«Հրապարակ» թերթը գրում է. Տարին ավարտվեց: 2023-ը հայ ժողովրդի համար ողբերգությամբ լի տարի էր: Բայց մեր կողքին կան մարդիկ, որոնք այդ ողբերգության զգացումը չունեն: Ավելին` անհամբերությամբ սպասում են մոտակա Ամանորի եւ Սուրբ ծնունդի տոներին: Կա նաեւ անտարբերների մի հսկա բանակ, որը ոչինչ չի զգում` ո՛չ ուրախություն, ո՛չ տխրություն: Չենք մեղադրում ոչ մեկին, չենք դատապարտում տոնի եւ ուրախության պահանջ ունեցողներին:

Հասկանում ենք նաեւ մեր իշխանությունների վարած քաղաքականությունը` հաց եւ տեսարաններ ապահովել, որ մարդիկ մոռանան Արցախը, մեր զոհերին ու գերիներին, անդառնալի կորուստները: Բայց մարդը հիշողությամբ է տարբերվում կենդանուց: Ոչինչ չի մոռացվելու: Տա Ասված, վերքերը սպիանան, ցավը մեղմանա, եւ 2024-ին մենք կարողանանք վերագտնել մեր հոգու անդորրն ու խաղաղ ստեղծագործելու ուղին:

Առավել մանրամասն թերթի այսօրվա համարում

Մենք կշարունակենք հարաբերությունների կարգավորման գործընթացը, որը սկսվել է Հայաստանի հետ՝ Ադրբեջանի հետ լիարժեք համակարգելով՝ հաշվի առնելով տարածաշրջանում տեղի ունեցող զարգացումները։

Ինչպես հաղորդում է ԱՊԱ-Ն, այս մասին երկրի խորհրդարանում ելույթի ժամանակ ասել է Թուրքիայի արտգործնախարար Հաքան Ֆիդանը։

Ֆիդանի խոսքով՝ 1915 թվականի իրադարձությունների մասին պնդումները համառորեն օրակարգ բերելու մի շարք երրորդ երկրների փորձերը կխաթարեն կարգավորման գործընթացը. «Այդ երկրները Հայաստանի համար լավ բան չեն անում։

«3+3» հարթակը, որը մենք գլխավորում ենք Ադրբեջանի հետ Հարավային Կովկասում, առաջին անգամ հավաքվել Է Թեհրանում ՝ նախարարական մակարդակով: Հաջորդ հանդիպումը կկայանա Թուրքիայում 2024 թվականին» ։

Ֆրանսիայի նախագահ Էմանուել Մակրոնը դեմ է արտահայտվել Ժերար Դեպարդյեին Պատվո լեգեոնի շքանշանից զրկելուն «մեկ հեռուստատեսային ռեպորտաժի հիման վրա»։ Այդ նյութում դերասանը մեղադրվում է չորս կանանց կողմից բռնության մեջ։ Սա առաջին դեպքը չէ, երբ Դեպարդյեն հայտնվում է սեքս-սկանդալի կիզակետում։ 2018 թվականին նրան դատի է տվել երիտասարդ դերասանուհի Շառլոտ Առնոն։ 2023 թվականի ապրիլին ևս 12 կանայք հայտնել են դերասանի կողմից սեռական ոտնձգությունների մասին։

Ֆրանսիայի նախագահ Էմանուել Մակրոնը պաշտպանել է Ժերար Դեպարդյեին և չի աջակցել դերասանին Պատվո լեգեոնի շքանշանից զրկելուն։ France 5 հեռուստաընկերությանը տված հարցազրույցում Ֆրանսիայի ղեկավարն ասել է, որ «այդ կոչում չի շնորհվում բարոյականության դասեր կարդալու համար»։

Ֆրանսիայի նախագահը հիշեցրել է նաև անմեղության կանխավարկածը և ավելացրել, որ երբեք չի մասնակցի մարդու «որսին»։

«Ես պարզապես ցանկանում եմ, որ նա կարողանա բոլորի նման պաշտպանել իր իրավունքները»,- ասել է Մակրոնը։

Ժերար Դեպարդյեն մեկ անգամ չէ, որ մեղադրվել է բռնաբարության կամ սեռական ոտնձգությունների մեջ։ Շառլոտ Առնո, ով մեղադրել է դերասանին իրեն բռնաբարելու մեջ, այդ 13 կանանցից միայն մեկն էր: 2023 թվականի ապրիլին ֆրանսիական Mediapart պորտալը հրապարակեց հետաքննություն՝ հիմնված նրանց ցուցմունքների վրա։ Պորտալի տվյալներով՝ բոլոր միջադեպերը տեղի են ունեցել 2004-ից 2022 թվականներին։

Կանայք պատմել են, որ ամենից հաճախ դա տեղի է ունեցել նկարահանման հրապարակներում։ Օրինակ՝ «Մարսել» սերիալի և «Մյուս Դյումա» ֆիլմի նկարահանման հրապարակում։ Դեպարդյեն միշտ գործում էր նույն օրինաչափությամբ՝ նա «շոշափում էր» երիտասարդ դերասանուհիներին, դիմահարդարներին, այլ աշխատակցուհիների։

Ինքը՝ դերասանը, հերքում է մեղադրանքները։ Իր նամակում Դեպարդյեն գրում է, որ երբեք չի վնասել կանանց։

Ամեն ինչ շատ հստակ է, քննարկման կարիք էլ չկա, ուղղակի պետք է չեղարկել Արցախի Հանրապետությունը լուծարելու վերաբերյալ հրամանագիրը: Այս մասին NEWS.am-ի հետ զրույցում նշեց Արցախի նախկին պետնախարար Արտակ Բեգլարյանը։

«Ես չգիտեմ՝ ինչու է այս թեման այսքան ծանրանում: Ուղղակի չեղարկելու մեխանիզմների հարցն է, թե որն է ավելի նախընտրելի. Կամ նախագահի նոր հրամանագրով, կամ Գերագույն դատարանի միջոցով: Իհարկե, նախագահի նոր հրամանագրով պետք է լինի, որը շատ արագ է, առանց երկարացնելու, առանց երկար ընթացակարգերի, առանց ուրիշ դերակատարներից կախված լինելու եւ այլն:

Նախընտրելի է, որ դա լինի մինչեւ հունվարի 1-ը, բայց դա իրավական առումով որեւէ նշանակություն չունի, դրա նշանակությունը տեղեկատվական, քաղաքական է, որովհետեւ միեւնույն է, սեպտեմբերի 28-ի հրամանագիրը որեւէ իրավական հետեւանք չի առաջացնում, որովհետեւ այն հակասահմանադրական է, նախագահը հանրապետությունը լուծարելու լիազորություն չունի: Երկրորդը, բռնության սպառնալիքի  ներքո է դա ստորագրվել, որի մասին փաստել են եւ նախագահը, եւ ԱԺ-ն»,-ասաց նա:

Բեգլարյանի խոսքով, իրավական խնդիր այստեղ չկա, բայց ընկալման եւ քաղաքական ուղերձի խնդիր կա, հատկապես միջազգային հանրությանը. «Պետք է ցույց տալ քաղաքական կամք եւ հստակ այդ ուղերձը տալ, որ մենք հունվարի 1-ից շարունակում ենք գործել: Նույնիսկ եթե չչեղարկվի, դրանից ոչինչ չի փոխվում, Արցախի պետական մարմինները շարունակում են գործել»:

Համացանցում գործի է դրվել հանցավոր նոր մեխանիզմ, որով ՀՀ քաղաքացիներից արդեն հափշտակվել է 500 հազար դոլարից ավելի գումար։

Քննչական կոմիտեից  հայտնում են՝ 2022-ի վերջերից սոցիալական ցանցերում տարածված գովազդներով քաղաքացիներին առաջարկվում է գրանցվել իբր եկամտաբեր ներդրումային ծրագրերում ու որոշակի գումար ներդնելով ստանալ անհամեմատ բարձր շահույթ։

Գրավչությունը բարձրացնելու և արժանահավատության պատրանք ստեղծելու նպատակով,  սոցիալական ցանցերով տարածվող գովազներում, արհեստական բանականության տեխնոլոգիաների կիրառմամբ, օգտագործվում են հանրաճանաչ մարդկանց պատկերներ, հայտնի ընկերությունների անվանումներ և պատկերանշաններ։

Նշված մեխանիզմով խարդախության հեղինակները հարյուրավոր անձանցից հափշտակել են ոչ միայն վերջիններիս կողմից որպես ներդրում կատարված, այլև նրանցից տարբեր պատրվակներով ստացած գումարները։

ՀՀ քննչական կոմիտեն քաղաքացիներին զգուշացնում է ներդրում կատարելուն ուղղված ցանկացած առաջարկ ընդունելուց առաջ նախ ստուգել դրա հավաստիությունը, զերծ մնալ  ոչ պաշտոնական կայքերում հրապարակվող և չափազանց  գրավիչ ու որևէ տեսակի ջանասիրություն ու աշխատանք չպահանջող առաջարկներին արձագանքելուց: Ստուգեք, որ ներդրումային առաջարկ անող ընկերություններն ունենան Կենտրոնական բանկի կամ իրական բանկերի ու կազմակերպությունների միայն պաշտոնական կայքերում տեղադրված և փաստացի առկա լիցենզիա։

Սննդաբան Անաստասիա Չիժիկովան ռուսներին զգուշացրել է Ամանորին կարմիր խավիարով սենդվիչներ ուտելու դեպքում ալկոհոլային խմիչքներ չխմել։ Նա նշել է նաև ամանորյա սեղանից օգտվելու ժամանակ մի քանի այլ վտանգավոր սննդային համադրություններ։

«Ալկոհոլի հետ յուղոտ և բարձր կալորիականությամբ մթերքների օգտագործումը կտրուկ մեծացնում է աղեստամոքսային տրակտի հիվանդությունների սրման հավանականությունը։ Դա կարող է հանգեցնել ստամոքսի, աղիքների, ենթաստամոքսային գեղձի, լեղապարկի և լյարդի հետ կապված լուրջ խնդիրների, ուստի ավելի լավ է խուսափել ալկոհոլ օգտագործել յուղալի նախուտեստների հետ, ինչպիսիք են մայոնեզով աղցանները, խավիարով սենդվիչները կամ քաղցր աղանդերը»,- ասել է սննդաբանը։

Ռուսական կողմն ակնկալում է, որ Հայաստանի վարչապետ Նիկոլ Փաշինյանը ներկա կգտնվի Սանկտ Պետերբուրգում ԱՊՀ երկրների ղեկավարների ոչ պաշտոնական գագաթնաժողովին, Մոսկվան պատրաստ է կառուցողական կերպով լուծել Երևանի հետ բոլոր հարցերը։ Այս մասին դեկտեմբերի 20-ին կայացած ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան՝ ի պատասխան երեկ Հայաստանի Հանրային հեռուստաընկերությանը տված հարցազրույցում Փաշինյանի հայտարարությունները մեկնաբանելու խնդրանքին։

«Մենք հիմնվում ենք այն բանի վրա, որ ՀՀ վարչապետ Նիկոլ Փաշինյանը կօգտվի Ռուսաստանի Դաշնության նախագահի հրավերից և դեկտեմբերի 25-26-ը կժամանի Սանկտ Պետերբուրգ, որտեղ կմասնակցի Եվրասիական տնտեսական միության բարձրագույն խորհրդի նիստին և ԱՊՀ անդամ պետությունների ղեկավարների նախաամանորյա ավանդական հանդիպմանը։ Այնտեղ, փաստորեն, հնարավոր կլինի բարձրացնել բոլոր հետաքրքրող հարցերը»,- նշել է նա։

«Մոսկվայում, առաջնորդվելով Հայաստանի հետ հարաբերությունների դաշնակցային բնույթով, մենք միշտ պատրաստ ենք լուծել բոլոր ի հայտ եկած խնդիրները հանգիստ, պրոֆեսիոնալ և գործընկերային եղանակով», — նշել է Զախարովան։

ՌԴ ԱԳՆ պաշտոնական ներկայացուցիչ Մարիա Զախարովան այսօր ճեպազրույցում անդրադարձել է ԵՄ արտաքին քաղաքականության ծառայության ղեկավար Ժ. Բորելի հայտարարությանն ու դրա խմբագրմանը։

Այս հայտարարությունը հետագայում խմբագրվել է, նոր հայտարարության մեջ այլևս չկա Հայաստանի և Ադրբեջանի մասին հիշատակումներ։

«Մենք, իրոք, տեսել ենք ԵՄ անդամների կողմից դեկտեմբերի 17-ին ԵՄ արտաքին քաղաքականության և անվտանգության քաղաքականության գերագույն ներկայացուցչի կողմից հրապարակված հայտարարության որոշ վերանայման փաստ։ Սկզբնական տարբերակում Ադրբեջանն ու Հայաստանը հայտնվել են ցուցակին միացած երկրների ցանկում։ Սակայն որոշ ժամանակ անց նրանք հրաշքով անհետացել են այնտեղից։

Իհարկե, իմ կարծիքով, ավելի ճիշտ կլինի այս հարցը ուղղել ոչ թե բրյուսելյան ֆունկցիոներներին, այլ ֆոկուսնիկներին, քանի որ  իսկապես ինչ-որ կախարդական բան է՝ փաստաթղթերի տարբեր տարբերակների հետ ձեռնածություն անելը»,- ասել է Զախարովան։

Ադրբեջանի նախագահի օգնական, նախագահի վարչակազմի արտաքին քաղաքականության բաժնի ղեկավար Հիքմեթ Հաջիևը Newsweek-ին տված հարցազրույցում հերքել է մտավախությունները, որ Բաքուն ծրագրում է զենքի ուժով «ցամաքային միջանցք կտրել» դեպի Նախիջևան Հայաստանի տարածքով։ 

«Մենք տեսնում ենք կեղծ տագնապ և հիստերիա Հայաստանի կողմից։ Ադրբեջանն այլևս չունի ռազմական նպատակներ: Մեզ համար պատերազմն ու դիմակայությունն ավարտված են։ Մենք հասանք նրան, ինչին արժանի էինք»,- ասել է Հաջիևը։

Խոսելով Բաքվի և Երևանի բանակցությունների մասին՝ Հաջիևը նշել է, որ դեռևս մնում են «հարցեր, որոնք պետք է քննարկվեն»՝ միևնույն ժամանակ նկատելով, որ «շատ ավելի մոտ են խաղաղությանը, այլևս լուրջ խնդրահարույց հարցեր չեն տեսնում»։

Վաշինգտոնը պետք է փոխի իր դիրքորոշումը Բաքվի նկատմամբ, որպեսզի ԱՄՆը կարողանա միջնորդի դեր խաղալ Ադրբեջանի և Հայաստանի միջև խաղաղ բանակցություններում: Այդ մասին հայտարարել է Ադրբեջանի նախագահի օգնական, նախագահի աշխատակազմի արտաքին քաղաքականության հարցերով բաժնի ղեկավար Հիքմեթ Հաջիևը:

Նրա խոսքով՝ ամերիկյան կողմի մոտեցումը, որն ավելի վաղ հնչեցրել էր ԱՄՆ պետքարտուղարի Եվրոպայի եւ Եվրասիայի հարցերով օգնական Ջեյմս Օ ‘ Բրայենը (Վաշինգտոնը դատապարտել է 2023 թվականի սեպտեմբերին Ղարաբաղում Բաքվի գործողությունները) «հավասարակշռված չի եղե»։ «Դա միակողմանի մոտեցում էր, որն անհանգստություն էր առաջացրել Ադրբեջանում», — կարծում է Ալիևի օգնականը:

Հաջիեւը նշել է, որ Ազատության աջակցության ակտի 907 ուղղումը շարունակում է հիասթափություն առաջացնել Բաքվում՝ այն անվանելով «անհասկանալի» եւ «ԱՄՆ Կոնգրեսի պատմության մեջ ամենաանարդար լրամշակումներից մեկը»։

«Ադրբեջանը ոչ մի օտարերկրյա օգնության կամ աջակցության կարիք չունի։ Ադրբեջանն ինքնաբավ երկիր է, բայց այստեղ շատ կարևոր է հոգեբանական և քաղաքական հանգամանքը, քանի որ Ադրբեջանի նկատմամբ նման վերաբերմունքն անարդար է»,- հայտարարել է նա։

Այդ կետը, ինչպես հավելել է Ալիևի օգնականը, բարդացնում է Վաշինգտոնի հետ աշխատանքը Հայաստանի հետ ցանկացած խաղաղ համաձայնագրի շուրջ: «Մենք ակնկալում ենք, որ ԱՄՆ գործադիր իշխանության կողմից կարող է այլ վերաբերմունք լինել, հենց լինի՝ կարող ենք շարունակել  քննարկումները Վաշինգտոնում»,- ասել է նա։

Բաքվի բանտերում երկար ժամանակ տառապող երեսուներկու հայ ռազմագերիները վերջապես ազատ արձակվեցին և վերադարձան իրենց երջանիկ ընտանիքների գիրկը։ Ես կվերլուծեմ նրանց ազատման նախապատմությունն ու հանգամանքները՝ մատնանշելով, թե ինչու Հայաստանը պետք է շատ ավելի լավ գործարք կնքեր։

1) 2020 թվականի պատերազմի ավարտի համաձայնագիրը, որը ստորագրվել է Ռուսաստանի նախագահ Վլադիմիր Պուտինի, Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի կողմից, ներառում էր մի դրույթ, որը պարտավորեցնում էր «իրականացնել ռազմագերիների և այլ պահվող անձանց ու զոհվածների մարմինների փոխանակում»։ Փաշինյանի սխալն այն էր, որ այս դրույթի կատարման համար վերջնաժամկետ չսահմանվեց՝ դրանով իսկ թույլ տալով Ադրբեջանին հայ գերիներին պահել այնքան ժամանակ, որքան նա ցանկանում է։

2) Փաշինյանի երկրորդ սխալն այն էր, որ 2020 թվականի պատերազմի ավարտից անմիջապես հետո Հայաստանն ազատ արձակեց բոլոր ադրբեջանցի գերիներին, իսկ Ադրբեջանը` հայ գերիներից միայն մի քանիսին։ Տեղի չունեցավ «բոլորը բոլորի դիմաց» փոխանակում:

3) Թեև 2020 թվականի համաձայնագրով որևէ նախապայման չէր դրվում հայ և ադրբեջանցի գերիների ազատ արձակման համար, Փաշինյանը թույլ տվեց իր երրորդ սխալը՝ Ադրբեջանին հանձնելով Ադրբեջանի կողմից բռնագրավված Արցախում հայկական ականների տեղադրման քարտեզները՝ Ադրբեջանի կողմից ևս մի քանի հայ գերիների ազատ արձակման դիմաց։ Ալիևն կարևոր դաս քաղեց, որ կարող է ավելի շատ զիջումներ կորզել Հայաստանից հայ գերիների դանդաղ և աստիճանական ազատ արձակմամբ։ Այլ կերպ ասած, Ալիևը պարզեց, որ հայ բանտարկյալներն իր համար ավելի արժեքավոր են, եթե նրանց պահի Բաքվի բանտում, և ժամանակ առ ժամանակ մի քանիսին ազատ արձակի՝ Հայաստանից հավելյալ զիջումների դիմաց:

4) Փաշինյանի հարատև մտասևեռումը Ադրբեջանի հետ անհարկի «Խաղաղության պայմանագիր» կնքելու նկատմամբ ևս մեկ հնարավորություն է ընձեռում Ալիևին Հայաստանից հավելյալ զիջումներ կորզելու, այդ թվում՝ սահմանի կարգավորման բանակցությունների ընթացքում հայկական տարածքների նորանոր պահանջներ, ադրբեջանցիների վերադարձը Հայաստանի ներսում իրենց նախկինում բնակեցված գյուղերը, և այսպես կոչված «Զանգեզուրի միջանցքի» ընդունումը, որն Արևելյան Ադրբեջանը կապում է Նախիջևանի հետ՝ Հայաստանի վերահսկողության տակ գտնվող ճանապարհի փոխարեն, ինչպես նշված է 2020 թ. համաձայնագրում։

5) Փաշինյանը պետք է հրաժարվեր Ադրբեջանի հետ բոլոր հանդիպումներից ու բանակցություններից՝ մինչև նրա զինված ուժերի դուրսբերումը Հայաստանի ներսում գրավյալ տարածքներից և բոլոր հայ ռազմագերիների վերադարձը։

6) Ադրբեջանը համաձայնեց երկու ադրբեջանցի զինվորներին փոխանակել 32 հայ ռազմագերիների հետ, քանի որ Հայաստանը հանեց իր թեկնածությունը և չեղարկեց իր վետոն Ադրբեջանի վրա, որը հաջորդ տարի Բաքվում կհյուրընկալի կլիմայի փոփոխության միջազգային հեղինակավոր համաժողովը (COP29): Սա է միակ պատճառը, որ Ալիևը համաձայնել է իրականացնել գերիների նման անհամաչափ փոխանակում։ Հրապարակայնորեն նշված մյուս պատճառներից ոչ մեկը ճիշտ չէ։ Հակառակ անհիմն շահարկումների՝ ԱՄՆ-ը, ԵՄ-ն, ՆԱՏՕ-ն, Ռուսաստանը, Թուրքիան և Իրանը որևէ դեր չեն խաղացել այս գերիների փոխանակման կազմակերպման գործում։ Ալիևի մեծ ցանկությունն էր օգտագործել համաժողովը որպես միջոց՝ ցույց տալու Բաքուն որպես միջազգային նշանակալի մայրաքաղաք՝ ուշադրությունը շեղելու համար Ադրբեջանի կողմից մարդու իրավունքների լուրջ խախտումներից և ռազմական հանցագործություններից: Ալիևը մեծ ջանքեր է գործադրել Բաքվում այլ խոշոր իրադարձություններ անցկացնելու համար, ինչպիսիք են «Ֆորմուլա 1» մրցաշարը, «Չմիավորված երկրների շարժման» գագաթնաժողովը, «Եվրատեսիլը», «Եվրոպական խաղերը» և այլն:

7) Հաշվի առնելով Ալիևի բուռն ցանկությունը Բաքվում կլիմայի գագաթնաժողովն ամեն գնով անցկացնելու վերաբերյալ, Հայաստանը պետք է ձգտեր բոլոր հայ ռազմագերիների ազատ արձակմանը, այլ ոչ թե միայն նրանցից 32-ին: Բացի այդ, Փաշինյանը պետք է պահանջեր ազատ արձակել 2023 թվականի սեպտեմբերի վերջին Ադրբեջանի կողմից գերեվարված և բանտարկված Արցախի բարձրաստիճան պաշտոնյաներին։

8) Միևնույն ժամանակ Հայաստանում տառապում են ավելի քան 100 հազար տարագիր արցախահայեր՝ զրկված ամենաառաջնային անհրաժեշտություններից՝ բնակարանից, սննդից և դեղորայքից։ Արցախահայերը թողել են իրենց ողջ ունեցվածքն Արցախում։ Հայաստանի կառավարությունը պետք է հայց ներկայացնի Համաշխարհային դատարան՝ պահանջելով Ադրբեջանից փոխհատուցում վճարել արցախահայերի բռնագրավված ունեցվածքի համար։

9) Վերոհիշյալ հարցերը լուրջ հարցադրումներ են առաջացնում Փաշինյանի հասցեին նրա համախոհների կողմից հնչեցրած բարձր գովասանքի վերաբերյալ, որոնք հպարտանում են, որ նա մեծ հաջողություն է գրանցել 32 հայ գերիների ազատ արձակմամբ։ Նրանք չգիտեն, որ ավելի հմուտ հայ ղեկավարը կարող էր շատ ավելի զիջումներ ստանալ Ադրբեջանից, քան մի քանի հայ գերիների վերադարձը:

10) Փաշինյանի կողմնակիցները նաև հիացած են, որ տարբեր օտարերկրյա ղեկավարներ իրենց գոհունակությունն են հայտնել գերիների փոխանակման կապակցությամբ՝ հուսալով, որ դա երկու երկրներին կբերի «Խաղաղության պայմանագրի» ստորագրմանը։ Փաշինյանի կողմնակիցները չեն հասկանում, որ «Խաղաղության պայմանագիրը» իրականում խաղաղություն չի բերի երկու երկրներին, քանի որ Ալիևն արդեն խախտել է 2020 թվականի համաձայնագրի պայմանների մեծ մասը։ Ինչպիսի՞ երաշխիքներ կարող է որևէ մեկը տալ, որ նա կհարգի ապագա պայմանավորվածությունները: Այս արտաքին ուժերը մտածում են միայն մեկ բանի մասին՝ իրենց շահերի, այլ ոչ թե Հայաստանի ազգային շահերի։ Նրանք գոհ են, որ Փաշինյանը բազմիցս զիջումներ է անում Ադրբեջանին, որպեսզի միջազգային հանրությունը օգուտ քաղի Ադրբեջանի նավթից ու գազից՝ անտեսելով հայկական շահերը և աչք փակելով Ալիևի կողմից սեփական ժողովրդի մարդու իրավունքների խախտումների վրա։

Հարութ Սասունյան
«Կալիֆորնիա կուրիեր» թերթի հրատարակիչ

Թարգմանությունը՝ Ռուզաննա Ավագյանի