Արդեն երկրորդ օրն է շարունակում ենք ինտենսիվ կերպով գտնվել Ադրբեջանի ռազմաքաղաքական ղեկավարության սանձազերծած պատերազմական լայնամաշտաբ գործողությունների մեջ: Այս մասին իր ֆեյսբուքյան էջում գրել է Արցախի նախագահ Արայիկ Հարությունյանը՝ դիմելով հայրենիքում եւ Սփյուռքում բնակվող մեր հայրենակիցներին:

«Գիշերվա ընթացքում Պաշտպանության բանակն իրականացրել է մի քանի փայլուն ռազմագործողություններ՝ պաշտպանական բնագծի տարբեր հատվածներում վերականգնելով կորցրած դիրքերը կամ ունեցել որոշակի առաջխաղացում:

Հպարտ և շնորհակալ եմ մեր զորքին, հրամանատարությանը՝ ցուցաբերվող մարտական բարձր ոգու և պատրաստականության համար:

Հպարտ և շնորհակալ եմ մեր ժողովրդին՝ այս ընթացքում ցուցաբերած ողջախոհության, ամեն ինչ հանուն Հայրենիքի ու ճակատի՝ նվիրվածության համար:

Հպարտ և շնորհակալ եմ ՀՀ մեր հայրենակիցներին ու իշխանություններին՝ ցուցաբերած անվերապահ սատարման համար:

Հպարտ և շնորհակալ եմ աշխարհասփյուռ մեր հայրենակիցներից աջակցող հազարավոր զանգերի ու խոսքերի համար:

Խոնարհումս ու ցավակցություններս եմ հայտնում այս ընթացքում հերոսի կյանքով ընկած մեր բոլոր տղաների հարազատներին: Հպարտ և շնորհակալ եմ:

Հարգելի՛ հայրենակիցներ

Մեկ անգամ ևս դիմում եմ բոլորիդ՝ հաղթանակի անվերապահ հավատով ու զգացումով: Անհնար է հաղթել մի ժողովրդի, որը ժամերի ընթացքում վերածվում է կուռ ու միասնական բանակի:

Հաղթանակը մերն է լինելու»:

Հայաստանում սեպտեմբերի 28-ին՝ ժամը 11:00-ի դրությամբ նոր կորոնավիրուսով վարակվելու 174 նոր դեպք է գրանցվել, վարակվածների ընդհանուր թիվը հասել է 49574 դեպքի: Այս մասին հայտնում է ՀՀ ԱՆ հիվանդությունների եւ վերահսկման եւ կանխարգելման ազգային կենտրոնը:

Ընդհանուր թեստերի թիվը կազմում է 286161, վերջին մեկ օրում` 1935 նոր թեստավորում:

Փաստացի այս պահին բուժվում է 4657 պացիենտ, վերջին մեկ օրում ավելացել է 116-ով:

Վերջին տվյալներով ապաքինվել է 43665 անձ` վերջին մեկ օրում 52 անձ:

Մեկ օրում կորոնավիրուսի հետեւանքով մահացել է 6 քաղաքացի, մահացածների թիվը 957 է:

 

Գիշերվա ընթացքում մարտերը շարունակվել են տարբեր ինտենսիվությամբ։ Այս մասին Facebook-ի ր էջում գրել է ՊՆ խոսնակ Շուշան Ստեփանյանը: «Վաղ առավոտյան հակառակորդը վերսկսել է հարձակողական գործողությունները՝ կիրառելով հրետանային միջոցներ, զրահատեխնիկա, այդ թվում՝ «ՏՕՍ» ծանր հրանետային համակարգ։ Հայկական ստորաբաժանումները սառնասրտորեն դիմագրավում են ադրբեջանական ստորաբաժանումների ոտնձգությունները և ձեռնարկում համապատասխան գործողություններ՝ պատճառելով հակառակորդին անձնակազմի և տեխնիկայի զգալի կորուստներ»,-գրել է նա:

Հոկտեմբերի 1-ից ջուրը կդառնա ժամով: Այս մասին հայտարարություն է տարածել «Վեոլիա ջուր» ՓԲԸ-ն։

«Հարգելի սպառող,

Հրապարակված ջրամատակարարման գրաֆիկն առաջիկա ամիսների համար կազմվել է` հաշվի առնելով «Վեոլիա ջուր» ՓԲԸ ներկայիս տեխնիկական հնարավորությունները և համապատասխանում է ՀՀ հանրային ծառայությունները կարգավորող հանձնաժողովի` խմելու ջրի մատակարարմանը ներկայացվող նվազագույն պահանջներին: Այն գործում է 2020 թ. հոկտեմբերի 1-ից մինչև 2021 թ. ապրիլի 30-ը ներառյալ:

Հրապարակված գրաֆիկների վերաբերյալ լրացուցիչ տեղեկատվություն կարող եք ստանալ «Վեոլիա ջուր» ՓԲԸ «Հեռախոսային կենտրոնի» (հեռ.՝ 1-85, 011.300-185, 0-800-00-185` անվճար), veolia.am պաշտոնական կայքի, Բաժանորդների սպասարկման գրասենյակների (հասցե` ք. Երևան՝ Աբովյան 66ա, Ազատության 24, Էրեբունի 5, Լվովյան 2, Ֆուչիկի 1/3, ք. Գյումրի՝ Դուդկոյի 1, ք. Վանաձոր՝ Ն.Ստեփանյան 2), ընկերության տարածքային բոլոր ստորաբաժանումների, ինչպես նաև Վճարման անդորրագրերի միջոցով, որտեղ նշվում է յուրաքանչյուր հաջորդ ամսվա ջրամատակարարման գրաֆիկը:

«Վեոլիա ջուր» ՓԲԸ-ն հիշեցնում է, որ բազմաբնակարան շենքերի ներքին ցանցում վթարների դեպքում անհրաժեշտ է դիմել համապատասխան համատիրությանը, շենքի լիազոր ներկայացուցչին, համայնքապետարանի կամ վարչական շրջանի աշխատակազմին: Անհատական տնատիրություններում վթարները պարտավոր են վերացնել իրենք` սեփականատերերը»,- ասված է հայտարարության մեջ։

Հասցեների ցանկը կարող եք տեսնել այստեղ։

 

«Թող չթվա, որ դա փոքր խնդիր է, օրինակ, ռազմական գործողությունների համեմատ։ Դա այդպես չէ։ Հենց հասարակության քայքայումը, հենց ամբողջական այս իրարամերժ հայտարարությունների ֆոնի վրա, որոնք հնչել են հենց նոր իշխանությունների կողմից՝ իրարամերժ, շատ վտանգավոր։ Մենք էլի հնարավորություն ունեցել ենք դրա մասին խոսել, նա ուզում է այդ անորոշությունը դարձնել զենք և պայթեցնել այդ հարցը ներսից, որ Հայաստանում համոզված լինեն, որ ահա նոր իշխանությունը դրժել է,  թե տեսեք՝ ո՞վ է ձեր իշխանությունը, նրանք մեզ խոստացել են և դրժել են»,- այսօր մամուլի ասուլիսում հայտարարեց «Ընդդեմ իրավական կամայականության» ՀԿ գործադիր տնօրեն Լարիսա Ալավերդյանը՝ անդրադառնալով վերջին շրջանում Ադրբեջանում հնչող հայտարարություններին։ Բանախոսը գտնում է, որ Ադրբեջանը ցանկանում է, որ իր խոսքի նշանակությունը ավելի մեծ լինի Հայաստանում, քան հայկական կողմին:

«Էլ ի՞նչ անի Իլհամ Ալիևը, որ Հայաստանում հասկանան իր քաղաքականությունը»,-նկատեց Լարիսա Ալավերդյանը և հայտարարեց, որ այն անվստահությունը, որ կա Հայաստանում նոր իշխանությունների հանդեպ արտաքին քաղաքականության և հարաբերությունների հանդեպ ընդհանուր առմամբ և Արցախի հարցում՝ մասնավորապես, Ադրբեջանը փորձում է դարձնել զենք:

«Ինձ մոտ վրդովմունք է առաջանում, երբ վարչապետը ասում է ինչ-որ բաներ, որոնց չի տիրապետում, նա ջնջում է անջնջելին: Ես չեմ խոսում իշխանությունների մասին, ես խոսում եմ ժողովրդի մասին: Այս տարիների ընթացքում ժողովուրդը շան քթից ջուր խմեց, էլ ինչ անի: Ինչպե՞ս կարելի է դա զրոյացնել, ինչպե՞ս կարելի է երկրի պատմությունը նույնականացնել իշխանավորների այս կամ այն սխալների հետ»,- հայտարարեց Ալավերդյանը և նկատեց, որ բոլոր երեք նախագահների ժամանակ էլ ինչ-որ մի դրական բան եղել:

Նրա խոսքով, այդ ժամանակ եղել են նաև բացասական բաներ և բերեց առաջին նախագահի օրինակը, որը ամբողջովին քանդել էր տնտեսությունը:

«Բոլոր գյուղերում եղել են փոքր գործարաններ և ֆաբրիկաներ, բառիս բուն իմաստով քարը քարի վրա չթողեցին»,-նշեց Հայաստանի առաջին օմբուդսմենը և հիշեց նաև առաջին նախագահի ժամանակ արձանագրված դրականը՝ երբ խորհրդային համակարգից անցման գործընթացներ մեկնարկեցին: Նրա համոզմամբ, բոլոր ժամանակներում իշխանությունում եղել են նվիրյալներ, որոնք հնարավորինս նվազեցրել են այն կորուստները, որոնք ընդհանրապես կարող էին լինել բախտորոշ:

Լարիսա Ալավերդյանն ընդգծեց, որ Թուրքիան և Ադրբեջանը ունեն ռազմավարական ծրագիր, որտեղ Հայաստանը խանգարող հանգամանք է։ Ըստ նրա, վերջին տարիներին Թուրքիան և Ադրբեջանը գործում են որպես երկու պետությունների միություն:

«Այն, որ նրանք դա դե յուրե չեն արել կամ կարող է դեռ առժամանակ չանեն որևէ մի ձևով՝ չպետք է մեզ մոլորության մեջ գցի»,- նշեց բանախոսը և անդրադարձավ հայաստանյան որոշ վերլուծաբանների այն մտքերին, թե Ադրբեջանի և Թուրքիայի քաղաքականության մեջ տարբերություն կա մասնավորապես՝ Արցախի և Հայաստանի հարցում։ Ալավերդյանը նման դատողություններն անթույլատրելի միամտություն  որակեց։

«Մենք պետք է լուրջ ընդունենք, որ մենք ունենք երկու հարևան պետություններ, որոնք որ դարեր շարունակ, իսկ հարյուր տարի առաջ այդպես էլ չկարողացան ավարտել ցեղասպանությունը Արևելյան Հայաստանում։ Նրանք բոլորովին չեն հրաժարվել այդ մտքից, խիստ հակառակը»,- հայտարարեց Լարիսա Ալավերդյանը:

Քրեական ոստիկանության գլխավոր վարչության կոռուպցիոն և տնտեսական հանցագործությունների դեմ պայքարի վարչությունում ստացված օպերատիվ տեղեկությունների հիման վրա նախապատրաստված նյութերով փաստական տվյալներ են ստացվել, որ 2012-2013 թվականներին մի ՍՊ ընկերության տնօրինություն, նպատակ ունենալով չվճարել առանձնապես խոշոր չափերի հարկերը, հարկման հիմք հանդիսացող հարկը, տուրքը, պարտադիր այլ վճարը հաշվարկելու և վճարելու պարտավորություն առաջացնող հարկային 8 հաշիվներում մտցրել է ակնհայտ կեղծ տվյալներ։

Մասնավորապես, մայրաքաղաքի Դավիթաշեն թաղամասի Միկոյան փողոցում կառուցված բազմաբնակարան բնակելի համալիրի բնակարանների վաճառքի ընթացքում հարկային հաշիվներում 1 քմ-ի արժեքը ձևակերպվել է 162 000-171 000 դրամ՝ ներառյալ ավելացված արժեքի հարկը, իսկ ավտոկայանատեղիների 1 քմ-ի արժեքը՝ 60 000 դրամ՝ ներառյալ ԱԱՀ-ն։ Սակայն փաստացի բնակարանների 1 քմ-ն վաճառվել է 740-980 ԱՄՆ դոլարին համարժեք, իսկ ավտոկայանատեղիները՝ յուրաքանչյուրը՝ 15 000 ԱՄՆ դոլարով։

Արդյունքում՝ թաքցվել է ընկերության 119 910 227 դրամի շրջանառությունը և չի վճարվել առանձնապես խոշոր չափերով՝ 39 973 273 դրամի հարկ, որից 19 989 035 դրամը՝ ավելացված արժեքի հարկ, իսկ 19 984 238-ը՝ շահութահարկ։

Առանձնապես խոշոր չափերով հարկերը չվճարելու առերևույթ հանցագործության դեպքի առթիվ ՀՀ քրեական օրենսգրքի 205-րդ հոդվածի 2-րդ մասով հարուցվել է քրեական գործ, որն ուղարկվել է ՊԵԿ քննչական վարչություն՝ նախաքննության։

Մարդիկ հաճախ հետաձգում են ստոմատոլոգին այցելությունը։ Դիմանում են, սպասում՝ մտածելով, թե ցավ է, կանցնի։ Բայց իրականում խնդիրը գնալով բարդանում է, ու կարող է բարդանալ այնքան, որ բուժմամբ զբաղվի ոչ թե ստոմատոլոգը, այլ արդեն դիմածնոտային վիրաբույժը։ Ինչո՞վ է վտանգավոր ստոմատոլոգին այցը ուշացնելը՝ կպատմի հենց «Արթմեդ» ԲՎԿ դիմածնոտային ծառայության վիրաբույժ Գրիգոր Գրիգորյանը Առողջապահական համակարգ մասնագիտական պարբերականի հետ զրույցում:

Հավանաբար շատերը չգիտեն կամ չեն պատկերացնում, որ ընդամենը մեկ չբուժած ատամը, կարող է դառնալ առողջության, անգամ կյանքի սպառնալիք։ Կարիեսը և պուլպիտը նախ առաջացնում են պերիօդոնտիտ՝հարարմատային հյուսվածքների բորբոքում, հետո բորբոքային պրոցեսը տարածվում է ծնոտով մեկ՝առաջացնելով պերիօստիտ կամ ենթավերնոսկրային թարախակույտ,ինչպես նաև կարող է տարածվել  դեպի դիմածնոտային շրջանի փափուկ հյուսվածքներ՝առաջացնելով աբսցես կամ ֆլեգմոնա։

Հիվանդի ինքազգացողությունը վատանում է, ի հայտ են գալիս ինտոքսիկացիայի երևութներ, մինչև 40  ջերմության բարձրացում, ցավ, բերանի բացման սահմանափակում, մաշկի այտուց և հիպերեմիա։

Ինչպես պատմում է դիմածնոտային վիրաբույժ  Գրիգոր Գրիգորյանը, աբսցեսների ու ֆլեգմոնաների բուժումն արդեն պահանջում է վիրահատական միջամտություն և երբեմն ստացիոնար երկարատև բուժում. «Աբսցեսը պատիճավորված թարախային էքսուդատն է, իսկ ֆլեգմոնան բջջանքի տարածուն թարախային բորբոքումը: Կատարում ենք աբսցեսի կամ ֆլեգմոնայի բացահատում ու դրենավորում, ապահովում թարախի էվակուացիան, հետո նշանակում ենք դեղորայքային բուժում, անտիբիոտիկային թերապիա, հակահիստամինային, դեզինտոքսիկացիոն,ցավազրկող թերապիա: Հետվիրահատական շրջանը ստացիոնարում կախված է հիվանդի ընդհանուր վիճակից, հիվանդության բարձիթողիության աստիճանից»:

Ավելին, ո՛չ միայն չբուժած, այլև սխալ բուժված ատամը կարող է դառնալ դիմածնոտային լուրջ խնդիր։ Մասնավորապես, պատահում է, որ ոչ հմուտ ստոմատոլոգիական միջամտության արդյունքում հարքթային հայմորյան խոռոչներից մեկում պլոմբանյութ է հայտնվում։ Բժիշկ Գրիգորյանը ներկայացնում է դրա հավանական բարդությունները. «Կարող է զարգանալ սուր օդոնտոգեն (ատամնածին) հայմորիտ։ Խնդիրը ժամանակին չկանխելու դեպքում, կարող է առաջացնել մի շարք բարդություններ՝թարախաբորբոքային պրոցեսի տարածում դեպի դիմածնոտային շրջանի փափուկ հյուսվածքներ, հարքթային այլ խոռոչներ,դեպի ակնակապիճ,գլխուղեղ՝առաջացնելով այնպիսի ծանր բարդություններ ինչպիսիք են՝ դիմային երակի թրոմբոֆլեբիտ, մենինգիտ, մենինգոէնցեֆալիտ,ուղեղի աբսցես և այլն» 

Օդոնտոգեն հայմորիտի ժամանակ լինում է դեմքի շրջանում ծանրության զգացում, ճառագայթող ցավ դեպի աչք, քունք, ականջ, քթից արտադրություն՝ շճային կամ թարախային բնույթի,հնարավոր է սուբֆեբրիլ ջերմություն: Եթե սուր շճային կամ սուր թարախային հայմորիտ է, բուժումը կատարվում է կոնսերվատիվ դեղորայքային մեթոդներվ։Հեռացվում է ինֆեկցիայի աղբյուր հանդիսացող ատամը, նշանակվում են քթի  կաթիլներ կամ փչոցներ, հակաբիոտիկային թերապիա, հայմորյան խոռոչի պունկցիա և լվացումներ։ Քրոնիկ օդոնտոգեն հայմորիտի ժամանակ կատարվում է վիրահատություն, հեռացվում են օտար մարմինը և պաթոլոգիական հյուսվածքները։ Պարտադիր հեռացվում  է պատճառային ատամը՝ հայմորիտի կրկնությունը բացառելու համար։

Դիմածնոտային բժիշկը հիվանդ ատամից առաջացող մեկ այլ լուրջ խնդիր էլ է նշում։ Հաճախ այդ նույն չհեռացված ատամից կարող է առաջանալ կիստա: Կիստան հեղուկով լի բարորակ գոյացություն է, որը կարող է առաջանալ վերին ու ստորին ծնոտներում, ժամանակի ընթացքում մեծանում է, սկսում քայքայել ոսկրային հյուսվածքը: Երբեմն ոսկորն այնքան է բարակում, որ առաջանում է ծնոտի ախտաբանական կոտրվածք:

«Կիստայի առանձնահատկությունն այն է, որ զարգանում է առանց ախտանշանների, այնքան ժամանակ մինչև մարդը դեմքին չի նկատում անհամաչափություն և ուռածություն: Երբեմն կիստաները պատահաբար են հայտնաբերվում ԼՕՌ բժշկի կամ ստոմատոլոգի ցուցումով կատարված ռենտգենաբանական հետազոտության արդյունքում: Երբեմն կիստան կարող է ավելի վաղ հայտնաբերվել, եթե առաջանա կիստայի թարախակալում, ու հիվանդը ցավեր ունենա»,- ասում է բժիշկ Գրիգորյանը:

Սրանք դիմածնոտային այն խնդիրներն են, որոնք առաջանում են ատամներից, և դրանց լիարժեք բուժմամբ կարող է զբաղվել միայն դիմածնոտային վիրաբույժը։Դիմածնոտային բժիշկները հաճախ են կատարում հեռացումներ ոչ միայն բորբոքման պատճառ դարձած, այլև ռետենցված և կիսառետենցված, դիստոպիկ ատամների։ Դրանք այն ատամներն են,  որոնք գտնվում են ծնոտների մեջ, սխալ դիրք ունեն, չծկթած ժանիքներ կամ իմաստության ատամներ են, և հեռացվում են միայն վիրահատական միջամտությամբ, երբեմն անգամ պահանջվում է անեսթեզիոլոգիական ծառայություն՝ընդհանուր անզգայացում։ Դիմածնոտային վիրաբույժներն են զբաղվում նաև հղիների, սոմատիկ խնդիրներ ունեցողների ատամների հեռացումով, երբ անհրաժեշտ է ստացիոնար պայմաններ և տարբեր մասնագետների խորհրդատվություն։

«Արթմեդ» բժշկական վերականգնողական կենտրոնի դիմածնոտային ծառայությունում մեծ հաջողությամբ իրականացնում են նաև կոտրվածքների վերականգնում և պլաստիկ միջամտություններ: Այստեղ իրականացվող պլաստիկ միջամտությունները ունեն ինչպես էսթետիկ,այնպես էլ ֆունկցիոնալ-վերականգնողական նշանակություն: Օրինակ՝ կարող է կատարվել ֆունկցիոնալ-ռեկոնստրուկտիվ վիրահատություն, երբ վնասվածքի կամ նորագոյացության հեռացման հետևանքով առաջանում է արտաքին թքի դեֆեկտ կամ դեֆորմացիա,ինչպես նաև  կատարվում են երկորրդային, երրոդային էսթետիկ վիրահատություններ։

Օրթոգնատիկ վիրահատությունները ևս ունեն էսթետիկ և  ֆունկցիոնալ նշանակություն, դրանց շնորհիվ ուղղվում է սովորական դիրքից առաջ ու հետ տեղադրված ծնոտների կծվածքը:

«Արթմեդ» ԲՎԿ դիմածնոտային բաժանմունքը ընդունում է պլանային ու շտապ դեպքերով բազմաթիվ հիվանդները: Այստեղ կարևորվում է թիմային աշխատանքը.

պրոֆեսիոնալ բարձր մակարդակում հզոր ախտորոշիչ կենտրոնի, նյարդաբանական, ԼՕՌ ծառայությունների հետ սերտ համագործակցությամբ պացիենտներին մատուցվում է արդյունավետ ու լիարժեք բուժում:

 

Հայաստանում սեպտեմբերի 26-ին՝ ժամը 11:00-ի դրությամբ նոր կորոնավիրուսով վարակվելու 429 նոր դեպք է գրանցվել, վարակվածների ընդհանուր թիվը հասել է 49072 դեպքի: Այս մասին հայտնում է ՀՀ ԱՆ հիվանդությունների եւ վերահսկման եւ կանխարգելման ազգային կենտրոնը:

Ընդհանուր թեստերի թիվը կազմում է 280366, վերջին մեկ օրում` 4289 նոր թեստավորում:

Փաստացի այս պահին բուժվում է 4253 պացիենտ, վերջին մեկ օրում ավելացել է 251-ով:

Վերջին տվյալներով ապաքինվել է 43576 անձ` վերջին մեկ օրում 175 անձ:

Մեկ օրում կորոնավիրուսի հետեւանքով մահացել է 1 քաղաքացի, մահացածների թիվը 948 է:

Նախորդ օրն արձանագրվել է մահվան 2 դեպք, երբ պացիենտի մոտ հաստատվել է կորոնավիրուսային վարակ, սակայն մահը վրա է հասել այլ հիվանդության պատճառով: Այդպիսի դեպքերի ընդհանուր թիվը 295 է:

Կենտրոնական բանկը գիտակցված է բարձրացրել վարկերի տոկոսադրույքները, որ կրճատի փոխառուներին վարկերի տրամադրման ծավալը։ Այս մասին սեպտեմբերի 24-ին ԱԺ նիստերի դահլիճում ընթացող՝ «Վարկերի եւ ժամկետանց այլ պարտավորությունների նկատմամբ տույժերի, տուգանքների եւ վարկային տոկոսադրույքների կիրառման, դրանց համաներման եւ այլ վարկային հիմնախնդիրները ՀՀ բանկային համակարգում» թեմայով խորհրդարանական լսումների ժամանակ ասաց Կենտրոնական բանկի փոխնախագահ Ներսես Երիցյանը։

Նրա խոսքով՝ սա հատուկ է արվում, որ նվազեցվի բնակչության վարկային բեռը։ «Սա տնտեսության օրենքն է։ Երբ վարկերի տոկոսադրույքները մեծանում են, դրանց պահանջարկը նվազում է, իսկ երբ նվազում են, ապա պահանջարկն աճում է։ Եթե վարկային պայմաններն անտրամաբանական կերպով մեղմվեն, ընդ որում՝ հաշվի չառնելով եղած ռիսկերը, կամ ընդհանրապես վարկառուներին վարկային արձակուրդ տրվի, ապա պահանջարկը զգալիորեն կմեծանա, եւ դա ապագայում կարող է լուրջ սպառնալիքներ եւ խնդիրներ ստեղծել, քանի որ վարկառուների վճարունակությունը տարբեր է։ Մեկի մոտ այն բարձր է, մյուսի մոտ՝ ոչ։ Այնպես որ, այս ճանապարհը, ինչպես ցույց է տալիս միջազգային փորձը, տանում է ճգնաժամերի։ Քաղաքական եւ պոպուլիստական մոտեցումները բանկերին ստիպում են սահմանել վարկերի ցածր տոկոսադրույքներ, եւ բանկերը ստիպված են վարկերի տոկոսադրույքները նվազեցնել՝ հաշվի չառնելով հնարավոր ռիսկերը։ Վերջնարդյունքում բոլորս դրա պատճառով վճարում ենք հարկերի բարձրացման տեսքով»,- պարզաբանեց Երիցյանը։

ԲՀԿ առաջնորդ Գագիկ Ծառուկյանի խափանման միջոցի հարցով դատական նիստի մասին կողմերին ծանուցել են ԱԱԾ ավագ օպերլիազորները։ Այս մասին լրագրողների հետ զրույցում ասաց պաշտպաններից Երեմ Սարգսյանը։

«Մնացական Մարտիրոսյանը ստանալով գործը, հասկանալով, որ ամսի 23-ին չի կարող պատշաճ ձեւով ծանուցումներ ուղարկել փոստային առաքման միջոցով չի հասնի տեղ։ Արագությունն այնքան պարտադիր էր իրենց համար, որ նշանակեց ամսի 23-ին, 23-ի նիստը հետաձգվելուց հետո էլ որոշվում է, որ ԱԱԾ օպերատիվ աշխատակիցների միջոցով ամսի 25-ի համար տեղ հասցվեն։ Երեւի այս մարմնի ֆունկցիան այդքան էլ լավ չեն պատկերացնում։ ԱԱԾ աշխատակիցները դատարանի աշխատակազմի փոխարեն ծանուցագրեր է բաժանում»,- ասաց Սարգսյանը։

Պաշտպաններից Սամվել Դիլբանդյանն էլ ասաց, որ իրենց դեռեւս Վճռաբեկ դատարանի որոշումը չեն ստացել. «Մենք մերժման որոշումը չենք ստացել, իսկ առաջին ատյանի դատարանն արդեն նիստ է նշանակել։ Այս ամենի արդյունքում խախտվել է անձի արդար դատաքննության իրավունքը։ Եթե առաջին ատյանի դատարանն ինքնաբացարկ չհայտնի, ապա նշանակում է, որ ինքը լեգիտիմ դատարան չի»։

Երեմ Սարգսյանը շեշտեց, որ այս գործընթացի շտապողականության նպատակը Ծառուկյանին կալանավորելն է։

Նշենք, որ Ծառուկյանի պաշտպանները դատավոր Մնացական Մարտիրոսյանին ինքնաբացարկ են հայտնել. քիչ անց կհրապարակվի որոշումը։

Հիշեցնենք, որ պաշտպանները Գագիկ Ծառուկյանի գործով հանցագործության մասին հաղորդում են ներկայացրել ՀՀ գլխավոր դատախազին եւ ՀՔԾ-ին։ Նրանք հայտնել են, որ ունեն փաստական տվյալներ այն մասին, որ ինչ-որ պաշտոնատար անձանց անօրինական միջամտության արդյունքում «որոշվել» է, որ վճռաբեկ դատարանը հնարավորինս սեղմ ժամկետում պետք է մերժի ներկայացված վճռաբեկ բողոքները, որպեսզի դատական գործը շատ արագ մուտքագրվի Երեւան քաղաքի ընդհանուր իրավասության դատարան, հնարավորինս արագ կարգով քննություն իրականացվի եւ Գագիկ Ծառուկյանը կալանավորվի։

Գագիկ Ծառուկյանին մեղադրանք է առաջադրվել ՀՀ ՔՕ 154.2 հոդվածով (ընտրողի կողմից թեկնածուներից, կուսակցություններից (կուսակցությունների դաշինքներից), հանրաքվեի քարոզչական նախաձեռնություններից կաշառք ստանալը կամ թեկնածուների, կուսակցությունների (կուսակցությունների դաշինքների), հանրաքվեի քարոզչական նախաձեռնությունների կողմից ընտրողներին կաշառք տալը կամ ընտրողի ազատ կամքի իրականացմանը խոչընդոտելը):