shamshyan.com-ի հաղորդմամբ՝ երեկ՝ մայիսի 8-ին, արտառոց դեպք է տեղի ունեցել Երևանում: Ժամը 19:30-ի սահմաններում ՀՀ Ներքին գործերի նախարարության ոստիկանության Մալաթիայի բաժնում օպերատիվ տեղեկություններ են ստացվել, որ Ռոմանոս Մելիքյան փողոցում գտնվող «Սուրբ Աստվածածին» եկեղեցու տարածքում մի քանի օրական երեխա է հայտնաբերվել: 

Ինչպես հայտնում է ֆոտոլրագրող Գագիկ Շամշյանը, դեպքի վայր են մեկնել ոստիկանության Մալաթիայի բաժնի օպերատիվ խումբը՝ բաժնի պետի օպերատիվ գծով տեղակալ Րաֆֆի Բագրատունյանի գլխավորությամբ: Ոստիկանները պարզել են, որ ստացված օպերատիվ տեղեկությունը հավաստի է: 

Նշված եկեղեցու այգեպանը աշխատանքներ կատարելու ժամանակ եկեղեցու այգում հայտնաբերել է նորածին երեխայի, ինչի մասին հայտնել է իր ծանոթ, Երևանի բնակիչ 68-ամյա Մարիամ Հ.-ին, ով երեխային տարել է իր տուն, խնամել: Ոստիկաններն այնուհետև մեկնում են Մարիամ Հ.-ի տուն, որտեղ էլ հայտնաբերում են 5 օրական երեխայի ու նրան տեղափոխում են «Սուրբ Աստվածամայր» բժշկական կենտրոն: 

Դեպքի փաստով ոստիկանության Մալաթիայի բաժնում փաստաթղթեր են ձևակերպվում,որոնք փոխանցվել են ՀՀ քննչական կոմիտեի Երևան քաղաքի քննչական վարչության Մալաթիային քննչական բաժին, որտեղ դեպքի փաստով նախաձեռնվել է քրեական վարույթ: Ոստիկանությունն ու քննչական բաժինը ձեռնարկում են անհրաժեշտ օպերատիվ հետախուզական և քննչական միջոցառումներ՝ երեխայի ծնողին հայտնաբերելու ուղղությամբ: 

«Ճանապարհային դեպարտամենտ հիմնադրամը» ներկայացրել է Հյուսիս-հարավ ճանապարհային միջանցքի 4-րդ տրանշի Սիսիան-Քաջարան շուրջ 60 կմ նոր ճանապարհահատվածի, ներառյալ՝ Բարգուշատի թունելի ներդրումային ծրագիրը։

Նշվում է, որ Սիսիան-Քաջարան ճանապարհի հարավային՝ 24,2 կմ-ի կառուցումն իրականացվելու է երեք ենթահատվածների՝

1.27.12 կմ երկարությամբ հյուսիսային ենթահատված,

2.8.65 կմ երկարությամբ Բարգուշատի թունելի ենթահատված,

3.24.25 կմ երկարությամբ հարավային ենթահատված:

Նոր ասֆալտբետոնե պատվածքով ճանապարհի շնորհիվ կկրճատվի Սիսիան-Քաջարան ճանապարհային հատվածի երկարությունը, ներկայիս մեքենաների 50 կմ/ժ միջին արագությունն էլ կբարձրացվի մինչև 100 կմ/ժ-ի։

Ճանապարհահատվածի կառուցումը կնպաստի նաև ապրանքաշրջանառության ավելացմանն ու տուրիզմի զարգացմանը:

Ծրագիրը նախատեսվում է ավարտել մինչև 2032թ․ նոյեմբեր, իսկ շինարարության կանխատեսվող ավարտը՝ 2030թ․ նոյեմբեր, թերությունների համար պատասխանատվության ժամկետի ավարտը նախանշված է 2032թ․–ի նոյեմբերին։

Ծրագրի հարավային ենթահատվածը նախատեսվում է իրականացնել ՎԶԵԲ-ի և ԵՆԲ-ի համաֆինանսավորմամբ: Ընդհանուր ծրագիրն արժենալու է մոտ 373 մլն եվրո, որից 236 մլն եվրոն նախատեսվում է ներգրավել ՎԶԵԲ-ից, իսկ մնացած 137 մլն եվրոն՝ ԵՆԲ-ից:

ՊԵԿ նախկին նախագահ Դավիթ Անանյանն իր ֆեյսբուքյան էջում գրել է.

«Սիրելի՛ հայրենակիցներ,

Մեր հայրենիքի համար դժվարին ու պատմական այս պահին, երբ մեզանից յուրաքանչյուրը մտածում է մեր երկրի պետականության ու Հայրենիքի ճակատագրի մասին, եկել է պահը միավորելու մեր ջանքերն ու սրտերը՝ հանուն արդարության, պատվի ու հայրենասիրության բարձրագույն իդեալների։

Բագրատ Սրբազանի հոգևոր առաջնորդությամբ Տավուշի շարժումը դարձել է մեր ընդհանուր լուսավոր ապագայի անսպառ հույսի խորհրդանիշը, որին մասնակից մեր յուրաքանչյուր հայրենակից ի ցույց է դնում իր խորին սերն ու հարգանքը դեպի մեր երկրի պատմությունը, մշակույթը և ազգային հոգեկերտվածքի այլ խորհրդանիշները։ Սրբազանը, քարոզելով սեր և հարգանք բոլորի ու յուրաքանչյուրի հանդեպ, հիշեցնում է միասնության, համերաշխության և համախմբման կարևորության մասին, քանի որ, ըստ Սրբազանի, նույնիսկ նրանք, ովքեր ժամանակավորապես մոլորված են, ճանապարհ կգտնեն դեպի արդարության և հավասարության իդեալների ընդհանուր ձգտումները օրենքի և հասարակության առջև:

Այս շարժումն իր էությամբ քաղաքական չէ, բայց այն կրում է քաղաքացիական ներգրավվածության հզոր լիցք՝ մեզանից յուրաքանչյուրին պատասխանատվության կանչելով, քանի որ ոտնահարված են մեր և մեր երկրի իրավունքներն ու ազատությունները։

Կո՛չ ենք անում ձեզ, հարգելի՜ հայրենակիցներ, անկախ ձեր համոզմունքներից, քաղաքական նախասիրություններից, սոցիալական կարգավիճակից, միանալ Բագրատ Սրբազանին, վաղը՝ մայիսի 9-ին, ժամը 16:00-ին, Երևանի Հանրապետության հրապարակում։

Մեր համընդհանուր միասնությունը կլինի մեր հավաքական պատասխանը ժամանակի մարտահրավերներին՝ մեր ժողովրդին ամուր և անխորտակելի դարձնող իդեալներին նվիրվածության մեր հրապարակային վկայությունը:

Եկեք միասին «այո» ասենք մեր պատկերացրած այն աշխարհին, որտեղ հարգանքն ու հայրենիքի հանդեպ սերը մեզանից յուրաքանչյուրի սոցիալական ներդաշնակության և բարեկեցության հիմքն են: Եկեք մաս կազմենք մի իրադարձության, որն ակնհայտորեն մնալու է պատմության մեջ որպես անաչառության, ազնվության և եղբայրական սիրո օրինակ բոլոր համախոհների միջև»։

1992 թվականի մայիսի 8-9-ին հայկական ինքնապաշտպանական ուժերի կողմից իրականացվել է բերդաքաղաք Շուշիի ազատագրումը, որը ռազմական կարևոր նշանակություն է ունեցել արցախյան ազատագրական պայքարում։ Արցախյան երրորդ պատերամից հետո Շուշին գտնվում է Ադրբեջանի օկուպացիայի ներքո։

«Արհեստածին կազմավորում Ադրբեջանն իր ձևավորման առաջին օրվանից՝ 1918 թվականից, որդեգրել է հայկական մշակութային ժառանգության յուրացման  ու ոչնչացման քաղաքականություն, որն էլ ադրբեջանական հակահայկական քաղաքականության անբաժանելի մասն է»,- ֆեյսբուքյան ուղիղ եթերում ասում է Հայքի մշակութային օմբուդսմեն, ադրբեջանագետ Հովիկ Ավանսեովը։

Նա նշում է, որ բերդաքաղաքի ազատագրումից հետո Շուշիի մշակութային ժառանգությունն անընդհատ ադրբեջանական կողմից ենթարկվում էր յուրացման, կեղծման, կեղծվում էր նաև պատմությունն ու իսկությունը։

«Բացի այդ, Ադրբեջանը կեղծում էր փաստերը, իբր հայկական կողմը թիրախավորել ու վանդալիզմի էր ենթարկել Շուշիի մզկիթները ևս, ինչն իրականությանը չէր համապատասխանում։ Ավելին ասեմ՝ պետական մակարդակով ու մասնավոր ներդրումներով Շուշիի մզկիթը մասնագետների ներգրավմամբ, այդ թվում Իրանից,  վերականգնվել էր՝ հաշվի առնելով բոլոր սկզբունքները, մասնագետների կարծիքը ևս»,- պատմում է ադրբեջանագետը։

Նա նշում է, որ 2020 թվականի պատերազմի ժամանակ Շուշիի  մշակութային ժառանգությունը տեղեկատվական դաշտում թիրախավորելուց բացի, հայտնվեց ադրբեջանական զինված ուժերի ուղիղ նշանառության տակ, իսկ այնուհետև՝ բռնազավթումից հետո, մշակութային ժառանգության ոչնչացման քաղաքականությանը զուգահեռ սկսվել են «վերականգման» աշխատանքներ։

«Ամենափրկիչ եկեղեցու տարածքում  իրականացվում են աշխատանքներ՝ խախտելով եկեղեցու ամբողջականությունը։ Ներկայացվում է իբրև վերականգնում են նախկին տեսքը, ինչն իրականությանը չի համապատասխանում։

Հերքվում է նաև Շուշիի պատմության հայկական հետքը, հայկական ծագումնաբանությունը և այն ներկայացվում է որպես  իսլամական աշխարհի մշակութային կենտրոն։

Սրանով ոչ միայն Շուշին, այլ նաև սկիզբ է դրվում Արցախի պատմական հայկական ինքնության իսլամացման ադրբեջանական քաղաքականությանը։ Սա արվում է դարձյալ պետական մակարդակով»,- ասում է Ավանեսովը։

«Մայր Հայաստան» դաշինքի ղեկավար Անդրանիկ Թևանյանը գրում է.

Հեղափոխությունը/իշխանափոխությունը կախված է մեկ մարդուց, և այդ մեկ մարդը ․․․

Մայիսի 9–ից հանրային մեծ, ավելի ճիշտ՝ շատ մեծ սպասումներ կան։
Կան տարբեր պատկերացումներ, թե ինչպես պետք է իրականացնել հեղափոխությունը/իշխանափոխությունը։ Այս առումով Բագրատ Սրբազանի խաչը, բառի բուն և փոխաբերական իմաստներով, շատ ծանր է, հետևաբար՝ չի՛ կարելի միայն նրա վրա թողնել ամեն ինչ։ Ամեն մեկն իր անելիքը պետք է անի ու չխուսափի իր բաժին պատասխանատվությունից։

Անվստահության սցենարի մասին

Քաղաքական դաշտում տևական ժամանակ է, ինչ քննարկման առարկա է դարձել հեղափոխության/իշխանափոխության ճանապարհներից մեկը։ Դա գործող վարչապետին ԱԺ–ի միջոցով անվստահություն հայտնելն է։ Խորհրդարանական ընդդիմությունը պատգամավորական մանդատները պահելու թիվ մեկ հիմնավորումը հենց դա է ներկայացնում։ Ասում են՝ պահում ենք, մանդատը, որ պետք է եղած ժամանակ Փաշինյանին անվստահություն հայտնենք ու իշխանափոխության այդ տարբերակը կյանքի կոչենք։ Իրենց ասածի մեջ տրամաբանություն կա։ Եթե քաղաքական զարգացումները տանում են Նիկոլ Փաշինյանին ժողովրդական ճնշմամբ խորհրդարանում անվստահություն հայտնելու ուղղությամբ, ապա ընդդիմությունն, իրոք, անելիք ունի այնտեղ։

Մեջբերում ՀՀ սահմանադրության 115–րդ հոդվածից․ « 1․ Վարչապետին անվստահություն հայտնելու մասին Ազգային ժողովի որոշման նախագիծ կարող է ներկայացնել պատգամավորների ընդհանուր թվի առնվազն մեկ երրորդը միայն այն դեպքում, եթե որոշման նախագծով միաժամանակ առաջարկվում է նոր վարչապետի թեկնածու:
2. Վարչապետին անվստահություն հայտնելու մասին Ազգային ժողովի որոշման նախագիծը քվեարկության է դրվում այն ներկայացվելուց ոչ շուտ, քան քառասունութ, եւ ոչ ուշ, քան յոթանասուներկու ժամ հետո: Որոշումն ընդունվում է պատգամավորների ընդհանուր թվի ձայների մեծամասնությամբ՝ անվանական քվեարկությամբ: Որոշման ընդունման դեպքում համարվում է, որ վարչապետը հրաժարական է ներկայացրել»:

Սա նշանակում է, որ ԱԺ–ում առնվազն 36 պատգամավոր պետք է ստորագրի Փաշինյանին անվստահություն հայտնելու նախաձեռնության տակ։ Դա անհրաժեշտ նվազագույն պայմանն է։

Եթե համարենք, որ «Հայաստան» ու «Պատիվ ունեմ» դաշինքներում ամեն ինչ նորմալ է, ապա նրանց համատեղ ձայներն այս պահին 35 են։ Իշխան Զաքարյանը, որը «Պատիվ ունեմ»–ով էր դարձել պատգամավոր, լքել է այդ խմբակցությունը և դարձել «անկախ»։ Հիմա, այսպես կոչված, տնային աշխատանքը նրա և/կամ այլ իշխանզաքարյանների հետ է պետք տանել, որպեսզի այդ նվազագույն 36 պատգամավորական ստորագրությունը լինի։ Եթե, իհարկե, քաղաքական փոփոխությունների սցենարը զարգանա վարչապետի պաշտոնը զբաղեցնողին անվստահություն հայտնելու տարբերակով։

Ամփոփենք․ Նիկոլ Փաշինյանին հեռացնելու սցենարներից մեկը նրան խորհրդարանում անվստահություն հայտնելն է, որի համար պետք է սկզբում առնվազն 36 պատգամավորի, հետո՝ 54–ի «կողմ» քվեն (այսինքն՝ ՔՊԿ–ից առնվազն 18 հոգի պետք է դեմ գնա Փաշինյանին)։ Դա նշանակում է, որ այս սցենարով հեղափոխությունը/իշխանափոխությունը, ավելի ճիշտ՝ դրա մեկնարկը կախված է մեկ մարդուց, և այդ մեկ մարդը ․․․ Իշխան Զաքարյանն է (կամ նրա նման մեկը (Շիրակ Թորոսյանին աչքի տակ պահեք)․ ճակատագրի ինչպիսի՜ հեգնանք)։

Իշխանափոխության այլ սցենարներ էլ կան, բայց այդ մասին հաջորդիվ։

Մայիսի 9-ը ցույց կտա, թե որ ուղղությամբ է զարգանալու համաժողովրդական շարժումը»։

Ֆրանսիահայ լրագրող Լեո Նիկոլյանը 16 օր շարունակ հացադուլ է անում Երևանի օդանավակայանում՝ Հայաստան մուտք գործելու արգելքից հետո։

57-ամյա Նիկոլյանը խիզախ հետաքննող լրագրող է, որը բազմաթիվ վեճեր է առաջացրել կարևոր անձանց մասին իր բացահայտումների պատճառով: Նա եղել է Արցախի հակամարտության և Իսրայել-Լիբանան սահմանին վերջերս տեղի ունեցած բախումների առաջնագծում, վիրավորվել է երկու հակամարտությունների ժամանակ:

Անցած 30 տարիների ընթացքում Նիկոլյանը տասնյակ անգամ այցելել է Հայաստան ու Արցախ և հարցազրույցներ ունեցել բարձրաստիճան պաշտոնյաների հետ: Այնուամենայնիվ, այն, ինչին նա բախվեց երկու շաբաթ առաջ Երևանի օդանավակայանում իր վերջին այցի ժամանակ, բոլորովին անսպասելի էր և ցնցող:

Ապրիլի սկզբին Նիկոլյանն այցելել էր Հայաստանի Տավուշի մարզի Ոսկեպար գյուղ և հարցազրույց ունեցել Տավուշի թեմի առաջնորդ Բագրատ արքեպիսկոպոս Գալստանյանի հետ, որը ղեկավարում է ժողովրդական շարժումը՝ ընդդեմ վարչապետ Նիկոլ Փաշինյանի վերջերս կայացրած որոշման՝ հանձնելու չորս հայկական սահմանային գյուղերը Ադրբեջանին:

Ապրիլի վերջին, երբ Նիկոլյանը փորձեց վերադառնալ Հայաստան, Երևանի օդանավակայանում ներգաղթի ծառայության աշխատակիցները նրան ասացին, որ իրեն թույլ չի տրվում մուտք գործել երկիր: Հարցին, թե ինչու, նրան պատասխանեցին, որ նա «վտանգ է ներկայացնում Հայաստանի անվտանգությանը»: Սա ծիծաղելի մեղադրանք է, քանի որ Նիկոլյանը պրոֆեսիոնալ լրագրող է, որը հայկական որևէ օրենք չի խախտել և հանցագործություն չի կատարել:

Ցավոք, Նիկոլյանը միակ սփյուռքահայը չէ, ում մուտքն արգելված է Հայաստան: Մի քանի այլ անձանց ևս Երևանի օդանավակայանում վայրէջքից հետո ասել են, որ իրենց թույլ չի տրվում այցելել Հայաստան: Նրանցից ոչ մեկը ոչ մի անօրինական կամ հանցավոր բան չէր արել, որ նման կոշտ պատժի արժանանար: Բացի այդ, եթե նրանք որևէ օրենք են խախտել կամ վտանգ են ներկայացնում Հայաստանի անվտանգության համար, նրանց պետք է ձերբակալեին օդանավակայանում և կանգնեին դատարանի առջև՝ նրանց ճակատագիրը որոշելու համար։ Որևէ պաշտոնատար անձ, անկախ իր կոչումից և պաշտոնից, իրավունք չունի դատական իշխանության անունից կամայական որոշումներ կայացնել։

Բացի այդ, վարչապետ Փաշինյանը իրավունք չունի որոշելու, թե ով կարող է մուտք գործել երկիր: Հայաստանը նրա առանձնատունը չէ: Նա չի կարող որոշել, թե ում թույլ տալ կամ ում թույլ չտալ: Հայաստանը աշխարհի բոլոր 10 միլիոն հայերի հայրենիքն է, և ոչ մի պաշտոնյա իրավունք չունի օրինական պատճառի բացակայության դեպքում արգելել նրանցից որևէ մեկի մուտքը երկիր:

Նիկոլյանի և մի քանի այլ սփյուռքահայերի մուտքը Հայաստան արգելված է միայն այն պատճառով, որ նրանք համարձակվել են քննադատել Փաշինյանի պարտվողական քաղաքականությունը։Վարչապետը բազմիցս հայտարարել է, որ ժողովրդավար է: Սակայն, խոսքի ազատությունը ժողովրդավարության հիմնարար սկզբունքներից մեկն է, որը հաճախ խախտվում է Հայաստանի իշխանությունների կողմից, որոնք երկիրը վերածել են միանձնյա կառավարման՝ բռնապետության:

Իրավիճակն ավելի վատթարացավ, երբ Մուրադ Փափազյանին, Փաշինյանի ֆրանսահայ հայտնի քննադատին, թույլ չտվեցին մուտք գործել Հայաստան, և նա հայց ներկայացրեց հայկական դատարան, որն էլ ապօրինի համարեց կառավարության արգելքը: Քանի որ հայ պաշտոնյաները 30 օր ժամանակ ունեին բողոքարկելու ավելի ցածր ատյանի դատարանի որոշումը, ոչ ոք չգիտեր, թե արդյոք նրանք նման բողոք կներկայացնեն: Բարեբախտաբար, երբ Փաշինյանն այցելեց Փարիզ այդ 30 օրերի ընթացքում, նախագահ Էմանուել Մակրոնը հանդիպեց Փափազյանի և Փաշինյանի հետ և հորդորեց վարչապետին հրաժարվել Փափազյանի հետապնդումից: Փաշինյանը դժկամությամբ համաձայնեց չեղարկել բողոքը, բայց ամոթալի էր, որ օտար երկրի ղեկավարը ստիպված էր միջամտել հայկական ներքին գործերին:

Մինչդեռ, Նիկոլյանը վերջին 16 օրվա ընթացքում հյուծվում է Երևանի օդանավակայանում: Մեր բազմաթիվ հեռախոսազրույցների ընթացքում նա ինձ ասաց, որ կշարունակի իր հացադուլը, նույնիսկ եթե դա հանգեցնի մահվան:

Նրա կյանքը վտանգված է, քանի որ նա մի քանի լուրջ հիվանդություններ ունի։ Ժամանակ առ ժամանակ տեղի բուժանձնակազմը գալիս է նրա ճնշումը չափելու և մի քանի ներարկումներ անելու։ Նրան թույլ չեն տալիս դուրս գալ օդանավակայանից որևէ բուժօգնության համար: Վերջին օրերին շտապօգնության մեքենա էին ուղարկել օդանավակայան՝ ստուգելու նրա արյան ճնշումը, սրտի աշխատանքը և ևս մեկ ներարկում անելու։

Նիկոլյանի վիճակն անորոշ է: Նա ինձ ասում է՝ քանի որ ինքը գտնվում է օդանավակայանի միջազգայնորեն պահպանվող «չեզոք գոտում», հայ պաշտոնյաները չեն կարող որևէ գործողություն ձեռնարկել իր դեմ: Վերջիններս փորձել են համոզել նրան նստել Փարիզ մեկնող ինքնաթիռը, ինչից նա հրաժարվել է։ Նրան նաև սենդվիչներ և ջուր են առաջարկել, որոնք նա մերժել է:

Նիկոլյանն ինձ ասաց, որ մտադիր է սովամահ լինել Երևանի օդանավակայանում: Նա կարծում է, որ իր մահն ամոթալի կլինի վարչապետի համար: Ես համոզված չեմ, որ նա ճիշտ է: Կարծում եմ, որ դա խայտառակություն կլինի Հայաստանի Հանրապետության հեղինակության համար:

Երևանում Ֆրանսիայի դեսպանատունը, հակառակ իր դիվանագիտական պարտավորություններին, հրաժարվել է այցելել սեփական քաղաքացուն՝ տեղեկանալու նրա վիճակի մասին։ Սա Ֆրանսիայի դեսպանի վրեժխնդրական դիրքորոշումն է, քանի որ Նիկոլյանը լրատվամիջոցներով բացահայտել էր դեսպանի սկանդալները: Ֆրանսիայի արտաքին գործերի նախարարությունը նույնպես հետաքրքրություն չի ցուցաբերել Նիկոլյանի բարօրության նկատմամբ, քանի որ նա նախկինում հրապարակավ քննադատել է Ֆրանսիայի նախագահին:

Չնայած Նիկոլյանն իր կոշտ քննադատությունների և բիրտ անհատականության պատճառով հակադրված է բազմաթիվ անհատների և կազմակերպությունների դեմ, հայերը պարտավոր են անել ամեն ինչ, որպեսզի հրապարակայնացնեն նրա ծանր վիճակը և փրկեն իրենց հայրենակցի կյանքը, նախքան նրա սովամահ լինելը:

Ես կոչ եմ անում Հայաստանի քաղաքացիներին բողոքի ցույցեր անցկացնել Երևանում վարչապետի շենքի դիմաց՝ պահանջելով, որ Նիկոլյանին թույլատրվի մուտք գործել Հայաստան: Բողոքի ցույցեր պետք է կազմակերպվեն նաև Երևանում Ֆրանսիայի դեսպանատան դիմաց:

Ֆրանսահայերը պետք է բողոքի ցույցեր անցկացնեն Փարիզում՝ արտաքին գործերի նախարարության և նախագահական պալատի առջև՝ պահանջելով իրենց միջամտությունը Հայաստանի կառավարությանը:

Եթե Նիկոլյանը մահանա Երևանի օդանավակայանում իր երկարատև հացադուլի պատճառով, վարչապետ Փաշինյանի ձեռքերը կթաթախվեն արյան մեջ, Ֆրանսիայի նախագահ Մակրոնինը՝ նույնպես։

Հարութ Սասունյան

www.TheCaliforniaCourier.com

Թարգմանությունը՝ Ռուզաննա Ավագյանի

Շտապօգնությունում 22 տարեկան բժիշկ չի աշխատում․ մայիսի 4-ին տեղի ունեցած դեպքի մասնակիցը եղել է շտապօգնության բուժակը, որի աշխատանքային գործունեությունն այս պահին դադարեցված է։ Այս մասին NEWS.am-ի հեը զրույցում հայտնեց «Շտապօգնություն» ՓԲԸ տնօրեն Ռուբեն Գևորգյանը:  Հիշեցնենք, որ Երևանի 20-ամյա բնակչուհու ահազանգի հիման վրա նախաձեռնվել է քրեական վարույթ։ Կինը զանգել էր ՀՀ ՆԳՆ ոստիկանության Արաբկիրի բաժին և հայտնել, որ մայիսի 4-ին զանգահարել է բժիշկին և հայտնել, որ իրեն վատ է զգում:

Բժիշկն իր սեփական մեքենայով մոտեցել է Կոմիտասի պողոտայի եկեղեցու մոտ: Մեքենայի մեջ կատարել է ներարկում, միացրել է կաթիլային, որից հետո «ձեռքերին ազատություն է տվել», իբրև թե ստուգում է կատարում, բռնի ուժով համբուրել է իրեն:  Շտապօգնության տնօրենը շեշտում է, որ մայիսի 4-ին բուժակը եղել է աձակուրդում: 20-ամյա աղջիկը ապրիլի 29-ին երկու անգամ կանչ է գրանցել: Երկու անգամ էլ նույն բրիգադն է սպասարկել: «Չգիտեմ, թե ինչ հանգամանքներում, կանչի ժամանակ բուժակն ու աղջիկը փոխանակվել են հեռախոսահամարներով: Բուժակն ինձ ասել է, որ աղջիկն է խնդրել համարը: Օրեր անց` մայիսի 4-ին, դարձյալ բուժակի խոսքով, աղջիկը զանգել է և հայտնել, որ իրեն վատ է զգում: Թե իրականում ինչ է տեղի ունեցել` կպարզվի քննության ընթացքում, բայց ես բուժակին խնդրել եմ, որպեսզի այս ընթացքում ազատման դիմում գրի»,- նշեց Ռուբեն Գևորգյանը:

Անկախ հանգամանքներից, Շտապօգնության տնօրենի համար անընդունելի է, որ կանչի մեկնած անձնակազմի որևէ մեկը աշխատանքի ժամին կարող է հեռախոսահամար վերցնել: Նրա խոսքով` բուժակը չի աշխատի այնքան ժամանակ, քանի դեռ գործը չի ավարտվել: Եթե պարզվի, որ այս դեպքի հետ կապված բուժակը որևէ մեղավորություն չունի` կվերականգնվի աշխատանքում: «Այնքան ժամանակ չի աշխատի՝ մինչև կբերի իրավասու մարմնի որոշումը։ Հակառակ դեպքում, այս ոլորտում աշխատելու իրավունք նա չունի»,- եզրափակեց Ռուբեն Գևորգյանը:  Ի դեպ, Շտապօգնության տնօրենի խոսքով, գործի հետ կապված մինչև հիմա Ոստիկանությունից կամ իրավապահ համակարգի որևէ այլ մարմնից բուժակին չեն էլ զանգել։ Բուժակը Ռուբեն Գևորգյանից է իմացել, որ 20-ամյա աղջիկն իր դեմ բողոք է ներկայացրել:  

ԱԺ նախկին պատգամավոր Արթուր Ղազինյանը գրում է. 

«Սահմանազատման իրավական հիմքերն ու ՀՀ տարածքային ամբողջականության հիմնախնդիրը

ՀՀ ինքնիշխան տարածք է համարվում այն ֆիզիկական-աշխարհագրական տարածությունը, որի վրա տարածվում և գործում է ՀՀ օրենսդրությունն ու իրավազորությունը:

Որևէ պետական մարմին կամ պաշտոնատար անձ իրավասու չէ որոշել ՀՀ ինքնիշխանության և իրավասության ներքո գտնվող տարածքի պատկանելությունն ու կարգավիճակը:

ՀՀ ինքնիշխան տարածքը կարող է փոխվել միայն ՀՀ Սահմանադրության 205 հոդվածով և ՀՀ օրենսդրությամբ սահմանված ընթացակարգով` հանրաքվեով:

Մասնավորապես. Տավուշի մարզի քննարկվող 4 գյուղերում մինչև վերջին զարգացումները, գործում էր ՀՀ օրենսդրությունը, այսինքն հանցագործության դեպքում նախաքննությունն իրականացնում էր ՀՀ քննչական մարմինը ՀՀ դատախազության  հսկողությամբ և ՀՀ քրեական և քրեական դատավարության օրենսգրքով նախատեսված կարգով, հասարակական կարգի պահպանությունն իրականացնում էր ՀՀ Ոստիկանությունը, իսկ անվտանգությունն ապահովում էին ՀՀ Զինված ուժերը:

Վերջին 30 տարին գործել է այս կանոնը և որևէ ՀՀ պետական մարմին կամ պետական պաշտոնյա երբևէ չի հրաժարվել իր գործառույթների իրականացումից այն հիմնավորմամբ, որ այդ 4 գյուղները ինչ որ քարտեզով չեն հանդիսանում ՀՀ ինքնիշխան տարածք:

Հետևաբար, խնդրո առարկա 4 գյուղերը հանդիսացել և ներկայումս հանդիսանում են ՀՀ ինքնիշխան տարածք, իսկ դրանք, ՀՀ Սահմանադրությամբ և օրենսդրությամբ սահմանված կարգով այլ պետությանը հանձնելուն ուղղված ցանկացած գործողություն հանցագործություն է` ՀՀ Քր. օրենսգրքի 421 հոդվածի հատկանիշներով:

Եթե սույն արարքը կատարվել է թշնամու կողմն անցնելու կամ լրտեսության միջոցով, որը կատարել է Հայաստանի Հանրապետության քաղաքացին՝ ի վնաս Հայաստանի Հանրապետության ինքնիշխանության, տարածքային անձեռնմխելիության կամ արտաքին անվտանգության, ապա վերը նշված ՀՀ քր. օրենսգրծի 421 հովածին ավելանում է նաև 418 հոդվածը` պետական դավաճանության հանցակազմով:

Հետևություն
Հաշվի առնելով այն փաստը, որ Հայաստանի Հանրապետության և Ադրբեջանի միջև չկա ստորագրված և վավերացված սահմանագծման մասին միջազգային պայմանագիր, հայտնում եմ, որ ՀՀ կառավարության ղեկավարը` իր ենթակա իրավասու պետական պաշտոնյաների հետ, դիտավորությամբ խախտելով ՀՀ Սահմանադրությամբ ամրագրված ՀՀ տարածքային ամբողջականության և սահմանների անխախտելության կանոնները, միանձնյա կամ խմբի կողմից թշնամուն է հանձնել ՀՀ ինքնիշխան տարածքը` խախտելով ՀՀ տարածքային ամբողջականությունը,  պետք է ստանա քրեաիրավական պատշաճ որակում և գնահատական ՀՀ գլխավոր դատախազության կողմից` ՀՀ քր. օրենսգրքի 421 և 418 հոդվածների հատկանիշներով:

Լավ ճանաչելով Նիկոլին՝ գիտեմ, թե ինչ է հիմա կատարվում նրա գլխում։ Հիմա փորձում է օրակարգ շեղել, տարբեր թեզեր է դաշտ նետում, հերթական ստերը պատմում։

Ֆեյսբուքյան էջում գրել է «Հայրենիք» կուսակցության նախագահ Արթուր Վանեցյանը՝ անդրադառնալով այսօր ասուլիսի ընթացքում Փաշինյանի՝ իր հասցեին հնչեցրած մեղադրանքներին․

«Նիկոլի՝ իմ հասցեին այսօր հնչեցրած հորինվածքները բժշկության կոնկրետ ճյուղի ներկայացուցիչների կոնկրետ հետազոտությունների և կոնկրետ եզրահանգման լավ նյութ են։ Կարծում եմ՝ դա հենց նրանց զբաղվելու գործն է։

Լավ ճանաչելով Նիկոլին՝ գիտեմ, թե ինչ է հիմա կատարվում նրա գլխում։ Ժողովրդական խոսքը պնդում է՝ երկու վախը մի մահ է։ Դե իսկ մահն իր հետ միշտ գարշահոտություն է բերում։

Նիկոլը հիմա փորձում է օրակարգ շեղել, տարբեր թեզեր է դաշտ նետում, հերթական ստերը պատմում։

Բոլոր այդ մեղադրանքների դատարկությունը ժամանակի ընթացքում կբացահայտվեն։ Իսկ հիմա մենք շատ ավելի կարևոր անելիքներ ունենք։ Ճշմարտությունը կհաղթի ստին»։

Հիշեցնենք, որ այսօր Փաշինյանն ասել էր, որ շարժման գծին աջակցում է նախկին բարձրաստիճան պաշտոնյա, ում ձայնագրել են, ո՞վ ասաց՝ ամբողջ ձայնագրությունն են հրապարակել, նրան հիմա օգտագործում են որպես գործակալ։

Ճշտող հարցին, թե ում մասին է խոսքը, Փաշինյանն ասաց․ 

«Արթուր Վանեցյանի մասով եմ ասում, ո՞ւմ մասով եմ ասում, այդքան փա՞կ եմ խոսում։

Չեմ բացառում, որ այդ ձայնագրության մեջ կարող էր լինել այլ բնույթի՝ անձնական ոչ անձնական հազար ու մի բան և հիմա, այդ մարդիկ հայրենիքի մասի՞ն են մտածում»։

Հայ Առաքելական Սուրբ Եկեղեցու Արցախի թեմը հորդորում է միանալ «Տավուշը հանուն Հայաստանի» շարժման կազմակերպած խաղաղության և համերաշխության երթին։

«Սիրելի արցախցիներ,

Հազարամյա մեր բնօրրանի բռնազավթումի և կորուստի վերքը դեռ չսպիացած՝ շարունակվում է միակողմանի զիջումների վտանգավոր գործընթացը, որը գոյաբանական լուրջ մարտահրավերների առջև է կանգնեցրել Հայաստանի պետականությունը: Հայրենիքն է մեր ժողովրդի յուրաքանչյուր զավակի արժանապատիվ գոյության երաշխիքը, ուստի պետք է իմաստություն և ուժ գտնենք մեր մեջ՝ ետ շրջելու վայրընթաց գնացող այս անիվը, որպեսզի Մայր Հայրենիքը չունենա Արցախի դառը փորձառությունը:

Սիրելիներ, հորդորում ենք բոլորիդ միանալ «Տավուշը հանուն Հայաստանի» շարժման կազմակերպած խաղաղության և համերաշխության երթին: Հզոր Հայաստանը ցանկությունն է մեր քաջարի նահատակների և հիմքը մեր ապագա բոլոր իղձերի կատարման»,- նշված է Արցախի թեմի հայտարարության մեջ։