Պաշտոնական այցով Մեծ Բրիտանիայում գտնվող Թուրքիայի նախագահ Աբդուլլահ Գյուլին ուղեկցող արտգործնախարար Ահմեթ Դավութօղլուն հանդիպել է Եվրամիության արտաքին հարաբերությունների և անվտանգության քաղաքականության հարցերով գերագույն հանձնակատար Քեթրին Էշթոնի հետ։

Ինչպես տեղեկացնում են թուրքական լրատվամիջոցները, հանդիպմանը, որը տեղի է ունեցել Hilton Park Lane հյուրանոցում, կողմերը քննարկել են Թուրքիա–ԵՄ հարաբերությունները, տարածաշրջանային և միջազգային խնդիրները։

Թուրքիայում տեղի ունեցած ավերիչ երկրաշարժից տուժածներին ցուցաբերած օգնության դիմաց ԱԻՆ-ին փոխհատուցելու համար կառավարությունն այսօրվա նիստում ավելի քան 122 մլն դրամ հատկացրեց նախարարությանը։ Հարցը ներկայացրեց ԱԻՆ փոխնախարար Հայկարամ Մխիթարյանը, ով տեղեկացրեց, որ օգնությունը Թուրքիային տրամադրվել է 2 փուլով։

Վարչապետ Տիգրան Սարգսյանը կարևորեց հարևան Թուրքիայում տեղի ունեցած աղետից տուժածներին աջակցելու այս ծրագիրը՝ փոխնախարարին հարցնելով՝ «Հիմնականում տրամադրում ենք վրաննե՞ր»։ «Այո, վրաններ, աձյալներ և այլն»,- պատասխանեց փոխնախարարը։

Վիզային ռեժիմի դյուրացման հարցն ընթացքի մեջ է, և պետք չէ այս երկարատև պրոցեսն ընկալել իբրև ձգձգում։ Այս մասին այսօր Երևանում ասաց ԵՄ արտաքին քաղաքականության և անվտանգության հարցերով բարձրագույն ներկայացուցիչ Քեթրին Էշթոնը ԱԳ նախարար Էդվարդ Նալբանդյանի հետ համատեղ ասուլիսի ժամանակ։

«Վիզային ռեժմի դյուրացման ուղղությամբ գործընթացը առհասարակ երկար է տևում և դրա պատճառը տեխնիկական բնույթի հարցերն են։ Երբ տեխնիկական մասի գործընթացն ավարտվի, մնացած հարցերն ավելի արագ կլուծվեն: Ամեն դեպքում սա մի գործընթաց է, որը պետք է ճիշտ և պատշաճ կերպով իրականացվի։ Այնպես որ, վիզային ռեժիմի դյուրացման հարցն ընթացքի մեջ է և պետք չէ այս երկարատև պրոցեսն ընկալել իբրև ձգձգում»,- այսօր լրագրողների հետ հանդիպմանն ասաց Քեթրին Էշթոնը, ով պաշտոնական այցով առաջին անգամն էր Հայաստանում: Նրա խոսքով` ԵՄ-ն անում է ամեն ինչ՝ Հայաստանի հետ հարաբերությունները ուժեղացնելու համար, իսկ ազատ առևտրի համաձայնագիրը Հայաստանին լայն հնարավորություններ կընձեռի փոքր բիզնեսը զարգացնելու և արտահանման ծավալները մեծացնելու ուղղությամբ:

«ՀՀ վարչապետի հանդիպման ժամանակ նա ասաց, որ Հայաստանում գործում է 350 ձեռնարկություն 5000 աշխատողներով բարձր տեխնոլոգիաների բնագավառում: Հենց բարձր տեխնոլոգիաների ոլորտն ու գյուղատնտեսությունը խթանելով` Հայաստանը կզարգացնի տնտեսությունը»,-ասաց Քեթրին Էշթոնը:

Ազգային անվտանգության խորհրդի քարտուղար Արթուր Բաղդասարյանի գլխավորած պատվիրակությունը nոյեմբերի 16-18-in, ՌԴ ԱԱԽ քարտուղար  Նիկոլայ Պատրուշեւի հրավերով կմեկնի Մոսկվա:

ԱԱԽ մամուլի ծառայությունից հայտնում են, որ այցի շրջանակներում ԱԱԽ քարտուղարը հանդիպումներ կունենա Ռուսաստանի իր գործընկերոջ` Նիկոլայ Պատրուշեւի, Ռուսաստանի Ռազմատեխնիկական համագործակցության դաշնային ծառայության ղեկավար Միխայիլ Դմիտրեւի, Քաղաքացիական պաշտպանության եւ արտակարգ իրավիճակների նախարար Սերգեյ Շոյգուի եւ ՀԱՊԿ Գլխավոր քարտուղար Նիկոլայ Բորդյուժայի հետ:

Այցի շրջանակներում կստորագրվի Հայաստանի եւ Ռուսաստանի Ազգային անվտանգության խորհուրդների միջեւ համագործակցության 2012-2013 թթ. ծրագիրը:

Հայաստան-ՀԱՊԿ համագործակցության ընթացիկ հարցերի քննարկման եւ հետագա փոխգործակցության նոր ուղիների նախանշման նպատակով Հավաքական անվտանգության պայմանագրի կազմակերպության կենտրոնակայանում տեղի կունենա «Հայաստանի համագործակցությունը ՀԱՊԿ շրջանակներում» թեմայով կլոր սեղան-քննարկում, որին կմասնակցեն ՀՀ եւ ՌԴ անվտանգության խորհուրդների, ՀԱՊԿ ստորաբաժանումների, պաշտոնական այլ շրջանակների ներկայացուցիչներ եւ փորձագետներ: ՀԱՊԿ շրջանակներում Հայաստանի կողմից իրականացված բարեփոխումների շուրջ զեկույցով հանդես կգա ԱԱԽ քարտուղար Արթուր Բաղդասարյանը:

Երկօրյա այցով, նոյեմբերի 16-ին, Հայաստան կժամանի Եվրոպական հանձնաժողովի փոխնախագահ, Եվրոպական միության արտաքին գործերի եւ անվտանգության քաղաքականության հարցերով բարձր ներկայացուցիչ Քեթրին Էշթոնը:

ԱԳՆ մամուլի ծառայությունից  հայտնում են, որ այցի ընթացքում Քեթրին Էշթոնին կընդունի Հայաստանի նախագահ Սերժ Սարգսյանը:

Քեթրին Էշթոնը հանդիպումներ կունենա նաեւ ՀՀ վարչապետ Տիգրան Սարգսյանի եւ ՀՀ ԱԳ նախարար Էդվարդ Նալբանդյանի հետ:

Վրացական կողմը վերաբացել է «Վերին Լարս» անցակետի երթևեկությունը։ Այս մասին հայտնում են հյուսիսօսական սահմանապահները։Սակայն մասնակի սահմանափակումներ կլինեն: Այս մասին հաղորդում է ռուսական Regnum լրատվական գործակալությունը:

Ավելի վաղ Հյուսիսային Օսիայում Ռուսաստանի Անվտանգության դաշնային ծառայության (ԱԴԾ) սահմանապահ վարչությունը հայտարարել էր, որ կլիմայական գործոնի հետ կապված 2011 թվականի նոյեմբերի 8-ից մինչև 2012 թվականի մարտի 1-ն ընկած ժամանակահատվածում ռուս-վրացական սահմանի հյուսիսօսական հատվածում տրանսպորտի երթևեկության սահմանափակումներ են մտցվելու:

Մասնավորապես ռուս-վրացական սահմանին ընկած «Վերին Լարս» անցակետը փակվում է կցովի և կիսակցովի բեռնատար ավտոտրանսպորտի և ավելի քան 30 նստատեղ ունեցող ուղևորատար տրանսպորտային միջոցների համար:

Նշելով, որ հայ-վրացական ավանդական և պատմականորեն արդարացված բարեկամական հարաբերությունները երկու ժողովուրդների միջև զարգանում են համագործակցության ոգով, Նախագահն ընդգծել է, որ երկկողմ կապերին հատուկ դինամիկա է հաղորդում բարձր մակարդակով կանոնավոր քաղաքական երկխոսությունը: Հանրապետության ղեկավարի խոսքով, դա հնարավորություն է տալիս օպերատիվորեն լուծել հայ-վրացական հարաբերություններին վերաբերող ցանկացած հարց:

Սերժ Սարգսյանը կարևորել է առաջիկայում տեղի ունենալիք միջկառավարական տնտեսական հանձնաժողովի նիստը, վստահություն հայտնելով, որ ինչպես նախկինում` այս դեպքում ևս այն զգալիորեն կխթանի Հայաստանի և Վրաստանի միջև տարբեր ոլորտներում համագործակցությունը:

Նախագահ Սերժ Սարգսյանը և Վրաստանի արտաքին գործերի նախարարը, ՀՀ Նախագահի Վրաստան կատարելիք պաշտոնական այցից առաջ, քննարկել են նաև այցի հետ կապված հարցեր: Նախարար Վաշաձեն նշել է, որ երկու երկրների արտաքին գործերի նախարարություններն աշխատում են այցը պատշաճ նախապատրաստելու ուղղությամբ և ընդգծել, որ ամեն ինչ կնախապատրաստվի երկու պետությունների միջև եղած հարաբերություններին հարիր մակարդակով:

Նախորդ շաբաթ Հայաստանի պետական կառույցներից մեկի ղեկավարը գաղտնի այցելել է Իսրայել: Այս մասին IzRus պորտալին հայտնել է իսրայելական հավաստի աղբյուրը: Հայաստանից Իսրայել մեկնած պատվիրակության կազմում եղել է երեք մարդ, ովքեր Իսրայելում անցկացրել են մի քանի օր:

Հայ հյուրերը դիտել են մի շարք պրոֆիլային կառույցներ Իսրայելի կենտրոնական եւ հյուսիսային շրջաններում, այցելել Երուսաղեմի հայկական թաղամաս: Ընդոնող կողմը զարմացած է եղել հայ պաշտոնյայի` Իսրայելի պատմության եւ ներքաղաքական իրավիճակի, ինչպես նաեւ իր հրեա գործընկերների աշխատանքի նրբությունների լավ իմացությամբ:

Աղբյուրի փոխանցմամբ, այս այցելության նախաձեռնողը եղել է Հայաստանում Իսրայելի դեսպան Շմուել Մերոմը, ով այդ պաշտոնում նշանակվել է նախորդ տարվա մարտին: Հենց նա էլ ուղեկցել է հայկական պատվիրակությանն Իսրայելում:

Հայ հյուրերն Իսրայելի քաղաքական ղեկավարության հետ հանդիպումներ չեն ունեցել: Այցելությունը կրել է ճանաչողական բնույթ եւ կոնկրետ գործարքներ ու նախագծեր չեն քննարկվել:

Միաժամանակ, IzRus պորտալի աղբյուրը հավելել է, որ հայկական կողմը կարծիք է հայտնել, որ թուրք-հրեական հարաբերություններում առկա ճգնաժամը լավ նախադրյալներ է ստեղծում Երեւանի եւ Երուսաղեմի միջեւ կապերի զարգացման համար:

Հոկտեմբերի 31-ին ՄԱԿ-ում Հայաստանի դեսպան Կարեն Նազարյանը ելույթ է ունեցել ՄԱԿ-ի Գլխավոր ասամբլեայի 3-րդ կոմիտեի 37-րդ հանդիպման օրակարգի «ժողովուրդների ինքնորոշման իրավունք» և «Ռասիզմի, ռասայական խտրականություն ու անհանդուրժողականության այլ ձևերի վերացում» կետերով, որտեղ  նաև նշել է, որ Ադրբեջանի կողմից Արցախի ժողովրդի ինքնորոշման իրավունքի նկատմամբ ոտնձգությունները հանգեցրեցին ավերածությունների, տեղահանումների ու ագրեսիայի, և որ այսօր էլ Հայաստանի ու առհասարակ հայերի նկատմամբ ատելություն քարոզելով` Ադրբեջանը պատրաստվում է նոր պատերազմի:

Նազարյանը, հղումներ կատարելով ռասիզմի դեմ պայքարի միջազգային ատյանների զեկույցներին, ներկաների ուշադրությունն է հրավիրել Բաքվի կողմից հայատյացությունը որպես պետական քարոզչություն հռչակելու փաստերին:

Ըստ դեսպանի`այդ անընդունելի վարքագիծը քողարկելու համար Ադրբեջանը շարունակում է շրջանառել կեղծիքներ, ստեր պարունակող հայտարարություններ, ելույթներ ու նամակներ, և որ ռասայական խտրականության դրսևորումներն ու ձևերը վտանգում են վստահության մթնոլորտի ձևավորման գործընթացը, հետևաբար նաև վնասում ԼՂ կարգավորման բանակցային գործընթացը: