ՀՀ պարետ Տիգրան Ավինյանը կորոնավիրուսի տարածման ներկա իրավիճակի ու ռիսկի խմբերի մասին ամփոփ տվյալներ ներկայացրեց ԱԺ–ում։

ՀՀ պարետ, փոխվարչապետ Տիգրան Ավինյանն այսօր արտակարգ դրության երկարացման հարցով հրավիրված ԱԺ հատուկ նիստում հայտարարեց, որ ՀՀ բնակչության 12 տոկոսը կամ 353 000 մարդ 60 տարեկանից բարձր են և գտնվում են կորոնավիրուսային հիվանդության ռիսկի խմբում։ Բացի տարիքային խմբից, ռիսկային խմբում են նաև խրոնիկ տարբեր հիվանդություններ ունեցող անձինք (շաքարային դիաբետ, սրտանոթային հիվանդություններ), որոնց թիվը հասնում է 300 հազարի` միայն պաշտոնապես գրանցված դեպքերով։

Ավինյանը հայտնեց նաև, որ ներկա պահին ՀՀ առողջապահական համակարգը ունի 1700 հիվանդի հիվանդանոցային պայմաններում սպասարկելու հնարավորություն։

«Ինչը նշանակում է, որ ամենամեղմ հաշվարկներով դա մեզ թույլ է տալիս ունենալ 4500 ակտիվ վարակակիր»,– ասաց նա։

«Սա նշանակում է` 3000 հավելյալ անձ կա, որոնք 14 օրվա ընթացքում կարող են դառնալ վարակակիրներ»,– ասաց Ավինյանը` հավելելով, որ այդ բոլոր անձանց հետ կապ է հաստատվել, նրանցից 21-ը թեստավորվել են, 4-ի մոտ հաստատվել է կորոնավիրուսի առկայությունը։

«Արդեն այսօրվա դրությամբ մենք կունենայինք 30 000 վարակված անձ միայն Երևանում և արդեն իսկ հարյուրավոր մահեր»,– ասաց նա։

Ըստ Ավինյանի` այս մտահոգությամբ է, որ կառավարությունը որոշել է ևս մեկ ամսով երկարացնել արտակարգ դրության ժամկետը։

ՀՀ կառավարությունն այսօր հրավիրված արտահերթ նիստում միաձայն ընդունեց հանրապետությունում արտակարգ դրության ռեժիմը 30 օրով երկարաձգելու որոշումը։ Այն կտևի մինչև 2020 թվականի մայիսի 14-ը` ժամը 17:00-ն ներառյալ։

Հայաստանում կորոնավիրուսով վարակվածների թիվը հասել է 1039–ին։

Քիչ առաջ ավարտվեց մեր հերթական ամենօրյա խորհրդակցությունը՝ կապված կորոնավիրուսով պայմանավորված իրավիճակի հետ. երեկ ունեցել ենք 685 թեստ, որիդ դրական է եղել 28-ը: Այս մասին Facebook-ի իր ուղիղ եթերում նշեց ՀՀ վարչապետ Նիկոլ Փաշինյանը:
Շատ կարեւոր վիճակագրություն ունենք, առաջին անգամ մեր դրական դեպքերը գրեթե կրկնակի ավելի քիչ են, քան առողջացած դեպքերը: Երեկվ դրությամբ մենք 54 առողջացման դեպք ենք ունեցել, դուրսգրում ենք ունեցել: Այս առումով ունենք 786 ակտիվ դեպք, այսինքն ակտիվ դեպքերի որոշակի նվազում ունենք: Սա էլ է առաջին անգամ:
Իհարկե, ունենք նաեւ վատ նորություն, եւս երկու մահ ենք ունեցել: Կարող եմ ասել, որ մահվան դեպքերի տարիքային միջինը կազմում է 74,8 է»,-ասաց Փաշինյանը:
Նա հավելեց, որ այս վիճակագրությունը թույլ է տալիս ասել, որ մենք ունենք հնարավորություն ջարդելու վարակի ողնաշարը:

ՀՀ առողջապահության նախարար Արսեն Թորոսյանը իր ֆեյսբուքյան էջում գրառում է կատարել.

«Վերջին մեկ ամսում «կայծակնային» արագությամբ ձևավորված Կորոնավիրուսի դեմ պայքարի այս առողջապահական համակարգը կարող է «չօգտագործված» մնալ, եթե մենք մնանք տանը»,-նշել է նա։

Հայաստանում ապրիլի 13-ին՝ ժամը 11:00-ի դրությամբ նոր կորոնավիրուսով վարակվելու 26 նոր դեպք է գրանցվել: Այս մասին հայտնում է ՀՀ ԱՆ հիվանդությունների եւ վերահսկման եւ կանխարգելման ազգային կենտրոնը:

Հիշեցնենք, որ երեկ հաղորդված տվյալների համաձայն՝ գրանցվել էր կորոնավիրուսի 1013 դեպք:

Ընդհանուր առմամբ՝ ապրիլի 13-ին հաստատվել է կորոնավիրուսի 1039 դեպք:

Բացասական արդյունք է արձանագրվել 7631 թեստավորման դեպքում (վերջին մեկ օրում՝ 680): Փաստացի այս պահին բուժվում է 814 անձ (վերջին մեկ օրում ավելացել է 11-ով):

Վերջին տվյալներով ապաքինվել է 211 անձ (վերջին մեկ օրում՝ 14 մարդ), 14 պացիենտ մահացել է:

ՀՀ քննչական կոմիտեն այսօր հաղորդագրություն տարածեց, որտեղ մասնավարոպես նշված էր, որ «ՀՀ քրեական օրենսգրքի 179-րդ հոդվածի (յուրացում) 3-րդ մասի 1-ին կետով և 309-րդ հոդվածի (պաշտոնեական լիազորություններն անցնելը) 1-ին մասով քննվող քրեական գործով իրականացված մեծածավալ քննչական և այլ դատավարական գործողությունների արդյունքում պարզվել է, որ 2017թ. Կաննի կինոփառատոնին ՀՀ պատվիրակության մասնակցության ծախսերը հոգալու պատրվակով ՀՀ մշակույթի նախկին նախարարը «Տատիկիս վարսերը» ֆիլմի ռեժիսորից պահանջել և միջնորդավորված, մաս-մաս ստացել է նշված ֆիլմի նկարահանումների համար նախատեսված գումարներից շուրջ 6.800.000 դրամ գումար: Քրեական գործն ուղարկվել է ՀՀ դատախազություն՝ ըստ քննչական ենթակայության ՀՀ հատուկ քննչական ծառայություն ուղարկելու միջնորդությամբ»:

Այս առնչությամբ մշակույթի նախկին նախարար Արմեն Ամիրյանը իր ֆեյսբուքյան էջում արձագանքեց, մասնավորապես նշելով.

«Այսօր Ավագ ուրբաթ է՝ Հիսուսի խաչելության, մահվան ու թաղման հիշատակության օրը։
Սուտն ու կեղծիքը մարդկության պատմության մեջ միշտ էլ ճակատագրական, քայքայիչ դերակատարում են ունեցել, բայց գոնե այս օրերին սուտը, կեղծիքը, կեղծ մատնությունը մեր կյանքում տեղ պետք չէ ունենան։
Փաստորեն, ՀՀ քննչական կոմիտեն, լսելով մեկ, կամ գուցե մի քանի բանսարկուի, կարող է քրեական գործ հարուցել և հետն էլ հրապարակային շեփորահարել, թե տեսեք-տեսեք, նախկին նախարարը յուրացում է կատարել։
Ո՞վ է ինձ գումար տվել, այդ ու՞մ միջոցով եմ ստացել ձեր նշած գումարը։
Չկա որևէ մեկը, որ կարող է ասել, որ ինձ՝ Արմեն Ամիրյանին երբևէ գումար է տվել։
Անամոթաբար ցեխ են շպրտում մարդու վրա, թե գողացել ես, յուրացրել ես, իսկ դուք՝ քննչական կոմիտեի հարգելի քննիչներ, ձեր կենսագրության մեջ ևս մեկ իբր «բացահայտում» եք ավելացնում։
Ես միշտ էլ փող տվող եմ եղել, ոչ թե՝ վերցնող։
Կեղծ մատնությամբ, ստով և կեղծիքով լցոնված բանսարկուներին խորհուրդ կտամ օգտվել առիթից և ապաշխարելով մաքրվել։
Դեռ ուշ չէ, մեծ պահքի ժամանակ ընդհանրապես մաքրվում են։

Վերջում, սիրելի հայրենակիցներ, բոլորին ցանկանում եմ ուրախ զատիկ և անսահման առողջություն»:

«Վերջին 2 օրերին լավ դինամիկա ենք նկատում գների նվազման, բայց դա դեռ չի նշանակում, որ գները հասել են փետրվար ամսվա գներին»,- այսօր՝ ապրիլի 10-ին, կառավարության մամուլի կենտրոնում կայացած ասուլիսի ժամանակ ասաց Տնտեսական մրցակցության պաշտպանության պետական հանձնաժողովի նախագահ Գեղամ Գևորգյանը:

Նա տեղեկացրեց, որ հանձնաժողովի աշխատանքները 24 ժամ շարունակվում են, խումբը հերթափոխով ուսումնասիրություն է իրականացնում Երևանում և մարզերում: Խոշոր տնտեսվարողների մոտ առկա պաշարների մասով անհանգստացնող երևույթներ գոյություն չունեն, պարենային մթերքի քանակը բավարար է:

Արտակարգ պայմաններում տնտեսվարողների կողմից խախտումներ թույլ տալը, նրա խոսքերով, կդիտվի որպես ծանրացնող հանգամանք:

Հանձնաժողովի ուսումնասիրության համաձայն՝ հնդկաձավարի գինը փետրվարին 705 դրամ է եղել, պիկը եղել է ապրիլին՝ 730 դրամ, իսկ այժմ 710 դրամ է, այսինքն՝ նվազում է եղել: Ցիտրուսային մրգերի, մասնավորապես նարինջի դեպքում կա գնի բարձրացում`60 դրամով թանկացել է, բայց դարձյալ փետրվարի գներից հեռու է, ինչը պայմանավորված է բեռնափոխադրումներով:

«Տեղական արտադրության գները, բնականաբար, նվազում են՝ կախված սեզոնային բնույթից: Լոլիկի, վարունգի գինը այժմ ավելի նվազ է, քան փետրվարին, ինչ վերաբերում է ալյուրին, ամսի 8-ի դրությամբ ունենք 5 դրամի նվազում՝ 290-ից դարձել է 285 դրամ, նախնական գինը եղել է 275 դրամ: Հացի գինը խոշոր ցանցերում որևէ կերպ չի փոխվել: Հետաքրքիրն այն է, որ գների բարձրացումը տեղի չի ունեցել միանգամից, այս փաստը ևս կարող է վկայել, որ գները բարձրացան ոչ թե կորոնավիրուսի հետևանքով, այլ որոշակի ժամանակահատվածում: Օրինակ՝ ալյուրի գինը թանկացել է մարտի 14-ից և պահպանվել է մինչև մարտի 26-ը, որը կարող է կապված լինել թե՛ արտարժույթի, թե՛ բեռնափոխադրման որոշակի խնդիրների հետ՝ պայմանավորված տարբեր երկրներում կարանտինային ռեժիմով»,- ասաց Գեղամ Գևորգյանը:

Անդրադառնալով այն ահազանգերին, որ Վանաձորում հացը թանկացել է, հանձնաժողովի նախագահը նշեց, որ հանդիպել են հաց արտադրողների հետ: Ուսումնասիրությունները ցույց են տվել, որ հացը Վանաձորում, ի տարբերություն այլ քաղաքների, ամենաէժաններից է: Վանաձորում գործում է 40-ից ավելի տնտեսվարող սուբյեկտ, չկան գերիշխող դիրք ունեցողներ, և թանկացումը այլ խնդիրներ հետ է կապված եղել, ինչը հիմա ուսումնասիրվում է:

«Մի մասը կապված է եղել ալյուրի գնի հետ, մի մասը՝ փաթեթավորման, քանի որ այս օրերին առավել պաշտպանված փաթեթավորում են օգտագործել, իսկ հիմնական պատճառը սպառման ծավալով է պայմանավորված եղել: Դպրոցներն ու մանկապարտեզները փակ են եղել, չեն կարողացել իրացնել հացաբուլկեղենը: Գնի փոփոխություն է եղել 1-2 տեսակ մատնաքաշի դեպքում, դա էլ պայմանավորված է նրանով, որ մարդիկ սկսել են իրենց բնակարանում հաց պատրաստել: Ի հակառակ հացի,  լավաշի գինը նվազել է: Այս տրամաբանությունը, փաստերը կստուգենք, կհասկանանք: Միակ մտահոգիչ հանգամանքն այն է, որ հացի գնի փոփոխությունը տեղի է ունեցել համատարած, տնտեսվարողները համագործակցության եզրեր են միմյանց ցույց տվել, և սա էլ պետք է հասկանանք, սա մտահոգիչ է մեր օրենքի տեսանկյունից»,- նշեց Գևորգյանը:

Հանձնաժողովի նախագահը նաև տեղեկացրեց, որ համեմատություններ են արվել 2018-2019թթ. նույն ժամանակահատվածի հետ, բայց դա չի արվել գների բարձրացումը արդարացնելու համար:

Հանձնաժողովը հարուցել է նաև վարույթներ կարագի, շաքարի, ձվի, բենզինի և դիզելի շուկաներում: Նախատեսվում է վարույթներ հարուցել նաև կարևոր մյուս ապրանքային շուկաներում, այդ թվում՝ ձեթի, հավի բդի, հավի մսի:

«Հետևում ենք գների դինամիկային, և չի լինի մի սուբյեկտ, որը կխախտի և պատասխանատվության չի ենթարկվի: Ավելին, այս իրավիճակում խախտում անելը կդիտարկվի որպես ծանրացնող հանգամանք»,- զգուշացրեց բանախոսը:

Այսօրվանից առողջապահության նախարարությունը  պատրաստվում է օրական 1000 թեստավորում իրականացնել վարակակիրների հետ կոնտակտավոր մարդկանց շրջանակներում:
Չնայած ոլորտի լավատեղյակները վստահեցնում են, որ այս պահին համավարակի հարցում իրավիճակը վերահսկելի է, բայց անհրաժեշտ է ավելի ուժեղացված ծառայության անցնել՝ հնարավորինս արագ բացահայտելու եւ կանխելու վարակի բոլոր օջախները: Այս աշխատանքն իրականացնելու նպատակով լրացուցիչ լաբորատորիաներ են ներգրավվելու, թոքաբորբ ունեցող հիվանդներին անխտիր թեստավորելու են՝ հասկանալու կորոնավիրուսի արդյունք է, թե ոչ:

Կառավարությունը, ինչպես հայտնի է, մտադիր է եւս մեկ ամսով երկարաձգել արտակարգ դրության ռեժիմը՝ մինչեւ մայիսի 14-ը: Սա առողջապահության նախարարության առաջարկով է արվում, քանի որ այստեղ կարծում են, որ եթե այդ ռեժիմը չեղարկվի, ապա կարող ենք անկառավարելի իրավիճակ ունենալ:

«Մեր առաջարկությունը լինելու է արտակարգ դրությունը երկարացնել, որոշումը կընդունվի՝ հաշվի առնելով շատ հանգամանքներ»,- ասուլիսի ժամանակ հայտարարեց առողջապահության նախարար Արսեն Թորոսյանը: Ըստ նրա՝ դրա մասին հանրությունը կտեղեկացվի:
Անդրադառնալով կորոնավիրուսով վարակված 2 ամսական երեխայի ու մոր առոողջական վիճակին՝ Ա. Թորոսյանն ասաց. «Ենթադրում եմ, որ լավ է վիճակը, այս պահին վատի մասին տեղեկատվություն չունեմ: Ծանր երեխա, կամ երեխայի հետ եղած ծնող այս պահին չունենք»:
Թե քանի դպրոցահասակ հիվանդ երեխա կա, նախարարն ասաց՝ թվային տվյալ չունի:

Հ.Գ-Անցյալ շաբաթ ԱՀԿ-ն կանխատեսել էր Հայաստանում 10 շաբաթ անց 500 հազար վարակակիր ենք ունենալու, ուժեղացված աշխատանքները թերեւս ԱՀԿ կանխատեսումները իրականություն չդառնալու նպատակով են:

Հայաստանում ապրիլի 11-ին՝ ժամը 11:00-ի դրությամբ նոր կորոնավիրուսով վարակվելու 29 նոր դեպք է գրանցվել: Այս մասին հայտնում է ՀՀ ԱՆ հիվանդությունների եւ վերահսկման եւ կանխարգելման ազգային կենտրոնը:

Հիշեցնենք, որ երեկ հաղորդված տվյալների համաձայն՝ գրանցվել էր կորոնավիրուսի 937 դեպք:

Ընդհանուր առմամբ՝ ապրիլի 11-ին հաստատվել է կորոնավիրուսի 966 դեպք:

Բացասական արդյունք է արձանագրվել 6484 թեստավորման դեպքում (վերջին մեկ օրում՝ 1324): Փաստացի այս պահին բուժվում է 780 անձ (վերջին մեկ օրում ավելացել է 3-ով):

Վերջին տվյալներով ապաքինվել է 173 անձ (վերջին մեկ օրում՝ 24 մարդ), 13 պացիենտ մահացել է (վերջին մեկ օրում մահացել է 2 քաղաքացի): Մահերից մեկի մասին երեկ նշել էր առողջապահության նախարար Արսեն Թորոսյանը: