Ինչպես գրում է իտալական Il Sole 24 Ore-ը,  Իտալիայի նախկին վարչապետ Սիլվիո Բեռլուսկոնին, որի դեմ հայրենի երկրում մի քանի դատական գործ է հարուցվել, գնացել է Սոչի` ՌԴ նախագահ Դմիտրի Մեդվեդևի և վարչապետ Վլադիմիր Պուտինի հետ հանդիպելու:

Իհարկե այցի նպատակը՝ հայտնի չէ: «Տանդեմի» պաշտոնական ներկայացուցիչները ոչ մի մեկնաբանություն չեն անում:

ՌԴ նախագահի պաշտոնական կայքում տեղեկություն կա միայն Բեռլուսկոնիի այցի մասին: Միայն զետեղված լուսանկարներից  կարելի է եզրակացնել, որ հանդիպումն անցել է լեռնադահուկային Կրասնայա Պոլյանա կուրորտում:
Իտալական ԶԼՄ-ները պնդում են, որ հանդիպումը, ինչպես միշտ, անցել է լիակատար գաղտնիության պայմաններում:

Նախագահ Սերժ Սարգսյանն այսօր շնորհավորական ուղերձ է հղել Վլադիմիր Պուտինին` Ռուսաստանի Դաշնության նախագահի պաշտոնում ընտրվելու կապակցությամբ: Ուղերձում ասված է.

«Հարգելի՛ Վլադիմիր Վլադիմիրի,

Հայաստանի ժողովրդի և անձամբ իմ անունից անկեղծորեն և սրտանց շնորհավորում եմ Ձեզ՝ Ռուսաստանի Դաշնության նախագահ ընտրվելու կապակցությամբ:

Նախագահական ընտրություններում Ձեր տարած համոզիչ հաղթանակը վկայում է Ռուսաստանի համակողմանի զարգացմանը, երկրի բարեփոխմանն ու արդիականացմանը, համաշխարհային գլոբալ գործընթացներում նրա դերակատարության և ազդեցության էլ ավելի բարձրացմանն ուղղված Ձեր կողմից իրականացվող քաղաքականության նկատմամբ ռուսաստանցիների լայն և բազմամյա աջակցության մասին:

Հայաստանին և Ռուսաստանին միավորում են դաշնակցային հարաբերությունները, որոնք հիմնված են մեր երկրների եղբայրական ժողովուրդների ժամանակի փորձությունն անցած բարեկամության վրա:

Վերջին տարիներին հայ-ռուսական համագործակցության զարգացման մեջ ձեռք են բերվել նշանակալի արդյունքներ, ստեղծվել է էական պաշար ապագայի համար: Եվ դրանում անգնահատելի է Ձեր անձնական ներդրումը:

Վստահ եմ, որ մեր երկկողմ ռազմավարական փոխգործակցության հետագա զարգացումն այսուհետ ևս կծառայի Հարավային Կովկասում խաղաղության, անվտանգության և կայունության ամրապնդմանը, թույլ կտա ոչ միայն իրականացնել երկարաժամկետ նախագծեր տնտեսության մեջ, միջտարածաշրջանային համագործակցության ոլորտում, մշակութային-հումանիտար բնագավառում, այլև բացահայտել միջպետական համագործակցության նոր հնարավորություններ:

Հարգելի՛ Վլադիմիր Վլադիմիրի, Հայաստանի Հանրապետության և Ռուսաստանի Դաշնության միջև դիվանագիտական հարաբերությունների հաստատման 20-ամյակի տարում հրավիրում եմ Ձեզ այցելել Հայաստան պետական այցով: Անկասկած, Ձեր այցը նոր խթան կհաղորդի բոլոր ուղղություններով հայ-ռուսական դաշնակցային հարաբերությունների զարգացմանը՝ ի շահ մեր երկրների ժողովուրդների:

Մաղթում եմ Ձեզ, հարգելի՛ Վլադիմիր Վլադիմիրի, քաջառողջություն և նոր հաջողություններ բարձր պետական պաշտոնում, իսկ Ռուսաստանի եղբայրական ժողովրդին՝ բարգավաճում և բարեկեցություն»:

ՌԴ նախագահական ընտրություններում ռուս միլիարդատեր Միխայիլ Պրոխորովը, Պուտինի շտաբի համաձայնությամբ, կկատարի գլխավոր ընդդիմադրի դերը: Այս մասին գրում է ռուսական The New Times թերթը՝ վկայակոչելով վարչապետին մոտ կանգնած իր աղբյուրը:

Պարբերականի տվյալներով՝ առաջիկա նախագահական ընտրություններում Պրոխորովի խնդիրը կլինի հավաքել դժգոհ քաղաքացիների ձայները և նախագահական քարոզարշավի օրինականության տպավորություն թողնել:

Ռուսաստանի ամենահարուստ մարդկանց ցուցակում երրորդ տեղը զբաղեցնող գործարար Միխայիլ Պրոխորովը, առաջադրելով իր թեկնածությունը ՌԴ նախագահական ընտրություններում, հայտարարել է, որ չի պատրաստվում իր ընտրական քարոզարշավը կառուցել Պուտինի քննադատության վրա, ինչպես նաև պատրաստվում է համագործակցել երկրի նախկին ֆինանսների նախարար Ալեքսեյ Կուդրինի հետ:

Ընդ որում, թերթը գրում է, որ գործարարի գործունեությունը կլուսաբանեն պետական ԶԼՄ-ները, և նրան հնարավորություն կտան արտահայտվել ցանկացած, անգամ ամենասուր հարցերով:

Պարբերականի տվյալներով՝ այս ծրագիրը կազմվել է Պուտինի շտաբի արտահերթ խորհրդակցության ժամանակ՝ ընդդիմության դեկտեմբերի 10-ի ցույցից հետո:

Այս պայմաններում վարչապետի շրջապատում որոշել են կրկնել 2004 թ. ընտրարշավի սցենարը. Պրոխորովը կփոխարինի Իրինա Խակամադային և մարտին կստանա ձայյների շուրջ 10%-ը:

Լիբանանահայության ազգային-քաղաքական կյանքի եռուզեռը շարունակվում է: Անթիլիասի միջազգային խորհրդաժողովը հազիվ ավարտված,  լիբանանահայությունը ոգեկոչեց սումգայիթյան եղեռնագործության զոհերի  հիշատակը, այս անգամ՝ հատուկ նշումով:

Ցվետանա Պասկալևայի «Ղարաբաղի վերքերը» ժապավենը  փաստավավերագրական առումով պատերազմի արհավիրքը, Բաքվի իրականացրած ջարդերն ու հայ անմեղ բնակչության դեմ սանձազերծած պատերազմի ծալքերը բացահայտող տեղեկությունների աննախադեպ հավաքածու է, որն ամփոփված է բուլղարացի լրագրողի՝ տարիների ընթացքում  ռազմաճակատներում պատրաստած տեսանյութերում: Տեսանյութերին հետեւողը շատ արագ կարող է հասկանալ Արցախի ժողովրդի ինքնորոշման իրավունքի ձեռք բերման՝ ինքնապաշտպանության  եւ ազատագրական պայքարի շարժառիթները:

Ադրբեջանական հետեւողական հարձակումներն ու շարունակվող ջարդարարությունը անպայման զուգահեռվում են թուրքական շարունակվող ցեղասպանության հետ: Թուրքական եւ ադրբեջանական համակարգված մեքենաները շարունակում են գործել ինչպես զինվորական, այնպես նաեւ քաղաքական եւ տեղեկատվական ասպարեզում, նաեւ` ցեղասպանական եւ ջարդարարական քաղաքականությունը իրականացնելու ուղղությամբ:

Մեծի Տանն Կիլիկիո կաթողիկոսության կազմակերպած իրավական հարցեր քննարկող միջազգային համագումարը հաստատեց ցեղասպանության շարունակականության փաստը եւ այդ առումով ճանաչումից հատուցման հանգրվան անցնելու իրավական ուղիների որոնումներում նոր հեռանկարների  ուրվագծման նախաքայլեր արձանագրեց:

Հայոց եկեղեցիների, ազգապատկան կալվածքների, անձնական սեփականության, ինչքերի, ապահովագրությունների եւ տարբեր ունեցվածքների փաստահավաքը, գրանցումները, վավերաթղթերի համախմբումները կազմում են հատուցման պահանջատիրության նախնական աշխատանքները: Իրավունքը ենթադրում է դատ, դատը` ատյան. իսկ ատյանի դիմումը` անառարկելի փաստերի հանրագումարով պատրաստված թղթածրար` հիմնված միջազգային օրենքների օրինաչափությունների վրա: Այս թղթածրարի պատրաստության նախանշումն էր, որ հատուցման հանգրվանում  առարկայականորեն նախապատրաստվելու ազդանշանն էր տալիս:

Անթիլիասի միջազգային համագումարը այս բոլորին առընթեր լուռ պատգամ էլ  ուներ: Հայկական դաշտում դերերի բաշխման եւ համակարգման  անհրաժեշտությունը` Հայաստանի Հանրապետության, հայոց եկեղեցական կենտրոնների եւ սփյուռքյան կազմակերպությունների միջեւ, միջազգային ընտանիքի ամենաարդյունավետ եւ ազդեցիկ ձեւերով ներկայանալու անհրաժեշտությունից է բխում: Հատուցման պահանջատիրությունը համազգային խնդիր է եւ բոլորի ներդրումը այստեղ նախապայման է նպատակուղղված աշխատանքի համար: Լուռ պատգամը հզորանալու եւ քաղաքական ինքնապարտադրանքի ճանապարհով միջազգային օրենքները հայության արդար դատաստանին ծառայեցնելու հրամայականն է: «Ուժն է ծնում իրավունք»-ի նժդեհյան փիլիսոփայությունը մեկ անգամ եւս զգալի էր դարձնում Անթիլիասի համաժողովում, երբ ամեն անգամ որեւէ փորձագետ իրավական ճանապարհը նեղ էր համարում հայկական իրավունքների վերականգնման ուղիները հարթելու համար:

Քաղաքական հզոր գործոնի վերածվելը գերխնդիր է համայն հայության համար, մանավանդ երբ նկատի ենք ունենում միջազգային ատյանների նկատմամբ բանեցված քաղաքական ճնշամիջոցների իրականությունը: Իրավականորեն պատրաստվել, ուրեմն եւ քաղաքականապես հզորանալ:

Արցախը այս առումով ուսանելի դաս ունի հատուցման մեր հետագա աշխատանքների համար: Արցախի ազատագրական պայքարը, ազատագրումը, ինքնորոշումն ու Լեռնային Ղարաբաղի Հանրապետության հռչակումը հայկական գործոնի զինվորաքաղաքական հզորացումն են, որի հիման վրա իրականացված է հողային հատուցումը եւ որի հիման վրա միայն Արցախը իրավականորեն պատրաստ է այսօր միջազգային ընտանիքի կողմից ճանաչվելու: Առանց առաջինի, երկրորդի համար լավագոյն պատրաստվածությունը դատապարտված էր մնալու տեսաբանության սահմաններում:

Անթիլիասի համագումարը շատ կարեւոր նախաքայլ է մեր հետագա աշխատանքների հունավորման համար: Նրա լուռ պատգամը` իրավագիտական նախապատրաստվածության առընթեր քաղաքական հզոր գործոն դառնալու համազգային համոզման հերթական վերաամրագրումն է՝ Արցախի արձանագրած հաղթերթի ուղով:

ՇԱՀԱՆ ԳԱՆՏԱՀԱՐԵԱՆ

«Ազդակ»-ի գլխավոր խմբագիր

Ադրբեջանի ազգային անվտանգության նախարարությունը հայտարարել է, որ ևս մեկ ահաբեկչական խմբավորում է բացահայտվել:  Այս մասին փետրվարի 21-ին հաղորդել է AzTV պետական հեռուստաընկերությունը` վկայակոչելով Ադրբեջանի ԱԱԾ-ին:

Ադրբեջանական ԱԱԾ-ն հաղորդում է, որ խմբավորումը ստեղծվել է «Սեպահ» իրանական հատուկ ծառայության աշխատակցի` Համիդի և Գյաջի Աբասի կողմից, որը գլխավորում է «Հըզբոլահի» զինված թևը` «Մուգավիմաթ»-ը: Խմբի անդամները, «Սեպահ»-ի կարգադրությամբ, հետախուզական բնույթի տեղեկություններ են հավաքել, ձեռք են բերել զենք, պայթուցիկ սարքեր, կատարել նախապատրաստական աշխատանքներ: ԱԱԾ-ն, սակայն չի բացահայտել հատուկ գործողության մի շարք մանրամասներ, այդ թվում խմբավորման ձերբակալված անդամների թիվը:

Այն, ըստ ԱԱԾ-ի գործում էր իրանական հատուկ ծառայությունների կարգադրությամբ, և նախատեսում էր ահաբեկչություններ իրականացնել օտարերկրյա քաղաքացիների հանդեպ:

Իրանական կողմը ևս արձագանքելով  Ադրբեջանի մեղադրանքներին: Ադրբեջանի մահմեդականներին մեղադրում են հատուկ ծառայությունների հետ համագործակցելու մեջ, սակայն քաջ հայտնի է, որ այդ երկիրը համագործակցում է «Մոսադ»-ի և ամերիկյան հատուկ ծառայությունների (CIA) հետ, այս մասին հայտարարել է Իրանի Մեջլիսի ազգային անվտանգության և արտաքին քաղաքականության հարցերով հանձնաժողովի փոխնախագահ Էսմայիլ Քուսարին. «Ադրբեջանը պետք է պատասխանատվություն կրի իր քայլերի համար և շտապ կերպով ԻԻՀ-ի սահմաններից հեռացնի հետախուզություն իրականացնող կազմակերպություններին», -ասել է նա:

Ադրբեջանական ԱԱԾ-ի  հայտարարությանը նախորդել է իրանական կողմի հղած նոտան, որով պահանջվում էր ազատ արձակել օրեր առաջ ձերբակալած իրանցի լրագրողներին, որը իրանական կողմի բնութագրմամբ միջազգային նորմերին հակասող լուրջ խախտում է:

Ադրբեջանա-իրանական հակասությունները խորանում են, ինչը կարող է լուրջ հետևանքներ ունենալ տարածաշրջանի  մահմեդական բնակչություն ունեցող երկու պետությունների հետագա հարաբերությունների տեսանկյունից:

Ria-novosti- գործակալության փոխանցմամբ, Ալլա Պուգաչովան մամուլի ասուլիսին հայտարարել է, որ եթե ինքը երկար ժամանակով զբաղված չլիներ, դեմ չէր լինի դառնալու  Միխայիլ Պրոխորովի կինը: Ի դեպ սա պատասխանն է այն հարցի, թե ինչպիսին պետք է լինի ՌԴ նախագահի կինը:
Պրիմադոննան, սակայն, խոստացել է կին գտնել միլիարդատեր, ՌԴ նախագահի թեկնածու Պրոխորովի համար:

«Առաջին տիկինը, ըստ էության, պետք է ես լինեմ, բայց ես ազատ չեմ և երկար ժամանակ ազատ չեմ լինի: Իսկ ինձ նման երկրորդին գտնելը շատ դժվար է»,- ասել է Պուգաչովան`ՌԴ նախագահի թեկնածու Պրոխորովի վստահված անձը:

Իսկ որ ինքը և Պրոխորովի կողմնակիցները կօգնեն նրան «արժանի կին» գտնել կարելի է չկասկածել: Սակայն ըստ պրիմադոննայի` ամուրի լինելը Պրոխորովի արժանիքներից մեկն է, և ճիշտ կլինի, որ նա որոշ ժամանակ ամուսնացած լինի երկրի հետ:
 

Վրաստանի Պաշտպանության նախարարության նախաձեռնությամբ երկարացվելու է զինծառայության ժամկետը. 12 ամսի փոխարեն այժմ զինվորները կծառայեն 15 ամիս: Այս մասին գրում է vz.ru-ն:

Պաշտպանության նախարարությունը փաստում է, որ մեկ տարին բավարար չէ` զինակոչիկների նախապատրաստման համար:

Վրաստանի բանակն ունի ավելի քան 30 հազ. զինծառայող, որոնց մեծամասնությունը պայմանագրային ծառայողներ են:

Ծառայության ժամկետները ոչ վաղ անցյալում փոփոխության էին ենթարկվել (12 ամսից դարձել էին 18), այնուհետ կրկին նվազեցվել են:

Նախագահ Սերժ Սարգսյանը, ՌԴ նախագահ Դմիտրի Մեդվեդևի հրավերով, հունվարի 23-ին աշխատանքային այցով կմեկնի Սոչի: Այցի շրջանակներում նախատեսված է Հայաստանի Հանրապետության և Ռուսաստանի Դաշնության նախագահների երկկողմ հանդիպում:
Նախագահի մամլո գրասենյակից հաղորդում են, որ նույն օրը տեղի կունենա նաև Հայաստանի, Ռուսաստանի և Ադրբեջանի նախագահների եռակողմ հանդիպում` նվիրված Լեռնային Ղարաբաղի հակամարտության կարգավորմանը:

Ձմռան ընթացքում Թուրքիայում կրկին H1N1 վարակի` խոզի գրիպի վարակման դեպքեր են արձանագրվել:Այս մասին հայտնել է Թուրքիայի առողջապահության նախարարությունը: 2009-2010 թվականների ընթացքում Թուրքիայում խոզի գրիպի հետեւանքով 656 մարդկանց մահը, պետք է, որ մտահոգեր երկրի առողջապահական համակարգին:

Սակայն Թուրքիայի առողջապահության նախարարության աշխատակիցն ասել է, թե` դրանք անհանգստանալու հիմք չեն տալիս, քանի որ թեթև են ընթացել, իսկ իրենք հետևողական են սեզոնային վարակների նկատմամբ:

Ռուսաստանի նախագահական ընտրությունների նպատրաստվում են նաև լիբերալ — դեմոկրատական կուսակցության առաջնորդ Վլադիմիր Ժիրինովսկին և միլիարդատեր  Միխայիլ Պրոխորովը: ՌԴ նախագահական ընտրություններին ժիրինովսկու կուսակցությունը առաջադրել է նրա թեկնածությունը:

Ժիրինովսկին կուսակցության համագումարում, հայտարարել է, որ Ռուսաստանի քաղաքական իրավիճակի զարգացման ներկայիս սցենարը կարող է հանգեցնել նախագահական ընտրությունների երկրորդ փուլին և ոչ կրեմլյան թեկնածուի հաղթանակին: Այս մասին հաղորդում են ռուսական լրատվամիջոցները:

Մեկ այլ թեկնածու` վերջերս ակտիվ քաղաքականություն մտած Միխայիլ Պրոխորովը  հայտարարել է, որ առաջադրելու է իր թեկնածությունը և չի խնայելու իր միլիարդները  Ռուսաստանի նախագահի պաշտոնին հասնելու ճանապարհին:

«Սա, հավանաբար իմ կյանքի ամենալուրջ որոշումն է։ Ես գնում եմ նախագահական ընտրությունների»,- գրել է Պրոխորովը:

Ի դեպ, նրան սատարում են ռուսական շոու բիզնեսի հայտնի դեմքերը.սիրված հաղորդավարուհի Քսենիա Սոբչակն Twitter միկրոբլոգի իր էջում սատարել է Պրոխորովի որոշմանը: