Ուսամա բեն Լադենի սպանությունից հետո «Ալ Ղաիդա» ահաբեկչական կազմակերպությունում կադրային փոփոխություններ են սպասվում: Այս պահին կազմակերպությունը ղեկավարում է եգիպտացի Սաիֆ ալ Ադելը:

Ըստ CNN հեռուստաընկերության, «Ալ Ղաիդա»-յի  լիբիական մասնաճյուղի անդամ Նոմանա Բենոթմանան հայտնել է, որ ալ Ադելի թեկնածությանը դեմ չեն Աֆղանստանի և Պակիստանի սահմանի մոտ գործող ահաբեկիչները:

Քանի դեռ չի կայացել «Ալ Ղաիդա»-յի բոլոր անդամների հավաք-խորհրդակցությունը, ահաբեկիչներին կղեկավարի Սաիֆ ալ Ադելը:

Այսօր` մայիսի 17-ին ժամը 21:10-ի սահմաններում խոշոր ավտովթար է տեղի ունեցել Արցախի փողոցում, կա 9 զոհ:

Արցախի փողոցում` 28 շենքի դիմաց, միմյանց են բախվել «Մերսեդես» եւ «ԳԱԶԵԼ» մակնիշների ավտոմեքենաները: Բախման հետեւանքով, «ԳԱԶԵԼ»-ը պայթել է եւ հրդեհ է բռնկվել: Երկու մեքենաներն էլ այրվել են:

Երթեւեկությունը նշված հատվածում դադարեցվել է: Ամբողջ տարածքը լցված է քաղաքացիներով: Դեպքի վայրում են հրշեջ մեքենաները:

Ոստիկանության Էրեբունիի բաժնի փրկարար ծառայության աշխատակիցները աշխատում են դեպքի վայրում:

Ըստ նախնական տեղեկության մարմնական վնասվածքներ ստացած  3 մարդու շտապօգնության մեքենաներով տեղափոխել են հիվանդանոց: Ընդհանուր առմամբ, հաշվվել է  9 զոհ:

Ավելի ուշ տեղեկացանք, որ զոհերի թիվը կազմում է 4 մարդ:

Մինչ պետության բարձրագույն պաշտոնյաները հավաստիացնում են, թե անպայման մեղավորները պատժվելու են, մինչ դատախազությունում քրեական գործ է հարուցվել ՀՀ Աշխատանքի և սոցիալական ապահովության նախարարության Սոցիալական ապահովության հիմնադրամում Վերահսկիչ պալատի բացահայտած չարաշահումների կապակցությամբ, Վազգեն Խաչիկյանը, պարզվում է, առանց ձեռնաշղթաների  լքել է հանրապետությունը: Խաչիկյանը Գերմանիայում է և վախի հերթական  նոպայի շրջանակներում ընդամենը  ճնշման տատանումներն է կարգավորում:

Ավելին, կայքերից մեկի հարցմանն ի պատասխան` Խաչիկյանի եղբայր Խաչիկյան Հայկազը` Ախթալայի քաղաքապետն ասել է, թե պարզ չէ, թե երբ կվերադառնա եղբայրը: Այսինքն` կարելի է ենթադրել, որ միլիոնների չարաշահման մեջ մեղադրվող պարոնի հետապնդում Հայաստանի Հանրապետության դատախազությունը չի հայտարարել, որ միլիոններ յուրացրած պարոնը կարող է իր քմահաճույքով հայտնվել աշխարհի ցանկացած երկրում: Մեր երկրի համար արդեն ավանդույթ է դարձել խոշոր հանցագործներին թռցնել, իսկ մանրներին փակել բանտերում:  Չի բացառվում, որ դատական գործընթացն էլ կարող է անցնել առանց գլխավոր գործող անձի մասնակցության, քանզի արդեն քանի ամիս է` խոսում են առանձնակի խոշոր չափերի յուրացումից, բայց  Խաչիկյանը շարունակում է մնալ ընդամենը այդ ամենին կողքից նայողի կարգավիճակում: Դե, իսկ դատախազությունն էլ 500 էջանոց գործը մինչև կարդա ու որոշի, թե դա այն Խաչիկյանն է`  արտերկրից նա ճնշման տատանումների հետ մեկտեղ այլ տատանումներ էլ կկարգավորի:

Լուսինե Կեսոյան

Հայաստանի ԱԳՆ — ն անտեսել է ՀՀ կառավարության 24.07.2008թ-ի որոշման պահանջները, որով սահմանվում են ծառայողական ավտոմեքենաների ձեռքբերման չափանիշները։

Այսպիսի փաստ է արձանագրել ՀՀ  ֆինանսների նախարարությունը պետական բյուջեի կատարման նկատմամբ հսկողության 2010 թ. արդյունքների վերաբերյալ հաշվետվության մեջ:

Ֆինանսների պատասխանատուները բացահայտել են, որ անտեսելով կառավարության որոշումը` արտգործնախարարությունը 2009 թ. ձեռք է բերել 2 Volkswagen Jetta confort տեսակի ավտոմեքենա՝ ՀՀ կառավարության որոշմամբ նախատեսած առավելագույն գնից`  4.66 մլն դրամ (մոտ 12,5 հազ. դոլար), բարձր արժեքով:

Որպես հետևանք, արտգործնախարարությանն, ընդամենը, առաջարկվել է, այսուհետ «պետական բյուջեի միջոցները ծախսել խիստ խնայողաբար»:

Հ.Վ.  Շատ հետաքրքիր մոտեցում է, եթե ասենք, ՀՀ որևէ քաղաքացի համարձակվի ոտնձգություն կատարել ինչ-որ մեկի ունեցվածքի նկատմամբ, նրան առանց հապաղելու կձերբակալեն, կկալանավորեն ու պատասխանատվության կենթարկեն: Իսկ եթե դա արվում է պետական գերատեսչության կողմից` փոշիացվում են պետբյուջեի փողերը, և դա իրեն թույլ է տալիս երկրի արտգործնախարարը, այսինքն`  Նալբանդյանը շքեղ ավտոմեքենաներ է գնում, չգիտես` որ արժանիքի համար, նրան ընդամենը «առաջարկվում է» հաջորդ անգամ նման բան չանել. «պետական բյուջեի միջոցները ծախսել խիստ խնայողաբար»:

Ասողներն էլ այնպես են ասում` կարծես խոսքը վերաբերվում է մանկահասակ ինչ որ մեկին, որին ընդամենը խրատ են տալիս: Ու ասելիս էլ` իրենք են ասում. Իսկ կառավարության ղեկավարին ասող չկա,՞ բյուջեի միջոցները իրենց հոր տանի՞ց են բերել:

Արժույթի միջազգային հիմնադրամի ղեկավար Դոմինիկ Ստրոսս-Կանի իրավապաշտպանը կարծում է, որ տուժողը համաձայն է եղել սեռական կապ ունենալ Ստրոսս-Կանի հետ: Հիշեցնենք, որ Արժույթի միջազգային հիմնադրամի ղեկավարին մեղադրում են հյուրանոցի աղախնին բռնաբարելու փորձ կատարելու մեջ:

Իրավապաշտպանի կարծիքով չկա որևէ ապացույց, որ Կանը հարձակվել է այդ կնոջ վրա: Սակայն Նյու Յորքի դատարանը չի համաձայնվել ազատ արձակել Կաննին նույնիսկ մեկ միլիոն դոլար գրավի դիմաց:

Նյու Յորքի Sifitel հյուրանոցի 32 ամյա աղախինը պնդում է, որ 2011թվականի մայիսի14-ին Ստրոսս-Կանը փորձել է բռնաբարել իրեն այն ժամանակ, երբ վերջինս մաքրել է նրա համարը:

Ստրոսս-Կանի համար կարևոր է, որպեսզի իրեն արդարացնեն, քանի որ վերջինս պատրաստվում է մասնակցել 2012 թվականի Ֆրանսիայի նախագահական ընտրություններին:

Հայաստանի աշխատանքի և սոցիալական հարցերի նախարարության աշխատակիցներից մեկը` Սուրեն Պիվազյանը Հոլանդիա կատարած աշխատանքային այցի ընթացքում լքել է խումբը և մնացել Հոլանդիայում:

Նախարարության հաշմանդամների և տարեցների հիմնահարցերի վարչության գլխավոր մասնագետ Պիվազյանը նախարարության պատվիրակության կազմում մեկնել էր Հոլանդիա:

Սոցապ նախարարությունից ասացին, որ իրենց գլխավոր մասնագետը, հայաստանյան խմբի հետ Հոլանդիա էր մեկնել հոլանդական կողմի նախաձեռնությամբ՝ մասնակցելու «Հաշմանդամությունը որպես խոստումնալից աշխատուժ»  ծրագրին: Նախարարությունում մտադիր են միայն վերջերս գլխավոր մասնագետի պաշտոնը ստանձնած Սուրեն Պիվազյանին պատժել և դիմելու են Քաղծառայության խորհրդին՝ համաձայնություն ստանալու նպատակով:

Լուրերի համաձայն, պատվիրակության անդամներից մեկին Պիվազյանը ծրար է փոխանցել ու խնդրել վերադառնալուն պես հանձնել իր վարչության պետ Արթուր Կեսոյանին: Նամակով Պիվազյանը հայտնել է, թե առողջական խնդիրներ ունի և առաջարկել է իրեն աշխատանքից ազատել:

Հայ Ազգային Կոնգրեսի մայիսի 31-ի հանրահավաքում նախատեսված են քաղբանտարկյալներ` «Հայկական ժամանակ» թերթի գլխավոր խմբագիր Նիկոլ Փաշինյանի և ԱԺ նախկին պատգամավոր Սասուն Միքայելյանի ելույթները:

Այդ մասին նշված է ՀԱԿ-ի թռուցիկում: Այսօր այն սկսել են բաժանել Երևանում և մարզերում:

Ըստ ՀԱԿ –ի  Առաջին նախագահ Լևոն Տեր- Պետրոսյանը իշխանությունների հետ արտահերթ ընտրությունների հարցով երկխոսություն սկսելու համար առաջարկել էր մինչև մայիսի 31-ը ազատ արձակել բոլոր քաղաքական բանտարկյալներին:

Պաղեստինի   ինքնավար վարչակազմի ղեկավար Մահմուդ Աբբասը կոչ է արել միջազգային հանրությանը սեպտեմբերին կայանալիք ՄԱԿ-ի գլխավոր ասամբլեայի նստաշրջանին աջակցել Պաղեստինին և ընդունել նրա անդամակցությունը Միավորված Ազգերի Կազմակերպությանը:

Ամերիկյան The New York Times թերթը գրում է, որ Աբբասը նաև  ընդգծել է, որ ԱՄՆ-ն որպես միջնորդ բավականին թույլ է և չի կարող  բավարար ճնշում գործադրել Իսրայելի վրա: Պաղեստինի ղեկավարի խոսքերով իրենք պատրաստ են  հանդես գալ որպես մի երկիր, որի տարածքները օկուպացվել են մեկ այլ պետության կողմից, և ոչ թե որպես պարտված ազգ, որը պատրաստ է  համաձայնվել ցանկացած պայմանների  հետ:

Երևանի թիվ 114 ավագ դպրոցում այսօր մեկնարկել է հանրակրթական ուսումնական հաստատության ղեկավարման իրավունք /հավաստագիր/ ստանալու համար քննությունների հանձնման երկրորդ փուլը, որը մի յուրահատուկ փորձություն է դարձել գործող տնօրենների համար, գումարվելով բարեփոխումների առաջացրած քաոսին։

Այս անգամ քննություններին մասնակցության հայտ են ներկայացրել 1066 հավակնորդ: Հավակնորդները քննությունները կհանձնեն երկու օրում՝ նախ գրավոր, ապա հաջորդ օրը՝ բանավոր:

Մեկնարկի առաջին օրը քննության էին ներկայացել 94 հավակնորդ: Այս մասին տեղեկացնում են ԿԳՆ — ից:

Այսօր ՀՀ կրթության և գիտության նախարար Արմեն Աշոտյանը, իր հերթին, յուրօրինակ մեսիջ է ուղղարկել, հասկացնելով, թե բողոքներ չեն ընդունվում. «Գործընթացը ներդնելիս որոշ շրջանակներ փորձում էին քննադատել և վարկաբեկել նախարարությանը, սակայն հավաստագրերի հանձնման ժամանակ բոլորը միանշանակ փաստել են, որ քննություններն անցել են օբյեկտիվ ու արդար: Այս անգամ ևս կարող եմ տեղեկացնել, որ նախարարությունը երաշխավորում է արդար, օբյեկտիվ քննություններ, գործընթացի օրինականություն»: Նա մի մեսիջ էլ միջնորդներին է հասցեագրել, «որոնք կփորձեն ուսուցիչներին և տնօրեններին այլազան ծառայություններ առաջարկել, հայտնվելու են անհարմար իրավիճակներում», սպառնացել է նախարարը:
Աշոտյանը հավաստիացրել է, որ հանրակրթության ոլորտի բարեփոխումներն անկասելի են և յուրաքանչյուր փոփոխություն, չնայած որ դժվար է ընկալվում, բերում է դրական արդյունքների: Այդ առումով նախարարը թերևս ճիշտ է, բարեփոխումներն այնպիսի խառնաշփոթ են առաջացրել համակարգում, որից սատանան անգամ գլուխ չի հանի, իսկ դրանք ոչ միայն անկասելի, այլև անշրջելի են:

«Այս գործընթացով փորձում ենք հայկական դպրոցում տնօրենի նոր նշաձող ձևավորել, կառավարման որակը դարձնել ընկալելի և ընդունելի այսօրվա պայմաններին, կոտրել այն կարծրատիպերն ու կաղապարները, որ մեր դպրոցում կարող են աշխատել նաև տգետ մարդիկ»,-նշել է նախարարը: Թե ինչ է տալու քննություններում հավաստագիր ձեռ բերած տնօրենները դպրոցին, այնքան էլ պարզ չէ, սակայն ակնհայտ է, որ մեր դպրոցներում կրթության որակը այս ողջ բարեփոխումների արդյունքում ոչ միայն չի լավացել, այլև ընդհակառակը.Իսկ գործող տնօրենին տգետ անվանելուց առաջ, պարոն նախարարը լավ կաներ մի քիչ երկար մտածել. արդյո՞ք   60 հարց անգիր արած մեկի մուտքը դպրոց դրա կայացման երաշխիք է: Իսկ որ ամենակարևորն է, տնօրեններին օրենքներ սովորել պարտադրելուց առաջ, հարկ է ապահովել այնպիսի համակարգ, որտեղ նույն տնօրենները ստիպված չլինեն այդ օրենքները խախտել:

Ատեստավորման գործընթացը շարունակում է վախի մեջ պահել այն  դպրոցների տնօրեններին, ովքեր դեռ չեն անցել այս թրի  տակով:

«Հայկական Վարկածը»  փորձեց լսել մի քանի դպրոցների տնօրենների:

Հարցի վերաբերյալ  Երևանի  Մուշեղ Իշխանի անվան թիվ 5 դպրոցի տնօրեն  Անահիտ Սարգսյանն ասաց. «Մեր ձեռը  ի՞նչ կա:   Հիմա կառավարության որոշումն է, պետք է կատարենք: Ես դեռ չեմ մասնակացել,  բայց արդեն պատրաստվում եմ:  Ուղղակի  գիտեք  ինչն ա վատ, որ տարիքով կանանց  քաշքշուկի մեջ են պահում սթրեսների ենթարկում:  Կարճ ասած` նրանք մի շարք հիվանդություններ են ձեռք բերում:  Միայն մեռնելը կփրկի»: Ավետիք Իսահակյանի անվան  թիվ 16 ավագ դպրոցի տնօրեն  Անահիտ Կիրակոսյանն այն բախտավորներից է, ով հաղթահարել է  այս փորձությունը. «Ես մարտին եմ մասնակցել քննություններին: Կարծում եմ , որ անհրաժեշտ գործառույթ է, մի օղակ , որը պետք է հաղթահարես: Ես շատ գոհ եմ հանձնաժողովից օբյեկտիվ քննության համար: Ընդհանուր նախատեսված 60 հարցից 90 տոկոսը ճիշտ եմ պատասխանել:Մյուս կողմից ինձ օգնեց այն հանգամանքը,  որ ես գործող տնօրեն էի և  ամեն օր շփում ունեի օրենքների հետ: Չնայած մինչ քննությունը մասնակցել էի մի շարք դասընթացների, որոնք նույնպես ինձ օգնեցին»:

Հրաչյա Աճառյանի անվան թիվ 72 դպրոցից մեզ  ասեցին, որ տնօրենը այս քանի օրը  շատ լարված է և մենք չենք կարող զրուցել նրա հետ,  իսկ  երբ իմացան, թե ինչի համար ենք հարցնում Գայանե Մարտիրոսյանին, ասացին, որ  այսօր էլ հենց քննության է գնացել:

Հ.Գ. ԿԳ Նախարարությունից տեղեկացրեցին, որ քննությանը մասնակցած 94 տնօրենից երկուսն այսօր կտրվել են գրավոր քննությունից:

Ռուզան Ավոյան

Տիգրան Կարապետյանի և Րաֆֆի Հովհաննիսյանի քաղաքական նախաձեռնությունները դեռ չէինք հասցրել մարսել, երբ նոր հայտ ներկայացրեց «Նոր Ժամանակներ» կուսակցության նախագահ Արամ Կարապետյանը:

Վերջինս մի հետաքրքիր հատկություն ունի: Նա, իհարկե, ակտիվորեն մասնակցում է օրվա ընդդիմության կազմակերպած հրապարակային միջոցառումներին, ելույթներ է ունենում, 2008-ին նույնիսկ կալանավորվեց: Այդպես էր` թե «Արդարություն» դաշինքի և թե ՀԱԿ պարագայում: Բայց երկու դեպքում էլ Կարապետյանը որոշակի հեռավորություն է պահել այս դաշինքներից` քաղաքական իր ինքնուրույնությունը պահպանելով:

Եվ ահա` իշխանություն — ՀԱԿ հնարավոր երկխոսության ֆոնին, ՆԺԿ ղեկավարը խոսում է ազգային գաղափարական դաշինք ձևավորելու մտադրության մասին` հասկացնելով, որ ազգային դաշտից դուրս են թե իշխանությունը, թե ՀԱԿ-ը:

Նախաձեռնության հեղինակը ներկայացրել է նաև նոր միավորման անդամների հնարավոր կազմը` ՀՅԴ, ՀՌԱԿ, ՍԴՀԿ, «Ժառանգություն», ՆԺԿ:

Անկեղծ ասած, մի փոքր դժվար ենք պատկերացնում Արամ Կարապետյանի և Րաֆֆի Հովհաննիսյանի դաշինքն ազգային հարցերում, երբ առաջինը անվերապահորեն կարևորում է ռուսական գործոնի առկայությունը Հայաստանում, իսկ երկրորդը հարապարակավ ընդդիմացել է ՀՀ-ում ռուսական ռազմաբազաների ժամկետի երկարաձգմանը:

Արամ Կարապետյանի պատկերացրած դաշինքում առանցքային դերակատարություն է վերապահված ավանդական կուսակցություններին:

Նրանցից միայն ՀՅԴ-ն ունի ինքնուրույն ռեսուրսներ և կարող է խորհրդարանում ներկայացված լինելու ամբիցիա ունենալ: Բայց դաշնակցական գործիչները տարբեր առիթներով հասկացրել են, որ իրենք առանձին են մասնակցելու խորհրդարանական և նախագահական ընտրություններին:

Ռամկավարները Սփյուռքում և Հայաստանում չունեն խարիզմատկ գործիչներ և, ըստ էության, պատրաստ են դաշնակցել ցանկացածի հետ` մեկ –երկու մանդատի հարց լուծելու համար: Երեկ նրանց դաշնակիցը Սամվել Բաբայանն էր, հիմա փորձում են սիրաշահել ԲՀԿ-ին, Արամ Կարապետյանի առաջարկն էլ չեն մերժի, եթե մանդատի հեռանկար բացվի:

Պարադոքսալ վիճակ է ՍԴՀԿ-ում: Հայաստանում կա Հնչակյան երեք կուսակցություն:

Էռնեստ Սողոմոնյանի մասին չենք խոսի, որովհետև նրա անունը վաղուց ասոցացվում է միայն ԱԺ ԲՀԿ խմբակցության հետ:

ՍԴՀԿ անունը պատկանում է Լյուդմիլա Սարգսյանի թիմին, որը սակայն կապ չունի համահայկական վարչության հետ և իր քաղաքական հեռանկարն ամբողջովին կապել է Լևոն Տեր-Պետրոսյանի ՀԱԿ-ի հետ:

Հնչակյան անունով հանդես եկող շիրխանյանականների կուսակցությունը ուղղորդվում է հենց համահայկական վարչության կողմից և հենց նրանց, ըստ էության, նկատի ունի Արամ Կարապետյանը: Հնչակյան կուսակցության մամլո դիվանի պատասխանատու Նարեկ Գալստյանն այսօր հաղորդագրություն է տարածել, որով հայտնում է, որ իրենք պարբերաբար ունենում են հանդիպումներ և խորհրդատվություններ ձախ գաղափարախոսություն կրող տարբեր ուժերի, միությունների և անհատների հետ` քննարկելով Հայաստանի ներքին քաղաքական իրավիճակն ու առաջիկա ընտրություններին հնարավոր դաշինքով մասնակցությունը: Գուցե Արամ Կարապետյանն ու Նարեկ Գալստյանը խոսում են նույն գործընթացի մասին, սակայն այդ դեպքում անհականալի՞ է, թե ինչպես ՆԺԿ-ն ու «Ժառանգությունը» դարձան ձախ ուժեր: Անհասկանալի է նաև, թե ինչի՞ շուրջ են բանակցում, եթե Կարապետյանը խոսում է միավորման ազգային, իսկ հնչակները` սոցիալիստական, սոցիալ-դեմոկրատական հատկանիշների մասին:

Մի խոսքով, այս դաշտում էլ կատարյալ շիլաշփոթ է: Ըստ ամենայնի, Արամ Կարապետյանը խոսել է ոչ թե իրական գործընթացի մասին, այլ տվել է իր նոր քաղաքական ակտիվության մեկնարկը, իսկ շիրխանյանական թևն էլ պարզապես հիշեցրել է իր գոյության մասին:

Սուրեն Սուրենյանց