Անցած ամսվա ընթացքում աշխարհում կորոնավիրուսով վարակվածների թիվն ավելացել է գրեթե երեք անգամ՝ 1 միլիոնից դառնալով 3.2 միլիոն մարդ: Սակայն վարակման նոր դեպքերի աճի արագությունը նվազում է արդեն չորս շաբաթ շարունակ. եթե ապրիլի սկզբում այդ թիվն աճում էր շաբաթական 200 տոկոսով, ապա այժմ միայն 21.5 տոկոսով, հաղորդում է ՏԱՍՍ-ը:

Աշխարհում յուրաքանչյուր 100 հազար մարդու շրջանում կա 41 վարակված (մեկ ամիս առաջ այդ թիվը 13 էր):

Ապրիլի ընթացքում կորոնավիրուսի հետեւանքով զոհերի թիվն աճել է շուրջ վեց անգամ՝ 50 հազարից մինչեւ գրեթե 300 հազար մահվան դեպք: Ընդ որում՝ մահացության պայմանական ցուցանիշն ավելացել է ոչ այնքան նշանակալի չափով՝ 5-ից 7.12 տոկոս:

Արագորեն աճում է նաեւ առողջացածների թիվը՝ ամսվա սկզբում առողջացել էր 200 հազար մարդ, իսկ այժմ արդեն ավելի քան 1 միլիոն:

Տվյալ պահին վիրուսը հայտնաբերվել է արդեն 173 երկրներում, անցած ամսի այդ թիվը կազմում էր 164:

Չինաստանն այլեւս առաջին տասնյակում չէ

Մեկ ամիս առաջ վարակվածների թվով առաջատարներն ԱՄՆ-ն էր, Իսպանիան, Իտալիան, Չինաստան ու Գերմանիան:

Միացյալ Նահանգները դեռեւս առաջին տեղում են. երկրում հաստատվել է վարակման ավելի քան 1 մլն դեպք (ապրիլի 3-ին այդ թիվը հինգ անգամ պակաս էր): Այնուհետեւ Իսպանիան է (230 հազար մարդ, մեկ ամսում թիվը քառապատկվել է) եւ Իտալիան, որտեղ կա 203 հազար վարակված (2.5 անգամ աճել է թիվը մեկ ամսում):

Չինաստանը, որն ապրիլի սկզբում զբաղեցնում էր չորրորդ տեղը (84.5 հազար), այժմ անգամ առաջին տասնյակում չէ եւ գտնվում է 11-րդ հորիզոնականում: Մեկ ամսում այդտեղ հայտնաբերվել է օրական մի քանի տասնյակ վարակակիր:

Անցած շաբաթ չորրորդ հորիզոնականում էր Ֆրանսիան, սակայն նրան գերազանցել է Մեծ Բրիտանիան, որը վեցերորդ տեղում էր: Այժմ թագավորությունում արդեն ավելի քան 171 հազար հաստատված դեպք կա:

169 հազար վարակակիրներ ունեցող Ֆրանսիան այժմ հինգերորդ տեղում է, որին հաջորդում է Գերմանիան (161 հազար):

Մեծ Բրիտանիան երրորդն է մահացության ցուցանիշով

Աշխարհում կորոնավիրուսային վարակի հետեւանքով մահացության մակարդակը կազմում է շուրջ 7,12 տոկոս, անցած շաբաթ այն գրեթե 7 տոկոս էր, իսկ մեկ ամիս առաջ՝ 5 տոկոս: Եթե ապրիլի սկզբում մահացել է յուրաքանչյուր 20-րդ վարակվածը, ապա այժմ՝ յուրաքանչյուր 14-րդն է:

Երեք շաբաթ շարունակ մահացածների թվով առաջատարն է ԱՄՆ-ը (60.1 հազար): Իտալիայում, որը տեւական ժամանակ զբաղեցնում էր առաջին տեղը, այդ ցուցանիշը երկու անգամ նվազել է (27.7 հազար): Մահվան դեպքերով երրորդ տեղում է Մեծ Բրիտանիան (26,8 հազար): Իսպանիայում եւ Ֆրանսիայում մահացել է 24,8 հազար եւ 24,3 հազար կորոնավիրուսով վարակված պացիենտ:

Ամենամեծ թվով վարակվածներ ունեցող երկրներում մահացության ամենացածր ցուցանիշները Ռուսաստանում են (1 տոկոս), Թուրքիայում (2.6 տոկոս), Գերմանիայում (4 տոկոս):

Օրեցօր ավելի շատ մարդ է առողջանում

Ապրիլին սրընթաց աճ է գրանցվել առողջացածների շրջանում. 200 հազարից մինչեւ 1 մլն մարդ: Այդկերպ, բուժվել է արդեն յուրաքանչյուր երրորդ վարակակիրը:

Բացի Չինաստանից, որտեղ դուրս է գրվել պացիենտների շուրջ 94 տոկոսը, այդ ցուցանիշով առաջատար է նաեւ Իրանն ու Գերմանիան (համապատասխանաբար՝ 79 եւ 78 տոկոս):

ԱՄՆ-ում բուժվել է վարակվածների դեռեւս 14 տոկոսը, Իտալիայում՝ 37 տոկոսը, իսկ Իսպանիայում՝ արդեն ավելի քան 57 տոկոսը:

Էկոնոմիկայի փոխնախարար Վարոս Սիմոնյանը Կառավարության մամուլի կենտրոնում հրավիրված ասուլիսին ներկայացրեց այն նոր փոփոխությունների փաթեթը, որը ուժի մեջ կմտնի մայիսի 4-ից։

«Հանվելու են ազատ տեղաշարժի սահամանփակումները, այսինքն՝ բոլոր քաղաքացիները ՀՀ տարածքում իրավունք կունենան ազատ տեղաշարժվել, միևնույն ժամանակ պահպանվելու է հանրային տրանսպորտի արգելքը: Դա պայմանվորված է նրանով, որ գործում է և կա որոշակի ռիսկային մոտեցումներ՝ համավարակի տարածման հետ կապված»,- նշեց նա::

Սիմոնյանը խոսքով՝ երբ հրապարակվի որոշումը, կտեսնենք, որ գրեթե բոլոր սահմանափակումները հանվում են, մնում են որոշ սահամանափակումներ տնտեսական գործունեության որոշ տեսակների վերաբերյալ: «Մասնավորապես, սահմանափակումները վերաբերելու են մանրածախ և մեծածախ առևտրին. գերեթե չեն լինելու սահամանափակումներ մանրածախ և մեծածախ առևտրում, միայն պահպանվելու է սահմանափակումը առևտրի իրականացման վայերերում: Մոլերը, հանրախանութները բոլորը փակ են լինելու: Միայն իրենց տարածքում գործող սննդի, պարենային խանութները, դեղատները, ինչպես նաև գյուղատնետական արտադրանքների մասով շուկաները կգործեն»,- նշեց նա:

Փոխնախարարի խոսքով՝ բացվելու է մշակվող արդյունաբերությունը՝ բոլոր գործուենության տեսակներով: Նա նշեց, որ կբացվի նաև տեքստիլը ,կահույքի, կոշիկի արտադրությունը պոլիգրաֆիական և այլ ենթաոլորտները: «Հանրային սննդի կազմակերպման մասով կգործեն այն ռեստորաններն ու սրճարանները, բարերը, որոնք կունենան բացօթյա տարածք. կթույլատրվի վերջիններիս գործունեույթունը, եթե իրենց գործունեույթունը ծավալեն բացօթյա տարածքներում, փակ տարածքներում սպասարկում չի իրականացվի»,- ընդգծեց նա:

Միևնույն ժամանակ Սիմոնյանը նշեց, որ բուսաբանկան և կենդանաբանական այգիները և բնության հատուկ պահպանվող տարածքները նույնպես կբացվեն, արգելոցների գործունեությունը նույնպես կթույլատրվի: «Սպորտային օբյեկտների գործունեությունը բացառապես կթույլատրվի պրոֆսիոնալ մարզիկների մասնակցությամբ սպորտային միջոցառումների անցկացման համար: Նաև անհատական ծառայություններ, որոնց խմբին է դասվում լվացման, մաքրման և չոր մաքրման ծառայություները, գեղեցության սրահների գործունեությունը նույնպես կթույլատրվի սույն թվականի մայիսի 4-ից»,- ընդգծեց նա:

ՀՀ ԱՆ Հիվանդությունների վերահսկման և կանխարգելման ազգային կենտրոնից հայտնում են, որ մայիսի 2-ի ժամը 11։00-ի դրությամբ՝ Հայաստանում գրանցվել է կորոնավիրուսով վարակման 125 նոր դեպք, ընդհանուր՝ 2273։

Առողջացել է ևս 33 պացիենտ, ընդհանուր՝ 1010: Փաստացի բուժում է ստանում 1227 մարդ։

Մահվան դեպքերի թիվն անփոփոխ է՝33։ Մինչ օրս գրանցվել է կորոնավիրուսով վարակի առկայությամբ, սակայն այլ պատճառներով մահվան 3 դեպք։

Անցկացված թեստերի ընդհանուր թիվը կազմում է 23142։

Զինծառայողների ապահովագրության հիմնադրամի հոգաբարձուների խորհրդի անդամ Մեսրոպ Մանուկյանն իր ֆեյսբուքյան էջում գրել է․

«Տեղյակ եք, որ Նիկոլ Փաշինյանի իշխանության գալուց մի քանի ամիս անց, որպես «Զինծառայողների ապահովագրության հիմնադրամի» հոգաբարձուների խորհրդի անդամ, առաջինը բարձրաձայնեցի, որ վարչապետի կողմի հայտարարված թվերը հիմնադրամում չեն արտահայտվում. դրանք կամ յուրացվում են, կամ` թերհավաքագրվում. այդ տենդենցը գնալով խորանում էր, որևէ քայլ չէր ձեռնարկվում, իմ շարունակական բարձրաձայնումները նախկինի պես մնում էին` «ձայն բարբառոյ յանապատի»` իշխանություններին համար դառնալով այլևս խիստ անհաճո:
Ի դեպ. այս ամենին զուգահեռ` հիմնադրամը նաև ինը ամիս շարունակ նիստ չի գումարում: Առ ժամանակ առաջ նամակ ստացա, որ ինձ հեռացնում են հիմնադրամից, խնդրեցի` հարցին իրավական կարգավորում տալ և ինձ ներկայացնել իրավական հիմքը, որովհետև ընտրվել եմ հինգ տարի ժամկետով:
Հ.Գ.Ստացվում է, որ իշխանությունները` գումարների անհամապատասխանության մասին բարձրաձայնողներից փորձում է անպայման ազատվել`այս կամ այն պատրվակով հեռացնելով նրանց հիմնադրամից . . .»

Մինչեւ տարեվերջ 1-2% արդյունաբերության աճը կարող է հաջողություն համարվել: Այս մասին NEWS.am-ի հետ զրույցում ասաց Հայրենական ապրանք արտադրողների միության նախագահ Վազգեն Սաֆարյանը:

Նրա խոսքով՝ արդյունաբերական արտադրության ծավալների կրճատման վրա կանդրադառնա ինչպես ներքին, այնպես էլ արտաքին սպառողի գնողունակությունը:

«Եթե կարողանանք ՀՀ տնտեսական աճը պահպանել 0%-ի մակարդակով, ապա դա լուրջ հաջողություն կլինի կառավարության համար: ՀՆԱ 12,5 մլրդ դրամը, այսինքն՝ 1 մլրդ դոլարի աճը, ինչպես անցած տարի, գրեթե անհնար կլինի ապահովել»,-նշեց փորձագետը:

«Մասնավորապես, հունվար-մարտ ամիսներին տնտեսական ակտիվությունը նվազել է 0,2%-ով»,-հավելեց նա:

Մարտին արդյունաբերական արտադրության ծավալը կազմել է 150,8 մլրդ դրամ, փետրվարին՝ 155 մլրդ դրամ, այսինքն՝ 1,9%  անկում: Եթե համեմատենք 2020-ի եւ 2019-ի մարտի ցուցանիշները, ապա անկումը կկազմի 2%:

Շինարարության ոլորտում մարտին ծավալները կազմել են 16,9 մլրդ դրամ, փետրվարին ՝ 15,1 մլրդ դրամ, այսինքն՝ 14% աճ:

Ինչ վերաբերում է ներքին առեւտրին,  ապա 2020-ի մարտին ծավալները կազմել են  221,9 մլրդ դրամ, փետրվարին՝ 228,2 մլրդ դրամ, անկումը՝ 9,1%: 2019-ի մարտի համեմատությամբ՝ անկումը կազմել է 3,5%:

Մարտին արտահանման ծավալները կազմել են 171 մլն դոլար, փետրվարին՝ 197,5 մլն դոլար (անկումը կազմել է 8% – խմբ.):

Մարտին ներմուծման ծավալները կազմել են 348 մլն դոլար, փետրվարին՝ 366 մլն դոլար (անկումը՝ 9% – խմբ.);

2020-ի մարտին սպառվել է ժամում 622 մլն կՎտ էլեկտրաէներգիա, փետրվարի ՝ 730 մլն կՎտ, անկումը՝  15,4%: Անցած տարվա համեմատությամբ՝ անկումը կազմել է 1%:

Հայաստանի Հանրապետության ազգային անվտանգության ծառայությունը, հետևողական և անզիջում
պայքար մղելով կոռուպցիոն տարաբնույթ դրսևորումների դեմ և հավատարիմ լինելով դրանք արմատախիլ
անելու որդեգրած քաղաքականությանը, կոռուպցիայի հակազդմանն օրենքով իրեն վերապահված
գործառույթների շրջանակներում ձեռնարկված օպերատիվ-հետախուզական միջոցառումների և քննչական
գործողությունների արդյունքում բացահայտել է Երևան քաղաքի «Բնակչության հատուկ սպասարկում»
ՀՈԱԿ-ի գերեզմանատներից մեկի աշխատակիցների կողմից կաշառք ստանալու հերթական առերևույթ
դեպքը։

Ստացված փաստական տվյալների համաձայն՝ Երևան քաղաքի «Բնակչության հատուկ սպասարկում» ՀՈԱԿ-ի գերեզմանատներից մեկի վարիչն ու նույն գերեզմանատան հսկիչը, հանդիսանալով տեղական ինքնակառավարման մարմնի կազմակերպությունում կազմակերպչական և տնօրինչական լիազորություններով օժտված պաշտոնատար անձինք, գործելով նախնական համաձայնությամբ, քաղաքացու կողմից նախընտրելի գերեզմանատանը գերեզմանատեղի հատկացնելու համար վերջինիցս պահանջել են խոշոր չափերի՝ 719 280 ՀՀ դրամին համարժեք 1500 ԱՄՆ դոլար կաշառք:

2020 թ. ապրիլի 29-ին գերեզմանատան հիշյալ հսկիչը նախապես պայմանավորված 1500 ԱՄՆ
դոլար կաշառքը ստանալուց անմիջապես հետո բերման է ենթարկվել ՀՀ ԱԱԾ աշխատակիցների կողմից,
որի անձնական խուզարկությամբ կաշառքի առարկան հայտնաբերվել և առգրավվել է, իսկ վերջինս
խոստովանել է հանցագործության կատարումը։

ՀՀ քրեական օրենսգրքի համապատասխան հոդվածներով առերևույթ հանցագործության դեպքի առթիվ
ՀՀ ԱԱԾ քննչական դեպարտամենտում հարուցված քրեական գործով կաշառք ստացած պաշտոնատար
անձինք ձերբակալվել են։

Նախաքննությունը շարունակվում է, ձեռնարկվում են համապատասխան միջոցառումներ կաշառք
ստանալու հնարավոր այլ հանցադեպերը, կոռուպցիոն շղթայի մեջ ներգրավված այլ անձանց
բացահայտելու և պատասխանատվության ենթարկելու ուղղությամբ։

Բոլոր բաժանորդներին օգնել ենք. 600 հազարից ավելի էլեկտրաէներգիայի բաժանորդներին, մոտ 600 հազարին մոտ գազի բաժանորդներին, 400 հազարից ավելի ջրի բաժանորդներին։  Այս մասին այսօր՝ ապրիլի 30-ին, ֆեսբուքյան ուղիղ եթերում ասաց ՀՀ վարչապետ Նիկոլ Փաշինյանը։

Վարչապետը հայտնեց, որ կոմունալային ճգնաժամի շրջանն ավարտված է.

«Եթե արտառոց բան չպատահի, իսկ մենք գնում ենք կորոնավիրուսի պայմաններում տնտեսական գործունեությունները վերաբացելուն։  Բոլորս առանց բացառության պիտի վճարենք կոմունալները։ Մենք մի պրոբլեմ լուծել ենք եւ մի պրոբլեմ առաջացրել ենք։ Մեր կոմունալ ծախսերի ծրագրերով հիմա առաջնորդվում ենք ոչ թե մարդու սոցիալական նույնականացմամբ, այլ աշխատում ենք ծախսած էլեկտրաէներգիայի եւ գազի չափով, մենք այստեղ ակամա օգնում ենք այն մարդկանց, որոնք այդ աջակցության կարիքը չունեն»։

Փաշինյանը պատմեց, որ կա քաղաքացի, որը ստացել է 300 հազար դրամ աջակցություն, սակայն կոմունալ վճարումներ չի կատարում. «Մեր մեջ մի գաղտնիք եմ ուզում ասել։ Այսօրվա դրությամբ էլ շատ մարդիկ, անուն-ազգանուններով գիտեմ, ովքեր սոցիալական պրոբլեմ չունեն, իրենց մեջ էլ կան բազմաթիվ մարդիկ, որոնք պարտք ունեն այսօրվա դրությամբ հոսանքի կամ գազի դիմաց։ Կոչ եմ անում՝ րոպե առաջ վճարեք կոմունալ վարձերը. ամոթ է։ Եկել ենք մի որոշման եւ խնդրանքի. ովքեր այդ աջակցության կարիքը չունեն եւ իրենց բաժանորդային հաշիվներին այդ գումարները, միեւնույն է, նստելու են, ձեզ կոչ ենք անում, ձեր խղճի մտոք այդ նույն չափով ձեր գրպանից փոխանցում արեք կորոնավիրուսի դեմ պայքարի հիմնադրամին։ Եթե չունեք սոցիալական խնդիր, բայց այս ծրագրերով 11;12;16 ծրագրերով ստացել եք աջակցություն՝ կոմունալ ծախսերի համար, այդ նույն չափով փոխանցում արեք հիմնադրամին»։

Վարչապետն ասաց, որ աջակցության միջոցառումներով շուրջ 5 միլիարդ դրամ է ծախսվում քաղաքացիների կոմունալների ծախսերի համար, եւ, որ այս փուլում Կառավարությունն ինչ պիտի աներ կոմունալների աջակցության համար, արդեն արել է.

«Հիմա տաք ամիսներն են, գազի եւ լույսի վարձերն էականորեն նվազում են, պիտի խնդրենք, որ վերադառնանք հին ռեժիմին, որ բոլորն այս պահից սկսած իրենց վարձերը պիըի վճարեն։ Ճգնաժամն ինչո՞ւ առաջացավ։ Ես ասել եմ, այն պահից երբ հայտարարվեց ֆորս մաժոր, պարզվեց, որ կոմունալների վճարները չեն վճարում ոչ միայն նրանք, ովքեր ճգնաժամի արդյունքում պրոբլեմ են ունեցել, այլեւ համատարած չեն վճարում։ Ինչի արդյունքում առաջացավ պրոբլեմ, որ մեր էներգետիկ եւ գազի համակարգը կարող է հայտնվել կոլապսի առաջ։

Ճգնաժամը ժգնաժամ, ասում ենք՝ 2600 քաղաքացու հոսանք անջատվել է, բայց 2019 թվականի ապրիլին 5 հազար անջատում է եղել, այսինքն՝ հիմա մեր անջատումներն ավելի քիչ են, քան 2019 թվականի ապրիլին»։

ՀՀ ԱՆ Հիվանդությունների վերահսկման և կանխարգելման ազգային կենտրոնից հայտնում են, որ մայիսի 1-ի ժամը 11։00-ի դրությամբ՝ Հայաստանում գրանցվել է կորոնավիրուսով վարակման 82 նոր դեպք, ընդհանուր՝ 2148։

Առողջացել է ևս 48 պացիենտ, ընդհանուր՝ 977: Փաստացի բուժում է ստանում 1136 մարդ։

Մահվան դեպքերի թիվն ավելացել է 1 -ով՝ հասնելով 33-ի։

Անցկացված թեստերի ընդհանուր թիվը կազմում է 22177։

ՌԴ-ում ՀՀ դեսպանատունը տեղեկացնում է, որ դեսպանությունը ջանքեր է գործադրում ստեղծված բարդ իրավիճակում հայտնված հազարավոր քաղաքացիների խնդիրների կարգավորման ուղղությամբ.

«Այս օրերին մենք շարունակում ենք աշխատել գերծանրաբեռնված և գերլարված ռեժիմով՝ ինչպես չվերթների կազմակերպման, այնպես էլ առկա պայմաններում հնարավորինս աջակցելով մեզ դիմած քաղաքացիների օթևանի, սննդի ու առաջին օգնության պարագաներով ապահովման, աշխատանքի ու բուժհաստատություններում տեղավորման բազմաթիվ հարցերի կարգավորման ուղղությամբ։Ինչպես տեղյակ եք, ապրիլ ամսվա ընթացքում կազմակերպված 7 չարտերային թռիչքի արդյունքում հնարավոր դարձավ ապահովել հարյուրավոր քաղաքացիների անվճար վերադարձը Հայաստան, այդ թվում՝ շնորհիվ մեր բարերարների և աջակից կառույցների։Միևնույն ժամանակ հարկ ենք համարում նշել, որ կազմակերպվող չվերթները՝ բազմակողմ ծավալուն աշխատանքի հետ մեկտեղ, պահանջում են հսկայական ֆինանսական միջոցներ։

Ելնելով վերոնշյալից՝ տեղեկացնում ենք, որ հաջորդիվ կայանալիք չվերթներին, որոնց մասին ինչպես և նախկինում կտեղեկացնենք հերթագրված քաղաքացիներին, դեսպանությունը՝ բարերարների և բարեգործական կառույցների աջակցությամբ հնարավորություն կունենա օժանդակելու բացառապես ծայրաստիճան բարդ իրավիճակում հայտնված սահմանափակ թվով քաղաքացիներին։ Խնդրում ենք բոլոր դիմողներին ըմբռնումով մոտենալ ստեղծված իրավիճակին և հաշվի առնել, որ չվերթները լինելու են վճարովի»,- ասված է դեսպանատան հայտարարության մեջ:

ԱԱԾ նախկին տնօրեն, գեներալ-մայոր Արթուր Վանեցյանն արձագաքնել է վարչապետի մամուլի խոսնակի երեկվա հայտարարություններին, դրանց կապակցությամբ կարևոր է համարում տալ հետևյալ հստակ պարզաբանումները։

«Ո՞րն էր խոսնակի հայտարարությունների (Փաշինյանի հանձնարարականի) երեկվա իրական դրդապատճառը։ Պատասխանը մեկն է՝ շեղել հանրության ուշադրությունը երկրի իրական խնդիրներից։ Սա ծանոթ ձեռագիր է, որը մեկ անգամ չէ, որ կիրառվել է այս երկու տարիների ընթացքում։ Նայելով նման դսևորումների ժամանակագրությանը, դժվար չէ նկատել, որ ամեն անգամ, բարդ իրավիճակներում հայտնվելիս, այդ մարդը դիմում է նույն գործելաոճին՝ ստեղծում կեղծ թիրախներ, սլաքներն ուղղում այլոց դեմ։ Այդ թվում՝ իմ։ Հանգամանքների բերումով վարչապետի պաշտոնը զբաղեցրած անձն այս երկու տարիների ընթացքում այդպես էլ չհասկացավ, որ իր գործը ոչ թե էժանագին լրատվական մանիպուլիացիաներն են, այլ՝ երկրի կառավարումը։

Ինչ վերաբերում է ԶՊՄԿ-ում իմ առնչություններին, ապա դա իմ ընտանիքի վարկաբեկման փորձերի շարունակությունն է, ընդամենը այդքանը։ Ոչ մի իրական հիմք։ Իսկ հորս պատկանող բեռնափոխադրող ընկերությունը ԶՊՄԿ-ի հետ սկսել է աշխատել հեռավոր 2014-ից։

Ղեկավարի թելադրանքով՝ խոսնակը հայտարարեց իբր իմ կողմից ձեռք բերված փայաբաժնի մասին։ Գիտեք, կա սուտ, կա մեծ սուտ և կա փաշինյանական սուտ։ Պաշտոնապես հայտարարում եմ, որ վարչապետ Փաշինյանը տեղյակ է իրականությանը, փայաբաժինների փոփոխության ողջ պատմությունը կատարվել է նրա անմիջական գիտությամբ։ Եվ ես որևէ անձնական հետաքրքրություն դրա մեջ չունեմ։ Կրկնում եմ՝ վարչապետը դա բոլորից լավ գիտի։

Մի քանի նկատառում ևս.

Երկրում իսկապես ստեղծվել է բավական ծանր վիճակ՝ պայմանավորված համաճարակով և դրանից բխող տնտեսական խնդիրներով։ Ռիսկերի թերագնահատումը, հապաղումը մեզ կկանգնեցնի բարդ իրականության առաջ։ Մենք հասել ենք այն կետին, երբ մանիպուլիացիաներով այլևս հնարավոր չի լինելու ժամանակ շահել, հետաձգել խնդիրները, մոլորեցնել հանրությանը։ Երեկ Ազգային Ժողովում կատարվածը և Գեղարքունիքի մարզի սահմռկեցուցիչ տեսարանները վկայում են կառավարման խորը ճգնաժամի մասին։ Գրագետ հակաճգնաժամային կառավարումը, հասարակական կոնսոլիդացիան այլընտրանք չունեցող հրամայականներ են։

Օգտվելով նաև որպես քաղաքացի իմ հարց տալու իրավունքից. ի՞նչ եք բանակցել և բանակցում Ղարաբաղի շուրջ։ Փուլայի՞ն, թե՞ փաթեթային տարբերակ։ Ակնկալվում է պարզ պատասխան։ Այս հարցադրումից հնարավոր չի լինելու խուսափել, եթե անգամ խոսնակը կրկնապատկի կեղծ հայտարարությունների չափաբաժինը»։

Հիշեցնենք, որ Նիկոլ Փաշինյանի մամուլի խոսնակը երեկ մասնավորապես հայտարարել էր.

«ԶՊՄԿ-ում Մ. Մինասյանի փայաբաժինն, օրինակ, առերևույթ պաշտոնական լիազորությունների չարաշահմամբ եւ կրկին կեղծ փայատերերի օգնությամբ ձեռք է բերել ԱԱԾ նախկին տնօրեն Արթուր Վանեցյանը։

Վերջինիս հորը պատկանող ընկերությունը դարձել է նաեւ ԶՊՄԿ-ի բեռների խոշոր փոխադրող»։