Մի քանի անգամ արդեն խոսվել է Ստեփանակերտի օդանավակայանի բացման և դրա հետաձգման պատճառների մասին: Ներկայիս նշված բացման օրը` մայիսի 8-ը առիթ է տվել նոր մեկնաբանությունների. «Ես միայն կարող եմ ասել, որ օդանավակայան կառուցելը հնարավոր է, սակայն գործնականում «անհնար» է, որ այն գործի առանց Ադրբեջանի թույլտվության,- Ադրբեջանական APA լրատվական գործակալության փոխանցմամբ, ասել է ՎՈՒԱՄ-ի (Վրաստան, Ուկրաինա, Ադրբեջան, Մոլդովա) գլխավոր քարտուղար Վալերի Չեչելաշվիլին,-
ողջ աշխարհը գիտի, որ Լեռնային Ղարաբաղի և հարակից տարածքների օդային տարածությունը պատկանում է Ադրբեջանին: Դրա համար գոյություն ունեն միջազգային նորմեր»:
Հիշեցնենք, որ ՀՀ նախագահ Սերժ Սարգսյանը հայտարարել է, որ բացվելու է օդանավակայանը, որի առաջին ուղևորն է լինելու ինքը, իսկ թուրքական Zaman օրաթերթի վերլուծաբան Ֆիքրեթ Էրթանը իր «Մայիսի 8-ին սպասելիս» խորագրով հոդվածում,  անդրադառնալով Ստեփանակերտի օդանավակայանի բացմանը, գրել էր, թե 2011 թվականի մայիսի 8-ը կարող է պատմական օր դառնալ մեր տարածաշրջանի համար:

Մայիսի 4-ին Ռուսաստանի Կազան քաղաքում տեղի կունենա Աշխարհի չեմպիոնի կոչման հավակնորդների մրցաշարի բացման արարողությունը: Առաջին փուլի հանդիպումները կկայանան մայիսի 5-ին և կընթանան 4 մրցափուլերով:

Ինչպես հայտնի է, Հայաստանի առաջատար գրոյսմայստեր Լևոն Արոնյանը նույնպես կմասնակցի աշխարհի թագի համար մղվող պայքարին և առաջին փուլում նրա մրցակիցը կլինի ռուս` Ալեքսանդր Գրիշչուկը:

Մյուս զույգերում մրցելու են հետույալ շախմատիստները.

Կրամնիկ – Ռաջաբով, Թոփալով – Կամսկի, Գելֆանդ — Մամեդյարով:

Հիշեցնենք, որ հավակնորդների մրցաշարի հաղթողը հնարավորություն կստանա աշխարհի չեմպիոնի կոչման համար պայքարել ներկայիս տիտղոսակիր Վիշվանաթան Անանդի հետ:

Մայիսի 4-ին, Մայր Աթոռ Սուրբ Էջմիածնում, Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունեց ՙՀազարամյակի մարտահրավերներ՚ հիմնադրամի գլխավոր գործադիր տնօրեն Դանիել Յոհաննեսին` ՀՀ-ում ԱՄՆ արտակարգ և լիազոր դեսպան Մարի Յովանովիչի ուղեկցությամբ:

Նորին Սրբությունը գոհունակությամբ անդրադարձավ այն կարևոր ներդրմանը, որ հիմնադրամը կատարում է Հայաստանի տնտեսության զարգացման գործում: Ի դեմս ՀՄԿ գործադիր տնօրենի Վեհափառ Հայրապետը գնահատանք հայտնեց Միացյալ Նահանգների ժողովրդին և բարի արդյունավորում մաղթեց հիմնադրամի աշխատանքներին:

Ամենայն Հայոց Կաթողիկոսը նաև վստահություն հայտնեց, որ Հայաստանը կհաղթահարի իր առջև ծառացած դժվարություններն ու խնդիրները` դրանում մեծապես կարևորելով հոգևոր արժեքների վերականգնումը:

Պրն. Դանիել Յոհաննեսն իր հերթին շնորհակալություն հայտնեց ընդունելության համար և Վեհափառ Հայրապետին ներկայացրեց ՀՄՀ-Հայաստան ծրագրի իրականացման ընթացքի դիտարկման արդյունքները:

Զրույցի ընթացքում, ի պատասխան հյուրի հարցումների, Ամենայն Հայոց Կաթողիկոսը ներկայացրեց Մայր Աթոռ Ս. Էջմիածնի առաքելությունը, անդրադարձավ Հայոց Եկեղեցու առջև ծառացած մարտահրավերներին և դրանց հաղթահարման ուղիներին:

Մայիսի 4-ին ԱԳ նախարար Էդվարդ Նալբանդյանն ընդունեց Երեւան ժամանած Ճապոնիայի արտգործնախարարի առաջին տեղակալ Հիսասի Տոկունագային:

Էդվարդ Նալբանդյանը խորին ցավակցություններ հայտնեց մարտին Ճապոնիայում պատահած բնական արհավիրքների հետեւանքով հազարավոր զոհերի կապակցությամբ:

Փոխնախարար Տոկունագան երախտագիտություն հայտնեց մարտի 11-ին Ճապոնիայում տեղի ունեցած երկրաշարժի կապակցությամբ Հայաստանից ստացված ցավակցությունների եւ հետեւանքների վերացման համար ցուցաբերած օժանդակության համար: Նա հավելեց, որ ավերիչ երկրաշարժի հետեւանքները վերապրած հայ ժողովուրդը ճապոնական ժողովրդի վիշտն ընկալեց ինչպես իր սեփականը եւ այս կապակցությամբ Երուանում տեղի ունենալիք միջոցառումը՝ նվիրված արհավիրքների զոհերի հիշատակին, հայ ժողովրդի բարեկամության հավաստումն է եւ Ճապոնիան շատ բարձր ենք գնահատում այն:

Նախարար Նալբանդյանը, գոհունակությամբ նշեց, որ վերջին տարիներին հայ-ճապոնական  հարաբերությունները դինամիկ զարգացում են ապրում, ընդգծելով, որ Ճապոնիայի հետ փոխգործակցության զարգացումը Հայաստանի համար կարեւոր ուղղություն է:

Հայաստանի արտգործնախարարին հանձնելով Ճապոնիայի ԱԳ նախարար Տակեակի Մացումոտոյի ուղերձը հյուրն ասաց, որ Ճապոնիայի իշխանությունները բարձր են գնահատում Հայաստանի հետ բարեկամական հարաբերությունները եւ ցանկանում են առավել ընդլայնել դրանք: Նա հավելեց, որ իր այցելությունը դիվանագիտական հարաբերությունների հաստատումից ի վեր ճապոնական բարձրաստիճան պաշտոնյայի առաջին այցելությունն է եւ այն վկայում է վերջին շրջանում երկկողմ հարաբերությունների աննախադեպ զարգացման մասին:

Զրուցակիցները հանգամանալից քննարկեցին երկկողմ համագործակցության տարբեր ոլորտներին առնչվող հարցերի լայն շրջանակ:

Երկուստեք նշվեց, որ բարձրաստիճան փոխայցելությունները, ԱԳՆ-երի միջեւ խորհրդատվությունները կարեւոր դեր են խաղում փոխգործակցության ամրապնդման եւ խորացման համար:

Հայաստանի արտաքին քաղաքական գերատեսչության ղեկավարը գոհունակություն հայտնեց, որ շուրջ երկու տարի առաջ Տոկիո կատարած իր այցի ընթացքում ձեռք բերված մի շարք պայմանավորվածություններ իրականացվում են:

Ճապոնիայի փոխարտգործնախարարը շեշտեց, որ անցյալ տարի Ճապոնիայում ՀՀ դեսպանության հիմնումը նոր լիցք է հաղորդել երկու երկրների միջեւ համակողմանի հարաբերությունների ամրապնդմանն ու ընդլայնմանը:

Հանդիպման ընթացքում զրուցակիցները անդրադարձան երկկողմ համագործակցությանը միջազգային կազմակերպություններում, ՄԱԿ-ի բարեփոխման գործընթացին:

Երկուստեք կարեւորվեցին խորհրդարանների միջեւ համագործակցության խթանման, իրավապայմանագրային դաշտի կատարելագործման,  առեւտրա-տնտեսական  բնագավառի փոխգործակցության ակտիվացման նպատակով ձեռնարկվող քայլերը:

Էդվարդ Նալբանդյանը ներկայացրեց Հայաստանի մոտեցումները Հարավային Կովկասի տարածաշրջանային խնդիրների լուծման վերաբերյալ:

Օբամայի վարչակազմը դեմ է Ուսամա բեն Լադենի դիակի լուսանկարները հրապարակելու ԿՀՎ-ի առաջարկին:

ԿՀՎ-ի կարծիքով՝ ահաբեկչի լուսանկարների հրապարակումն անհրաժեշտ է, որպեսզի «Ալ Ղաիդայի» ղեկավարի մահվան իսկության շուրջ հնչող կասկածները փարատվեն, իսկ Սպիտակ տունը հակադարձում է, որ լուսանկարների բովանդակությունը կարող է ցնցել հասարակությանը:

«Այդ լուսանկարները պարզապես սարսափելի են»,- ասել է Սպիտակ տան մամլո քարտուղար Ջեյ Քարնին՝ հավելելով, որ դրանց հրապարակումը նպատակահարմար չէ:

Սակայն, ըստ ԿՀՎ-ի, սպանված Բեն Լադենի նկարների հրապարակումն ամերիկացիների համար ահաբեկչի մահվան վերջնական ապացույց կարող է դառնալ:

Ի դեպ, ԿՀՎ-ի այս որոշումը բուռն քննադատության է արժանացել:

Որոշ քննադատներ, օրինակ, կարծում են, որ այդ լուսանկարները տհաճ են և կարող են ոչ միայն վիրավորել մահմեդականներին, այլև շահարկման առարկա դառնալ ծայրահեղականների համար:

Դրանից զատ, Օբամայի վարչակազմն արդեն հայտարարել է, որ ԴՆԹ-ի հետազոտությամբ ապացուցվել է, որ սպանվածը հենց Ուսամա բեն Լադենն է եղել:

Իսկ ԿՀՎ տնօրեն Լեոն Պանետը  այլ կարծիքի է: «Խնդիրն այն է, որ մենք վերջապես ոչնչացրել ենք Բեն Լադենին և կարող ենք ամբողջ աշխարհին ցույց տալ»,- ասել է Պանետը:

ՀՀ ոստիկանության օպերատիվ հաղորդագրությունների ամփոփագրերի համաձայն, մայիսի 3- 4-ը հանրապետությունում արձանագրված մարմնական վնասվածք հասցնելու 6,  և խարդախության 4 դեպքերն էլ բացահայտվել են:

Արձանագրված գողության 24 դեպքից բացահայտվել է 17-ը, խուլիգանության 3 դեպքից՝ 2-ը:

Անցած մեկ օրվա ընթացքում հանրապետությունում արձանագրվել է ճանապարհատրանսպորտային 4 պատահար, որից 1-ը՝ վրաերթ: 5 մարդ ստացել է տարբեր աստիճանի մարմնական վնասվածքներ:

Նույն ժամանակահատվածում նախկինում կատարված հանցագործություններից բացահայտվել է մարմնական վնասվածք հասցնելու և գողության 3-ական և սպանության փորձի ու խարդախության 1-ական դեպք:

«Այս տարի ունենք 18 500 վճարովի և 2 428 անվճար տեղ, այսինքն` ընդունվելու համար, որոշ ֆակուլտետներում անվճար սովորելու համար անգամ բավարար է դրական ստանալը», Հայաստանի պետական 28 և մասնավոր 48 բուհեր ընդունվելու պայմանները ներկայացրեց Գնահատման և թեստավորման կենտրոնի մշակումների և կազմակերպման բաժնի պետ Կարո Նասիբյանը:

Նասիբյանը տեղեկացրեց, որ ավարտվել է առաջին փուլի դիմորդների տվյալների ամփոփումը. այս տարի առաջին փուլի քննություն հանձնողների թիվը 1209 է` 320-ը Երևանից, 143-ը Շիրակից, 108 Արմավիրից, 104-ը Արարատից, մյուս շրջաններից դիմորդների թիվը չի գերազանցում 100-ը: Դիմորդները պետք է հանձնեն միասնական քննություն: «Այս տարի անհամեմատ քիչ են, քանի որ հանրակրթական հաստատությունները շրջանավարտներ չունեն: Այս տարվա դիմորդներն են նախորդ տարիներին բուհերից դուրս մնացած, անցյալ տարի չընդունված, բանակից զորացրված և այս ու նախորդ տարիներին սփյուռքի շրջանավարտները, հեռակա բաժինների կամ մասնավոր բուհերի ուսանողները, որ ցանկանում են ընդունվել պետական, անվճար համակարգ»,-տեղեկացրեց Նասիբյանը:

Ապրիլի 10-ին դիմումների ընդունումն ավարտվել է: Քննությունների լրացուցիչ փուլը կազմակերպվելու է  հունիսի 24-ից հուլիսի 2-ը: Թույլատրվելու է հայտագրել 2 անվճար և 8 վճարովի տեղ: «Լուրեր կան, թե լինելու են հեշտ քննություններ, եթե 1209 դիմորդ ունենք, դա չի նշանակում, որ բոլորն ընդունվելու են»,- նշեց Նասիբյանը` հավելելով, որ քննությունների ընթացքը հսկվելու է ամենայն խստությամբ:

Նա ասաց նաև, որ միասնական քննություն տվողների թիվն քիչ է. ընդամենը 11 քննական կենտրոններ կան, որտեղ լինելու են Գնահատման և թեստավորման կենտրոնի աշխատակիցներ. «Եթե նախորդ տարիներին կային 41-55 գնահատման կենտրոններ, և մենք դրսից ստիպված էինք լինում հրավիրել մասնագետներ, ապա այս տարի մեր մասնագետները լիովին կարող են հետևել բոլոր քննություններին»:

Նախորդ տարվա սերտիֆիկատ ստացած դիմորդներին ևս թույլատրվում է մասնակցել քննություններին, բայց անբավարարի դեպքում,  չի կարող շարունակել:

Նասիբյանը գտնում է, որ «Եթե բուհերի ռեկտորները ճիշտ քաղաքականություն վարեն, այս տարի գները կիջեցնեն»: Նա  բացառեց բուհերի վարձավճարների բարձրանալու տարբերակը:

Սիրիայի իշխանությունները հայտարարել են, որ պատրաստ են բանակցել ցուցարարների հետ, հաղորդում է The Christian Science Monitor-ը: Ըստ այս գործակալության տվյալների՝ Սիրիայի նախագահ Բաշար Ասադի խորհրդական Բութայնա Շահաբանն այս պահին փորձում է բանակցողներ գտնել ընդդիմության ներկայացուցիչների շրջանակում:

Սակայն ընդդիմադիրները չեն ցանկանում բանակցել Սիրիայի իշխանությունների հետ: Դրանից զատ, ընդդիմությունը չունի ղեկավարներ, որոնք լիազորված են ներկայացնել իրենց պահանջներն ու շահերը:

Հիշեցնենք, որ Սիրիայում զանգվածային անկարգությունները սկսվեցին և շարունակվում են մարտի կեսերից: Սկզբնական շրջանում ընդդիմադիրները պահանջում էին բարեփոխումներ:

ԱՄՆ նախկին նախագահ  Ջորջ Բուշ կրտսերը մերժել է Բարաք Օբամայի առաջարկը` այցելել սեպտեմբերի 11-ի ահաբեկության վայրը:

«Նա բարձր է գնահատել այդ առաջարկը, սակայն որոշել է հեռու մնալ այդ իրադարձություններից»,-  ասել է նախկին նախագահի ներկայացուցիչ Դևիդ Շեզերը:

Մայիսի 5-ին ԱՄՆ նախագահ Բարաք Օբաման կհանդիպի սեպտեմբերի 11-ի ահաբեկության զոհերի ընտանիքների հետ:

Հենց Ջորջ Բուշն էր ահաբեկչական հարձակումներից հետո սկսել Բեն Լադենի ոչնչացման գործընթացը, սակայն իր կառավարման 8 տարիների ընթացքում այդպես էլ չհաջողվեց հայտնաբերել թիվ մեկ ահաբեկչին:

Հիշեցնենք, որ 2001թ. սեպտեմբերի 11-ին ահաբեկիչները մարդատար ինքնաթիռներով հարվածեցին Նյու Յորքի Համաշխարհային առևտրի կենտրոնի երկվորյակ երկնաքերերին և Պենտագոնի շենքին: Ահաբեկության հետևանքով զոհվեց առնվազն 3000 մարդ:

Մայիսի 3-ին  ՝ժամը 21.10-ին  ստացված տեղեկության համաձայն` Արմավիր քաղաքի Շահումյան փողոցի թիվ 3 հասցեում գտնվող էլ. ենթակայանի տարածքում հայտնաբերվել է հոսանքահարված պատանու դիակ:

Դեպքի վայր է մեկնել մարզային փրկարական վարչության փրկարական ջոկատը:

Դեպքի վայրում պարզվել է, որ բարձր լարման էլ. մալուխից (10000 վոլտ) հոսանքահարվել է Արմավիր քաղաքի 41-րդ փողոցի թիվ 47 տան բնակիչ,1995թ.-ին ծնված Վազգեն Թադևոսյանը: