Հայաստանում պետք  է  անցնցում հեղափոխություն և  արմատապես նոր համակարգի ստեղծում: Այս մասին հուլիսի 22-ի ասուլիսում հայտարարել է «Հանրապետություն» կուսակցության քաղխորհրդի անդամ, ՀԱԿ ներկայացուցիչ Սմբատ Այվազյանը:

Ըստ նրա, Հայաստանի նախագահ Սերժ Սարգսյանը երկխոսությամբ իր թիմին հոգեբանորեն պատրաստում է արտահերթ ընտրությունների, և  օգոստոսի առաջին տասնօրյակում իշխանությունը պետք է հստակություն մտցնի, թե գնում է արդյո՞ք  արտահերթ ընտրությունների, թե՞ ոչ: «Սերժ Սարգսյանն ինքը դեռևս չգիտի, թե այս երկխոսության արդյունքն ինչ է լինելու, սպասում է իրավիճակային զարգացումներին: Ես նրան շատ լավ եմ ճանաչում, ինքը իրավիճակային լուծումների գնացող անձնավորություն է, շատ վաղուց, միշտ այդպես է եղել, որևէ կոնցեպտուալ հարցում առաջին կետից մինչև վերջին կետ ինքը չի նստում, չի հաշվում», ասել է ընդդիմադիր գործիչը:

Այսօր ԱԺ ԲՀԿ-ական պատգամավոր Վարդան Բոստանջյանը լրագրողներին տեղեկացրեց,  որ ՀԱԿ-իշխանություն երկխոսության արդյունքում կարող է քննարկման առարկա դառնալ նաև արտահերթ ընտրությունների անցկացման հարցը: «Եթե հիմնավորումների համալիրը բերի տվյալ հարցի այսպիսի լուծման, պետք է լուծում ստանա»,- ասաց նա:
Բոստանջյանը ՀԱԿ-ի պահանջներն օբյեկտիվ որակեց. ցանկացած քաղաքական ուժ պետք է հնարավորություն ունենա իր տեսակետները, մոտեցումները ներկայացնելու հեռուստաեթերով, միաժամանակ նշեց, որ հեռուստատեսության և մամուլի միջոցները, լավ թե վատ, լուսաբանել են ՀԱԿ-ի հանրահավաքները:

«Ի վերջո` հարցը հանգելու է Լևոն Տեր-Պետրոսյան-Սերժ Սարգսյան երկխոսությանը, իսկ մինչ այդ ՀԱԿ-իշխանություն երկխոսությունը հող կնախապատրաստի դրա համար»,- հայտարարեց նա` հավելելով, որ դա ինկուբացիոն շրջան է: Ըստ Բոստանջյանի` առաջիկա երկուշաբթի օրը պատվիրակությունների համակարգողներ Լևոն Զուրաբյանը և Դավիթ Հարությունյանը կպայմանավորվեն հաջորդ հանդիպման մասին, ինչը, ենթադրվում է, տեղի կունենա հենց հաջորդ շաբաթ:

Լրագրողներից մեկի դիտարկումը, թե նախկինում Բոստանջյանը միտք է հայտնել, որ «երկխոսության իմիտացիա կանեն», ԲՀԿ պատգամավորը պատասխանեց. «Մենք մտածում ենք երկրի մասին, իսկ դուք ինչ եք ուզում: Իբր ուժեղ ժուռնալիստ եք, ինձ ուզում եք պռոսակի մեջ գցել»: Նաև նկատեց, որ 21-րդ դարում կռիվ անելու փոխարեն պետք է փորձեն իրար հասկանալ: Ըստ բանախոսի` երկխոսության ինստիտուտը արդեն արդյունք է, և պետք է հանդուրժողական լինել:

Այսօրվա ասուլիսում ՀՀԿ խմբակցության անդամ, երկխոսության նպատակով ստեղծված կոալիցիոն աշխատանքային խմբի անդամ Գագիկ Մինասյանը հիշեցրել է Մարտի 1-ը և ընդգծել, որ եթե այդ օրերին մենք ունենայինք երկխոսելու այս հարթակը, չէինք կանգնի ծանր հետևանքների առջև՝ որ ունեցանք:

Միանգամայն ճիշտ դիտարկում է, սակայն երեք տարվա հեռվից հեշտ է գնահատականներ տալ իրադարձություններին:

Մարտի 1-ը հետևանք էր կոնկրետ հանգամանքների, որոնցից կառանձնացնեի հատկապես երկուսը:

Առաջին, այն օրերի նախագահ Ռոբերտ Քոչարյանը երկրում ստեղծել էր անտագոնիստական համակարգ, որը երաշխավորում էր նրա իշխանության պահպանումն ու վերարտադրությունը: Լևոն Տեր-Պետրոսյանը ևս քաղաքականություն վերադարձավ արմատական կարգախոսներով: Երբ ողջ ընտրարշավն ուղեկցվում է «ավազակապետություն» և «քիրվայություն» փոխադարձ որակումներով, դժվար է ռացիոնալ արդյունք ակնկալել:

Երկրորդ` կարևոր է ընտրությունների որակը. երբ տեղի են ունենում բռնություններ, լցոնումներ, քաղաքացու քվեի կեղծում, հասարակությանն այլ բան չի մնում, քան` իր իրավունքին տեր կանգնել հրապարակներում, փողոցներում: Իշխանությունն էլ այս պարագայում կանգնում է երկընտրանքի առաջ` տեղի տալ հասարակական ճնշմանը կամ կրակել:

Իշխանություն-ՀԱԿ այսօրվա երկխոսությունը չի կարող սրբագրել պատմությունը, չենք կարող հետ բերել 10 անմեղ զոհերին, վերացնել այլ հազարների ապրած տառապանքը:

Բայց երկխոսությունը կարող է կանխել նոր Մարտի 1-եր, եթե.

—         ստեղծվի նոր քաղաքական մշակույթ, որի բնութագրիչը ոչ թե հակադրությունն ու առճակատումն են, այլ` մրցակցությունն ու կոմպրոմիսը,

—         հիմք դնի համակարգային բարեփոխումների` ժողովրդավարության և ազատ շուկայական տնտեսության իրական պաշտպանվածության մեխանիզմների ստեղծման,

—         ընտրական ինստիտուտները հասցվեն այն որակին, որ քաղաքացու քվեն արժեվորված լինի, ընտրական գործընթացի ավարտին ունենանք փոքրամասնությանը հարգող մեծամասնություն և մեծամասնությանը շնորհավորող ընդդիմություն, և որ ամենակարևորն է` ընտրության արդյունքներն ընդունող հասարակություն:

Եթե ընթացիկ երկխոսությունն այս խնդիրները լուծի, ուրեմն` միանշանակ հաջողել ենք: Ու այս համատեքստում` բացարձակապես անկարևոր է, թե երբ կանցկացվեն ընտրությունները` ժամկետից  շո՞ւտ, թե՞ իրենց ժամկետին:

Ռացիոնալ երկխոսությունը Մարտի 1-երից խուսափելու միջոց է:

Այն որ Հանրապետական կուսակցության պատագամավոր, ձեռնարկատեր Մանվել Բադեյանը գոհ չէ Հայաստանում գործող կրթական համակարգից եւ մակարդակից՝ դա համարելով երկրում առկա խնդիրների հիմնական պատճառներից մեկը, կարելի է հասկանալ, բայց որ նա դրա ելքը տեսնում է իր դստերը օտար երկրում կրթություն տալով հարցը լուծելու մեջ,և մեր դպրոցները հեգնանքով «ծխական »անվանելով, ու իր կուսակցության չարած աշխատանքը ծաղրելով, արդեն իսկ վատ է. (Բադեյանը հպարտացավ, որ իր դուստրն ընդունվել է Թաիլանդի միջազգային դպրոց: Ըստ նրա, աշխարհում կան կրթական հաստատություններ, որտեղ կրթության որակն ավելի լավն է, քան Հայաստանի «ծխական» դպրոցներում):

Այսօր հրավիրած մամուլի ասուլիսի ժամանակ Բադեյանը հայտարարեց, որ եթե անգամ նախագահի աթոռին նստեցնես անձամբ Էնշտեյնին դժվար է ինչ-որ բան ուղղել մի երկրում, որտեղ կրթության այս մակարդակն է.«Հայաստանում կրթական ցածր ցենզը խանգարում է առողջ ազգի եւ ամուր պետականության ձեւավորմանը։ Բոլոր խնդիրները գալիս են հենց այդտեղից»։ Նա համոզված է, որ հանդիպումների ժամանակ հենց այս թեման պետք է քննարկեն իշխանությունն ու ընդդիմությունը։

Պետք է ամեն ինչ անել ՀԱԿ-իշխանություն երկխոսության հաջող ավարտի համար£  Հայտարարելով այս մասին հուլիսի 21-ի ասուլիսում, ՀՀ Ազգային Ժողովի ՙՀՀԿ՚ խմբակցության անդամ Գագիկ Մինասյանը նշեց, որ երկխոսող կողմերը պատրաստակամ են քայլեր անելու ի նպաստ ժողովրդի և այդ ճանապարհով գնալու առաջ, այլ ոչ` հակամարտության£ ՙԵրկխոսության նպատակը ժողովրդի և պետության առջև ծառացած խնդիրների արդյունավետ լուծումն է՚,- ասաց ՀՀԿ-ի ներկայացուցիչը, ով ընդգրկված է ՀԱԿ-ի հետ բանակցող կոալիցիոն ուժերը ներկայացնող պատվիրակության կազմում:

Անդրադառնալով  երկխոսության շուրջ ծավալված քննարկումներին, Գ. Մինասյանը նշեց, որ ցանկացած ՙլավ գործի՚ իրականացման ժամանակ հասարակությունը բաժանվում է  2 խմբի` լավատեսների և վատատեսների, և անհրաժեշտ է այնպես անել, որ հասարակության վատատես հատվածը փոխի իր դիրքորոշումը£

Գ.Մինասյանը հայտնեց, որ իրենք նպատակ ունեն վեր հանել կարևոր հարցերը: ՙՄենք միայն երկխոսելու ենք, իսկ հարցերը կլուծվեն համապատասխան լիազորություն ունեցող պետական կառույցներում՚- պարզաբանեց նա: Ըստ նրա, երկխոսության ընթացքում բոլոր հրատապ խնդիրներն էլ քննարկվելու են: ՙԵթե դու վստահ ես քո դիրքորոշման և տեսակետի մեջ և քեզ այդտեղ ամուր ես զգում, ապա պատճառ չեմ տեսնում այդ խնդիրները չքննարկելու՚,- ասաց նա:

Խոսելով երկխոսության  ընթացքի մասին, Գ.Մինասյանը նշեց, որ երկխոսության ավարտի  կոնկրետ ժամկետ նախանշված չէ: ՙԴա կախված է հարցին մոտեցման լրջությունից և վերջնական արդյունքից: Գերակա խնդիր է լավ արդյունքը՚,- ասաց նա£

Հուլիսի 20-ին ՀՀ Առաջին նախագահ Լևոն Տեր-Պետրոսյանը հանդիպել է ԵԽԽՎ Հայաստանի հարցով համազեկուցող Ալեքս Ֆիշերին, Հայաստանում ԵԽ Գլխավոր քարտուղարի ներկայացուցիչ Սիլվիա Զեհեին, ԵԽԽՎ Մոնիտորինգային հանձնաժողովի քարտուղար Բաս Քլայնին:

Հանդիպման ընթացքում Առաջին նախագահի խնդրանքով համազեկուցողը ներկայացրեց ԵԽԽՎ սեպտեմբերյան նստաշրջանի` Հայաստանին վերաբերող քննարկվելիք խնդիրները և Հայաստանում տեղի ունեցող իրադարձությունների վերաբերյալ գնահատականները:

Առաջին նախագահը շնորհակալություն հայտնեց համազեկուցողներին`  մարտի 1-ի ոճրագործության բացահայտմանն ուղղված նրանց ջանքերի համար և կարևորեց միջազգային հանրության հետևողական ուշադրությունը` սպանությունների բացահայտման հարցում:

Պատվիրակության խնդրանքով նախագահ Տեր-Պետրոսյանը ներկայացրեց նաև ներքաղաքական գործընթացները Հայաստանում, մասնավորապես Հայաստանում ժողովրդավարության հաստատման նպատակով իշխանության և ընդդիմության միջև սկսված երկխոսության ընթացքը: Ներկայացվեցին նաև արտահերթ նախագահական և խորհրդարանական ընտրությունների պահանջը, ազատ, արդար և օրինական ընտրություններով Հայաստանում լեգիտիմ իշխանության ձևավորման մեխանիզմները, դրա հետ կապված` ընտրական մեխանիզմների բարելավումը: Քննարկվեց նաև կեղծիքների մեխանիզմի և Հայաստանում հաստատված քրեապետական համակարգի փոխկապակցվածությունը:

Զրույցի ընթացքում Կոնգրեսի ներկայացուցիչները բարձրացրեցին նաև միջազգային դիտորդական առաքելության` ընտրությունների դիտարկման ներկա ձևերի անարդյունավետությունը և 2000 հոգանոց առաքելության ուղարկման ինչպես նաև մոնիտորինգի արդյունավետության բարձրացման անհրաժեշտությունը: Կարևորվեց նաև Հայաստանում հեռուստատեթերի նկատմամբ իշխանության տոտալ վերահսկողության բացառման անհրաժեշտությունը և հեռուստատեսության անկախության ապահովման անհրաժեշտությունը:

Հանդիպմանը մասնակցել են Հայ Ազգային Կոնգրեսի կենտրոնական գրասենյակի ներկայացուցիչներ Լևոն Զուրաբյանը, Դավիթ Շահնազարյանը, Ավետիս Ավագյանը, ինչպես նաև ԵԽԽՎ-ում Հայ Ազգային Կոնգրեսի ներկայացուցիչ Արման Գրիգորյանը:

ԱԺ «Ժառնագություն» խմբակցության պատգամավորները ԵԽԽՎ Հայաստանի հարոցով համազեկուցող Ակսել Ֆիշերի հետ այսօր` հուլիսի 20-ին տեղի ունեցած հանդիպման մասին խոսել է հանդիպման մասնակից  Զարուհի Փոստանջյանը: Ըստ նրա  համազեկուցողին են ներկայացրել հարցերի լայն շրջանակ` սկսած լրատվամիջոցների դեմ ներկայացված դատական հայցերից, խոսքի ազատությունից մինչեւ «Մարտի 1» :

«Ժառանգության» պատգամավորները խոսելով մարտի 1-ի բացահայտման մասին նշել են, որ այդ ողբերգության կրկնությունը բացառելու համար անհրաժեշտ է, որ Հայաստանը Հաագայի դատարանին դիմելու հնարավորություն ունենա:

«Նշեցինք, որ նախկին կեղծարարի համբավ ունեցողներից ձեւավորված ԿԸՀ-ն լավ մեկնարկ չէ արդար ընտրությունների համար: Նշեցինք նաեւ, որ գործող դատախազը, որը գործ սարքելու համբավ ունի, դեռեւս շարունակում է պաշտոնավարել, իսկ Հատուկ քննչական ծառայության ղեկավարը, ով տարիներ շարունակ զբաղված է եղել կեղծիքներ կոծկելով` ի վիճակի չի լինի բացահայտել նաեւ «մարտի 1-ը»:

Հետեւաբար`այս տեսակ պաշտոնյաների առկայության եւ խոսքի ազատության առկա սահմանափակումների պայմաններում մենք չենք կարող ակնկալել արդար, թափանցիկ, հավասար պայմաններով ընտրությունների անցկացում, անկախ այն բանից, թե ինչպիսի Ընտրական օրենսգիրք է ընդունվել»,-հայտարարեց Փոստանջյանը` հավելելով, որ նոր օրենսգրքում չեն ներառվել  ընդդիմության կողմից արված հիմնական առաջարկները:

Հուլիսի 20-ին Հայաստան ժամանած ԵԽԽՎ հարցով համազեկուցող Ակսել Ֆիշերին հանդիպել են «Ժառանգություն»  խմբակցության ղեկավար Ստյոպա Սաֆարյանը, խմբակցության քարտուղար Լարիսա Ալավերդյանը եւ պատգամավոր Զարուհի Փոստանջյանը:

Զ. Փոստանջյանն ասաց նաեւ, որ բարձրացված հարցերի վերաբերյալ համազեկուցողներն իրենց կարծիքը կարտահայտեն սեպտեմբերին հրապարակվելիք զեկույցում: Այդ զեկույցի հիման վրա ԵԽԽՎ-ն Հայաստանի վերաբերյալ կընդունի հերթական բանաձեւը:

ՀԱԿ-ը երեկ հանդես է եկել հայտարարությամբ՝ հստակեցնելով իշխանության հետ երկխոսության հեռանկարի իր մոտեցումը: Հայտարարությունը բաղկացած է հինգ կետից, ըստ այդմ՝ նպատակահարմար է դրանց անդրադառնալ ըստ հերթականության:

«Ի գիտություն ընդունելով Հայ Ազգային Կոնգրես-իշխանություն բանակցություններում իշխանության պատվիրակության համակարգող Դավիթ Հարությունյանի պաշտոնական հայտարարությունն այն մասին, որ իր ղեկավարած պատվիրակությունը, լինելով քաղաքական կոալիցիայի որոշմամբ ստեղծված մարմին, ներկայացնում է Գործադիր իշխանությունը, խորհրդարանական մեծամասնությունը և անձամբ Սերժ Սարգսյանին, Հայ Ազգային Կոնգրեսը համարում է, որ երկխոսությունը կարելի է շարունակել այս ձևաչափով և պատրաստ է նոր հանդիպման»,- ասված է այս հայտարարության մեջ։

Այսպիսով, կարող ենք արձանագրել, որ երկխոսության հարցում իշխանության և ՀԱԿ-ի միջև առկա ձևաչափային հակասությունները վերացված են, ըստ այդմ՝ որևէ խնդիր չկա հուլիսի 18-ին մեկնարկած գործընթացը շարունակելու համար:

«Ինչպես նշել էինք մեր նախորդ հայտարարության մեջ, հետագա հանդիպումները պետք է կայանան չեզոք վայրում»,- իր նախորդ հայտարությունն է հիշեցնում ՀԱԿ-ը:

Հանդիպման վայրն, ըստ իս, այնքան էլ էական չէ, սակայն Հանրային խորհուրդն իսկապես դրական ասոցիացիաներ չի առաջացնում, և հանդիպումները կարելի է կազմակերպել այլ վայրում:

«Հանդիպումները կամ պետք է հեռարձակվեն ուղիղ եթերով, կամ էլ` կողմերի քարոզչական հավասար հնարավորությունները ապահովելու նպատակով Կոնգրեսի պատվիրակությանը յուրաքանչյուր հանդիպումից հետո պետք է Հանրային հեռուստաընկերությամբ առնվազն կես ժամ ուղիղ եթեր տրամադրվի՝ իր տեսակետները հասարակությանը ներկայացնելու համար»,- նոր պահանջ է ձևակերպում ՀԱԿ-ը։

Հանդիպումների կամ բանակցությունների ուղիղ եթերով հեռարձակելու պահանջն անհեթեթություն է մի քանի պատճառով:

Նախ, պահանջի հեղինակներին զուր է թվում, թե այս իրադարձությունը հասարակության այդքան լայն շերտերի հետաքրքրում է: Երկրորդ, այս հանդիպումների ուղիղ հեռարձակմամբ՝ Հանրայինը կխախտի օրենսդրությունը՝ զբաղվելով կոալիցիայի անդամ կուսակցությունների և ՀԱԿ-ի քարոզչությամբ, ինչն օրենքի խախտում է, մանավանդ՝ մոտենում են Ազգային ժողովի ընտրությունները:

ՀԱԿ-ը կարող էր պահանջել, որպեսզի, օրինակ, հանդիպումների մասին ԶԼՄ-ներին տրամադրվի երկուստեք համաձայնեցված հաղորդագրություն՝ միակողմանի լուսաբանումը բացառելու համար:

Յուրաքանչյուր քաղաքական ուժ՝ ոչ թե Հանրայինով, այլ՝ մասնավոր հեռուստաընկերություններով կարող է ունենալ երեսուն րոպե կամ ավելի շատ եթերաժամ՝ կոմերցիոն հիմունքներով: Նույնը վերաբերում է ՀԱԿ հայտարարության չորրորդ կետին. պետք է վերացնել Հանրային հեռուստաընկերությամբ և մյուս հեռուստաալիքներով Հայ Ազգային Կոնգրեսի և մյուս քաղաքական ուժերի հանրահավաքների մասին իրազեկող նյութերի հեռարձակման արգելքը։

«Պետք է դադարեցնել Կոնգրեսի հանրահավաքներից առաջ իրավապահ մարմինների կողմից բնակչության ահաբեկումը, տարաբնույթ խոչընդոտների հարուցումը, մասնավորապես հանրային և այլ տրանսպորտային միջոցների աշխատանքի կազմալուծումը»,- հայտարարության վերջում պահանջում է ՀԱԿ-ը։

Վերջին հանրահավաքների պարագայում, կարծես թե, այս խոչընդոտները վերացվել են, հետևաբար՝ այնքան էլ ադեկվատ չէ այս կետի ներառումը հայտարարության տեքստում:

Այսօր ՀՀ կառավարությունում օրվա երկրորդ կեսին շարունակվել է ՀՀ պետական կառավարման մարմինների 2011 թ. 1-ին կիսամյակի գնահատված կատարողականների, գործունեության միջոցառումների ծրագրի և գերակա խնդրիների կատարման մասին հաշվետվությունների քննարկումը:

Մինչ հաշվետվություններին անդրադառնալը վարչապետ Սարգսյանը նշել է, որ անդրադարձ է արվելու նախարարությունների` ՀՀ կառավարության 2011թ. գործունեության ծրագրից բխող գերակա խնդիրներին, նախարարների անձնական հսկողության տակ գտնվող  հարցերին և տարվա կտրվածքով գնահատականներին` գերակա խնդիրների և միջոցառումների ծրագրի իրականացման գործում ռիսկերի առկայության առումով:

2011 թ. առաջին կիսամյակի ընթացքում կատարված աշխատանքների ու դրանց արդյունքների վերաբերյալ հաշվետվություններով հանդես են եկել ՀՀ առողջապահության, քաղաքաշինության, տրանսպորտի և կապի, բնապահպանության և էներգետիկայի և բնական պաշարների նախարարները: Նրանք ներկայացրել են ՀՀ կառավարության 2011 թ. գործունեության ծրագրից բխող գերակա խնդիրներն ու դրանց լուծման ուղղությամբ իրականացված միջոցառումների արդյունքները:

Մասնավորապես, առողջապահության նախարար Հարություն Քուշկյանը զեկուցել է 2011 թ. գերակա խնդիրների կատարման ընթացքի մասին: Առողջապահության նախարարության 2011 թ. գերակա խնդիրներն են` 2011թ. համավճարի համակարգի ներդրում անհետաձգելի և գինեկոլոգիական բժշկական օգնության և սպասարկման բնագավառներում, առողջության առաջնային պահպանման օղակում ըստ կատարողականի (խրախուսական) ֆինանսավորման կարգի հաստատում և ներդրում, երեխայի առողջության պետական հավաստագրի համակարգի ներդրման ծրագրի մշակում և իրականացում, շտապ բժշկական օգնության և սպասարկման հայեցակարգի ներդրում:

Քաղաքաշինության նախարար Վարդան Վարդանյանը մանրամասներ է ներկայացրել 2011 թ. գերակա խնդիրների իրականացման վերաբերյալ, որոնք են` բնակարանային ապահովումը` աղետի գոտու բնակավայրերում իրականացվող բնակարանային շինարարության ծրագրի շրջանակներում կառուցված բնակարանների (բնակելի տների) հատկացման միջոցով, քաղաքաշինության գործունեության հատուկ կարգավորման բնագավառի օրենսդրության կատարելագործումը և ՀՀ բնակավայրերում քաղաքաշինական գործունեության հատուկ կարգավորումը, ՀՀ տարածական պլանավորման համակարգի բարեփոխումը և քաղաքաշինության ոլորտում համայնքների ինստիտուցիոնալ կարողությունների զարգացումը, ՀՀ տարածքում ինքնակամ շինարարության հիմնախնդիրների լուծման միջոցառումների իրագործումը, քաղաքաշինական էլեկտրոնային թույլտվությունների տրամադրման մեխանիզմների կանոնակարգումը, Համաշխարհային բանկի խմբի «Գործարարությամբ զբաղվելը» (Doing Business) վարկանիշային դասակարգման սանդղակում Հայաստանի դիրքի էական բարելավումը:

Տրանսպորտի և կապի նախարար Մանուկ Վարդանյանն անդրադարձել է Վանաձոր-Ֆիոլետովո նոր երկաթգծի նախագծման աշխատանքների և Հյուսիս-հարավ նոր երկաթգծի տեխնիկատնտեսական հիմնավորման աշխատանքների կազմակերպման, Հյուսիս-հարավ ճանապարհային միջանցքի 1-ին, 2-րդ և 3-րդ Տրանշերի շինարարական աշխատանքների նախապատրաստման և կազմակերպման, ինչպես նաև փոստի կառավարման նոր մոդելի ներդրման նպատակով իրականացված միջոցառումներին:

Սևանա լճի ջրի մակարդակի բարձրացման հետևանքով ջրածածկման ենթակա տարածքներում վնասակար ազդեցության կանխարգելման միջոցառումների իրականացման, ՀՀ Շիրակի մարզի Աշոցքի տարածաշրջանում պահպանվող տարածքների ստեղծման, Սևանա լճում էնդեմիկ ձկնատեսակների պոպուլյացիայի համալրման հարցերի մասին զեկուցումով հանդես է եկել բնապահպանության նախարար Արամ Հարությունյանը:

Էներգետիկայի և բնական պաշարների նախարար Արմեն Մովսիսյանը, խոսելով իր ղեկավարած նախարարության գերակայությունների մասին, ներկայացրել է էլեկտրաէներգիա արտադրող հզորությունների ստեղծման և վերազինման, տարածաշրջանային ինտեգրացման և էլեկտրաէնեգետիկական համակարգի տեխնիկական վերազինման, ատոմային էնեգետիկայի զարգացման, ինչպես նաև Իրան-Հայաստան նավթամթերքատար խողովակաշարի և նավթամթերքների տերմինալի կառուցման ուղղությամբ ձեռնարկված քայլերը:

Հաշվետվությունները լսելուց և համապատասխան հանձնարարականներ տալուց հետո կառավարության ղեկավարն անդրադարձել է 2011 թ. առաջին կիսամյակի ընթացքում ըստ նախարարությունների տրված հանձնարարականների և աշխատանքների ֆինանսական կատարողականներին, ինչպես նաև աշխատակազմերի ընդհանուր գնահատականին: Նախարարները զեկուցել են տրված հանձնարարականների ժամանակին չկատարման և հետաձգումների պատճառների մասին: Կառավարության անդամների ուշադրությունը հրավիրելով չկատարված միջոցառումների վրա` վարչապետը հանձնարարել է դրանք ավարտին հասցնել հնարավորինս սեղմ ժամկետում:

«Ես էդքան լավատես չեմ, որ վաղը իշխանություններն ասելու են՝ եկեք արտահերթ ընտրություններ անենք։ Իշխանությունները փորձելու են ձգձգել։ Հայտնի կինոն՝ «Կովկասի գերուհին», հիշում եք ,չէ՞, նա կխփի, կփորձի քացի տալ… էդ ամեն ինչը լինելու է…»,- այսօր «Ազգ» օրաթերթի գլխավոր խմբագիր Հակոբ Ավետիքյանի հետ բանավեճում հայտարարեց հրապարակախոս Տիգրան Պասկևիչյանը: Հետո ասաց թե`«Նույն Գարեգին Ազարյանը արտահերթ ընտրություններն անցկացնելու է շատ ավելի վատ, քան հերթականը, որովհետև որևէ մեկը նրան երաշխիք չի տալու, որ իր արած կեղծիքների համար ինքը չի պատժվելու:

«ՀԱԿ–ը բոլոր նրանց, ովքեր կարող էին տարբեր դերակատարում ունենալ ընդդիմության ներսում կամ դրսից, դրանք բոլորն ահավոր կերպով վարկաբեկիչ արշավի ենթարկեց»,– Իր հերթին արձագանքեց Ավետիքյանը:

«Ո՞վ ստիպեց Րաֆֆի Հովհաննիսյանին սափրել բեղերը, գնալ ու առանց պահանջների նստել հացադուլի։ Իշխանությունները շատ մեծ սիրով այցելում էին Րաֆֆի Հովհաննիսյանին, տոն էին տալիս, էն դեպքում, երբ որ ՀԱԿ–ը էդ ժամանակ վերելքի վրա էր։ ՀԱ՞Կ–ը ստիպեց «Ժառանգությանը» հիմար քայլերի գնալ»,– հակադարձեց Պասկևիչյանը:

«ՀԱԿ–ը՝ իրեն ծառայող, սպասարկող մամուլի միջոցով անընդհատ ընդդիմության յուրաքանչյուր ճիչ, շարժում, միտք, քիլլերությամբ սպանեց, փորձեց սպանել»,– ասաց Ավետիքյանը:

Պասկևիչյանն էլ շնորհակալություն հայտնեց խմբագրին «հաճոյախոսության» համար, իր հերթին նրան ակնարկելով. «Դուք ինձ քիլլեր եք անվանում, բայց երբ որ ես իմ շուրջը տեսնում եմ հիմարություն, իմ պարտքն եմ համարում գրել դրա մասին»:

Հ.Գ.Երցուկը քաղաքականության մեջ հոգնեցնում է, ի վերջո կլինեն թե չեն լինի արտահերթ ընտրություններ, կամ կա՞ դրա պահանջը, կերևա մոտ ժամանակներս: Եթե ժողովուրդը վստահ լինի,թե դա իր համար ինչ որ բան կփոխի, միգուցե ոգևորվի, բայց նա վստահ է, որ ցանկացած դեպքում իր համար էական տեղաշարժ չի լինելու: