Երևանի նախկին փոխոստիկանապետ Ռոբերտ Մելքոնյանը ֆեյսբուքի իր էջում գրել է.

«Կառավարության ծրագրի քննարկումն ակնհայտ ցույց տվեց «հրաշալի քառյակի»  և «ընդդիմադիր» դաշտի ողջ պերճանքն ու թշվառությունը…
Այդ  «հրաշալի հարմարվողականության քառյակը» դարձավ ՀՀ կառավարությանը կից հանրային խորհուրդ…Իշխանության, ընդդիմադիր, իրական իշխանական լծակների ձգտող ուժերի կուլիսային պայքարը, վերադասավորումները ցույց տվեցին, որ նախկին վարչապետը ընդամենը քավության նոխազ էր…
Հիմա արդեն կրկին կսկսեն վերադասավորումները, առնետավազքերը, հավատարմության երդումները, Բոթ-Բոթելու, բլթացնելու պրոցեսները…
«Հրաշալի քառյակը» կատարեց իր խնդիրը… Սակայն հրաշալի է ողջ իրականությունն ու այս քաղաքական գործիչների իրական պատկերը… »:

Հայաստանը մայիսի 29-ին կարող է միանալ Բելառուսին, Ղազախստանին և Ռուսաստանին՝ ստորագրելով Եվրասիական տնտեսական տարածքի ձևավորման փաստաթուղթը: Սակայն վերջերս սկսել են համառ տեղեկություններ շրջանառվել այն մասին, թե Հայաստանի անդամակցության գործընթացը ձգձգվում է ՄՄ-ում Ղարաբաղի կարգավիճակի հետ կապված անհամաձայնության պատճառով, Հայաստանը չի կարողանա միանալ ռուսական ինտեգրացիոն պրոյեկտներին, և որ ԼՂ-ի ու ՀՀ-ի միջև մաքսային անցակետ է տեղակայվելու:

Ռուսական շրջանակներից այս թեմաների քննարկումը, կարծես, բավական հետևողական է սկսվել իրականացվել, ինչը, թերևս, վկայում է այն մասին, որ Հայաստանին` ՄՄ-ի անդամակցության ճանապարհին բարդություններ են սպասվում և Մոսկվան ամենևին էլ մտադիր չէ արհամարհել Բաքվի շահերը` ԼՂ-ի հարցում:

Պետդումայի նախկին պատգամավոր, ՌԴ հանրային պալատի ներկայացուցիչ Սերգեյ Մարկովը 1in.am-ին տված հարցազրույցում ուշագրավ կարծիք է հայտնել այս առիթով. «ՌԴ-ն այսօր չի կարող Հայաստանին միացնել Մաքսային միությանը ԼՂ-ի հետ միասին, որովհետև ՌԴ-ն նախատեսում է ՄՄ-ի կազմում ընդգրկել Ադրբեջանին ևս: Իսկ ՀՀ անդամակցությունը ՄՄ-ին ԼՂ-ի հետ միասին կնշանակեր ճանաչել ԼՂ-ն Հայաստանի կազմում: Ուստի, ես կարծում եմ, որ այստեղ ՌԴ-ի դիրքորոշումը բավական հստակ է՝ ՄՄ-ին անդամակցելու է միայն Հայաստանը… Ես ենթադրում եմ, որ ՀՀ ղեկավարությունը, սկսելով ՄՄ անդամակցության գործընթացը, փոքր-ինչ շտապել է, քանի որ ՀՀ ղեկավարությունը դեռ չի կայացրել միանշանակ որոշում:

Առավոտ

Երբ Հովիկ Աբրահամյանը նշանակվել էր վարչապետ, ընդդիմադիրներն ասում էին՝ դեռ շուտ է որևէ բան ասելը՝ թող կառավարությունը ներկայացնի իր ծրագիրը: Երբ կառավարությունը ներկայացրել էր իր ծրագիրը, ընդդիմադիրներից ոմանք ասում են՝ տեսնենք, թե այդ ծրագիրը ինչպես է իրականացվելու: Այդ դիվանագիտական ձևակերպումները թույլ են տալիս պարզապես չմասնակցել կառավարության ծրագրի քվեարկությանը՝ այդպիսով ոչ մի վերաբերմունք չցուցաբերելով դրա բովանդակության նկատմամբ:

Օրինակ, հետաքրքիր կլիներ իմանալ, թե ինչպես են խմբակցությունները վերաբերվում կոնկրետ այս կառավարության ծրագրում տեղ գտած գաղափարներին՝ հարկային քաղաքականության փոփոխությանը մանր և միջին բիզնեսի վերաբերյալ, պահանջարկի, ոչ թե առաջարկի խթանմանը, ավելացված արժեքի հարկը սահմանին չգանձելուն, համայնքների խոշորացմանը, գյուղատնտեսությունը սուբսիդավորելու մտադրությանը և այլն:

Հասկանում եմ, որ դրա համար պետք է նվազագույնը՝ ծրագիրը կարդալ, ինչը, վստահ եմ, պատգամավորների ճնշող մեծամասնությունը չի արել:

Առավոտ. խմբագրական

ՕԵԿ-ական պատգամավոր Կարեն Բոթոյանն այսօր հայտարարեց, որ դիմում է ներկայացրել՝ ՕԵԿ-ից դուրս գալու վերաբերյալ: Նրա խոսքով, ինքը նման որոշում է կայացրել, որպեսզի «կողմ» քվեարկի կառավարության ծրագրին:

Հեղինե Բիշարյանը նշեց, որ իրենք հարգում են գործընկերոջ դիմումը, քանի որ գործարար մարդը չի կարող դեմ քվեարկել կառավարության ծրագրին:

Այսօր՝ Ազգային ժողովում, խորհրդարանական ոչ իշխանական ուժերը (ԲՀԿ, ՀԱԿ, ՀՅԴ, «Ժառանգություն») համատեղ նիստ են անցկացրել, որի ժամանակ քննարկել են կառավարության ծրագրի վերաբերյալ միասնական դիրքորոշում հայտնելու հարցը։

Նիստից հետո ՀՅԴ խմբակցության ղեկավար Արմեն Ռուստամյանը տեղեկացրել է, որ քառյակը որոշել է չմասնակցել քվեարկությանը։

Նշենք, որ կառավարության ծրագրի քվեարկությունը կայանալու է այսօր՝ 17.30-ին:

«Ես այս տարածաշրջանում չեմ տեսնում այնպիսի օբյեկտ, որը կարող էր խաղալ Ղրիմի դերը, և ես չեմ տեսնում նաև նմանություն Ուկրաինայի հարավ-արևելքի հետ, ուստի այս թեմայով զուգահեռներն այնքան էլ ճիշտ չեն»,- «168 Ժամ» հետ զրույցում կարծիք է հայտնեց ռուսաստանցի հայտնի վերլուծաբան Վադիմ Դուբնովը` անդրադառնալով Լեռնային Ղարաբաղի և Ղրիմի միջև անցկացվող զուգահեռներին:

Քաղաքագետի խոսքով` իրականում միջնորդներից որևէ մեկը չի ցանկանում ղարաբաղյան հիմնախնդրի վերջնական լուծումն այս կամ այն կողմի օգտին, քանի որ առաջին հերթին` Ռուսաստանն է ուզում, որ ստատուս-քվոն պահպանվի, իսկ ամերիկացիները և ֆրանսիացիները հիմնվում են այն ենթադրության վրա, որ ստատուս-քվոն կշարունակվի դեռ շատ երկար տարիներ:

Հարցին` այդ դեպքում ինչո՞ւ են ամերիկացիներն անընդհատ շեշտում ստատուս-քվոյի փոփոխման անհրաժեշտության մասին, Վադիմ Դուբնովը պատասխանեց, որ ամերիկացիները, իհարկե, կուզենային լուծել այս հարցը, բայց չի կարծում, որ նրանք հավատում են, թե այդ ստատուս-քվոն կարող է փոխվել. «Դա պարզապես մի արտահայտություն է, որը ոչ ոքի ոչինչ չի պարտավորեցնում: Վերջիվերջո, ոչ վաղ անցյալում Պուտինը նույնպես Բաքվում խոսում էր այն մասին, թե ստատուս-քվոն հավերժ չէ, և Ռուսաստանը հարգում է Ադրբեջանի տարածքային ամբողջականությունը: Սրանք պարզապես խոսքեր են, որոնք ոչ մի նշանակություն չունեն, և միջնորդ երկրների բանակցային ողջ գործունեությունն իրականում անիմաստ է ճիշտ այնքանով, որքանով այն չի հանդիսանում կոնսենսուսային»:

168 ժամ

«Ճիշտ ա ասե վարչապետը»,- «Առավոտի» հարցին այսպես է արձագանքել ԱԺ ՀՀԿ-ական պատգամավոր, ՄԱՊ ընկերության սեփականատեր Ալեքսան Պետրոսյանը: Խոսքը վարչապետ Հովիկ Աբրահամյանի` կառավարության ծրագիրը ներկայացնելի արած հայտարարության մասին էր:

Վարչապետն ասել էր. «Ստվերը բոլորիս թշնամին է, և պայքարը ստվերի դեմ լինելու է անողոք, անաչառ և հետևողական: Փաստաթղթավորումը պետք է պարտադիր լինի բոլորի համար: Անխտիր: Ուզում եմ ևս մեկ անգամ հայտարարել՝ ամեն ոք բարեփոխումները պետք է սկսի իրենից: Առավել խստապահանջ եմ լինելու իմ մերձավորների նկատմամբ: Եվ պահանջելու եմ նույնը կառավարության բոլոր անդամներից»:

Այս հայտարարությունը Ձեզ չի վախեցնում` հարցին պատգամավորը հպարտ կեցվածք ընդունեց և ասաց. «Իհարկե` ոչ, ընդհակառակը, ես շատ ուրախ եմ: Ավելի լավ, մենք սեփականատեր ենք, մենք աշխատում ենք, և աշխատում ենք շատ պարզ: Իմիջայլոց, ինքը շատ թափանցիկ աշխատողների նկատմամբ, ընդհակառակը, արտոնություններ ձևակերպեց: Հույսով ենք, որ մենք կօգտվենք էդ արտոնություններից»:

Առավոտ

Իշխանության և ընդդիմության համագործակցելու ասպարեզը խորհրդարանն է։ Այստեղ մեր պատկերացումների մեջ որոշակի խեղում կա. ոմանց թվում է, թե համագործակցությունը ենթադրում է՝ իշխանության այս կամ այն օրինագծին «կողմ» քվեարկել կամ իշխանության այս կամ որոշման համար պատասխանատվություն կրել։ Երբ ընդդիմադիր պատգամավորն ասում է, որ նա դեմ է քվեարկելու տվյալ օրինագծին, որովհետև վերջինիս այս կամ այն կետը հակասում է իր համոզմունքներին, դա նույնպես համագործակցություն է՝ օրինագիծն ավելի լավը սարքելու համատեղ աշխատանք։

Այդ իմաստով իշխանության հետ չի համագործակցում օրինակ, «Նախախորհրդարանը»՝ որպես ոչ համակարգային ընդդիմություն։ Իսկ նրանք, ովքեր խորհրդարանում են, նույնիսկ եթե վերջին խոսքերով հայհոյում են իշխանավորներին, միևնույն է՝ համագործակցության դաշտում են։ Կարելի է տարբեր ձևով վերաբերվել Նիկոլ Փաշինյանին, նրա բառապաշարին և հռետորական հնարքներին, բայց նրա գործունեությունը դուրս չի գալիս դասական քաղաքական շրջանակներից։ Մանավանդ, որ վերջին իր ելույթում բովանդակային առումով նա ճիշտ էր. կառավարության առնվազն կեսը չափազանց հաջողակ բիզնեսմեններ են, և սպասել, որ նրանք պայքարելու են ստվերի դեմ, իրատեսական չէ։

Ընդդիմությունը պետք է վերահսկի գործադիր իշխանությանը։ Բայց ընդդիմությանը Հայաստանում վերահսկողական պաշտոններ տալը ինձ անտրամաբանական է թվում։ Ենթադրենք, ես իշխանության մրցակիցն եմ, ես, բնականաբար, ցանկանում եմ, որ ժողովրդի դժգոհության աստիճանը բարձրանա, և այդպիսով վարչակարգը տապալվի։ Պատկերացնո՞ւմ եք՝ ես ինչպես եմ աշխատելու, օրինակ, Վերահսկիչ պալատի նախագահի պաշտոնում:

Առավոտ

Կառավարության ծրագրի խորհրդարանական քննարկումների երկու օրվա ընթացքում լրագրողները հարաճուն տպավորություն ստացան, թե վարչապետ Հովիկ Աբրահամյանը վերահսկում է ոչ իշխանական քառյակին։ նման տպավորության պատճառն այն է, որ քառյակ-Հովիկ Աբրահամյան հարցուպատասխանն ու քննարկումը տեղի էր ունենում լայթս-ընդդիմիզմի, առավել հաճախ՝ փոխադարձ ջերմության մթնոլորտում։

Հարցուպատասխանի մթնոլորտը սրելու եզակի փորձեր ՀԱԿ խմբակցության ղեկավար Լեւոն Զուրաբյանն ու խմբակցության քարտուղար Արամ Մանուկյանը ձեռնարկեցին։ Իրականում, սակայն, նրանց հարցերը տեղավորվում էին Հովիկ Աբրահամյանին չնեղացնելու ռազմավարության մեջ:

Հայկական ժամանակ

Ռոբերտ Քոչարյանը երեկ՝ մայիսի 20-ին, մեկնել է Մոսկվա՝ մասնակցելու «Սիստեմա» ԲՖԿ-ի տնօրենների խորհրդի՝ այսօր կայանալիք նիստին։

Նշենք, որ Քոչարյանի այս այցը, ի տարբերություն նախորդ այցերի, չի ուղեկցվում տեղեկատվական ինտրիգային արտահոսքերով, որոնց թեման մշտապես նույնն է՝ Քոչարյանը գնացել է Պուտինի հետ հանդիպելու։

Հիշեցնենք, որ 2009 թ. հունիսից Ռոբերտ Քոչարյանը «Սիստեմա» ԲՖԿ-ի անկախ տնօրենն է:

Ժողովուրդ