Ամանորի օրերին քաղաքապետարանի ենթակայության հանրային ծառայություններ մատուցող բոլոր կազմակերպությունները, Երևանի քաղաքապետի հանձնարարությամբ, աշխատել են ուժեղացված աշխատակարգով:

2013 թվականի դեկտեմբերի 31-ից հունվարի 7-ն ընկած ժամանակահատվածում Երևանի քաղաքապետարանի ենթակայության «Շտապբուժօգնություն» ՓԲ ընկերությունում ստացվել է 6172 կանչ: Դրանց հիմնական մասը եղել են սրտանոթային ու սուր շնչառական հիվանդությունների հետ կապված:

1032 դեպքում հիվանդները տեղափոխվել են հիվանդանոց:

Կանչերի գերակշիռ մասը՝ 2221, եղել է գիշերային ժամերին:

Նշենք, որ նախորդ տարվա նույն ժամանակահատվածում գրանցվել էր 5390 կանչ:

Ընդհանուր առմամբ՝ 2013-ին 20-25 հազարով ավելի կանչեր են ստացվել, ինչը, ըստ «Շտապբուժօգնություն» ՓԲԸ տնօրեն Թագուհի Ստեփանյանի, պայմանավորված է ինչպես ոլորտում կատարված բարեփոխումներով, այնպես էլ ծառայության նկատմամբ քաղաքացիների վստահության աճով:

Հայաստանի Հանրապետության վարչապետ Տիգրան Սարգսյանի որոշմամբ` Արման Բաբլոյանը նշանակվել է Հայաստանի Հանրապետության քաղաքաշինության նախարարի տեղակալ։

Արման Բաբլոյան

Տարեթիվ, ամսաթիվ, ծննդավայր

1979 թ. օգոստոսի 22, ք. Երևան

Կրթություն

1996 – 2001 թթ. — Մ. Հերացու անվան Երևանի պետական բժշկական համալսարանի ստոմատոլոգիայի ֆակուլտետ

2001–2004 թթ. — Մ. Հերացու անվան Երևանի պետական բժշկական համալսարանի օրթոպեդիկ ստոմատոլոգիայի ամբիոն, կլինիկական օրդինատուրա

2004–2007 թթ. — Ակադեմիկոս Ս. Ավդալբեկյանի անվան Առողջապահության ազգային ինստիտուտի վիրաբուժական ստոմատոլոգիայի ֆակուլտետ, ասպիրանտուրա

2005–2007 թթ. — Հայաստանում ֆրանսիական համալսարանի կառավարման ֆակուլտետի մագիստրատուրա, մասնագիտություն՝ ձեռներեցություն, փոքր և միջին ձեռնարկությունների կառավարում

Աշխատանքային գործունեություն
2004-2007 թթ. — «Արաբկիր» բժշկական համալիրի երեխաների և դեռահասների առողջության ինստիտուտ մարզային մասնաճյուղերի տնօրեն

01.06.2007 – առ այսօր — «Արաբկիր» բժշկական համալիրի երեխաների և դեռահասների առողջության ինստիտուտի տնօրեն

2007-2008 թթ. — «Գարանտ Լիմենս» ԱՓԲԸ-ի տնօրենների խորհրդի նախագահ

2008 — 2010 թթ. — «Գարանտ Լիմենս» ԱՓԲԸ-ի տնօրենների խորհրդի անդամ,

2010-2013 թթ. — «Գարանտ Լիմենս» ԱՓԲԸ-ի տնօրենների խորհրդի նախագահ

2013 թ. դեկտեմբերի 20-ից՝ ՀՀ առողջապահության նախարարի տեղակալ

Այլ տվյալներ

2007 – 2009 թթ. ծառայել է ՀՀ զինված ուժերում որպես բժշկական ծառայության լեյտենանտ, ատամնաբույժ: ՀՀ զինված ուժերի 20-ամյակի կապակցությամբ ՀՀ պաշտպանության նախարարի կողմից պարգևատրվել է հոբելյանական մեդալով, կուսակցական, հասարակական-քաղաքական գործունեության համար պարգևատրվել է պատվոգրով ՀՀԿ նախագահի կողմից: Մասնակցել է վերապատրաստման դասընթացների Շվեյցարիայի Ժուրայի Կանտոնալ հիվանդանոցի ադմինիստրացիայում՝ «Հիվանդոցային կառավարում-մարդկային ռեսուրսների կառավարման հմտություններ» և «Հիվանդոցային կառավարում» թեմայով, Հայաստանի ամերիկյան համալսարանում՝ «Մարդկային ռեսուրսների կառավարում առողջապահության համակարգում», Ֆրանսիայի Մարսել քաղաքի Aix–Marseille 2 համալսարանում՝ «Օրթոպեդիկ ստոմատոլոգիա» թեմաներով: Տիրապետում է անգլերենի, ֆրանսերենի, ռուսերենի։ «ՀՀ Ռադիոսպորտի ֆեդերացիա» հասարակական կազմակերպության նախագահն է, հանդիսանում է ՀՀ նախագահին կից հանրային խորհրդի առողջապահության և սոցիալական հարցերով հանաձնաժողովի անդամ, «Առողջապահության կազմակերպիչների միավորում» հասարակական կազմակերպության խորհրդի անդամ, Երևան քաղաքի Արաբկիր վարչական շրջանի ղեկավարին կից հասարարական խորհրդի անդամ:

Կուսակցական պատկանելությունը

Հայաստանի հանրապետական կուսակցություն

Անձնական տվյալներ

Ամուսնացած է, ունի մեկ որդի և մեկ դուստր:

Հիշեցնենք, որ ավելի վաղ «Հրապարակ»-ը գրել էր. «Երեկ տեղեկացանք, որ առողջապահության փոխնախարար է նշանակվել Աժ առողջապահության, մայրության և մանկության հարցերի մշտական հանձնաժողովի նախագահ, առողջապահության նախկին նախարար Արա Բաբլոյանի որդին՝ Արման Բաբլոյանը, ով «Արաբկիր» բժշկական կենտրոնի տնօրենն էր։ Թե ինչու է արժանին հենց պաշտոնյայի որդին համարվել, ակնհայտ է, որ ոչ թե հմտությունների ու բացառիկ խելքի համար, այլ հայրիկի կապերն ու շրջապատն են դեր խաղացել»:

Հերթական պաշտոնյայի որդուն բարձր պաշտոն են տվել։ Երեկ տեղեկացանք, որ առողջապահության փոխնախարար է նշանակվել Աժ առողջապահության, մայրության և մանկության հարցերի մշտական հանձնաժողովի նախագահ, առողջապահության նախկին նախարար Արա Բաբլոյանի որդին՝ Արման Բաբլոյանը, ով «Արաբկիր» բժշկական կենտրոնի տնօրենն էր։ Թե ինչու է արժանին հենց պաշտոնյայի որդին համարվել, ակնհայտ է, որ ոչ թե հմտությունների ու բացառիկ խելքի համար, այլ հայրիկի կապերն ու շրջապատն են դեր խաղացել:

Մանրամասները՝ «Հրապարակի» այսօրվա համարում:

ՀՀ կառավարությունը վերաբաշխում է կատարել 2013թ. պետբյուջեում, փոփոխություններ և լրացումներ` իր ավելի վաղ ընդունած որոշումներից մեկում և ՀՀ աշխատանքի և սոցիալական հարցերի նախարարությունից մոտ 67.5 մլն դրամ հատկացրել ՀՀ առողջապահության նախարարությանը: Նշված գումարը կտրամադրվի գործող երեք տեսչությունների միավորմամբ ստեղծված ՀՀ առողջապահության նախարարության աշխատակազմի առողջապահական պետական տեսչությանը` մինչև տարեվերջ իր գործառույթներն անխափան իրականացնելու, ինչպես նաև վերակազմավորման և կառուցվածքային փոփոխության արդյունքում աշխատանքից դուրս մնացած անձանց վերջնահաշվարկի և արձակման նպաստի գումարը վճարելու նպատակով: Տեսչությունների օպտիմալացման ծրագրով կմեծանա պետության կողմից ծախսվող միջոցների արդյունավետությունը:

Կառավարության լրատվական ծառայության տեղեկացմաբ, նիստում լրացումներ են կատարվել կառավարության ավելի վաղ ընդունած որոշումներից մեկում, ինչը թելադրված է «Հայաստանի Հանրապետությունում ստուգումների կազմակերպման և անցկացման մասին» օրենքի ընդունմամբ, որի նպատական է տեսչական բարեփոխման իրականացմամբ նոր ռիսկի վրա հիմնված ստուգման ներդրումը: Հաստատվել են այդպիսի ստուգման ստուգաթերթերը:

Մեկ այլ որոշմամբ ՀՀ առողջապահության նախարարության պետական առողջապահական գործակալության (ՊԱԳ) կենտրոնական ապարատում ստեղծվել է բժշկական օգնության մշտադիտարկման և փորձագիտական գնահատման բաժին:
Կառավարությունն իր ավելի վաղ ընդունած որոշումներից մեկում կատարել է փոփոխություններ և լրացումներ, որոնց նպատակն է սոցիալական փաթեթի պարտադիր պայման հանդիսացող ապահովագրության ծառայությունը փոխարինել պետության կողմից տրամադրվող (բժշկական օգնության և սպասարկման ծառայությունների) առողջապահական փաթեթով, բանկերի կողմից հաշվետվության ներկայացման ժամանակահատվածը բաշխել ամսական, եռամսյակային և տարեկան կտրվածքով և այլն:
Փոփոխելով իր նախկին որոշումներից մեկը, կառավարությունը որոշել է փակել հակատուբերկուլոզային այն բաժանմունքները, որոնք հիվանդներով թերծանրաբեռնված են, եղած հիվանդներն էլ ուղեգրվում են Հանրապետական հակատուբերկուլոզային դիսպանսեր: Որոշումը պայմանավորված է ՀՀ մարզերի առողջապահական համակարգերում ընթացող օպտիմալացման ծրագրով և մարզերում մատուցվող բժշկական ծառայությունների որակի, արդյունավետության և մատչելիության բարձրացմամբ: Նույնանման հիմնավորմամբ կառավարությունը որոշել է ՀՀ առողջապահության նախարարության «Հոգեբուժական բժշկական կենտրոն» ՓԲԸ-ն բաժանման ձևով վերակազմակերպել` ստեղծելով «Նարկոլոգիական հանրապետական կենտրոն», «Նուբարաշեն» հոգեբուժական կենտրոն», «Նորք» հոգեբուժական կենտրոն», «Ավան» հոգեկան առողջության կենտրոն», «Նևրոզների կլինիկա» փակ բաժնետիրական ընկերությունները:
«Հայաստանի կույրերի միավորում» ՀԿ անդամ հանդիսացող` աշխատողների միջին ցուցակային թվաքանակի առնվազն 50 տոկոս տեսողությունից հաշմանդամ ունեցող ընկերությունների կանոնադրական գործունեության իրականացման արդյունքում հաշվարկված (հաշվարկվելիք) ԱԱՀ-ի, գործատուի կողմից վճարման ենթակա պարտադիր սոցիալական ապահովության վճարների և եկամտային հարկի գծով մուծված (մուծվելիք) գումարները փոխհատուցելու նպատակով կառավարությունը հատկացրել է ավելի քան 62.5 մլն դրամ:

Այսօր՝ ՎԱՐԿԱԾ ակումբում,  ՁԻԱՀ-ի դեմ պայքարի միջազգային օրվան ընդառաջ  հրավիրված ասուլիսում  ՁԻԱՀ- ի կանխարգելման հանրապետական կենտրոնի «ՁԻԱՀ-ի դեմ պայքարի» բաժնի վարիչ Ժաննետա Պետրոսյանը կոչ արեց այն մարդկանց, որոնք իրենց կյանքում ունեցել են ռիսկային իրավիճակներ, դիմել համապատասխան ծառայություն և անցնել ՄԻԱՎ վերաբերյալ հետազոտություն:

«Մարդիկ տեղեկացված չեն, որ գոյություն ունի բուժում և կարծում են, թե ախտորոշումն արդեն իրենց կյանքի վերջն է: Այսօր այդ բուժումը կա, հասանելի է, անվճար է»,-ասաց Ժաննետա Պետրոսյանը:

Նույն կենտրոնից համաճարակաբանական հսկման բաժնի վարիչ Արշակ Պապոյանը ևս կոչ արեց մարդկանց՝ իմանալ իրենց կարգավիճակի մասին: Ըստ նրա, ՀՀ-ում բնակչության 2/3-ը չգիտի իր կարգավիճակի մասին:

«Ինչքան ախտորոշումը բարելավվի  և ինչքան արձանագրվող դեպքերի թիվն ավելանա, այնքան ավելի շատ մարդ կիմանա իր կարգավիճակի մասին»,-նշեց Արշակ Պապոյանը և ընդգծեց, որ ՄԻԱՎ-ով վարակված մարդը, եթե ժամանակին ախտորոշվում է  և ստանում է սպեցիֆիկ բուժում, նա կարող է ապրել այնքան, ինչքան որ կապրեր առանց ՄԻԱՎ վարակի:

Արշակ Պապոյանի տեղեկացմամբ, սկսած 1988թ.-ից, երբ Հայաստանում արձանագրվել է ՄԻԱՎ վարակի առաջին դեպքը, մինչև այսօր ՀՀ-ում 1586 ՄԻԱՎ վարակի դեպք է գրացվել, իսկ այս տարվա 11 ամիսների ընթացում արձանագրվել է 205 դեպք:

«Հանրային տեղեկատվություն և գիտելիքի կարիք» ՀԿ նախագահ Մամիկոն Հովսեփյանը< խոսելով թմրամոլների, միասեռականների և մարմնավաճառների մոտ պայքարի եղանակների մասին, նշեց, որ իրականացվում է ասեղի փոխանակման ծրագիրը. «Նրանք միշտ իրենց հետ պետք է ասեղ ունենան, կոնկրետ թմրամոլությունը բուժելու համար կա մեթադոնային բուժումը, որի ընթացքում փորձում են վերացնել կախվածությունը թմրանյութից, հետևաբար նաև ՄԻԱՎ-ի և այլ վարակների տարածվածությունը»:

«Հայկական Վարկած»-ի այն հարցին, թե արդյո՞ք իրենց ՀԿ-ն  վերահսկում է սեռական պաշտպանվածությունը, տրամադրում է բժշկական օգնություն, Մամիկոն Հովսեփյանը պատասխանեց. «Մենք ուղղորդում են սեռավարակների կենտրոն, բնականաբար նաև ՁԻԱՀ-ի կանխարգելման կենտրոն.  անձի ցանկությունից է կախված, թե ինքն ուր կգնա»:

Ասուլիսի մյուս բանախոս «Դրական մարդկանց հայկական ցանց» ՀԿ նախագահ Անահիտ Հարությունյանն իր հերթին նշեց, որ, ճիշտ է, այսօրվա  դրությամբ բուժումը հասանելի է, բայց մի քանի տարի հետո խնդիրներ են ծագելու, քանի որ, նրա տեղեկացմամբ, «Գլոբալ» հիմնադրամը երկրից գնալու է:

Անահիտ Հարությունյանն անդրադարձավ մեկ այլ խնդրի, որը պակաս կարևոր չէ. «Հայաստանում բավականին տարածված է հեպատիտ C-ն, սակայն  պետական ոչ մի ֆինանսավորում  չկա, այդ թվում նաև ՄԻԱՎ-ով ապրող մարդկանց շրջանում: Ոչ մի գումար կառավարության կողմից չի տրամադրվում:  Առողջապահության նախարարությանը նամակ ենք ուղարկել, արդեն մի քանի ամիս անցել է, սակայն  ոչ մի արձագանք չկա»:

Ի դեպ, ՁԻԱՀ-ի կանխարգելման հանրապետական կենտրոնը մի շարք հասարակական կազմակերպությունների հետ համատեղ, վաղը Հյուսիսային պողոտայում ժամը 14.00-ից 18.00 անցկացնելու է ՀՀ-ում ամենամեծ ակցիան: Մարդիկ կարող են գնալ, անվճար հետազոտվել և 20 րոպեից իմանալ արդյունքները:

Վաղը՝ նոյեմբերի 30-ին, ժամը 10.30, ՎԱՐԿԱԾ ակումբի (Արշակունյաց 2, Տիգրան Մեծ հրատարակչություն, 4-րդ հարկ, 417 սենյակ) հյուրերն են ՁԻԱՀ- ի կանխարգելման հանրապետական կենտրոնի «ՁԻԱՀ-ի դեմ պայքարի» բաժնի վարիչ Ժաննետա Պետրոսյանը, «Հանրային տեղեկատվություն և գիտելիքի կարիք» ՀԿ նախագահ Մամիկոն Հովսեփյանը և «Դրական մարդկանց հայկական ցանց» ՀԿ նախագահ Անահիտ Հարությունյանը:

Թեման՝ ՁԻԱՀ-ի դեմ պայքարի վիճակագրական տվյալների հրապարակում, պայքարի եղանակները թմրամոլների, միասեռականների և մարմնավաճառների մոտ:

Սննդի անվտանգության տեսչությունն անցել է ընդհատակ. այստեղ ոչ հեռախոսազանգերի են պատասխանում, ոչ էլ, դատելով իրավիճակից ու հանրության բողոքների արձագանքից, մտահոգվում շուրջը տիրող իրավիճակի մասին:

Մասնավորապես՝ խայտառակ իրավիճակ է ԳՈՒՄ-ի շուկայի տարածքում. Խորենացի փողոցի մի մայթում, կրպակից գոռացող «ռաբիսի» տակ, ուղիղ մայթի կենտրոնում, լայն տաշտերի մեջ խաշ են վաճառում, ու ջուրը թափում մադկանց ոտքերի տակ, (այստեղից անցնելիս`  չգիտես ականջներդ բռնես, թե՞ քիթդ, ու ինչպես անցնես որ խաշի ջուրը չլցվի վրադ, և դա այն դեպքում, երբ դիմացը՝ շուկայի մեջ կառուցված շինությունը կարող է հանգիստ ծառայել այդ նպատակին:) Իսկ մյուս մայթում ուղղակի աներևակայելի բան է՝ արյուն, աղբ, կենդանիների լեշի զանազան մասեր և գարշահոտ:

Դեռ անցյալ տարի ՍԱ ծառայությունը մսի պասաժների տերերին պարտադրեց վերակառուցել կրպակները, ապրանքը ներս տանել, ու, կարծես թե, մի կարճ ժամանակ վիճակը կարգավորվել էր: Այսօր շատ ավելի վատ է:

Երևանի քաղաքապետարանն էլ, կարծես, ձեռքերը լվացել է, մասնավորապես կենտրոնի թաղապետարանում կամ չեն տեսնում կատարվածը, կամ տեսնում են ու աչք փակում:

Իսկ այս ամենաթողությունից տուժում է հետիոտն քաղաքացին, որի  համար մայրաքաղաքի կենտրոնական փողոցներից մեկի մայթերը անանցանելի են:

Արդեն մեկ շաբաթ է, ինչ բուժման նպատակով Ֆրանսիայում է ԱԺ ՀՀԿ-ական պատգամավոր, գեներալ Մանվել Գրիգորյանը:

«Հրապարակ» օրաթերթը գրում է, որ արտասահմանցի բժիշկների միջամտությանն այս տարի արդեն երրորդ անգամ է դիմում գեներալը: Ըստ նրա ընտանիքին մոտ կանգնած թերթի աղբյուրի` Մանվել Գրիգորյանի մոտ թոքերի հետ կապված շատ լուրջ հիվանդություն է, որն աստիճանաբար քայքայում է գեներալի օրգանիզմը:

Երեկ էլ Ֆրանսիա է մեկնել նրա որդին` Էջմիածնի քաղաքապետ Կարեն Գրիգորյանը: Քաղաքապետարանի թերթի աղբյուրի փոխանցմամբ` քաղաքապետի մեկնումը բոլորի համար անսպասելի է եղել:

Օրաթերթը երեկ տեղեկություն է ստացել, որ ՀՀ ՊՆ Արարատ քաղաքի զորամասում զանգվածային թունավորում է գրանցվել։

Դեպքը եղել է չորս օր առաջ։ Թունավորվել է մոտ 40 զինծառայող։ Զինվորներն ասել են, որ թունավորվել են զորամասի թեյարանի սնունդից և ճաշարանում մատուցված հավի մսից։ Ըստ այդ նույն տեղեկությունների, չնայած զինվորների պնդումներին, Ռազմական ոստիկանությունը փորձում է թունավորումը բարդել զորամասի հարևանությամբ գտնվող սննդի օբյեկտների վրա։

Այս կետերից ինչ-որ նմուշներ են տարել փորձաքննության, ստուգումներ անցկացրել, անգամ փորձել են «պլոմբել» դրանցից մեկը։

Արծրուն Հովհաննիսյանը թերթի հետ զրույցում ասել է, որ ոչ թե թունավորում է եղել, այլ աննշան բան է:

Հոդվածն ամբողջությամբ՝  «Հայկական ժամանակ» օրաթերթի այսօրվա համարում:

Այսօր  ՎԱՐԿԱԾ ակումբի հյուր ԱՆ հիվանդությունների վերահսկման և կանխարգելման ազգային կենտրոնի աշխատակից Լիլիթ Ավետիսյանը, խոսելով սուր շնչառական վիրուսների, այդ թվում՝ գրիպի ներկայիս համաճարակային իրավիճակի մասին, նշեց, որ բազմաթիվ վիրուսների մեջ  ամենածանրը գրիպն է, որն ունի արագ տարածվելու հատկություն և կարող է առաջացնել պանդեմիաներ:

«Հիմա գրիպի սեզոնը սկսվել է, բնակիչները պետք է իմանան, թե ինչ անել, որ հնարավորինս կանխարգելեն վիրուսի ներթափանցումն իրենց օրգանիզմ: Ամենակարևորը, գրիպով հիվանդը անպայման պետք է հրավիրի բժիշկ և չզբաղվի ինքնաբուժմամբ»,- խորհուրդ տվեց Լիլիթ Ավետիսյանը և հավելեց. « Մեր հասարակությունը սիրում է հակաբիոտիկներ օգտագործել, իսկ դրանով ոչ միայն օգուտ չեն տալիս իրենց, այլև վնասում են: Դիմելով բժշկին նրանք օգնում են նաև առողջապահական ծառայություններին, որպեսզի ճիշտ ստատիստիկա վարեն »:

Նրա խոսքով, ցանկալի է այս սեզոնին սնվել այնպիսի սննդատեսակներով, որոնք հարուստ են վիտամին C-ով և կարող են իմունիտետ բարձրացնել, շատ կարևոր է օգտագործել նաև ընկույզ, մեղր, և ամենակարևորն, ըստ Լիլիթ Ավետիսյանի, եղանակին համապատասխան հագնվելն է:

Բանախոսը նշեց, որ ամեն տարի գրանցվում է գրեթե նույն թիվը՝ այս տարի ևս բացառություն չէ, և վերջին շաբաթվա մոնիթորինգի համաձայն՝ սուր շնչառական հիվանդությունների շուրջ 2000 դեպք է գրանցվել:

Լիլիթ Ավետիսյանի տեղեկացմամբ, հանրապետությունում իրավիճակը հսկողության տակ է, այդ հարցում մեծ դեր է խաղում նաև բնակչությունը, որը բարձրաձայնելով, օգնում է կանխարգելել հիվանդությունները:

Անդրադառնալով «իրանական վիրուսի» վերաբերյալ  տարածված լուրերին, Լիլիթ Ավետիսյանը նշեց.  «Նման որևէ պաշտոնական տեղեկատվություն իրանական կողմից չի եղել, իսկ մենք ունենք միջպետական պայմանավորվածություն, որ եթե մեր, կամ իրենց մոտ ինչ-որ բան լինի, անպայման մյուս կողմին տեղյակ են պահում, իսկ  նման բան դեռ չի եղել: Եվ ընդհանրապես, Հայաստանում որևէ արտառոց վիրուս չի ախտորոշվել, որի անունն էլ դեռ դնենք իրանական»: