Զանգվածային լրատվամիջոցներում այս օրերին բազմաթիվ անդրադարձներ եղան «Առևտրի և ծառայությունների մասին» ՀՀ օրենքով դեղերի պարտադիր դրոշմապիտակավորման շուրջ։

ՀՀ առողջապահության նախարարությունը բարեփոխմանը կողմ է, քանի որ ՀՀ ֆինանսների նախարարությունն օրենսդրական այս փոփոխությունը հիմնավորում է դեղերի շուկայում ստվերի վերացման եւ մրցակցային դաշտ ստեղծելու անհրաժեշտությամբ: Կեղծ կամ չգրանցված դեղերը շրջանառվում են ստվերում` դուրս մնալով փորձագիտական անհրաժեշտ վերահսկողությունից։ ՀՀ առողջապահության նախարարությունը, լինելով բնակչությանն արդյունավետ, անվտանգ և որակյալ դեղերով ապահովելու երաշխավորը, շահագրգիռ է, որ շուկան զերծ մնա կեղծ, չգրանցված դեղերից։

Ինչ վերաբերում է դրոշմապիտակավորման ներդրմամբ դեղերի գների բարձրացմանը, ապա հարկային օրենսդրությամբ դրոշմապիտակների ձեռք բերման համար վճարված գումարները պակասեցվում են հարկ վճարողի ունեցած հարկային պարտավորություններից: Դրոշմապիտակավորման վրա կատարվող ծախսերն այնքան մեծ չեն, որ ազդեցություն ունենան ապրանքի գնի վրա: Մասնագիտական հաշվարկներով դրոշմապիտակավորումը կարող է հանգեցնել դեղերի 2-5 դրամի թանկացման։

Առողջապահության նախարարությունում բազմաթիվ քննարկումներ են եղել «Դեղերի մասին» ՀՀ նոր օրենքի նախագծի, ոլորտին առնչվող այլ հարցերի, այդ թվում` դեղերի պարտադիր դրոշմապիտակավորման վերաբերյալ։ Դրանց մշտապես մասնակից են եղել շահագրգիռ բոլոր կողմերը, նարառյալ` դեղ ներկրող և արտադրող խոշոր ընկերությունների ներկայացուցիչները:

Հանրապետության բնակչությանը որակյալ, արդյունավետ, անվտանգ և մատչելի դեղերով ապահովելու նպատակով ՀՀ առողջապահության նախարարությունը դեղագործական գործունեություն իրականացնող կազմակերպությունների հետ համատեղ հուշագիր ստորագրելու նախաձեռնություն է հանդես բերել: Փաստաթղթի ստորագրումը միտված է Հայաստանում դեղերի շրջանառության ոլորտում պետական քաղաքականության իրականացման նպատակով պետական և մասնավոր հատվածների միջև կառուցողական ու փոխշահավետ համագործակցությանը` որդեգրելով բաց և թափանցիկ գործելաոճ, համատեղ քննարկումների միջոցով փոխհամաձայնության գալու սկզբունք: Այն արդեն ստորագրվել է դեղ ներկրող և արտադրող ավելի քան 15 կազմակերպության կողմից։

ՀՀ առողջապահության նախարարությունը պատրաստակամ է բնակչությանը որակյալ, արդյունավետ, անվտանգ և մատչելի դեղերով ապահովելու համար առավել բարենպաստ միջավայրի ձևավորմանը, կնպաստի այդ ուղղությամբ առաջարկների քննարկմանը, սակայն ոչ երբեք դեղերի գների բարձրացման միջոցով` սպառողների հաշվին:

Բժշկագիտությունը վաղուց արդեն կարողացել է հաղթահարել վարակիչ շատ հիվանդություններ, որոնք ողջ աշխարհում բազմաթիվ կյանքեր էին խլում։ Այսօր հաշմանդամության և մահացության հիմնական պատճառները դարձել են ոչ վարակիչ հիվանդությունները։ Ինչպես եվրոպական տարածաշրջանի երկրներում, Հայաստանում ևս մահացության ընդհանուր կառուցվածքում հիմնական բեռը` մոտ 80%-ը, բաժին է ընկնում ՈՎՀ-ին, որոնցից առաջին տեղում սրտանոթային հիվանդություններն են` 48%, ապա` չարորակ նորագոյացությունները` 19,8%, իսկ երրորդ տեղում` շաքարային դիաբետը` 4,9%։

ՀՀ կառավարությունը դեռ 2010թ. հունվարին հաստատել է «Առավել տարածված ոչ վարակիչ հիվանդությունների (ՈՎՀ) կանխարգելման, վաղ հայտնաբերման և բուժման հայեցակարգը և  կատարումն ապահովող միջոցառումների ցանկը»: Դրան հաջորդել է ՀՀ կառավարության «Առավել բարձր մահացություն բերող երեք հիվանդության` արյան շրջանառության համակարգի (սրտանոթային հիվանդություններ), չարորակ նորագոյացությունների և շաքարային դիաբետի ազգային ռազմավարական ծրագրերը և միջոցառումների ժամանակացույցը»: Այս ծրագրերով ամրագրված է ՈՎՀ կանխարգելման վերաբերյալ բնակչության հանրային իրազեկում, բնակչության ռիսկային խմբերում սկրինինգային հետազոտությունների իրականացում, ինչպես նաև ազգային ուղեցույցների մշակում և մասնագետների կրթում:

Նախանշված միջոցառումներն իրականացնելու նպատակով 2013թ. մեկնարկել է Համաշխարհային բանկի կողմից ֆինանսավորվող «Հիվանդությունների կանխարգելում և վերահսկում» վարկային ծրագիրը: Այն նպատակ ունի բարելավել մոր և մանկան առողջության պահպանման ծառայությունները, ընտրված ոչ վարակիչ հիվանդությունների վաղ հայտնաբերումը և վերահսկումը առողջության առաջնային պահպանման (ԱԱՊ) օղակում, ինչպես նաև առողջապահական ծառայությունների որակը և արդյունավետությունը ծրագրում ընդգրկված հիվանդանոցներում:

Այսօր Աղվերանում պաշտոնապես մեկնարկեց «Հիվանդությունների կանխարգելում և վերահսկում»  ծրագիրը։

«Ուզում եմ ընդգծել, որ այս ծրագրերը համահունչ են նախարարության որդեգրած բնակչությանն առողջ պահելու և ոչ թե հիվանդաբուժություն իրականացնելու գաղափարախոսությանը։ Մոտ ապագայում հիվանդությունների իրական պատկեր կունենանք։ Երեք տարվա ընթացքում հիվանդացության աճ կարձանագրենք, սակայն, միաժամանակ, շատերի մոտ հիվանդությունը կհայտնաբերվի վաղ փուլում և հեշտությամբ կբուժվի»,- ողջունելով համաժողովի մասնակիցներին` ասաց ՀՀ առողջապահության նախարարի տեղակալ Սերգեյ Խաչատրյանը։ նա հավելեց, որ ծրագրի երկարաժամկետ նպատակն է նվազեցնել արգանդի պարանոցի քաղցկեղի, ինչպես նաև ոչ վարակիչ այլ հիվանդությունների հիվանդացությունն ու մահացությունը:

Ինչպես իր խոսքում նշեց Հայաստանում Համաշխարհային բանկի առողջապահության թիմի ղեկավար Վեզի Մսիշան, ծրագրով   նախատեսվում են  խրախուսումներ զարկերակային գերճնշման և շաքարային դիաբետի վաղ հայտնաբերման, ինչպես նաև արգանդի պարանոցի քաղցկեղի կանխարգելման համար:

«Հայաստանն առաջին երկիրն է, որի հետ Համաշխարհային բանկն աշխատում է այս մոտեցումով։ Հնարավոր է, որ այդ փորձը կիրառենք նաև այլ երկրներում ոչ վարակիչ հիվանդությունների դեմ պայքարի ընթացքում»,- նշեց Վեզի Մսիշան։

Զարկերակային գերճնշման և շաքարային դիաբետի սկրինինգներում (զարկերակային ճնշման չափում և արյան մեջ քաղցի գլյուկոզի որոշում) կընդգրկվի կանանց և տղամարդկանց 35-68 տարիքային խումբը: Արգանդի պարանոցի քաղցկեղի վաղ հայտնաբերման նպատակով 30-60 տարեկան կանանց շրջանում կիրականցվի ՊԱՊ թեստ: Երրորդ տարվա վերջում  պետք է հետազոտված լինի թիրախային բնակչության առնվազն 50-60 տոկոսը։

ՀՀ ԱՆ Ծրագրերի իրականացման գրասենյակի տնօրեն Նելսոն Զուլոյանն ամփոփ ներկայացրեց «Հիվանդությունների կանխարգելում և վերահսկում»  ծրագիրը` անդրադառնալով նաև մարզային հիվանդանոցների և ամբուլատորիաների արդիականացմանը։ Նա նշեց, որ Սկրինինգային հետազոտությունները լիովին անվճար են և թիրախային խմբերում ընդգրկված քաղաքացիներին կոչ արեց օգտվել ընձեռված հնարավորությունից և  հետազոտություն անցնել։

ՀՀ ԱՆ Պետական առողջապահական գործակալության պետ Սարո Ծատուրյանը ներկայացրեց կատարողականի վրա հիմնված ֆինանսավորման և խրախուսական վարձատրության սկզբունքները, իսկ ՀՀ ԱՆ Առողջապահության ազգային կենտրոնի տնօրենի պաշտոնակատար Ալեքսանդր Բազարչյանը խոսեց ծրագրի նախապատրաստական փուլում նոր մշակված ուղեցույցների հիման վրա առողջության առաջնային օղակի բուժանձնակազմի համար կազմակերպված կրթական գործընթացի մասին։

Հանդիպման ընթացքում քննարկվեցին նաև մասնագիտական վերապատրաստումների որակի գնահատման և այլ հարցեր։

Հայաստանի դեղարտադրողների և ներմուծողների միության նախագահ Սամվել Զաքարյանը նշում է, որ «Առևտրի և ծառայությունների մասին» օրենքում դեղերի պարտադիր դրոշմապիտակավորումը ներառելը հանգեցնում է մասնավոր հատվածի համար մի շարք խնդիրների:

Այսօր կայացած մամուլի ասուլիսում նա նկատեց, որ նախատեսված փոփոխությունները սովորաբար քննարկվում են մասնավոր հատվածի հետ, այնինչ այս փոփոխությունն առանց քննարկման է ընդունվել և արագ հաստատվել է: «Կոպիտ ասած՝ դա մեզ համար անակնկալ էր»,-ասաց նա:

Սամվել Զաքարյանը նշեց, որ այս փոփոխությունը հանգեցնելու է նրան, որ մատակարարը չի կարողանալու ժամանակին հասցնել դեղամիջոցը սպառողին, ինչպես նաև արտահանման հարցում խնդիրներ է առաջանալու: Նա պարզաբանեց, որ դեղերի փաթեթավորումները շատ տարբեր են և անհրաժեշտ է դրոշմապիտակավորումը ձեռքով իրականացնել, ինչն էլ բերում է մեծ ծախսերի, իսկ դա կազդի դեղերի գնի վրա, առավել ևս որ բողոքներ կան, թե դեղերի գները տատանվում են։

«Դրոշմապիտակավորման այսպիսի համակարգ աշխարհ ոչ մի երկրում չկա»,-ասաց նա:

Նա նշեց, որ թեև Առողջապահության նախարարությանը ներկայացրել է, թե հնարավոր է՝ դեղերը երկուսից-հինգ դրամ թանկանան, սակայն իրենց համար հասկանալի չէ, թե ինչպիսի ուսումնասիրություն են կատարել՝ նման եզրահանգման գալու համար:

Բանախոսն ասաց, որ թեև դրոշմապիտակավորման համակարգի ներդնումը բացատրվում է ստվերի դեմ պայքարով, սակայն դեղագործությունը ամենաթափանցիկ ոլորտն է:

«Պետության կողմից դրոշմապիտակավորման համար ծախսվող գումարներն իրականության մեջ չեն բերի իրենց ակնկալած արդյունքները»,-ասաց նա և նշեց, որ կրկին դիմում են Նախագահին, կառավարությանը, որպեսզի նրանք հասկանան, որ դեղերը հասարակ ապրանքատեսակներ՝ լիմոնադ, օճառ չեն, և այսպիսի քայլերը կբերեն «պարալիզացման»:

Tert.am-ի դիտարկմանը, թե ի՞նչ միտում է տեսնում ոլորտի ներկայացուցիչը Կառավարության այս քայլում՝ հաշվի առնելով, որ դեղագործությունը գերակա ոլորտ է ճանաչվել, Սամվել Զաքարյանը պատասխանեց. «Մենք քաղաքական հարց սրա մեջ չենք տեսնում: Մենք էլ ենք ցանկանում, որ ստվերային տնտեսությունը մաքսիմալ կրճատվի, սակայն անհրաժեշտ է այդ պրոցեսում մասնագիտորեն հիմնավորված որոշումներ կայացվեն»:

Դեղարտադրողների միության նախագահը նշեց, որ Կառավարության համար իրենք միշտ օրինակելի գործընկերներ են եղել և կարծում է, որ այս որոշման մեջ թաքնված նպատակ չկա:

Այնուհանդերձ, նա նաև կոռուպցիոն վտանգ է տեսնում այս փոփոխության մեջ, ինչպես նաև նշում, որ եթե օրինակ դրոշմապիտակավորվի ամբողջ դեղի փաթեթը, դեղատներն այլևս հատով դեղեր չեն կարող վաճառել:

Tert.am

ՀՀ պաշտպանության նախարար Սեյրան Օհանյանը սեպտեմբերի 17-ին հանդիպում ունեցավ ՀՀ առողջապահության նախարարության Դատաբժշկական գիտագործնական կենտրոնի տնօրեն Մհեր Բիշարյանի և ՀՀ-ում ԿԽՄԿ-ի պատվիրակության ղեկավար, տիկին Սառա Էպրեխտի հետ:

Հանդիպման ընթացքում ՀՀ պաշտպանության նախարարության, ՀՀ առողջապահության նախարարության դատաբժշկական գիտագործնական կենտրոնի և ՀՀ-ում ԿԽՄԿ-ի գրասենյակի միջև ստորագրվեց «Ղարաբաղյան հակամարտության հետևանքով անհայտ կորած անձանց ընտանիքներից կենսաբանական նմուշներ վերցնելու, վարելու և այլ անձնական տվյալներ հավաքագրելու վերաբերյալ» Արձանագրությունը:

Անհայտ կորած անձանց ընտանիքների անդամներից վերցված կենսաբանական նմուշները կհեշտացնեն անհայտ կորած անձանց որոնումներն ու հայտնաբերումը, կմեծացնեն զոհվածների արտաշիրիմումն իրականացնելու ընթացքում աճյունների ինքնությունը պարզելու հավանականությունը:

Բոլոր կենսաբանական նմուշները կպահպանվեն ՀՀ առողջապահության նախարարության Դատաբժշկական գիտագործնական կենտրոնում` դրանք հարկ եղած պարագայում համապատասխան փորձաքննություն անցկացնելու  նպատակով:

Հանդիպման ավարտին կողմերը պատրաստակամություն հայտնեցին էլ ավելի ընդարձակել համագործակցությունը վերոնշյալ բնագավառում:

ՀՀ պաշտպանության նախարարություն

Oգտվելով ՀՀ գլխավոր հոգեբույժ Սամվել Թորոսյանին հանդիպելու հնարավորությունից, (քանի որ նա իրեն անցանկալի հարցերի դեպքում խնդրում է 10 րոպեից զանգահարել, ապա դառնում է անհասանելի) որոշեցինք պարզել «Հայկական վարկած»-ին հասած տեղեկությունը, թե՝ Սևանի հոգեբուժարանում հիվանդներից մեկի մահվան հետ կապված հետաքննություն է սկսվել:

Ըստ մեր տեղեկության, հիվանդներից մի կին կոտրել է թևը: Հիվանդանոցի երկու աշխատակից թաքցրել են դեպքը, և համարժեք օգնություն չի եղել. կինը, հավանաբար, տրավմատիկ շոկից, մի քանի օր հետո մահացել է: Այժմ երկու աշխատակիցներն ազատվել են աշխատանքից, իսկ դեպքով զբաղվում են իրավապահները:

Տեղեկության ստույգ լինելը փորձեցինք ճշտել ՀՀ գլխավոր հոգեբուժ Սամվել Թորոսյանից, որը  նշեց, որ տեղյակ չէ նման դեպքից. «Եթե տեղեկություն ունենամ, բնականաբար՝ կասեմ»:

Զրուցեցինք նաև առողջապահության նախարարի մամլո քարտուղար Անահիտ Հայթայանի հետ, որը պատասխանեց, թե նման բան անհավանական է. «Ես երեկ եմ խոսել հոգեբուժարանի տնօրենի հետ, ինձ նման տեղեկություն չեն հայտնել»:

Տիկին Հայթայանը փոխանցեց, որ վերջերս հոգեբուժարանում մի կին ոտքն է կոտրել, այն հիմա գիպսի մեջ է, և կինը շատ լավ վիճակում է:

Հռիփսիմե Գալստյան

 Ի տարբերություն նախորդ տարիների, երբ ուսուցիչների ապահովագրությամբ զբաղվում էին ապահովագրական ընկերությունները, այս տարի այդ գործն իր վրա է  վերցրել առողջապահության նախարարությունը: Նոր գործառույթը  մի շարք խնդիրներ է առաջացրել: Այն մինչ այժմ կարգավորված չէ: Դրանցից մեկը վերաբերվում է  հավաստագրերին, որոնք մինչ այժմ չեն հասել ուսուցիչներին:

Ըստ ծրագրի՝ ուսուցիչներիը ներառված են  սոցիալական փաթեթի շահառուների շարքում,  և նրանց համար  առողջապահական  փաթեթի շրջանակներում պետության կողմից երաշխավորված անվճար բուժօգնության ու սպասարկման կազմակերպում է իրականացվում: Ուսուցիչներին պետք է տրվեն հավաստագրեր, որոնցով էլ կարող են օգտվել ծառայություններից: Սակայն, ինչպես  հայտնեց  Բժշկական օգնության մշտադիտարկման և փորձագիտական գնահատման բաժնի պետ Մարինե Սամսոնյանը, Հավաստագրերը դեռ պատրաստ չեն: (ՀՀ առողջապահության նախարարի մամլո քարտուղար Անահիտ Հայթայանը, մեզ հետ զրույցում պարզաբանեց, որ հավաստագրերը շատ մեծ քանակությամբ են, այդ պատճառով դեռ պատրաստ չեն):

Մեր խմբագրություն դիմած ուսուցիչներից մեկը պատմում է.

«Ես գնացի հիվանդանոց բժշկական հետազոտության համար ու ասացի, որ սոցփաթեթի մեջ եմ, իրենք փաստաթուղթ պահանջեցին, բայց մեզ ոչ մի փաստաթուղթ չեն տվել: Ըստ էության չի պարզաբանվել անվճար ծառայություններից օգտվելու կարգը : Ես ստիպված, իմ անալիզները հանձնեցի վճարելով դրանց դիմաց: Տնօրինությունն էլ չգիտի, թե ինչպես պետք է վարվենք: Կարծում եմ` մեզ պետք է տային հավաստագրեր, բայց չենք ստացել ,իսկ բուժհիմնարկը պահանջում է »:

Հարցի վերաբերյալ  պարզաբանում ստանալու համար ստիպված եղանք զանգահարել ավելի քան 20 համարով, ի վերջո կարողացանք պարզել հետևյալը.

«Դրա փոխարեն ուղղակի տեղեկանք եք վերցնում աշխատանքի վայրից, կոնկրետ դպրոցի տնօրենի կնիքով տեղեկանք, որ աշխատում է այս ինչ վայրում, հանդիսանում է սոցիալական փաթեթի շահառու և ապահովագրության ժամկետն ավարտվում է այս ինչ ամսին: Այդ տեղեկանքի հինման վրա պոլիկլինիկայից վերցնում եք ուղեգիր հիվանդանոցային բուժօգնության համար և գնում, օգտվում ծառայությունից»:

Ի դեպ, այստեղ ավելորդ չէ նշելը, որ առողջապահության նախարարությունից «Հայկական Վարկածին» տեղեկացրեցին, որ սոցփաթեթի ծառայության տնօրինումը  իրենց անցնելուց հետո, իրենք բոլոր բուժհիմնարկներին զգուշացրել են որ չեն հասցրել հավաստագրեր պատրաստելը, սակայն դա չպետք է խանգարի սպասարկելու դիմողներին:

Մեր մյուս հարցին՝ «Եթե հավաստագիր չունենալու պատճառով վճարումներն արել են, կփոխհատուցվի այդ գումարը, և ինչու ուսուցիչները բավարար տեղեկացված չեն գործընթացի մասին», պատասխանեց Երևանի քաղաքապետարանի ֆինանսական վարչության պետ Վիլեն Արևշատյանը,  նշելով, թե՝ այդ փաթեթի մեջ մտնում է միայն հիվանդանոցային բուժումը, հետազոտություններն փաթեթի մեջ չեն մտնում.

‹‹Այս տարվա կառավարության 375N որոշման մեջ, որն ընդունվել է մարտի 27-ին այդ մասին մանրամասն գրված է ››,- պատասխանեց պարոն Արևշատյանը:

Հռիփսիմե Գալստյան

Օգոստոսի 1-ից սայտոտեկը դեղատներից բաց կթողնվի միայն դեղատոմսով։ Այդ մասին նախարարությունը տեղեկացրել է դեղատնային գործունեությամբ զբաղվող բոլոր տնտեսվարողներին։

Նման որոշման առիթ են հանդիսացել հղիության ժամանակ դեղի օգտագործումից առաջացած բարդությունները` արյունահոսություններ, թերի վիժում, պոստհեմոռագիկ անեմիաներ, չբերություն, ընդհուպ` անբարենպաստ ելք։

Հաշվի առնելով Միզոպրոստոլ (Սայտոտեկ, Միրոլյուտ) դեղի դեղաբանական ցուցման, հակացուցման, նշանակման, իրացման, փոխարինելիության առանձնահատկությունները, ինչպես նաև հղիության ժամանակ դեղի օգտագործումից առաջացած բարդությունները` 2014 թվականի օգոստոսի 1-ից դրա բացթողումն իրականացնել բժշկի նշանակման համաձայն` դեղատոմսով: Միզոպրոստոլ (Սայտոտեկ, Միրոլյուտ) դեղն ընդգրկված է «Դեղատոմսով բաց թողնվող դեղերի ցանկում», որոնք ամբուլատոր հիվանդների համար դուրս են գրվում ՀՀ կառավարության 14.08.2001թ. N 759 որոշմամբ հաստատված N 3 դեղատոմսային ձևաթղթով, որը նախատեսված է սովորական դեղերի համար:

Սայտոտեկ դեղի ՀՀ-ում գրանցված ներդիր թերթիկի «ցուցումներ» բաժնում նշված է միայն աղեստամոքսային տրակտի հիվանդությունների բուժման համար ցուցումներ: Միաժամանակ հակացուցված է Սայտոտեկի օգտագործումը հղիության ժամանակ: Հետևաբար, Սայտոտեկ դեղը ՀՀ-ում գրանցված է և երաշխավորված միայն խոցային հիվանդությունների բուժման համար և երաշխավորված չէ հղիությունն ընդհատելու համար:

Միաժամանակ հանձնարարվել է ոչ նպատակային օգտագործումից և անցանկալի հետևանքներից խուսափելու համար ղեղատոմսերը դեղատանը կամ դեղատնային կրպակում պահել 3 ամիս և վարել դեղերի շարժի/մնացորդի հաշվառման մատյան՝ համաձայն նախարարության ներկայացրած ձևաչափի:

ՀՀ առողջապահության նախարարություն

Երևանի քաղաքապետ Տարոն Մարգարյանի հանձնարարությամբ քաղաքապետարանի ենթակայության բուժհաստատություններում քաղաքացիների պատշաճ սպասարկման և մատուցվող ծառայությունների որակի բարձրացման ուղղությամբ սահմանված է մշտական հսկողություն: Այդ նպատակով պատասխանատուների կողմից կազմակերպվում են ստուգայցեր, իրականացվում է աշխատանքների մշտադիտարկում: Ըստ այդմ, 2014 թվականի առաջին կիսամյակում քաղաքապետարանի ենթակայության համաբուժարաններում սպասարկված հաճախումների թվաքանակը կազմել է 1 մլն 58.396, այդ թվում՝ 42.874 տնային կանչ:

Ինչպես հայտնում են Երևանի քաղաքապետարանի տեղեկատվության և հասարակայնության հետ կապերի վարչությունից, նույն ժամանակահատվածում հիվանդանոցային ծառայություններ մատուցող բուժհաստատություններ դիմած 10974 քաղաքացիներից 7384-ը սպասարկվել է պետության կողմից երաշխավորված անվճար բուժօգնության և սպասարկման շրջանակում: Կատարվել է 3799 վիրահատություն՝ նախորդ տարվա նույն ժամանակահատվածի 3618-ի համեմատ:

Զգալի թիվ են կազմում նաև Երևանի քաղաքապետարանի նախաձեռնությամբ կանանց միամսյակի կապակցությամբ անվճար բուժօգնության ակցիայի շրջանակում դիմած քաղաքացիները՝ ավելի քան 26 հազար, որոնցից շուրջ 2000-ը վիրահատվել է:

«Շտապբուժօգնության» ծառայության կողմից այս տարվա հունվար-հուլիս ամիսներին սպասարկվել է 113272 կանչ: Հիվանդանոց տեղափոխվածների ընդհանուր թիվը կազմել է 21333:

Նշենք նաև, որ 2014 թվականի առաջին վեց ամիսներին մայրաքաղաքում ծնվել է 10284 երեխա:

Օմբուդսմենի ներկայացուցիչներն այսօր հերթական այցն են կատարել հոգեբուժական հաստատություններ: Սևանի հոգեբուժարանում հայտնաբերվել է 3 անուն ժամկետանց դեղ, ինչպես նաև կտրված են եղել այլ դեղերի ժամկետների նշման հատվածները: Ժամկետանց դեղորայք է հայտնաբերվել նաև Արմաշի առողջության կենտրոնում: Ահա և Օմբուդսմենից խնդրված փաստեր՝ հատուկ Նախարար Արմեն Մուրադյանի համար:

Երեկ Առողջապահության նախարարությունն արդեն հնաոճ դարձած գործելաոճով էր արձագանքել մեր կողմից բազմիցս բարձրաձայնված և կրկին հնչեցված խնդիրներին: Առանձին պետական մարմինների կարող է թվալ, որ «մեկ փաստ», «գեթ մեկ փաստ» գոչելով՝ կարելի է թաքցնել սեփական համակարգային արատներն ու առանձին պաշտոնյաների վատ աշխատանքը:

Մեզ պատասխանելիս Առողջապահության նախարարությունը խնդիրներին լուծում չտալը պատճառաբանել էր Նախարարի կարճատև՝ 2 ամիս պաշտոնավարմամբ: Մինչդեռ երկու ամսում կարելի էր լուծել առնվազն հոգեբուժարաններից ժամկետանց դեղերը վերացնելու հարցը: Ավելին,  սանիտարահիգիենիկ պայմանների բարելավման համար պահանջվում է ընդամենը մաքրման համապատասխան աշխատանքների կազմակերպում: Բացի այդ, մի սանհանգույցի կոսմետիկ վերանորոգումը կպահանջի տասն օրից ոչ ավելի ժամանակ և ոչ մեծ ֆինանսներ: Այսպիսով, թվարկված խնդիրների լուծումը կարիք չունի ֆինանսական հատուկ ներդրումների, երկարատև ռազմավարական լուծումների: Դրանք կարող են վերացվել բացառապես հետևողական ու իրական աշխատանքով:

Այդուհանդերձ, Մարդու իրավունքների պաշտպան Կարեն Անդրեասյանն իր գոհունակությունն է հայտնում, որ Առողջապահության նախարարությունն ընդունում է իր մատնանշած խախտումների և թերությունների առկայությունը, և հուսով է, որ Նախարարի հանձնարարականները վաղ թե ուշ կկատարվեն:

ՄԻՊ գրասենյակ

Առայժմ ՀՀ-ում խայթոցների 10-12 դեպք է գրանցվել.այս մասին այսօր՝ լրագրողների հետ հանդիպման ժամանակ, հայտնեց ՀՀ գլխավոր թունաբան Միքայել Գաբրիելյանը:

Նա այդ փաստը բացատրեց նրանով, որ օձերի համար այժմ շատ անբարենպաստ եղանակ է:

Թունաբանի խոսքով՝ կծած տեղը կապել կամ այրելն արգելվում է:

«Առաջին օգնությունն է բերանով արտածծել թույնը և հասցնել մոտակա հիվանդանոց»,-նշեց Միքայել Գաբրիելյանը՝ ավելացնելով, որ մեզ մոտ ամենաթունավորներն են հայկական իժը:

Հիմնականում առավել շատ խայթոցի դեպքեր են գրանցվել Արարատի և Արմավիրի մարզերում:

Իսկ անցած տարի, բժշկի խոսքով, դեպքեր են գրանցվել հիմնականում Հրազդանի կիրճում և մի քանի բնակելի շենքերի տարածքներում:

Ըստ նրա ներկայացրած ցուցանիշի՝ անցած տարի ամբողջ հանրապետությունում գրանցվել է 85 դեպք:

Խոսելով կարիճների և մորմերի մասին՝ Միքայել Գաբրիելյանը նշեց, որ հիմնականում սև կարիճներն են վտանգ ներկայացնում, որի կծելուց հետո անմիջապես պետք է հասցնել հիվանդանոց: Իսկ մորմի կծելուց հետո պետք է մի որևէ հորմոնային դեղ ներարկել և նույնպես շտապ հասցնել հիվանդանոց: