2010 թվականին Հայաստանի Հանրապետությունում Ընդհանուր իրավասության առաջին ատյանի դատարաններում արդարացման դատավճիռ է կայացվել 27 դատական գործով 35 անձանց նկատմամբ:
Ի պատասխան մեր հարցման, այս տեղեկությունը տրամադրեցին դատական դեպարտամենտից : 25 դատական գործի վերաբերյալ արդարացումը եղել է լիովին իսկ 2 գործով`փոփոխություններով, այսինքն` արդարացման վճիռը կայացվել է դատապարտվելուց հետո միայն:

Նշենք նաև, որ 2010-ին դատապարտվել է 4402 անձ:

Այսօր Ազգային ժողովում հայտարարեց արդարադատության նախարար Հրայր Թովմասյանը՝ ԱԺ-կառավարություն հարցուպատասխանի ժամանակ արձագանքելով «Ժառանգություն» խմբակցության պատգամավոր Լարիսա Ալավերդյանի հարցին, նշել է, որ քրեակատարողական հիմնարկներում բենզինը թմրանյութի դեր է կատարում: Արդարադատության նախարարություն կալանավայրեր հակասությունը սկսվեց այն ժամանակից, երբ այդ հիմնարկները դե յուրե անցան արդարադատության համակարգ, իրականում մնալով, ոստիկանության իրավասության ներքո. և հիմա այդ պայքարը թեկուզ ոչ տեսանելի շարունարկվում է, ու երկուստեք առիթը բաց չեն թողնում:

Հարցին, թե վերջին տարիներին բանտերում մահացության թիվն աճել է, նախարարն ասաց. «Այդ մահացությունների մի մասը պայմանավորված է մի հիվանդության հետ, որը, նաև պետք է հնչեցնել, թմրամոլության մի տեսակ է, որը ձեռք է բերվում բենզինի և որոշակի այլ նյութերի խառնուրդով և որի ռիսկայնությունը բավական բարձր է: Այսինքն՝ իրականում այսօր բենզինը կատարում է թմրանյութի դեր, և այսօր այդ խնդիրը կա»: Սակայն նրա կարծիքով, ՔԿՀ-ներում մահացության դեպքերի աճը մասամբ կապված է այնպիսի հիվանդությունների հետ, որ անգամ դրսում է դժվար կանխել:

ՔԿՀ-ների խնդիրների մասին խոսելիս՝ նախարար Թովմասյանը նաև նշեց, որ վերջին երեք տարում Հայաստանի ՔԿՀ-ներում սպանության դեպք չի եղել, իգական սեռի անչափահաս դատապարտվածներ չկան: Իսկ Վերջին տարիներին չորս ինքնասպանության դեպք է եղել, բոլորի դեպքում էլ գրություն է թողնվել՝ ինքնասպանության համար որևէ մեկին չմեղադրելու կոչով:

Հարգարժան պարոն Սարգսյան.

Դեռևս 2008 թ. սեպտեմբերի 23-ին ՀՀ Արմավիրի մարզի Մրգաստան գյուղի բնակիչ Հովհաննես Եղիազարյանին անմիջապես իր հայրական տան դիմացից առևանգել, Երևանում գործող «Էլիտ Շանթ» գործարան է տեղափոխել ու դաժան ծեծի ենթարկել բազում հանցագործություններ կատարած և անպատիժ մնացած Վարշամ (Յուրա) Ղարիբյանը: Այս գործողությունների նպատակն է եղել ստիպել Հ. Եղիազարյանին՝ ստացականներ գրել, թե իբր՝ ինքը պարտքով խոշոր գումար է վերցրել Վ. Ղարիբյանից: Ստացականները ստիպողաբար գրելուց հետո Վ. Ղարիբյանը վերցրել է Հ. Եղիազարյանի գրպանում եղած 120.000 ՀՀ դրամը, որից միայն 5000 ՀՀ դրամն է վերադարձրել`տաքսիով տուն հասնելու համար: Հ. Եղիազարյանի ավտոմեքենան ևս Վ. Ղարիբյանը պահել է գործարանի տարածքում:

Ծեծի հետևանքով Հ. Եղիազարյանը ստացել է տարբեր աստիճանի մարմնական վնասվածքներ, այդ թվում` գլխուղեղի ցնցում, քթոսկրի կոտրվածք, և մինչև 2008 թ. Հոկտեմբերի վերջը բուժում է ստացել տարբեր բուժհաստատություններում:

Դեպքի առթիվ 29.09.2008 թ. ՀՀ ոստիկանության Վաղարշապատի քննչական բաժանմունքում ՀՀ քրեական օրենսգրքի 131-րդ հոդվածի 2-րդ մասի 1-ին կետի հատկանիշներով հարուցվել է քրեական գործ` Հ. Եղիազարյանին առևանգելու փոստի առթիվ:

Միայն 13.02.2009 թ. է Վարշամ Ղարիբյանին մեղադրանք առաջադրվել, այն էլ՝ ՀՀ քրեական օրենսգրքի 117-րդ հոդվածով Հ. Եղիազարյանին թեթև վնաս պատճառելու կապակցությամբ:

Ակնհայտ թերի, միակողմանի քննություն կատարելուց հետո, նախաքննական մարմինը 3 անգամ`28.02.2009, 06.08.2009 և 11.03.2010 թթ. որոշումներ է կայացվել քրեական գործի վարույթը կարճելու և Վարշամ Ղարիբյանի նկատմամբ քրեական հետապնդումը դադարեցնելու մասին:

Կատարվածն այն աստիճան զարհուրելի է եղել, որ ՀՀ Արմավիրի մարզի ընդհանուր իրավասության դատարանը երեք անգամ շարունակ` 30.06.2009, 19.10.2009 և 10.06.2010 թթ. վերացրել է քրեական գործի վարույթը կարճելու և քրեական հետապնդումը դադարեցնելու մասին որոշումները, և կարճված քրեական գործի վարույթը վերահսկվել է:

Անգամ այս աստիճան միակողմանի նախաքննությամբ ձեռք բերված ապացույցները հիմնավորում են Վարշամ Ղարիբյանի կողմից կատարված հանցագործությունների փաստը, և օրենքը թույլ է տալիս սահմանված կարգով Վ. Ղարիբյանին ենթարկել քրեական պատասխանատվության:

Քննչական մարմնի և նրա նկատմամբ հսկողություն իրականացնող դատախազության նման պահվածքն ունի իր պատճառները: Քրեական գործի շարունակաբար ապօրինի կարճումներն ուղղակիորեն կապվում են ՀՀ գլխավոր դատախազ Ա. Հովսեփյանի անվան հետ: Գաղտնիք չէ, ու մամուլում էլ բազմաթիվ հրապարակումներ են եղել այն մասին, որ Վ. Ղարիբյանը գտնվում է ՀՀ գլխավոր դատախազի անձնական հովանավորության ներքո: Հենց դա է պատճառը, որ Վ. Ղարիբյանը դիմել է նման լկտի ու սանձարձակ քայլի, համոզված լինելով, որ Աղվան Հովսեփյանի հովանավորությամբ խուսափելու է պատասխանատվությունից, և անպատժելիությունը Վ. Ղարիբյանին դրդում է նորանոր հանցագործություններ կատարել: Միայն այս երկու տարիների ընթացքում Վ.Ղարիբյանը կատարել է բազմաթիվ հանցագործություններ, ու դրանց վերաբերյալ հարուցված քրեական գործերը հաջորդաբար կարճվել են:

Ի վերջո, Վ. Ղարիբյանի «ուժեղ մեջքն» իր գործը արել է, և 17.09.2010թ. քննիչը (որի եղբայրն, ի դեպ, նույնպես աշխատում է Վ. Ղարիբյանի մոտ՝ որպես առաքիչ) կայացրել է Վ. Ղարիբյանի նկատմամբ քրեական հետապնդումը դադարեցնելու և քրեական գործի վարույթը կասեցնելու մասին որոշումներ:

Արմավիրի մարզի ընդհանուր իրավասության դատարանն իր մեջ ուժ չի գտել վերացնելու այդ որոշումներն, ու այդ որոշումների դեմ ներկայացված բողոքները մերժել է: Այժմ կայացված որոշումները Հ. Եղիազարյանը բողոքարկել է ՀՀ Վճռաբեկ դատարան, և մենք սպասում ենք այդ դատարանի որոշմանը:

Չենք ցանկանում հավատալ, որ Վ.Ղարիբյանին հովանավորողն այնքան զորեղ է, որ Վ. Ղարիբյանը կարողանա հերթական անգամ խուսափել իր արարքին համարժեք, օրենքով սահմանված պատասխանատվությունից:

Ավելին, անպատասխանատվությունից թևավորված Վ. Ղարիբյանը, օգտագործելով առևանգման ու ծեծի հետևանքով ստիպողաբար գրված ստացականները, քաղաքացիական հայց է հարուցել Հ. Եղիազարյանի դեմ և հիմա էլ ցանկանում է նրա ձեռքից խլել հայրական տունը՝ ընտանիքին թողնելով փողոցում:

Հարգելի պարոն Նախագահ, սա է պատճառը, որ ճարահատյալ դիմում ենք Ձեզ՝ հայցելով Ձեր միջամտությունը Հ. Եղիազարյանին առևանգելու և ծեծի ենթարկելու փաստի առթիվ հարուցված քրեական գործը վերսկսելու և օրինական ընթացք ապահովելու հարցում:

Ս.թ. փետրվարի 28-ին մենք` Հ. Եղիազարյանի հարազատներս ու համագյուղացիներս, այցելել էինք Նախագահի նստավայր ու Ձեզ հասցեագրված դիմում հանձնել, որում առավել մանրամասն ներկայացված էր կատարվածը: Ի զարմանս մեզ, սակայն, հաշված օրեր անց տեղեկացանք, որ Հ. Եղիազարյանի դիմումն ուղարկվել է ՀՀ գլխավոր դատախազություն: Փաստորեն ստացվում է, որ դիմումում բարձրացված հարցերին պետք է պատասխանի Վ. Ղարիբյանին հովանավորողի կողմից ղեկավարվող հիմնարկը:

Համոզված ենք, որ դիմումի բովանդակությունը Ձեզ պատշաճ կարգով չի զեկուցվել, այլապես չէր վերահասցեագրվի ՀՀ գլխավոր դատախազություն: Սա է պատճառը, որ ստիպված ենք Ձեզ դիմել բաց նամակի ձևով՝ հավատալով, որ կատարվածի մասին տեղեկանալով, թույլ չեք տա, որ օրինազանցն օգտվի պետական պաշտոնյայի հովանավորությունից և խուսափի պատասխանատվությունից:

Հարգելի պարոն Նախագահ, խնդրում ենք Ձեր հանձնարարությունը պատշաճ մարմիններին՝ օբյեկտիվ և բազմակողմանի քննություն կատարելու և հանցագործություն կատարած Վ. Ղարիբյանին պատժելու համար:

Քիչ առաջ ի պատասխան Հայկական վարկածի հարցի ոստիկանության լրատվականից հայտնեցին, որ Ապրիլի 12-ի գիշերը թմրամիջոց օգտագործելու և պահելու կասկածանքով ոստիկանություն բերման ենթարկված հանցավոր աշխարհում ճանաչված «օրենքով գող» «Օշականցի Գևորիկ» մականունով Գևորգ Մելիքյանը ձերբակալվել է: Գևորգ Մելիքյանի մոտ, ըստ ոստիկանության, խուզարկությամբ հայտնաբերվել է ափիոն թմրամիջոցի նմանվող 1,5 գ մուգ շագանակագույն զանգված:

Հայտնաբերվածն ուղարկվել է փորձաքրեագիտական ստուգման, իսկ նախապատրաստված նյութերը Քննչական գլխավոր վարչություն:

Ոստիկանությունից հայտնեցին, որ նախկինում դատապարտված 41-ամյա «օրենքով գողին» ոստիկանության ԿՀԴՊ գլխավոր վարչության ծառայողները բերման են ենթարկել Աշտարակ-Երևան ճանապարհին գտնվող գազալցակայանի մոտից:

Վերջին շրջանում սա առաջին դեպքը չէ, որ Օշականցի Գևորիկը գրավում է իրավապահների ուշադրությունը ու բերման ենթարկվում ոստիկանության համապատասխան բաժին: Հետքաքրքիր է ի՞նչն է նմանօրինակ ուշադրության պատճառը: Նախկինում մեր այդ հարցին իրավապահ համակարգից պարզաբանել էին, որ ժամանակ առ ժամանակ հանցաշխարհի կենտրոնական դեմքերին պրոֆիլակտիկայի համար բաժին են բերում, սակայն այս անգամ կարծես, բանը պրոֆիլակտիկ միջոցառմամբ չի ավարտվել, թեպետ ով իմանա…

Հիշեցնենք, որ Օշականցի Գևորիկը երգչուհի Սյուզի Մելիքյանի հարազատ հորեղբայրն է:

Ամերիկահայ մոդել Քիմ Քարդաշյանը զայրացել է՝ Cosmo-ի միջազգային ֆոտոսեսիային մասնակցելու ժամանակ Cosmopolitan ամսագրի թուրքական տարբերակի շապիկին տեսնելով իր լուսանկարը:
Հիշեցնենք, որ նույն լուսանկարը տպվել է նաև հեղինակավոր հանդեսի հայկական առաջին հրատարակման շապիկին:
Քիմին հատկապես զայրացրել է այն փաստը, որ լուսանկարը տպվել է ամսագրի ապրիլյան համարում, քանի որ այդ ամսին իր հայրնակիցները նշում են Հայոց ցեղասպանության տարելիցը:

TMZ կայքը տեղեկացնում է, որ ամսագրի ներկայացուցիչները նկարը տպագրելուց առաջ չեն տեղեկացրել Քիմ Քարդաշյանին:

Սփյուռքի նախարար Հրանուշ Հակոբյանն այսօր հանդիպել է բլոգերների հետ: Անդրադառնալով «Մեկ ազգ, մեկ մշակույթ» հիմնադրամի նախագահ, մշակույթի նախկին նախարար Թամար Պողոսյանի հետ կոնֆլիկտին, Հրանուշ Հակոբյանը չի թաքցրել, որ պատրաստված է ներկայացել: Նա ցույց է տվել մի փաստաթուղթ, որտեղ 2010 թվականին Թամար Պողոսյանը «Մեկ ազգ, մեկ մշակույթ» փառատոնն անցկացնելու համար իրեն գրել է

6 միլիոն 631 հազար դրամ աշխատավարձ:

Ընդ որում, փառատոնի տևողությունը 1 շաբաթ էր, շեշտել է Սփյուռքի նախարարը՝ հավելելով. «Թե ինչու է այդքան բարձր Թամար Պողոսյանի աշխատանքային ինքնագնահատականը, թերևս պետք է պարզեն համապատասխան պետական կառույցները: Նաև պետք է պարզել, թե ուրիշ ինչ աշխատավարձեր են բաշխվել այդ փառատոնի շրջանակում»:

Մենք այսօր փորձեցինք լսել նաև տիկին Պողոսյանի կարծիքը՝ իրեն «շանտաժիստ», «զրպարտիչ» և «օրինախախտ» անվանող նախարարության աշխատակիցների մասին: Նա խոստացավ պարզաբանել, սակայն պահը հարմար չէինք ընտրել. տիկին Թամարը ավտոմեքենայի մեջ էր:

Անցյալ տարի ապրիլի 16-ը միաժամանակ և ՀՀ ոստիկանի օրն էր, և աշխարհի քաղաքակիրթ հանրության կողմից նշվող այսպես կոչված Լռության օրն է` ընդդեմ սեռական խտրականության և բռնության:
Այդ օրը, որը լողացող է, ֆիքսված օր չի, ամեն տարի մի շարք երկրներում Լռության Համազգային Օր է, այդ օրն ամբողջ երկրով մեկ լռության ծոմ են պահում, լռության երթեր անցկացնում, որպեսզի ուշադրություն հրավիրեն ոչ տրադիցիոն սեռական կողմնորոշվածություն ունեցող մարդկանց դպրոցներում ու համալսարաններում ու ընդհանրապես առօրյա կյանքում վիրավորանքների, ծաղրանքի ենթարկելուն ու հետապնդմանն ու բռնությանը:

«Հարգելի լրագրողներ, ձեր հորդորներից և մի քիչ էլ անիմաստ կասկածներից հետո ես հանձնարարել եմ տարբեր ինտերնետային կայքերը ուսումնասիրել: Մեր ուսումնասիրությունները ցույց տվեցին, որ ապրիլի 16-ը որևէ երկրում որևէ հիշյալ տիպի կազմակերպության հետ երբևէ չի առնչվել: Չգիտեմ՝ դա ում հիվանդ ֆանտազիայի արդյունքն է եղել տարիներ առաջ, ով է որոշել, որ ապրիլի 16-ը կարող է այդպիսի խորհուրդ ունենալ: Ապրիլի 16-ին Ոստիկանության մասին ՀՀ օրենքն է ընդունվել:

Դեռ երեք ամիս առաջ ես նպատակադրվել էի, որ ոստիկանության օրը նշենք ապրիլի 19-ին, նույնիսկ զեկուցել էի նախագահին, խնդրել էի թույլտվություն, որ անցկացվի 19-ին: Բայց նախագահը խնդրեց մեկ անգամ էլ ստուգել: Հերթական ուսումնասիրության արդյունքում էլ մենք նման երևույթ չարձանգրեցինք»,- ասել է երեկ Ալիկ Սարգսյանը(1in.am):

Ալիկ Սարգսյանի հանձնարարականը կատարելիս ճիշտ են զեկուցել`իրոք, այս տարի Լռության Օրն ամբողջ աշխարհում նշվում է ապրիլի 15-ին, էնպես որ, մեր ոստիկանները կարող են հանգիստ անցկացնել իրենց պառադը ապրիլի 16-ին, նախօրեին լռությամբ միանալով այլաճնշման դեմ պայքարին:

Մեր լրագրողներն էլ կարող են հանգստանալ ու իրոք թեմային հարիր սրտացավ նյութեր գրել, հո միայն սկանդալներով չի՞ կարելի կերակրել հանրությանը, ամենքս մի բարի, սիրուն բան գրենք էդ օրը մեր հասարակության խոցելի մասը կազմող քաղաքացիների նկատմամբ տոլերանտությունը բարձրացնելու համար: Բոլորս էլ մարդ ենք:

Լուսինե Վայաչյան

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանից ԱԱԾ մեկուսարան` «Երևան-Կենտրոն» ՔԿՀ տեղափոխեցին Հովհաննես Թամամյանի գործին առնչվող մի անձի:
Հատուկ քննչական ծառայությունը այսօր միջնորդել էր դատարանին, Ոստիկանության քննչական գլխավոր վարչության հատկապես կարևորագույն գործերով ավագ քննիչ, ոստիկանության մայոր Վահան Խանզադյանի նկատմամբ որպես խափանման միջոց երկամսյա կալանք կիրառելու: Խանզադյանի նկատմամբ քրեական գործ հարուցվել է ապրիլի 11-ին` 308 հոդվածի 2-րդ մասի (պաշտոնեական լիազորությունները չարաշահելը, որը առաջացրել է ծանր հետևանքներ) հատկանիշներով:

Խանզադյանը որպես կասկածյալ անցնում է ոստիկանության քրեական հետախուզության գլխավոր վարչության նախկին պետ, գեներալ-մայոր Հովհաննես Թամամյանի դեմ հարուցված քրեական մեկ այլ գործով, որի հետ կապում են նաև հայր Թամամյանի ինքնասպանության փաստը:

Այս մասին արդեն գրվել է մամուլում`2009թ. նոյեմբերի 5-ին Գավառ քաղաքում քաղաքապետի ազգականները մի քաղաքացու նկատմամբ սպանության փորձ էր կազմակերպել. Եղբայրներ`Արամ և Արթուր Մարտիրոսյանները, Հրաչյա Պետրոսյանը ձեռք էին բերել ապօրինի հրազեն և սպանությունը տեղի չէր ունեցել, իսկ նախաքննության ընթացքում ոստիկանության բարձրաստիճան պաշտոնատար անձինք կատարել էին չարաշահումներ:

Դռնփակ դատական նիստը վարում էր դատարանի նախագահ Ռուբեն Վարդազարյանը, ով բավարարեց ՀՔԾ-ի միջնորդությունը:

Եթե Հայ ազգային կոնգրեսի նախորդ հանրահավաքները բնութագրվում էին իբրև «վճռական» կամ «բեկումնային», ապա ապրիլի 8-ի հանրահավաքը միանշանանակ կարելի է որակել իբրև «ջերմություն բարձրացնող»:
«Եթե ուզում եք ձեր մարմնի ջերմաստիճանը մեկ-երկու աստիճանով բարձրանա, ապա լսեք, թե ինչ կասի Գագիկ Ջհանգիրյանը»,- հայտարարեց Արամ Մանուկյանը:

Ապրիլի 7-ն է՞ր պատճառը, թե՞ ուղղակի գարունը, բայց արմատական ընդդիմությունը, փաստորեն, որոշել էր մարդկանց ջերմացնել, նրանց արյունը եռացնել երակներում: Բարձրացրե՞ց Ջհանգիրյանը հանրահավաքի եկածների մոտ ինչ-որ բան, թե՞ ոչ, դժվար է ասել, բայց հանրահավաքը վարող ՀՀՇ ղեկավար Արամ Մանուկյանը որոշեց շարունակել ջերմաստիճանի բարձրացման գործընթացը:

«Եթե ուզում եք ձեր մարմնի ջերմաստիճանը էլի բարձրանա, լսեք Արամ Սարգսյանին»:

Արամ Զավենի Սարգսյանի բարձրացրած ջերմաստիճանի չափը չպարզաբանվեց, սակայն դատելով շարքային առաջնորդների բարձրացրած ջերմաստիճանի վերաբերյալ նախնական` «մեկ-երկու աստիճան» գնահատականից, կարելի է մոտավորապես կանխատեսել, թե քա~նի աստիճանով կարող էր բարձրանալ մարդկանց մարմնի ջերմաստիճանը առաջնորդի ելույթից: Մխիթարականն այստեղ թերևս այն է, որ ՀԱԿ առաջնորդը ջերմաստիճանը բարձրացնելու հետ միաժամանակ բավական վարպետորեն տիրապետում է նաև ջերմաստիճանի կարգավորման մեխանիզմներին և կարողանում է ճիշտ ժամանակին մարդկանց բարձրացած ջերմաստիճանը իջեցնել և ժողովրդին ուղարկել տներով` նրանց հասկացնելով, որ ընդդիմադիր շարժման ներկա փուլում մի երկու ժամով, մի երկու աստիճանով մարմնի ջերմաստիճանի բարձրացումն էլ ահագին առաջընթաց է:

ԼՈՒՍԻՆԵ ԿԵՍՈՅԱՆ

ԱՄՆ Պետդեպարտամենտը hրապարակել է ամենամյա «Մարդու իրավունքները ամբողջ աշխարհում» զեկույցը: Զեկույցը ներկայացրել է ԱՄՆ պետքարտուղար Հիլարի Քլինթոնը: Վերջինիս խոսքերով իրենք դրական փոփոխություններ են նկատում աշխարհի շատ երկրներում, սակայն բացասական զարգացումները նույնպես առկա են:

Զեկույցում հատուկ ուշադրության է արաժանացել Ռուսաստանը: Զեկույցի հեղինակների կարծիքով ՌԴ-ում չկան ազատ

և ժողովրդավարական ընտրություններ անցկացնելու պայմաններ և շատ են ոստիկանության կողմից քաղաքացիների նկատմամբ կիրառվող բռնության դեպքերը: Ըստ այդմ Ռուսաստանը դասվեց այն երեք երվրոպական երկրների շարքին, որտեղ իրավիճակը մադու իրավունքների տեսակետից «չափազանց լուրջ է» : Հաջորդ երկու երկրները Ուկրաինան և Բելոռուսիան են:
Վերոնշյալ զեկույցում ներկայացված է մարդու իրավունքների հետ կապված իրավիճակը աշխարհի 194 երկրում: Սա մարդու իրավունքների հետ կապված ամենամեծածավալ ուսումնասիրությունն է,որի վրա աշխատել է ավելի քան 1000 մարդ: