Մայիսի 5-ին Կազանում մեկնարկեց Շախմատի աշխարհի չեմպիոնի կոչման համար պայքարող հավակնորդների մրցաշարը, որտեղ հանդես է գալիս նաև Հայաստանի առաջատար գրոյսմայստեր Լևոն Արոնյանը: Վերջինիս 1/8 եզրափակիչում որպես մրցակից բաժին էր ընկել Ալեքսանդր Գրիշչուկը:

Մեր գրոյսմայստերը առաջին պարտիայում խաղալով սպիտակներով, չկարողացավ առավելության հասնել ռուսաստանցու նկատմամբ, և հանդիպումը ավարտվեց ոչ-ոքի: Հատկանշական է, որ մրցաշարի մյուս 3 զույգերը նույնպես իրենց առաջին պարտիաները ոչ-ոքի ավարտեցին:

Մյուս զույգերում մրցում էին հետևյալ զույգերը.

Ռաջաբով -Կրամնիկ 0.5-0.5 Կամսկի — Թոփալով 0.5-0.5 Մամեդյարով — Գելֆանդ 0.5-0.5:

Տեղեկացնենք, որ զույգերի միջև երկրորդ պարտիաները կկայանան այսօր` Երևանի ժամանակով ժամը 17:00-ին:

«Դժբախտաբար, հայ ժողովրդի համար նշանակալի օրը`Մայիսի 8-ը իմ նմանների համար տոն չէ, որովհետև զինադադարից հետո հայերիս չհաջողվեց ստեղծել մի այնպիսի երկիր, որտեղ մեր ժողովրդի նվազագույն արժանապատվությունը պահպանվեր ու չկեղեքվեր: Ցավալիորեն, այս օրը տոնելը ձև է, բովանդակությունից զուրկ »,- այսօր ասաց Շուշիի առանձնակի գումարտակի հրամանատար, «Սարդարապատ» շարժման նախաձեռնող խմբի համակարգող Ժիրայր Սեֆիլյանը:

Սեֆիլյանը  կարծում է , որ արցախյան պատերազմից հետո հայերին չի հաջողվել կարգին պետություն ստեղծել, որի օրինակը ազատամարտիկ Սասուն Միքայելյանի բանտում  գտնվելու փաստն է:
«Այսօր ազատագրված Շուշին թերբնակեցված է: Ու այս ողբալի պատկերը մեզ պետք է զգաստացնի»,- ասաց նա, համարելով, որ Շուշիի ազատագրումը այս օրերին տոնելը կարծես խրախճանք լինի ժանտախտի ժամանակ:

Սեֆիլյանը համոզված էր, որ Շուշիի ազատագրման նախօրեին աշխարհում չէր գտնվի մի հայ, որը դեմ լիներ Շուշիի ազատագրմանը: «Եվ հենց դա էր մեր հաղթանակի պատճառը, որ մարտիկները իրենց թիկունքին զգում էին ժողովրդի շունչը,-  ասաց նա,- Շուշիի ազատագրման պլանից ես ավելի շատ այդ օրերի մթնոլորտն եմ հիշում: Նշանակալիցն այն էր, որ այդ օրերին հարյուրավոր, հազարավոր տղամարդիկ հերթի էին կանգնած՝ մասնակցելու Շուշիի ազատագրման գործընթացին, քանի որ հայկական կողմը այնքան ռեսուրսներ չուներ, որ բոլորին զիներ: Այդ օրերին ավելի շատ հիշում եմ ոգու բարձր վիճակը, մեր ժողովրդի միակամությունը»:

Իսկ այսօր, ըստ բանախոսի, պատկերը փոխվել է: Մարդիկ հոգնել են: Իշխանություն-ընդդիմություն երկխոսությունն ակնհայտ է եւ դրա շուրջ առանձնապես խորը վերլուծություններ չարժե անել. երկխոսության հիմնական նպատակը Սերժ Սարգսյանի մղումն է՝ ընտրություններից առաջ երկրում հանգիստ մթնոլորտ ապահովել։

Սեֆիլյանի համոզմամբ՝ մեր այսօրվա խնդիրն է գտնել մի գլխավոր օրակարգ, որի շուրջը պետք է համախմբել ժողովրդին. «Այսօր այդ օրակարգը օր առաջ հայրենի հողակտորի վրա ազգային պետություն ստեղծելն է: Եկող ժամանակահատվածի գլխավոր օրակարգը սա է լինելու, որի շուրջ համախմբվելու է հայությունը»:

ՀՀ Պետական եկամուտների  կոմիտեն հրապարակել է 2011 ֆինանսական տարվա առաջին հազար խոշոր հարկ վճարողների ցանկը` ըստ վճարված հարկերի և տուրքերի մեծության: Ցանկում ընդգրկված են նաև ՀՀ պետական 14 բուհ և կրթական ծառայություն մատուցող կազմակերպություններ£ Նրանց մեջ առաջատարը Երևանի պետական համալսարանն է  /106-րդ տեղ/  155 մլն դրամ վճարման ցուցանիշով: Նրան հաջորդում են Մ.Հերացու անվան բժշկական պետական համալսարանը  /116-րդ տեղ/  և Խ.Աբովյանի անվան հայկական պետական մանկավարժական համալսարանը /220-րդ տեղ/,  համապատասխանաբար, 146 մլն  և 77 մլն դրամ ցուցանիշներով:

Ըստ ՀՀ Կրթության և գիտության նախարարության մամլո ծառայության, ընդհանուր առմամբ ցանկում ընդգրկված կրթական կազմակերպություններն առաջին եռամսյակում պետական բյուջե են մուծել ավելի քան 741 մլն դրամի հարկեր:

ՌԴ Պետդումայի և «Եդինայա Ռոսիա» կուսակցության բարձրագույն խորհրդի նախագահ Բորիս Գռիզլովն այսօր հայտարարել է, որ խորհրդարանի վերին պալատի նախագահ Սերգեյ Միրոնովը պետք է հանձնի մանդատը:

Գռիզլովն ընդգծել է, որ Միրոնովը ներկայացնում է Սանկտ Պետերբուրգի օրենսդիր մարմինը, որտեղ գերակշիռ մեծամասնություն են կազմում «Եդինայա Ռոսիա» կուսակցության պատգամավորները:

«Եթե նա թույլ է տալիս անհամաձայնություն ցուցաբերել ոչ թե իշխանության մարմնի հետ, այլ փաստացի հակադրում է իրեն և իր դիրքորոշումը քաղաքային իշխանություններին, ապա ճիշտ չի՞ լինի, որ հանձնի մանդատը: Թող փնտրի այնպիսի իշխանություն, որը պատրաստ է ներկայացնել»,- ասել է  Գռիզլովը:

Միրոնովի նկատմամբ վերաբերմունքի կտրուկ փոփոխության պատճառն իր կուսակցության վերջին համագումարի ժամանակ իշխող կուսակցության նկատմամբ արտահայտած քննադատությունն է: Նա հայտարարել էր, որ մարտին կայանալիք նախագահական ընտրությունների ժամանակ իր ղեկավարած «Արդար Ռուսաստանը» չի աջակցելու «Եդինայա Ռոսիա»-ի թեկնածուին:

Լիբիայի արտգործնախարարությունը քննադատել է միջազգային կոալիցիայի երկրների (կոնտակտային խմբի)` Մուամար Քադաֆիի գումարներն ապստամբների ֆինանսավորման նպատակով օգտագործելու որոշումը:

«Լիբիայի հարցով զբաղվող կոնտակտային խումբը տարօրինակ և կասկածելի հեղինակություն ունեցող կառույց է, որը չունի իրավական ուժ»,- հայտարարել է Լիբիայի արտգործնախարարի տեղակալ Հալեդ Քաիմը՝ ընդգծելով, որ Լիբիայի իշխանությունները թույլ չեն տալու հումանիտար օգնություն տեղափոխող նավերի մուտքը  Միսուրատա քաղաքի նավահանգիստ:

«Տրիպոլին երբեք թույլ չի տա, որ այդ նավերով զինամթերք ներմուծեն և քաղաքից  դուրս բերեն ահաբեկիչներին»,-ասել է արտգործնախարարը:

Հիշեցնենք, որ նախօրեին Հռոմում կայացավ կոնտակտային խմբի հերթական հանդիպումը: Խմբում ընդգրկված են Լիբիայի ռմբակոծություններն իրականացնող միջազգային կոալիցիայի անդամ երկրները, ինչպես նաև ՆԱՏՕ-ի և ՄԱԿ-ի մի շարք միջազգային կազմակերպություններ և Արաբական երկրների լիգան:

Հանդիպման ժամանակ ԱՄՆ պետքարտուղար Հիլարի Քլինթոնն առաջարկել է օգտագործել Մուամար Քադաֆիի սառեցված հաշիվների գումարները, որոնք գտնվում են ամերիկյան բանկերի հսկողության տակ: Հիշեցնենք, որ Վաշինգտոնը լիբիացի ապստամբներին արդեն 30 մլն դոլար է հատկացրել:

ՀՀ Նախագահի հովանավորությամբ`Հայկական գրատպության 500 ամյակի շրջանակում, առաջին անգամ Հայաստանը մասնակցեց LA Times թերթի կազմակերպած ամենամյա Գրքի փառատոնին: Լոս Անջելեսում ՀՀ գլխավոր հյուպատոսության եւ ՀՀ Մշակույթի նախարարության համատեղ ջանքով եւ ՀԲԸՄ համահովանավորմամբ, փառատոնին ներկայացվեց հայկական մշակութային ժառանգությունը` Նարեկացուց մինչեւ ժամանակակից հայ գրողների լավագույն հավաքածուները, պատմության, արվեստի տարբեր բնագավառների օտարալեզու եւ հայերեն գրականություն, պատկերազարդ մանկական գրքեր, տեսերիզներ ու ձայնասկավառակներ:

Հայկական տաղավարն առանձնանում էր հատուկ ձեւավորմամբ եւ այն LA Times-ի կողմից ճանաչվեց ամենեգեղեցիկ տաղավարներից մեկը:

Ողջունելով հայ եւ օտար այցելուներին` գլխավոր հյուպատոս Գրիգոր Հովհաննիսյանը հայտարարեց, որ Հայաստանի մասնակցությունը խոշորագույն փառատոնին կարեւոր քայլ է` Հայկական գրատպության 500-ամյա ժառանգությունն աշխարհին ներկայացնելու իմաստով, եւ մեծ պատասխանատվություն է երկու օրերի ընթացքում այն պատշաճ մատուցել` առաջին տպագիր գրքից մինչեւ էլէկտրոնային գրականություն:

Առանձին ներկայացվեցին նաեւ ՀԲԸՄ Վիրտուալ հայկական համալսարանը, Կոմիտաս վարդապետի կյանքը ներկայացնող էլէկտրոնային գիրքը, Սարոյանի ծննդյան 100 ամյակի առիթով տպագրված` գրողի լուսանկարների ժողովածուն:

Հայկական տաղավարն այցելուներին հայտարարեց, որ ՅՈՒՆԵՍԿՕ-ի կողմից Երեւանը 2012թ. հռչակվել է գրքի համաշխարհային մայրաքաղաք:

Փառատոնի երկու օրերի ընթացքում ընթերցասերների համար հնարավորություն ստեղծվեց զրուցել հայ ժամանակակից գրողների հետ, ովքեր իրենց հերթին փառատոն էին բերել իրենց ժողովածուները:

Հայկական տաղավարում հնչում էր ազգային երաժշտություն, այցելուներին բաժանվում էին օտարալեզու գրականության նմուշներ եւ հայկական մանրանկարչության դրվագներով պատկերազարդված շապիկներ:

Խոշորագույն փառատոնին հայկական առաջին ներկայությունը ողջունեց Հարավային Կալիֆորնիայի համալսարանի պրոֆեսոր Հրայր Դեքմեջյանը, ով ներկայացրեց ժամանակակից անգլալեզու գրականությունը հայերի ցեղասպանության մասին։

Ըստ ՀՀ ԱԳՆ Մամուլի եւ տեղեկատվության վարչության հաղորդագրության, փառատոնի ավարտին գլխավոր հյուպատոս Գրիգոր Հովհաննիսյանը հայտարարեց, որ Մշակույթի նախարարի առաջարկով հաջորդ տարի Հայաստանը կստանձնի LA Times-ի Գրքի փառատոնի գլխավոր հովանավորի դերը:

Մայիսի 5-ին`ժամը 17.00-ին ահազանգ է ստացվել, որ Արագածոտնի մարզի Օհանավան գյուղում` եկեղեցու հարակից ձորը տղամարդ է ընկել, անհրաժեշտ է փրկարարների օգնությունը:

Դեպքի վայր է մեկնել մարզային փրկարական վարչության փրկարարական ջոկատը:

Փրկարարների ուժերով ձորից (50-60մ խորությունից) դուրս է բերվել Երեւան քաղաքի բնակիչ,1946թ.-ին ծնված Հրանտ Արամյանի  դին եւ հանձնվել շտապօգնության բրիգադին:

Բրազիլիայի Գերագույն դատարանը օրինական ընթացք է տվել միասեռ ամուսնություններին: Agence France-Presse գործակալությունը տեղեկացնում է, որ նման միություններ կազմող մարդիկ կարող են օգտվել ավանդական ամուսնական զույգերի իրավունքներից: Դատավորներից մեկն ընդգծել է, որ որևէ մեկն իրավունք չունի մարդկանց զրկելու իրավունքներից` միասեռական լինելու պատճառով:

Բրազիլական Սան Պաուլո քաղաքում ավանդաբար միասեռականների շքերթ է անցկացվում, որին կտրականապես դեմ է կաթոլիկ եկեղեցին:

Լատինական Ամերիկայում միասեռականների ամուսնությունն առաջին անգամ օրենքի ուժ է ստացել Ուրուգվայում 2007 թվականին, իսկ 2010 թվականին՝ Արգենտինայում:

Իրանի իշխանությունները ձերբակալել են նախագահ Մահմուդ Ահմադինեջադի մի խումբ կողմնակիցներին, որոնց մեղադրում են կախարդության և ջիներին կանչելու համար:

The Guardian թերթի տեղեկություններով, ձերբակալվածների շարքում է նաև Աբաս Հաֆարը, որին իշխանությունները մեղադրում են մետաֆիզիկայի բնագավառում հատուկ հմտությունների տիրապետելու և անհայտ աշխարհների հետ կապ ունենալու համար:

Ընդհանուր առմամբ, ձերբակալվել է 25 «կախարդ»:

Թերթը նաև գրում է, որ ձերբակալությունների պատճառը Ահմադինեջադի  և Իրանի Գերագույն առաջնորդ Ալի Համենեիի հակամարտությունն է, որը ծագել է այն բանից հետո, երբ Համենեին հրաժարվեց ընդունել հետախուզության նախարար Հեյդար Մոսլեհի հրաժարականը:

Որոշ իրանական լրատվամիջոցների դիտարկմամբ, նախարարի պաշտոնանկությունը նախագահը ծրագրել է  իր վարչակազմի նախկին ղեկավար Էսֆանդյար Ռահիմ Մաշեի հետ, ում Ահմադինեջադն իր իրավահաջորդն է համարում:

Նախկինում Մաշեն զբաղեցնում էր առաջին փոխնախագահի պաշտոնը, սակայն Համենեին 2009 թ.-ին նրան ազատեց աշխատանքից:

Այսօր Երեւանի շուկաներում կարտոֆիլը ռեկորդային գին է սահմանել` 500 դրամ մեկ կիլոգրամի համար: Մոտավորապես այդքան արժե նարինջը. Կարող ենք արձանագրել, որ Հայաստանում կարտոֆիլը դադարեց անապահով բնակչության հիմնական սննդատեսակը լինելուց, վերջինիս ձգելով շոգ եղանակին տհաճությամբ մարսվող ձավարեղենի, կամ ճամփեզրից հավաքած խոտի հույսին: Բնակչության շրջանում կարտոֆիլի թանկացումը կապում են գենետիկապես մոդիֆիկացված բանջարեղենի մուտքն ապահովելու հետ: Գենետիկական փոփոխությունների միջոցով ստացված կարտոֆիլն ու լոլիկը արգելված են եվրոպական երկրներում, մինչդեռ մեզ մոտ դրանց ներկրումը օրինական է համարվում, և թանկացնելով  էկոլոգիապես մաքուր բանջարեղենը, հնարավոր է լուծել էժանագին և վտանգավոր տեսականու սպառման հարցը: