BBC News-ը տեղեկացնում է, որ մի խումբ գիտնականների, արբանյակից արված լուսանկարների միջոցով, հաջողվել է հայտնաբերել նախկինում անհայտ 17 եգիպտական բուրգ, հազարավոր դամբարաններ ու 3 հազար հին բնակավայր։

Տիեզերքից նկարահանման տեխնոլոգիան տեսանելի է դարձնում տեսնել նույնիսկ գետնի տակ գտնվող կառույցները։

Հնագետներն արդեն սկսել են աշխատանքները նշված վայրերում։ Նախնական տվյալներով՝ արդեն հաստատվել է 2 անհայտ բուրգի առկայությունը։

Ի դեպ, ամերիկացի գիտնականները հետազոտում էին 700 կիլոմետր բարձրությունից արված լուսանկարները՝ հողի ընդերքում գտնվող տարատեսակ նյութեր ուսումնասիրելու նպատակով։

Associated Press գործակալությունը տեղեկացնում է, որ Եմենի մայրաքաղաք Սանայում կառավարական զորքերի և ընդդիմադիրների միջև տեղի ունեցած հերթական բախման զոհ է դարձել առնվազն 38 մարդ:

Իսկ ահա պաշտոնական տվյալներով՝  բախումների հետևանքով զոհվել է ընդամենը 14 զինծառայող, իսկ 20-ը՝ անհետ կորել են։

Հիշեցնենք, որ Եմենում նախագահ Ալի Աբդալլահ Սալեհի դեմ հակակառավարական ցույցերը սկսվել են այս տարվա փետրվարի սկզբին։ Որոշ ԶԼՄ-ների տվյալներով՝ այդ ընթացքում զոհվել է 140 մարդ։

Երկուշաբթի օրը Արաբական Ծոցի երկրների համագործակցության խորհուրդը հայտարարեց, որ հետ է կանչում Եմենում իրադրության խաղաղ կարգավորմանն ուղղված իր նախաձեռնությունը, քանի որ նախագահ Սալեհը հրաժարվում է ստորագրել մեկ ամսվա ընթացքում իշխանությունը խաղաղ փոխանցելու համաձայնագիրը։

ՀՀ Տնտեսական մրցակցության պաշտպանության պետական Հանձնաժողովի կողմից սուրճի ապրանքային շուկայում կատարված ուսումնասիրությունների արդյունքում ի հայտ են եկել որոշակի չարաշահումներ: Մասնավորապես, բացահայտվել է, որ լուծվող սուրճի շուկայում գերիշխող դիրք ունեցող «Մոկոնաթ» ընկերության կողմից առկա են օրենքի պահանջների խախտումներ: Այս ընկերության մասնաբաժինը լուծվող սուրճի շուկայում կազմում է 48,1 տոկոս:

Վերոնշյալի հիման վրա մայիսի 25-ի նիստում ՏՄՊՊՀ-ն որոշեց վարույթ հարուցել «Մոկոնաթ» ընկերության նկատմամբ: Վարույթի ընթացքում Հանձնաժողովը տնտեսվարողից կպահանջի բացատրություններ` հայտնաբերված օրենսդրական խախտումների առնչությամբ: Վարույթի արդյունքները սահմանված ժամկետում կներկայացվեն հանրությանը:

«Մոկոնաթե ընկերությունը խոշոր մասաբաժիններ ունի նաև «Սառեցրած ձկներ», «Ներկրվող սառեցված միս» և «Բրինձ» ապրանքային  շուկաներում:

Իտալիայում ձերբակալվել է  նեապոլյան «Կամորրա» մաֆիայի պարագլուխ Ջուզեպպե  Դել Աքվիլան: ANSA գործակալության տեղեկություններով՝ հանցագործին ձերբակալել են իր առանձնատներից մեկում:

Իտալիայի ներքին գործերի նախարարությունը հայտարարել է, որ մաֆիայի ղեկավարը մեղադրվում է գողացված ապրանքների գնման ու իրացման, ինչպես նաև փողերի լվացման համար:

Դրանից բացի, մաֆիայի նախկին անդամներից մեկը, որն այժմ համագործակցում է ոստիկանության հետ, պնդում է, որ Դել Աքվիլան ավելի քան հարյուր մարդկանց սպանության մասնակից է:

Դել Աքվիլան ընդգրկված է իտալական ոստիկանության «ամենացանկալի» հանցագործների ցուցակում:

Ըստ ANSA-ի տեղեկությունների,  ձերբակալված հանցագործը միանգամից երկու կլանների ղեկավար է` «Կամորրա»-ի և «Միլարդո»-ի:

Նախագահ Սերժ Սարգսյանը ստորագրել է Ազգային ժողովի ընդունած «Հաստատագրված վճարների մասին» ՀՀ օրենքում փոփոխություններ և լրացում կատարելու մասին, «Հյուպատոսական ծառայության մասին» ՀՀ օրենքում փոփոխություն և լրացում կատարելու մասին, «Հանրակրթության մասին» ՀՀ օրենքում լրացում կատարելու մասին ՀՀ օրենքները: Հայտնում են նախագահի մամուլի գրասենյակից։

Այսօր չի հնչի Հայաստանի դպրոցներում ավանդաբար լսվող վերջին զանգը: Կապված 12-ամյա կրթական համակարգի անցնելու հետ, մենք այս տարի շրջանավարտ չունենք:

Վերջին զանգը, դպրացականների ամենասիրելի և ամենասպասված տոնն է: Այդ օրը նշում են գրեթե բոլոր երկրներում, օրվա խորհրդի հետ կապված, օրը տոն է դառնում նաև նրանց ծնողների համար, որոնք էլ վերջին շրջանում միջոցառումներ են կազմակերպում իրենց երեխայի կյանքի կարևորագույն փուլը նշելու առիթով:

Այսօր Երեւանի քաղաքապետարանի մամուլի քարտուղար Շուշան Սարդարյանը, մեկնաբանելով մամուլի հրապարակումները, ասաց թե Կենտրոն վարչական շրջանի  ղեկավար Գագիկ Գյանջումյանը պաշտոնանկ չի արվի: Վարչական շրջանի ղեկավարը շարունակում է աշխատել իր բնականոն ռեժիմով:

Լուրն այն մասին, որ պաշտոնյան տեղյակ է իր պաշտոնանկության մասին եւ համաձայնել է դրան միայն մի պայմանով, որ իր որդուն` կոմպոզիտոր Էդգար Գյանջումյանին, նշանակեն Երեւանի  Թումանյան փողոցի վրա գտնվող Քրիստափոր Քուշնարյանի անվան երաժշտական դպրոցի տնօրեն:

Շուշան Սարդարյանը ասել է, որ Էդգար Գյանջումյանը մի քանի ամիս է, ինչ  նշանակված է այդ պաշտոնում:

Երեւանի քաղաքապետարանը հերքել է նաև այն տեղեկությունները, թե Կարեն Կարապետյանը որոշել է հեռացնել Երեւանի վարչական շրջանների ղեկավարներին եւ նրանց փոխարեն նշանակել բացառապես իր մերձավոր շրջապատի մարդկանց:

Մեր ունեցած հավաստի տեղեկություններով թաղապետներն արդեն տեղյակ են իրենց սպասվող պաշտոնանկությունից եւ արդեն զբաղված են առաջիկա ընտրություններին մեծամասնական ընտրակարգով իրենց համայնքներից առաջադրվել որպես պատգամավորի թեկնածուներ:

Amnesty International-ը զեկույց է հրապարակել, որտեղ նշում է, որ Կոտ Դ’Իվուարում հակամարտության երկու կողմերն էլ մարդկության դեմ հանցագործություններ են կատարել:

Զեկույցում նկարագրվում են անցյալ տարվա նոյեմբերին տեղի ունեցած նախագահական ընտրություններից հետո կատարված սպանությունների եւ բռնությունների դեպքերը:

Կազմակերպությունը նաեւ մեղադրում է ՄԱԿ-ի խաղաղապահներին բնակչությանը չպաշտպանելու հարցում:

Իսլանդական Գրիմսվոտն հրաբուխի առաջացած մոխիրի ամպի պատճառով Գերմանիայի իշխանությունները ստիպված են եղել փակել երկրի մի քանի օդակայաններ:

Ինչպես հաղորդում է BBC-ն, հետաձգվել են Բրեմենի եւ Համբուրգի չվերթները: Իշխանությունները չեն բացառում չվերթների սահմանափակումներ նաեւ այլ քաղաքներում, ընդ որում մայրաքաղաք Բերլինում:

Նշենք, որ նախօրեին 500 չվերթ է հետաձգվել Մեծ Բրիտանիայի հյուսիսում:

Մայիսի 24-ին ոստիկանության Մարտունու բաժնում հաղորդում է ստացվել, որ  ժամը 09.45-ի սահմաններում 24-ամյա Միքայել Մ.-ի վարած «ԶԻԼ-130» մակնիշի ավտոմեքենան Սևան-Մարտունի-Գետափ ճանապարհի 81-րդ կմ-ին շրջվել է, ինչի հետևանքով ուղևորուհին` 34-ամյա  Մարինե Գրիգորյանը, տեղում մահացել է, իսկ մյուս ուղևորները` 46-ամյա  Գոհար Կ.-ն, 16-ամյա Կարեն Կ.-ն, 48-ամյա Ջիվան Մ.-ն և 36-ամյա Արփինե Ա.-ն  մարմնական վնասվածքներով տեղափոխվել են հիվանդանոց: