Կորոնավիրուսի համավարակի պատճառով 364 հազար 489 զբոսաշրջիկ Հայաստան չի եկել։ Հենց այսքան զբոսաշրջիկ էր երկիրն ակնկալում 2020 թվականի երկրորդ եռամսյակում, հետևաբար հանրապետությունը միայն այս ընթացքում զրկվել է 264 միլիոն 619 հազար 14 դոլարից։

Sputnik Արմենիայի հարցմանն ի պատասխան ՀՀ զբոսաշրջության պետական կոմիտեից տրամադրել են այս տեղեկությունը։

Որ ավելի պարզ լինի, ներկայացնենք մանրամասն վիճակագրություն։

Ինչի՞ մասին են վկայում թվերը

Կոմիտեի տրամադրած տեղեկության համաձայն՝ 2019 թվականին Հայաստան է ժամանել 4 միլիոն 319 հազար 618 մարդ։ 2018 թվականի համեմատ դա 14,9%-ով ավելի շատ է։ Այդքան այցելուներից զբոսաշրջության նպատակով երկիր էին ժամանել 1 միլիոն 894 հազար 377-ը, ինչը 14,7%-ով ավելի շատ է, քան 2018 թվականին։

Մինչդեռ 2019 թվականի հունվար-հունիսին Հայաստան են այցելել 770 հազար 55 զբոսաշրջիկ։ 2020 թվականին առաջին եռամսյակի ընթացքում արդեն 311 հազար 264 զբոսաշրջիկ էր եկել մեր երկիր։

Երկրորդ եռամսյակում (ապրիլ-հունիս) միջինում ակնկալվում էր, որ 364 հազար 489 մարդ է ժամանելու։ Սակայն համավարակի հետևանքով փակված սահմանների պատճառով սպասվող զբոսաշրջիկներն այդպես էլ չեկան։

Որքա՞ն է կորուստը

Կոմիտեն հայտնում  է, որ երկրի անցակետերում 2013 թվականին անցկացրած վերջին ուսումնասիրության համաձայն՝ մեկ զբոսաշրջիկը միջինում 17,4 օր է մնում մեր երկրում ու միջինը օրական 41,8 դոլար է ծախսում։

Հաշվի առնելով, որ ուսումնասիրությունը 2013 թվականին է արվել ու այն ժամանակվանից հետո շատ բան է փոխվել, այդ թվում՝ ենթակառուցվածքների ու զբոսաշրջության դիվերսիֆիկացիայի առումով, կոմիտեի տվյալներով, զբոսաշրջիկը Հայաստանում միջինը 726 ԱՄՆ դոլար է ծախսում։

Հաշվի առնելով  Հայաստան չեկած զբոսաշրջիկների միջինացված ցուցանիշներն ու զբոսաշրջիկների կողմից ծախսվող միջին գումարը, եզրակացնում ենք, որ 2020 թվականի երկրորդ եռամսյակում Հայաստանը 264 միլիոն 619 հազար 14 դոլար է կորցրել։

Իսկ  Զբոսաշրջության պետական կոմիտեն նախորդ տարի 2020 թվականի համար զբոսաշրջիկների հոսքի 14-15% աճ էր կանխատեսում։

Ի՞նչ անեն ոլորտի ներկայացուցիչները

Կորոնավիրուսի հետևանքները մեղմելու նպատակով հակաճգնաժամային օժանդակության 23-րդ փաթեթը նախատեսում է օգնություն ցուցաբերել ընկերություններին, որոնք ներգրավված են հյուրանոցային բիզնեսում, հանրային սննդի ու զբոսաշրջային ոլորտի ուղղություններում։ Շահառու կարող են դառնալ միկրոձեռնարկություններն ու մասնավոր ընկերությունները, որոնք գրանցվել են մինչ 2020 թվականի մարտի 31-ը։

Մասնավորապես՝ օգնություն է ցուցաբերվում աշխատավարձ վճարելու համար։ Եթե վերջին տարվա ընթացքում ընկերությունը պահել է իր աշխատակիցների ավելի քան 70%-ին, յուրաքանչյուր երրորդ աշխատակցի հաշվարկով դրամաշնորհ կստանա։ Այն պահին, երբ ընկերության ֆինանսական վիճակը կայունանա ու շրջանառությունը գերազանցի նախորդ տարվա նույն ժամանակահատվածի շրջանառության 70%-ը, պետական աջակցությունը կդադարեցվի։

Աջակցություն չեն ստանա այն ընկերությունները, որոնց 2019 թվականին վերադարձվել է  ԱԱՀ-ի ավելի քան 50 միլիոն դոլարը, բայց կրճատել են աշխատակիցների ավելի քան կեսին։ Օգնություն չեն ստանա նաև այն ընկերությունները, որոնք թաքցնում են իրենց շրջանառությունն ու ՀԴՄ կտրոններ  չեն տրամադրում։․

Աջակցությունը տրամադրվելու է 2020 թվականի հուլիսի 1-ից մինչև 2021 թվականի մարտի 1-ը։

Ի՞նչ է անում Կոմիտեն

Ներկայիս ճգնաժամը հաղթահարելու նպատակով կոմիտեն հետագա քայլեր է մշակում։ Դրանք ներառվելու են հետճգնաժամային մարքեթինգային ծրագրի մեջ։

Իսկ այժմ ներքին զբոսաշրջության ակտիվացման ֆոնին կոմիտեն առանձնահատուկ ուշադրություն է դարձնում զբոսաշրջային վայրերում և օբյեկտներում եղած խնդիրների լուծմանը։

«Այս պահին իրականացվում են Գորիս համայնքի ժառանգության հանգույցի վերականգնում, Խոր Վիրապ վանքի հարակից շրջակայքի բարեկարգում և Գառնու քարերի սիմֆոնիա զբոսաշրջային գոտու բարեկարգում ենթածրագրերի շինարարական աշխատանքները», — նշված է Sputnik Արմենիայի հարցման պատասխանում։

2020-2021 թվականներին նախատեսվում է զարգացնել Ջերմուկ քաղաքի զբոսաշրջային ենթակառուցվածքները, բարեկարգել Գյումրու պատմական փողոցներն ու բարեկամության այգին, Մարմաշենի վանական համալիր տանող ճանապարհը և հարակից տարածքը, վերականգնել ու ամրակայել Դվինի հուշարձանները։

Նաև կարգի են բերվելու Գառնու տաճարի հարակից տարածքն ու փողոցները, Զորաց քարերը, վերանորոգվելու է Երևան-Լանջազատ-Գառնի ճանապարհը, նաև Հին Խնձորեսկ տանող հատվածը, Արենի հանգույցը։

Նշենք՝ Հայաստանում մարտի 16–ից մինչև սեպտեմբերի 11-ը արտակարգ դրության ռեժիմ է գործում։ Շարունակվում է գործել պարտադիր դիմակային ռեժիմը՝ որոշ թուլացումներով։

armeniasputnik.am

Հետընտրական Բելառուսում «կրքերը» չեն հանդարտվում։ Ընտրությունների պաշտոնական արդյունքներին անհամաձայնություն հայտնող բելառուսները շարունակում են բողոքի զանգվածային գործողությունները, ընդդիմության առաջնորդներից Սերգեյ Տիխանովսկու կինը՝ Սվետլանա Տիխանովսկայան, ով հայտնվել էր նախագահական ընտրությունների երկրորդ հորիզոնականում, սպառնալիքների պատճառով լքել է Բելառուսը՝ մեկնելով Լիտվա, ըստ էության հրաժարվելով հետընտրական պայքարից և ընդդիմության առաջնորդի դերակատարությունից։ Նա բնակչությանը խաղաղ անհնազանդության կոչ է արել, իսկ Բելառուսի նախագահ Ալեքսանդր Լուկաշենկոն շարունակում է դիմադրել փողոցի ճնշմանը ոստիկանական բիրտ ուժի և արտաքին դաշնակիցներ փնտրելու միջոցով։ Ուշագրավ է, որ Մինսկում, իր վերջին խորհրդակցության ժամանակ, նա ըստ էության Ռուսաստանից օգնություն է խնդրել՝ իր իշխանությունը պահպանելու հարցում։

«Մենք տեսնում ենք, թե խորքում ինչ է տեղի ունենում։ Մենք շատ լավ տեսնում ենք դա։ Մենք կարդացել ենք գունավոր հեղափոխությունների մեթոդաբանությունը։ Ավելին, գունավոր հեղափոխությունների մեթոդներին ավելացել են արտաքին միջամտության տարրերը», – ասել է Լուկաշենկոն։

Այնուհետև Բելառուսի ղեկավարն ասել է․ «Բելառուսի դեմ ագրեսիայի սցենար է ծավալվում։ Պետք է կապվել Պուտինի հետ, որ կարողանամ հիմա խոսել նրա հետ։ Որովհետև սա սպառնալիք է ոչ միայն Բելառուսին։ Գիտեք, որոշ ռուսներ գոչում են՝ ահա Բելառուսը՝ այսպիսին, այնպիսին․․․ ուզում եմ ասել, որ Բելառուսի պաշտպանությունը ոչ պակաս պաշտպանություն է՝ մեր ընդհանուր տարածության, Դաշնային պետության, և օրինակ՝ ուրիշների համար։ Եթե բելառուսները չդիմանան, ալիքը կտեղափոխվի այնտեղ։ Այդ պատճառով են մեզնից այդպես բռնել»,- ասել է Լուկաշենկոն։

168.am-ի հետ զրույցում գերմանացի քաղաքագետ Ուվե Հալբախը Բելառուսում ծավալվողը որակեց պայքար հին և նոր քաղաքական համակարգերի միջև։ Ըստ նրա՝ հասկանալի է, որ հետսովետական հին համակարգի ներկայացուցիչները փորձելու են պահպանել այդ համակարգը, որոնց մաս է կազմում նաև Ռուսաստանը, և Բելառուսն այդ օղակում առանցքային երկիր է։

«Բայց Բելառուսի զարգացումները ճիշտ չէ համեմատել Հայաստանում տեղի ունեցած հեղափոխական իրադարձությունների հետ, քանի որ Բելառուսում այսօր հասարակությունն անհնազանդություն է ծավալում առանց առաջնորդի, քանի որ պոտենցիալ առաջնորդները կալանքի տակ են, իսկ Տիխանովսկայան երբեք չի դիրքավորվել՝ որպես ապագա առաջնորդ, լինի դա ընդդիմության թե երկրի։ Նրա քաղաքական նպատակը եղել է ամուսնու ազատ արձակումը։ Բելառուսական զարգացումների ապագան կախված է հենց հասարակության տրամադրություններից և դիմադրողունակությունից, քանի որ ճնշումները իշխանության կողմից շատ են, և իշխանական լծակները դեռ մեծ են։ Եվ այստեղ մենք տեսնում ենք, որ Բելառուսը օգնության է կանչում Ռուսաստանին, դեռ բարդ է ասել, թե այդ աջակցությունն ինչպիսին կարող է լինել, ինչպես կարող է դրսևորվել, սակայն ինքնին երևույթն ուշագրավ է նրանով, որ հետսովետական համակարգն է սկսում պայքարել, և այդ աջակցությունը, չնայած Պուտին-Լուկաշենկո երկարատև տարաձայնություններին, բխում է Ռուսաստանի շահերից, և այն, ամենայն հավանականությամբ, ինչ-որ կերպ կլինի։

Արևմուտքի դերակատարությունն այս ամենում սահմանափակվել է ընտրությունների արդյունքները չընդունելով։ Թե ինչպես կզարգանան իրադարձությունները, բարդ է ասել, բայց հավանական է թե ներկայիս իշխանության, թե քաղաքացիական հասարակության «հաղթանակ», քանի որ ներկայումս Բելառուսում այդ հասարակությունը ներկայանում է նորովի՝ նոր ուժով ու թափով, քան նախկինում»,- ասաց վերլուծաբանը։

Նրա կարծիքով՝ իրադարձությունների զարգացման ցանկացած սցենար ազդելու է հետսովետական տարածաշրջանի ապագայի, այդ թվում՝ Հայաստանի վրա, քանի որ Հայաստանն այդ տարածաշրջանի մի մասն է։

«Դրա վկայությունն էր նաև ՀՀ ղեկավարի շնորհավորանքն ուղղված Լուկաշենկոյին։ Չպետք է մոռանալ, որ այդ տարածաշրջանի մասն է նաև Ադրբեջանը, Ռուսաստանը, և սա Հայաստանի համար որոշակի պայմաններ է ստեղծում։ Սակայն, եթե Բելառուսում իշխանությունը ստիպված լինի հեռանալ, ապա հետսովետական տարածաշրջանին մեծ փոփոխություններ են սպասվում, այդ թվում՝ եվրասիական ինտեգրացիոն պրոյեկտներին, ՀԱՊԿ-ին, Հայաստանին, Ռուսաստանին և բոլոր երկրներին։ Կարծում եմ՝ դա կարող է առանցքային հանգրվան դառնալ հետսովետական տարածաշրջանի համար։ Բայց կրկին հիշեցնեմ այն, ինչ ասացի Ռուսաստանի շահերի վերաբերյալ, կարծում եմ՝ Ռուսաստանն առաջ է տանելու այդ շահերը»,- ասաց նա։

Բելառուսի նախագահ Ալեքսանդր Լուկաշենկոյին աջակցող հանրահավաքի մասնակիցները սկսել են ցրվել առաջնորդի խոսքից հետո։ Նրանք քայլերթ են կազմակերպել եւ վանկարկում են․ «Ամոթ քաղաքական մարմնավաճառներին»։

Հանրահավաքի ժամանակ նախագահի պաշտոնում վերընտրված Լուկաշենկոն հայտարարել է հավաքվածներին, որ ծնկի է իջել նրանց առջեւ առաջին անգամ։

Շատ շնորհակալություն ձեզ։ Ես կանգնում եմ այստեղ ձեր առջեւ ծնկի իջած առաջին անգամ իմ կյանքում։ Դուք դրան արժանի եք»,-ասել է նախագահը, որից հետո նա խոնարհվել է։ Այնուհետեւ Լուկաշենկոն շնորհակալություն է հայտնել երկրի բնակչությանն ու բանակին «աջակցության եւ հավատի» համար։

Բելառուսի ղեկավարը նաեւ հայտարարել է, որ կանգնած է Բելառուսի բնակիչների առջեւ ոչ այն պատճառով, որ ամուր կառչած է իշխանությունից։ Նրա խոսքով՝ նա տվել է հայրենիքին իր լավագույն տարիները։ Եթե նրան տապալեն, ապա դա կլինի հանրապետության քաղաքացիներին դեպի կործանումը տանող սկիզբը։

https://www.youtube.com/watch?v=EDHvPLUdXso&feature=emb_logo

Հայաստանում օգոստոսի 17-ի դրությամբ հաստատվել է կորոնավիրուսով վարակման 36 նոր դեպք, վարակվածների ընդհանուր թիվը հասել է 41701-ի: 

Ինչպես տեղեկացնում է ՀՀ ԱՆ հիվանդությունների վերահսկման և կանխարգելման ազգային կենտրոնը, մեկ օրում կորոնավիրուսի հետևանքով մահացել է 6 քաղաքացի, մահացածների թիվը 824 է:

Մեկ օրում գրանցվել է կորոնավիրուսով վարակված պացիենտների՝ այլ հիվանդությունից մահվան 1 դեպք: Օգոստոսի 17-ի դրությամբ մահվան այս դեպքերի թիվը 244 է: Ընդհանուր առմամբ, մեկ օրում մահացել է 7 մարդ, իսկ մահվան ընդհանուր դեպքերի թիվը հասել է 1068-ի: 

Մեկ օրում առողջացածների թիվը 71 է, ընդհանուր առողջացածներինը՝ 34655, փաստացի բուժվողներինը՝ 5978 (մեկ օրում նվազել է 40-ով): Մեկ օրում արվել է 284 թեստ, ընդհանուր առմամբ առ այսօր արվել է 185594 թեստ:

Քառօրյայի մասնակից, պայմանագրային զինծառայող Հայկ Սեխլիյանի առողջական վիճակը կրկին վատացել է։ Մոտ մետ տարի առաջ Գերմանիայում վերականգնողական բուժման կուրսից հետո գրանցած արդյուքներից գրեթե ոչինչ չի մնացել, մի քանի ամիս է՝ ցավերն ուժեղացել են, շարժողունակությունը պակասել։

«Մինչեւ Գերմանիա գնալը ոնց որ կար, վիճակս նույնն է հիմա։ Իսկ որ այնտեղ է, առանց ձեռնափայտի էի սկսել քայլել, մինչեւ մի քանի կիլոմետր կարայի քայլեի օրվա մեջ, թեթեւ էի քայլում։ Ցավերս էլ քչացել էին, եկել էի հետ, 3 տարվա մեջ առաջին անգամն էր, որ զգում էի՝ հանգիստ քնում եմ»,- NEWS.am-ի հետ զրույցում պատմեց Հայկը։

Հայկի վիճակը վատացել է, որովհետեւ Գերմանիայի բուժումն ընդհատվել է վճռորոշ փուլում։ Մեկ ամիս հետո հետ գնալու եւ այն շարունակելու փոխարեն մինչեւ այժմ սպասում է այդ հարցում կառավարության խոստացած աջակցությանը։

«Վերջում պետք է ապարատ տեղադրվեր, այդ մասին ի սկզբանե հենց տեղյակ պահվեց առողջապահության նախարար Արսեն Թորոսյանին դեռ Գերմանիայից, դրական արձագանք եղավ, ուրախացան, որ սարքը կլինի Հայաստանում։ Սարքն, ի դեպ, վաճառքի ենթակա չի, բայց իրենք որոշեցին, որ կվաճառեն մեզ սարքը։ Նոյեմբերին հանդիպեցի նախարարին, խոստացան, որ մի ամիս հետո հետ կգնամ, ուրախացանք, բայց եկավ, հասավ դեկտեմբեր, սկսվեց տարվա հաշվետվությունը, հետո հունվար, ձգձգվեց, ձգձգվեց, հետո կորոնավիրուս, մինչեւ հիմա»,- պատմեց Հայկը։

Այս ընթացքում Հայկը փորձել է հանդիպել նաեւ մասնավոր կլինիկաների ղեկավարներին, բայց նրանցից ոչ մեկ 13 հազար եվրո արժողությամբ սարքը գնելու ցանկություն չի հայտնել, չնայած որ այն բազմակի օգտագործման համար է եւ Հայկից բացի կարող է օգնել նաեւ այլ՝ նման խնդիր ունեցողների։ Այդուհանդերձ, սարքն այս պահին մասնագետների կողմից Հայկին տրված գլխավոր ցուցումն է։ Վարժությունները, որ հիմա էլ ինքնուրույն անում է, այդքան մեծ արդյունավետություն չունեն։

Ընդամենը մի քանի ամիս անց Հայկը կրկին Գերմանիա պետք է մեկնի՝ հետազոտման, կօգտագործի իր համար կազմակերպված դրամահավաքի գումարը, որը պահում է հաշվին՝ բուժման ծախսերը հոգալու համար։ Եթե սարքի միջոցով բուժման կարեւոր փուլն այդպես էլ չանցնի, ապա ամեն տարի ստիպված է լինելու վերադառնալ Գերմանիա։

Բելառուսի նախագահ Ալեքսանդր Լուկաշենկոն Անվտանգության խորհրդի նիստ է հրավիրել, որի ընթացքում քննարկել է երկրով մեկ ընթացող հետընտրական բողոքի ակցիաներն ու ցույցերը, հայտնում է belta.by-ը:

«Չեմ ասի, որ ինչ-որ աղետ է կամ էլ չափից ավելի լարված իրավիճակ է, սակայն խնդիրները բավական շատ են, և մենք պարտավոր ենք լուծել դրանք: Մենք այսօր միանգամայն հստակ տեսնում ենք՝ ինչ է կատարվում, տեսնում ենք գործող անձանց: Ինչպես և ասում էինք, այս ամենի հրահրիչներն ու կազմակերպիչներն արտասահմանից են: Առաջին շարքերում քրեական անցյալով մարդիկ են»,-ասել է նախագահը:

Լուկաշենկոն նաև դիմել է իշխանություններին՝ խնդրելով չհարվածել վայր ընկած ցուցարարներին:

«Ամեն դեպքում մենք սլավոնացի ենք, և եթե մարդն ընկել է ու պառկած է, նրան պետք չէ ծեծել: Այսինքն պետք է հստակ արգելակ լինի»,-ասել է Լուկաշենկոն՝ միևնույն ժամանակ հավելելով, որ սադրիչները միտումնավոր հարձակվում են հատուկջոկատայինների վրա:

Բելառուսի նախագահը դիմել է դեռահասների ու երիտասարդների ծնողներին՝ պահանջելով, որպեսզի նրանք հետևեն իրենց երեխաներին:

«Չորրորդ անգամ եմ դիմում ծնողներին՝ հետևեք՝ որտեղ են ձեր երեխաները: Հասկանում եմ, որ դեռահասների որոշ ծնողներին դժվար է այդ տարիքում վերահսկել իրենց երեխաներին, այդ դեպքում դիմեք մեզ, մենք օգնենք»,-ասել է Լուկաշենկոն:

Դիմելով քաղաքացիներին՝ Լուկաշենկոն ասել է.«Հիմա փողոց դուրս մի՛ եկեք: Հասկացեք, որ ձեզ ու մեր երեխաներին որպես մսաղաց ուղարկվող միս են օգտագործում: Հիմա արդեն մեզ վրա են տվել Լեհաստանից, Նիդեռլանդներից, Ուկրաինայից, այդ բաց Ռուսաստանից, Նավալնիի մոտից և այլն: Արդեն երկրի դեմ ագրեսիա է սկսվել: Ասեք՝ որպես զինվորական ինչպե՞ս գործեմ, ի՛նչ անեմ նման իրավիճակում: Դուք ուզում եք, որ ես նստե՞մ ու սպասեմ մինչև որ Մինսկը գլխիվայր կշրջեն: Այդպես մենք հետո իրավիճակը չենք կարողանա կայունացնել: Ուստի՝ հարկավոր է կանգ առնել, գլուխը ձեռքերի մեջ առնել, հանգստանալ և թույլ տալ մեզ կարգուկանոն հաստատել, լուծել այստեղ եկածների հարցերը»,-ասել է Լուկաշենկոն:

Բելառուսի Կենտրոնական ընտրական հանձնաժողովն օգոստոսի 9-ին երկրում տեղի ունեցած նախագահական ընտրությունների վերջնական արդյունքներն է հրապարակել, որոնց համաձայն՝ երկրի գործող նախագահ Ալեքսանդր Լուկաշենկոն ստացել է ձայների 80,1%-ը, ընդդիմադիր թեկնածու Սվետլանա Տիխանովսկայան՝ 10,1%-ը:

Հիշեցնենք, որ զանգվածային ցույցերը Բելառուսում չեն դադարում օգոստոսի 9-ին կայացած նախագահական ընտրություններից ի վեր: Քաղաքացիներն իրենց դժգոհությունն են հայտնում ընտրությունների արդյունքներից, որոնց համաձայն` ավելի քան 80 տոկոս ձայնով հաղթող է ճանաչվել գործող նախագահ Ալեքսանդր Լուկաշենկոն:

Օրեր շարունակ մի շարք քաղաքներում, ինչպես, օրինակ, Բրեստում, Գոմելում, Գրոդնոյում և մայրաքաղաք Մինսկում բախումներ են տեղի ունենում ցուցարարների և ուժայինների միջև: Բազմաթիվ մարդիկ վնասվածքներ են ստացել, հազարավորներն էլ` ձերբակալվել: Նշվում է, որ բախումների ընթացքում օգոստոսի 10-ին մեկ մարդ մահացել է:

«Անհասկանալի է՝ Հայաստանի Հանրապետության Վարչապետի կցկտուր պատասխանը հայտնի հարցազրուցավար Ստեֆան Սակուրին, երբ վերջինս ուղղակիրորեն մեղադրեց մեզ Արցախում 1980 և 1990֊ականներին մարդու իրավունքների կոպիտ խախտումներ և պատերազմական հանցագործություններ կատարելու մեջ՝ առաջարկելով Վարչապետին ներողություն խնդրել։

Վարչապետը ոչ միայն պետք է հստակ արձագանքեր ու ի լուր ամբողջ աշխարհի բացառեր հայկական ուժերի կողմից նման գործողությունների կատարումը, այլ նաև հիշեցներ ադրբեջանական ուժերի կողմից Արցախյան պատերազմի սկզբում և ընթացքում, ինչպես նաև բոլորովին վերջերս 2016 թվականին քաղաքակիթ աշխարհի աչքի առաջ Ապրիլյան պատերազմի ժամանակ տեղի ունեցած գլխատումների, խոշտանգված դիակների, աշխարհում ճանաչված ահաբեկչական կազմակերպությունների անդամների կողմից հայ խաղաղ բնակչյության նկատմամբ իրականացված վայրագությունների, քաղաքացիական անձանց և տարեցների սպանությունների, Գուրգեն Մարգարյանի գլխատման և հերոսացման դեպքը։

Այս ամենի մասին մենք պետք է անդադար և բոլոր հարթակներում բարձրաձայնենք, բաց չթողնենք ոչ մի հնարավորություն և չկարկամենք, երբ մեզ մեղադրում են ինչ֊որ իրավախախտում թույլ տալու մեջ։

Այլապես, երբ ամբողջ աշխարհով մեծ դիտում ունեցող հաղորդման շրջանակներում պատերազմական հանցագործություն կատարածին դարձնում են զոհ, կարծես՝ փորձում են մաքրել նրա վրայից պատասխանատվության հետևանքները՝ այն տարածելով իր բնօրրանի համար պայքարողների վրա։

Պետք է այս հարցում հստակ լինել ու հստակ պատասխանել՝ Ադրբեջանի գործող իշխանությանը հավասարեցնելով իսլամական պետություն ահաբեկչական կազմակերպության ոճի պատերազմներ վարող պետության մակարդակին»:

«Սահմանափակումների աստիճանական թուլացումների արդյունքում թույլատրվել է ՀՀ քաղաքացի չհանդիսացող անձանց մուտքը Հայաստան: Այս մասին հայտարարություն է տարածել ՀՀ զբոսաշրջության կոմիտեն։

Հայտարարության մեջ, մասնավորապես, ասվում է.

«Սահմանափակումների աստիճանական թուլացումների արդյունքում թույլատրվել է ՀՀ քաղաքացի չհանդիսացող անձանց մուտքը Հայաստան:

Ներկայումս այցելությունների դեպքում նախատեսվող ընթացակարգը հետեւյալն է.

Օդային ուղիներով ՀՀ տարածք մուտք գործելուց հետո անհապաղ կատարվում է բժշկական զննություն վարակի առկայության կամ վարակի ախտանիշների բացահայտման նպատակով։ Համապատասխան զննություն անցնելուց հետո մուտք գործող անձը ենթակա է ինքնամեկուսացման 14-օրյա ժամկետով, եթե ախտանիշների առկայությամբ պայմանավորված վերջիններիս նկատմամբ չեն կիրառվում հոսպիտալացում կամ այլ սահմանափակող միջոցառումներ։

Ինքնամեկուսացման մեջ գտնվող անձը կարող է ինքնակամ, վճարովի հիմունքներով անցնել կորոնավիրուսային հիվանդության (COVID-19) ախտորոշման ՊՇՌ հետազոտություն: Ընդ որում մեկուսացման ընթացքում ՊՇՌ թեստավորման համար անհրաժեշտ նմուշառումը պետք է իրականացվի բացառապես անձի ինքնամեկուսացման վայրում համապատասպան լաբարատորիաների մասնագետների այցի միջոցով։ ՊՇՌ հետազոտության բացասական պատասխանի դեպքում անձը դուրս է գալիս ինքնամեկուսացումից:

Ի լրումն ներկայացված լաբորատորիաների ցանկի՝ ՊՇՌ հետազոտությունը իրականացվում է գրեթե բոլոր մասնավոր բժշկական կենտրոններում։

Ամբողջական տեղեկատվությունը հասանելի է նաեւ երեք լեզուներով՝ անգլերեն, ռուսերեն, ֆրանսերեն, Armenia.Travel Հայաստանի պաշտոնական զբոսաշրջային կայքում հետեւյալ հղումով՝ https://armenia.travel/en/covid19-traveler-information»։

Հայաստանում օգոստոսի 15-ի դրությամբ հաստատվել է կորոնավիրուսով վարակման 196 նոր դեպք, վարակվածների ընդհանուր թիվը հասել է 41495-ի:

Ինչպես տեղեկացնում է ՀՀ ԱՆ հիվանդությունների վերահսկման և կանխարգելման ազգային կենտրոնը, մեկ օրում կորոնավիրուսի հետևանքով մահացել է 3 քաղաքացի, մահացածների թիվը 817 է:

Մեկ օրում գրանցվել է կորոնավիրուսով վարակված պացիենտների՝ այլ հիվանդությունից մահվան 3 դեպք: Օգոստոսի 15-ի դրությամբ մահվան այս դեպքերի թիվը 242 է: Ընդհանուր առմամբ, մեկ օրում մահացել է 6 մարդ, իսկ մահվան ընդհանուր դեպքերի թիվը հասել է 1059-ի:

Մեկ օրում առողջացածների թիվը 360 է, ընդհանուր առողջացածներինը՝ 34484, փաստացի բուժվողներինը՝ 5952 (մեկ օրում նվազել է 130-ով): Մեկ օրում արվել է 1827 թեստ, ընդհանուր առմամբ առ այսօր արվել է 183789 թեստ:

Հատուկ քննչական ծառայությունում քննված քրեական գործով ձեռք բերված բավարար ապացույցների համակցությամբ հիմնավորվել է, որ Լոռու մարզում ապօրինի ծառահատման դեպքերին ընթացք չտալու և դրանք կոծկելու դիմաց ՀՀ ոստիկանության Լոռու մարզային վարչության Գուգարքի բաժնի համայնքային ոստիկանության բաժանմունքի ավագ տեսուչ Ա. Դ.-ն ապօրինի ծառահատում իրականացրած բնակիչներից ստացել է կաշառք և չարաշահել իր պաշտոնեական լիազորությունները, իսկ ոստիկանին կաշառք տված քաղաքացիներից մեկն էլ կատարել է սուտ մատնություն:

ՀՔԾ-ից մանրամասնում են, որ  Լոռու մարզի բնակիչ Հ. Հ.-ն, տեղեկանալով, որ իր կողմից 2019 թվականի նոյեմբերին մոտ մեկ խորանարդ մետր հաճարի և բոխու փայտանյութի ապօրինի հատման դեպքի առթիվ ՀՀ ոստիկանության Գուգարքի բաժնում նյութեր են նախապատրաստվում, այդ մասին հայտնել է ընկերոջը՝ Ա. Ս.-ին: Վերջինս Հ. Հ.-ին օգնելու համար հանդիպել է ՀՀ ոստիկանության Գուգարքի բաժնի պաշտոնատար անձանց, այդ թվում` ավագ տեսուչ Ա. Դ.-ի հետ:

Ոստիկանության ավագ տեսուչը, իր ծանոթ Ա. Ս.-ի մտերիմ Հ. Հ.-ին օգնելու անձնական շահագրգռվածությունից ելնելով, նյութերի նախապատրաստման ընթացքում խեղաթյուրել է դեպքի իրական հանգամանքները. ձևական բնույթ կրող զննություն է կատարել այլ վայրում, որտեղ Հ. Հ.-ն իրականում ծառահատում չի իրականացրել, թաքցրել է վերջինիս կողմից հաճարի փայտանյութ ապօրինի հատելու հանգամանքը և որոշում կայացրել քրեական գործ հարուցելը մերժելու մասին:

Ա. Դ.-ի` վերը նշված ապօրինի գործողությունների հետևանքով նվազեցվել է բնությանը պատճառված վնասը, և Հ. Հ.-ն ենթարկվել է ընդամենը 14.850 ՀՀ դրամ վարչական տույժի: Այնուհետև Ա. Ս.-ն Հ. Հ.-ին դրդել է կաշառք տալ Ա. Դ.-ին, ով  Վանաձոր քաղաքում նրանից անձամբ ստացել է կաշառքի գումարը։

Ըստ աղբյուրի, բացի այդ, Ա. Դ.-ն Լոռու մարզի մեկ այլ բնակչի` Ա. Ս.-ի՝ ապօրինի հատված փայտանյութով բեռնված ավտոմեքենան կանգնեցնելուց հետո դիտավորությամբ չի կատարել իր ծառայողական պարտականությունները և, պաշտոնեական դիրքն օգտագործելով ծառայության շահերին հակառակ, Ա. Ս.-ի կողմից ապօրինի ծառահատում իրականացնելու դեպքին օրինական ընթացք չտալու և վերջինիս օրենքով սահմանված պատասխանատվությունից ազատելու համար նրանից անձամբ պահանջել և ստացել է կաշառք:

Նախաքննության ընթացքում պարզվել է նաև, որ Ա. Ս.-ն կատարել է սուտ մատնություն` ոստիկաններին հանիրավի մեղադրելով խոշտանգում կատարելու և պաշտոնեական լիազորությունները չարաշահելու մեջ: Վերջինս ՀՀ հատուկ քննչական ծառայությունում իրականությանը չհամապատասխանող ցուցմունքներ է տվել այն մասին, որ ՀՀ ոստիկանության քրեական ոստիկանության գլխավոր վարչության ծառայողներն իբր խոշտանգել են իրեն և պահանջել խոստովանել իր կողմից ոստիկանության ծառայողին կաշառք տալու փաստը, այնուհետև, իբր բռնության և սպառնալիքների ազդեցության ներքո, ցուցմունք է տվել, որ ինքը զբաղվել է ապօրինի ծառահատումներով և կաշառք է տվել ոստիկանության ծառայողներին:

Վերը նշված հանցավոր արարքների կատարման համար ոստիկանության ավագ տեսուչ Ա. Դ.-ին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին մասով/ 2 դրվագ/ և 311-րդ հոդվածի 2-րդ մասով /2 դրվագ/: Հ. Հ.-ին մեղադրանք է առաջադրվել ՀՀ քրեական օրենսգրքի 312-րդ հոդվածի 1-ին մասով, կաշառք տալուն դրդած Ա. Ս.-ին` 38-312-րդ հոդվածի 1-ին մասով, իսկ  Լոռու մարզի բնակիչ Ա. Ս.-ին` 312-րդ հոդվածի 1-ին մասով և 333-րդ հոդվածի 2-րդ մասի 1-ին կետով:
Հիշյալ չորս մեղադրյալների վերաբերյալ քրեական գործի նախաքննությունն ավարտվել է: Քրեական գործը մեղադրական եզրակացությամբ ուղարկվել է հսկողություն իրականացնող դատախազին` այն հաստատելու և դատարան ուղարկելու միջնորդությամբ: