Տասնմեկ տարի առաջ Կալիֆորնիայի օրենսդիր մարմինը երկարաձգեց Հայոց ցեղասպանության զոհերի ժառանգներին նպաստները չվճարած ապահովագրական ընկերությունների դեմ հայց ներկայացնելու վերջնաժամկետը մինչև 2010 թվականի վերջը։

Մինչև 2000 թվականը, այդ ժառանգները չէին կարող դատի տալ ապահովագրական ընկերություններին, քանի որ հայց ներկայացնելու վերջնաժամկետը վաղուց անցել էր։ Քալիֆորնիայի օրենսդրության համաձայն նման հայց ներկայացնելու ժամկետը սահմանվում է 4 տարի։

Նախորդ տասնամյակում, երբ հայցային վաղեմության ժամկետը երկարաձգվեց, ամերիկահայերին հաջողվեց ԱՄՆ դաշնային դատարաններում «Նյու Յորք Լայֆ» և ֆրանսիական «ԱՔՍԱ» ապահովագրական ընկերությունների դեմ հայց ներկայացնել։

Գերմանական ապահովագրական ընկերությունների և բանկերի դեմ սկսված լրացուցիչ դատական գործընթացները դեռևս ընթացքում են։ Վարույթի կողմ չհանդիսացող թուրքական կառավարության աջակցությամբ այդ գերմանական ընկերությունները օրենսդրի որոշումը դատարանում վիճարկելու անհաջող փորձ կատարեցին՝ պնդելով, որ Կալիֆորնիայի օրինագծում Հայոց ցեղասպանության վկայակոչումը ոտնձգություն է դաշնային կառավարության արտաքին քաղաքականության նկատմամբ։

2010 թվականի դեկտեմբերի 31-ի վերջնաժամկետը լրանալուց հետո, ամերիկահայ համայնքը դիմեց Կալիֆորնիայի օրենսդիր մարմնին` հայցային վաղեմության ժամկետը ևս մեկ անգամ երկարաձգելու խնդրանքով, քանի որ պարզվել է, որ այլ  ապահովագրական ընկերություններ ևս չեն վճարել «Ցեղասպանության ժամանակաշրջանի» հաճախորդներին հասանելիք գումարները։

Թուրքիայի կառավարության և ապահովագրական ընկերությունների կողմից հետագա դատական վիճարկումներից խուսափելու նպատակով, ոմանք պնդեցին, որ միգուցե անհրաժեշտ չլինի Կալիֆորնիայի նոր օրինագծում վկայակոչել Հայոց ցեղասպանությունը, քանի որ ընկերությունները պայմանագրային պարտավորություն ունեն վճարել շահառուներին՝ անկախ մահվան պատճառից։ Այնուամենայնիվ, օրենսդիրը որոշեց տեղի չտալ թուրքական ճնշումներին և պահպանել Հայոց ցեղասպանության վկայակոչումը, հատկապես որ Ցեղասպանության զոհերի կողմից հայց հարուցելու ժամկետի երկարաձգման հիմնավորումն այն էր, որ վերջիններս ժամանակին հայց ներկայացնելու համար բնականաբար չեն ունեցել անհրաժեշտ փաստաթղթերը՝ մահվան վկայականները և ապահովագրերը։

Ուշագրավ է, որ Կալիֆորնիայի նահանգը   ապահովագրության մասին օրինագծում Հայոց ցեղասպանությունը սահմանում է հետևյալ կերպ. «Օրենսդիրը ճանաչում է, որ 1915-1923 թվականների ընթացքում հայերի նախնիներից շատերը, ովքեր բնակվում էին այդ ժամանակ Օսմանյան Կայսրությունում գտնվող պատմական Հայաստանի տարածքում, ենթարկվել են ջարդի, խոշտանգումների, սովամահության, մահվան երթերի և աքսորի։ Այս ժամանակաշրջանը հայտնի է որպես Հայոց ցեղասպանություն»։

2011 թվականի ապրիլի 14-ին Կալիֆորնիայի նահանգի Օրենսդիր ժողովն ընդունեց նոր օրինագիծ  (AB173), որով երկարաձգվում էր Հայոց ցեղասպանության զոհերի ժառանգների կողմից ապահովագրական ընկերությունների դեմ հայց ներկայացնելու վերջնաժամկետը մինչև 2016 թվականի դեկտեմբերի 31-ը։ Չնայած ինքնակոչ «Կալիֆորնիայի՝ Խաղաղության և արդարադատության թուրքական հանձնաժողովի» առարկություններին, օրինագիծը հաստատվեց 10-0 ձայներով Կալիֆորնիայի Օրենսդիր ժողովի իրավաբանական կոմիտեի կողմից և 61-0 ձայներով Նահանգի լիակազմ Օրենսդիր ժողովի կողմից։ AB 173-ը, որը պաշտոնապես սատարվում է Կալիֆորնիայի սպառողների փաստաբանների և Նահանգի Ամերիկյան Դաշնության, Շրջանային և քաղաքային աշխատողների կողմից, ներկայացվել էր  Օրենսդիր մարմնի անդամ Մայք Գատտոյի կողմից 2011 թվականի հունվարի 20–ին։ Օրենսդիր մարմնի անդամ Կաչո Աչաջյանը դրա գլխավոր համահեղինակն էր։

Օրենսդիր ժողովի իրավական խորհրդատուն տվեց օրինագծի հետևյալ ամփոփ

նկարագրությունը՝ «Գործող օրենքը թույլ է տալիս Հայոց ցեղասպանության ցանկացած զոհին, ինչպես սահմանվել է, կամ նրա ժառանգին կամ շահառուին, ով բնակվում է այս նահանգում և ունի պահանջ, որը բխում է 1875-1923 թվականների ընթացքում Եվրոպայում կամ Ասիայում սահմանված ապահովագրողի կողմից ձեռք բերված կամ գործող ապահովագրից կամ ապահովագրերից, դիմել այս նահանգի դատարան` իրենց պահանջը վերականգնելու համար։ Գործող օրենքը նաև նախատեսում է, որ ցանկացած դատական հայց, ներառյալ այն հայցերը, որոնք ներկայացվել են Հայոց ցեղասպանության զոհի կամ նրա ժառանգի կամ շահառուի կողմից և դեռևս քննվում են, անկախ նրանից հանդիսանում է այս նահանգի ռեզիդենտ թե ոչ, ով ցանկանում է ստանալ 1875-1923 թվականների ընթացքում տրված կամ գործող ապահովագրերով նախատեսված նպաստները, չպետք է մնան չվաբարարված հայցային վաղեմության ժամկետը չպահպանելու պատճառով՝ պայմանով, որ հայցը հարուցվել է մինչև 2010 թվականի դեկտեմբերի 31-ը։ Օրինագծով հայց հարուցելու վերջնաժամկետը երկարաձգվում է մինչև 2016 թվականի դեկտեմբերի 31-ը։ Այս օրինագծով հայտարարվում է, որ այն պետք է անմիջապես ուժի մեջ մտնի որպես հրատապ իրավական ակտ»։

Նահանգի Օրենսդիր ժողովի կողմից ապրիլին հաստատվելուց հետո, օրինագիծը ներկայացվեց Կալիֆորնիայի Սենատի իրավաբանական կոմիտեին 2011 թվական մայիսի 12-ին։ Դրանից հետո, այն կուղարկվի լիակազմ Սենատին և կներկայացվի նահանգապետ Բրաունի ստորագրությանը։ Այս օրինագծով փոփոխություններ կկատարվեն Կալիֆորնիայի Քաղաքացիական դատավարության օրենսգրքի 354.4 բաժնում, որը ստորագրվել և ուժի մեջ էր մտել 2000 թվականի սեպտեմբերի 18-ին։ Նոր օրինագծով կերկարաձգվի ապահովագրական ընկերությունների դեմ Հայոց ցեղասպանության զոհերի ժառանգների կողմից հայց ներկայացնելու վերջնաժամկետը 2010 թվականից մինչև 2016 թվականի վերջը՝ Հայոց ցեղասպանության 100-րդ տարելիցից մեկ տարի անց, հնարավորություն տալով ավելի շատ թվով հայցեր ներկայացնել իրավախախտ ապահովագրական ընկերությունների դեմ։

Տրիպոլիի հարյուրավոր բնակիչներ այսօր մասնակցել են  հակակառավարական երթի, որն սկսվել է երկու մարդու թաղումից հետո. նրանց սպանել են անվտանգության ուժերը՝ Սուկ ալ Ջումա թաղամասում:

Ցուցարարները շարունակ բղավել են «Մուամարն ազգի թշնամի է»: «Ալ Ջազիրա» հեռուստաընկերությունը տեղեկացրել է, որ իրավապահ մարմինները կրակ են բացել ցուցարարների ուղղությամբ, ինչից հետո բողոքի ցույցն ավարտվել է: Նոր զոհերի մասին դեռևս տեղեկություններ չկան:

Իտալիայում տեղական  ինքնակառավարման մարմինների ընտրությունների արդյունքում Միլանի քաղաքապետ է դարձել Աբդուլլահ Օջալանի նախկին փաստաբաններից մեկը՝ Ջուլիանա Պիսապիան։

Թուրքական Hurriyet թերթը տեղեկացնում է, որ Իտալիայի վարչապետ Սիլվիո Բեռլուսկոնիի սեռական սկանդալների հետևանքով՝ նրա գլխավորած կուսակցության վարկանիշն այնքան է նվազել, որ տեղական ինքնակառավարման մարմինների ընտրություններում պարտություն են կրել նույնիսկ այն քաղաքներում, որտեղ ավանդաբար ուժեղ էին համարվում։

Բեռլուսկոնին հատկապես զարմացել է, որ իր կուսակցությունը պարտություն է կրել Իտալիայի՝ մեծությամբ 3-րդ քաղաք Նապոլիում, որտեղ կրկին հաղթել են ձախերը։

Ըստ El Pais թերթի՝ «Գալա-Սալվադոր Դալի» հիմնադրամը ռեկորդային չափերի հասնող գումար է վճարել իսպանացի սյուրռեալիստի նկարի համար: Հիմնադրամը գնել է «Տեսարան առեղծվածային տարրերով» նկարը 7.8 մլն եվրոյով (11.14 մլն դոլար):

Այս նկարը ստեղծվել է 1934-ին և ունի 72.8×59.5 սմ չափեր: Նկարը գնվել է անհատից, որը ցանկացել է անհայտ մնալ: Նկարում նիդերլանդացի նկարիչ Յան Վերմեյերի փոքրիկ պատկերն է. հենց նա էլ նկարում է «առեղծվածային տեսարանը»: Դալին հետին պլանում պատկերել է իրեն՝ մանուկ հասակում:

Սա հիմնադրամի երկրորդ խոշոր ձեռքբերումն է, առաջինը մարտ ամսին գնած «Մեղրը քաղցր է արյունից» աշխատանքն էր, որը հիմնադրամը գնեց 4.7 մլն եվրոյով, և այժմ ցուցադրվում է Սալվադոր Դալիի Ֆիգերասում գտնվող թանգարանում: «Տեսարան առեղծվածային տարրերով» նկարը նույնպես կհանգրվանի այստեղ:

20-րդ դարի այլ մեծ նկարիչների համեմատ, Սալվադոր Դալիի աշխատանքները աճուրդների ժամանակ վաճառվում էին շատ ցածր գներով: Երկար տարիներ նրա աշխատանքների վաճառքից ստացված գումարը չի գերազանցել 10 մլն դոլարը: Սառույցը կոտրվեց 2011-ի փետրվարին, երբ Sotheby’s-ի աճուրդում Պոլ Էլյուարի դիմանկարը վաճառվեց 21.6 մլն դոլարով:

«RGM» գրուպը, որը սնանկ է ճանաչվել և լուծարվել մոտ մեկ տարի առաջ, դեռևս չի վճարել իր աշխատողների` տարբեր տարիների կուտակված աշխատավարձերի պարտքերը: Իրենց աշխատավարձերի վճարման պահանջով աշխատակիցները դիմել են դատական տարբեր ատյանների:

Գործն արդեն երկրորդ տարին է, ինչ «քնած» է ՀՀ վճռաբեկ դատարանում: Բողոքավորներն արդեն դիմել են ՀՀ սահմանադրական դատարան: Եթե այստեղ էլ իրենց պահանջը չբավարարվի, նրանք նախապատրաստվում են բողոքի ակցիա կազմակերպել նախագահի նստավայրի առջև: Այս ընկերությունը «Դվին» կոնցեռնի նախագահ Ռաֆիկ Սարգսյանի սեփականություններից մեկն է, իսկ Սարգսյանին, ըստ աշխատակիցների, խորթ չէ այս աշխատաոճը. մարդկանց աշխատեցնելուց հետո ընկերությունը սնանկ ճանաչել տալ, լուծարել և խուսափել կուտակված աշխատավարձերը վճարելուց:

Անի Սահակյան

Այսօր Երևանի Խ. Դաշտենցի անվան թիվ 114 միջնակարգ դպրոցում անցկացվում էր տնօրենների հավաստագրման հերթական քննությունը: Այս անգամ ներկա էր նաև  Կրթության և գիտության նախարար Արմեն Աշոտյանը: Նա հավանաբար եկել էր, որ հետևի շպարգալկայից օգտվող տնօրեններին:

Նա այս անգամ էլ կրկնեց նույնը ինչ ասել է այդ առիթով.« Այսօր ամեն ինչ փոխվել է և քննությունները մեզ համար սովորական են դարձել»,- նշեց նախարարը՝ ավելացնելով, որ ինքն այսօր վստահաբար կարող է նշել, որ չկա որևէ կողմնակալ վերաբերմունք, և նա երաշխավորում է քննությունների օբյեկտիվությունը:

Ա. Աշոտյանը խոսակցությունների դիմացն առնելու համար, թե հնարամիտ տնօրեններն աշակերտներից ոչ պակաս քննությունների ժամանակ օգտվել են ծածկագրերից, ասաց .«Այո նրանց մոտ հայտնաբերվել են ծածկագրեր:
Այդ իսկ պատճառով այսուհետ քննություններին կհետևեն նաև հասարակական կազմակերպությունների ներկայացուցիչներ, պատգամավորներ և այլ դիտորդներ»,- ասաց ՀՀ ԿԳ նախարարը:
Նա նաև կարծիք հայտնեց, որ տնօրենի լավ անունից է կախված դպրոցի համբավը: «Իսկ լավ անուն ասելով՝ ես հասկանում եմ գիտելիքներով, կարողություններով և հմտություններով հարուստ մարդ»,- նկատեց նախարարը:

Հիշեցնենք որ, «Հայկական վարկածը»  մասնակցել է նախորդ քննություններին: Ընդհանուր առմամբ, քննությունների երկրորդ փուլին նախատեսվում է 1066 վերապատրաստված մասնակիցներ մասնակցությունը: Առաջին փուլում վերապատրաստվել է 450 տնօրեն, քննությանը մասնակցել 360-ը, իսկ արդյունքում հավաստագիր ստացել է 267-ը: Քննության հանձնելու համար տրվում է 90 րոպե: Հարցաշարը բաղկացած է 60 հարցից,  անցողիկ շեմը համարվում է պատասխանների 90 տոկոսի ճշգրտությունը:

Քննությանը մասնակցեցին 93 գործող և հավակնող տնօրեններ՝ 95-ի փոխարեն:

Մայիսի 29-ին Իջևանում կայացան համայնքի ավագանու արտահերթ ընտրություններ: Ի դեպ, ընտրություններն անցան առանց միջադեպերի, ինչը զարմանալի է իջևանյան վերջին 10 տարվա ընտրարշավների ընթացքի պարագայում: Սակայն Իջևանն Իջևան չէր լինի, եթե այս անգամ էլ քաղաքական ինտրիգներ չլինեին, եթե նույնիսկ ընդամենը ավագանու ընտրություններ են: Կրկին ընտրարշավը վերածվեց քաղաքում առկա երկու կլանների`Ներսիսյանների և Ղալումյանների միջև մրցապայքարի:

Այս «հակամարտության» հիմքը դրվել է դեռևս նախկին վարչապետ Անդրանիկ Մարգարյանի օրոք. նրա իջևանյան այցերից մեկի ժամանակ վիրավորական արտահայտությանն ի պատասխան՝ քաղաքապետ Վարուժան Ներսիսյանը ապտակել էր այն ժամանակվա ԱԺ պատգամավոր Արծրուն Ղալումյանին: Դրանից հետո Ղալումյանն ամեն ինչ անում է Ներսիսյանին «գահընկեց» անելու համար: Նրա վերջին նախաձեռնությունն իր բարեկամ-հարազատ ավագանու անդամների միջոցով քաղաքապետին անվստահություն հայտնելու փորձն էր, որը նույնպես ձախողվեց: Այս ընտրապայքարում ևս Ղալումյանը ջանք չէր խնայում, որ ավագանու անդամ ընտրվեն նրանք, ովքեր նորից կպայքարեն քաղաքապետի դեմ: Եվ, որքան էլ զարմանալի է, լինելով ՀՀԿ-ի Իջևանի տարածքային կառույցի ղեկավար, նա սատարում էր ոչ թե ՀՀԿ-ական թեկնածուներին, այլ ՀՅԴ-ական Վարդան Կուրդինյանին, ԲՀԿ-ական՝ իր հորեղբոր որդի Վարդան Ղալումյանին, իր մյուս բարեկամ, ՀԱԿ ակտիվիստ և իր սեփականությունը հանդիսացող Ճանշինի փոխտնօրեն Վահե Ղալումյանին, որն, ի դեպ, գրանցվել է որպես անկուսակցական, և այլ թեկնածուների:

Իսկ նորաթուխ ՀՀԿ-ական քաղաքապետ Վարուժան Ներսիսյանը պայքարում էր, որ ավագանու անդամներ դառնան հենց ՀՀԿ-ականները: Փաստորեն ստացվում է, որ նույն կուսակցության ներսում՝ մի փոքրիկ քաղաքում, անձնական շահերից ու վրեժխնդրությունից դրդված, քաղաքի կուսակցական վերնախավում ելել են իրար դեմ:

Ղալումյաններ-Ներսիսյաններ կլանների այս մրցապայքարն էլ ավարտվեց Ղալումյանների պարտությամբ, քանի որ նրանց չհաջողվեց ավագանու անդամների գերակշռող մեծամասնություն ստանալ: Իսկ թե առաջիկա խորհրդարանական ընտրություններում ինչպես են աշխատելու նույն կուսակցության իրար դեմ ելած անդամները` դժվար է ասել:  Ի դեպ, ըստ Իջևանում շրջող լուրերի, ընտրություններում ակտիվորեն, բայց ոչ բացահայտ, ընդդեմ Ներսիսյանների աշխատում էր նաև Տավուշի մարզի դատախազ Աննա Մանթաշյանը:

ՆԱԻՐԱ ՎԱՆՅԱՆ

ԱՄՆ ազգային առողջապահության ինստիտուտի գիտնականները պարզել են, որ բջջային հեռախոսներն արագացնում են ուղեղի աշխատանքը:

Ամերիկացի հետազոտողները բացահայտել են, որ հեռախոսից արտածվող  էլեկտրամագնիսական ճառագայթումն ազդում է մարդկանց ուղեղի գործունեության վրա, սակայն դեռևս  հայտնի չէ՝ այդ երևույթի ազդեցությունը դրական է, թե բացասական:

Ամերիկյան գիտնականների փորձին մասնակցած 47 մարդ 50 րոպե ականջի մոտ պահել է բջջային հեռախոսը, և նրանց ուղեղների հետազոտությունները ցույց են տվել, որ այդ ընթացքում ուղեղի նեյրոններն ակտիվացել են գրեթե 7 տոկոսով: Գիտնականները դա պայմանավորում են ոչ թե բջջայինի տաքացմամբ, այլ՝ դրանց ալեհավաքների գործունեությամբ:

Իրանն արգելել է, որ իր օդային տարածքով անցնի Հնդկաստան ուղևորվող Անգելա Մերկելի կառավարական A 340 ինքնաթիռը, տեղեկացնում է Financial Times Deutschland կայքը:

Ինքնաթիռն Իրանի օդային տարածք է մտել Բեռլինի ժամանակով 01.40-ին, սակայն որոշ ժամանակ անց Իրանի օդային երթևեկության կառավարման ծառայությունը կոչ է արել անմիջապես դադարեցնել թռիչքը:

Ինքնաթիռն սկզբում 4 պտույտ է կատարել Իրանի տարածքով՝ սպասելով թույլտվության, և մերժվելուց հետո ստիպված պտույտներ է կատարել Վանա լճի վերևում: Մերկելի հետ միասին Նյու Դելի էին թռչում նաև ներքին գործերի նախարար  Հանս Պետեր Ֆրիդրիխը, պաշտպանության նախարար Թոմաս դե Մեզյերը, տրանսպորտի նախարար Պետեր Ռամզաուերը և կրթության նախարար Անետտա Շավանը: Բացի պաշտոնյաներից, ինքնաթիռում են եղել նաև մի քանի գործարարներ:

Երևանի կենդանաբանական այգու տնօրեն Ռուբեն Խաչատրյանի տեղեկացմամբ, 200 դրամով թանկացել են մեծահասակների տոմսերը: Տոմսերի արժեքը փոխվել է այգու ադմինիստրացիայի նախաձեռնությամբ: Ըստ տնօրենի՝ փոփոխությունն իրականացվել է այգու բարեփոխմանն ուղղված ֆինանսական հոսքերի ապահովման նպատակով:

Հիշեցնենք, որ նախկինում թե՛ մեծահասակների, թե՛ փոքրահասակների համար տոմսի արժեքը նույնն էր՝ 300 դրամ