Վարչապետի տիկին Աննա Հակոբյանը ֆեյսբուքյան իր էջում տեսանյութ է տեղադրել, որում ասում է, որ իրենց ջոկատով այս պահին շարունակում են պահել դիրքը, որը վստահված է եղել իրենց։

Մարտական դիրքերից մեկից արված տեսանյութում Աննա Հակոբյանն ասում է, թե իրենց հայտնել են, որ այս օրերին Երևանում փնտրում են իրեն:

«Վստահված էր հսկվել այն ձորը, որտեղից հնարավոր էր թշնամու դիվերսանտների սողոսկում մեր տարածք: Մեզ վստահված էր դա հսկել և չեզոքացնել անհրաժեշտության դեպքում: Գիտեմ՝ մեծ քննարկում է եղել, թե ինչու եմ զինվորագրվել հայրենիքի պաշտպանությանը, թե դա կնոջ տեղ չի, կամ վարչապետի տիկինը այլ գործեր ուներ անել: Հիմա այն պահն է, որ պատասխանները պետք է փնտրենք՝ ինչ անհարժեշտությունից այդ քայլին գնացինք»,- ասել է նա։

Վարչապետի տիկինը նաև նշել է, որ սահմանված ժամկետներում մյուս կամավորների պես կվերադառնան, իսկ վերադառնալուց  հետո ջոկատը համալրելու է և ավելի պրոֆեսիոնալ պատրաստվածություն են ձեռք բերելու:

Մանրամասները՝ տեսանյութում։

https://www.facebook.com/wifeofarmenianPM/videos/417422162755592/

Արցախի «Արդարություն» կուսակցության նախագահ Վիտալի Բալասանյանը ֆեյսբուքյան իր էջում գրառում է կատարել՝ դիմելով զանգեզուրցիներին։ Նա մասանվորապես նշել է՝ Հայաստանի ներկայիս իշխանությունների դավաճանական քաղաքական դիրքորոշումները և կատարած գործողությունները սկիզբ են դնում Արցախի հայաթափմանը, նրա լինել չլինելու հարցը և վտանգում Լեռնահայաստանը ամբողջությամբ: Գրառումը ստորև․

«Սիրելի´ զանգեզուրցիներ

Դարերի պատմությամբ է ապացուցված ձեր պայքարող լինելը, օրհասական պահերին դուք միշտ ունեցել եք կամք և համառություն հայրենիքը փրկելու հարցում:

Այսօր Հայաստանի ներկայիս իշխանությունների դավաճանական քաղաքական դիրքորոշումները և կատարած գործողությունները սկիզբ են դնում Արցախի հայաթափմանը, նրա լինել չլինելու հարցը և վտանգում Լեռնահայաստանը ամբողջությամբ: Սա է թուրքի երազանքը.

Կապիտուլիացիայի ակտով` բացվում են Մեղրիի դարպասները, որը Հայաստանի հարավային դարպասն է:

Մեր պապերի, մեծն Նժդեհի թոռներ և ծոռներ րոպե առաջ ոտքի կանգնե´ք:

Կոչ եմ անում անհապաղ միանալ մեր այն հայրենակիցներին, ովքեր պայքարում են այս խայտառակ կապիտուլյացիայի հայտարարությունը ստորագրող Նիկոլ Փաշինյանի դեմ։

Կորցնելով Արցախը, կորցնելով Սյունիքը` կորցնում ենք Հայաստանը:

Թու´յլ չտաք` թուրքը մտնի Սյունիք:

Ձեր գեներալ Վիտալի Բալասանյան»։

Անչափ ցավալի է, որ այս պահին օտարն ավելի լավ է պատկերացնում մեր հիվանդությունն ու դրա բուժման հնարավորությունները, քան մենք՝ հայերից շատ-շատերը: Այդ մասին ֆեյսբուքյան գրառում է արել Արցախի ՊԲ նախկին խոսնակ Սենոր Հասրաթյանը:

«Դա հասկանալու համար մեզ անհրաժեշտ է ունենալ, ինչպես արցախցին կասեր, «քթի ծակ». այլ ոչ թե թույլ տրված սխալների վրա անիմաստ ծանրանալու ժամանակավրեպ ջղաձգումներ…

Հարկավոր է ինքնակազմակերպվել և շարունակել կատարել այն, ինչը կարող է ստիպել հակառակորդիդ հաշվի նստել քո հետ: Համոզված եղեք, միայն այդ դեպքում կարող են մեզ հասկանալ ինչպես մեր բարեկամները, այնպես էլ թշնամիները»,- գրել է նա:

Պետք չի փնտրել դավաճանների ու հող ծախողների. Ես հիմա կասեմ՝ դավաճաններն ու հող ծախողներն  ովքեր են: Այս մասին, այսօր՝ նոյեմբերի 11-ին, իր տեսաուղերձում նշեց Արցախի նախագահ Արայիկ Հարությունյանը:

«Առաջին անգամ ես ահազանգել են հոկտեմբերի 3-ին, երբ հակառակորդը գրավել էր Մատաղիսն ու Թալիշը և վտանգված էր մեր ամբողջ հյուսիսային հատվածը, երբ «Եղնիկներից» մեր զորքի մի մասը խուճապահար փախչում էր, չունեինք մարդկային ռեսուրսներ, որպեսզի կարողանանք գոնե եղնիկներում գտնվող տղաների թիկունքը պահելու: Այդ օրն առավոտյան ես կոչ եմ արել և ասել, որ ես գնում եմ առաջնագիծ: Այդ օրը ինձ արդեն պարզ էր, որ զորքի մի մասը խուճապահար վիճակում է, ոչ թե պաշտպանության բանակի, ոչ թե զինված ուժերի, այլ առաջնագծում եղած զորքի, տարբեր կամավորականների և այլն:

Ուզում եմ մի դեպք պատմել. Այդ օրը երբ հատուկ ստորաբաժանումների հետ պետք է գնայինք, ՀՀ ԱԱԾ-ից եկած մեր ամենաուժեղ էլիտար ստորաբաժանումները և նաև Արցախից, հրաժարվել են գնալ եղն իկներ: Խնդրել եմ, աղաչել եմ, ասել եմ՝ ձեր առաջց ես եմ գնալու, ստացել եմ բացասական պատասխան, չեն եկել, թողել են երկրի նախագահին մենակ առաջնագիծ գնալու ժամանակ:

Հիմա դրա մասին րտահայտվում եմ, որովհետև ստիպված եմ արտահայտվել: Կհարցնդեք Հայաստանի ԱԱԾ ամենաէլիտար ստորաբաժանման անդամներին՝ ինչպես են մերժել խնդրանքս: Աղաչել, պաղատել եմ, գնում ենք առաջնագիծ, որովհետև զորքի մի մեծ մասը գտնվում է ամենաառաջնային մասում, իսկ թիկունքը բաց էր: Կհարցնեք, թե ինչ պատասխան են տվել երկրի նախագահին: Իհարկե, շատ քիչ զորք միացավ ինձ և մենք կարողացանք կատարել մեր խնդիրը և դրա շնորհիվ հիմա եղնիկները ամբողջությամբ գտնվում են մեր վերահսկողության տակ: Հոկտեմբերի 3-ին կոչ եմ արել, ասել եմ՝ մարդկային ռեսուրս է պետք: Ամեն մի կոչի ժամանակ զգուշացնում էի, որ ունենք մարդկային ռեսուրսների կարիք:

Ի դեպ, մի քանի օր առաջ ռուսական մի խոշոր ռազմական վերլուծաբան ասել էր՝ ուզո՞ւմ եք ղարաբաղյան պատերազմում հաղթել, պետք է մոբիլիզացնեք մինչև 80-100 հազար մարդ: Եթե ոչ, պարտվելու եք: Չեմ ուզում ասել, թե քանի մարդ է միացել, կամավորական կլինի, թե պահեստազոր, զորքին թողել եք մենակ, 18 տարեկաններին թողել եք մենակ»,-ասաց նա:

Արայիկ Հարությունյանի խոսքով, այո, շատ կամավորական ջոկատներ կային. «Մի մասը բարեխղճորեն մինչև վերջին պահը կատարել է իր խնդիրը, մի մասը մի օր էլ չի մնացել: Պահեստազորից համալրված ստորաբաժանումներ եկել են, մի մասը մի քանի ժամ, մի մասը՝ մի քանի օր: Կոնկրետ մի դեպք նշեմ, գնդապետ Գրիգորի Սահակյանի զեկուցագիրը կա, նա պետք է ուղեկցեր Հայաստանից ժամանած երկու գումարտակ: Զեկուցում է, որ հրաժարվում են Շուշիի պաշտպանությունից, պլանավորած ռազմական օպերացիա ունեինք, այդ օպերացիային մասնակցելուց:

Ո՞վ է ծախել հողը, ծախել ենք ազգովի: դավաճանել ենք մեր զինվորներին, 18-20 տարեկան մեր երեխաներին: Բոլորս միասին ենք դավաճանել: Դավաճան չփնտրեք. Այն կանայք, որ արդեն ֆեյսբուքով սկսել են իրենց վայրահաչոցն իմ նկատմամբ, և մնացած ղեկավարների նկատմամբ: Բացի զոհվածների հարազատներից, քանի որ նրանք իրավունք ունեն բոլորիս անվանել դավաճան: Ձեր ամուսինների, ձեր տղաների տեղն եմ ման գալու, թե որտեղ են եղել: Իհարկե, մի մասը եղել են առաջնագծում, մի մասը կռվել է, իրավունք ունեն: Այն քաղաքական գործիչները, որոնք փորձում են դավաճաններ փնտրել, թող հատ-հատ ներկայացնեն իրենց տղաների, եղբայրների, իրենց մասնակցությունը: Նկարվելը չեմ ասում,  բոլորին եմ ասում, որտե՞ղ եք եղել, առաջնագծում պետք է լինեիք: Ում հարցնում եմ՝ ասում են՝ եղել ենք Օմարում: Այո, Օմարում շատ ծանր ճակատամարտ ենք ունեցել մի քանի օր և շնորհիվ զինվորականների կարճ ժամկետում կարողացել ենք վերականգնել դիրքերը: ԹՓող ոչ ոք իրեն չվերագրի: Սելֆի անելով ազնիվ խաբել ենք, թե գտնվում ենք առաջնագծում:

Զինվորի կարիք ունեինք, մոենք ունեինք խնդիրներ անօդաչուներից պաշտպանվելու, օդից պաշտպանվելու, հիմնական դավաճանը բոլորս ենք, որ զինվորներին թողել ենք մենակ»,-հայտարարեց նա:

Հայաստանում նոյեմբերի 12-ին՝ ժամը 11:00-ի դրությամբ նոր կորոնավիրուսով վարակվելու 1993 նոր դեպք է գրանցվել, վարակվածների ընդհանուր թիվը հասել է 112680 դեպքի: Այս մասին հայտնում է ՀՀ ԱՆ հիվանդությունների եւ վերահսկման եւ կանխարգելման ազգային կենտրոնը:

Ընդհանուր թեստերի թիվը կազմում է 453033 վերջին մեկ օրում` 4583 նոր թեստավորում:

Փաստացի այս պահին բուժվում է 40452 պացիենտ. մեկ օրում ավելացել է 295-ով:

Վերջին տվյալներով ապաքինվել է 70130 անձ` վերջին մեկ օրում 1794 անձ:

Մեկ օրում կորոնավիրուսի հետեւանքով մահացել է 32 քաղաքացի, մահացածների թիվը 1668 է:

Նախորդ օրն արձանագրվել է մահվան 11 դեպք, երբ պացիենտի մոտ հաստատվել է կորոնավիրուսային վարակ, սակայն մահը վրա է հասել այլ հիվանդության պատճառով: Այդպիսի դեպքերի ընդհանուր թիվը 430 է:

Ես ամբողջ պատերազմի ընթացքում, ամեն օր կոչ եմ արել, ինքս այդպես վարվելով, օրինակ եմ ծառայել, կառավարության շուրջ համախմբման: Այս մասին Facebook-ի իր էջում գրել է վարչապետի նախկին խորհրդական Հակոբ Ճաղարյանը:

Նա, մասնավորապես, նշել է. «Դա արել եմ ինստիտուցիոնալ պետականության գաղափարով առաջնորդվելով: Պետությունը երկու ճակատով չպայքարելու գաղափարով: Արել եմ դա, ունենալով գաղափարական բազմաթիվ անհամաձայնություններ իշխող վարչակարգի հետ:

Այդպես եմ վարվել, նույնիսկ Պատերազմի առաջին օրերին, իր գնից 4 անգամ ավելի թանկ, 2 Իլ-76 օդանավ գնելում երկրի գրպանից մոտ 6 մլն ԱՄՆ դոլլար թալանելու փաստը չհանրայնացնելով:

Ես տեղեկացրել եմ վարչապետի պաշտոնը զբաղեցնող խենթի օգնականին եւ քպ-ական մի փոխնախարարի, որ մինչեւ պատերազմի ավարտը ես կլռեմ, որ պառակտում ու կասկած չմտցնեմ, բայց էդ թալանողները դրանից ավել ժամանակ չունեն:

Ու եթե էդ հարցը չուղղվեց մինչեւ պատերազմի ավարտ, ապա ես դրանից անմիջապես հետո դատարան եմ դիմելու: Պատերազմն ավարտվեց, ավելի ճիշտ մեր գլխին մեր ձեռով դրած խենթն ավարտեց անսպասելի եւ կործանարար ճանապարհով:

Ես այլեւս ազատ եմ իմ հայտարարություններում: Եվ հայտարարում եմ վարչապետի պաշտոնը զավթած նիկոլ փաշինյանի, փոխվարչապետի պաշտոնը զբաղեցնող տիգրան ավինյանի տնտեսական հանցագործությունների իմ ունեցած բազմաթիվ փաստերի մասին:

Սկսված 2019 թ. Եգիպտոսում հայ զբոսաշրջիկներին հայրենիք վերադարձնելու համար նախատեսված գումարի մեծ մասի թալանից, ԱՄՆ վարձու օդանավով թռիչք պատվիրելու արժեքից, անհասկանալի թանկ արժեքով Իլ-76 օդանավ գնելու անհասկանալի որոշումից, երբ ՀՀ-ն ուներ 3 այդպիսի օդանավ: Իհարկե, մի քիչ խելք հավաքել են արդեն: Հիմա ցույց կտան, որ դա մասնավոր անձինք են առել:

Բայց նույնիսյկ էս պարագայում այդ մասնավոր անձանց պատվիրատուն պետությունն է: Եվ էդ մասնավոր անձանցից շուկայական արժեքից թանկ օդանավ վարձելը հենց երկքայլանոց կոռուպցիոն սխեմա է: Էս դեռ տնտեսական թալանի մասով միայն: Ստեղ կա նաեւ հակապետական գործունեության մեղադրանք, որը պետքա դիտարկվի միայն հայրենիքի դավաճանության հոդվածով: Բայց էս հարցին կանդրադառնամ ավելի հանգամանորեն ու մի փոքր ուշ:

Ասեմ, որ ես ոչ ոքի շահը չեմ պաշտպանում, բացի իմ թալանված ու թալանվող երկրի, Ու ոչ էլ էն 17 կուսակցություն կոչվողներից որեւէ մեկի հետ կապ ունեմ, կամ համակիր եմ: Համոզված եմ, որ նրանց բոլորին պետքա հենց հիմա ձերբակալել պատերազմի ժամանակ հեղաշրջման փորձի մեղադրանքով: Որովհետեւ նրանք քայլիչի հրաժարականը պահանջել են դեռեւս վերջինի կողմից խայտառակությունը չլափած ժամանակ: Ես հանդես եմ գալիս միայն եւ միայն իմ` դեռեւս գոյություն ունեցող երկրի ոչ հպարտ, անպատված ու ստորացված քաղաքացու անունից: Եվ ամեն բան կանեմ, կյանքս կդնեմ, ոնց որ մինչեւ հիմա եմ արել, որ թոռներս գոնե անարգված չլինեն: Որ էս երկրից մի ցենտ անգամ, մի լումա թալանած ցանկացած սրիկա հայտնվի բանտում: Եվ այսպես` Գանձագողություն»։

Հայաստանի վարչապետ Նիկոլ Փաշինյանը, որը Լեռնային Ղարաբաղում ռազմական գործողությունները դադարեցնելու մասին համաձայնագիր է ստորագրել, կարող է հրաժարական տալ առաջիկայում: Նման կանխատեսում է արել ՌԴ Պետդումայի ԱՊՀ և հայրենակիցների հետ կապերի հարցերով հանձնաժողովի նախագահի առաջին տեղակալ Կոնստանտին Զատուլին՝ gazeta.ru-ի հետ զրույցում:

«Գործող վարչապետը շատ ծանր վիճակում է: Երկրի ղեկավարի պաշտոնում նրա օրերը գործնականում հաշվված են: Շաբաթներ առաջ պատասխանատու քաղաքական գործիչներն արդեն խոսել էին իշխանությունը բանակին փոխանցելու անհրաժեշտության մասին: Փաշինյանը «թավշյա հեղափոխության» տարիների հաղթող և հայտնի առաջնորդից վերածվել է ոչ պոպուլյար գործչի»,-ասել է պատգամավորը:

Զատուլինի կարծիքով՝ հակամարտության երկու կողմերն էլ գոհ չեն ձեռք բերված պայմանավորվածություններից:

«Ռազմական գործողությունների դադարեցումը պարտադրված քայլ է երկու կողմերի համար: Ադրբեջանը ավելիի հույս ուներ և մեծացնում էր իր հարձակումը Թուրքիայի օգնությամբ, իսկ Հայաստանը ռազմական պարտություն է կրել և կորցրել է նախկինում զբաղեցրած տարածքները»,-եզրափակել է իր խոսքը Զատուլինը:

Ավելի վաղ ՌԴ նախագահ Վլադիմիր Պուտինը հայտնել էր, որ ՌԴ-ն, Ադրբեջանը և Հայաստանը Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել:

Իր հերթին, ՀՀ վարչապետ Նիկոլ Փաշինյանը հայտնել էր, որ Ռուսաստանի և Ադրբեջանի նախագահների հետ ղարաբաղյան պատերազմը ժամը 01:00-ից դադարեցնելու մասին հայտարարություն է ստորագրել:

«Հայտարարության տեքստը, որ արդեն հրապարակվել է, անասելի ցավոտ է անձամբ ինձ և մեր ժողովրդի համար: Այդ որոշումը կայացրել եմ ռազմական իրադրության խորը վերլուծության և այդ իրադրությանը ամենալավը տիրապետող մարդկանց գնահատականի արդյունքում: Նաև հիմնվելով այն համոզմունքի վրա, որ ստեղծված իրավիճակում սա հնարավոր ամենալավ հանգուցալուծումն է: Այս ամենի մասին առաջիկա օրերին հանդես կգամ մանրամասն ուղերձով»,- ասել է նա:

Ռեժիսոր և պրոդյուսեր Ռուբեն Մխիթարյանը իր ֆեյսբուքյան էջում տեսաուղերձ է հղել, տեսանյութում նշում է, որ իշխանության գալուց առաջ Նիկոլ Փաշինյանը նշում էր, որ ճակատագրական  որոշումների ժամանակ, ներառյալ Արցախի հարցը, մարդկանց հավաքելու է հրապարակում և ներկայացնելու խնդիրը, սակայն, Մխիթարյանի խոսքով, իրականում գիշերը թաքուն, աղետալի և խայտառակ փաստաթուղթը ստորագրել է և հիմա  շարունակում է խաբել բոլորին:

«Նշում ես, որ 25 տարիների ընթացքում բոլոր փաստաթղթերում այդ 7 շրջանների մասին կետեր են եղել, Շուշին հանձելու մասի՞ն էլ է եղել, որ Արցախից մի փոքր հատված է մնալու, կամ որ Հայստանի միջով ճանապարհ է գնալու Նախիջևան, դա էլ է՞ եղել փաստաթղթում»,- նշում է նա:

Ռուբեն Մխիթարյանի խոսքով՝ Արցախի նախագահ Արայիկ Հարությունյանի տեսաուղեձից պարզ է դառնում, որ  պատերազմի սկսվելուց 40-45 օր իրականությունը չի ներկայացվել, կեղծ իրականություն է  ստեղծվել հասարակության մոտ:

«Դու մեզ  խայտառակել ես, դու բաժանեցիր մեզ հազար մասի, հիմա հանկարծ չփորձեց ժողովրդին հանել իրար դեմ, չփորձես քո ապաշնորհ դիվանագիտության պատճառով մեղքը գցել բանակի վիզը, զինվորն ու սպան քո դավերի հետ կապ չունեն, իրենք առավելագույնն են արել: Այս պատերազմի ընթացքում հազարավոր հայերի արյուն է թափվել. պատերազմը չտեղափոխես Հայաստանի փողոցներ, հային հայի դեմ չհանես հայը հայի արյուն Հայաստանում չի թափելու: Հեռացիր, եթե մեջդ մի փոքր հայ մնացել է, հանգիստ թող գնա»,- նշեց նա:

2020 թվականի սեպտեմբերի 27-ին Ադրբեջանի Հանրապետության կողմից Արցախի Հանրապետության դեմ սանձազերծված պատերազմի ու դրանով պայմանավորված՝ նույն օրը Հայաստանի Հանրապետությունում եւ Արցախի Հանրապետությունում հայտարարված ռազմական դրության պայմաններում, 2020 թվականի նոյեմբերի 10-ին պատերազմը դադարեցնելու մասին Հայաստանի Հանրապետության, Ռուսաստանի Դաշնության եւ Ադրբեջանի Հանրապետության միջեւ ձեռք բերված համաձայնության վերաբերյալ հայտարարությունը զանգվածային լրատվության միջոցներում հրապարակվելուց հետո Հայաստանի Հանրապետության տարբեր տարածքներում, հատկապես մայրաքաղաք Երեւանում գտնվող ՀՀ Կառավարության, Ազգային ժողովի շենքերում եւ պետական նշանակության այլ օբյեկտներում ու հասարակական վայրերում կազմակերպվել եւ իրականացվել են բռնություն գործադրելով, ջարդ իրականացնելով, գույք ոչնչացնելով, վնասելով կամ իշխանության ներկայացուցչին զինված դիմադրելով արտահայտված զանգվածային անկարգություններ: Այս մասին հայտարարություն է տարածել Հայաստանի ԱԱԾ-ն:

Հայտարարությունում նաեւ ասվում, է. «Այդ ընթացքում մասնակիցների կողմից հնչել են ինչպես իշխանության ներկայացուցիչների օրինական պահանջներին ակտիվորեն չենթարկվելու կամ անձանց նկատմամբ բռնություն կիրառելու կոչեր, այնպես էլ իշխանությունը զավթելուն, սահմանադրական կարգը բռնի տապալելուն ուղղված հրապարակային կոչեր, ինչի հետեւանքով վտանգվել է հասարակական անվտանգությունը, պետական եւ տեղական ինքնակառավարման մարմինների բնականոն գործունեությունը:

Բացի այդ, նույն օրը զանգվածային անկարգությունների մասնակիցները վերը նշված համաձայնագրի կետերը չկատարելուն պարտադրելու նպատակով Երեւան քաղաքում բռնություն են գործադրել ՀՀ ազգային ժողովի նախագահ Արարատ Միրզոյանի նկատմամբ, ինչպես նաեւ նույն նպատակով բռնություն գործադրելու սպառնալիքներ են հնչեցրել ՀՀ կառավարության անդամների եւ վարչապետի նկատմամբ:

Դեպքի առթիվ ՀՀ ազգային անվտանգության ծառայության քննչական դեպարտամենտում 2020 թվականի նոյեմբերի 10-ին ՀՀ քրեական օրենսգրքի 225-րդ հոդվածի 1-ին, 2-րդ եւ  4-րդ մասերով, ՀՀ քրեական օրենսգրքի 301-րդ հոդվածով եւ ՀՀ քրեական օրենսգրքի 301.1 հոդվածի 1-ին մասով նախատեսված հանցագործությունների հատկանիշներով հարուցվել է քրեական գործ:

Քրեական գործի նախաքննությամբ ձեռնարկված մեծաթիվ եւ արդյունավետ քննչական ու այլ դատավարական գործողությունների եւ օպերատիվ-հետախուզական միջոցառումների արդյունքում հանցանք կատարելու մեջ անմիջականորեն ծագած կասկածանքի հիման վրա հայտնաբերվել եւ ձերբակալվել են ընդհանուր թվով շուրջ  20 անձինք:

Ընդ որում հանրությանն իրենց անկարգություններով արդեն իսկ հայտնի՝ հիշյալ անձանց մեծամասնությունը զղջացել է կատարվածի համար, դատավարական հարկադրանք կիրառելուց անմիջապես հետո տրամագծորեն փոխել վարքագիծը եւ դրսեւորել իրավահպատակ, օրինապաշտ քաղաքացուն բնորոշ  վարքագիծ:

Հավելենք, որ ձեռնարկվում են օպերատիվ-հետախուզական միջոցառումներ, կատարվել են դեպքի վայրերի զննություններ, անհետաձգելի քննչական եւ դատավարական գործողություններ, նշանակվել են դատաբժշկական, դատաապրանքագիտական եւ դատահետքաբանական համալիր փորձաքննություններ, հարցաքննվել են բազմաթիվ վկաներ, հայտնաբերվել եւ վերցվել են կառավարական առանձնատնից հափշտակված իրերը, առգրավվել են դեպքի վայր հանդիսացող տարածքների տեսախցիկների տեսագրությունները, նույնացվել դրանցում առկա անձինք, իրականացվել են այլ տեսակի քննչական ու դատավարական գործողություններ՝ զանգվածային անկարգությունների բոլոր մասնակիցների, այդ թվում նաեւ կազմակերպիչների ինքնությունը պարզելու եւ նրանց՝ օրենքի առջեւ պատասխանատվության ենթարկելու ուղղությամբ:

Հայաստանի Հանրապետության ազգային անվտանգության ծառայությունը հետեւողական պայքար է տանում հասարակական անվտանգության, սահմանադրական կարգի հիմունքների եւ պետության  անվտանգության դեմ ուղղված հանցագործությունների կանխման, խափանման եւ բացահայտման ուղղությամբ:

Միաժամանակ, ակնկալվում է նաեւ այդ գործընթացում հասարակության լայն շերտերի ներգրավվածությունը՝ իշխանության մարմիններին հայտնելու վերը հիշատակված դեպքերի, սոցիալական ցանցերում հրապարակված տեսանյութերում երեւացող անձանց ինքնությունների վերաբերյալ իրենց հայտնի դարձած տեղեկությունները:

ՀՀ ազգային անվտանգության ծառայությունը կոչ է անում պահպանել ռազմական դրության իրավական ռեժիմի պահանջները, ցուցաբերել քաղաքացիական բարձր պատասխանատվություն, չտրվել սադրանքների, զերծ մնալ նեղ անձնական կամ կուսակցական շահերը հանրային շահին ստորադասելու, հայրենասիրության քողի տակ հանրությանը մոլորության մեջ գցելու, այս պահին դեռեւս մարտական դիրքերում գտնվող զինվորների կյանքն ու առողջությունը վտանգի տակ դնելու անթույլատրելի գործելաոճից եւ զգուշացնում է, որ պետությունն իր ողջ գործիքակազմի կիրառմամբ իրականացնելու է իրավիճակից բխող համարժեք գործողություններ:

Ագրեսիվ ադրբեջանցիները զանգվածային հալածանքներ և արյունալի վրեժխնդրություն են իրականացնում Լեռնային Ղարաբաղում։ Մինչդեռ մեծ տերությունները նվազագույն քայլեր են ձեռնարկում վատագույնը կանխելու համար, գրում է շվեյցարական Neue Zürcher Zeitung պարբերականի լրագրող Անդրեաս Ռյուշը։

Խոսելով Լեռնային Ղարաբաղում ռուս խաղաղապահների տեղակայման շուրջ պայմանավորվածություն ձեռք բերելու և տարածքային զիջումների մասին՝ հոդվածագիրը նշում է, որ «Շուշիի անկումը հանգեցրել է նման դրամատիկ շրջադարձի»։

Հոդվածի հեղինակը նշում է, որ ադրբեջանական բանակի հետ Հայաստանի դեմ կռվել են Սիրիայից բերված վարձկաններ։

«Բաքվի ռեժիմն իր համար նոր տեխնոլոգիաներ էր բացահայտել պատերազմ վարելու համար և օգտագործում էր մեծ թվով մահաբեր անօդաչու թռչող սարքեր։ Բացի այդ, ադրբեջանցիներն ու նրանց թուրք դաշնակիցները հստակ հաշվարկել էին, որ այս աշունը հարված հասցնելու իդեալական պահն է. բռնությունից հրաժարվելու թույլ կոչերից ավելին ձեռնարկելու համար ԱՄՆ-ն չափազանց զբաղված էր նախընտրական արշավով, Եվրոպան՝ կորոնավիրուսի համավարակով, իսկ Ռուսաստանը՝ բելառուսական ճգնաժամով և ներքին խնդիրներով», — ասվում է հոդվածում:

Լրագրողի խոսքով՝ «Ադրբեջանը փորձում էր իր ագրեսիան արդարացնել նրանով, որ իբր միայն վերադարձնում է այն, ինչ ժամանակին եղել է Ադրբեջանական ԽՍՀ-ի՝ միջազգային իրավունքով ճանաչված մասը։ Սակայն Բաքվի նկրտումները Լեռնային Ղարաբաղի տարածքի նկատմամբ, որն ավանդաբար բնակեցված է եղել մեծամասամբ հայերով, չափազանց վիճելի է։ Բացի այդ, ցինիկորեն օգտագործում էր միջազգային իրավունքը որպես փաստարկ, միաժամանակ խախտելով հրադադարի մասին համաձայնագիրը, գնդակոծելով բնակելի շրջանները և կիրառելով արգելված զենք»։