՀ կառավարությանը հենց այնպես, որպես նվիրատվություն տարեկան 150 միլիոն դոլար տա, որպեսզի կառավարությունը սուբսիդավորի նույն Ռուսաստանի կողմից թանկացված գազի գնի մի մասը։

Խնդիրն այն է, որ եթե սուբսիդավորման համար անհրաժեշտ գումարը Ռուսաստանից ստանալ չհաջողվի, ապա գազի գինը ՀՀ սահմանի վրա պետք է հաշվարկվի արդեն 270 դոլարով։ Դրա արդյունքում գրեթե կկրկնապատկվի գազալցակայաններում գազի գինը և այդ դեպքում ուղեվարձի բարձրացումը կարող է դառնալ շատ թե քիչ հիմնավորված։ Ու ընդհանրապես, եթե կառավարությունը չստանա այդ գումարը, ապա դժվար է նկարագրել, թե ինչ տեղի կունենա։ Այն թանկացումները, որոնց ականատեսն ենք այսօր, երանություն կթվան։ Այդ դեպքում, Հայաստանում գնաճը արդեն կհաշվարկվի երկնիշ տոկոսներով։

Հոդվածն ամբողջությամբ՝ «Հայկական ժամանակ»-ի այսօրվա համարում: