Վերջին շրջանում զանազան միջնորդությունները միջնորդություն չեն բառի դասական իմաստով, այնպես, ինչպես հայկական հանրությունը ընկալում էր այդ եզրույթը ԵԱՀԿ Մինսկի խմբի դեպքում, երբ առաջարկներ էին մշակվում և ներկայացվում կողմերին։

Այս մասին մամուլի ասուլիսի ժամանակ ասաց արտգործնախարար Արարատ Միրզոյանը։

Նա ընդգծեց, որ վերջին շրջանում այդ միջնորդությունները առավելապես նոր հանդիպումներ կազմակերպելու մասին են։

Միրզոյանը խոսեց նաև այն մասին, թե արդյո՞ք Բաքուն պատրաստ է ստորագրել խաղաղության պայմանագիր ՌԴ-ում։

«Չգիտեմ, ադրբեջանական կողմից այդպիսի հավաստիացում ո՛չ փակ և ո՛չ էլ հրապարակային հանդիպումների ընթացքում չեմ լսել։ Եթե Սերգեյ Լավրովը այդպես է պնդում, գուցե ինչ-որ հիմք ունի»,- ասաց Միրզոյանը։ 

Հայաստանի իշխանություններն աշխատում են ականների մասին տեղեկություններ ստանալու ուղղությամբ։ Այս մասին հունվարի 23-ին լրագրողների հետ հանդիպման ժամանակ հայտարարեց Հայաստանի արտգործնախարար Արարատ Միրզոյանը։

«Փոխադարձ կառուցողական մոտեցման և վստահության ամրապնդման դեպքում մենք կկարողանանք վերականգնել հավաստի տեղեկատվությունը և այն փոխանցել Ադրբեջանին։ Բայց այս գործընթացը պետք է տեղի ունենա միջազգային գործընկերների միջոցով։ Սա թույլ կտա համոզվել, որ հայկական կողմը հավաստի տեղեկատվություն է փոխանցում»,- նշեց նա։

Սոչիում փառատոնի ժամանակ սպանվել է ՈՒՀԱ (Ուրախների և հնարամիտների ակումբ) «Հարավային մայրաքաղաք» թիմի նախկին անդամ, 31-ամյա Ամիրան Գևորգյանը։ Նա ծեծկռտուքի մեջ է մտել 32-ամյա դաղստանցի Արթուր Ռասուլովի հետ, ինչի արդյունքում կոմայի մեջ է ընկել։ Այս մասին հայտնում է SHOT հեռագրային ալիքը։

Հեռուստաալիքի տվյալներով՝ միջադեպը տեղի է ունեցել հինգշաբթի՝ հունվարի 18-ին, Ժեմչուժինա հյուրանոցի մոտ։ Տղամարդկանց միջև ծեծկռտուք է սկսվել, որի ժամանակ Ռասուլովը հայազգի հումորիստին նետել է աստիճանների վրա։ Գևորգյանը գլխի ծանր վնասվածք է ստացել և հոսպիտալացվել։ Տուժածի մոտ ախտորոշվել է գանգուղեղի և գանգի հիմքի կոտրվածք, գլխի բաց վնասվածք, գլխուղեղի ծանր կոնտուզիա, էպիդուրալ հեմատոմա: ՈՒՀԱ-ի խաղացողը կոմայի մեջ է ընկել և մի քանի օր անց  գիտակցության չգալով՝ մահացել։

Դեպքին ներկաները սկզբում հայտնել են, որ հումորիստ դերասանն ընկել է երկու մետր բարձրությունից, իսկ հետո պարզվել է, որ դրան նախորդել է ծեծկռտուք։ Ներկա պահին իրավապահ մարմինները փնտրում են Արթուր Ռասուլովին։

Ադրբեջանական լրատվամիջոցները և թելեգրամ ալիքները նախորդ շաբաթ լայնորեն տարածեցին Արցախի նախկին նախագահներ Արկադի Ղուկասյանի, Բակո Սահակյանի, Արայիկ Հարությունյանի, Հանրապետության պաշտպանության նախկին նախարար Լևոն Մնացականյանի լուսանկարները։ Դրանցով Բաքուն փորձ արեց ներկայացնել, թե ինչ լավ պայմաններում են պահվում առեւանգված արցախցի գործիչները, ինչը, ցավոք, լայն տարածում ստացավ նաեւ հայկական տիրույթում։

Ադրբեջանական քարոզչամեքենային ընդառաջ գնալով՝ սոցցանցերի հայկական տիրույթում անգամ որոշ հայեր սկսել են պախարակել ու անվանարկել գերության մեջ գտնվող գործիչներին։ Դրանց արձագանքել է Բաքվի բանտի «շքեղությունն» իր մաշկի վրա զգացած ռուս-իսրայելցի բլոգեր Ալեքսանդր Լապշինը։

Նկարների տակ նա հանդես է եկել մեկնաբանությամբ՝ նշելով, որ չի դադարում զարմանալ բազմաթիվ հայերի ֆանտաստիկ ինֆանտիլիզմի և միամտության վրա:

«Հայաստանի բնակիչները բացարձակապես չեն հասկանում, թե ինչ է Ադրբեջանը, ովքեր են ադրբեջանցիները և ինչ է Ալիևի ռեժիմը։ Վերջին օրերին ադրբեջանցիները տարածել են «ուրախ» հայ բանտարկյալների, այդ թվում՝ Արայիկ Հարությունյանի, Դավիթ Բաբայանի և այլոց լուսանկարները, ովքեր իբր գրադարանում գրքեր են կարդում, հեռուստացույց են դիտում և նույնիսկ ջեռուցման համակարգեր կան խցում (Արայիկ Հարությունյանի): Դրանից հետո շատ հայեր գրում են «Նրանց մոտ ամեն ինչ լավ է, ամեն ինչից գոհ են, հանգստանում են», և այս հիմար մեկնաբանությունները տասնյակ լայքեր են հավաքում այլ միամիտ հիմարներից։

Ժողովո՛ւրդ, դուք չեք հասկանում, որ դրանք բեմադրված լուսանկարներ են։ Ինձ պահեցին Բաքվի Քուրդախանի բանտում և տարան գրադարան՝ ալիևյան լրատվամիջոցների համար լուսանկարվելու համար։ Ադրբեջանցիներն ինձ գիրք նվիրեցին, ասացին՝ ժպտա, այլապես կզրկվեմ բանտի բակում զբոսանքներից։ Հետո ինձանից վերցրեցին գիրքը և վերադարձրին կեղտոտ ու գարշահոտ խուց, որտեղ ինձ պահեցին ամբողջ յոթ ամիս։

Բանտի խցերն իրականում շատ ավելի վատն են՝ նրանց տեղափոխել են բժշկական շենք՝ լուսանկարվելու։ Բժշկական շենքում կան մի քանի էլիտար խցեր, որոնք նման են լուսանկարում երևացողներին։ Սովորական խցերում ջեռուցում չկա, բանտարկյալները ձմռանը սառչում են, քնում են պատառոտված սովետական վերմակների տակ՝ ամբողջ հագուստը հագած։ Այնտեղ էլ հեռուստացույց չկա, բայց ինձ տարան բժշկական շենքի մի խուց, որտեղ հեռուստացույցներ կային լուսանկարելու համար։

Երբ կարդում եմ այն անհեթեթությունը, որ հայերը գրում են հայ բանտարկյալների «ուրախ» դեմքերի մասին, ուղղակի զզվում եմ նման հայերից։ Անկախ լուսանկարում պատկերված այս մարդկանց ինքնությունից (շատերին պետք է դատել դավաճանության և կաշառակերության համար), նրանք իսկապես վատ վիճակի մեջ են և օգտագործվում են որպես Հայաստանի վրա ճնշում գործադրելու գործիք։ Դուք պետք է հասկանաք, որ Ադրբեջանն այսօր ոչնչով չի տարբերվում թալիբներից կամ ԻՊ-ից։ Այս բանտարկյալներին Բաքվի բանտում լրջորեն սպառնում են խոշտանգումներով և մահով:

Հիշեցնեմ, որ այս նույն բանտում ադրբեջանցիները, «Ալլահ աքբար» գոռալով, ինձ կիսամահու ծեծեցին, կոտրեցին ձեռքս, մատներս, երեք կողերս, ծնոտս ու առջևի ատամներս։ Դա տեղի ունեցավ մոտ երեք ամիս այն բանից հետո, երբ նրանք ինձ լուսանկարեցին «երջանիկ»՝ ձեռքիս գիրքը: Եվրոպական դատարանը 2021 թվականի մայիսի 20-ի որոշմամբ Ադրբեջանին մեղավոր է ճանաչել ապօրինի ձերբակալության, դաժան խոշտանգումների և սպանության փորձի համար»,-գրել է Լապշինը։

Ուկրաինայի նախագահ Վլադիմիր Զելենսկու` Ռուսաստանի «պատմականորեն ուկրաինացիներով բնակեցված» տարածքների վերաբերյալ հրամանագիրը «պարզ քարոզչական քայլ է», ասել է ՌԴ Անվտանգության խորհրդի փոխնախագահ Դմիտրի Մեդվեդևը։

Իր թելեգրամյան ալիքում Մեդվեդևը գրել է, որ դա «ռազմաճակատում ձախողման հետևանքով պայմանավորված քայլ է»։

«Այստեղ մեկնաբանելու ոչինչ չկա, քանի որ ուկրաինացիները ռուսներ են, իսկ Մալոռոսիան Ռուսաստանի մաս է։ Ժամանակն է, որ գլխավոր «ուկրաինացին» հեռանա: Եթե այսպես շարունակվի, նա շուտով Կանադան էլ կմիացնի»,- գրել է Մեդվեդևը։

Նշենք, որ Ուկրաինայի նախագահ Վլադիմիր Զելենսկին հրամանագիր է ստորագրել «Ռուսաստանի Դաշնության պատմականորեն ուկրաինացիներով բնակեցված տարածքների մասին», հայտնում է «Ուկրաինսկա պրավդա» թերթը։

Զելենսկու խոսքով՝ այս փաստաթուղթը «պատմական անցյալի մասին ճշմարտության վերադարձն է՝ հանուն Ուկրաինայի ապագայի»։

Ըստ Զելենսկու հրամանագրի՝ Ուկրաինան «Ռուսաստանի Դաշնության պատմականորեն ուկրաինացիներով բնակեցված տարածքներ» է համարում Կուբանը, Ստարոդուբշչինան, Հյուսիսային և Արևելյան Սլոբոժանշչինան՝ ժամանակակից Կրասնոդարի երկրամասի, Բելգորոդի, Բրյանսկի, Վորոնեժի, Կուրսկի, Ռոստովի մարզերի սահմաններում»։

Զելենսկին իր որոշումը բացատրում է նրանով, որ Ռուսաստանը դարեր շարունակ կատարել և շարունակում է կատարել գործողություններ  «ուղղված ուկրաինացիների ազգային ինքնության ոչնչացմանը, նրանց ճնշելուն, նրանց իրավունքներն  ու ազատությունները ոտնահարելուն»։

Փաստաթղթում ասվում է, որ Ռուսաստանը, միջազգային պարտավորություններին համապատասխան, պետք է իր տարածքում ապրող ուկրաինացիներին տրամադրի ուկրաինական լեզվով կրթություն ստանալու և դրա անարգել օգտագործման իրավունք, հասանելիություն տրամադրի ուկրաինալեզու լրատվամիջոցներին, ինչպես նաև երաշխավորի քաղաքացիական, սոցիալական, մշակութային և կրոնական իրավունքները։ Ուկրաինայի նախագահը կառավարությանը և միջազգային փորձագետներին հանձնարարել է մշակել Ռուսաստանում ուկրաինացիների ազգային ինքնության պահպանման գործողությունների ծրագիր։

Եվրոպայի խորհրդի խորհրդարանական վեհաժողովը նախատեսում է սահմանափակել Ադրբեջանի պատվիրակության լիազորությունները՝ Բաքվի կողմից կազմակերպության սկզբունքները խախտելու համար։ Այս մասին Ստրասբուրգում «Եվրապեյսկայա պրավդա»-ի թղթակցին հայտնել են նման քայլի նախապատրաստմանը ծանոթ մի քանի աղբյուրներ։

ԵԽԽՎ նախագահական հանձնաժողովի մակարդակով արդեն իսկ կայացվել է Ադրբեջանի համար սահմանափակումներ նախաձեռնելու հիմնարար որոշում։ Կեսօրին՝ լիագումար նիստի մեկնարկին, պատգամավորները պաշտոնապես նախաձեռնում են այս ընթացակարգը, ամենայն հավանականությամբ՝ Գերմանիայի ներկայացուցչի պաշտոնական նախաձեռնությամբ։

«Երկրի դեմ դրված պաշտոնական պահանջը կլինի այն, որ ԵԽԽՎ դիտորդները չեն հրավիրվել փետրվարին կայանալիք Ադրբեջանի նախագահական ընտրություններին։ Նաև բողոք կա, որ Ադրբեջանը հրաժարվել է ԵԽԽՎ զեկուցողներին թույլ տալ մտնել Լաչինի միջանցք»,-ասվում է հրապարակման մեջ։

Ազգային Ժողովի նախագահ Ալեն Սիմոնյանի այսօրվա կարգադրությամբ ԱԺ աշխատակազմը կստանա պարգևավճար յուրաքանչյուր աշխատողի պաշտոնային դրույքաչափի 15 տոկոսի չափով:

Կարգադրությունը ստորև.

«Ղեկավարվելով «Ազգային ժողովի կանոնակարգ» սահմանադրական օրենքի 5-րդ հոդվածի 2-րդ մասի 12-րդ եւ 22-րդ կետերով` կարգադրում եմ.

1. «Հայաստանի Հանրապետության 2024 թվականի պետական բյուջեի մասին» օրենքով եւ Հայաստանի Հանրապետության կառավարության 2023 թվականի դեկտեմբերի 28-ի N 2323-Ն որոշման N 4 հավելվածի «ՀՀ Ազգային ժողովի լիազորությունների իրականացման ապահովում» 1024 ծրագրի 11001 միջոցառման «Պարգեւատրումներ, դրամական խրախուսումներ եւ հատուկ վճարներ» հոդվածով Ազգային ժողովի աշխատակազմի 2024 թվականի համար նախատեսված պարգեւատրման գումարը բաշխել Ազգային ժողովի աշխատակազմի աշխատողների միջեւ յուրաքանչյուր աշխատողի պաշտոնային դրույքաչափի 15 տոկոսի չափով՝ համաձայն հավելվածի:
2. Ազգային ժողովի աշխատակազմի ղեկավար-գլխավոր քարտուղար Դ. ԱՌԱՔԵԼՅԱՆԻՆ՝ Հայաստանի Հանրապետության օրենսդրությամբ սահմանված կարգով ապահովել համապատասխան վճարումների կատարումը»:

AstraZeneca բրիտանաշվեդական դեղագործական ընկերության դեմ տասնյակ միլիոնավոր դոլարների փոխահատուցման հայցեր են ներկայացվել. 35 հայցվոր պնդում են, որ կորոնավիրուսի դեմ պատվաստանյութի ներարկումից հետո բարդություններ են առաջացել: Այս մասին գրում է dailymail.co.uk-ը:

Դեղագործական հսկան, որը պատվաստանյութը մշակել է Օքսֆորդի համալսարանի հետ համագործակցությամբ, կկանգնի Լոնդոնի Բարձր դատարանի առաջ՝ պատվաստանյութի «թերի» լինելու վերաբերյալ պնդումների պատճառով:

AstraZeneca-ի արտադրանքը կապում են պատվաստանյութից առաջացած իմունային թրոմբոցիտոպենիայի և թրոմբոզի (VITT) հետ, որն առաջացնում է արյան խցանումներ: Պարբերականը մանրամասնում է, որ առնվազն 81 մարդ մահացել է առաջացրած բարդությունների պատճառով, որոնք կապված են պատվաստանյութի՝ շատ հազվադեպ հանդիպող կողմնակի ազդեցության հետ, մինչդեռ հարյուրավոր մարդիկ նույնպես տուժել են այդ պատճառով:

Պատվաստանյութ արտադրողը կարող է ստիպված լինել մինչև 80 միլիոն ֆունտ ստերլինգ (ավելի քան 100 մլն դոլար-Խմբ.) փոխհատուցում վճարել, եթե պարտվի դատարանում, հայտնում է The Telegraph-ը: Ընդ որում, պատվաստանյութի բարդությունները արձանագրված են AstraZeneca պատվաստանյութը ստացած որոշ մարդկանց մահվան վկայականներում:

ԱԺ «Պատիվ ունեմ» խմբակցության քարտուղար Տիգրան Աբրահամյանը գրում է.

«Սիրիայի մայրաքաղաքում իրականացված հարձակման հետևանքով Իրանի իսլամական հեղափոխության պահապանների կորպուսի բարձրաստիճան սպաներ են զոհվել:

Հարվածի հետևանքով կորուստներ ունի նաև սիրիական կողմը:

Այս կորպուսի մարտիկներն ու բարձրաստիճան սպաներն անընդհատ թիրախում են, որովհետև նրա առանձին ստորաբաժանումներ պատասխանատու են տարբեր երկրներում իրականացվող հատուկ օպերացիաների համար, իսկ թիրախում` տարբեր երկրների հովանավորչությամբ գործող ահաբեկչական ցանցերն են:

Հիշեցնեմ, որ տարեսկզբին Իրանում ահաբեկչություն էր իրականացվել` հայտնի հրամանատար Ղասեմ Սոլեյմանիի հերթական տարելիցի հիշատակման օրը, ինչից հետո Իրանի ամենամարտունակ միավորումը` Իրանի իսլամական հեղափոխության պահապանների կորպուսը, պատժիչ հակաահաբեկչական գործողություններ է իրականացնում աշխարհի տարբեր կետերում:

Տարածաշրջանում կրքերը բավականին թեժանում են և չի բացառվում, որ միմյանց դեմ օգտագործվող հարվածներն առավել վտանգավոր ծավալների կհասնեն, իսկ բախումների մասշտաբը կտրուկ կընդլայնվի:

Միայն կարելի է պատկերացնել, թե դա ինչ ազդեցություն կունենա Հարավային Կովկասի վրա, հատկապես Հայաստանի, որի իշխանությունը փոշիացրել է պետության իմունիտետը և կույր աչքերով սլանում է թշնամիների գիրկը»։

«Բաքվի բարբարոսական վարչախումբը բռնազավթված հայկական Շուշին հռչակել է իսլամական աշխարհի 2024թ., իբր, «մայրաքաղաք»: Այս մասին տելեգրամյան իր ալիքում գրել է իրանագետ Վարդան Ոսկանյանը:

«Եվ սա այն դեպքում, երբ Բաքվի բարբարոսական վարչախումբն իր բնույթով և էությամբ իսլամատյաց է։ Դրա վերջին ակնառու դրսևորումը շիայական հռչակավոր իմամ Հուսեյնի եղբայր և զինակից, շիաների կողմից սրբացված Աբուլֆազլ Աբբասի անվան՝ արհեստածին Ադրբեջանում կիրառության պետական արգելքն է, որն անհնարին եղել հաղթահարել նույնիսկ եվրոպական ատյանների միջոցով», — գրել  է նա: