«Լուսավոր Հայաստանը» դիմել է ՀՀ վարչապետին եւ ԱԺ ղեկավարությանը, որ այդքան քննադատված պարգեւատրման 30 տոկոս ֆոնդերը հանվեն եւ դրանք հանվեն միայն բարձրաստիճան պաշտոնատար անձանց համար՝ նախարարներ, պատգամավորներ, տարբեր գերատեսչությունների ղեկավարներ: Այս մասին Facebook-ի իր էջում ուղիղ եթերուն նշեց ԱԺ «Լուսավոր Հայաստան» խմբակցության ղեկավար Էդմոն Մարուքյանը:

Նա, մասնավորապես, նշել է. «Եվ այս բոլոր գումարներն ուղղվեն կառավարության կողմից ձեւավորված եւ ձեւավորվելիք սոցիալական փաթեթներին, որ մեր այն քաղաքացիները, որոնք չեն աշխատում, տանը նստած են, օրավարձով են ապրել, կամ ՌԴ-ում են աշխատել, հիմա չեն կարող մեկնել, սրանից օգտվեն:

Երկրորդ, կառավարությանն առաջարկել ենք, որ իրավիճակն այնպիսին է, որ պետք է բյուջետային մեծ ծախսեր իրականացվեն, որ տնտեսությունը կարողանա շնչել, որ ստեղծված սոցիալ տնտեսական իրավիճակը կարողնանք մի քիչ շտկել:

Ըստ էության, շատ ծանր վիճակում ենք եւ եւս 10 օր խիստ կարանտինը պետք է պահպանենք:

Երրորդ, կառավարությունը նախաձեռնել էր ԱԺ արտահերթ նիստ, որով առաջարկում էր մարդկանց հեռախոսներով տեղորոշել, որը, ըստ էության, որեւէ ազդեցություն չի ունենալու համավարակի դեմ պայքարի առումով: Դրա մասին խոսեց նաեւ ԱԺ առողջապահական ահնձնաժողովի նախագահը՝ ասելով, որդա ձգտում է զրոյի: Տվյալ իրավիճակում ընդդիմությունը չքվեարկեց եւ նախագիծը տապալվեց: Դրանից հետո իշխող մեծամասնությունը կրկին հրավիրեց արտահերթ նիստ եւ նախագիծն ընդունվեց: Դա հետընթաց է ժողովրդավարության իմաստով եւ որեւէ կապ չունի մարդկանց կյանքերը փրկելու առումով: Աշխարհի որեւէ պառլամենտում մերժված, տապալված նախագիծը երկրորդ անգամ չի բերվում»:

Հայաստանում տնտեսվարող սուբյեկտները թաքցրել են 700 հազար բժշկական դիմակների առկայությունը: Այս մասին ապրիլի 7-ին ԱԺ տնտեսական հարցերի մտշական հանձնաժողովի նիստում հայտարարեց ՏՄՊՊՀ նախագահ Գեղամ Գեւորգյանը:

Նա նշեց, որ ՏՄՊՊՀ-ն չի կարող միջամտել շուկայում գների կարգավորմանը: «Այնուամենայնիվ, Հայաստանում տնտեսվարող սուբյեկտները կարող էին խանութներին ապրանքներով ապահովել»,- ասաց Գեւորգյանը:

Նա նկատեց, որ եթե ՏՄՊՊՀ-ն սկսի միջամտել այդ պրոցեսին, ապա կարող է մեծանալ ստվերային շուկայի ծավալը:

Սիսիանում միլպետի ժամանակավոր պաշտոնակատարը բռնություն է կիրառել քաղաքացիների նկատմամբ։ 3 քաղաքացու է ծեծել, նրանցից մեկը Սիսիանի ավագանու անդամ, մյուսը 1952 թ. ծնված քաղաքացի է։ Ծեծվածները հոսպիտալում են։ Այս մասին ֆեյսբուքյան իր էջում գրել է ԱԺ «Լուսավոր Հայաստան» խմբակցության անդամ Սրբուհի Գրիգորյանը։

Նա, մասնավորապես, գրել է.

«Հատուկ նոր ոստիկանապետի համար։

Սիսիանում միլպետի ժամանակավոր պաշտոնակատարը բռնություն է կիրառել քաղաքացիների նկատմամբ։ 3 քաղաքացու է ծեծել, նրանցից մեկը Սիսիանի ավագանու անդամ, մյուսը 1952 թ. ծնված քաղաքացի է։ Ծեծվածները հոսպիտալում են։

Այս օրերին տարբեր զանգեր եմ ստացել, որ նա օգտվել է հայտարարված արտակարգ դրությունից։

Սիսիանում մարդիկ ժամեր շարունակ դուրս են եկել փողոց։

Զբաղվեք այս խնդրով։

Սիրելի քաղաքացիներ, ոչ ոք իրավունք չունի ձեռք բարձրացնի ձեզ վրա։

Ափսոս՝ Սիսիանում չեմ…

Հիմա նաեւ պաշտոնական գրություն կուղարկեմ»։

Հայաստանում ապրիլի 7-ին՝ ժամը 11:00-ի դրությամբ նոր կորոնավիրուսով վարակվելու 28 նոր դեպք է գրանցվել: Այս մասին հայտնում է ՀՀ ԱՆ հիվանդությունների եւ վերահսկման եւ կանխարգելման ազգային կենտրոնը:

Հիշեցնենք, որ երեկ հաղորդված տվյալների համաձայն՝ գրանցվել էր կորոնավիրուսի 833 դեպք:

Ընդհանուր առմամբ՝ ապրիլի 7-ին հաստատվել է կորոնավիրուսի 881 դեպք:

Բացասական արդյունք է արձանագրվել 4571 թեստավորման դեպքում: Փաստացի այս պահին բուժվում է 758 անձ:

Վերջին տվյալներով ապաքինվել է 114 անձ, 9 պացիենտ մահացել է:

Ինչպես ավելի վաղ տեղեկացրել էինք   Արցախում կորոնավիրուսով վարակման դեպք է գրանցվել: Այս առիթով Արցախի պետնախարար Գրիգորի Մարտիրոսյանը և Արցախի առողջապահության նախարար  Արայիկ Բաղրյանը  հրատապ ասուլիսով հանդես եկան:

Արցախի պետնախարար Գրիգորի Մարտիրոսյանը  տեղեկացրեց, որ կորոնավիրուսով վարակված անձը գտնվել  է Քաշաթաղի շրջանի Միրիկ գյուղում:

«Շտապօգնության մեքենայով տվյալ  անձը տեղափոխվել է Հայաստան։ Նա բուժում կստանա Երևանում։ Անձը 60 տարեկանից բարձր է և որոշակի ռիսկային խմբում է գտնվում: Վարակված անձը   մեկուսացման մեջ է եղել,  քանի որ համապատասխան ախտանշաններ կային: Ապրիլի 6-ին  փորձանմուշներն ուղարկվել էին ՀՀ համապատասխան լաբորատորիա թեստավորման և այսօր աստացվել է փորձանմուշի  դրական պատասխանը:  Տվյալ անձի  հետ շփում ունեցող անձիք զգուշացվել են ինքնամեկուսացման համար: Մոտ 17  հոգի են : Գյուղում ապրում է մոտ 40 ընտանիք և հնարավոր է ,որ շփումներ եղած լինեն միմյանց հետ: Հետևաբար որոշում է   կայացվել ինքնամեկուսացնել ողջ գյուղը: Արդեն իսկ գյուղապետի միջոցով հանձնարավել  է ,որ հնարավորինս քիչ շփվեն միմյան հետ»,-ասաց Մարտիրոսյանը, հավելելով. « Առողջապահության  համակարգը գործել է արագ և այն պահից ,երբ հաստատվել է դեպքը, ապա նախարարի հանձնարարությամբ համապատասխան  մեքենայով  ուղարկվել է  ՀՀ բուժում ստանալու համար»:

Արցախի պետնախարարը նաև տեղեկացրեց, որ ինքնամեկուսացված քաղաքացիներին կաջակցեն նաև սոցիալական խնդիրների լուծման հարցում:  Բացի այդ, վաղվա ընթացքում ախտահամնան աշխատանքներ կկատարվեն ողջ գյուղում:

ԱՀ առողջապահության նախարար Արայիկ Բաղրյանն էլ ավելացրեց, որ գործողություններ իրականացրել են նաև կոնտակտավորների ընտանիքներում:

«Մեկուսացման օրը կոնտակտավորների  շրջանակը պարզելուց  հետո , բոլորի բկարաններում իրականցվել են  ախտահանման  միջոցառումներ: Բացի այդ,  հորդորել ենք բնակիչներին  խուճապի չմատնվել և հետևել կանոններին : Այս պահին համաճարակային մասնագետները, ոստիկանության աշխատակիցների հետ համատեղ,  գտնվում են Միրիկ համայնքում և իրականացնում են տարբեր աշխատանքներ »,- ասաց նախարարը:

ՀՀ աշխատանքի և սոցիալական հարցերի նախարարությունը ներկայացրել է Պետական օժանդակության 6-րդ ծրագիրը:

«Այս միջոցառման շահառուներն այն ֆիզիկական անձինք են, որոնք 2020թ. հունվարի 1-ից մինչև մարտի 13-ն ընկած ժամանակահատվածում մասնավոր հատվածում գրանցված աշխատող են եղել և աշխատանքից ազատվել են 2020թ. մարտի 13–ից մինչև մարտի 30-ն ընկած ժամանակահատվածում:

Աջակցությունը տրամադրվելու է միանվագ՝ նվազագույն ամսական աշխատավարձի՝ 68․000 դրամի չափով:

Աջակցությունից չեն կարող օգտվել այն անձիք, որոնց վերջին 2 ամիսների միջին ամսական աշխատավարձը գերազանցել է 500 հազար դրամը, ունեն այլ աշխատանք, հանդիսանում են անհատ ձեռնարկատեր, կամ հանդիսանում են կորոնավիրուսի տնտեսական հետևանքների չեզոքացման չորրորդ միջոցառման (shorturl.at/eCV47) շահառու»,- ասված է հայտարարության մեջ:

Հայաստանի Հանրապետության վարչապետ Նիկոլ Փաշինյանը կարծում է, որ 7-րդ գումարման Ազգային ժողովն իր որակով էապես գերազանցում է առնվազն նախորդ մի քանի խորհրդարանների աշխատանքին, իսկ խորհրդարանի իմիջն առաջին հերթին ձևավորում է մեծամասնությունը: Փաշինյանը նման տեսակետ հայտնեց ֆեյսբուքի ուղիղ եթերում՝ պատասխանելով քաղաքացիների հարցերին:

«Կարծում եմ, որ «Իմ քայլը» խմբակցությունը գործում է բավականին էֆեկտիվ: Եվ դրա մասին է խոսում նաև վիճակագրությունը: ԱԺ մոնիտորինգ ծրագիրն ամփոփել է 7-րդ գումարման ԱԺ 3-րդ նստաշրջանի գործունեությունը, ըստ որի ընդունված օրենքների 30 տոկոսը հեղինակել են պատգամավորները, 70 տոկոսը՝ կառավարությունը: Սա ԱԺ մոնիտորինգի շուրջ տասնամյա դիտարկումների արդյունքում գրանցած ամենաբարձր ցուցանիշն է: Այսինքն, պատգամավորների օրենսդրական գործունեությունը երբեք ավելի բարձր, ավելի արդյունավետ չի եղել: Եվ ես որպես նախորդ երկու գումարումների պատգամավոր, նաև դրաից առաջ որպես նախկին խորհրդարանների աշխատանքը լուսաբանած լրագրող, համաձակություն կունենամ ասելու, որ խորհրդարանը, որպես քաղաքական մարմին իր որակով էապես գերազանցում է առնվազն նախորդ մի քանի խորհրդարաններին, և բնականաբար առաջին խորհրդարանական մեծամասնությունը, քանի որ հենց խորհրդարանական մեծամասնությունն է առաջին հերթին ձևավորում խորհրդարանի իմիջը»,-ասաց Փաշինյանը:

«Իմ քայլը» խմբակցության գործունեության վերաբերյալ Փաշինյանը մի դիտարկում արեց: Նա նկատեց, որ, իհարկե, խմբակցությունը ձևավորվել է հայտնի իրադարձությունների համատեքստում և կարծիք հայտնեց, որ դրա ամենակարևոր խնդիրն է՝ կայանալ որպես ամբողջական, գաղափարական հենքի վրա աշխատող քաղաքական թիմ: «Եվ այս առումով կա լուրջ անելիք, և ես հույս ունեմ, որ այդ անելիքը մեր գործընկերների հետ միասին կանենք լիարժեք: Իսկ մինչև այս պահը, կարծում եմ, որ այդ խնդիրը լուծված է բավական արդյունավետ կերպով»,-ասաց Փաշինյանը:

Վարչապետը նշեց, որ խորհրդարանում վերջին մի քանի քաղաքական քննարկումներն իրեն հպարտանալու առիթ են տվել: Նա, մասնավորապես, նկատեց, որ սահմանադրական փոփոխությունների հանրաքվե նշանակելու հարցի քննարկման, հետագայում արտակարգ դրություն հայտարարելու հարցի քննարկման ժամանակ «Իմ քայլը» խմբակցության համար հպարտություն է ապրել:

Կառավարության միջոցառումների 9 փաթեթն ընդունվել է ոչ «ժողովրդի հանդեպ մեծ սիրուց», այլ ելնելով պետության պարտականություններից: Այս մասին NEWS.am-ի հետ զրույցում ասաց Ազգային ժողովի նախկին պատգամավոր, տնտեսագետ Վարդան Բոստանջյանը:

Նրա խոսքով՝ ներկայիս պայմաններում Հայաստանի իշխանությունների գործողությունները կրում են ոչ պրոֆեսիոնալ բնույթ, ինչն անդրադառնում է դրանց արդյունավետության վրա: «Ասածի վկայությունն է Հայաստանում հիվանդացության մակարդակի եւ այն բանի միջեւ տոկոսային հարաբերակցությունը, ինչը տեղի է ունենում հարեւան շատ երկրներում»,- նշեց նա:

Փորձագետի գնահատմամբ՝ ճգնաժամի պայմաններում կարելի է կանխատեսել անշարժ գույքի գնանկում, սակայն ստույգ տվյալների մասին խոսելն առայժմ վաղ է: «Հիմա առաջնայինը առողջապահության ոլորտն է, իսկ մնացյալ բոլոր հարցերը երկրորդ պլան են մղվում»,- ամփոփց Վարդան Բաստանջյանը:

Նշենք, որ մինչեւ հիմա Հայաստանի կառավարությունն ընդունել է հակաճգնաժամային միջոցառումների 9 փաթեթ բնակչության սոցիալ-տնտեսական կյանքը մեղմելու նպատակով:

Հայաստանում ապրիլի 7-ին՝ ժամը 11:00-ի դրությամբ նոր կորոնավիրուսով վարակվելու  20  նոր դեպք է գրանցվել: Այս մասին քիչ առաջ Facebook-ի իր էջում նշեց ՀՀ վարչապետ Նիկոլ Փաշինյանը՝ հավելելով, որ առողջացել է 25 քաղաքացի:

Նա նկատեց, որ թեստավորվել է 211 քաղաքացի: «Ըստ էության, առաջին անգամ է, որ հաստատված դեպքերն ավելի քիչ են, քան առողջացած քաղաքացիները: Մինչեւ շաբաթվա վերջ կհասնենք նրան, որ օրական հազար թեստ կանցկացվի»,-ասաց Փաշինյանը:

«Առողջապահական համակարգի լարվածությունը նվազել է մի փոքր, համակարգը ադապտացվել է։ Այսօրվա դրությամբ 1400 մահճակալ ունենք կորոնավիրուսի համար, բայց դրանց կեսն է միայն զբաղված, ինչը նշանակում է, որ մենք շատ լարված չենք եւ կարող ենք ասել, որ նաեւ լավ է նրանով, որ ծայրահեղ ծանր դեպքերի նվազում ունեցանք, երկու հոգի, որ ծայրահեղ ծանր էին, ավելի լավ վիճակում են»,- ասաց նա։

ՀՀ քննչական կոմիտեի Կոտայքի մարզային քննչական վարչությունում իրականացված մեծածավալ քննչական և այլ դատավարական գործողությունների արդյունքում պարզվել են Հրազդան քաղաքի բնակչի սպանության դեպքի մի շարք հանգամանքներ, շարժառիթը, ենթադրյալ հանցագործությունը կատարած անձի ինքնությունը, որը Ադրբեջանի Հանրապետությունում ծնված, ազգությամբ ազերի, սակայն վերջին 25 տարում Հայաստանի Հանրապետությունում փաստացի բնակվող, ՀՀ քաղաքացի 41-ամյա տղամարդ է՝ տուժողի վաղեմի ծանոթը և հարևանը: Այս մասին հայտնում են ՀՀ քննչական կոմիտեի տեղեկատվությանև հասարակայնության հետ կապերի բաժնից:

Նախաքննությամբ փաստական տվյալներ են ձեռք բերվել այն մասին, որ 2019թ. դեկտեմբերի 18-ին` ժամը 22:30-ի սահմաններում, 41-ամյա տղամարդն իր հարևանի տանն ընթրել և ոգելից խմիչք է օգտագործել նրա հետ, որից հետո նրանց միջև կենցաղային հարցերի շուրջ առաջացած վիճաբանության ժամանակ վերջիններս քաքշել ու հարվածել են միմյանց: Այնուհետև Ադրբեջանի քաղաքացին, բռունցքով հարվածելով հարևանի դեմքին, գետնին է տապալել նրան, ապա, ապօրինաբար կյանքից զրկելու ուղղակի դիտավորությամբ, բռունցքով շարունակել հարվածներ հասցնել նրա գլխին և մարմնի այլ հատվածներին, ինչի հետևանքով ստացած վնասվածքներից վերջինս մահացել է:

Ձեռք բերված բավարար ապացույցների համակցությամբ՝ ենթադրյալ հանցագործություն կատարած անձին մեղադրանք է առաջադրվել՝ ՀՀ քրեական օրենսգրքի 104-րդ հոդվածի (սպանություն) 1-ին մասով:

Նախաքննությունն ավարտվել է, և քրեական գործը, մեղադրական եզրակացությամբ, ուղարկվել է դատարան: