ՀՀ ազգային անվտանգության ծառայությունում իրականացված մեծածավալ օպերատիվ-հետախուզական համալիր միջոցառումների, քննչական և այլ դատավարական գործողությունների արդյունքում ձեռք են բերվել բավարար ապացույցների համակցության առ այն, որ Հայաստանի Հանրապետության Սահմանադրության 163-րդ հոդվածի 1-ին մասով և «Հայաստանի Հանրապետության դատական օրենսգիրք» սահմանադրական օրենքի 2-րդ հոդվածով սահմանված դատարանների (այսուհետ՝ Դատարան) բնականոն գործունեությունն ապահովելու նպատակով Դեպարտամենտի կազմում ստեղծված ՀՀ սնանկության դատարանի աշխատակազմի ղեկավարի պաշտոնատար անձը 2018-2020 թթ. ընթացքում շահադիտական դրդումներից ելնելով, օգտագործելով իր պաշտոնեական դիրքը, մի շարք քաղաքացիների հրամանագրել է ՀՀ սնանկության դատարանի աշխատակազմի տարբեր հաստիքներում:

Նա, հաստատապես տեղյակ լինելով վերջիններիս կողմից աշխատանքի չհաճախելու և աշխատանքային պարտականությունները չկատարելու հանգամանքի մասին, կազմել, հաստատել և իր ստորագրությամբ վավերացրել է իրավունք վերապահող պաշտոնական փաստաթուղթ հանդիսացող, իրավաբանական նշանակություն ունեցող փաստեր հավաստող, բովանդակությամբ կեղծ «Աշխատաժամանակի հաշվարկի տեղեկագրեր», որոնցում կեղծ տեղեկություններ է ներառել աշխատակիցներ թվով 5 քաղաքացիների աշխատանքի հաճախելու և փաստացի աշխատած ժամաքանակի վերաբերյալ, ապա բովանդակությամբ կեղծ փաստաթղթերը շրջանառության մեջ դնելով, ներկայացրել է վճարման, որի արդյունքում պետական բյուջեից չաշխատած օրերի դիմաց որպես աշխատավարձի գումարներ անհիմն դուրս է գրվել առանձնապես խոշոր չափերով՝ 9.340.946 ՀՀ դրամ, որն էլ, օգտագործելով իր պաշտոնեական դիրքը, վատնման եղանակով հափշտակել է:

Դեպքի առթիվ ՀՀ ԱԱԾ քննչական դեպարտամենտում ՀՀ քրեական օրենսգրքի 179-րդ հոդվածի 3-րդ մասի 1-ին կետի և 314-րդ հոդվածի 1-ին մասի հատկանիշներով հարուցվել է քրեական գործ, կատարվում է նախաքննություն:

Քրեական գործով Բարձրագույն դատական խորհրդին նախապես իրազեկելուց հետո քննչական գործողություններ են կատարվել ինչպես Սնանկության դատարանի վարչական շենքում, այնպես էլ՝ ՀՀ սնանկության դատարանի աշխատակազմի ղեկավարի փաստացի բնակության վայրում, որի ընթացքում  հայտնաբերվել և առգրավվել են տարբեր անձանց անուններով ձևակերպված աշխատավարձի վճարային քարտեր, արտարժույթով առկա գումարներ, արտարժույթով գումարներ տրամադրելու վերաբերյալ գրառումներ պարունակող փաստաթղթեր, ինչպես նաև քրեական գործի համար ապացուցողական նշանակություն ունեցող այլ նյութեր:

2020 թ. հուլիսի 27-ին հանցանք կատարելու մեջ անմիջականորեն ծագած կասկածանքի հիման վրա քննչական դեպարտամենտ է բերման ենթարկվել ՀՀ սնանկության դատարանի աշխատակազմի ղեկավարը, ով հարցաքննվել է կասկածյալի դատավարական կարգավիճակում և տվել խոստովանական ցուցմունքներ՝ ամբողջությամբ հատուցելով նաև պետությանը պատճառված վնասը:

Ձեռնարկվում են համալիր միջոցառումներ՝ դեպքի բոլոր հանգամանքները պարզելու, առերևույթ հանցանք կատարած անձանց ամբողջական շրջանակը պարզելու, նրանց արարքին համարժեք քրեաիրավական գնահատական տալու և արդյունքում ՀՀ քրեական դատավարության օրենսգրքի 2-րդ հոդվածով նախատեսված խնդիրներն արդյունավետ կենսագործելու ուղղությամբ:

ԱԱԾ-ն տեղեկացնում է, որ հանրային կառավարման տարբեր ոլորտներում առկա կոռուպցիոն դրսևորումները բացահայտելու, դրանք իսպառ բացառելու գործելաոճը կրելու է շարունակական բնույթ և Ծառայությունը ցուցաբերելու է առավել անհանդուրժողական մոտեցում՝ հատկապես հանրային միջոցների հափշտակության վերաբերյալ դեպքերով, և հորդորում է ցուցաբերել իրավահպատակ վարքագիծ:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։

Երբ Ուկրաինան ուղղակիորեն հայտարարեց, որ աջակցում է Ադրբեջանի տարածքային ամբողջականությանը, անհրաժեշտություն առաջացավ հիշեցնել մեր ընկերներին Կիեւում, որ իրենք կանգնած են Ղրիմի խնդրինժ առջեւ: Այս մասին NEWS.am-ի թղթակցի հետ զրույցում ասաց Ադրբեջանի հարցերով փորձագետ Գրիգորի Այվազյանը:

Ըստ Այվազյանի՝ եթե նրանք շարունակեն հավատարիմ մնալ այդպիսի «անաչառ» քաղաքականությանը, ապա պետք է նաեւ իմանան, որ Հայաստանը ճանաչում է Ղրիմի ժողովրդի՝ Ռուսաստանի հետ վերամիավորվելու օրինական իրավունքը: «Թող Ուկրաինայում, եւ հատկապես՝ քաղաքական էլիտայի շրջանում, հստակ իմանան եւ գիտակցեն, որ կա նեւ Դոնբասի հանրապետությունների խնդիրը: Եվ եթե Ուկրաինան շարունակի պաշտպանել Ադրբեջանին նույն ձեւով, նույն ճանապարհով, ապա հնարավոր է, որ հայկական կողմը ճանաչի Դոնբասի անկախությունը, եւ դա տեղի կունենա նույնիսկ նախքան իր կողմից Ղարաբաղի անկախության ճանաչումը»,- ասաց փորձագետը՝ կոչ անելով ուկրաինական իշխանություններին ավելի զուսպ դիրքորոշում որդեգրել։

Հանդես գալով հօգուտ այն բանի, որ բանակցություններում Ստեփանակերտը ներկայացնի Հայաստանը, Ադրբեջանն արձանագրում է, որ Լեռնային Ղարաբաղը դրա մի մասն է հանդիսանում։ ՀՀ վարչապետ Նիկոլ Փաշինյանը նման հայտարարություն է արել РБК-ին տված հարցազրույցում։

Նրա խոսքով՝ Ղարաբաղյան հակամարտությունը հնարավոր չէ լուծել առանց իշխանությունների, առանց Լեռնային Ղարաբաղի կառավարության։ Եթե նախագահ Ալիևը ցանկանում է, որ Հայաստանի վարչապետը Լեռնային Ղարաբաղը ներկայացնի բանակցությունների սեղանի շուրջ, ապա դրանով նա, ըստ էության, արձանագրում է, որ Լեռնային Ղարաբաղը Հայաստանի մի մասն է։

«Չէ՞ որ եթե այդպես չէ, ապա ինչո՞ւ պետք է Հայաստանի վարչապետը ներկայացնի այն։ Միայն ես չեմ ասում, որ Լեռնային Ղարաբաղը Հայաստան է։ Այդ Իլհամ Ալիևը, Ադրբեջանն են (ընդհանուր առմամբ) ասում, որ Լեռնային Ղարաբաղը Հայաստան է, չէ՞ որ նրանք պնդում են, որ ՀՀ վարչապետը պետք է բանակցությունների սեղանի շուրջ ներկայացնի Ստեփանակերտը»,-ասել է Փաշինյանը։

Վարչապետի խոսքով` եթե միջազգային հանրությունը նույնպես պնդում է, որ այդպես պետք է լինի, ապա նրանք ևս խոստովանում են, որ Լեռնային Ղարաբաղը Հայաստանի մասն է։

«Եթե այդպես է, եկեք արձանագրենք այդ փաստը և անցնենք առաջ»,-նշել է Փաշինյանը։

Նա ուշադրություն է հրավիրել այն հանգամանքին, որ հակամարտության լուծումը պետք է ընդունելի լինի Հայաստանի, Լեռնային Ղարաբաղի և Ադրբեջանի ժողովուրդների համար։

Ի պատասխան Ադրբեջանի նախագահն առաջարկեց հռետորաբանություն, որը կար մինչև 2018 թվականը՝ հակամարտության լուծում, որն ընդունելի է միայն Ադրբեջանի ժողովրդի համար։

Ինչ վերաբերում է Հայաստանի և Ադրբեջանի առաջնորդների հանդիպումներին, ապա, Փաշինյանի խոսքով, դրանք ինքնանպատակ չեն։

«Նախևառաջ պետք է կայունացնել իրավիճակը։ Հայաստանի համար անընդունելի է սպառնալիքների տակ բանակցային գործընթաց վարելը։ Նման բան անհնար է պատկերացնել»,-ասել է Փաշինյանը։

Նա նշել է, որ մի քանի անգամ խորհուրդ է տվել չխոսել Հայաստանի հետ ուժի տեսանկյունից։ Տավուշի իրադարձությունները ցույց տվեցին, թե որքան անիմաստ են նման փորձերը։

Ինչ վերաբերում է միջազգային հանրության դիրքորոշմանը, ապա հասկանալի է, որ յուրաքանչյուր սրացման դեպքում Հայաստան ու Ադրբեջանը միմյանց են մեղադրում։

«Ի՞նչ անել այս իրավիճակում։ Կա կոնկրետ միջոց՝ ստեղծել ԵԱՀԿ Մինսկի խմբի համանախագահների կողմից հրադադարի ռեժիմի խախտման դեպքերի դիտարկման և հետաքննության մեխանիզմ»,-ասել է Փաշինյանը

Նրա խոսքով՝ Երևանը միշտ էլ առաջարկել է կիրառել այդ մեխանիզմը, բայց Ադրբեջանը չի ընդունում այդ առաջարկը։ Մյուս կողմից, Փաշինյանը հույս է հայտնել, որ Տավուշի դեպքերից հետո բոլորը կհանգեն այդ որոշմանը։

Հայաստանում հուլիսի 29-ին՝ ժամը 11:00-ի դրությամբ նոր կորոնավիրուսով վարակվելու 308 նոր դեպք է գրանցվել: Այս մասին հայտնում է ՀՀ ԱՆ հիվանդությունների եւ վերահսկման եւ կանխարգելման ազգային կենտրոնը:

Ընդհանուր առմամբ՝ հուլիսի 29-ին հաստատվել է կորոնավիրուսի 37937 դեպք:

Ընդհանուր թեստերի թիվը կազմում է 160380, վերջին մեկ օրում` 1853 նոր թեստավորում:

Փաստացի այս պահին բուժվում է 9165 պացիենտ, պակասել է 165-ով:

Վերջին տվյալներով ապաքինվել է 27824 անձ` վերջին մեկ օրում 467 անձ:

Ընդհանուր առմամբ, 723 պացիենտ մահացել է (ավելացել է 4-ով):

Արձանագրվել է մահվան 2 դեպք, երբ պացիենտների մոտ հաստատվել է կորոնավիրուսային վարակ, սակայն մահը վրա է հասել այլ հիվանդության պատճառով: Այդպիսի դեպքերի ընդհանուր թիվը 225 է:

Պացիենտները եղել են 83 (կին), 64 (կին), 84(տղամարդ) եւ 68 (կին) տարեկան։ Բոլորն ունեցել են ուղեկցող քրոնիկական հիվանդություններ

Ազգային անվտանգության ծառայությունն e-draft.am կայքում հանրային քննարկման է ներկայացրել նախագիծ՝ «Պետական սահմանի մասին» օրենքում լրացում կատարելու մասին։ ԱԱԾ հիմնավորմամբ՝ նախագծի ընդունման անհրաժեշտությունը պայմանավորված է այն հանգամանքով, որ ներկայումս օրենքով կանոնակարգված չէ ՀՀ պետական սահմանի սահմանային շերտում տեսալուսանկարահանող սարքերի և անօդաչու թռչող սարքերի օգտագործումը:

«Սահմանամերձ բնակավայրի բնակիչների կամ զբոսաշրջիկների կողմից կատարվող նկարահանումները տեսալուսանկարահանող սարքերի և անօդաչու թռչող սարքերի միջոցով, չեն վրիպում սահմանակից պետության սահմանապահ ծառայության ներկայացուցիչների ուշադրությունից, որն իր հերթին վերջինների կողմից նշված գործողությունների վերաբերյալ բողոքի արտահայտման տեղիք է տալիս»,- ասված է հիմնավորման մեջ:
Նշվում է նաև, որ տեսալուսանկարահանող սարքերի և անօդաչու թռչող սարքերի օգտագործումը կարող է խիստ բացասական անդրադառնալ ՀՀ պետական սահմանի պահպանմանը, որից ելնելով էլ առաջարկվում է որոշ սահմանափակումներ կիրառել սահմանային շերտում տեսալուսանկարահանող սարքերի՝ այդ թվում անօդաչու թռչող սարքերի օգտագործման համար։

Միշտ էլ եղել է քննադատություն Մինսկի խմբի առկա ձեւաչափի վերաբերյալ: Այս մասին «Ամերիկայի ձայնին» տված հարցազրույցում նշել է ԵԱՀԿ Մինսկի Խմբի ամերիկացի նախկին համանախագահ Ջեյմս Ուորլիքը՝ անդրադառնալով հարցին, թե ո՞րն է Մինսկի խմբի համանախագահների անելիքը այս իրավիճակում:

«Ես շատ ուրախացա, երբ տեսա դրական հայտարարություն ՌԴ ԱԳ փոխնախարարի կողմից, որը խաղաղ կարգավորման եւ բանակցությունների վերսկսման կոչ էր անում: Դա ամրապնդեց այն ուղերձը, որ Մինսկի խմբի երկրները պետք է շատ ակտիվ լինեն եւ ներգրավված: Համանախագահները այս հարցում պետք է լինեն առաջատարի դերում:

Խնդիրը ձեւաչափը չէ, մենք կարող ենք այն փոխել, ներգրավել նոր բանակցողների: Խնդիրն այն է, որ այս հակամարտությանը վերջ տալու համար պետք է Հայաստանի եւ Ադրբեջանի իշխանությունների եւ ժողովուրդների քաղաքական կամքը լինի, ինչը մինչ այժմ չենք տեսնում: Ինձ անհանգստացնում է, որ մերձենալու փոխարեն երկու երկրներում էլ տրամադրությունները ավելի կոշտ են դառնում: Նկատում եմ տրամադրություն, որ խնդրի միակ լուծումը պատերազմով է, եւ դա շատ ցավալի է, որովհետեւ դա միակ միջոցը չէ: Առկա է դիրքորոշման կարծրացում:

Երբ ես դեռ նախագահ ի, մենք դեռ խոսում էինք Մադրիդյան սկզբունքների եւ կարգավորման այն սկզբունքների մասին, որոնք ապագա համաձայնության հիմքում պետք է լինեին:

Եթե պետք է նոր ձեւաչափ եւ պետք է նոր բանակցողներ ներգրավել, ապա եկեք անենք դա, բայց իմ իմ մտավախությունն այն է, որ չկա քաղաքական կամք պարզապես: Դա վերաբերում է թե նախագահի, թե վարչապետին: Հակամարտության սրացումը շատ վտանգավոր է եւ երկու երկրներն էլ կարող են չափազանց բարձր գին վճարել դրա համար: Ինձ անհանգստացնում է նաեւ այն, որ  լարվածությունը կարող է էլ ավելի աճել» Եվ սա դեռ տեղայնացված բախում էր»,-ընդգծեց նա:

ՀՀ ՊԵԿ մաքսային ծառայության իրավասու պաշտոնատար անձինք, իրենց պաշտոնեական դիրքը ծառայության շահերին հակառակ օգտագործելով, 2018թ. մարտի 1-ին ընդունված «Աջակողմյան ղեկային տեղաբաշխմամբ տրանսպորտային միջոցների ներմուծումն արգելելու մասին» ՀՀ օրենքով սահմանված կարգով պարտավորված լինելով 2018թ. ապրիլի 1-ից արգելել «բաց թողում ներքին սպառման համար» մաքսային ընթացակարգով աջակողմյան ղեկային տեղաբաշխմամբ տրանսպորտային միջոցների, ինչպես նաև ֆիզիկական անձանց անձնական օգտագործման տրանսպորտային միջոցների ազատ շրջանառության համար բաց թողնելու նպատակով ՀՀ տարածք ներմուծելը, առանց նույն օրենքով սահմանված՝ որպես բացառություն նախատեսված հանգամանքների առկայության, շահադիտական դրդումներից ելնելով, թույլատրել են աջակողմյան ղեկային համակարգով ավտոմեքենաների ներմուծումը ՀՀ տարածք, որից հետո՝ 2020 թվականին, ավտոմեքենաների մաքսազերծումը և բացթողումը Հայաստանի Հանրապետություն:

Մինչ այդ, նույն պաշտոնատար անձանց կողմից մաքսազերծման համար լրացված փաստաթղթերում փաստացի աջակողմյան ղեկային համակարգի փոխարեն ակնհայտ կեղծ տեղեկություններ են ներառվել ղեկային համակարգի տեղադիրքի վերաբերյալ՝ այն նշելով ձախակողմյան, որպիսի գործողությունների հետևանքով խաթարվել է պետական մարմնի՝ ՀՀ ՊԵԿ մաքսային ծառայության հեղինակությունն ու համբավը, տրանսպորտային միջոցներ ներկրած և օրենքի ուժով մաքսազերծման հնարավորությունից զրկված քաղաքացիների իրավահավասարությունը՝ էական վնաս պատճառելով հասարակության և պետության իրավունքներին ու օրինական շահերին:

Վերոգրյալից բացի, նյութերի նախապատրաստմամբ փաստական տվյալներ են ձեռք բերվել նաև առ այն, որ ՀՀ ոստիկանության հաշվառման-քննական բաժանամունքների իրավասու պաշտոնատար անձինք, ՀՀ կառավարության 2010 թվականի սեպտեմբերի 9-ի թիվ N-1251-ն որոշմամբ սահմանված կարգով լիազորված լինելով տրանսպորտային միջոցները հաշվառել «զննության կայան-վճարման վայր-սպասարկման սրահ-փաստաթղթերի տպագրման և հատկացման սրահ» հոսքագծի եղանակով, ի թիվս այլնի, նույն ընթացակարգով պարտավորված լինելով զննել քաղաքացիների կողմից հաշվառման-քննական բաժանմունք ներկայացրած տրանսպորտային միջոցները և դրանց իրական տվյալները համեմատել փաստաթղթային տվյալների հետ, 2019-2020 թթ. ընթացքում, պարբերաբար, քաղաքացիների կողմից ՀՀ տարածք ներմուծված աջակողմյան ղեկային համակարգով ավտոմեքենաները, որպես ձախակողմյան ղեկային համակարգով տրանսպորտային միջոց հաշվառելու, ըստ այդմ դրանց սեփականության փաստը ճանապարհային ոստիկանությունում գրանցելու և հետագայում ՀՀ տարածքում անարգել տնօրինելու, տիրապետելու կամ օգտագործելու հնարավորություն տալու համար, ինչպես անձամբ, այնպես էլ միջնորդների միջոցով մեկ միասնական դիտավորությամբ, կաշառք տվողի կամ նրա ներկայացրած անձի օգտին պաշտոնատար անձի կողմից իր լիազորությունների շրջանակում որևէ գործողություն կատարելու կամ չկատարելու համար, յուրաքանչյուր ավտոմեքենայի գրանցման համար ընդհանուր խոշոր չափերով կաշառք ստացած գումարների դիմաց օրենքով սահմանված կարգի խախտմամբ՝ առանց փաստացի ստուգելու ավտոմեքենայի փաստաթղթերը և զննելու ավտոմեքենայի ղեկանիվի տեղադիրքը, հաստատապես համոզված լինելով ավտոմեքենաների՝ աջակողմյան ղեկային համակարգով աշխատելու հանգամանքի մասին, կազմված արձանագրություններում և հաշվառման համար հիմք հանդիսացող այլ փաստաթղթերում ակնհայտ կեղծ տեղեկություններ են ներառել ավտոմեքենաների՝ փաստացի ձախակողմյան ղեկային համակարգով աշխատելու վերաբերյալ և դրանց հիման վրա տվել ժամանակավոր հաշվառման համարանիշներ:

Դեպքի առթիվ ՀՀ ԱԱԾ քննչական դեպարտամենտում ՀՀ քրեական օրենսգրքի 308-րդ հոդվածի 1-ին մասով, ՀՀ քրեական օրենսգրքի 311-րդ հոդվածի 3-րդ մասի 3-րդ կետով, ՀՀ քրեական օրենսգրքի 38-311-րդ հոդվածի 3-րդ մասի 3-րդ կետի, ՀՀ քրեական օրենսգքրի 312-րդ հոդվածի 2-րդ մասով և ՀՀ քրեական օրենսգրքի 314-րդ հոդվածի 1-ին մասով նախատեսված հանցագործության հատկանիշներով հարուցվել է քրեական գործ, կատարվում է նախաքննություն:

Ձեռնարկվում են քրեադատավարական և օպերատիվ-հետախուզական միջոցառումներ կոռուպցիոն սխեմայում ներգրավված մյուս պաշտոնատար անձանց և քաղաքացիների ինքնությունները պարզելու, նրանց արարքներին քրեաիրավական գնահատական տալու համար:

ԱԱԾ մամուլի կենտրոն

Ստամբուլի Քումքափը թաղամասի մեծածախ  հագուստներ վաճառող խանութների փողոցում ադրբեջանցիները հայ երիտասարդի վրա են հարձակվել։

Ինչպես տեղեկացնում է Ստամբուլի հայկական «Ակոս»–ը. Հարձակման ենթարկված երիտասարդի մայրը պատմել է, որ իրենք տաքսի էին ցանկացել նստել, երբ մի խումբ ադրբեջանցիներ մոտեցել են իրենց եւ Ղարաբաղից հարցեր տվել։

«Չնայած մենք ասացինք, որ այդ հարցերով հետաքրքրված չենք, նրանք հարձակվեցին»,–ասել է մայրը։

https://www.youtube.com/watch?time_continue=29&v=rO27wINqjsg&feature=emb_logo

Հայաստանում հուլիսի 28-ին՝ ժամը 11:00-ի դրությամբ նոր կորոնավիրուսով վարակվելու 236 նոր դեպք է գրանցվել: Այս մասին հայտնում է ՀՀ ԱՆ հիվանդությունների եւ վերահսկման եւ կանխարգելման ազգային կենտրոնը:

Ընդհանուր առմամբ՝ հուլիսի 28-ին հաստատվել է կորոնավիրուսի 37626 դեպք:

Ընդհանուր թեստերի թիվը կազմում է 158527, վերջին մեկ օրում` 1061 նոր թեստավորում:

Փաստացի այս պահին բուժվում է 9330 պացիենտ, պակասել է 463-ով:

Վերջին տվյալներով ապաքինվել է 27357 անձ` վերջին մեկ օրում 692 անձ:

Ընդհանուր առմամբ, 719 պացիենտ մահացել է (ավելացել է 8-ով):

Արձանագրվել է մահվան 2 դեպք, երբ պացիենտների մոտ հաստատվել է կորոնավիրուսային վարակ, սակայն մահը վրա է հասել այլ հիվանդության պատճառով: Այդպիսի դեպքերի ընդհանուր թիվը 223 է:

6 օր առաջ էի գրել, որ ստեղծված իրավիճակում Ադրբեջանը որպես տակտիկական լուծում գործի է դնելու դիպուկահար խմբերին։ Այս մասին գրել է «Հենակետ» վերլուծական կետրոն ՀԿ ղեկավար, Արցախի նախագահի անվտանգության հարցերով նախկին խորհրդական Տիգրան Աբրահամյանը։ Նա մասնավորապես նշել է

«Ցավոք այսօր զոհ ունեցանք, բայց դա չի նշանակում, որ թշնամին միայն գիշերն է գործել։ Ակնհայտ է, որ օրեր շարունակ դիպուկահար խմբերը սահմանի բոլոր ուղղություններով փորձել են մեզ կորուստ հասցնել։

Այս իրավիճակը դեռ կշարունակվի, ընդ որում՝ թիրախները շատ տարբեր են։

Ավելի վաղ տեղեկացրել էինք, որ Հուլիսի 27-ին, ժամը 01.10-ի սահմաններում, ՀՀ հյուսիսարևելյան ուղղությամբ տեղակայված զորամասերից մեկի մարտական դիրքում, հակառակորդի կողմից դիպուկահար հրազենից արձակված կրակոցից մահացու հրազենային վիրավորում է ստացել պայմանագրային զինծառայող Աշոտ Գևորգի Միքայելյանը: