Ընդամենը երկու օր առաջ ՀՀ Հանրային ծառայությունները կարգավորող հանձնաժողովի նախագահ Ռոբերտ Նազարյանը հայտարարեց, որ էլեկտրաէներգիայի գործող սակագները օգոստոսի 1-ից կբարձրանան 3.8-4.3 դրամով՝ կՎտ/ժ-ի համար, քանի որ «Էլցանցը» վնասով է աշխատում, 16 մլրդ դրամ պարտք ունեն և այլն:

Սակայն մեր ազգաբնակչությունը դեռ չէր հասցրել ուշքի գալ այս լուրից, երբ երեկ Ազգային ժողովը էլ ավելի ապշեցուցիչ որոշում կայացրեց. հուլիսի 1-ից բարձրացնել նախագահի, վարչապետի, ԱԺ նախագահի, պատգամավորների և պետական ծառայողների աշխատավարձերը:

Ըստ այդմ, Սերժ Սարգսյանի աշխատավարձը կբարձրանա 203%-ով՝ 436 հազարից մինչև 1,223 մլն դրամ: Մեր բարձաստիճան պաշտոնյաների դրամական պահանջներին հագուրդ տալու համար բյուջեից կհատկացվի 35 մլրդ դրամ:

Չորրորդ ինքնիշխանություն

Երկար ժամանակ է, ինչ Հայաստանում քրեական աշխարհը խառնվել է իրար: Օշականցի Գևորիկին ծեծի ենթարկելու փաստը խռովել է նրա շրջապատին, որոնք ձեռնամուխ են եղել վրեժ լուծել:

Հիշեցնենք, որ Երրորդմասցի Լյովիկն ու Քանաքեռցի Տույը՝ Արթուրը, ծեծել էին Օշականցի Գևորիկին, նկարահանել այդ ծեծը՝ այդպիսով փորձելով գահընկեց անել նրան «գողի» տիտղոսից:

Ու այս խնդիրը երկար ժամանակ է, ինչ չի հարթվում, քանի որ «ՉԻ» տեղեկություններով, ՀՀ կապի և տրանսպորտի նախարար Գագիկ Բեգլարյանը «կրիշ է կանգնել» Երրորդմասցի Լյովիկին ու Տույին և չի թողնում, որ նրանք գնան և պատասխան ապտակ ստանան Օշականցի Գևորիկի կողմից:

Ու այն, որ այսօր քրեական աշխարհում ամեն ինչ խաղաղ չէ, դրա մեղավորը հենց Գագիկ Բեգլարյանն է, ով հանձն է առել կարգավորել խնդիրը, սակայն չի կարողանում:

Չորրորդ ինքնիշխանություն

Երևանի քաղաքապետ Տարոն Մարգարյանի մերձավորները «ՉԻ»-ին հայտնեցին, որ մոտ ապագայում քաղաքապետարանը մտադիր է Երևանի կենտրոնում տեղադրել Գարեգին Նժդեհի արձանը: Նրանց փոխանցմամբ՝ Տարոն Մարգարյանն անձամբ է շահագրգռված արձանի տեղադրման հարցում և արձանը որոշել է տեղադրել ոչ թե Շենգավիթում գտնվող Գարեգին Նժդեհի անվան հրապարակում, այլ հենց Երևանի կենտրոնում:

Հիշեցնենք, որ Գարեգին Նժդեհի անվան հրապարակում մինչև այժմ կանգնած է հասարակական-քաղաքական գործիչ Սուրեն Սպանդարյանի արձանը»,–գրում է թերթը իսկ մեկ այլ հոդվածում նշում է, որ որոշվել է կանգնեցնել նաև Անաստաս Միկոյանի եղբոր Արտեմ Միկոյանի հուշարձանը:

Ըստ թերթի՝ դրա մասին է վկայում ֆեյսբուքյան օգտատեր Վահրամ Միրաքյանի կողմից արված լուսանկարը: «Միրաքյանի խոսքով այն արվել է Էրեբունի օդանավակայանի դիմաց, իսկ տապանաքարի վրայի գրությունից պարզ է դառում, որ շուտով այդ վայրում տեղադրվելու է ավիակոնստրուկտոր, ինժեներատեխնիկական ծառայության գեներալ-գնդապետ, ՄԻԳ ռազմական օդանավերի ստեղծող Արտեմ Միկոյանի հուշարձանը:

Չորրորդ ինքնիշխանություն

Բազմիցս խոսվել է, որ կարկտահարության արդյունքում այս տարի զրկվելու ենք ծիրանի բերքից: Այժմ արդեն հստակ է, որ հայկական խորհրդանիշ համարվող ծիրանն իրականում ոսկու գին ունի: Այսպես, օրինակ, «Երևան-Սիթի» և «Կրպակ» սուպերմարկետների ցանցում մեկ կգ ծիրան կարելի է գնել համապատասխանաբար 2600 և 2700 դրամով: «ՍԱՍ» սուպերմարկետների ցանցն էլ որոշել է ծիրանի թանկ գնով միանգամից չզարմացնել հաճախորդներին և 100 գրամ ծիրանի համար սահմանել է 682 դրամ: Սրանով, սակայն, չի փոխվում իրականությունը մեկ կգ ծիրանը կարելի է «ՍԱՍ»-ից գնել 6820 դրամով:

«Մոսկվիչկա» սուպերմարկետն էլ ներկայանում է ծիրանի տեսակների բազմազանությամբ՝ նույնքան բազմազան գնով: 8150 դրամ արժե, ինչպես ժողովրդի լեզվով ընդունված է անվանել՝ «մեղրի» համով ծիրանը, 3150 դրամ՝ «Արջանաբադ» տեսակինը, իսկ 3500 դրամով էլ կարելի է գնել սովորական ծիրան:

Չորրորդ ինքնիշխանություն

Մեր տեղեկություններով, Հայաստանի Հանրային հեռուստառադիոընկերության խորհրդի նախագահ Ռուբեն Ջաղինյանը Հայաստանի Հանրային հեռուստաընկերության ներկայիս գործադիր տնօրեն Մարգարիտա Գրիգորյանին փոխարինող է փնտրում:

Մեր աղբյուրները նշում են. որ Ռուբեն Ջաղինյանը դժգոհ է Մ. Գրիգորյանի աշխատանքից, բացի այդ, ներկայումս Հ1-ի գրեթե ողջ աշխատակազմը վերջինիս հետ լարված հարաբերություններ ունի: Ռուբեն Ջաղինյանը մեդիա դաշտի առավել հայտնի դեմքերին արդեն խնդրել է Հ1-ի տնօրենի պաշտոնի համար թեկնածուների անուններ նշել:

Չորրորդ ինքնիշխանություն

ՀՀ արտգործնախարարության մեր աղբյուրները տեղեկացնում են, որ Ուկրաինայում Հայաստանի արտակարգ և լիազոր դեսպան Անդրանիկ Մանուկյանի և ՀՀ փոխարտգործնախարար Շավարշ Քոչարյանի միջև ներկայումս սուր պայքար է սկսվել Ռուսաստանում Հայաստանի դեսպանի պաշտոնի համար, քանի որ գործող դեսպան Օլեգ Եսայանի դիվանագիտական առաքելության ժամկետն ավարտվում է:

Սակայն, մեր տեղեկություններով, Ռուսաստանում երկուսի թեկնածությանն էլ դեմ են արտահայտվել:

Շավարշ Քոչարյանը մինչև 2013թ. սեպտեմբերի 3-ը, երբ Սերժ Սարգսյանը հայտարարեց Մաքսային Միությանը միանալու մասին, հենց ինքն էր Ասոցացման Պայմանագրի ամենաթունդ ջատագովը և ՄՄ-ին միանալու հակառակորդը: Հենց նա էր ասել, որ Մաքսային Միություն մտնելը անիմաստ է, քանի որ նրա հետ Հայաստանը ընդհանուր սահմաններ չունի:
Ինչ վերաբերում է Անդրանիկ Մանուկյանին, ապա ուրիշ բան չասենք. ընդամենը 2-3 օր առաջ նա հայտարարեց, որ Ուկրաինայի նոր նախագահ Պյոտր Պորոշենկոն իր անձնական ընկերն է:

Չորրորդ ինքնիշխանություն

Ազգային վիճակագրական ծառայության ներկայացրած տվյալների համաձայն, այս տարվա առաջին եռամսյակում արտաքին ներդրումները նախորդ տարվա նույն ժամանակահատվածի համեմատ կրկնակի աճել են:

Իսկ գիտե՞ք, թե ինչի շնորհիվ է հնարավոր դարձել այդ հրաշքը: ԱՎԾ-ն պարզապես վերցրել ու «Հայռուսգազարդի» բաժնետոմսերի՝ Հայաստանին պատկանող 20 տոկոսը «Գազպրոմին» փոխանցելը ներկայացրել է որպես օտարերկրյա ներդրում:

Փաստորեն՝ եթե Սյունիքի արոտավայրերն Իրանի ադրբեջանցիներին վաճառելու գործարքն էլ կայանար, հնարավոր կլիներ հայտարարել, որ օտարերկրյա ներդրումների ծավալը եռապատկվել է:

Ի դեպ, Հայաստանում օտարերկրյա ուղղակի ներդրումների ծավալով առաջին տեղում Ռուսաստանն է: Իսկ գիտե՞ք, թե որ երկիրն է երկրորդ տեղում: Կյանքում գլխի չեք ընկնի: Կիպրո՛սը: Իսկ գիտե՞ք, թե ինչու: Որովհետև օֆշորային գոտի է:

Պարզ ասած՝ դա օտարերկրյա ներդրում չէ: Մեր պաշտոնյաներն իրենց թալանածը դուրս են բերում երկրից, Կիպրոսում «լվանում» ու հետո Հայաստանում բիզնեսներ սկսում՝ դա ներկայացնելով որպես օտարերկրյա ներդրում: Ե՛վ վիճակագրությունն է դառնում ավելի բարեբաստիկ, և՛ որոշակի արտոնություններ են ստանում՝ որպես «օտարերկրյա ներդրողներ»: Ահա և ամբողջ վիճակագրությունը:

Չորրորդ ինքնիշխանություն

Թերթի տեղեկություններով՝ Առողջապահության նախարար Արմեն Մուրադյանը իր պաշտոնավարման օրից սկսել է ձերբազատվել նախորդի՝ Դերենիկ Դումանյանի կադրերից: Նախօրեին սեփական դիմումի համաձայն աշխատանքից ազատվել է ՀՀ պաշտպանության նախարարի կինը՝ Մարինե Հայրապետյանը, որն զբաղեցնում էր Դերենիկ Դումանյանի խորհրդականի պաշտոնը: Մինչ այդ աշխատանքից ազատվել էին Դումանյանի հետ նախարարություն եկած մի շարք աշխատակիցներ:

«ՉԻ» աղբյուրների փոխանցմամբ՝ աշխատանքից ազատվելու դիմում է ներկայացրել նաև նախկին նախարարի մամլո խոսնակ Անահիտ Հայթայանը, սակայն նոր նախարարը չի ընդունել միայն նրա դիմումը, հորդորելով մնալ և համատեղ աշխատել:

Կադրային սրբագրումներից հետո Արմեն Մուրադյանը աշխատանքային այցով երեկ մեկնել է Մոսկվա:

Չորրորդ ինքիշխանություն

«Մեկն էլ քո աղջիկն էր, որ ամուսնացրեցինք հենց այդ ծրագրի արդյունքում», դիմելով հանրապետական պատգամավոր Կարինե Աճեմյանին ասել է Սփյուռքի նախարար Հրանուշ Հակոբյանը՝ նկատի ունենալով «Արի տուն» ծրագիրը:

«ՉԻ» — Չէ, եկեք իրար հասկանանք: Եթե հանրապետական պատգամավորի դուստրը մտադիր է ամուսնանալուց հետո մեկնել երկրից, ապա ծրագիրը պիտի կոչվի ոչ թե «Արի տուն», այլ «Գնա՛ տնից», իսկ եթե նորաստեղծ ընտանիքը (որին, ի դեպ, երջանկության ենք մաղթում) մտադիր է ապրել Հայաստանում, այդ դեպքում մեզ օրենսդրական փոփոխություններ են պետք: Մասնավորապես՝ պետք է օրենք ընդունել, որ այսուհետ պատգամավոր կարող են ընտրվել առնվազն երեք դուստր ունեցողները, ինչն էապես կխթանի հայրենադարձության գործընթացը:

Ամեն դեպքում՝ ուրախալի է, որ վերջապես Սփյուռքի նախարարի գործունեության գոնե մի դրական արդյունք արձանագրվեց:

Չորրորդ ինքնիշխանություն

Նիգ-Ապարան տոնական միջոցառումների շրջանակում Ապարանում էին բազմաթիվ գործարարներ: Այստեղ էր նաև նախկին գլխավոր դատախազ Աղվան Հովսեփյանի հովանավորյալ Յուրա /Վարշամ/ Ղարիբյանը:
«ՉԻ»-ն փորձեց նրանից տեղեկանալ, թե որքա՞ն գումարով է վաճառվել նրան պատկանող «Երևան» հեռուստաընկերությունը, սակայն վերջինս հայտարարեց, թե հեռուստաընկևրությունը չի վաճառվել:

Հիշեցնենք, որ Ղարիբյանը բոորովին վերջերս պատասխանելով լրատվամիջոցներից մեկի հարցին, հաստատել էր, որ հեռուստաընկերությունը վաճառվել է, բայց այդ մասին տեղեկություն չի հրապարակվել՝ կոմերցիոն նպատակներից ելնելով:

Ի դեպ, «ՉԻ»-ն իր հրապարակումներից մեկում անդրադարձել էր այն փաստին, որ հեռուստաընկերության վաճառքից հետո նրա բաժնետերերից մեկը դարձել է ՕԵԿ նախագահ Արթուր Բաղդասարյանը:

Նշենք, որ այս փաստը գործարարը ոչ հաստատեց, ոչ էլ հերքեց՝ ասելով, որ չի ուզում քաղաքական թեմաներով խոսել:

Չորրորդ ինքնիշխանություն