Եվրոպայի շախմատի թիմային առաջնության 4-րդ տուրն անհաջող էր հայկական «Միկա» տղամարդկանց և կանանց ակումբների համար, որոնք իրենց առաջին պարտություննները կրեցին: Առաջնությունն ընթանում է սլովենական Ռոգաշկա Սլատինա քաղաքում:

Տղամարդկանց թիմը 4:2 հաշվով զիջեց «Baden Baden»-ին: Հայկական թիմի կազմում ոչ ոքի խաղացին Գաբրիել Սարգսյանը, Արման Փաշիկյանը, Զավեն Անդրիասյանը և Ավետիք Գրիգորյանը, Տիգրան Պետրոսյանն ու Հրանտ Մելքումյանը զիջեցին իրենց մրցակիցներին: 4 տուրերից հետո «Միկան» 17 միավորով իջել է 9-րդ տեղը: Առաջնությունը 20,5 միավորով գլխավորում է «Saint-Petersburg Chess Federation»-ը:

5-րդ տուրում հայ շախմատիստները խաղալու են «Glasinac Sokolac»-ի դեմ:
Կանանց «Միկա» թիմը չկարողացավ դիմակայել «AEM Luxten Timisoara»-ին և պարտվեց 1,5:2,5 հաշվով: Էլինա Դանիելյանը, Հարիկա Դրոնավալին և Լիլիթ Մկրտչյանը միավորները կիսել են հակառակորդների հետ, իսկ Ժու Չենը զիջել է իր մրցակցին:

«Միկան» 11,5 միավորով 2-րդ տեղում է, առաջատարը «AEM Luxten Timisoara»-ն է 13 միավորով: 5-րդ տուրում հայկական թիմի մրցակիցը կլինի «Giprorechtrans»-ը, որը 8 միավորով գտնվում է 5-րդ տեղում:

Չինաստանի Նինբո քաղաքում ավարտվեց շախմատի աշխարհի թիմային առաջնությունը: Մեր հավաքականը` Լեւոն Արոնյան, Սերգեյ Մովսիսյան, Վլադիմիր Հակոբյան, Գաբրել Սարգսյան, Ռոբերտ Հովհաննիսյան կազմով, փայլուն անցկացրեց մրցաշարը` նվաճելով աշխարհի չեմպիոնի կոչումը:

Մեր հավաքականը առաջնությունում միակն էր, որ պարտություն չկրեց: Անցկացրած ինը խաղերից հինգում մեր տղաները հաղթանակ տարան, չորս խաղ ավարտեցին ոչ—ոքի:

Աշխահի առաջնության ամփոփիչ աղյուսակը հետեւյալ տեսքն ունի

1. Հայաստան- 14 միավոր
2. Չինաստան- 13 միավոր
3. Ուկրաինա- 12 միավոր
4. Ռուսատան- 10 միավոր
5. Հունգարիա- 10 միավոր
6. ԱՄՆ- 10 միավոր
7. Ադրբեջան- 9 միավոր
8. Հնդկաստան- 7 միավոր
9. Իսրայել- 5 միավոր
10. Եգիպտոս- 0 միավոր

Չինաստանի Նինբո քաղաքում այսօր ընթանում են աշխարհի թիմային առաջնության վերջին 9-րդ տուրի հանդիպումները։ Առաջատար Հայաստանը մրցում էր Ուկրաինայի հետ։ Ասպարեզ էին դուրս եկել Վասիլի Իվանչուկ-Լևոն Արոնյան, Սերգեյ Մովսեսյան-Պավել Էլյանով, Զահար Եֆիմենկո-Վլադիմիր Հակոբյան, Գաբրիել Սարգսյան-Ալեքսանդր Մոյսենկո զույգերը։

Ինչպես հայտնում է armsport.am-ը, բոլոր հանդիպումներն էլ ավարտեցին խաղաղ ելքով և Հայաստանն ապահովեց առաջին հորիզոնականը։ 10 հավաքականների պայքարում Հայաստանի ընտրանին 14 միավորով գրավեց առաջին հորիզոնականը։

Հայաստանի հավաքականի անցկացրած հանդիպումները.

1. Հայաստան-Իսրայել՝ 3.5։0.5
2. ԱՄՆ-Հայաստան՝ 2։2
3. Հայաստան-Ռուսաստան՝ 2։2
4. Հայաստան-Եգիպտոս՝ 3.5։0.5
5. Չինաստան-Հայաստան՝ 1.5։2.5
6. Հայաստան-Հնդկաստան՝ 2.5։1.5
7. Հունգարիա-Հայաստան՝ 1.5։2.5
8. Հայաստան-Ադրբեջան՝ 2։2
9. Հայաստան-Ուկրաինա՝ 2։2

Հայ շախմատիսների ցուցանիշները.

Սերգեյ Մովսիսյան՝ 9 պարտիա, 6 միավոր

Վլադիմիր Հակոբյան՝ 9 պարտիա, 6 միավոր

Լևոն Արոնյան՝ 8 պարտիա, 5 միավոր

Գաբրիել Սարգսյան՝ 9 պարտիա, 4.5 միավոր

Ռոբերտ Հովհաննիսյան՝ 1 պարտիա, 1 միավոր

Շախմատի աշխարհի թիմային առաջնության նախավերջին տուրի Հայաստան — Ադրբեջան մրցամարտում ավարտվեց երրորդ պարտիան: Չորրորդ համարների մրցախաղում Գաբրիել Սարգսյանը սեւերով պարտվեց Շաքրիյար Մամեդյարովին: Պարտիան ավարտվեց 45-րդ քայլում: Մամեդյարովն ուներ նավակի եւ զինվորի առավելություն:

Լեոն Արոնյանն ու Սերգեյ Մովսիսյանը խաղացել էին ոչ ոքի:

Չինաստանում ընթացող շախմատի աշխարհի թիմային առաջնության 5-րդ տուրի պարտիաներն ավարտվեցին ։ Հայաստանի հավաքականն այսօր իր ուժերը  չափեց և 2,5:1,5 հաշվով առավելության հասավ չինացիների նկատմամբ և 8 միավորով պահպանեց ընթացիկ առաջին տեղը:

խաղաղ արդյունքներ գրանցվեցին Վան Հաո- Լևոն Արոնյան, Չաո Լի-Վլադիմիր Հակոբյան,Վան Յուե — Սերգեյ Մովսեսյան պարտիաներում։ Միայն Գաբրիել Սարգսյանին հաջողվեց պարտության մատնել Յու Յանգին:

Ներկա պահին մրցաշարային աղյուսակը 8 միավորով գլխավորող Հայաստանի հավաքականը, հաջորդ փուլում իր ուժերը կչափի Հնդկաստանի թիմի հետ:

Չինաստան-Հայաստան 1.5-2.5
Եգիպտոս-Ռուսաստան 0.5-2.5
Հնդկաստան-ԱՄՆ 1-3
Ադրբեջան-Ուկրաինա 1.5-1.5
Հունգարիա-Իսրայել 2.5-0.5

2011թ. Համահայկական խաղերի նշանաբանն  է՝ «Միասնություն սպորտի միջոցով»։ Այս մասին այսօրվա ասուլիսի ժամանակ հայտնեց Համահայկական խաղերի համաշխարհային կազմկոմիտեի նախագահ Իշխան Զաքարյանը։

Խաղերի մեկնարկը տրվելու է օգոստոսի 13-ին։ Նույն օրը «Հանրապետական» մարզադաշտում կկայանա բացման հանդիսավոր արարողությունը, որի մուտքն ազատ է։

Մրցումները կսկսվեն հաջորդ օրվանից ու կավարտվեն օգոստոսի 21-ին՝  հանդիսավոր արարողությամբ։

Իշխան Զաքարյանի տվյալներով՝ խաղերի ընթացքում Հայաստանում կլինեն 8-10 հազար զբոսաշրջիկներ։ Ինչ վերաբերում է մասնակիցներին, ապա ըստ Իշխան Զաքարյանի, նրանց թիվն այս անգամ ռեկորդային է լինելու։ Այս պահին հայտ է ներկայացրել 86 քաղաքից շուրջ 2200 մարզիկ, սակայն հայտերի ընդունման ժամկետը դեռ չի ավարտվել և հնարավոր է՝ մասնակից քաղաքների թիվը հասնի 100-ի, իսկ մարզիկներինը՝ 3000-ի։

Նախորդ չորս խաղերի արդյունքները հետեևյալն է.

1999թ.՝ 62 քաղաք, 1150 մարզիկ
2001թ.՝ 86 քաղաք, 1570 մարզիկ
2003թ.՝ 75 քաղաք, 1559 մարզիկ
2007թ.՝ 92 քաղաք, 2079 մարզիկ

Թուրքիայից Երևան է պատրաստվում ժամանել 210 մարզիկ, Արգենտինայից՝ 147, Իրանից՝ 400։ Ռուսաստանից կժամանի 103 մարզիկ. այս թիվը մտահոգում է կազմակերպիչներին, և այս պահին աշխատանքներ են տարվում, որ մարզիկների թիվն ավելանա։

Պետությունը 50 մլն դրամ է հատկացրել խաղերի կազմակերպման համար: Մասնակիցներն իրենք են հոգալու ճանապարհի և կեցության ծախսերը, իսկ կազմակերպիչները պետությունից ստացված 50 մլն դրամը և հովանավորչական գումարները ծախսելու են հիմնականում բացման և փակման արարողությունների վրա։

Համահայկական խաղերն անցկացվելու հետևյալ 10 մարզաձևերում.

ֆուտբոլ-«Փյունիկ», «Հրազդան», Ֆուտբոլի ակադեմիա, Աբովյանի քաղաքային մարզադաշտ
բասկետբոլ- «Միկա», «Գրանդ Տոբակո», Հայ սլավոնական համալսարան
վոլեյբոլ- «Կիլիկիա», ՀՊՏՀ մարզադահլիճ
թենիս- «Օրանժ»
սեղանի թենիս — «Դինամո»
շախմատ — Շախմատի տուն
բադմինթոն- «Օրանժ»
լող- Դավիթ Համբարձումյանի անվան մարզադպրոց
աթլետիկա- Արտաշատի քաղաքային մարզադաշտում
մինի ֆուտբոլ- «Գրանդ» մարզահամալիր, Ֆուտբոլի ակադեմիա

Իշխան Զաքարյանը հայտնեց, որ բոլոր մարզակառույցները տրամադրվել են անվճար։ Նա ավելացրեց , որ «Զվարթնոց» օդանավակայանում մասնակիցներից վիզայի գումար չեն գանձելու։

Պրոֆեսիոնալ բռնցքամարտի թեթևքաշային կարգում IBO-ի վարկածով աշխարհի չեմպիոն Վիկ Դարչինյանն իր հաջորդ մենամարտը կանցկացնի սեպտեմբերի 3-ին Հայաստանում:

Վախթանգ Դարչինյանն առաջին պրոֆեսիոնալ մենամարտը կանցկացնի հայրենիքում, հաղորդում է championat.ru-ն` հղում անելով boxrec.com-ին: Սեպտեմբերի 3-ին Դարչինյանի մրցակիցը կլինի պրոֆեսիոնալ ռինգում անցկացրած 15 մենամարտերում ոչ մի պարտություն չկրած WBA վարկածի Աֆրիկայի չեմպիոն, նամիբիացի Պաուլյուս Ամբունդան, որը 2004թ. Աթենքի Օլիմպիական խաղերում հասել էր մինչև քառորդ եզրափակիչ:

Այսօր հայ անվանի բռնցքամարտիկ Արթուր Աբրահամը 100 հազար եվրո արժողությամբ նվերներ հանձնեց Վլադիմիր Ենգիբարյանի անվան բռնցքամարտի օլիմպիական մանկապատանեկան մարզադպրոցին, դպրոցի սաներին եւ մարզիչներին:

Նվերները` “Ադիդաս” ֆիրմայի մարզական գույք, տանձիկներ, բռնցքամարտի “լապաներ”, բռնցքամարտի համար նախատեսված շապիկներ, վարտիքներ, կոշիկներ, մարզակոշիկներ, մարզական համազգեստներ, պայուսակներ, ձեռնոցներ, գլխարկներ եւ այլն:

Արթուր Աբրահամը տեղում պատասխանելով լրագրողների հարցերին` նշեց, որ  յուրաքանչյուր մրցույթի ժամանակ ինքը կրում է “Ադիդաս” ֆիրմայի ձեռնոցներ, եւ իր վերջին մենամարտից առաջ վերոնշյալ ֆիրմայի հետ ձեռք է բերվել պայմանավորվածություն, որպեսզի գումարի փոխարեն իրեն տան տրամադրվելիք գումարի կրկնակի չափին համարժեք մարզական իրեր:

“Այս քայլով ուզում եմ երախտագիտությունս եւ խորին շնորհակալությունս  հայտնել իմ մարզադպրոցին, որտեղ ժամանակին մարզվել եմ եւ որն ինձ օգնել է հետագայում արդյունքների հասնել”,- ասաց Արթուր Աբրահամը եւ հավելեց, որ այսօր Հայաստանում շատ են խոստումնալից բռնցքամարտիկներն եւ լավ մարզիչները:

Արթուր Աբրահամը խոստացավ, որ նմանօրինակ բարեգործական  միջոցառումներ առաջիկայում եւս կկազմակերպի` միտված ՀՀ-ում բռնցքամարտի զարգացմանը:

Անդրադառնալով իր առաջիկա ծրագրերին` բռնցքամարտիկն ասաց, որ առաջիկայում Գերմանիայում որակավորման 2 մենամարտ կանցկացնի, որից հետո կմենամարտի աշխարհի չեմպիոնի տիտղոսի  համար:

“Այն, ինչ կորցրել եմ, ետ կվերադարձնեմ”,- խոստացավ Արթուր Աբրահամը:

Հունիսի 30-ին Հայաստանի ալպինիզմի եւ լեռնային տուրիզմի ֆեդերացիայի հավաքական թիմը (7 մարդ) Իրանի ալպինիզմի ֆեդերացիայի հրավերով մեկնում է Իրան` վերելք կատարելու այդ երկրի բարձրագույն լեռը` Դեմավենդը, որի բարձրությունն է 5671 մետր:

Վերջին 15 տարիների ընթացքում  պաշտոնապես Հայաստանից թիմային ոչ մի միջազգային վերելք չի կատարվել: Սա առաջին եւ լուրջ փորձն է վերականգնելու հայկական լեռնագնացության ավանդույթները:

«Ուլիս» ակումբում ֆուտբոլիստներին «քցելն» ավանդույթ է։ Արդեն կես տարի է «Ուլիսի» առաջին լիգայի՝ «Շենգավիթ» թիմի պայմանագրային խաղացողները չեն ստացել իրենց հասանելիք ամսական աշխատավարձը։ Այն չնչին է ՝ ընդամենը 30 հազար դրամ, բայց անգամ այս կոպեկները «Ուլիսի» ղեկավարությունը նախընտրում է գողանալ օր ու գիշեր ֆուտբոլին նվիրած երիտասարդներից։ Այս «հույժ գաղտնի» տեղեկությունը ստանալով, խոստացանք չհրապարակել տղաների անունները։ Նրանք վստահ են, որ հակառակ դեպքում թիմի մարզիչներն իրենցից պարզապես կազատվեն։ Նրանցից գլխավորը Սևադա Արզումանյանն է, իսկ նախագահը Հանրային  հեռուստատեսության և ռադիոի խորհրդի նախագահ Ալիկ Հարությունյանի աղբայրն է՝ Արտակ Հարությունյանը։ Նա ճարպիկ և գործունյա երիտասարդի համբավ ունի և լայն կապեր բիզնես աշխարհում, որոնց շնորհիվ հովանավորչական մեծ գումարներ է բերում թիմի համար։