Հայաստանում սեպտեմբերի 5-ի դրությամբ հաստատվել է կորոնավիրուսով վարակման 188 նոր դեպք, վարակվածների ընդհանուր թիվը հասել է 44 649-ի:

Ինչպես տեղեկացնում է ՀՀ ԱՆ հիվանդությունների վերահսկման և կանխարգելման ազգային կենտրոնը, մեկ օրում կորոնավիրուսի հետևանքով մահացել է 4 քաղաքացի, մահացածների թիվը 895 է:

Մեկ օրում գրանցվել է կորոնավիրուսով վարակված պացիենտների՝ այլ հիվանդությունից մահվան 3 դեպք: Սեպտեմբերի 5-ի դրությամբ մահվան այս դեպքերի թիվը 275 է: Ընդհանուր առմամբ, մեկ օրում մահացել է 7 մարդ, իսկ մահվան ընդհանուր դեպքերի թիվը հասել է 1170-ի:

Մեկ օրում առողջացածների թիվը 566 է, ընդհանուր առողջացածներինը՝ 39 823, փաստացի բուժվողներինը՝ 3656 (մեկ օրում նվազել է 385-ով): Մեկ օրում արվել է 2166 թեստ, ընդհանուր առմամբ առ այսօր արվել է 215 810 թեստ:

Բոլորը հիշում են, թե ինչպես էին նախկին ընդդիմադիր Փաշինյանը և իր շրջապատի մարդիկ փնովում նախկին իշխանություններին՝ կոռուպցիայի մեջ «թաթախված» լինելու մեջ: Ընդ որում, նույն շրջանակներից բազմիցս նշվել և այժմ էլ նշվում է, որ կոռուպցիան միայն կաշառակերությունը չէ, այլև մեծ չափերի հասնող պետական հովանավորչությունը: Գրում է Alternativ.am-ը.

Բայց արի ու տես, որ հովանավորչության դեմ պայքարելով դիվիդենտներ հավաքող նախկին հեղափոխականներն այժմ իրենք են պետական մակարդակով հովանավորչությամբ զբաղված:

Alternativ.am-ի ձեռքի տակ են հայտնվել փաստաթղթեր, որոնք ապացուցում են, որ «Հայկական ժամանակ» օրաթերթը օգտվում է պետական հովանավորչությունից։ Լրատվամիջոցը, որի առևտրային անվանումը «Դարեսկիզբ» ՍՊԸ է (տնօրինությամբ Մանավազյանի), բազմիցս շահում է գնումներ պետական տարբեր գերատեսչություններից, որոնք իրականացվում են տենդերի՝ մեկ անձից գնման միջոցով և տրամաբանական արժեքից շատ ավելի թանկ գնով։

Առնվազն երկու դեպք, որոնք վերաբերվում են այս դեպքին, ներկայացնում ենք ձեր ուշադրությանը։ Եվ այսպես, «Դարեսկիզբ» ՍՊԸ-ն պայմանագիր է կնքել ՀՀ տնտեսական զարգացման և ներդրումների նախարարության զբոսաշրջության կոմիտեի հետ՝ պարտավորվելով կատարել թերթերում տպագրման ծառայության մատուցումը (19.03.2019թ․)։ Այս ամենն իրականացվել է առանց գնում հայտարարելու, և ծառայության մատուցումը տրվել է հայտնի խմբագրությանը։

2020թ. սեպտեմբերի 3-ին՝ ժամը 14:40-ին, ՀՀ ոստիկանության Մաշտոցի բաժնում ահազանգ է ստացվել այն մասին, որ  Երեւան քաղաքի Հալաբյան փողոցում կրակոցներ են հնչել, 4 անձ՝ հրազենային մարմնական վնասվածներով, տեղափոխվել է «Արմենիա» եւ «Նաիրի» բժշկական կենտրոններ: Այս մասին հայտնում են ՀՀ քննչական կոմիտեի տեղեկատվության եւ հասարակայնության հետ կապերի բաժնից:

Դեպքի վայր է մեկնել քննչական-օպերատիվ խումբը, կատարվել է դեպքի վայրի զննություն, որի արդյունքում հայտնաբերվել են արնանման հետքեր, կրակված պարկուճներ:

Դեպքի առթիվ ՀՀ քննչական կոմիտեի Երեւան քաղաքի քննչական վարչության Աջափնյակ եւ Դավթաշեն վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 34-104 հոդվածի (սպանության փորձ) 2-րդ մասի եւ 235-րդ հոդվածի (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) 1-ին մասի հատկանիշներով:

Նշանակվել են փորձաքննություններ։

Արմավիր քաղաքի Հանրապետության փողոցը սեպտեմբերի 1-ից այլ կյանքով է ապրում` փողոցում ոստիկաններ են հայտնվել, իսկ հարևանները դրսում իրար հանդիպելիս որպիսությունը հարցնելու փոխարեն մեկը մյուսից հետաքրքրվում են` ի՞նչ նորություն կա Աշոտից։

Առողջապահության նախարարությունը սեպտեմբերի 1-ին հայտարարեց, որ Արմավիրում ալկոհոլային թունավորման հետևանքով 9 մարդ է մահացել։ Նույն օրը ՀՀ քննչական կոմիտեն հայտնեց` ձերբակալվել է Արմավիրի բնակիչ Աշոտ Հովսեփյանը` անվտանգության պահանջներին չհամապատասխանող օղի վաճառելու համար։ Քննչական կոմիտեն հորդորում էր, որ բոլոր նրանք, ովքեր օղի են գնել Հովսեփյանից, չխմեն այն։

Sputnik Արմենիան այցելել է Հովսեփյանի բնակության վայր` դեպքի առնչությամբ մանրամասներ իմանալու։ Հովսեփյանի տան մոտ ոստիկանությունն այժմ շուրջօրյա հսկողություն է իրականացնում։ Տղամարդու ընտանիքի անդամներին տեսնել չհաջողվեց։ Տանն են, բայց որևէ մեկի հետ շփվել չեն ուզում. զրուցեցինք հարևանների հետ։

Հովսեփյանների հարևաններից Արմինե Պողոսյանը պատմեց` Աշոտ Հովսեփյանն ապրում է ընտանիքի` կնոջ և երեք երեխաների հետ։ Օղու գործը նորություն չէ Աշոտի համար` տարիներ առաջ նա տևական ժամանակ կոնյակի գործարաններից մեկում է աշխատել։

«Աշոտը վերջին տարիներին առողջական խնդիրներ ուներ (շաքարային դիաբետ, լյարդի խնդիր), և տանն էր գործ անում։ 4-5 տարի է, ինչ տանը կոնյակ և օղի էր պատրաստում ու վաճառում։ Այս ընթացքում որևէ խնդիր չի եղել. անգամ պաշտոնյաներն են նրանից խմիչք գնել։ Բոլորն էլ գիտեին` Աշոտինը ընտիր օղի էր»,–ասաց տիկին Արմինեն։

Նրա խոսքով` հարևանի համար կարևորը ոչ թե իր ապրանքը վաճառելն էր, այլ մարդկային հարաբերությունը։ Տիկին Արմինեն նշեց` Հովսեփյանին Արմավիրում գրեթե բոլորն են ճանաչում, և բոլորն էլ նույն բանը կարող են ասել` հասնող մարդ էր։ Երբ որևէ մեկի տանը դժբախտ դեպք էր պատահում, արարողությունների համար անհրաժեշտ օղին Հովսեփյանն ուղղակի նվիրում էր. տիկին Արմինեի քրոջ մահվան արարողության ժամանակ հարևանը նույնկերպ աջակցել է նրանց։

«Եթե ճար ունենայի ու իմանայի, որ կարող եմ ինչ–որ կերպ օգնել նրան, մի վայրկյան անգամ չէի տատանվի։ Ի դեպ, մեր թաղերում էլ կան մարդիկ, որ խմիչքի հետ սեր ունեն. Սամոն, օրինակ, այդ օրերին Աշոտից օղի է գնել տվել ու խմել, բայց ոչինչ էլ չի եղել»,–ասաց տիկին Արմինեն` հավելելով, որ խրոնիկ հարբեցողներին Հովսեփյանը խմիչք չէր վաճառում։

Աշոտ Հովսեփյանենց տնից մի քանի տուն այն կողմ բնակվող Մինաս Ամիրխանյանն էլ պատմեց` Աշոտի հայրը նույնպես օղու գործ է արել, և բոլորն էին նրանցից խմիչք գնում, քանի որ պատրաստելիս որակին մեծ տեղ էր տալիս։ Ամիրխանյանն ասում է, որ ինքը նույնպես օգտվել է Աշոտի պատրաստած օղուց, կոնյակից, հաճախ այդ կոնյակից տղայի ընտանիքին է ուղարկել։

«Աշոտն այնպիսի մարդ է, որ ես ուղղակի վստահ եմ` նրա գլխին սարքել են։ Նա մեծատառով մարդ է, մարդկային վերաբերմունք ունի` ուշքն ու միտքը գործը չէ»,–ասաց Ամիրխանյանը։

Հարևանը պատմեց, որ երբ ինքն էլ տանն օղի էր քաշում, կանչում էր Աշոտին որպես մասնագետ, և նա էր չափաքանակներն ասում, վերջնական ցուցումներ տալիս։ Ամիրխանյանի խոսքով` պետք չէ մտածել, որ Աշոտն «ընկել» է, ու դրա համար են հիմա լավն ասում նրա մասին. ոչ, պարզապես ոչ ոք չի կարող բացասական մի բառ ասել մեկի մասին, ով բոլորին օգնում էր, հասնում։
Մեկ այլ հարևան էլ` Անուշ Չվչյանն ասաց, որ Աշոտը մինչև չփորձեր, օղին չէր վաճառում մյուսներին, իսկ թե այս անգամ ինչպես այդպես ստացվեց` չգիտեն։ Կինն ասում է` մինչ օրս հարևաններով շոկի մեջ են և չգիտեն` ինչ անեն, որ օգնեն դժվար դրության մեջ հայտնված ընտանիքին։ «Նա երեք երեխա ունի, երկուսը` տղան ու աղջիկը, զույգ են` 21 տարեկան։ Բացի այդ, ևս մեկ` 4-րդ դասարանի տղա ունի։ Ո՞նց կարող է ընտանիք, նորմալ կյանք ունեցողը զգույշ չլինել։ Սա թյուրիմացություն է` ո՞վ իմանա, ինչ սպիրտ են վաճառել նրան։ Չեմ էլ ուզում պատկերացնել, թե հոգեկան ինչ վիճակում է Աշոտն ինքը»,–ասաց Չվչյանը։

Ի դեպ, հարևաններն ասում էին, որ ուզում են այցելել նրա կնոջը, երեխաներին, սակայն վերջիններս նույնպես ծանր վիճակում են հայտնվել և չեն ուզում որևէ մեկի հետ շփվել։ Հարևանների խոսքով` Աշոտ Հովսեփյանի տան բակում «սուրբ» կա, որտեղ գնում ու մոմ էին վառում, հիմա այդ պատրվակով անգամ չեն կարողանում տուն գնալ և իրենց օգնությունն առաջարկել։

Հ. Գ. Արդեն մոտենում ենք մեքենային, որ վերադառնանք, տեսնում ենք` Հովսեփյանենց տան բակում սնունդ առաքող մի մեքենա է կանգնում։ Տան դուռն արագ բացվում–փակվում է. ոստիկանները շարունակում են հսկել տունը։

armeniasputnik.am

Հայաստանում սեպտեմբերի 4-ի դրությամբ հաստատվել է կորոնավիրուսով վարակման 190 նոր դեպք, վարակվածների ընդհանուր թիվը հասել է 44 461-ի:

Ինչպես տեղեկացնում է ՀՀ ԱՆ հիվանդությունների վերահսկման և կանխարգելման ազգային կենտրոնը, մեկ օրում կորոնավիրուսի հետևանքով մահացել է 4 քաղաքացի, մահացածների թիվը 891 է:

Մեկ օրում գրանցվել է կորոնավիրուսով վարակված պացիենտների՝ այլ հիվանդությունից մահվան մեկ դեպք: Սեպտեմբերի 4-ի դրությամբ մահվան այս դեպքերի թիվը 272 է: Ընդհանուր առմամբ, մեկ օրում մահացել է 5 մարդ, իսկ մահվան ընդհանուր դեպքերի թիվը հասել է 1163-ի:

Մեկ օրում առողջացածների թիվը 402 է, ընդհանուր առողջացածներինը՝ 39 257, փաստացի բուժվողներինը՝ 4041 (մեկ օրում նվազել է 217-ով): Մեկ օրում արվել է 2363 թեստ, ընդհանուր առմամբ առ այսօր արվել է 213644 թեստ:

ՀՀ քննչական կոմիտեի Լոռու մարզային քննչական վարչությունում ավարտվել է ապահովագրական  ընկերության գործակալի կողմից պատասխանատվությունից ազատող փաստաթուղթ կեղծելու դեպքի առթիվ հարուցված քրեական գործի նախաքննությունը:

Քննությամբ ձեռք բերված տվյալների համաձայն՝ 30-ամյա տղամարդը աշխատելով ապահովագրական ընկերությունում որպես գործակալ, 2020թ. մայիսին 42-ամյա մշտական հաճախորդից տեղեկանալով, որ վերջինիս «Մերսեդես բենս» ավտոմեքենայի ԱՊՊԱ պայմանագրի ժամկետն ավարտվել է, խոստացել է առցանց եղանակով վերակնքել այն, սակայն աշխատանքային ծանրաբեռնվածության պատճառով մոռացել է։

2020թ. մայիսի 22-ին՝ ժամը 14:15-ի սահմաներում, ընկերության գործակալը տեղեկանալով, որ ՀՀ ոստիկանության «Ճանապարհային ոստիկանություն» ծառայության աշխատակիցները կանգնեցրել են 42-ամյա հաճախորդին պատկանող «Մերսեդես բենս»  ավտոմեքենան, իր հարաբերությունները վերջինիս հետ պահպանելու դրդապատճառով, առանց տղամարդու գիտության, Վանաձոր քաղաքի Խորենացի հասցեում գործող ապահովագրական ընկերության գրասենյակում, ապահովագրել է վերոնշյալ ավտոմեքենան և համակարգչով՝ առցանց եղանակով, կազմել պատասխանատվությունից ազատող ԱՊՊԱ վկայագիր՝ կեղծել դրանում նշված ժամը,  և այն օգտագործելու նպատակով տրամադրել է նրան:

Ձեռք բերված ապացույցների համակցությամբ՝ ապահովագրական ընկերության աշխատակցին մեղադրանք է առաջադրվել՝  ՀՀ քրեական օրենսգրքի 325-րդ հոդվածի (փաստաթղթեր, դրոշմներ, կնիքներ, ձևաթղթեր, տրանսպորտային միջոցների հաշվառման համարանիշներ կեղծելը, իրացնելը կամ օգտագործելը) 1-ին մասով: Նրա նկատմամբ որպես խափանման միջոց ընտրվել է ստորագրություն՝ չհեռանալու մասին:

Նախաքննությունն ավարտվել է, և քրեական գործը` մեղադրական եզրակացությամբ, ուղարկվել է դատարան:

Բունդեսվերի (Գերմանայի Զինված ուժեր) լաբորատորիայի մասնագետները հայտարարել են, որ ռուս ընդդիմադիր գործիչ Ալեքսեյ Նավալնիին թունավորել են նյարդակաթվածահար ազդեցության «Նովիչոկ» խմբին պատկանող ռազմական նյութով: Այս մասին հաղորդում է РИА Новости-ն՝ հղում անելով Գերմանիայի կառավարության խոսնակ Շտեֆեն Զայբերտին:

«Հավաստի ապացույց է ստացվել «Նովիչոկ» խմբին պատկանող ռազմական քիմիական նյութի առկայության մասին»,- ասվում է Զայբերտի թվիթերյան հայտարարության մեջ:

Նրա խոսքով՝ Գերմանիայի կառավարությունը կտեղեկացնի Եվրամիությանը և ՆԱՏՕ-ին հիվանդի հետազոտությունների հիման վրա անցկացվող թունաբանական փորձաքննության արդյունքների մասին, որպեսզի «ընդհանուր արձագանք մշակվի»: Բացի այդ, Բեռլինը մտադիր է կապ հաստատել Քիմիական զենքն արգելող կազմակերպության հետ:

Նշվում է, որ կանցլեր Անգելա Մերկելը, ֆինանսների նախարար Օլաֆ Շոլցը, ԱԳ նախարար Հայկո Մաասը և կառավարության մյուս անդամներն արդեն խորհրդակցություն են անցկացրել Նավալնիի հետ կապված թեմայով և համաձայնեցրել են հետագա քայլերը:

Հիշեցնենք, որ Նավալնիի ինքնազգացողությունը կտրուկ վատացել էր օգոստոսի 20-ին Տոմսկից Մոսկվա թռչելիս: Նրան տեղափոխող ինքնաթիռն արտակարգ վայրէջք է կատարել Օմսկ քաղաքում, ուր նրան հոսպիտալացրել են շտապ օգնության թիվ մեկ հիվանդանոց: Հիվանդանոցի մասնագետները Նավալնիի օրգանիզմում թույնի հետքեր չէին հայտնաբերել: Ըստ նրանց՝ հետազոտությունները միայն ալկոհոլի և կոֆեինի հետքեր են ցույց տվել: Հայտնի է, որ չվերթից առաջ Նավալնին թեյ է ըմպել օդանավակայանի սրճարանում:

Օգոստոսի 22-ին Նավալնիին ինքնաթիռով տեղափոխել են Բեռլինի Charite հիվանդանոց, որի մասնագետներն ավելի ուշ հայտարարել էին վերջինիս թունավորման մասին:

Արմավիրում եւ Երեւանում օգոստոսի 31-ից սեպտեմբերի 1-ն ընկած ժամանակահատվածում ալկոհոլից սուր թունավորման ախտանիշներով մեկ տասնյակից ավելի քաղաքացի է մահացել։ Ըստ քննչական կոմիտեի հաղորդադրության՝ օղիների արտադրությամբ եւ վաճառքով զբաղվել է արմավիրցի 50-ամյա Աշոտ Հովսեփյանը, որը ձերբակալված է։

Հովսեփյանի փաստաբան Գոռ Գեւորգյանն ասաց, որ Հովսեփյանը դեռեւս կասկածյալի կարգավիճակում է։ Ըստ փաստաբանի՝ չկան հետազոտությունների արդյունքները, որոնք կապացուցեն կամ կժխտեն օղուց թունավորման փաստը։ Այնուամենայնիվ, կասկածի պարագայում էլ իր վստահորդն ամեն կերպ աջակցում է իրավապահներին, որ բացահայտեն սպիրտի գնման սկզբնական աղբյուրը։

«Ինքն իր մոտ եղած ամբողջ քանակը հանձնել է իրավապահներին։ Ասել է, որ Արմավիրցի տղամարդուց է գնել սպիրտը, նա էլ ասել է, թե ինքն ումից է գնել։ Թե ինչքան քանակությամբ է սպիրտը սկզբնական աղբյուրից վաճառվել հանրապետությունում դեռ պարզ չի։ Բայց ոչ էլ ապացուցված է, թե այն իսկապես պարունակում է թունավոր տարրեր»,- նշեց փաստաբանը։

Հովսեփյանը պատմել է, որ անվտանգության կանոնները պահպանել է, օգտագործել է թորած ջուր, լիմոն, շաքար. «Շաքարն ու լիմոնի աղը ձեռք է բերել սուպերմարկետից՝ փաթեթավորած։ Իսկ սպիրտն էլ այդ տղամարդուց։ Պատրաստելիս անգամ դեգուստացիա է արել, որ պարզի՝ համը նորմալ է թե ոչ, բայց իրեն ոչինչ չի եղել, ինքնազգացողությունը որեւէ կերպ դրանից չի վատացել, ինքն էլ է հանկարածի եկել պատահածից, շատ վատ է զգում իրեն, շոկային վիճակում է, որ այդքան մարդու մահը կապվում է իր անվան հետ»։

Փաստաբանը պատմեց, որ Հովսեփյանը առողջական խնդիրներ ունի, նրա համար օրվա ընթացքում մի քանի անգամ «Շտապօգնություն» են կանչում։

«Շոկային վիճակում է, առողջական շատ լուրջ խնդիրներ ունի, շաքար ունի, դիետայով պետք է սնվի։ Իրեն նաեւ շատ վատ է զգում, որ այդքան մարդու մահը կապվում է իր անվան հետ»,- նշեց փաստաբանը։

Հովսեփյանը կասկածվում է ՀՀ ՔՕ 279-րդ հոդվածի հատկանիշներով (անվտանգության պահանջներին չհամապատասխանող ապրանքներ թողարկելը կամ իրացնելը, աշխատանքներ կատարելը կամ ծառայություններ մատուցելը): Նրա պատարստած օղուց, ըստ իրավապահների հաղորդած նախնական տվյալների՝ 9 արմավիրցի է մահացել, եւս 11-ն էլ հիվանդանոցում է։ Նշենք, որ եւս 5 անձ էլ մահացել, եւ 2-ն էլ տուժել են Երեւանից, կրկին ալկոհոլային թունավորումից, բայց նրանց դեպքը կապված չէ Արմավիրի դեպքի հետ։

Թեեւ սեպտեմբերի 11-ին, ժամը 18։00-ից սկսկած Հայաստանում կվերանա արտակարգ դրության ռեժիմը, այնուամենայնիվ համաճարակով պայմանավորված Կառավարությունը շրջանառություն մեջ է դրել արտակարգ դրությանը փոխարինող նոր կարգավորումներ նախատեսող օրենսդրական փաթեթ։ Կառավարության նախաձեռնությամբ սեպտեմբերի 4-ին կգումարվի Ազգային ժողովի արտահերթ նստաշրջան, որում էլ կքննարկվի հենց այդ փաթեթը։

«ՀՀ բնակչության սանիտարահամաճարակային անվտանգության ապահովման մասին» օրենքում փոփոխություն եւ լրացումներ կատարելու մասին եւ կից ներկայացված օրենքների նախագծերի փաթեթով՝  եթե վարակիչ հիվանդությունների՝ ՀՀ տարածք ներբերման (ներթափանցման), դրանց ծագման ու տարածման վտանգի, բռնկումների, համաճարակների առաջացման, ինչպես նաեւ դրանց հետեւանքով արտակարգ իրավիճակ առաջանալու դեպքերում կարող է սահմանվել կարանտին։

Լիազոր մարմնի առաջարկությամբ կարանտին կարող է սահմանել՝ Կառավարությունը, մարզպետը, Երեւանի քաղաքապետը։

Ուշագրավ է, որ կարանտին սահմանվելու պարագայում կիրառվելու են սահմանափակող այնպիսի  միջոցառումներ, որոնք, օրինակ՝ արտակարգ դրության ժամանակ էլ էին կիրառվում։ Այսինքն՝ հույս ունենալ, որ արտակարգ դրության ռեժիմի վերացումից հետո սահմանափակումները կթուլանան կամ ընդհանրապես դրանք կհանվեն, մեղմ ասած՝ իրականությանը չեն համապատասխանում։

Կարանտին սահմանվելու դեպքում կիրառվող սահմանափակող միջոցառումներն են՝

1) համաճարակի (կարանտինային) գոտում մուտքի եւ ելքի հատուկ ռեժիմի սահմանում.

2) «Պետական սահմանի մասին» օրենքի 16-րդ հոդվածով նախատեսված պետական սահմանով հաղորդակցության ժամանակավոր դադարեցում կամ սահմանափակում.

3) անձանց ազատ տեղաշարժվելու իրավունքի եւ տրանսպորտային միջոցների տեղաշարժման սահմանափակումներ.

4) օբսերվացիա.

5) ինքնամեկուսացում.

6) մեկուսացում:

Ըստ օրենսդրական փաթեթի՝ սահմանված միջոցառումների կիրառումը չի կարող խոչընդոտել Ազգային ժողովի, Սահմանադրական դատարանի, դատարանների, Մարդու իրավունքների պաշտպանի, զինված ուժերի, ոստիկանության զորքերի եւ սահմանապահ զորքերի բնականոն գործունեությունը:

Կարանտին սահմանելու մասին որոշմամբ կարող են կիրառվել անձանց ազատ տեղաշարժվելու իրավունքի եւ տրանսպորտային միջոցների տեղաշարժման հետեւյալ սահմանափակումները.

1)տեղաշարժվելու իրավունքի սահմանափակում որոշակի տարածքի սահմաններում.

2) անհատական պաշտպանության միջոցների առկայություն կամ կիրառություն եւ սանիտարահամաճարակային անվտանգության կանոնների պահպանում.

3) բնակության վայրի բնակելի տարածքից դուրս գտնվելիս եւ տեղաշարժվելիս անձի մոտ անձը հաստատող փաստաթղթի առկայություն.

4) անձնական օգտագործման մարդատար եւ բեռնատար տրանսպորտային միջոցներում, կանոնավոր եւ ոչ կանոնավոր ուղեւորափոխադրումներ իրականացնող տրանսպորտային միջոցներում, մարդատար-տաքսի ավտոմոբիլներում, հանրային տրանսպորտում անհատական պաշտպանության միջոցների առկայություն կամ կիրառություն եւ սանիտարահամաճարակային կանոնների պահպանում, ուղեւորների թվաքանակի սահմանափակում, ինչպես նաեւ սույն կետով սահմանված սահմանափակումների կիրառման նկատմամբ վերահսկողության նպատակով տրանսպորտային միջոցների զննում:

Նախատեսված միջոցառումների կիրառման նկատմամբ վերահսկողությունն իրականացնում եւ սահմանափակումների խախտման համար պատասխանատվության միջոցները կիրառում է Ոստիկանությունը:

Եթե քաղաքացին մեկուսանա, ապա մեկուսացման վայրում անձի համար ապահովվում են սննդի, կեցության համար բավարար պայմաններ, բժշկական խորհրդատվություն: Անհրաժեշտության դեպքում` մեկուսացված անձի համար ապահովվում է բժշկական օգնություն եւ սպասարկում ստանալու հնարավորությունը:

Սահմանափակող միջոցառումների կիրառման նկատմամբ վերահսկողություն իրականացնելու նպատակով սահմանափակման ենթակա անձանց վերաբերյալ տվյալները էլեկտրոնային առողջպահության համակարգի միասնական օպերատորի կողմից փոխանցվում են Տեսչական մարմնին եւ Ոստիկանությանը:

Կարանտինը սահմանվում է մինչեւ վեց   ամիս ժամկետով: Կարանտին սահմանելու հիմքերը չվերանալու դեպքում այն կարող է երկարաձգվել մինչեւ 6   ամիս ժամկետով` պահպանելով կարանտին սահմանելու սույն օրենքով սահմանված կարգը:  Կարանտինը դադարում է կարանտին սահմանելու մասին որոշման ժամկետը լրանալով կամ մինչեւ նշված ժամկետի լրանալը կարանտին սահմանելու հիմքերի վերացմամբ պայմանավորված կարանտին սահմանելու մասին որոշումը   ուժը կորցրած ճանաչելու միջոցով:

Արտակարգ իրավիճակի հիմք հանդիսացող համաճարակով պայմանավորված կարանտին սահմանելու դեպքում կարող են կիրառվել այնպիսի  միջոցառումներ, ինչպիսին են`

հավաքներ կամ հանրային միջոցառումներ կազմակերպելու, անցկացնելու կամ դրանց մասնակցելու սահմանափակումներ, իրավաբանական անձանց գործունեության սանիտարահամաճարակային անվտանգության կանոնների սահմանում, ապրանքների փոխադրման սահմանափակումներ, կրթական հաստատությունների գործունեության սահմանափակումներ, սահմանափակումներ պետական եւ տեղական ինքնակառավարման մարմիններում եւ այլ հաստատություններում:

Օրենսդրական փաթեթով հանրային են համարվում անձանց սոցիալական, մշակութային, կրթական, սպորտային կամ այլ ժամանցային կարիքների բավարարմանը ուղղված միջոցառումները, ներառյալ`

1) համերգները, ցուցահանդեսները, ցուցադրությունները, թատերական ներկայացումները, կրթական այլ միջոցառումները.

2) տոնական եւ հիշատակի միջոցառումները, ներառյալ` ծննդյան (տարեդարձի), հարսանյաց (նշանադրության) միջոցառումները, հոգեհանգստի եւ հուղարկավորության արարողությունները:

Հավաքներ կազմակերպելու, անցկացնելու կամ դրանց մասնակցելու սահմանափակումների կիրառման նկատմամբ վերահսկողությունն իրականացնում է Ոստիկանությունը:

Կարանտինի պայմաններում մեկուսացման (ինքնամեկուսացման) կամ անհատական պաշտպանության միջոցների կիրառման կանոնները խախտելը, որն անզգուշությամբ առաջացրել է անձի վարակում` պատժվում է տուգանքով` նվազագույն աշխատավարձի երեքհարյուրապատիկից հինգհարյուրապատիկի չափով, կամ կալանքով` առավելագույնը մեկ ամիս ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երկու տարի ժամկետով կամ առանց դրա:

Եթե արարքը կրկնվել է եւ այն անզգուշությամբ մարդու առողջությանը պատճառել է ծանր վնաս, անզգուշությամբ առաջացրել է երկու կամ ավելի անձանց վարակում` պատժվում է տուգանքով` նվազագույն աշխատավարձի հինգհարյուրապատիկից յոթհարյուրապատիկի չափով, կամ կալանքով` մեկից երեք ամիս ժամկետով, կամ ազատազրկմամբ` առավելագույնը երկու տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով կամ առանց դրա:

Նույն արարքը, որն անզգուշությամբ առաջացրել է մարդու մահ`պատժվում է ազատազրկմամբ` երկուսից չորս տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով կամ առանց դրա:

Կարանտին սահմանելու մասին որոշմամբ սահմանված համաճարակի (կարանտինային) գոտի մուտքի եւ ելքի հատուկ ռեժիմը խախտելը` առաջացնում է տուգանքի նշանակում` սահմանված նվազագույն աշխատավարձի հիսնապատիկից մինչեւ յոթանասունապատիկի չափով:

Կարանտինի ընթացքում անձանց ազատ տեղաշարժվելու իրավունքի կամ տրանսպորտային միջոցների տեղաշարժման սահմանափակումները խախտելը, ինչպես նաեւ դրանց զննման իրականացմանը խոչընդոտելը` առաջացնում է տուգանքի նշանակում` սահմանված նվազագույն աշխատավարձի տասնապատիկի չափով:

Կարանտինի ընթացքում տնտեսական գործունեության առանձին տեսակների իրականացման եւ ծառայությունների մատուցման, ինչպես նաեւ տնտեսական գործունեությամբ չզբաղվող այլ կազմակերպությունների գործունեության սահմանափակումները խախտելը` առաջացնում է տուգանքի նշանակում` սահմանված նվազագույն աշխատավարձի հարյուրապատիկից մինչեւ երեքհարյուրապատիկի չափով:

Կարանտինի ընթացքում հավաքներ կազմակերպելու կամ անցկացնելու սահմանափակումները խախտելը` առաջացնում է տուգանքի նշանակում` սահմանված նվազագույն աշխատավարձի հիսնապատիկից մինչեւ երկուհարյուրապատիկի չափով:

Կարանտինի ընթացքում հավաքների մասնակցելու սահմանափակումները խախտելը`առաջացնում է տուգանքի նշանակում` սահմանված նվազագույն աշխատավարձի տասնապատիկի չափով:

Կարանտինի ընթացքում հանրային միջոցառումներ կազմակերպելու, անցկացնելու կամ դրանց մասնակցելու սահմանափակումները եւ արգելքները խախտելը`առաջացնում է տուգանքի նշանակում` սահմանված նվազագույն աշխատավարձի հիսնապատիկից մինչեւ հարյուրապատիկի չափով:

Կարանտինի ընթացքում կանոնավոր փոխադրումներ իրականացնող տրանսպորտային միջոցների սահմանափակումները խախտելը, ինչպես նաեւ դրանց զննման իրականացմանը խոչընդոտելը`առաջացնում է տուգանքի նշանակում` սահմանված նվազագույն աշխատավարձի հիսնապատիկից հարյուրապատիկի չափով։  Կարանտինի ընթացքում մեկուսացման կամ ինքնամեկուսացման կանոնները խախտելը` առաջացնում է տուգանքի նշանակում` սահմանված նվազագույն աշխատավարձի հիսնապատիկից երկուահարյուրապատիկի չափով:

Կարանտինի ընթացքում անհատական պաշտպանության միջոցների կիրառման կանոնները խախտելը` առաջացնում է տուգանքի նշանակում` նվազագույն աշխատավարձի տասնապատիկի չափով:

Կարանտինի ընթացքում կրթական հաստատությունների կողմից սահմանված միջոցառումները եւ սահմանափակումները խախտելը`առաջացնում է տուգանքի նշանակում` սահմանված նվազագույն աշխատավարձի հիսնապատիկից հարյուրապատիկի չափով:

Ազգային ժողովում այս օրենսդրական փաթեթի հիմնական զեկուցող է նշանակվել Արդարադատության նախարարի առաջին տեղակալ Ռաֆիկ Գրիգորյանը: