Նախագահականում տեղի ունեցած կադրային փոփոխություններից հետո մեծ ճնշում է սկսվել լրատվական դաշտի վրա: Մասնավորապես նախագահի աշխատակազմի ղեկավարի տեղակալ Ալեքսան Հարությունյանը նշանակվելուց անմիջապես հետո խաղի իր կանոններն է սկսել սահմանել: Մեզ հայտնի դարձավ, որ իշխանությունների հետ որոշակի առնչություն ունեցող լրատվամիջոցները սկսելու են գործել բոլորովին այլ խաղի կանոններով:

Նախ, Ա.Հարությունյանը, ըստ մեզ հասած տեղեկությունների, փորձելու է սահմանափակել սույն լրատվամիջոցների ունեցած քիչ թե շատ ազատությունը: Այնուհետև կտրուկ պայման է դրվել` կրճատել արևմտամետ տեսակետ արտահայտող նյութերի քանակը: Ըստ այդմ` այդ լրատվամիջոցներում պետք է կրճատվեն նաև արևմտամետ տեսակետ հնչեցնող գործիչների հետ հարցազրույցները, նրանց տեսակետների ներկայացումը:

Որոշ տեղեկությունների համաձայն` այդ լրատվամիջոցներին անգամ արևմտամետ գործիչների ցանկ է տրվել և զգուշացվել, որ նրանց հնարավոինս քիչ հրավիրեն եթեր, նրանց տեսակետը հնարավորինս քիչ տեղադրեն թերթերում կամ կայքերում: Այդ ցանկում տեղ գտած գործիչներից են, օրինակ, քաղաքագետներ Հայկ Մարտիրոսյանը, Ստեփան Սաֆարյանը, Ստեփան Գրիգորյանը, Արա Պապյանը և այլոք:

Այդպիսով` նախագահական նստավայրում որոշվել է, որ այսուհետ պետք է զարկ տալ ռուսամետ տեսակետ արտահայտող նյութերի հրապարակմանն ու գործիչների հետ հարցազրույցներին: Պետք է նման նյութերով այնպիսի տեսակետ արտահայտել, որ առանց Ռուսաստանի, Հայաստանը չի կարող գոյատևել ոչ արտաքին քաղաքական, ոչ տնտեսական հարցերում: Պետք է հանրության մեջ տպավորություն ստեղծվի, որ Եվրասիական տնտեսական միությանը միանալը Հայաստանի փրկությունն է, և որ առանց դրա հիմա մեր երկիրն ավելի վատ վիճակում կհայտնվեր, քան թե կա:

Ի դեպ, որոշ տեղեկությունների համաձայն` հրահանգվել է խուսափել նաև հոկտեմբերի 27-ի իրադարձությունները հիշեցնող հրապարակումներից: Հիշեցնենք, որ Ա.Հարությունյանն այդ իրադարձությունների հետ խորը առնչություն ունեցող գործիչ է:

Թերեւս կարելի է եզրակացնել, որ «Առաջին լրատվական» լրատվական-վերլուծական կայքում տեղի ունեցող փոփոխությունները կարող են լինել այս ճնշումների արդյունքը: Իսկ այդ լրատվամիջոցը, ինչպես հայտնի է, իր հրապարակումներում ծանրակշիռ տեղ է հատկացնում արևմտամետ տեսակետներին ու այդ տեսակետները արտահայտող գործիչներին: Հիշեցնենք, որ երեկ «Առաջին լրատվականը» հաղորդագրություն էր տարածել` հայտնելով, որ արդեն նոր խմբագիր ունի՝ Աղասի Ենոքյանը, ով մինչ այդ էլ աշխատում էր կայքում և ղեկավարում հաղորդումների բլոկը: Հիմա նախատեսվում է կրճատել հաղորդումների հատվածը՝ ուժեղացնելով տեքստային նյութերը: Իհարկե, նյութերի հետ տեսանյութերը կպահպանվեն:

Իսկ կայքի սեփականատեր և արդեն նախկին խմբագիր Արման Բաբաջանյանը, ըստ մեր տեղեկությունների, ղեկավարելու է կայքի տեխնիկական վերազինման և սփյուռքում լրատվամիջոցի ներկայության ընդլայնման խնդիրները: «Հաշվի առնելով Հայաստանի առջև ծառացած նոր մարտահրավերները՝ պայմանավորված արտաքին և ներքին մի շարք նոր սպառնալից իրողություններով, ինչպես նաև նկատի ունենալով 2017թ. խորհրդարանական ընտրություններում անկախ լրատվամիջոցների դերն ու կարևոր նշանակությունը և իշխանական բոլոր լրատվական հարթակների ընտրողական մոտեցումը և նրանց կողմից տաբուավորված քաղաքական ուժերին և գործիչներին լիարժեք արտահայտվելու հնարավորություն ընձեռելու անհրաժեշտությունը, լրատվամիջոցը վերադասավորել է իր առաջնահերթությունները»,- նշված է «Առաջին լրատվականի» հաղորդագրության մեջ։

Նշենք նաև, որ մեր տեղեկություններով` իշխանությունների նոր քաղաքականության արդյունքում շատ լրատվամիջոցներ հայտնվել են ֆինանսական խնդիրների առաջ:

Աղբյուրը՝ armtimes.com

ՈՒՇԱԴՐՈՒԹՅՈՒՆ՝ հոկտեմբերի 17-19-ը շրջանների մեծ մասում սպասվում են տեղումներ, լեռնային գոտիներում, Լոռիի, Տավուշի, Սյունիքի և Արցախի նախալեռնային հատվածներում՝ ձյան տեսքով: Հատկապես Լոռի, Տավուշ, Սյունիք և Արցախ խորհուրդ ենք տալիս երթևեկել բացառապես ձմեռային անվադողերով:

Հանրապետության տարածքում հոկտեմբերի 20-21-ը սպասվում է առանց տեղումների եղանակ: 17-19-ը շրջանների մեծ մասում սպասվում են տեղումներ, լեռնային գոտիներում, Լոռիի, Տավուշի, Սյունիքի և Արցախի նախալեռնային հատվածներում՝ ձյան տեսքով:

Քամին՝ արևմտյան՝ 3-8 մ/վ արագությամբ: Օդի ջերմաստիճանը 17-18-ն աստիճանաբար կնվազի 8-10 աստիճանով, Լոռիում, Տավուշում, Սյունիքում և Արցախում՝ 15-20 աստիճանով: 20-ի ցերեկը ջերմաստիճանը կբարձրանա 2-3, Լոռիում, Տավուշում, Սյունիքում և Արցախում՝ 6-8 աստիճանով:

Երևանում հոկտեմբերի 20-21-ը սպասվում է առանց տեղումների եղանակ, 17-19-ը սպասվում է թույլ անձրև:

Երեկվանից Բաքվում հորդ, աննախադեպ անձրևների պատճառով ջրի տակ են մնացել նույնիսկ բազմաթիվ բնակելի շենքեր: Տրանսպորտը կաթվածահար վիճակում  է, փողոցներն՝ անանցանելի։Մարդկանց տարհանում են իրենց բնակարաններից: Հիմնարկություններից շատերը չեն աշխատում:

Քաղաքում խայտառակ գարշահոտություն է տիրում։ Շարքից դուրս է եկել կոյուղացանցը. կեղտաջրերը լցվել են փողոցներ։Ղեկավարությունն ամեն ինչ անում է դրությունը շտկելու համար, սակայն առայժմ ոչինչ չի ստացվում։

Անցած ուրբաթ Հավաքական անվտանգության պայմանագրի կազմակերպության (ՀԱՊԿ) երկրների ղեկավարները Երևանում էին: ՀԱՊԿ երկրների ղեկավարների հանդիպումից առաջ` ՌԴ արտաքին գործերի նախարար Սերգեյ Լավրովը հայտարարել էր.«Այն, որ Թուրքիան կարող է դրական դեր խաղալ՝ ապահովելով Լեռնային Ղարաբաղի ապաշրջափակումը, ապահովելով տարածաշրջանում տնտեսական նորմալ փոխգործակցությունը՝ կարևոր գործոն է, որը մենք միշտ հաշվի ենք առնում»,-հայտարարել էր Լավրովը:

Պետք է նկատել, որ Պաշտոնական Մոսկվայի նմանատիպ առաջին հայտարարությունն է: Ռուս-թուրքական հարաբերությունների լարվածությունից ի վեր ռուսները ամեն առիթով հայտարարում էին, որ թուրքական կողմը լարում է իրավիճակը:

Ապրիլյան պատերազմից հետո անձամբ Լավրովը հայտարարել էր.«Թուրքական ղեկավարության շուրթերից հնչած հայտարարությունները բացարձակապես անընդունելի են այն պարզ պատճառով, որ դրանք ոչ թե խաղաղության, այլ պատերազմի կոչեր էին: Դրանք խնդրի ռազմական, ուժային լուծման կոչեր էին»:

Փաստորեն ղարաբաղյան հարցը ռուս-թուրքական հարաբերությունների համար ծառայում էր որպես «մանրադրամ»: Քանի դեռ ռուսները լարված հարաբերություններ ունեին թուրքերի հետ` Թուրքիան պատերազմի հրահրիչ է,  իսկ երբ ռուս-թուրքական հարաբերությունները  ջերմ են` Թուրքիան ոչ միայն սադրիչ չէ, այլ նաև կարող է դրական դեր խաղալ:

Կարևոր է նկատել, թե ինչու է Լավրովը այս ամենի մասին խոսել նախագահների հանդիպումից առաջ: Եվ եթե հաշվի առնենք, այն փաստը, որը ՀԱՊԿ  երկրների ղեկավարները քննարկել են նաև Ղարաբաղի հարցը, ապա պետք է վստահորեն ասել, որ Ռուսաստանը  ներկայացրել է նաև Թուրքիայի շահերը: Ի վերջո այս անգամ Նազարբաևը չէր եկել և որևէ մեկը պետք է նարկայացներ Թուրքիայի շահերը:

Մնում է, որ մեր երկրի ղեկավարները հասկանան, որ Ղարաբաղի հարցը բացի Հայաստանից մնացած կողմերի համար միայն գործիք է` իրենց խնդիրները լուծելու համար: Մնում է հասկանալ և ամուր կանգնել սեփական շահերի համար:

Աղբյուրը` politik.am

ՀՀ վարչապետի որոշմամբ Ատոմ Ջանջուղազյանը նշանակվել է Հայաստանի Հանրապետության ֆինանսների նախարարի առաջին տեղակալ:

Որոշման մեջ ասվում է.

“Հիմք ընդունելով Հայաստանի Հանրապետության Նախագահի 2007 թվականի հուլիսի 18-ի ՆՀ-174-Ն հրամանագրով սահմանված կարգի 121-րդ կետի 6-րդ ենթակետը՝
Ատոմ Ջանջուղազյանին նշանակել Հայաստանի Հանրապետության ֆինանսների նախարարի առաջին տեղակալ՝ ազատելով նրան Հայաստանի Հանրապետության ֆինանսների նախարարի տեղակալ-գլխավոր գանձապետի պաշտոնից”։

***

ՀՀ վարչապետ Կարեն Կարապետյանի որոշմամբ` Արմեն Գևորգյանն ազատվել է Հայաստանի Հանրապետության ֆինանսների նախարարի տեղակալի պաշտոնից:

Որոշման մեջ ասվում է.
“Հիմք ընդունելով Հայաստանի Հանրապետության Նախագահի 2007 թվականի հուլիսի 18-ի ՆՀ-174-Ն հրամանագրով սահմանված կարգի 121-րդ կետի 6-րդ ենթակետը՝
Արմեն Գևորգյանին ազատել Հայաստանի Հանրապետության ֆինանսների նախարարի տեղակալի պաշտոնից՝ իր դիմումի համաձայն”։

Ստամբուլահայ երգչուհի Սիբիլ Բեքթորոսօղլուն ներկայացրել է իր նոր` «Վանա լճին» երգի հիման վրա նկարահանված տեսահոլովակը:

Սա հայազգի երգչուհու թվով երրորդ տեսահոլովակն է:

Երգի երաժշտության և խոսքերի հեղինակն է Հասմիկ Հախվերդյանը, տեսահոլովակի ռեժիսորն է Մարիամ Գևորգյանը, պրոդյուսերական աշխատանքներով զբաղվել է Անդրե Սիմոնյանը:

ԹԵՐԹ.ամ-ի փոխանցմամբ՝ ստամբուլահայ Սիբիլը, այս անգամ էլ հավատարիմ մնալով իր սկզբունքին, երգում է բացառապես հայերենով:

Սիբիլ Բեքթորոսօղլուն ծնվել և ապրում է Ստամբուլում: Սկսել է երգել փոքր հասակից եկեղեցական «Սուրբ Վարդանանց», այնուհետև` հայկական Սահակյան վարժարանին կից երգչախմբում։

2010 թ. նոյեմբերին թողարկել է հայալեզու «Սիբիլ» ալբոմը, որտեղ տեղ գտան «Տեր Ողորմեա», «Կիլիկիա», «Տեսնեմ Անին և նոր մեռնիմ», «Նամակ» և այլ երգերը։ Վերջինս մեծ հաջողություն ունեցավ Թուրքիայում։

«Նամակ»-ի հիման վրա նկարահանված տեսահոլովակը նկարահանվել է Օզքան Աքսուլառի՝ Թուրքիայի ամենահայտնի պրոդյուսերներից մեկի աջակցությամբ, և առաջինն հայալեզու տեսահոլովակն էր, որը ցուցադրվեց թուրքական պետական հեռուստատեսությամբ:

«Փաստինֆո»-ի տեղեկություններով` Ժամկետային զինծառայող Վահագն Վիրաբյանը մահացու հրազենային վնասվածքներն ստացել է իր ծառայակցի կողմից արձակված կրակոցների հետեւանքով: Համենայն դեպս` զենքը, որով կրակվել է նրա ուղղությամվ ամրակցված է եղել նույն զորամասի մեկ այլ զինծառայողի:

Տեղի ունեցածը դիտավորյալ սպանություն է, թե զենքի հետ վարվելու կանոնների խախտում կպարզի քննությունը: Նշենք սակայն, որ կայազորային քննչական բաժինը քրեական գործը հարուցել է հենց սպանության հատկանիշներով` ՀՀ քրեական օրենսգրքի 104-րդ հոդվածի 1-ին մասով, ինչից հետեւում է, որ նախաքննական մարմինը տեղի ունեցածը գնահատել է որպես դիտավորությամբ կատարված սպանություն:

Ավելի վաղ քննչական կոմիտեն տեղեկածրել է, որ նախնական տվյալներով՝ 15.10.2016թ.՝ ժամը 08:40-ի սահմաններում, N զորամասի պահպանության տեղամասի մարտական դիրքում հերթապահության նշանակված ժամկետային զինծառայող, շարքային Վահագն Գագիկի Վիրաբյանի ուղղությամբ՝ արձակվել են կրակոցներ՝ վերջինիս պատճառելով մահացու հրազենային վիրավորումներ:

ՌԴ օդադեսանտային զորքերի հրամանատար, Պետդումայի՝ պաշտպանության կոմիտեի նախագահ Վլադիմիր Շամանովը պատմել է, թե որն է «Իսկանդեր-Մ» համակարգի առանձնահատկությունը, և ինչու է ողջ Արևմուտքը վախենում դրանից: Այս մասին գրում է Vesti.ru-ն:

Նա նշել է. «Ոչ մի արևմտյան միջոց ունակ չէ հետևել այդ հրթիռին: Արձակված հրթիռին անհնար է դիմակայել, առավել ևս՝ ոչնչացնել, այսինքն՝ արձակված հրթիռը երաշխավորված կերպով հայտնվում է թիրախակետում:

Սա լիովին արդյունավետ զենք է, դրա համարել էր Արևմուտքը վախենում է դրանից»:

Պատասխանելով այն հարցին, թե արդյոք կա արևմտյան միջոց, որը հավասարազոր է «Իսկանդեր»-ին, փորձագետը նշել է. «Հակառակորդը այս համալիրին հավասար ոչինչ չունի»:

Տոն Սուրբ ավետարանիչների՝ Մատթեոսի, Մարկոսի, Ղուկասի և Հովհաննեսի

Մի օր Հիսուսը լեռ բարձրացավ աղոթելու և ամբողջ գիշերն անցկացրեց Աստծուն աղոթելով։ Առավոտյան իր մոտ կանչեց իր աշակերտներին և նրանցից ընտրեց տասներկու հոգի, որոնց նաև առաքյալ կոչեց։ Այդ առաքյալներն էին՝ Սիմոնը, որին և Պետրոս անվանեց, Անդրեասը՝ նրա եղբայրը, Հակոբոսը, Հովհաննեսը, Փիլիպպոսը, Բարթուղիմեոսը, Մատթեոսը, Թովմասը, Ալփեոսի որդին՝ Հակոբոսը, Նախանձահույզ կոչված Սիմոնը, Հակոբի որդի Հուդան և Հուդա Իսկարիովտացին, որը մատնիչ եղավ։

Հարգելի երևանցիներ,

Երևանի քաղաքապետարանի և «Վերադարձ Հայաստան» հիմնադրամի հետ համատեղ կազմակերպված «Կոկա-Կոլա Երևան կիսամարաթոնի» անցկացմամբ պայմանավորված՝ հոկտեմբերի 16-ին, առավոտյան ժամը 07:00-ից մինչև 13:30-ը մայրաքաղաքի որոշ հատվածներում ժամանակավորապես կդադարեցվի երթևեկությունը:
Տրանսպորտային միջոցների համար նշված ժամանակահատվածում փակ կլինեն մասնավորապես Հանրապետության, Ստ. Շահումյանի անվ. հրապարակները, Վազգեն Սարգսյան, Նալբանդյան, Վարդանանց, Ալեք Մանուկյան, Իսահակյան, Թամանյան, Մոսկովյան, Սարյան, Լեոյի, Պռոշյան փողոցները: Երթևեկության համար նշված ժամանակահատվածում փակ կլինի նաև Հրազդանի կիրճի մինչև Դավթաշենի կամուրջ ընկած հատվածը (ժամը 08։00-ից): Փակ կլինեն նաև Հաղթանակի կամուրջը, Աթենքի, Արգիշտի, Բեյրութի, Վ. Սարգսյանի փողոցները, Աբովյան փողոցից մինչև Պուշկինի փողոց, Սախարովի հրապարակից մինչև Նալբանդյան փողոց ընկած հատվածները:
Պատճառած ժամանակավոր անհարմարության համար հայցում ենք ձեր ներողամտությունը:

Երևանի քաղաքապետարան