Ազգային ժողովի կողմից առաջին ընթերցմամբ ընդունված Ընտրական օրենսգրքի նոր խմբագրությամբ նախագծի վերաբերյալ նախնական համատեղ եզրակացության մեջ Վենետիկի հանձնաժողովի և ԵԱՀԿ/ ԺՀՄԻԳ փորձագետները, ինչպես և Հայաստանի Ընտրական օրենսգրքի նախորդ նախագծերի դեպքում, համատեղ եզրակացությունում ընդգծել են, որ իրապես ժողովրդավարական ընտրությունների կազմակերպումը պայմանավորված չէ միայն համապարփակ ընտրական օրենսգրքով, այլ` նաև քաղաքական կամքով և ընտրական օրենսդրությունը բարեխղճորեն իրականացնելու ցանկությամբ: Այս կարծիքը նրանք վերահաստատեցին նաև մայիսի 5-ին ԱԺ-ում Ընտրական օրենսգրքի նախագծի վերաբերյալ տեղի ունեցած խորհրդարանական լսումներում:

Եվրոպական փորձագետները գոհունակությամբ նշեցին, որ ՀՀ ընտրական օրենսդրության վերաբերյալ իրենց վերջին` այս տարիների ընթացքում թվով 18-րդ, եզրակացությունը թարգմանվել և տեղադրվել է ԱԺ պաշտոնական կայքէջում: Ուստի նրանք անդրադարձան իրենց առաջարկություններից և առարկությունններից միայն մի քանիսին: Նշվեց, որ, չնայած նախագիծը ներառում է փորձագետների որոշ առաջարկություններ, այդուհանդերձ կան բարելավման ենթակա որոշ դրույթներ: Մասնավորապես, դա վերաբերում է ընտրական հանձնաժողովների կազմավորմանը, այդ թվում ղեկավար պաշտոնների ընտրությանը, ինչպես նաև թեկնածուների, դիտորդների իրավունքներին, քարոզարշավի կանոնակարգմանը, ընտրությունների արդյունքների վերահաշվարկին և բողոքարկմանը:

Թեկնածուների իրավունքների մասով փորձագետները գտնում են, որ ընտրական գրավի չափը մեծ է, իսկ ՀՀ նախագահի, ԱԺ պատգամավորի և տեղական ինքնակառավարման մարմինների ընտրություններում առաջադրվելու համար սահմանված բնակության և ՀՀ քաղաքացիության որոշակի ժամկետային պահանջները անհամաչափ են: Ըստ եվրոպական փորձագետների, այս դրույթները և երկքաղաքացիների ընտրվելու բացառումը պետք է վերանայվեն: Ինչ վերաբերում է արտասահմանում գտվող ՀՀ դիվանագիտական և հյուպատոսական ներկայացուցչություններում ծառայություն իրականացնող ՀՀ ընտրողներին և նրանց ընտանիքների անդամներին էլեկտրոնային եղանակով քվեարկելու իրավունքին, ապա, ըստ փորձագետների, նման եղանակով հեռահար քվեարկությունը շատ վիճելի է, քանի որ չի կարող երաշխավորել գաղտնիությունը և ենթակա չէ տեղամասերում իրականացվող դիտարկմանը:

Լսումները կազմակերպած ԱԺ պետաիրավական հանձնաժողովի նախագահ Դավիթ Հարությունյանն ընդգծեց, որ միջազգային փորձագետների կոմից նախագծի մի շարք դրույթների քննադատությունն ընդունելի չէ: Մասնավորապես, թեկնածուների առաջադրման համար ներկայացված բնակության և ՀՀ քաղաքացիության ժամկետային պահանջը սահմանված է երկրի Սահմանադրությամբ, և վերանայման ենթակա չէ: Օրինակ, ՀՀ նախագահի թեկնածուն պետք է առնվազն վերջին 10 տարում հանդիսանա ՀՀ քաղաքացի և նույնքան մշտապես բնակվի ՀՀ-ում: «Կան դրույթներ, որոնք, մեր կարծիքով, կարող են վտանգել երկրի անվտանգությունը»,- ասաց Դ.Հարությունյանը` հավելելով, որ  ասվածի վառ օրինակներից մեկն այն դրույթի քննադատությունն է, համաձայն որի Հանրապետության նախագահի պաշտոնում չի կարող առաջադրվել երկքաղաքացին, այսինքն` նաև այլ երկրի քաղաքացիություն ունեցող անձը:

ԱԺ մշտական հանձնաժողովի նախագահի համոզմամբ, փորձագետների մի շարք առարկությունները «վատ թարգմանության կամ թարգմանությունը ճիշտ չընկալելու» արդյունք են: Այդուհանդերձ նա վստահեցրեց, որ Վենետիկի հանձնաժողովի հետ համատեղ աշխատանքը շարունակվելու է: «Այն, որ ԸՕ-ի նախագծի դրույթների մի զգալի մասը կարող է փոխվել, և մենք կընդունենք առաջարկությունների զգալի մասը, դա միանշանակ է, սակայն, կարծում եմ, ոչ բոլոր առաջարկությունները կընդունենք այն տեսքով, որ առաջարկում է Վենետիկի հանձնաժողովը»,-ասաց Դ.Հարությունյանը` հավելելով, որ աշխատանքային խումբը ներկայումս աշխատում է թվով շուրջ 4 տասնյակ, այդ թվում ընտրական հանձնաժողովների կազմավորման կարգի, ընտրությունների արդյունքների վերահաշվարկի, փոփոխությունների վրա:

Այսօր «Ալ Ղաիդա» ահաբեկչական կազմակերպության 2 անդամ Եմենում ոչնչացվել է ինքնակառավարվող թռչող սարքի միջոցով :

Agence France-Presse գործակալության տվյալներով, ինքնակառավարվող թռչող սարքի թիրախն ի սկզբանե եղել է Սաուդյան Արաբիայում «Ալ Ղաիդայի» ղեկավարներից մեկը, սակայն նրան հայտնաբերել դեռևս չի հաջողվել:

Ոչնչացված գրոհայինները Աբդուլլահ և Մուբարաք ալ Խարադ եղբայրներն էին: Նրանք կազմակերպության  ղեկավարներից էին:

Գործակալությունը չի նշում, թե որ երկրի  ռազմաօդային ուժերին է պատկանում գրոհայիններին ոչնչացրած սարքը:

Ի դեպ, ականատեսները պնդում են, որ ինքնակառավարվող թռչող սարքի վրա երևացել է ԱՄՆ դրոշը: Եմենի իշխանությունները դեռևս այս լուրը չեն մեկնաբանել:

UPI  գործակալությունը տեղեկացնում է, որ Կուբայի 67-ամյա բնակիչ Խոսե Կաստելար Կայիրոն պատրաստել է 70 մետր (230 ֆութ) երկարությամբ սիգար։

Սա Կայիրոյի առաջին նման գործը չէ: 2001 թ. նա պատրաստել էր 36 ֆութ, 2003-ին՝ 48 ֆութ, իսկ 2008-ին՝ 149 ֆութ երկարությամբ սիգարներ։

Խոսեն սկսել է 70 մետրանոց սիգարը պատրաստել այս տարվա ապրիլի 25-ից և ավարտել  մայիսի 3-ին։  Սիգարը պատրաստելու համար նա օգտագործել է իր ֆերմայում աճող բարձրորակ կուբայական ծխախոտահումքը։

Խոսեի 70 մետրանոց սիգարը հավանաբար կներառվի Գինեսի ռեկորդների գրքում։

Սիգարը կարելի է տեսնել Հավանայի զբոսայգիներից մեկում։

Քրեական գործ է հարուցված «Սպայկա» ընկերության գլխավոր տնօրեն Դավիթ Ղազարյանի դեմ: Սա պաշտոնապես հաստատված միակ տեղեկությունն է մայիսի 4-ին տեղի ունեցած այս միջադեպի մասին:

«Սպայկա» ընկերության անունը վաղուց ի վեր կապվում է Քոչարյանների որդու` Սեդրակ Քոչարյանի անվան հետ:  Թե ինչ հանցանքի մեջ են կասկածում Ղազարյանին, Պետեկամուտների կոմիտեն չի հայտնում: Լուրեր են տարածվում, որ խոսքը  փաստաթղթերի կեղծման մասին է: Ձեռնարկությանը մոտ կանգնած աղբյուրները չեն բացառում, որ պատճառը խոշոր մաքսային խախտումներն են, որոնք հնարավոր չի եղել պարտակել: Ըստ դրանց,  երեկ Դավիթ Ղազարյանը ձերբակալված է եղել կարճ ժամանակով, իսկ այսօր արդեն գլխավոր տնօրենին բաց են թողել:

Ձեռնարկությունում, որը հիմնվել է 2001 թվականին և ի սկզբանե պատկանել է այդ նույն Դավիթ Ղազարյանին, չեն կասկածում, որ տնօրենը ջրից չոր է դուրս գալու, և ոչ անհիմն: Բանն այն է, որ այս նույն Դավիթ Ղազարյանը, որը «Սպայկայի» նախկին տերն էր, 2007թվականին բռնվել էր ապօրինի ճանապարհով Հայաստան 2 — 3 տոննա մոլիբդենի փոշի ներկրելու գործում: Այն ժամանակ Ղազարյանը կարողացավ խուսափել պատժից: Մամուլում տեղեկություններ հայտնվեցին, որ Դավիթ Ղազարյանին այս կերպ փորձում էին դուրս մղել մոլիբդենի շուկայից այդտեղ վերահսկողություն իրականացնող Քոչարյանները: Վերջիններիս փայատեր դարձնելու արդյունքում Ղազարյանին հաջողվեց ոչ միայն պահպանել, այլեւ ծաղկացնել իր բիզնեսը, իսկ ճաղավանդակների հետևում հայտնվեց նրա աշխատողը`մոլիբդենի փոշի տեղափոխող բեռնատարի վարորդը:

«Սթար» առևտրային ցանցը դեռ կես տարի առաջ հասկացավ, որ դուրս է մնում մրցակցությունից. Ցանցն իրոք վերազինվելու կարիք ուներ: Ընկերության զարգացման նոր շրջանին, կայանալիք ռեբրենդինգի և բաժնետիրոջ փոփոխությանը նվիրված այսօրվա ասուլիսին առևտրային ցանցի գործադիր տնօրեն Վահան Քերոբյանը հայտարարեց, որ որոշել են նոր շունչ հաղորդել ընկերության բրենդին և արդեն սկսել էր ռեբրենդինգ։

Ըստ նրա՝ ցածր գներ ապահովելու համար ընկերությունն արդեն սկսել է որոշ ապրանքների ներկրում անմիջապես արտադրողներից՝զերծ մնալով միջնորդ օղակներից, ինչի արդյունքում` առանձին ապրանքատեսակների գները նվազել են 10-15%-ով։
Այս տարի «Սթարի» 100% բաժնեմասը ձեռք բերած Viest Assets Ltd-ի (Բրիտանական Վիրջինյան Կղզիներում գրանցված ընկերություն) ներկայացուցիչ Հովսեփ Մանուկյանը վստահեցրեց, որ գնման գործարքը իրենք հաջողված են համարում: Ընկերության տնօրենների խորհրդի նախագահը Գևորգ Աֆանդյանն է: Նշենք, որ Փետրվարին Viest Assets Ltd –ը «Սթարի» բաժնետերերից՝ Վերակառուցման և զարգացման եվրոպական բանկից և Հենրիկ Զաքարյանցից, գնել էր նրանց պատկանող 100% բաժնեմասը:

Մանուկյանը վստահեցրեց, որ «Սթարի» սեփականատերը պատրաստ է ընկերությունում ներդրումներ կատարել։ Ըստ Մանուկյանի՝ Viest Assets Ltd-ն հայկական կապիտալով ընկերություն է, և «Սթարի» կապիտալում քաղաքական կապիտալ ներառված չէ:

Ակնկալվում է, որ ռեբրենդինգի գործընթացը կավարտվի մինչև 2012թ. կեսերը: Կենտրոն վարչական շրջանում գտնվող երեք «Սթար» սուպերմարկետներ հանրությանը շուտով կներկայանան նոր տեսքով: Նախատեսվում է 10-12 նոր սուպերմարկետի բացում:

Ըստ Եվրահանձնաժողովի անդամ Սեսիլիա Մալմսթրեմի հայտարարության, Եվրոպական միությունը որոշել է մասամբ վերականգնել վերահսկողությունը Շենգենի գոտում: Նրա կարծիքով՝ այդ միջոցառումներն անհրաժեշտ են Շենգենյան գոտու կայունության ապահովման համար, հատկապես՝  «բացառիկ հանգամանքների» պարագայում:

Խոսքը հիմնականում այն մասին է, որ  Հունաստանը չի կարողանում ամբողջությամբ պահպանել իր սահմանը Թուրքիայի հետ, ինչի հետևանքով այնտեղից բազմաթիվ գաղթականներ են ապօրինի մուտք գործում իրենց երկիր:

Բացի դրանից, Մալմսթրեմը խոսել է 25 հազար թունիսցի գաղթականների մասին, որոնց Իտալիան ժամանակավոր կացության թույլտվություն է տվել: Այդ թույլտվությամբ վերջիններս փորձել են անցնել Ֆրանսիայի տարածք, սակայն Ֆրանսիայի իշխանություններին հաջողվել էր կանխել գաղթականների մուտքը երկիր:

Այսօր կառավարության նիստում Աշխատանքի եւ սոցիալական հարցերի նախարար Արթուր Գրիգորյանը հայտարարեց, թե  իրավապահները կզբաղվեն բոլոր այն դեպքերով, երբ մահացած անձանց շարունակվում է կենսաթոշակ վճարվել: Նա վստահեցրեց, որ կհարուցվեն քրեական գործեր: Իսկ թե դրանք կառնչվեն կեղծիքները պարտակած բարձրաստիճաններին, հարցին նախարարը չպատասխանեց:

Նա ասաց, որ «Փարոս» համակարգով կեղծ տեղեկանքների հիման վրա ընտանեկան նպաստ ստացող անձինք եւս կենթարկվեն պատասխանատվության։

«Ազատիչը Լեւոն Տեր-Պետրոսյանին սարքեց դհոլ Արտաշ»,- այսօր իր գաղափարական առաջնորդի` Կարլ Մարքսի տարեդարձի օրը հայտարարեց Մարքսիստական կուսակցության առաջնորդ Դավիթ Հակոբյանը:

Ըստ մարքսիստի` այնպիսի փորձված գայլ, ինչպիսին ՀԱԿ առաջնորդ Լեւոն Տեր-Պետրոսյանն էր, զարմանալիորեն կուլ տվել Սերժ Սարգսյանի «կեղծ խոստումների խայծը» եւ մեծ հարված հասցրեց ՀԱԿ-ի վարկանիշին` զրկելով նրան իր մոնոպոլ դիրքից: «Սերժ Ազատիչը վիրտուոզ խաղաց ընդդիմության հետ թղթախաղի պարտիան», — ասաց նա:

Հայ ազգային կոնգրեսն իր հեղինակությունը փրկելու երկու շանս ունի`պետք է զիջի իր մոնոպոլ դիրքը եւ պահանջի արտահերթ նախագահական ընտրություններ` ամբողջական կապիտույլացիայի ենթարկելով գործող վարչակազմին, կարծում է Հակոբյանը. սակայն արտահերթ խորհրդարանական ընտրությունների պահանջը ներկա պահին անիմաստ եւ ուշացած է:

Նա կրկնեց այն` ինչ հաճախ է ասում. Իդեալոգիան ամենակարևորն է, որ բացակայում է մեզանում: «Ընդդիմադիր դաշտի համախմբումն այսօր պատմական անհրաժեշտություն է, որը պետք է տեղի ունենա ոչ թե ինչ-որ անձի կամ ուժի, այլ «նորին մեծություն իմպերատրիցա իդեալոգիայի» շուրջ:

Հակոբյանն ունի իր բառապաշարը` «լիդերամանիային» պետք է վերջ տալ, քանի որ այն խանգարում է ընդդիմադիր դաշտի համախմբմանը: Ըստ նրա, Հայ ազգային կոնգրեսն իր գոյության ընթացքում թույլ է տվել մի շարք գռեհիկ սխալներ. «ՀԱԿ-ը նախագահական ընտրություններից հետո այդպես էլ չկարողացավ գրագետ, հասարակությանը հուզող կարգախոսներ առաջարկել եւ բավարարվեց ընդամենը մի քանի «դատարկահաչ» պահանջ-կարգախոսներով` Ազատության հրապարակում հանրահավաքներ անցկացվելու թույլտվություն, քաղբանտարկյալների ազատ արձակում, մարտի 1-ի «նոր ռազբորկաներ» Երեքն էլ ժամանակավրեպ, երեքն էլ կործանարար, երեքն էլ բացարձակ քաղաքական բովանդակություն չունեցող կարգախոսներ են»:

Մարքսիստը հարցեր էր առաջադրում, հետո ինքն էլ պատասխանում. «Ի՞նչ կապ ունի Ազատության հրապարակը նոր տնտեսական քաղաքականության եւ Արցախյան հարցի նոր դիվանագիտական հայեցակարգի հետ: ՀԱԿ-ն իր ասելիքը կարող էր արտաբերել նաեւ այլ հարթակից, եթե իհարկե ասելիք ուներ, եւ երրորդ` քաբանտարկյալ ունենալ-չունենալը չպետք է պատճառ դառնա, որպեսզի ՀԱԿ-ն իր դիրքորոշումը հայտնի իշխանության նկատմամբ:» Ըստ նրա`ՀԱԿ-ը մարտի 1-ի բացահայտում է պահանջում մի մարդուց, որի «իշխանագողության» համար է տեղի ունեցել մարտի 1-ը:

Այսօր` մայիսի 5-ին միջազգային հանրությունը նշում է  Հաշմանդամների իրավունքների համար պայքարի օրը:

ՄԱԿ-ի` Հաշմանդամների իրավունքների մասին համընդհանուր հռչակագիրն ընդունվել է 2006 թ-ի դեկտեմբերի 13-ին:

Ավելորդ է ասել, որ չնայած ներկայացված աշխատանքին, մեր երկրում հաշմանդամների իրավունքները պաշտպանված չեն, և չեն էլ կարող լինել, քանի որ նրանք սոցիալապես ամենաանապահով խավն են` չնչին բացառությամբ:Իսկ այդ դեպքում իրավունքի մասին խոսելն ավելորդ է: Ըստ սոցապ նախարարության տվյալների` 2010թ հունվարի 1-ի դրությամբ հանրապետությունում հաշվառվել է 179 257 սահմանափակ հնարավորություններ ունեցող, իսկ 2011թ հունվարի 1-ի դրությամբ` 185 080 անձ:

Այսօր տեղի է ունեցել ՀՀ կառավարության նիստ, որը վարել է վարչապետ Տիգրան Սարգսյանը։

Կառավարությունն իր ընդունած մոտ մեկ տասնյակ որոշումներով կանոնակարգել է կենսաթոշակների նշանակմանը, վերահաշվարկմանը, վճարմանն առնչվող հարաբերությունները` դրանով իսկ կատարելով 2011թ. հունվարի 1-ին ուժի մեջ մտած «Պետական կենսաթոշակների մասին» ՀՀ օրենքի պահանջները և սահմանելով կենսաթոշակի նշանակման, աշխատանքային ստաժի հաշվարկման և բազմաթիվ այլ կարգեր և ցանկեր։ Գործադիրը նաև որոշել է Արևմտյան Հայաստանում և Օսմանյան Թուրքիայի այլ վայրերում մինչև 1915 թվականը (ներառյալ) ծնված և Հայոց ցեղասպանությունը վերապրած հայերին տալ 25 հազար դրամ ամենամսյա դրամական օգնություն` այն վճարելով յուրաքանչյուր ամսվա կենսաթոշակի հետ ընդհանուր գումարով։

Որոշումներից մեկով սահմանվել է, որ կենսաթոշակի վճարման ցուցակները 5 տարվա փոխարեն պետք է պահպանվեն 10 տարի, ինչը հնարավորություն կտա կենսաթոշակի վճարման առնչությամբ ծագած խնդիրները կարգավորել նաև այդ ցուցակների օգնությամբ։

Պաշտպանվում են սպառողների շահերը

ՀՀ կառավարությունն իր նախկին որոշումներից մեկում կատարել է փոփոխություններ և լրացումներ, ինչը պայմանավորված է կաթի և կաթնամթերքի արտադրության ոլորտում օգտագործվող անարատ կաթի պահանջարկի ավելացման, ինչպես նաև սպառողների շահերի պաշտպանության անհրաժեշտությամբ։ Ներկայումս կաթի և կաթնամթերքի արտադրությունում օգտագործվում են զգալի քանակությամբ անարատ չոր կաթ, չոր յուղազերծ կաթ, կաթնային չոր շիճուկ և անարատ չոր սերուցք, որոնց մասին սպառողը լիարժեք տեղեկություն չի ստանում։ Չոր կաթի համատարած օգտագործման հետևանքով նվազում են անարատ կաթի մթերման ծավալն ու գինը։ Որոշման ընդունումը կխթանի կաթնամթերք արտադրող տնտեսվարողների միջև մրցակցության ծավալումը, անարատ կաթի պահանջարկի և մթերման գնի ավելացումը` նպաստելով անասնաբուծության զարգացմանը և սպառողների շահերի պաշտպանությանը։

Կառավարությունը հաստատել է ձկնաբուծական մթերքների արտադրության ձեռնարկություններում վտանգի աղբյուրների վերլուծության և կրիտիկական կետերի հսկման (ՎԱՎԿԿՀ) համակարգի ներդրման միջոցառումների ծրագիրը, որը կերաշխավորի թողարկվող մթերքի անվտանգությունը` նպաստելով արտահանման խթանմանն ու սպառողների շահերի պաշտպանությանը։ Մեկ այլ որոշմամբ լրացումներ են կատարվել կառավարության ավելի վաղ ընդունած որոշման մեջ և ՀՀ անտառների վերականգնման և զարգացման հիմնադրամի կողմից իրականացվելիք «Երևանի անտառտնտեսության Էրեբունու անտառպետության 51 հա տարածքի անտառապատման աշխատանքներ» ծրագրով ոռոգման համակարգի ստեղծման և ցանկապատման աշխատանքները ֆինանսավորելու նպատակով ՀՀ գյուղատնտեսության նախարարությանը հատկացվել է 59 միլիոն դրամ։ Կիսաանապատային գոտու անբարենպաստ պայմաններում ոռոգման համակարգի ստեղծման և ցանկապատման միջոցով կանտառապատվի 20 հեկտար տարածք, ինչը կնպաստի բնակլիմայական սանիտարահիգիենիկ և ռեկրեատիվ պայմանների բարելավմանը։

Գործադիրն իր նախկին որոշումներից մեկում կատարել է փոփոխություններ, որոնց արդյունքում ակնկալվում է կատարելագործել ընդերքօգտագործման ոլորտում տեղեկատվության պահպանման և տրամադրման գործընթացը, ինչն իր հերթին կնպաստի ընդերքի արդյունավետ և լիարժեք օգտագործմանը։

Վերաբաշխում կատարելով 2011թ. պետբյուջեում, փոփոխություններ և լրացումներ` իր ավելի վաղ ընդունած որոշումներից մեկում, կառավարությունը 285 միլիոն դրամ է հատկացրել Սևան-Մարտունի-Գետափ ճանապարհահատվածի առաջնահերթ հիմնանորոգման ֆինանսավորումն իրականացնելու համար։

Գործադիրն ընդունել է ՀՀ արտակարգ իրավիճակների նախարարության ճգնաժամային կառավարման կենտրոնի և փրկարար ծառայության վարչական շենքի կառուցման որոշում։ Շենքը կառուցվելու է Երևանի Դավիթաշեն 4-րդ թաղամասի Ա.Միկոյան փողոց 109/8 հասցեում։ Որպես կառուցապատող ներգրավվել է «Լև ընդ Դավ գրուպ» ՍՊԸ-ն։

Արմավիրի մարզի Լուկաշինի, Ջրաշենի, Քարակերտի, Շենավանի և Հուշակերտի համայնքներում առաջացած ֆինանսական ծանր կացությունը մեղմելու համար պարտադիր ապահովագրության վճարի և եկամտահարկի գծով չկատարված պարտավորությունների մարմանն աջակցելու նպատակով ս.թ. առաջին կիսամյակում Արմավիրի մարզպետարանին է հատկացվել մինչև 40 մլն 232 հազար 300 դրամ։

Պարզեցվում է գնացքով տեղափոխվող ապրանքների մաքսային ձևակերպման ընթացակարգը

Փոփոխություններ և լրացումներ կատարելով իր նախկին որոշումներից մեկում, գործադիրը պարզեցրել է միջպետական հաղորդակցության մարդատար գնացքի բեռնային վագոնով տեղափոխվող, ինչպես նաև ուղևորային մասում տեղակայված, սակայն օրենքով սահմանված չափերը գերազանցող ապրանքների մաքսային հսկողության և մաքսային ձևակերպման ընթացակարգերը։ Լրացում կատարելով ավելի վաղ ընդունած իր մեկ այլ որոշման մեջ, կառավարությունը ՀՀ տրանսպորտի և կապի նախարարության կանոնադրական գործառույթներում նախատեսել է զորահավաքային նախապատրաստության, զորահավաքի և քաղաքացիական պաշտպանության միջոցառումների ծրագրման և իրականացման դրույթ։

Գործադիրն ի գիտություն է ընդունել ՀՀ կառավարության աշխատակազմի ղեկավարի հաղորդումը 2010թ. ընթացքում բարեգործական և մարդասիրական օգնության ծրագրերով կատարված աշխատանքի վերաբերյալ, որի համաձայն նման ծրագրեր է իրականացրել միջազգային և հանրապետական 135 կազմակերպություն։ Դրանցից են Հայաստանի ազգային մրցունակության հիմնադրամը` 5 մլրդ 82 մլն դրամ, «Մատենադարան» հիմնադրամը (Մատենադարանի նոր մասնաշենքի կառուցման 4-րդ փուլի աշխատանքների իրականացում)` 3 մլրդ 62 մլն դրամ, «Սիմոնյան» կրթական հիմնադրամը (առաջավոր տեխնոլոգիաների ուսուցման երիտասարդական կենտրոն)` 2 մլրդ 48 մլն դրամ և այլ ճանաչված կազմակերպություններ։

Կառավարության որոշմամբ ՀՀ սեփականությունը հանդիսացող, որևէ պետական կառավարչական հիմնարկի հաշվեկշռում չհաշվառված «Շիմիձու» կորպորացիայի կողմից Նուբարաշենի թափոնակուտակչի տարածքում կառուցված 1 մլրդ 25 մլն 866 հազար 800 դրամ արժեքով կենսագազի հավաքման և այրման կառույցը նվիրվել է Երևանի քաղաքային համայնքին։ Մեկ այլ որոշմամբ Տավուշի մարզի Վազաշենի գյուղական համայնքի սողանքային գոտում գտնվող բնակելի տների քանդումից հետո հողամասերը փոխադրվել են պետական սեփականության պահուստային հողերի կատեգորիա։

Փոփոխելով ՀՀ քաղաքացիություն ստանալու, ինչպես նաև ՀՀ քաղաքացիությունը դադարեցնելու համար անհրաժեշտ փաստաթղթերի ցանկը և դրանք ներկայացնելու կարգը սահմանելու` իր ավելի վաղ ընդունած որոշումը, կառավարությունը նպատակ ունի ավելի արդյունավետ կազմակերպել այդ գործառույթների հետ կապված փաստաթղթաշրջանառությունը։

Կատարելագործվում է իմունականխարգելման գործընթացը

ՀՀ կառավարությունը հաստատել է`

— ՀՀ առողջապահության նախարարության ԳԱՎԻ աջակցությամբ իրականացվող առողջապահության համակարգի հզորացման և նախարարության «Իմունականխարգելման ազգային ծրագրի ծառայությունների աջակցություն» դրամաշնորհային ծրագրերի արտաբյուջետային հաշիվների միջոցների ծախսման 2011թ. նախահաշիվները,

-ՀՀ կառավարության նախկին որոշումներից մեկով հաստատված «Տավարաբուծության զարգացման 2007-2015 թթ. ծրագրի» իրականացման նպատակով ստեղծված գանձապետական հատուկ հաշվի տնօրինման կարգը, որը հնարավորություն կտա առավել թափանցիկ դարձնել արտերկրից տոհմային երինջների ներկրման և հատկացման գործընթացը,

— ՀՀ պետական բուհերի 2011/2012 թթ. ուսումնական տարվա` պետության կողմից ուսանողական նպաստների ձևով ուսումնական վարձի լրիվ փոխհատուցմամբ (անվճար) առկա ուսուցմամբ մագիստրոսի կրթական ծրագրով 1684 տեղ, որից պարտադիր զինվորական զորակոչից տարկետման իրավունքով` 387 տեղ,

-ՀՀ մարդու իրավունքների պաշտպանի աշխատակազմի «Մարդու իրավունքների պաշտպանին միջազգային և դոնոր կազմակերպությունների կողմից հատկացվող ֆինանսական աջակցություն» ծրագրի արտաբյուջետային հաշվի միջոցների 2011թ. ծախսման նախահաշիվը,

-2011թ. մայիսի 26-ից 27-ը Երևանում կազմակերպվելիք «Սփյուռքի հեռանկարները գլոբալացվող աշխարհում» միջազգային համաժողովի ծրագիրը։

Կմեծանա դատարանների դերը

ՀՀ կառավարությունը հավանություն է տվել «ՀՀ դատական օրենսգրքում փոփոխություններ և լրացումներ կատարելու մասին» ՀՀ օրենքի նախագծին, որի ընդունմամբ կկատարելագործվի դատավորների նշանակման ներկայիս ընթացակարգը։

Կառավարության հավանությունն է ստացել «Հարկերի մասին» ՀՀ օրենքում լրացում կատարելու օրենքի նախագիծը, որով կընդլայնվի փաստաթղթերն էլեկտրոնային եղանակով ներկայացնելու շրջանակը` դրանով իսկ բարելավելով երկրի գործարար միջավայրի ցուցանիշը։ Հավանության է արժանացել «Ներքին շուկայի պաշտպանության մասին» և ևս երկու օրենքներում փոփոխություններ և լրացումներ կատարելու օրենքների նախագծերի փաթեթը, որի նպատակն է ապահովել ոչ խտրական մոտեցում տեղական և ներմուծվող արտադրանքի նկատմամբ և խուսափել շահագրգիռ տարբեր երկրների կողմից Առևտրի համաշխարհային կազմակերպության շրջանակներում ՀՀ նկատմամբ հնարավոր առևտրային վեճերի նախաձեռնումից։ Նույն նպատակին կծառայի նաև կառավարության հավանությունն ստացած «Ծխախոտի արտադրանքի համար հաստատագրված վճարների մասին» ՀՀ օրենքում փոփոխություններ կատարելու օրենքի նախագիծը։

Գործադիրը հավանություն է տվել «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» ՀՀ օրենքում փոփոխություններ կատարելու օրենքի նախագծին, որով մինչև 2011թ. մայիսի 1-ը 27 տարին լրացած, պարտադիր զինվորական ծառայությունից խուսափած քաղաքացիներին հնարավորություն կտրվի սահմանված ժամկետում մուծել համապատասխան վճարը, վերադառնալ հայրենիք և ազատվել քրեական հետապնդումից։

Գործադիրը քննարկել է Ազգային ժողովի մի խումբ պատգամավորների` օրենսդրական նախաձեռնության կարգով ներկայացրած «Գովազդի մասին» և «Հեռուստատեսության և ռադիոյի մասին» ՀՀ օրենքներում փոփոխություններ և լրացումներ կատարելու նախագծերի փաթեթը, որի վերաբերյալ եզրակացության համաձայն այն ունի լրամշակման կարիք։ Կառավարությունը բացասական եզրակացություն է տվել Ազգային ժողովի պատգամավոր Վիկտոր Դալլաքյանի` օրենսդրական նախաձեռնության կարգով ներկայացրած «Առևտրի և ծառայությունների մասին» ՀՀ օրենքում լրացում կատարելու օրինագծի վերաբերյալ։ Ըստ էության առաջարկվում է մրգերի ու բանջարեղենի բացօթյա վաճառքի իրականացում, ինչը հակասում է օրենքի պահանջներին։

Կառավարությունը քննության է առել ՀՀ Ազգային ժողովի պատգամավորներ Հեղինե Բիշարյանի և Հովհաննես Մարգարյանի` օրենսդրական նախաձեռնության կարգով ներկայացրած «Չեռնոբիլի ատոմային էլեկտրակայանի և այլ միջուկային աղետներից տուժած քաղաքացիների սոցիալական պաշտպանության մասին»  ՀՀ օրենքի նախագծի լրամշակված տարբերակը, որով լրացուցիչ արտոնություններ են նախատեսվում աղետից տուժածների համար։ Գործադիրը խնդրի վերաբերյալ տվել է բացասական եզրակացություն։

Վերը նշված օրենքների նախագծերը և կառավարության եզրակացությունները սահմանված կարգով կներկայացվեն Ազգային ժողով։