Այսօր  ասուլիսի ընթացքում ԱԺ ՀՀԿ խմբակցության ղեկավար Գալուստ Սահակյանը, խոսելով ՀԱԿ-ի նստացույցի մասին, ասաց. «Ես երբեք չէի  մտածի, որ հանրահավաքներ կանեն զուգարանների համար: Անհարմար է մարդկանց հավաքել և դրա համար նստացույց անել,- ՀԱԿ-ը պայքարում է, որ մենք իրենց զուգարան տանք: Երբ լրագրողները ինձ հարցին ՀԱԿ-ի մասին, ես լուրջ չընդունեցի և  կատակով ասացի, որ ՀԱԿ-ին գարշոկներ պետք է տալ »:

Իսկ թե ինչի՞ են փակված մարզերից Երևան մտնող ճանապարհները, պատգամավորը նշեց, որ դա բացասական երևույթ է համարում, սակայն ինքն ստույգ տեղեկություններ չունի դրա հետ կապված. «Երբեք չի կարելի ժողովրդին զրկել իր իրավունքից, դա դատապարտելի է»,- հավելեց Սահակյանը:

Խոսելով երեկվա Լևոն Տեր-Պետրոսյանի մեծ ասուլիսից` ՀՀԿ խմբակցության ղեկավարը  ասաց. «Երևի ժողովդրից ներողություն է խնդրել` ասելով, որ անիծվիի այն օրը, երբ ինքը քաղաքական դաշտ մտավ»:

Հարցին, թե հնարավո՞ր է արդյոք, որ ՀՀ երկրորդ նախագահ Ռոբերտ Քոչարյանը վերադառնա քաղաքականություն և նախագահական ընտրություններում առաջադրի իր թեկնածությունը, Գալուստ Սահակյանը պատասխանեց.«Դա կախված է իրենից: Այսօր ես Ռոբերտ Քոչարյանի մոտ ակտիվություն չեմ նկատել, որը թույլ կտա ասել, որ նա կմասնակցի նախագահական ընտրություններին: Եվ հետո, ես հո նրա մոտից չեմ գալիս, որ ասեմ`կառաջադրվի, թե ոչ: Դուք լրագրողներդ, միշտ հարցն այնպես եք տալիս, ասես Քոչարյանը բոբո լինի, մենք նրա ավանդը շատ բարձր ենք գնահատում և չգիտենք, թե վաղը ինչ կլինի»:

Նա բացառեց արտահերթ ընտրությունների անցկացումը, իսկ հերթականի ժամանակ, իր կարծիքով խորհրդարան կանցնեն ՀՀԿ-ն, ԲՀԿ-ն, ՕԵԿ-ը և ՀՅԴ-ն’ միևնույն ժամանակ չբացառելով նաև ՀԱԿ-ին:

«Ժառանգության» մասին էլ դժվարացավ որևէ բան ասել:

Այսօր` լրագրողների հետ հանդիպման ժամանակ, Լարիսա Ալավերդյանը նշեց, որ «Ժառանգությունը» դեռ չի քննարկել 2012 թ. բյուջեի նախագիծը , սակայն զարգացման միտում և որակական փոփոխություն չեն լինի. ամեն ինչ արվել է, որ բյուջեն իրատեսական լինի և շեղումները լինեն մինիմալ. «Վերցված են համեստագույն միջոցներով պարտավորություններ, քաղաքականացված պարտավորություններ, երևի՝ ընտրությունների հետ կապված։ Սոցիալական է միշտ կոչվում այն բյուջեն, որը անմիջապես անդրադառնում է քաղաքացու կենսամակարդակի վրա, այնտեղ է սոցիալական, երբ տնտեսությունը աշխատում է որակ ապահովելու ուղղությամբ»:

Հարցին, թե Հայաստանը կարո՞ղ է զարգացման բյուջե ունենալ հարցին պատգամավորը պատասխանել է. «Վարչապետը ժամանակին ասել է, որ չի բացառվում , որ ճգնաժամը օգնի մեզ նոր ելքեր և նոր գաղափարներ գտնել տնտեսության զարգացման համար: Այո, հնարավոր կլիներ, բայց քաղաքական կամքի բացակայությունն է ի հայտ գալիս։ Ոչ երկրորդ նախագահի ժամանակ տեղի ունեցավ դիվերսիֆիկացումը, տնտեսության որակյալ զարգացումը, ոչ՝ հիմա: Մենք ունենք մոնոպոլիզացված տնտեսություն, որը վտանգավոր է փոքր պետությունների համար: Ճնշումը, որ գնում է միջին և փոքր բիզնեսի վրա, ծնում է աղքատություն, որը, ասես, գնում ու հետ է գալիս։ Մի քիչ էլ, որ խորանա այդ ճնշումը, աղքատությունը ավելի կխորանա: Աղքատության մշակույթ կա Հայաստանում, հիմա աղքատ լինելը ձեռնտու է դարձել, այն մարդը, որ չպիտի փարոս ստանա, խաբեությամբ գնում է նպաստ ստանալու։ Դրա հիմքում զարգացում չապահովող բյուջեն է»:

ԲՀԿ նախագահ Գ. Ծառուկյանը ծավալուն հարցազրույց է տվել հայաստանյան կայքերից մեկին, որտեղ պատասխանել է հասարակությանը հուզող բազմաթիվ հարցերի:

— Պարոն Ծառուկյան, Единая Россия -ի համագումարին Ձեր մասնակցությունը և Մոսկվայում ունեցած հանդիպումները տարբեր մեկնաբանությունների և կանխատեսումների տեղիք են տվել: Ինչպես կբնութագրեք Դուք Ձեր հարաբերությունները ռուսական քաղաքական վերնախավի հետ:

— Ես` որպես ԲՀԿ նախագահ, մասնակցում էի Единая Россия–ի համագումարին ռուսական կողմի հրավերով, և այստեղ ոչ մի զարմանալի բան չկար, որովհետև Դուք գիտեք, որ ԲՀԿ-ի հիմնական գործընկեր – կուսակցությունը Ռուսաստանում հենց Единая Россия–ն է: Եվ ես կարծում եմ, որ մեր երկու կուսակցությունների լավ հարաբերությունները միմիայն կնպաստեն մեր երկու երկրների հարաբերությունների է’լ ավելի զարգացմանը:

— Իսկ ինչ եք կարծում, ինչո՞վ էր պայմանավորված Պուտինի վերադարձը, և ի՞նչ ազդեցություն դա կունենա Հայաստանի վրա:

— Ռուսական քաղաքական վերնախավի համար դա անսպասելի իրադարձություն չէր, քանի որ բոլորն են հասկանում, որ հենց նրա ժամանակ էր, որ Ռուսաստանը դուրս եկավ 90-ականներից եկած խորը ճգնաժամից, և կարողացավ կանգնեցնել չեչենական պատերազմը` կայունությունը վերականգնելով այդ երկրում: Ինչ վերաբերում է մեզ, ապա ես կարծում եմ, որ նրա վերադարձը միմիայն դրական ազդեցություն կունենա մեզ համար, թե հայ – ռուսական հարաբերությունների զարգացման, և թե ղարաբաղյան խնդրի կարգավորման տեսակետներից:

— Շատերը Պուտինի վերադարձի հետ կապում են նաև Ռոբերտ Քոչարյանի հնարավոր վերադարձը մեծ քաղաքականություն, որը, ի դեպ, չբացառեց նաև 2-րդ նախագահը` իր վերջին հարցազրույցում: Ի՞նչ կասեք այդ մասին:

— Ես զարմանում եմ, որ անկախության 20-րդ տարեդարձը նշող հասարակությունը այդպիսի պարզունակ հետևություններ է անում: Կարծում եմ, որ ժամանակն է, որ մենք հոգեբանորեն էլ մեզ անկախ զգանք, հակառակ դեպքում լիարժեք պետականություն չենք կառուցի: Իսկ ինչ վերաբերում է 2-րդ նախագահի հնարավոր վերադարձին, ապա նա դրա բարոյական և քաղաքական իրավունքն ամբողջովին ունի:

— Ինչպիսի՞ն են Ձեր հարաբերությունները գործող նախագահի հետ:

— Շատ նորմալ և աշխատանքային:

— Ինչպիսի՞ն է Ձեր վերաբերմունքը այն երկխոսության գործընթացին, որը գնում է ՀԱԿ-ի և իշխանությունների միջև:

— Ես կարծում եմ, որ երկիրը ցնցումներից զերծ պետք է պահել: Ես ողջունում եմ և գործող նախագահին, և 1-ին նախագահին, որ երկրի կայունությունը կարողացան վեր դասել ամեն ինչից, և մեզ մոտ չկրկնվեցին ոչ ադրբեջանական, ոչ էլ վրացական սցենարները: Հիշենք, թե այդ երկրները երբ կորցրեցին իրենց տարածքները…

— Պարոն Ծառուկյան, երկրում առկա է մի տեսակ հոռետեսական մթնոլորտ, շատերը հեռանում են երկրից, մյուսները նյարդայնացած են, և այս ամենը տեղափոխվում է քաղաքական դաշտ: Ինչպե՞ս կարելի է փոխել այս իրավիճակը:

— Դուք ճիշտ նկատեցիք, մենք դարձել ենք նյարդային և դառնացած ազգ: Բնականաբար, այս վիճակը պետք է փոխել: Պետք է փոխել վիճակը մեր քաղաքական, հասարակական դաշտում: Ատելությունն իրար նկատմամբ պետք է փոխարինվի հանդուրժողականությամբ և հարգանքով միմյանց նկատմամբ: Մենք բոլորս պետք է հասկանանք, որ առանց համախմբման չենք կարող այս վիճակից դուրս գալ: 2012 թվականը պետք է դառնա Հայաստանի համար լավատեսության, իրար նկատմաբ հարգանքի, բարգավաճման տարի:

— Իսկ ի՞նչ է պետք դրա համար:

— Շատ քիչ բան, մեր պրոբլեմների 20-25%-ը գտնվում է մակերեսի վրա: Ուղղակի պետք է տնտեսությունը զարգացնել ոչ թե պարզունակ «գրքային» սխեմաներով, այլ իրական կյանքի փորձը հաշվի առնելով: Մարդիկ այսօր վատ են ապրում, էլ ինչու ենք մենք լրացուցիչ արհեստականորեն վատթարացնում նրանց պայմանները: Հայ մարդը պետք է կարողանա ընտանիք կազմել, տուն պահել: Հայերը ամբողջ աշխարհին ապացուցել են, որ գործունյա են: Ամերիկայում, Ռուսաստանում, Եվրոպայում հայերը հիմնականում գործարար են, աշխատասեր: Մենք էլ Հայաստանում այնպիսի պայմաններ ստեղծենք, որ մարդը մնա Հայաստանում, աշխատի, ոչ թե այնքան նեղենք, որ թողնի նեղացած գնա երկրից: Դրա համար անհրաժեշտ է մեր աշխատող մարդկանց ձեռքերն ազատ թողնել: Պետությունն այսօր դեռ շատ բան չի կարող անել, որովհետև այդքան հարուստ չէ: Սակայն գոնե պետք է չխանգարի նաև կրպակի տիրոջը, խանութի առևտրականին, փոքր արտադրամաս ունեցողին, որ նրանք ոտքի կանգնեն, կայանան և իրենց հարկերով հարստացնեն նաև պետությունը: Իսկ եթե ձու բերող հավին մորթենք, այլևս ձու էլ չի լինի: Մի՞թե ակնհայտ չէ այս ամենը:

— Ի ՞նչ եք անում Դուք` մարդկանց կյանքը թեթևացնելու համար:

— Նախ ասեմ, որ սա մեկ մարդու խնդիրը չէ, մարդկանց կյանքի որակը կրկին փոխելու համար պետական մոտեցում է պահանջվում: Իսկ իմ կողմից նշեմ, որ ես անընդհատ հանդիպումների և շփման մեջ եմ հասարակության ամենալայն շերտերի հետ: Դրանք չափազանց կարևոր և հեռանկարային հանդիպումներ են: Հաշվի առնելով այսօրվա սոցիալական ծանր իրավիճակը` ես մեծացրել եմ աջակցությունս «Ծառուկյան» բարեգործական հիմնադրամին, ընդլայնել ենք ծրագրերը, եւ գոնե այդպես փորձում ենք օգնել մարդկանց:

— Ինչպե՞ս եք պատրաստվում գալիք խորհրդարանական ընտրություններին:

— Ես նշեցի, որ մեր երկրում վիճակը այնպիսին է, որ ոչ ոք միայնակ չի կարող Հայաստանը դուրս բերել այս իրավճակից: Մեզ օդի ու ջրի պես անհրաժեշտ է ոչ թե մեխանիկական, այլ բովանդակային համախմբում, և այդ իմաստով մենք չպետք է փնտրենք ներքին թշնամիներ: Կոնկրետ «Բարգավաճ Հայաստանն» իր առջեւ խնդիր է դրել այդ համախմբողի դերը ստանձնել, որպեսզի 2012 թվականին մենք իրավամբ կարողանանք դնել նոր Հայաստանի բարգավաճման հիմքը:

— Գալիք ընտրություններին Բարգավաճ Հայաստանը պատրաստվում է միայնա՞կ մասնակցել, թե՞ կոալիցիայի միասնական ցուցակով:

— Ես մի քանի անգամ նշել եմ, որ «Բարգավաճ Հայաստանը» միայնակ է գնալու ընտրություններին` ձեւավորելով սեփական ցուցակը: Մյուս կողմից, ես կրկին ուզում եմ շեշտել, որ այս վիճակից դուրս գալու համար երկրին անհրաժեշտ է ավելի մեծ կոնսոլիդացիա, համախմբում, քան նույնիսկ այսօրվա կոալիցիան է: Հավատացեք, որ երկիրը այս վիճակից դուրս բերելու համար մենք պետք է ստեղծենք այնպիսի մթնոլորտ, որտեղ չեն լինի թշնամիներ և հակառակորդներ: Եվ կոնկրետ ես համոզված եմ, որ սա է իրականությունը և շարժվելու եմ հենց այդ սկզբունքով:

— Ո՞ւմ է պաշտպանելու ԲՀԿ-ն նախագահական ընտրություններում:

— Սկզբում խորհրդարանական ընտրություններն են: Դա հիշեք: Ի դեպ, ես այս հարցին, ամիսներ առաջ կեսկատակ- կեսլուրջ պատասխանել եմ` «այդ մասին հաջորդ դասին». Պատասխանը մնում է ուժի մեջ:

Ազգային ժողովում, այսօր` հոկտեմբերի 3-ին, ժամը 18:00-ին, ՀԱԿ-ի հետ երկխոսության իշխանական կոալիցիայի պատվիրակության ներկայացուցիչները հավաքվելու են եւ քննարկեն երկխոսությունը շարունակելու ՀԱԿ-ի առաջարկը: Այս մասին, ԱԺ-ում, լրագրողնեևրի հետ զրույցում ասաց ՀՀԿ-ական պատգամավոր, ՀԱԿ-ի հետ երկխոսության կոալիցիայի պատվիրակության անդամ Գագիկ Մինասյանը:

Հարցին թե ինչպիսի՞ն է տրամադրվածությունը, նա դժվարացել է պատասխանել: «Մենք կքննարկենք խնդիրը բոլոր կողմերից, որը կախված է տարբեր գործոններից: Ուստի խնդրին մոտենալու ենք համակողմանիորեն »,-նշել է նա:

Այսօր` լրագորղների հետ հանդիպման ժամանակ, ԱԻՄ նախագահ Պարույր Հայրիկյանը  ասաց, որ. «Ես այսօր չեմ տեսնում այն նպատակը, հանուն որի պետք է համախմբվել ՀԱԿ-ի շուրջ ։Շատերն ասում են՝ լեգիտիմ իշխանություն ձևավորելու համար: Իհարկե, ճանապարհն է որոշում էությունը, բայց մի մոռացեք, որ Հիտլերն էլ օրինական ճանապարհով ընտրվեց»:

Հայրիկյանը կարևորում է, թե ինչ առաջարկով է հանդես գալիս ընդդիմությունը, որի շուրջ էլ կարելի է կամ չի կարելի համախմբվել: «Մի սկզբունքային հարց կա. պայքարում ես իշխանության դեմ, որ վերցնես քե՞զ այդ իշխանությունը, թե՞ որ վերցնես ու տաս իրական տիրոջը` ժողովրդին։ Այստեղ ես տեսնում եմ, որ ՀԱԿ-ը ուզում է վերցնի ու տերը լինի իշխանության»,- հավելեց ԱԻՄ նախագահը,- եթե ընդդիմության մնացած քաղաքական ուժերը չմիավորվեն, ապա պիտի լինեն կամ ՀԱԿ-ի կողքին, կամ իշխանությունների կողքին»:

Ըստ նրա` ՀԱԿ-ը սխալ ուղի է բռնել. «ՀԱԿ-ն ուզում է լավագույն դեպքում դառնալ հիմնական քաղաքական ուժը, որից հետո անպայման կգրկախառնվի իշխող ուժերի հետ։ Մենք դրա նախադեպն ունենք, երբ Ստեփան Դեմիրճյանը գրկախառնվեց Ռոբերտ Քոչարյանի հետ»,- շեշտեց Հայրիկյանը:

Այսօր` լրագրողների հետ հանդիպման ժամանակ,«Ժառանգություն» կուսակցության փոխնախագահ Ռուբեն Հակոբյանը հայտարարեց. «Այսօր ՀԱԿ-ը անհասկանալի որոշումներ ընդունելու գործում ոնց որ մոնստր լինի։ Այդպես չեն որոշումներ ընդունում ու առաջարկություններ անում»:

Ըստ նրա` այդպես չեն համագործակցում, ոչ մի իրեն հարգող քաղաքական ուժ չի միավորվի ՀԱԿ-ի շուրջ այնպիսի հայտարարության պարագայում, թե «թող մեզ միանան այն ուժերը, որոնք անգամ մեզ չեն համակրում»:
Նա համոզված է, որ արտահերթ ընտրություններով միայն կբավարարվի ՀԱԿ-ի քաղաքական ամբիցիաները, իսկ ժողովուրդը դրանից ոչինչ չի շահի. «Լևոն Տեր-Պետրոսյանն ամեն ինչ արեց, որ իր դեմ թշնամաբար տրամադրի ընդդիմության մնացած քաղաքական ուժերին. դա նրա մարդկային տեսակն է,- ավելացրեց Հակոբյանը,- ընդդիմությունը դեռ կարող է միավորվել, քանի որ երբեք չի կարելի ասել` երբեք»:

«Ինչ իմաստ ուներ դադարեցնել երկխոսությունը և հանդես գալ երկխոսության առաջարկով շաբաթներ անց, այլ պայմաններում»,-այսօր լրագրողների հետ հանդիպման ժամանակ  ասաց ԱԺ «ՀՀԿ» խմբակցության անդամ, երկխոսության նպատակով ստեղծված կոալիցիոն աշխատանքային խմբի անդամ Գագիկ Մինասյանը` անդրադառնալով երկխոսությունը վերսկսելու ՀԱԿ-ի երեկվա առաջարկին:

Հիշեցնենք, որ ՀԱԿ համակարգող Լևոն Զուրաբյանը երեկ երեկոյան զանգահարել էր կոալիցիոն խմբի ղեկավար Դավիթ Հարությունյանին` առաջարկը ներկայացնելու համար, սակայն չէր կարողացել կապվել նրա հետ և առաջարկը փոխանցել էր Գագիկ Մինասյանի միջոցով. «Ես դեռ չեմ հասցրել քննարկել իմ գործընկերների հետ, մանավանդ որ Դավիթ Հարությունյանը այստեղ չի եղել։ Երկուշաբթի օրը ես կքննարկեմ այդ հարցերը և կորոշենք` ինչ անել: Ավելի լավ է ճշգրիտ պատասխաններով առաջնորդվել, քան հենց հիմա ենթադրություններ անել»,- ասաց Գագիկ Մինասյանը` ավելացնելով. «Սա տարակուսանքի տեղիք է տալիս։ Ես կուզենայի պարզաբանումներ ստանալ` ինչով է պայմանավորված այդ կասեցումը, ում է դա ձեռնտու և արդյոք ՀԱԿ–ը զգում է իր պատասխանատվությունը այդ կասեցման մեջ»,- ասաց նա:

Նրա խոսքով` երկխոսությունը պետք է հասներ իր տրամաբանական ավարտին, քանի որ նրանց հուզող գլխավոր հարցերի հետ կապված «իրենք արդեն աշխատում էին և պատրաստվում էին ներկայացնել հակափաստարկներ»։

Գագիկ Մինասյանի համոզմամբ՝ երկխոսությունը ներքաղաքական կայունությունն ապահովելու ամենաճիշտ, ամենաքաղաքակիրթ ձևն է, որն «անհասականալի ու անհիմն» կերպով դադարեցրին ՀԱԿ–ի ներկայացուցիչները։

«Հայաստանի ժողովուրդ, դու ամենաուժեղն ես, գիտակցիր քո ուժը»,- ընդդիմության այսօրվա հանրահավաքին հայտարարեց Կոնգերսի ներկայացուցիչ, «Հայկական ժամանակ» օրաթերթի գլխավոր խմբագիր Նիկոլ Փաշինյանը՝ «Սկսել ա» գոչյունով բացված հայտարարելով Կոնգրեսի այսօրվա հանրահավաքը:

«Սիրելի ժողովուրդ, ՀՀ հպարտ քաղաքացիներ, երկու օր առաջ ես պատիվ ունեի հյուրընկալել եվրոպացի մի լրագրողի և նրա հետ հետաքրքիր զրույց ունենալ»,- պատմեց Փաշինյանը։ Ըստ նրա՝ ավստրիացի լրագրողն իրեն ասել է, որ եվրոպական դիվանագիտական կորպուսի մի ներկայացուցիչ իրեն ասել է, որ Հայաստանում ժողովրդավարության ապագան մշուշոտ է, որովհետև Հայաստանում հաստատված մաֆիան շատ ուժեղ է: Լրագրողին Փաշինյանն ասել է, որ ինքը ավելի ուժեղ է, քան այդ մաֆիան, ինքն ավելին է, քան սուպերմենը, ինքը ՀՀ հպարտ քաղաքացի է։

«Ես ուզում եմ հավաստիանալ, որ դուք՝ բոլորդ, ձեզանից յուրաքանչյուրն այստեղ է՝ աշխարհին, ինքն իրեն ասելու, որ ինքը, հենց ինքը, ՀՀ քաղաքացին, այդ քաղաքացիների ամբողջությունը ուժեղ է ցանկացած մաֆիայից և ավազակապետությունից»,- հայտարարեց Փաշինյանը՝ հույս հայտնելով, որ ՀՀ քաղաքացին դուրս է եկել Ազատության հրապարակ՝ սահմանադրությամբ հաստատված իր իշխանությունը հաստատելու համար:

Հայաստանի երկրորդ նախագահ Ռոբերտ Քոչարյանը չի բացառել, որ կվերադառնա մեծ քաղաքականություն: Նա այդ մասին հայտարարել է «Մեդիամաքս»-ին տված հարցազրույցում, մեկնաբանելով այն փաստը, որ վերջին շրջանում  շատ է խոսվում իր վերադարձի հնարավորությունների մասին, որը կապվում է Պուտին-Մեդվեդեւ փոխատեղման հետ:

«Ինձ զարմացնում է իմ հնարավոր վերադարձի վերաբերյալ ծավալված քննարկումը` Ռուսաստանում ընթացող քաղաքական գործընթացների հետ ուղիղ փոխկապակցմամբ: Եւ դա տեղի է ունենում Հայաստանի անկախության քսանամյակի ճոխ տոնակատարություններից անմիջապես հետո՞: Վստահ եմ, որ քաղաքական գործընթացները պետք է հասունանան այստեղ, Հայաստանում, այլ ոչ թե նույն հարթության մեջ պրոյեկտվեն դրսից:

Ես չեմ բացառում, որ կվերադառնամ մեծ քաղաքականություն: Սակայն, այդ քայլին ինձ կարող են դրդել ոչ թե այն իրադարձությունները, որ տեղի են ունենում Հայաստանին թեեւ շատ մոտ եւ Հայաստանի համար շատ կարեւոր, բայց, այնուամենայնիվ, ուրիշ երկրում, այլ հետեւյալ երեք գործոնները.

1. երկրի տնտեսական վիճակի եւ մարդկանց բարեկեցության զգալի եւ կայուն բարելավվման բացակայությունը, եւ, որպես հետեւանք` փակուղային տրամադրությունների եւ արտագաղթի աճը;

2. հասարակության տարբեր շերտերի կողմից իմ` մեծ քաղաքականություն վերադարձի պահանջարկը;

3. իմ ներքին համոզվածությունն առ այն, որ ես կարող եմ արմատական ձեւով բարելավել իրավիճակը:Այս երեք գործոնների առկայության պարագայում կարող են տարբեր ճանապարհներ լինել ակտիվ քաղաքականություն վերադառնալու համար:

Մնացած բոլոր հանգամանքները որոշ նրբերանգներ են մտցնում, ավելացնում են քաղաքական ռեսուրսը, բայց հիմնարար գործոններ չեն հանդիսանում», — ասել է Ռոբերտ Քոչարյանը:

Սեպտեմբերի 29-ին լրագրողների հետ հանդիպմանը ՀՅԴ խմբակցության ղեկավար, ՀՅԴ Բյուրոյի անդամ Վահան Հովհաննիսյանը, չնշելով իրենց ապագա թեկնածուի անունը, հայտարարեց, որ առաջիկա նախագահական ընտրություններին Հայ հեղափոխական դաշնակցությունը մասնակցելու է իր թեկնածուով:

Նախկին նախագահ Ռոբերտ Քոչարյանի հետ հնարավոր համագործակցության մասին խոսելիս Վահան Հովհաննիսյանն ասաց, որ ՀՅԴ-ում նման քննարկում դեռ չկա. «Նման դիմում, առաջարկ չի եղել ոչ անձնապես Ռոբերտ Քոչարյանի կողմից, ոչ էլ Վարդան Օսկանյանի: Վարդան Օսկանյանն ինքնուրույն քաղաքական անձ է, և չեմ կարծում, թե ինչ-որ մեկի շահերն է ներկայացնում: Քանի որ նման առաջարկ մեզ չի եղել, հարցին պատասխանելու կարիք էլ չկա»,- ասաց Հովհաննիսյանը, չբացառելով որ նման դիմումի դեպքում, ՀՅԴ-ում կքննարկեն, իսկ թե քննարկման արդյունքում ինչ որոշում կկայացվի, ասել չի կարող:

Անցնելով ՌԴ-ում տեղի ունեցող անցուդարձին, նախագահի պաշտոնը Մեդվեդևից Պուտինին փոխանցելու հարցին` ՀՅԴ անդամը նկատեց, որ Ռուսաստանում ընթացող փոփոխությունները կարող են որոշակիորեն ազդել Հայաստանի արտաքին քաղաքական զարգացումների վրա, սակայն դրանք շրջադարձային բնույթ չեն կրի. «Այն ինչ տեղի է ունեցել Ռուսաստանում, ռուսական ընդդիմադիր շրջանակները համարում են անթույլատրելի, քանի որ նախագահից նախկին նախագահին իշխանություն է փոխանցվել, և հասարակության կարծիքը մղվում է երկրորդ պլան: Եթե անկեղծ լինենք, Հայաստանում էլ նման բան եղել է,- ասաց նա,-  չեմ կարծում, որ Մեդվեդևը կամ Պուտինը,  լինելով ՌԴ նախագահ, կարող են էական փոփոխություն առաջացնել Հայաստանի ներքաղաքական կյանքում: Վերջապես մեր ձգտումը սեփական ուժերով սեփական նախագահին ընտրելն է, առանց այլոց միջամտության»:

Ըստ նրա` արտաքին քաղաքականության մեջ որոշ փոփոխություններ կարող են նկատվել. «Բայց ի վերջո չպետք է մոռանալ, որ օգոստոսյան պատերազմը Վրաստանում տեղի ունեցավ Մեդվեդեւի նախագահության ժամանակ: Այն, որ Պուտինն Արեւմուտքում ընկալվում է որպես ավելի կոշտ գործիչ, ակնհայտ է: Դա նկատվում է թե ամերիկյան կոնգրեսականների ելույթներում, թե եվրոպական գործիչների: Չեմ կարծում, որ փոփոխությունները կկրեն դրամատիկ կամ  շրջադարձային բնույթ»,- կարծում է  Հովհաննիսյանը:

Նա հավանել էր Հայաստանի նախագահ Սերժ Սարգսյանի ելույթը ՄԱԿ-ի Գլխավոր Ասամբլեայի 66-րդ նստաշրջանում , բայց շեշտեց, որ դա ընդամենը ելույթ էր:

Ելույթից բխող երկու անհրաժեշտություն է կա. «Առաջինն այն է, որ այդպիսի վճռական ազգային քաղաքականություն վարելու համար Հայաստանի իշխանությունները պարտավոր են ուղղակի երկրի ներսում ուժեղ թիկունք ստեղծել: Դա կարող է արվել լուրջ բարեփոխումներով, մոնոպոլիստական տնտեսական համակարգից հրաժարվելով, կարգուկանոն հաստատելով: Ակնհայտ է, որ ժողովրդի կյանքը վատանում է` ինչ թվեր էլ հրապարակվեն: Հավատո՞ւմ ենք, որ ունակ են իշխանությունները արդար երկիր կառուցել: Ոչ, մենք դրան արդեն չենք հավատում»,- նկատեց  Հովհաննիսյանը:

Երկրորդը, ըստ նրա, այն է, որ եթե ցանկանում ենք  արտաքին քաղաքականությունը համընկնի նախագահի ելույթի դրույթներին, պետք էր հետ կանչել ստորագրությունը հայ-թուրքական արձանագրություններից. «Հավատո՞ւմ ենք դրան: Ոչ, որովհետև մենք սառած վիճակում հետևում ենք, թե ինչ է կատարվում Թուրքիայում: Հայաստանում պարալիզացված վիճակ է, ոչ մի շարժ չկա»,- ավելացրեց նա,- այս երկու պատճառները բավարար են հասկանալու, թե ինչու է դաշնակցությունը համակարգային և ամբողջական իշխանափոխությունն անհրաժեշտություն համարում` անկախ մեր պաշտոնյաների հաջող, կամ ոչ այնքան հաջող ելույթներից»: