Արարատ Միրզոյանը Նորվեգիայի ԱԳ նախարար Աննիկեն Հյութֆիլդտի հետ համատեղ մամուլի ասուլիսի ժամանակ, պատասխանելով նաև լրագրողների հարցերին, ասել է․

«Ուրախ եմ հյուրընկալել Նորվեգիայի Թագավորության արտաքին գործերի նախարար Աննիկեն Հյութֆիլդտին: Ավելի քան մեկ տասնամյակ դադարից հետո սա նորվեգական կողմի առաջին բարձրաստիճան այցն է Հայաստան:

Մենք գնահատում ենք բարեկամ Նորվեգիայի արտգործնախարարի ներկայությունը Երևանում, հատկապես` բազում մարտահրավերներով լի ներկայիս ժամանակահատվածում, ինչը, միանշանակ, հայ ժողովրդի հետ Նորվեգիայի համերաշխության նշան է:

Հատկանշական է, որ Ձեր այցը տեղի է ունենում Հայաստանի և Նորվեգիայի միջև դիվանագիտական հարաբերությունների հաստատման 30-ամյա հոբելյանական տարում: Հայ-նորվեգական համագործակցությունը խարսխված է ընդհանուր արժեքների և ժողովրդավարական սկզբունքների վրա։ Այս համատեքստում բարձր ենք գնահատում ՀՀ կառավարության կողմից իրականացվող բարեփոխումներին և ժողովրդավարական ինստիտուտների ամրապնդմանն ուղղված ջանքերին Նորվեգիայի աջակցությունը։ Գոհունակությամբ պետք է արձանագրեմ, որ Նորվեգիան հանդիսանում է Հայաստան — Եվրոպայի խորհուրդ 2019-2022թթ․ գործողությունների ծրագրի ամենամեծ կամավոր հատկացում կատարած երկիրը։ Միաժամանակ, երախտագիտություն եմ հայտնում COVID-19 համավարակի դեմ պայքարում Նորվեգիայի ցուցաբերած աննախադեպ աջակցության համար։

Այսօր տիկին նախարարի հետ անդրադարձել ենք Հայաստանի և Նորվեգիայի միջև փոխադարձ հետաքրքրություն ներկայացնող ոլորտներում համագործակցության ընդլայնման հեռանկարներին։ Այս առումով կցանկանայի ընդգծել մեր երկրների արտաքին քաղաքական գերատեսչությունների դերակատարումը՝ կարևորելով պարբերական քաղաքական խորհրդակցությունների անցկացումը։

Փոխադարձ պատրաստակամություն ենք հայտնել գործնական քայլեր ձեռնարկել՝ առևտրատնտեսական ոլորտում առկա ներուժը լիարժեքորեն օգտագործելու ուղղությամբ: Որպես տնտեսական համագործակցության հեռանկարային ոլորտներ առանձնացրել ենք տեղեկատվական տեխնոլոգիաները, վերականգնվող էներգիան, ինչպես նաև թվային կառավարումը։

Տեղեկացնեմ նաև, որ այսօր տիկին նախարարի հետ այցելել ենք Հայոց ցեղասպանության հուշահամալիր և հարգանքի տուրք մատուցել Ցեղասպանության զոհերի հիշատակին։ Հայ ժողովուրդը մեծարանքով և երախտագիտությամբ է հիշում նորվեգացի հումանիստ, մեր ժողովրդի մեծ բարեկամ Ֆրիտյոֆ Նանսենին և միսիոներուհի Բոդիլ Բյորնին։ Որպես հարգանքի տուրք՝ նորվեգացի երկու մեծանուն հումանիստների գերեզմանների հողն ամփոփված է Հայոց ցեղասպանության հուշահամալիրի հուշապատի մեջ: Կարող ենք արձանագրել, որ Նորվեգիայի՝ միջազգային ասպարեզում մարդու իրավունքների պաշտպանության առաջամարտիկ դառնալու հիմքը նաև այս անհատներն են եղել։

Հարգելի՛ ներկաներ,

Մեր քննարկումների առանցքում են եղել նաև տարածաշրջանային և միջազգային զարգացումները։ Գործընկերոջս եմ ներկայացրել Հայաստան-Ադրբեջան խաղաղության պայմանագրի մշակման աշխատանքների մանրամասները, Լեռնային Ղարաբաղի հիմնախնդրի կարգավորման վերաբերյալ մեր դիրքորոշումը:

Քննարկել ենք Հայաստանի Հանրապետության ինքնիշխան տարածքի նկատմամբ ադրբեջանական վերջին ագրեսիայից հետո ստեղծված իրավիճակը: Մենք գնահատում ենք Նորվեգիայի հասցեական դիրքորոշումը՝ ի աջակցություն Հայաստանի տարածքային ամբողջականությանն ու ինքիշխանությանը, ինչպես նաև Ադրբեջանի զինված ուժերի կողմից հայ ռազմագերիների արտադատական սպանությունների խնդրի շուրջ։

Այս համատեքստում լիահույս ենք, որ Նորվեգիան՝ որպես ժողովրդավարության և մարդու իրավունքների պաշտպանության առաջամարտիկ, կշարունակի հավատարիմ մնալ իր որդեգրած դիրքորոշմանը։

Ադրբեջանի կողմից նոր ագրեսիաների կանխարգելման համատեքստում շեշտել եմ սահմանային իրավիճակի մշտադիտարկման և վերահսկման միջազգային մեխանիզմների ներդրումը և այս հարցում միջազգային գործընկերների, այդ թվում՝ Նորվեգիայի աջակցությունը: Վերահաստատել եմ ՀՀ ինքնիշխան տարածքից ադրբեջանական ԶՈՒ դուրսբերման, Ադրբեջանում ապօրինաբար պահվող բոլոր հայ ռազմագերիների հայրենադարձման և հրադադարի ռեժիմի անվերապահ պահպանման հրամայականը՝ վերստին ընդգծելով ուժի կիրառման կամ ուժի կիրառման սպառնալիքի միջոցով խնդիրների լուծման անընդունելիությունը:

Տիկի՛ն նախարար,

Եվս մեկ անգամ շնորհակալություն եմ հայտնում բովանդակային քննարկման համար և խոսքը սիրով փոխանցում եմ Ձեզ։

 
Հարց. Շնորհակալություն, պարոն Միրզոյան, իմ հարցը Ձեզ է ուղղված: Երեկ Եվրամիության դեսպանները հաստատեցին. Հայաստան դիտորդական առաքելություն է գալու։ Ինձ հետաքրքրում է, թե Երևանը ինչ ակնկալիքներ ունի այս առաքելությունից․ նրանց թիվն ու այստեղ գալու ժամկետները շատ մեծ չէ:

Պատասխան. Ըստ էության, մեր ակնկալիքները փոփոխության չեն ենթարկվել․ մենք ակնկալում ենք միջազգային մասնակցություն, միջազգային դերակատարում Հարավային Կովկասում և, մասնավորապես, Հայաստան-Ադրբեջան սահմանին խաղաղության հաստատման գործում։ Սա լայն իմաստով:

Իսկ եթե մասնավորեցնենք, ապա պետք է ասեմ, որ մեր ակնալիքն է, որ առաքելությունը որոշակի փաստահավաք մաս կունենա, և այդ փաստերը կվկայեն, որ Հայաստանի պնդումները, որ տեղի է ունեցել ագրեսիա Հայաստանի Հանրապետության ինքնիշխան տարածքի նկատմամբ, և կա ադրբեջանական զորքերի ներխուժում ՀՀ միջազգայնորեն ճանաչված տարածք, համապատասխանում են իրականությանը: Բայց նաև, իհարկե, պետք է այս առաքելությանը վերագրենք հետագա նոր հարձակումների, նոր ագրեսիայի կանխման կարևոր առաքելություն, և, ինչպես արդեն սկզբում ասացի, ավելի լայն իմաստով` կայուն խաղաղության հաստատումը: Եվ ես հույս ունեմ, որ Եվրամիությունից եկող այս առաքելությունը դերակատարում կունենա այդ հարցում:

Հարց. Որպես հարցի շարունակություն, թեման շարունակելով, Ձեր ռուս գործընկերոջ հետ վերջին հանդիպման ընթացքում անդրադարձ եղավ նաև ՀԱՊԿ-ի կողմից դիտորդներ ուղարկելու թեմային: Ուզում էի իմանալ` որևէ զարգացում կա այս հարցում: Եվ նաև որոշ տեղեկություններ կան, որ դիմում է եղել նաև ԵԱՀԿ-ին դիտորդների թեմայով։ Արդյո՞ք Երևանը դիմել է ԵԱՀԿ-ին` Հայաստանի սահմաններ դիտորդներ ուղարկելու համար: Շնորհակալություն:

Պատասխան. Այո, իրավացի եք: Քննարկվում է նաև մեր սահմանագծին, ՀՀ տարածքի կողմից Հայաստան-Ադրբեջան սահմանին ԵԱՀԿ դիտորդներ գործուղելու թեման: Շատ մոտ ապագայում մենք այս մասով ևս հստակություն կունենանք:

Ինչ վերաբերում է ՀԱՊԿ դիտորդներին, ինչպես գիտեք, մենք դիմել ենք կազմակերպությանը, որին անդամակցում ենք, և այդ կազմակերպությունում որոշում է կայացվել, այսպես ասած, նախնական դիտորդական կամ փաստահավաք առաքելություն ուղարկել։ Եկել են այդ պաշտոնյաները և իրենց արձանագրումների հիման վրա զեկույց են պատրաստել: Զեկույցը ներկայացված է բոլոր անդամ պետություններին։ Քարտուղարությունը նաև զեկույցի հիման վրա այժմ որոշման նախագիծ է շրջանառել:

Մենք բանավոր քննարկումներով փորձել ենք հասկանալ, մինչ այս պահը գոնե, երբ կարող է տեղի ունենալ ՀԱՊԿ խորհրդի՝ այսինքն բարձրագույն մարմնի նիստը, որտեղ երկրների ղեկավարները կարող են քննարկել նաև այդ նոր դիտորդական առաքելության գործուղումը։ Այս փուլում ենք այժմ։ Որոշում չկա, քննարկումներ կան։ Պետք է տեղի ունենա խորհրդի նիստ:

Նաև այս համատեքստում ուզում եմ ընդգծել, որ մեզ համար չափազանց կարևոր է իրավիճակի քաղաքական գնահատականը, որով հանդես կգան մեր դաշնակից պետությունները: Մեզ նախ և առաջ պետք է հասկանալ, որքանով է կազմակերպությունը ճանաչում իրավիճակը, որը կա, այն է` ագրեսիա Հայաստանի Հանրապետության դեմ և ներխուժում ՀՀ սուվերեն տարածք:

Հարց․ Պարո՛ն նախարար, երեկ Թուրքիայի արտաքին գործերի նախարարը հայտարարել է, որ Ադրբեջանն իրավացիորեն ասում է, որ Լաչինի միջանքը և Զանգեզուրի միջանցքը պետք է ունենան նույն կարգավիճակը: Եվ այդ առումով ևս մեկ հարց կուղղեմ․ նաև Թուրքիայի արտգործնախարարը պատրաստակամություն է հայտնել Ձեզ հետ հանդիպելու: Ինչ կարող եք ասել այդ երկու հարցի շուրջ։ Նաև ինչ պետք է ակնկալենք Թուրքիա-Հայաստան գործընթացի հետ կապված ապագայում։ Շնորհակալություն:

Պատասխան. Դուք մեջբերեցիք հետևյալ կերպ. «Ադրբեջանն իրավացիորեն ասում է…»: Ես պիտի ասեմ, որ այս ձևակերպման մեջ մեծ չափազանցություն կա։ Ադրբեջանը, պետք է տեղեկացնեմ, այդպիսի բան չի ասում, և այդպիսի բան ասողները, վստահաբար, իրավացիորեն չեն կարող դա ասել։

Ես չեմ թաքցնի, բանակցություններում Ադրբեջանը կամ Ադրբեջանի ներկայացուցիչները չեն պնդում և չեն առաջարկում ունենալ ճանապարհ, որը կունենա նույն կարգավորումները, ինչ Լաչինի միջանցքը։ Եթե պարոն Չավուշօղլուն իր կողմից այս կոմպոնենտն է մտցնում բանակցություններում, ապա երևի լավ կլինի` իր անունից ասի։ Կրկնում եմ, Ադրբեջանն այդպիսի բան չի ասում և չի էլ կարող, ըստ էության, որևէ կողմը իրավացիորեն այսպիսի բան պնդել, որովհետև կարգավորումները տրված են նոյեմբերի 9-ի հայտարարությամբ և հետագայում նաև բացվել են 2021 թվականի հունվարի 11-ի եռակողմ հայտարարությամբ։

Երկու հայտարարություններն էլ հրապարակային են, դրված են երկրների պաշտոնական կայքերում, և բոլորը կարող են ծանոթանալ։ Այնտեղ կա Լաչինի միջանցք, որը կյանքի ճանապարհ է Լեռնային Ղարաբաղի հայության համար, և կա հաջորդիվ տարածաշրջանի տրանսպորտային և տնտեսական ենթակառուցվածքների ապաշրջափակման թեմա: Եվ այս համատեքստում նաև խոսվում է Ադրբեջանի և Նախիջևանի միջև նոր կապուղու մասին։

Այս առումով մեր դիրքորոշումը բազմիցս հայտնել ենք․ այն չի փոփոխվել։ Բոլոր ճանապարհները, այդ թվում` և՛ գործողները, և՛ ենթադրաբար նոր կառուցվելիքները, եթե կլինեն այդպիսիք, պետք է գործեն այն երկրների սուվերենության և օրենսդրության ներքո, որոնց տարածքով անցնում են։ Իմ սուբյեկտիվ ընկալմամբ, այս առումով որոշակի առաջընթաց կա, և ես լավատես եմ, որ այս ուղղությամբ բանակցություններն առաջիկայում հաջողությամբ կարող են ավարտվել։

Թուրքիայի հետ մեր երկխոսության մասով. մենք ևս մշտապես բաց և հրապարակային ենք արտահայտել մեր դիրքորոշումը։ Մենք շահագրգռված ենք երկխոսության հաջողությամբ և որևէ հանդիպում, որ կօգնի հասնել այդ հաջող ավարտին, իհարկե, կարող է տեղի ունենալ: Ես երբեք դեմ չեմ եղել այդպիսի հանդիպմանը։
Այլ բան, ես կարծում եմ, որ այս հանդիպումների ընթացքում կողմերը պետք է անկեղծորեն և լուրջ քայլեր ձեռնարկեն երկրների միջև դիվանագիտական հարաբերությունների հաստատման և սահմանի բացման ուղղությամբ։ Ես կրկնում, եմ պատրաստ եմ այդպիսի հանդիպման։ Հուսամ, այդպիսի հանդիպումը, ի վերջո, շոշափելի արդյունքներ կգրանցի, եթե տեղի ունենա։

Հարց. Պարո՛ն նախարար, վերջին շրջանում ակտիվ դիվանագիտական շփումներ են ընթանում Հայաստանի և Ադրբեջանի պաշտոնյաների միջև։ Նախ, Ձեր հանդիպումն էր Ժնևում Բայրամովի հետ, հետո` Պրահայում քառակողմ հանդիպումը, այնուհետև` Աստանայում եռակողմը։ Ո՞րն է հաջորդիվ, ի՞նչ սպասենք հաջորդիվ, և ի՞նչ ակնկալիքներ կարող է ունենալ հայկական կողմը նման ակտիվ դիվանագիտական շփումներից։ Շնորհակալություն:

Պատասխան. Շնորհակալ եմ։ Ես պետք է ասեմ, որ, ըստ էության, այո, վերջին շրջանում ակտիվ հանդիպումներ են տեղի ունենում, և մենք պարտաստ ենք և ամեն ջանք գործադրելու ենք, որպեսզի նույն ինտենսիվությամբ ակտիվ աշխատանքներ շարունակվեն՝ տարածաշրջանում, ի վերջո, իսկապես կայուն և երկարատև ու արդար խաղաղություն հաստատելու համար։

Այս առումով մեր ակնկալիքները և տրամադրվածությունը չի փոխվել։ Այլ բան, որ մենք զուգահեռ այս բանակցությունների շարունակաբար տեսնում ենք Ադրբեջանի կողմից ոչ կոնստրուկտիվ, ես կասեի, առավելապաշտական պահվածք։ Տեսնում ենք նաև ուժի գործադրման, կամ ուժի գործադրման սպառնալիքի միջոցով այդ բանակցությունների վրա ազդելու ցանկություն և փորձ։ Միայն այսպես, այս համատեքստում և այս մեկնաբանությամբ եմ ես տեսնում Ադրբեջանի վերջին ագրեսիան։

Մենք գիտենք նաև, որ դրանից առաջ եղել է ևս մեկ ագրեսիա, դրանից առաջ եղել է ևս մեկ սադրիչ գործողություն և նաև հռետորաբանությունը։ Ես պետք է ասեմ, որ ակնհայտորեն այդպիսի գործողությունները չեն նպաստում կառուցողական մթնոլորտին և կառուցողական բանակցություններին։ Չնայած դրան, և շարունակելով մեր նախկին գործելաոճը և արտահայտելով մեր նախկին համոզմունքը՝ մենք կարծում ենք, որ վերջնական լուծումների պետք է հանգենք բանակցությունների սեղանի շուրջ։ Մենք պատրաստ ենք շարունակել այդ ջանքերը»:

Վարդենիսի ուղղությամբ հրետանային միջոցների առկայությունը անմիջականորեն կապված է Ադրբեջանի ԶՈՒ կողմից լրացուցիչ ուժերի և միջոցների տեղաշարժի ու բացազատման հետ, որն առաջացրել է որոշակի լարվածություն: Այս մասին հայտնում են ՀՀ պաշտպանության նախարարությունից:

«Հայկական կողմի քայլերը, որ իրականացվել են տվյալ գոտում ադրբեջանական հրետանային և զենիթային լրացուցիչ միջոցների տեղակայումից հետո, կրում են բացառապես պաշտպանական բնույթ:

Հայկական կողմի գործողությունները իրադրությունը լարելու նպատակ չունեն, և ադրբեջանական կողմի՝ հիշատակված միջոցները տվյալ ուղղությունից դուրս բերելու դեպքում, հայկական կողմը ևս դուրս կբերի իր լրացուցիչ միջոցները: Հայկական կողմը պատրաստ է տվյալ հարցի շուրջ բանակցել»,- ասված է ՊՆ հայտարարության մեջ:

ՀՀ կառավարությունը նախագիծ է ներկայացրել հանրային քննարկման, որով առաջարկվում է պարզեցված կարգով ՀՀ քաղաքացիություն շնորհել տնտեսության, գիտության, կրթության, մշակույթի, առողջապահության, սպորտի բնագավառներում 150․000 $ -ի ներդրում կատարած անձանց։

«Միացյալ Հայաստան» կուսակցության վարչության անդամ, սահմանադրագետ Վարդան Այվազյանը Tert.am-ի հետ զրույցում անդրադարձել է նախագծին՝ ընդգծելով անվտանգային բոլոր այն խնդիրները, որոնք կառաջանան նախագծի ընդունման դեպքում։

Ըստ Այվազյանի՝ նախագծից առաջին հերթին կօգտվեն Թուրքիայի և Ադրբեջանի քաղաքացիները, ովքեր, ստանալով ՀՀ քաղաքացիություն, կարող են դառնալ ՀՀ սեփականատեր, ինչն իր մեջ անվտանգային առումով լուրջ վտանգներ կարող է պարունակել։

«Քաղաքացիություն ստանալով՝ թուրքերը և ադրբեջանցիները հեշտորեն կարող են ազդել բնակչության դեմոգրաֆիական կազմի, քաղաքական գործընթացների վրա և անուղղակիորեն լուծել իրենց բաղձալի երազանքը՝ «Զանգեզուրի միջանցքի» հարցը։
Պատկերացրեք տեսականորեն․ 50 Թուրքիայի և Ադրբեջանի քաղաքացիներ 150․000$-ով գնեցին ՀՀ քաղաքացիություն և ամբողջ Սյունիքի սեփաականությունը, հողերը 2-3 մլրդ դոլարով գնեցին, արդյունքում Սյունիքի հողերի մեծ մասում իրենք կդառնան հողի սեփականատեր։ Սա լուրջ անվտանգային սպառնալիք է»,- ասաց Վարդան Այվազյանը։

Մանրամասները՝ տեսանյութում։

Համաշխարհային էներգետիկ ճգնաժամը ցույց տվեց, որ աշխարհում ամենաէժան էներգակիրներ ունեցող երկիրը ՌԴ-ն է, որի հետ աշխարհում ոչ մի երկիր մրցակցել չի կարող։

«Փաստինֆո»-ի հետ զրույցում նման կարծիք հայտնեց էներգետիկ եւ անվտանգության հարցերով փորձագետ Արմեն Մանվելյանը՝ անդրադառնալով Հայաստանի էներեգետիկ անվտանգությանն ու խորացող հակառուսականության համատեքստում հնարավոր խնդիրներին։ «Նման գին, որը հիմա մենք վճարում են գազի համար՝ մոտ 170 դոլար սահմանին՝ 1000 խմ-ի համար, այսօր աշխարհում գոյություն չունի, դրանից մի փոքր ավելի էժան Բելառուսն է վճարում, որը ՌԴ-ի հետ միութենական պետություն է, իսկ համաշխարհային գները շատ ավելի թանկ են, Եվրոպայում գները, ընդհանրապես, անցնում են բոլոր տրամաբանական սահմանները։ Մեկ ամիս առաջ նույն 1000խմ-ի համար նրանք վճարում էին 3 հազար դոլար, հիմա մի փոքր իջել է գինը, անցել հազար դոլարը, բայց կրկին, դա ֆանտաստիկ թանկ գին է, իսկ պատճառն այն է, որ իրենք հրաժարվել են ռուսական գազից, փոխարենը բերում են ամերիկյան, քաթարական այսպես կոչված հեղուկացված գազը»,-բացատրում է մասնագետը՝ շեշտելով, որ այս առումով, ՌԴ-ն մրցակից չունի։

Նույն Իրանը Թուրքիային գազը վաճառում է նվազագույնը 400 դոլար, այն էլ՝ Թուրքիայի երկարատեւ բանակցությունների արդյունքում։ Այնպես, որ, ըստ մասնագետի, եթե Հայաստանի իշխանությունը դիտարկում է ՌԴ-ի հետ հարաբերությունների փոփոխություն, պետք է նկատի ունենա, որ ռուսական գազին այլընտրանք չկա, մյուս կողմից ատոմակայանի խնդիրն է։ Աշխարհի ատոմակայանների շուրջ 30 տոկոսը, Մանվելյանի խոսքով, աշխատում է ռուսական հարստացված ուրանով։ «եթե նկատել եք, սանկցիաներ կիրառվեցի ՌԴ-ի բոլոր սեգմենտներում, բացի միջուկային, որովհետեւ ամերիկյան ատոմակայաններն աշխատում են ռուսական ուրանով, արեւելաեվրոպական երկրների ատոմակայանները եւս աշխատում են ռուսական ուրանով, որը եւ՛ ավելի որակով է, եւ՛ ավելի էժան»։

Մասնագետը հիշեցնում է մի հանգամանք եւս՝ Ռուսաստանը հայկական պատրաստի ապրանքների սպառման հիմնական շուկան է, այդ ապրանքները եվրոպական շուկա չեն գնում , դրանց 80 տոկոսը հենց ռուսական շուկայում է սպառվում, ուստի, նման պայմաններում չհիմնավորված կերպով Ռուսաստանի հետ հարաբերությունները վատացնելու քաղաքականությունը, Մանվելյանի խոսքով, ընդամենը գործող իշխանության մտավոր տհասության վկայությունն է։

«Կամ նրանք չեն հասկանում, թե ինչ են անում, կամ հասկանալով՝ ուզում են Հայաստանի տնտեսական վիճակն էլ ավելի վատացնել»,-ասում է Արմեն Մանվելյանը։

Անդրադառնալով Հայաստանի էլեկտրաէներգետիկ ռեսուրսին, մասնագետը նկատեց՝ էլեկտրաէներգիա արտահանով Հայաստանը վերջին 2 տարիներին դարձել է այն ներկրող երկիր, ինչը խոսում է այն մասին, որ Հայաստանը էլեկտրաէներգիայի արդյունահանման լուրջ խնդրի առաջ է, որովոհետեւ պետք է կառուցվեր նոր ՋԷԿ-ը, որը չկառուցվեց, Հրազդանի 5-րդ էներգաբլոկը փակ է եւ չի աշխատում, քանի որ ներքին սպառումը քիչ է, իսկ արտահանում գրեթե չկա։ Արմեն Մանվելյանը ընդգծում է՝ այդպես էլ չկառուցվեց դեպի Իրանի բարձրավոլտ համակարգը, մինչդեռ այն շահագործման պետք է հանձնվեր դեռ 2019 թվականին։

«Իշխանությունը ձախողել է այս ծրագրերը, Հայաստանը դարձել է Վրաստանից էլեկտրաէներգիա ներմուծող պետություն, մինչդեռ նախկինում մենք էինք Վրաստանին տալիս»,-ասում է մասնագետը՝ հավելելով, որ սա նշանակում է, որ մենք արդեն իսկ էներգետիկ խնդիր ունենք, որովհետեըւ չունենք էներգետիկայի զարգացման ծրագիր, մարդիկ կոմպետենտ չեն, էներգետիկայի նախարարություն ընդհանրապես չկա, փակվել է։

Ինչ վերաբերում է նոր ատոմակայանի կառուցման ծրագրին, որը այդպես էլ կյանքի չի կոչվում, մասնագետն այն ֆեյք համարեց, շեշտում է՝ այն իշխանության տարածած կեղծիքներից հերթականն է ։ «Որեւէ նոր ատոմակայան չի կառուցվում, չկա նման ծրագիր, կարող է՝ իրենք բանակցություններում դնում են, օրինակ, որ լավ կլինի՝ նոր ռեակտոր կառուցել, խոսքը հենց ռեակտորի եւ ոչ թե նոր ատոմակայանի կառուցման մասին է, բայց ռուսական մեկ ռեակտորի միջազգային գինը 4-5 միլիարդ դոլար է, այսինքն, նվազագույնը 4 միլիարդ դոլար, իսկ օրվա իշխանությունները ոչ միայն ի վիճակի չեն նման գումար վճարել։ Բացի այն, որ դա շատ թանկ է, հզորությունն էլ նվազագույնը 1000-1200 մեգավատ է ինչը Հայաստանի տարեկան պահանջարկն է, իսկ որպեսզի այդ ատոմակայանն աշխատի, պետք է Հայաստանի բոլոր գեներացնող ՋԷԿ-երն ու ՀԷԿ-երը անջատես, իսկ դա նշանակում է նաեւ էլէկտրաէներգիայի գները թանկացնել, ընդ որում, ոչ թե 5-10 տոկոսով, այլ՝ կրկնակի։ Այսինքն, ի սկզբանե, այդ ծրագիրը այս իշխանության օրակարգում եղել է կեղծ եւ սուտ, ուղղակի մարդկանց ականջին ինչ-որ օրակարգեր են փորձում հասցնել», -բացատրեց Մանվելյանը։

Նշենք, որ ավելի վաղ տեղեկացրել էինք, որ նոր ատոմակայանի կառուցման շուրջ բանակցություններն առաջընթաց չեն արձանագրում։ Ավելին՝ պաշտոնական հայտարարությունների մակարդակում նկատվում է հետընթաց, իսկ Հայաստանում նոր ատոմակայանի կառուցմանը մասնակցելու կորպորացիայի մտադրության մասին հայտարարած ԳՊՄ-ի վերահսկիչ բաժնետեր Ռոման Տրոցենկոն էլ կարծես ընդհատակ է անցել։

Ադրբեջանը Հայաստանին է վերագրում հրադադարի ռեժիմի սեփական խախտումները,  «Թվիթեր»-ի իր էջում գրել է Հայաստանի վարչապետ Նիկոլ Փաշինյանը։

«Ակնհայտ է, որ սա պատրվակ է Հայաստանի դեմ նոր ռազմական ագրեսիայի համար»,– գրել է Փաշինյանը։

Նա նշել է, որ հրադադարի ռեժիմը պահպանելու և սահմանների անվտանգությունն ապահովելու համար անհրաժեշտ են մշտական միջազգային մեխանիզմներ։

Հետաքրքիր է հետևել, թե ինչպես դեմքի «լուրջ» արտահայտությամբ իշխանության ներկայացուցիչները համոզում են իրենց ընդիմախոսներին լինել իրատես։Այս մասին ֆեյսբուքում գրել է ԱԺ նախկին պատգամավոր Արման Աբովյանը.

«Ըստ երևույթի` իրենց պատկերացումը «լինել իրատես» նշանակում է համաձայնվել Արցախը թուրքերին վերջնական հանձնելու նպատակների հետ։
Բարի…լինենք իրատես։

ԵՒ այսպես…եթե Արցախը այս կան այլ ձևաչափով անցնի Ադրբեջանի տիրապետության տակ, ապա դա նշանակում է արցախահայության ոչնչացում կամ տարհանում։

Ադրբեջանի տարածքային ամբողջականության ( առանց Արցախի լրացուցիչ կարգավիճակի հստակեցման) տակ ստրորագրող իշխանությունը հանձնում է Արցախը ոչնչացման։

Ոչ մի միջազգային անվտանգություն երաշխիքներ գործնականում ի զորու չեն լինի կանգնացնել ցեղասպան Ադրբեջանին։

Ոչ մի ստորագրած թուրք-ադրբեջանական ոհմակի հետ «խաղաղության պայմանագիր» չի կարող երաշխավորել, որ պատերազմի չի վերսկսի։

Եթե նույնիսկ սրանք ի վերջո «թղթով» հանձնեն մարդասպաններին Արցախը ,ապա դա չի բերելու խաղաղություն և յուրաքանչյուր դեպքում Ադրբեջանը ԱՆՊԱՅՄԱՆ փորձելու է կրկին պատերազմ հրահրել Հայաստանի դեմ ։

Հայաստանի իշխանությունների բոլոր փորձերը «խաղալ» գերտերությունների հակասությունների շուրջ բերելու են իրավիճակի ԱՆԽՈՒՍԱՓԵԼԻ սրացմանը Հայաստանի և Արցախի շուրջ։

…և այս կարգի շատ իրատեսական փաստեր կարելի է հնչեցնել
…
Ցանկանում եք լինել իրատես…խնդրեմ»,-գրել է նա:

Արցախի նախագահի գլխավորած պատվիրակությունն արդեն 3-4 օր է Երևանում տարբեր հանդիպումներ է ունենում, այդ թվում Հայաստանի բարձրագույն իշխանության ներկայացուցիչների հետ։ Սա արդեն երկրորդ նման հանդիպումն է պատվիրակության ներգրավմամբ: Այս մասին լրագրողների հետ ճեպազրույցի ժամանակ ասաց Արցախի ԱԳ նախարար Դավիթ Բաբյանը։

«Երեկ հանդիպել ենք ԱԽ քարտուղարի հետ, այսօր ԱԺ նախագահ Ալեն Սիմոնյանի հետ: Այսօր նախատեսված է հանդիպում ՀՀ նախագահի հետ, վաղը կհանդիպենք ԱԳ նախարարի և վարչապետի հետ: Այսինքն կհանդիպենք բոլորի հետ, որոն զբաղված են և ներգրավված են բանակցություններում, նաև Արցախի ճակատագրով անմիջական մասնակցություն ունեն»,-ասաց նախարարը։

Նրա խոսքով՝ շատ յուրահատուկ իրավիճակում ենք գտնվում, առերեսվում ենք իսկապես գոյաբանական մարտահրավերների․ «Շատ կարևոր է, որ հիմա մի շարք հարցերի պատասխան ստանանք, ներկայացնենք մեր  տեսակետը, նաև տեղեկանանք տարբեր գործընթացների մասին՝ լինի դա բանակցային գործընթաց,  լինի խորհրդարանական դիվանագիտություն կամ տարբեր երկկողմ հարաբերությունների հետ առնչվող հարցեր: Քննարկել ենք շատ ազնիվ ձևով ամենաբարդ հարցերը: Մեզ համար շատ կարևոր է նաև այն, որ Արցախի պարագայում ունենանք հստակ դիրքորոշում»,- ասաց նա:

Խոսելով տարածքների ճանաչման մասին, որ երբ Հայաստանը ճանաչում է Ադրբեջանի տարածքային ամբողջականությունը, դա առնչվում է նաև Արցախին, Դավիթ Բաբայանն ասաց. «Պարզաբանումներ եղան և դեռ կլինեն, որովհետև սա վերջին հանդիպումը չէ: Դեռ ԱԳ նախարարի, վարչապետի ու նախագահի հետ էլ են լինելու հանդիպումներ: Մենք դեմ չենք, որ Հայաստանն ու Ադրբեջանը իրենց հարաբերությունները բարելավեն, սակայն պետք է հասկանանք, որ Արցախի և ողջ հայության համար անընդունելի է Արցախը ճանաչել Ադրբեջանի մաս: Այս երկու հանդիպմանը ասվեց, որ ոչ մեկը չի պատրաստվում Արցախը ճանաչել Ադրբեջանի մաս: Հիմա պետք է շատ ճկուն քաղաքականություն վարենք: Մենք մեր կարծիքը հայտնել ենք. ցանկացած փորձ Արցախը խցկելու Ադրբեջանի կազմ, բերելու է երկու տարբերակի՝ կամ պատերազմի, արյունահեղության, ցեղասպանության, կամ Արցախի հայաթափման: Սա մեսիջ է ամբողջ աշխարհին։ Եթե ժողովրդավարական աշխարհը մեզ դիտում է որպես Ադրբեջանի մաս, սա կլինի խարան իրենց վրա դաջված, որովհետև Արցախի ցեղասպանությունը կլինի նաև այդ քաղաքականության արդյունք: Մենք դա բացեիբաց ասում ենք»:

Նախարարի խոսքով՝ Հայաստանն ու Ադրբեջանը կարող են ճանաչել իրար տարածքային ամբողջականությունը, բայց անպայման պետք է լինի մի բան, որ դա Արցախի վրա չի տարածվում. «Դա կլինի հատուկ նշված, թե կլինի, որ հետո քննարկենք այդ հարցը: Մեզ համար կարևոր է, որ այդ փիլիսոփայությունը հստակ նշված լինի: Այս պահին չկա որևէ փաստաթուղթ, որտեղ նշված լինի, որ Հայաստանը հրաժարվում է կամ Արցախն Ադրբեջանի կազմում է: Հիմա քննարկումների փուլում է ամեն ինչ: Մենք տեսանք, որ ըմբռնում կա ՀՀ իշխանությունների կողմից, ես չեմ հավատում, որ Հայաստանը կարող է հրաժարվել Արցախից: Սա լինելու է հայոց պատմության վերջին կետը»:

Դավիթ Բաբայանը նշեց, որ իրենք  երբեք դեմ չեն եղել Ստեփանակերտ-Բաքու երկխոսությանը, ընդհակառակը, 1996-1997-ից հետո, երբ Արցախը փաստորեն դուրս բնաց բանակցային գործընթացի մի հատվածից, իրենք միշտ կոչ են արել վերականգնել այդ ձեւաչափը և այդ ձևաչափի վերականգնումը մնացել է օրակարգում․

«Բայց այդ բանակցությունները չպետք է տեղի ունենան միջազգային ճանաչված հարթակից դուրս: Գոյություն ունի մեկ միջազգային ճանաչված հարթակ, դա Մինսկի խումբն է, որի փաստաթղթերում նշված է, որ Արցախը և հակամարտության, և բանակցությունների կողմ է: Ադրբեջանն ասում է՝ մենք չենք բանակցելու որպես կողմի հետ: Մենք էլ ասում ենք՝ վերականգնվի ձևաչափը, բանակցենք: Բայց եթե ինչ-որ մեկը կարծում է, որ բանակցություններն ստանան այն երանգը, որ ապորիգեն ինչ-որ մի ցեղախումբ՝ ի դեմս Արցախի, պետք է գնա մետրոպոլիայի կամ մայր երկրի հետ նեղացած, փոշմանած խնդրի, ասի՝ կներես, մայր երկիր, այսինքն Ադրբեջան, մենք մի ղալաթ ենք արել, հիմա գալիս ենք ներողություն ենք խնդրում, նորից մեզ ընդգրկեք ձեր կազմ, դա չի լինելու: Բնական է, որ սա Հայաստանի իշխանությունները հասկանում են, չեն կարող չհասկանալ, որովհետև սա Արցախի ժողովրդի հավաքական կարծիքն է»,- ասաց նա:

Անդրադառնալով Ֆրանսիայի նախագահ Մակրոնի հայտարարությանը, որտեղ նա ՌԴ-ին մեղադրում է Հայաստանի և  Ադրբեջանի միջև վերջին բախումները «նպատակային սադրելու» համար, Բաբայանը նշեց, որ անթույլատրելի է համարում, որ ցանկացած հայ ունենա հակառուսական կամ հակաամերիկյան կեցվածք․

«Նախ մենք սփյուռքային ժողովուրդ ենք, 3 մլն հայ է ապրում Ռուսաստանում: Այն ապուշը, որ հակառուսական կարծիքներ է արտահայտում, չի մտածո՞ւմ մեր հայրենակիցների մասին, որ կարող է այդ կապը կտրվել: Կամ այն ապուշը, որ հակաամերիկյան է, չի մտածո՞ւմ, որ 2 մլն հայ կա ԱՄՆ-ում: Հետևաբար, Ռուսաստանը մեզ համար բարեկամ երկիր է, Արեևմուտքն էլ մեզ համար թշնամի չէ: Դրա համար մենք չենք տեսնում այլընտրանք ռուս խաղաղապահներին, բայց դա չի նշանակում, որ մենք դեմ ենք Արևմուտքին: Ես անառողջ եմ համարում այս մեղադրանքները Ֆրանսիայի կողմից Ռուսաստանին, սա մեր գործը չէ: Շատ ավելի լավ կլիներ, որ այդ նույն ժողովրդավարական երկիրը հստակ ասի, որ չի տեսնում ժողովրդավարական Արցախը տոտալիտար Ադրբեջանի կազմում: Սա է ամենակարեևորը, որովհետև եթե Արցախի մազը ծռվեց, դա լինելու է խայտառակություն ու խարան իրենց գլխին դաջված»,- ասաց նա:

Դավիթ Բաբայանը նաև նշեց, որ ԱՄՆ-ն միակ երկիրն է, որ դեռևս կարողանում է Թուրքիային զսպել։

ԵԽԽՎ-ում թուրքական և ադրբեջանական պատվիրակությունների ներկայացուցիչները փորձել են ընդհատել ԱԺ ՀՀԿ-ական պատգամավոր Հայկ Մամիջանյանի՝ Ղարաբաղի կարգավիճակի մասին ելույթը։

ԵԽԽՎ լիագումար նստաշրջանի երեկվա նիստը նախագահել է թուրքական ազգային պատվիրակության ներկայացուցիչը, որն ընդհատել է Արցախի մասին Մամիջանյանի ելույթն ձայնը տվել ադրբեջանցի պատվիրակին, որն էլ հայտարարել է, թե հայ պատգամավորն իրավունք չունի իր ելույթում խոսել հակամարտության մասին, քանի որ այդ հարցի քննարկումը ԵԽԽՎ հարթակում ավարտվել է։

Վարման կարգով ձայնի իրավունք են խնդրել ՀՀ պատվիրակության անդամներ, ՔՊ պատգամավորներ Վլադիմիր Վարդանյանն ու Ռուբեն Ռուբինյանը։ Նրանք ընդգծել են, որ նախագահողն իրավունք չունի ընդհատել իրենց գործընկերոջ ելույթն ու պահանջել են հնարավորություն տալ, որ Մամիջանյանն ավարտի այն։

Մամիջանյանի ելույթն ամբողջությամբ ներկայացնում ենք ստորև․
«Տիկնայք և պարոնայք,
Այս նստաշրջանի առաջին օրը մենք քննարկում ունեցանք Հայաստանի դեմ Ադրբեջանի սանձազերծած ագրեսիայի մասին: Մի ասացվածք կա. «Ճշմարտության համար շնորհակալություն չեն հայտնում», բայց ես այնուամենայնիվ ցանկանում եմ շնորհակալություն հայտնել ճշմարտությունը բարձրաձայնելու խիզախության համար: Ես, անշուշտ, նկատի ունեմ այն մարդկանց, ովքեր ունեցան ճշմարտությունը բարձրաձայնելու խիզախություն այս եւ այլ ամբիոններից։ Բոլոր նրանց, ովքեր խուլ չմնացին իմ ժողովրդի ձայնի նկատմամբ։ Խիզախության նմանատիպ դրսևորումները մեր օրերում հազվադեպ են դարձել:

Այնուամենայնիվ, այդ քննարկման ժամանակ չխոսվեց Լեռնային Ղարաբաղի հակամարտությանն առնչվող խնդիրների մասին: Մենք չենք խոսել այն մարդկանց մասին, ովքեր հավատում էին, որ համաշխարհային առաջնորդների ԵԱՀԿ Մինսկի խմբի ձևաչափում արված հինգ հայտարարություններն արժեք ունեին Լեռնային Ղարաբաղի ինքնորոշման համատեքստում: Մարդիկ, ովքեր խաղաղ ապրում էին իրենց հայրենիքում ու հույս ունեին, որ «ուժի չկիրառում» բառերը ազդեցություն ունեն: Նրանք դաժանորեն խաբվեցին։

ՀՀ ներկայիս կառավարության վարած անմիտ դիվանագիտության հետևանքով իրականություն է դառնում Հայաստան-Ադրբեջան հարաբերությունների և Լեռնային Ղարաբաղի հակամարտության կարգավորման տարանջատման գաղափարը: Աշխարհը պատրաստվում է թողնել փոքր Արցախին Ադրբեջանի դեմ մեն մենակ: Ցավոք, այդ պատմությունը չի կարող ավարտվել Դավթի և Գողիաթի պատմության նման։ Եվ պատճառը բնավ Արցախի ժողովրդի՝ իր հայրենիքի ապագային տեր կանգնելու կամքի պակասը չէ: Պատճառն այն է, որ միջազգային հարաբերությունների պատմության մեջ ազգերի ինքնորոշմանն առնչվող կոնֆլիկտները երբեք չեն կարգավորվել մետրոպոլիայի և փոքրամասնության միջև բանակցությունների արդյունքում: Այդ պատմությունը կավարտվի Արցախի համար նույն կերպ, ինչպես հայ զինվորական կնոջ պատմությունը, ով խոշտանգվել և սպանվել էր ադրբեջանցի զինվորականների կողմից: Ես բնավ չեմ անտեսում այս դահլիճում քննարկված որևէ հարցի կարևորությունը, սակայն խորապես համոզված եմ, որ կնոջ խոշտանգումը, որն ուղեկցվել էր կենդանի մաշկազերծումով, կրծքին և որովայնին գրություն թողնելով, ակնակապիճի մեջ քար, բերանում կտրված մատ թողնելով, առնվազն նույն կարևորությունն է ներկայացնում, ինչ սպորտի աշխարհում կանանց հանդեպ խտրականության դրսևորումները, որոնք երեկ քննարկում էինք: Արցախի պատմությունը կունենա նույն ավարտը, ինչ ադրբեջանական զորքերի կողմից գերեվարված և սպանված հայ ռազմագերիների պատմությունը, որոնք սպանվեցին «հաճույքի» համար՝ պարզապես որովհետև հայեր էին:

Գիտեմ, որ ձեզանից ոմանք հոգնել են այս խնդրի մասին մեր ելույթները լսելուց, մյուսները՝ սարսափած են ելույթումս ներկայացված դեպքերից: Սակայն, եթե Լեռնային Ղարաբաղի կարգավիճակի հարցը դուրս մնա Հայաստան-Ադրբեջան հարաբերությունների շրջանակից, վստահ եղեք, որ ԵԽԽՎ ամբիոնից Լեռնային Ղարաբաղի ժողովրդի վերաբերյալ իմ հաջորդ ելույթները լինելու են առավել սարսափազդու, գուցե նաև գրված լինեն անցյալ ժամանակով:

Տիկնայք և պարոնայք, եթե շարունակեք անտեսել այն, ինչ տեղի է ունենում Լեռնային Ղարաբաղում՝ ինձ համար շատ դժվար կլինի մաքրել նախագահողի երեսից այն ժպիտը, որով նա փորձում էր խանգարել ինձ ելույթ ունենալ:
Շնորհակալություն»:

Արցախի համար «կարմիր գիծ» է ցանկացած փորձ, որը կդիտարկի Արցախի ապագան Ադրբեջանի կազմում։ ՀՀ ԱԽ քարտուղարի հետ հանդիպմանն ասել է Արցախի Հանրապետության ԱԺ նախագահը։ Տեղեկանում ենք ԱՀ ԱԺ հաղորդագրությունից․

«Արցախի Հանրապետության նախագահ Արայիկ Հարությունյանի գլխավորած պատվիրակությունը այս օրերին գտնվում է ՀՀ- ում և հանդիպումներ է ունենում ՀՀ բարձրագույն քաղաքական ղեկավարության հետ։

Քննարկվում են ղարաբաղա-ադրբեջանական հակամարտությանը, տարածաշրջանային վերջին զարգացումներին և ներհայկական կապերին վերաբերող հարցեր։

Այսօր՝ հոկտեմբերի 13-ին, ԱՀ պատվիրակությունը ԱԺ նախագահ Արթուր Թովմասյանի առաջնորդությամբ հանդիպում է ունեցել ՀՀ Անվտանգության խորհրդի քարտուղար Արմեն Գրիգորյանի հետ և քննարկել վերոնշյալ խնդիրներին առնչվող հարցեր։

Արցախի պատվիրակությունը ներկայացրել է պաշտոնական Ստեփանակերտի դիրքորոշումը ՀՀ ԱԽ քարտուղարին։

ԱՀ պատվիրակությունն ընդգծել է, որ Արցախի համար «կարմիր գիծ» է ցանկացած փորձ, որը կդիտարկի Արցախի ապագան Ադրբեջանի կազմում’ շեշտելով, որ Արցախը հավատարիմ է մնում ԵԱՀԿ Մինսկի խմբի ձևաչափով բանակցային գործընթացի վերսկսմանը’ պաշտոնական Ստեփանակերտի մասնակցությամբ»։

«Հիմա շատ բարդ է որեւէ գնահատական տալ, ՀՀ դատախազությունը, ԱԱԾ-ն խնդրով զբաղվում են, ըստ ամենայնի, քննությունը ցույց կտա, թե ինչ է եղել , բայց այն հանգամանքը, որ արդեն իսկ կասկածյալների մեջ երեք հայ կա, նշանակում է, որ Հայաստանում ինչ-որ գործարք է արվել, որը, ըստ ՌԴ դաշնային ծառայության, նպաստել է տեղի ունեցածին։ Դա շատ բարդ իրավիճակում է դնում Հայաստանին։ Բուլղարիայից մեքենան եկել է Վրաստան, ապա Հայաստանում փաստաթղթերը ձեւակերպել են, որ կարողանա ԵԱՏՄ տարածքում ազատորեն երթեւեկել, ինչից հետո մեքենան գնացել է եւ տեղի է ունեցել ահաբեկչական գործողությունը»,- «Փաստինֆո»-ի հետ զրույցում ասաց «Ազգային անվտանգություն» կուսակցության նախագահ Գառնիկ Իսագուլյանը՝ անդրադառնալով ՌԴ ՍԴԾ տարածած տեղեկությանն այն մասին, որ Ղրիմի կամրջի պայթյունի գործով կասկածյալների թվում նաեւ ՀՀ քաղաքացիներ կան։

Իսագուլյանը շեշտում է՝ Հայաստանում կարեւոր հարցերի պատասխաններ պետք է տրվեն։ «Մինչեւ հիմա օպերայի հրապարակի էլեկտրասյուները Ուկրաինայի դրոշներով են ներկված, Հայաստանի տարբեր ուժեր ու ՀԿ-ներ, առանց հաշվի առնելով Ուկրաինայի դիրքորոշումն Ադրբեջանի վարած քաղաքականության հարցում, ոգեւորված են Ուկրաինայով, եւ, ըստ էության, դրանով ցույց են տալիս, որ այն ամենը, ինչ տեղի է ունենում կապված Արցախի հետ, դրան էլ են համաձայն։ Վերջիվերջո, Հայաստանը պետք է հստակեցնի, թե որն է իր առաջնահերթությունները »,-նշում է Իսագուլյանը՝ հավելելով, որ ՀԱՊԿ-ից դուրս գալու եւ ռուսական ռազմաբազան երկրից հանելու վերաբերյալ խոսակցություններն ամենաբարձր մակարդակով են տեղի ունենում։

ՌԴ-ի ԱԴԾ–ի հանրային կապերի կենտրոնը հայտնել էր, որ Ղրիմի կամրջի վրա ահաբեկչության կազմակերպիչը Ուկրաինայի ՊՆ հետախուզության գլխավոր վարչությունն էր, ձերբակալվել են 8 մարդ՝ ՌԴ հինգ քաղաքացի, Ուկրաինայի և Հայաստանի երեք քաղաքացի։

Իսագուլյանի խոսքով, եթե իրավապահները իսկապես փաստեն ՀՀ քաղաքացիների կապը տեղի ունեցածի հետ, ապա դա երկրի համար ծանր հետեւանքներ կարող է ունենալ, որովհետեւ ,այդ դեպքում, պետք է հասկանալ, թե թելերը մինչեւ ուր են տանում։ «Քննությունը պետք է ցույց տա, թե դա որքանով կարող է կապ ունենալ ՀՀ իշխանությունների հետ, թե ինչ մարմիններ են մասնակցել, ովքեր են մասնակցություն ունեցել փաստաթղթերի պատրաստման գործընթացում »։

Իսագուլյանը , միեւնույն ժամանակ, շեշտեց, որ լրջագույն ռիսկեր ու վտանգաներ են ստեղծվում նաեւ հենց Հայաստանի ներսում անվտանգության տեսանկյունից։

Ինչ վերաբերում է հայ-ռուսական, մեղմ ասած, ոչ այնքան հեշտ հարաբերություններին, Գառնիկ Իսագուլյանն ակնհայտ համարեց, որ Հայաստանի գործող իշխանությունը մասնակցում է Ռուսաստանին տարածաշրջանից հանելու գործընթացին եւ այստեղ այլ կարծիք լինել չի կարող։

Ըստ նրա՝ այժմ Հայայստանը նույն այն վիճակում է, որում 44-օրյա պատերազմի օրերին էր գտնվում ՝ բացարձակ ոչ կոմպետենտություն ու դիլետանտիզմ է տիրում, իսկ իշխանությունը սեփական աթոռը պահելու համար պատրաստ է կործանել ամեն ինչ։ Ըստ Իսագուլյանի, ամեն ինչ գիտակցված է արվում ու պատահական չէ, որ գործող իշխանության շատ ակտիվիստներ մինչեւ 2018 թվականը ցույցներ ու միտինգներ էին անում ՀՀ-ում ՌԴ դեսպանատան առջեւ, իսկ Ալեն Սիմոնյանն արդեն Մոսկվայում որոշակի հարցադրումներ է անում, որոնք հստակ վկայում են, որ ՀՀ-ն փոխում է աշխարհաքաղաքական կուրսը՝ իր համար անհայտ հետեւանքներով։