«РИА Новости» գործակալությունը տեղեկացնում է, որ ԱՊՀ երկրների ղեկավարների հանդիպման ընթացքում Ռուսաստանի Դաշնության վարչապետ Վլադիմիր Պուտինը հայտարարել է, որ ԱՊՀ երկրների ապրանքաշրջանառության ակտիվությունը խոսում է այն մասին, որ այդ երկրների կառավարությունները ճիշտ են գործում:

«Համագործակցությունը ԱՊՀ-ի շրջանակներում ամրապնդվում է: Բավական է ասել, որ այս տարվա առաջին 8 ամիսների ընթացքում ապրանքաշրջանառությունն աճել է 30 տոկոսով: Դա նշանակում է, որ մենք ճիշտ ուղղությամբ ենք շարժվում»,-հայտարարել է վարչապետը:

Նա շեշտել է, որ կան բազմաթիվ խնդիրներ, որոնք պետք է քննարկել հանդիպման ընթացքում:

Արտգործնախարարությունն օրերս հերքել և «իրականությանն անհամապատասխան էր համարել» լուրը, որ Վրաստանի սահմանի վրա գտնվող հայկական մի քանի գյուղերի մոտ վրացական կողմը շաբաթներ առաջ սահմանապահ կետեր է տեղադրել, այսպես ասած՝ բլոկ-պոստեր, ինչի արդյունքում հայկական մի քանի գյուղեր` Լոռու մարզի Զիլիզա և Տաշիրի մերձակա մի քանի գյուղեր մնացել էին վրացական կողմում:

Ինչպես հայտնի է` հայ-վրացական համատեղ հանձնաժողովի Հայաստանի և Վրաստանի միջև դեռևս 90-ական թվականներից ընթանում է սահմանագծման և սահմանազատման գործընթաց, որի հայկական կողմի հանձնաժողովի նախագահն է փոխարտգործնախարար Շավարշ Քոչարյանը։ Ավելի վաղ, ԱԳՆ մամուլի ծառայությունը հարցին՝ որո՞նք են այդ գյուղերը, արդյոք ՀՀ իշխանությունների համաձայնությա՞մբ են դրանք մնացել Վրաստանի կողմում, խորհուրդ է տվել դիմել սահմանապահներին։

Իսկ ահա ԱԺ պատգամավոր Շիրակ Թորոսյանը կրկին բարձրաձայնել է այն մասին, որ հայ- վրացական սահմանում վրացի սահմանապահները նեղություն են տալիս հայ գյուղացիներին` նրանց ստիպելով իրենց հողը մշակել սահմանակետ անցնելով։ Շիրակ Թորոսյանն այսօր պարզաբանեց , որ խոսքը սահմանի այս ու այն կողմերում,բայց իրար շատ մոտ գտնվող Ջիլիզա և Չանախչի գյուղերի մասին է:

Ջավախքից ընտրված պատգամավորն ասում է. «Հայկական կողմը հակված է այդ գյուղերի միջև սահմանի անցման կետ տեղադրել, բայց վրացական կողմը այդպես էլ մերժեց տեղադրել»: Արդյունքում՝ հարևան երկու գյուղերում բարեկամական, խնամիական կապեր ունեցող հայ գյուղացիները ստիպված են միմյանց այցելելու համար շրջանցելով ճանապարհը, հարյուր կիլոմետր ճանապարհ կտրել: «Բարձրաձայնել ենք, ահազանգել ենք»,-ասում է Շիրակ Թորոսյանը, որի խոսքով՝ վրացական կողմի այս հետևողական մերժման նպատակը մեկն է` հայաթափել հայկական գյուղը` հեռահար նպատակներով: Պատգամավորն ավելացնում է, որ այսքանից հետո անհասկանալի է, թե ինչու են վրացական իշխանությունները հայկական կողմին մեղադրում` հայ դիվանագետների միջազգային ատյաններում վրացական նախագծերը չպաշտպանելու համար: «Իսկ երբ մենք ենք նրանց առաջարկում աջակցել, նրանք ասում են, թե մենք ձեզ համար Լարսի սահման ենք բացել` մոռանալով, որ դա արել են իրենց բիզնես- շահերից ելնելով»:

Հանրապետական Թորոսյանի կարծիքով` հայ-վրացական հարաբերություններում առկա կնճռոտ խնդիրները քաղաքակիրթ մեթոդներով և բանակցությունների միջոցով չեն լուծվում, միմիայն՝ վրացական իշխանությունների վարած քաղաքականության հետևանքով:

Վարչապետը «անկախությունը» կնշի Չինաստանում

Վաղը` սեպտեմբերի 19-ին, վարչապետ Տիգրան Սարգսյանի գլխավորած կառավարական պատվիրակությունը քառօրյա աշխատանքային այցով կմեկնի Չինաստանի Ժողովրդական Հանրապետություն։ Կառավարական պատվիրակության կազմում են ՀՀ կառավարության աշխատակազմի ղեկավար Դավիթ Սարգսյանը, ՀՀ էկոնոմիկայի նախարար Ներսես Երիցյանը, ՀՀ մշակույթի նախարար Հասմիկ Պողոսյանը, ՀՀ արտաքին գործերի նախարարի տեղակալ Կարինե Ղազինյանը, կառավարության և նախարարությունների աշխատակազմերի ներկայացուցիչներ, պաշտոնատար այլ անձինք։

Այցի շրջանակներում վարչապետը Պեկինում հանդիպումներ կունենա ՉԺՀ Պետական խորհրդի քարտուղարի առաջին տեղակալ Լի Կեցյանգի, ՉԺՀ արտաքին գործերի նախարարի առաջին տեղակալ Վանգ Գուանյայի ու մի շարք այլ բարձրաստիճան պաշտոնյաների հետ։ Սեպտեմբերի 20-ին ՀՀ կառավարական պատվիրակությունը կմասնակցի ՉԺՀ-ում ՀՀ դեսպանատանը Հայաստանի Անկախության տոնի առթիվ կազմակերպվելիք ընդունելությանը։ Այնուհետև սեպտեմբերի 21-ին Շանհայում վարչապետը ներկա կգտնվի «Շանհայ-Էքսպո-2010» համաշխարհային ցուցահանդեսի շրջանակներում Հայաստանի Ազգային օրվան նվիրված միջոցառումներին։ Նախատեսվում է նաև վարչապետի այցը Չենգդու քաղաքում գտնվող բազալտի մշակման ձեռնակություն և արևային մարտկոցների գործարան։

Սեպտեմբերի 23-ին վարչապետի գլխավորած կառավարական պատվիրակությունը կվերադառնա Երևան։