Բացառվում է, որ ընտրություններից հետո բախումներ չլինեն: Այս մասին հունիսի 18-ին լրագրողների հետ հանդիպմանը հայտարարել է ՀՀ առաջին նախագահ, «Հայ ազգային կոնգրես» կուսակցության ղեկավար Լեւոն Տեր-Պետրոսյանը:

«Եթե ընտրություններում հակազդումը չի վերածվում ֆիզիկական բախումների, արդեն լավ է: Սակայն դա բացառվում է: Երկու կողմերն էլ ամեն ինչի կգնան: Նրանք արդեն հանրահավաքներ են պատվիրել, նրանց մտադրությունները պարզ են», — նշել է նա:

Տեր-Պետրոսյանը պարզաբանել է, որ եթե երկիրը գնա այս ճանապարհով, դա կլինի մեկ տարվա մեջ երկրորդ պարտությունը:

«Մենք տեսնում ենք, թե ինչ ուժեր են ներգրավված այս ընտրություններում, ինչ միջոցներ են նրանք կիրառում: Միմյանց դեմ պատերազմ են հայտարարել: Ցանկացած ավանտյուրա սպասելի է նրանց կողմից: Սթափվելու ժամանակն է, այլապես եթե պատերազմի արդյունքում կորցրինք Արցախը, ապա ընտրությունների արդյունքում կարող ենք կորցնել Հայաստանը: Ես չեմ չափազանցնում: Այդպես էլ կլինի, եթե լինեն քաղաքացիական բախումներ», — հավելել է առաջին նախագահը:

Մենք հիանալի քարոզչություն անցկացրինք եւ հնարավորություն ստացանք մեր խոսքը հասցնել ընտրողներին:

«Եթե նորմալ ընտրություններ լինեն, մենք լավ տոկոսներ կհավաքենք եւ կհայտնվենք խորհրդարանում:

Նման պարագայում մենք կլինենք այն զսպող ուժը, որը թույլ չի տա կրկնել Փաշինյանի թիմի թույլ տված սխալները:

Խորհրդարանում մենք արբիտրի դեր կխաղանք, եւ ոչ մի դեպքում դահիճի», — նշել է նա:

Փաստաբանների պալատի նախագահ Արա Զոհրաբյանը Facebook-ի իր էջում հրապարակել է վարչապետի պաշտոնակատար Նիկոլ Փաշինյանի վերաբերյալ վարչական դատարանի որոշումը:

«Սիրելի հայրենակիցներ,

ՀՀ վարչական դատարանը 17.06.2021թ. մերժեց «Զարթոնք» ազգային քրիստոնեական կուսակցության հայցն ընդդեմ ՀՀ կենտրոնական ընտրական հանձնաժողովի և երրորդ անձ՝ «Քաղաքացիական պայմանագիր» կուսակցության, որը վերաբերվում էր ՔՊ ընտրական ցուցակն ուժը կորցրած ճանաչելու հետ կապված վեճին:

Կենտրոնական ընտրական հանձնաժողովը (ԿԸՀ) մերժել էր «Զարթոնք»-ի դիմումը, պատճառաբանելով, որ (1) իրավասու չէ գնահատել նախընտրական քարոզչության բովանդակությունը, և (2) ընտրական օրենսգիրքը որևէ ընթացակարգ չի սահմանում սպառնալիքների կամ այլ անօրինական հայտարարությունների մասով միջամտելու վերաբերյալ:

Թեև վարչական դատարանը մերժել է Զարթոնքի հայցը, սակայն մի քանի կարևոր հանգամանքներ է հաստատել՝

1. «Դատարանն արձանագրում է, որ ընտրություններին մասնակցող կուսակցության կամ թեկնածուի կողմից նախընտրական քարոզչության ընթացքում ցանկացած կոնտեսքստով, անձնավորված կամ անորոշ թվով անձանց ուղղված, որոշակի կամ անորոշ ձևակերպմամբ վերը շարադրված մտքերը պարունակող արտահայտություններն օբյեկտիվորեն և ողջամտորեն կարող են ընկալվել որպես բռնության կիրառման սպառնալիք, հետևաբար սույն վարչական գործով հայցվորի փաստարկներն առ այն, որ երրորդ անձ, «Քաղաքացիական պայմանագիր» կուսակցության թեկնածու Նիկոլ Փաշինյանի կողմից վերը նշված տեսաձայնագրություններում հնչեցված արտահայտություններն օբյեկտիվորեն և ողջամտորեն կարող են ընկալվել որպես բռնության կիրառման սպառնալիքներ, հիմնավոր են, ուստի կենտրոնական ընտրական հանձնաժողովի կողմից ՀՀ ընտրական օրենսգրքի 19-րդ հոդվածի 8-րդ մասով սահմանված գործիքակազմի կիրառման տեսանկյունից առաջադրված նախապայմանը՝ նախընտրական քարոզչության սահմանված կարգի խախտումը, սույն դեպքում առկա է»: (մեջբերման ավարտ).

2. Դատարանը գտել է նաև, որ այդ խախտումները շարունակական են.

3. Դատարանը գտել է, որ «Անկախ պետությունների համագործակցության մասնակից պետություններում ժողովրդավարական ընտրությունների, ընտրական իրավունքների և ազատությունների չափանիշների մասին» կոնվենցիայի 8-րդ հոդվածը կիրառելի է նախընտրական քարոզչության գործընթացի նկատմամբ և այդ կոնվենցիայի խախտումը հանգեցնում է Ընտրական օրենսգրքի 19-րդ հոդվածով նախատեսված գործիքակազմի կիրառմանը.

4. Դատարանը գտել է, որ Կենտրոնական ընտրական հանձնաժողովը կրում է պարտականություն այդպիսի խախտումները վերացնելու հարցում՝ ընտրական օրենսգրքի 19-րդ հոդվածի 7-րդ մասի համաձայն:

Հ.Գ.1 Դատարանը հայցը մերժել էր ըստ էության պատճառաբանելով, որ այդ խախտումների ազդեցությունը ընտրության արդյունքների վրա չի հիմնավորվել, ինչպես նաև Ընտրական օրենսգրքի 19-րդ հոդվածի 7-րդ մասը ԿԸՀ-ին օժտել է խախտումները կանխելու նախազգուշացում կիրառելու, ինչպես նաև իրավասու մարմիններին դիմելու գործիքակազմով:

Հ.Գ.2 Քիչ հետո դիմելու ենք կենտրոնական ընտրական հանձնաժողովին՝ ՀՀ ընտրական օրենսգրքի 19-րդ հոդվածի 7-րդ մասով նախատեսված պարտականությունը կատարելու հարցով»,- գրել է Արա Զոհրաբյանը։

Հայաստանի Դեմոկրատական կուսակցության կողմից վարչապետի թեկնածու Տիգրան Արզաքանցյանն այլևս անկուսակցական քաղաքական գործիչ չէ։ Sputnik Արմենիային տված հարցազրույցում Արզաքանցյանը հայտնեց, որ անդամակցել է կուսակցությանը, ավելին՝ այդ քաղաքական ուժի ղեկավար կազմի ներկայացուցիչ է դարձել։

Գործարարի խոսքով՝ իրեն պատգամավորական մանդատ ստանալու հնարավորությունից զրկված ԿԸՀ-ի որոշումից հետո հայտնվելով բարդ իրավիճակում, պետք էր չհիասթափեցնել իր կողմնակիցներին և ցույց տալ, որ անելանելի իրավիճակներ չեն լինում:

«Անկախ նրանից՝ ես խորհրդարանում առաջադրվելու իրավունք կստանամ, թե ոչ, ես, միևնույն է, շարունակում եմ հավակնել կառավարության ղեկավարի պաշտոնին։ Գործադիր իշխանությունը ղեկավարելու համար պարտադիր չէ պատգամավոր լինել կուսակցությունից կամ դաշինքից։ Նախընտրական ցուցակի առաջին համարը քաղաքական ուժի առաջնորդն ու խորհրդանիշն է։ Մեր կանխատեսումների համաձայն՝ մենք առաջին քառյակում հայտնվելու շանս ունենք, ուստի կոալիցիոն կառավարության դեպքում ժամանակ Դեմոկրատական կուսակցությունից կառաջարկվի իմ թեկնածությունը»,-նշեց Արզանքանցյանը։

Անցած շաբաթ Կենտրոնական ընտրական հանձնաժողովն անվավեր ճանաչեց Հայաստանի Դեմոկրատական կուսակցության կողմից վարչապետի թեկնածու Տիգրան Արզաքանցյանի գրանցումը: Նա չկարողացավ ապացուցել, որ վերջին չորս տարիների ընթացքում մշտապես բնակվել է Հայաստանում։ ԿԸՀ-ի հաշվարկներով՝ նա Հայաստանից բացակայել է փաստաթղթերի ներկայացումից առաջ 1461 օրից 1005-ը։

Դեմոկրատական կուսակցության ընտրական ցուցակի առաջնորդն այդ փաստարկները ոչ օբյեկտիվ է համարել և հայց է ներկայացրել դատարան։ Նրա խոսքով՝ ինքը ԿԸՀ ներկայացրել է ՀՀ Անձնագրային և վիզաների վարչության կողմից հաստատված փաստաթղթերը։ Եթե ԿԸՀ-ի մոտ կասկածներ էին ծագել, ապա այդ հարցը պետք է դատարան ուղարկվեր հենց հանձնաժողովի նախաձեռնությամբ։ Բայց ԿԸՀ-ն գրանցումը մերժելու որոշում է կայացրել, որն Արզանքանցյանը բողոքարկում է դատարանում։ Վերջնական վճիռ կհրապարակվի այսօր` հունիսի 18-ին։

«Ես մեծ հույս ունեմ, որ մարդասեր հայկական դատարանն արդար վճիռ կկայացնի»,-ասում է Արզանքանցյանը։

Եթե որոշումը նրա օգտին կայացվի, ապա Դեմոկրատական կուսակցության կողմից նվազագույն շեմը հաղթահարելու դեպքում Արզանքանցյանը ԱԺ պատգամավորի կարգավիճակ կստանա։ Իսկ եթե դատարանը ԿԸՀ-ի որոշումն ուժի մեջ թողնի, ապա կուսակցությունը, եթե անցնի խորհրդարան և մասնակցի կոալիցիոն կառավարության ձևավորմանը, կարող էր իր թեկնածությունն առաջադրել նաև ընտրական ցուցակից դուրս։

Հիշեցնենք, որ ըստ ԿԸՀ-ի հաղորդագրության` քաղաքական գործիչը երկու տեղեկանք է ներկայացրել Մոսկվայի Տեղեկատվական-տեխնոլոգիական համալսարանում սովորելու մասին՝ Հայաստանում իր բացակայությունը համարելով հարգելի, քանի որ այդ դեպքում օրենքը չի սահմանափակում որպես թեկնածու առաջադրվելու իրավունքը: Սակայն ներկայացված տեղեկանքում նրա ուսման ժամկետները չեն համընկնում, տարբերությունը կազմում է 7 ամիս։ Ավելին՝ դրանցից մեկում նշված չեն բուհի ռեկվիզիտները։

Ուղարկված հարցմանն ի պատասխան բուհից հայտնել են, որ իրենց առհասարակ նման տեղեկանքներ չեն տալիս։ Բուհի ռեկտորի պատասխանում հաստատվում է, որ Արզանքանցյանը սովորել է այդ ուսումնական հաստատությունում, բայց 2011թ․-ի սեպտեմբերից մինչև 2017թ․-ի սեպտեմբեր, ինչից հետո հեռացվել է բուհից՝ պահմանագրային պարտավորությունները չկատարելու համար։

Անվերապահորեն ու խստիվ դատապարտելի են հայաստանյան նախընտրական քարոզչության շրջանակներում հայության տարբեր խմբերի հանդեպ վիրավորական ու խտրական վերաբերմունքի դրսևորումները, մանավանդ «հայաստանցի-ղարաբաղցի» պառակտիչ տերմինաբանության կիրառումը և արցախցիների հասցեին հնչող թշնամական ու մեղադրական բառապաշարը։ Այս մասին ֆեյսբուքյան իր էջում գրել է Արցախի մարդու իրավունքների պաշտպան Գեղամ Ստեփանյանը։

«Գնացեք ձեր Ղարաբաղը», «ղարաբաղցին չկռվեց», «երբ կպրծնենք ղարաբաղցիներից» «թուրք ղարաբաղցի» և նմանատիպ այլ հայտարարությունները ոչ այլ ինչ են, քան հայության տարանջատման և ներքին թշնամանքի հրահրման անընդունելի փորձեր։ Դատապարտելի է, որ ազգը պառակտող և Արցախի հայության արժանապատվությունը վիրավորող հայտարություններ սոցիալական ցանցերում լայնորեն տարածվում են քաղաքական ուժերին սատարող իրական կամ կեղծ օգտատերերի կողմից։

Առավել դատապարտելի է, երբ նման անպատասխանատու հայտարարություններ հնչում են ՀՀ Ազգային ժողովի պատգամավոր դառնալու հայտ ներկայացրած քաղաքական գործչի կողմից՝ չգիտակցելով, կամ գուցե գիտակցելով իր խոսքի հանրայնությունն ու դրա թողած հետևանքները հանրության՝ այս պարագայում Արցախի հայության առանց այն էլ խոցելի հոգեբանական իրավիճակի վրա։

Արցախցին ոչ միայն կռվեց այս պատերազմում, այլև այսօր էլ ամեն օր պատասխանատվությամբ կատարում է Արցախը հայկական պահելու ծանր և արժանապատիվ առաքելությունը։ Ազատագրական պայքարի 30 տարվա ճանապարհին ողջ հայության հետ միասին, արցախցին ամեն օր երազել է մայր հայրենիքին միանալու մասին՝ իր մաշկի վրա տանելով պատերազմի մշտական վտանգի, միջազգային հանրությունից մեկուսացման ու անտեսման ծանր պայմանները ամենանվիրական գաղափարի՝ հայ մնալու համար։

Միանում եմ գործընկերոջս` ՀՀ մարդու իրավունքների պաշտպան Արման Թաթոյանի՝ նախընտրական քարոզարշավի ընթացքում փոխադարձ մեղադրանքները, վիրավորանքն ու հայհոյանքը դադարեցնելու բազմաթիվ կոչերին և խստիվ պահանջում զերծ մնալ արցախահայության արժանապատվությունը վիրավորելու, արցախցիների հասցեին հայհոյանքներ հնչեցնելու և պիտակավորելու դատապարտելի վարքագծից։

ՀՀ արտգործնախարարությունը դատապարտելի և սադրիչ է համարում Թուրքիայի և Ադրբեջանի նախագահներ Իլհամ Ալիևի և Ռեջեփ Թայիփ Էրդողանի` Շուշիում ստորագրած հռչակագիրն ու Թուրքիայի նախագահի` Ադրբեջանի խորհրդարանում հնչեցրած ելույթը։

«Թեև թուրք-ադրբեջանական հռչակագիրն առանձին կետով նշում է, որ այդ փաստաթուղթն ուղղված չէ երրորդ կողմի դեմ, այնուհանդերձ դրա ողջ բովանդակությունը թիրախավորում է հայ ժողովրդին։ Այն հստակ մատնանշում է Արցախի Հանրապետության դեմ 44-օրյա ագրեսիա իրականացրած երկու պետությունների դաշինքն ընդդեմ Արցախի ժողովրդի ինքնորոշման, Հայաստանի Հանրապետության տարածքային ամբողջականության և ցեղասպանություն վերապրած աշխարհասփյուռ հայ ժողովրդի իրավունքների»,– նշված է ԱԳՆ–ի տարածած հայտարարության մեջ։

Ըստ ԱԳՆ–ի` հռչակագրում տեղ գտած «Զանգեզուրի միջանցք» արտահայտությունը վկայում է, որ գոտեպնդվելով Արցախի ժողովրդի դեմ իրականացրած համատեղ ագրեսիայի և զանգվածային ոճրագործությունների անպատժելիությունից՝ Թուրքիան և Ադրբեջանը ձեռք են բերում հրապարակային պայմանավորվածություններ Հայաստանի Հանրապետության ինքնիշխանության և տարածքային ամբողջականության դեմ։ Նույնքան մտահոգիչ է երկու պետությունների պայմանավորվածությունը՝ պայքարելու Հայոց ցեղասպանության միջազգային ճանաչման դեմ։

«Վերոնշյալ պայմանավորվածություններն ամբողջովին հակասում են միջազգային իրավունքի հիմնական նորմերին։ Այս պարագայում արժանի է հիշատակման այն փաստը, որ միջազգային իրավունքի, մասնավորապես Միջազգային պայմանագրերի իրավունքի մասին 1969թ․ Վիեննայի կոնվենցիայի համաձայն՝ միջազգային բոլոր պայմանագրերը, որոնք հակասում են ընդհանուր միջազգային իրավունքի իմպերատիվ նորմերին՝ առոչինչ են և չեն կարող ունենալ որևէ միջազգային լեգիտիմություն»,– շեշտում է գերատեսչությունը։

Հատկանշական է, որ նշված հռչակագրի հիմքում ընկած է ոչ թե ՄԱԿ Կանոնադրությունը կամ ԵԱՀԿ համընդհանուր և անբաժանելի անվտանգության սկզբունքը, այլ «ցեղային անվտանգության» իրենց մոտեցումը, որն առաջ է մղվում որպես «թյուրքական աշխարհի» միավորման սկզբունք։

«Նման հայատյացության համատեքստում տարածաշրջանային համագործակցության պլատֆորմ ստեղծելու Ադրբեջանի խորհրդարանում հնչեցված Թուրքիայի նախագահի առաջարկները երեսպաշտ և ապակողմնորոշող են»,– նշում է ԱԳՆ–ն։

Թուրքիայի և Ադրբեջանի նախագահների հրապարակային պայմանավորվածությունները պարունակում են ոչ միայն ցեղասպան սպառնալիքներ տարածաշրջանում հայ ժողովրդի նկատմամբ, այլ նաև լուրջ մարտահրավեր են միջազգային և տարածաշրջանային խաղաղությամբ և անվտանգությամբ շահագրգիռ բոլոր երկրների համար, ինչն ընդգծում է նշված բոլոր երկրների կողմից սերտ համագործակցության անհրաժեշտությունը։

Արցախի ժողովրդի դեմ ագրեսիայի և ուժի կիրառման հետևանքով ձեռք բերված իրողությունները չեն կարող տևական խաղաղության հիմք դառնալ, այնպես, ինչպես Շուշիում թուրք-ադրբեջանական տարբեր մտացածին նախաձեռնությունները չեն կարող հայկական այդ մշակութային կենտրոնն օտարել Արցախից և հայ ժողովրդից։

Որևէ մեկը կարո՞ղ է ասել, թե ի՞նչ միջոցներով է ՔՊ-ն էս էպիկ հարթակները Հանրապետության հրապարակում հավաքում, պետակա՞ն միջոցներով, թե՞ կուսակցական։ Այս մասին Facebook-ի իր էջում գրել է «5165» շարժման մամուլի խոսնակ Դավիթ Գրիգորյանը, ով իր գրառումը վերնագրել է. «միլիոնավոր դրամների ծախսեր»:

Նա, մասնավորապես, նշել է. «Երկուսի դեպքում էլ սա կատարյալ խայտառակություն է։ Այս պահին սահմանապահ մեր զինվորները վրանների, ծառայության համար անհրաժեշտ առաջնային նշանակության բազմաթիվ այլ պարագաների կարիք ունեն։ Այդ իրավիճակում որքանո՞վ է բարոյական նման շքեղությամբ հանրահավաքներ անցկացնել։ Կամ ո՞վ է թույլ տվել սեփականաշնորհել իրենց կուսակցության ագիտացիոն նպատակների համար ամբողջ հրապարակն ու պետական գույք հանդիսացող կառավարության, պատկերասրահի շենքերը։

Լավ, դուք խիղճ ունե՞ք։ Լավ, էդ ծախսը մարդ լինեիք՝ ուղարկեիք դիրքեր։ Դեռ ընտրությունները չսկսված հաղթածի դի՞րք եք բռնում։

Դուք երկրին տեր կանգնող չեք եղել ու չկաք։ Էդ հրապարակային խայտառակությանը մասնակցողների համար, չգիտեմ էլ, թե Հայրենիքն ինչ արժեք ունի, հայորդի կորցնելն ինչ արժեք ունի․․․

Ամոթից պայթում եմ։ Դուք էլ, ձեր ապագան էլ, թե էդ ապագայում ձեզ ենք տեսնելու։

Լուրջ չեմ վերաբերվում այդ մարդու հայտարարությանը։ «Փաստինֆո»-ի հետ զրույցում ասաց Շուռնուխի գյուղապետ Հակոբ Արշակյանը՝ անդրադառնալով ՀՀ վարչապետի պաշտոնակատար Նիկոլ Փաշինյանի այն հայտարարությանը, որով Սյունիքի համայնքապետերին հորդորում էր ինքնակամ պառկել ասֆալտին և սելֆի անել։

Հակոբ Արշակյանը նշեց, որ առհասարակ լուրջ չի ընդունում Նիկոլ Փաշինյանի ցանկացած հայտարարություն, այդ թվում նաև այն, որ Սյունիքում մեծացել է սերունդ, որը չի հասկանում՝ Շուռնուխն ադրբեջանական է։

«Չեմ հասկանում այդ մարդու մտածելակերպը։ Շուռնուխում ասում է՝ տեսնում եք չեն սեփականաշնորհել հողերը, որովհետև իմացել են, որ դրանք ադրբեջանական են։ Մեր հողերը գտնվում են Շուռնուխի թիկունքում, այսինքն եթե մեր հողերին նման որակավորում տաք, որ դրանք Ադրբեջանինն են, ուրեմն Շուռնուխն ամբողջությամբ Ադրբեջանի՞նն է։ Նա չի տիրապետում քարտեզին և Շուռնուխի տարածքին, ուղղակի ինքն այդ պահին ինչ մտածում, դա է ասում»,-նշեց գյուղապետը։

Վերջինս նկատեց՝ Սյունիքի համայնքապետերից առաջին տեղում, որը գործող իշխանության թիրախում է, Գորիսի քաղաքապետ Առուշ Առուշանյանն է, ում ինչպես գյուղապետն է նշում, էլ քրեական հոդված չմնաց, որով մեղադրանք չառաջադրեն։

Հունիսի 15-ին Սյունիք կատարած այցի ժամանակ Նիկոլ Փաշինյանը մուրճը ձեռքին հայտարարել է, թե «բունտար» համայնքապետերին պառկեցնելու է ասֆալտին, իսկ այսօր էլ Վայոց Ձորում ընտրողների հետ հանդիպումների ժամանակ կրկին խոսել է սյունեցին մասին՝ ասելով, թե համայնքապետերը թող պառկեն ասֆալտին ու սելֆի անեն, սովորեն ասֆալտի վաննաներ ընդունել։

Հարցին՝ գործող իշխանություններին կհաջողվի՞ Սյունիքի համայնքապետերին «ասֆալտին պառկեցնել», Հակոբ Արշակյանն ասաց. «Իհարկե ոչ, եթե մարդ իր կարծիքն արտահայտում է, դրա համար այդ մարդուն պետք է ասֆալտին փռե՞ն։ Ես արտահայտել եմ կարծիքս և՛ հուզված, և՛ հանգիստ վիճակում։ Ես իրավունք չունե՞մ արտահայտեմ։ Արտահայտվելու իրավունքը պետք է սահմանափակե՞ն»։

Ինչ վերաբերում է հարցին, արդյոք իշխանության ներկայացուցիչներն ունեն նման ունակություններ, թե ոչ, Շուռնուխի գյուղապետը նկատեց՝ բազմիցս տեսել է, որ դա անում են, մասնավորապես Երևանում։

«Եթե կարող էր այդ մուրճը թուրքի գլխին ցույց տալ, ինչո՞ւ դա չարեց, ինչո՞ւ բերենք մեր ժողովրդի գլխին անենք։ Կամ այս մուրճի պատմությունը որտեղի՞ց եկավ, ո՞վ հուշեց, ինչո՞ւ հուշեցին։ Դա ճիշտ չէր»,-ասաց Հակոբ Արշակյանը։

Արտահերթ ընտրությունների շեմին ՀՀ նախկին վարչապետ Վազգեն Մանուկյանը տարածել է հայտարարություն, որտեղ ասված է.

«Հունիսի 20-ին տեղի են ունենալու ընտրություններ: Այս ընտրություններն ու հետագա գործընթացները վճռական նշանակություն են ունենալու ոչ միայն Հայաստանի, այլև ողջ հայության համար:

Ընտրություններն արտահերթ են՝ պայմանավորված նրանով, որ  ներկա իշխանությունը երկիրը հասցրել է մեծ աղետի: Մենք կորցրել ենք ոչ միայն տարածքներ և հազարավոր երիտասարդ կյանքեր, այլև մեր հեղինակությունն ու ինքնիշխանությունը, մեր անվտանգությունը, մեր քիչ թե շատ ներքին համերաշխությունը և մեր հավատն ապագայի նկատմամբ:
Հետևաբար այս ընտրությունները պետք է լուծեն մի կարևորագույն հարց՝ ձերբազատվել այս իշխանությունից:

Ընտրությունների ժամանակ ես միշտ կողմնակից եմ եղել, որպեսզի մարդիկ քվեարկեն ըստ իրենց քաղաքական ճաշակի՝ չանտեսելով նաև փոքր, բայց հրապուրիչ ծրագրեր ու գաղափարներ ունեցող ուժերին՝ քաղաքական դաշտում բազմազանություն ապահովելու նպատակով: Բայց այս վճռական պահին, երբ մենք լուծում ենք այս իշխանությունից ազատվելու կարևորագույն խնդիրը, իրավիճակը թելադրում է ձայնը տալ այն ուժերին, որոնք ակնհայտորեն ունեն անցողիկ շեմը հաղթահարելու հնարավորություն, պատրաստ են համախմբվել վարչապետի միասնական թեկնածուի շուրջ և լի են վճռականությամբ ու փորձով փոխելու ստեղծված իրավիճակը:

Դրա հետ մեկտեղ այս պայմաններում շատ վտանգավոր եմ համարում ՀՀ առաջին նախագահ Լևոն Տեր-Պետրոսյանի վերջին հարցազրույցը, որտեղ նա «դաս է տալիս» քաղաքական գործիչներին ու մտավորականությանը «քաղաքական իրատեսության» վերաբերյալ, և անհրաժեշտ եմ համարում շատ հակիրճ ներկայացնել որոշ դիտարկումներ:

1. Հայաստանի բոլոր քաղաքական ղեկավարները միշտ էլ գիտակցել են և փորձել են Արցախի հարցում իրականացնել իրատեսական և փոխզիջումային քաղաքականություն: Բանակցությունների ընթացքում քննարկվել են բազմաթիվ փոխզիջումային տարբերակներ: Դրա վառ օրինակներից են Մադրիդյան սկզբունքները, հետագայում դրանց հիման վրա տարբերակների զարգացումն ու փոխզիջումային եզրերի փնտրտուքը:

2.Մենք ունենք դաշնակիցներ:

Արցախի անկախության հարցը համապատասխանեցված է եղել ինչպես ԽՍՀՄ-ի օրենքներին, այնպես էլ ՄԱԿ-ի կանոնադրությանն ու միջազգային օրենքներին: Այդ հարցն այսօր էլ դուրս չի եկել միջազգային օրակարգից: Հենց այսօր ԱՄՆ նախագահն ու Ռուսաստանի նախագահը քննարկելու են Արցախյան հարցը: ԵԱՀԿ Մինսկի խումբը նույնպես շահագրգռված է բանակցությունների վերսկսման հարցում՝ որոշելու Արցախի կարգավիճակի հարցը, ինչը նշված է նաև 90-ական թվականների՝ ՄԱԿ-ի Անվտանգության խորհրդի բանաձևերում:
Որոշ պետություններ հետամուտ են այս հարցին՝ ելնելով իրենց աշխարհաքաղաքական շահերից, մի մասն էլ՝ ելնելով միջազգային օրենքների թելադրանքից: Մենք այս հարցում ունենք դաշնակիցներ, բայց նրանց ներդրումն, ինչպես նաև նոր դաշնակիցների ներգրավումը հարցի կարգավորման գործում, կախված է մեզանից:

3. Լևոն Տեր-Պետրոսյանի պատկերացումները քաղաքական պրագմատիզմի մասին պրիմիտիվ են և էապես սահմանափակում են մեր հնարավորությունների դաշտը: Իրատեսական ճանապարհով լուծվող հարցերի դաշտը իրականում շատ ավելի մեծ է, քան թվում է Տեր-Պետրոսյանին:
Նախևառաջ ձևակերպում են ազգային-պետական նպատակներ ու խնդիրներ, որոնք անհրաժեշտ է լուծել, որքան էլ դրանք այդ պահին դժվար ու անիրագործելի թվան: Հետո արդեն քայլ առ քայլ պետք է ձգտել իրականացնել դրանք՝ հաշվի առնելով աշխարհի զարգացման միտումները, օգտվելով ստեղծված իրավիճակից, զարգացնելով սեփական հնարավորությունները: Դա է քաղաքական պրագմատիզմը:

Ոչ թե հնարավորություններն են թելադրում, թե ինչ խնդիրներ է պետք դնել և լուծել, այլ խնդիրներն են թելադրում, թե ինչ հնարավորություններ է պետք ստեղծել:
Իր պատկերացումներով  Տեր-Պետրոսյանը միշտ թևաթափ է անում մեր ժողովրդին և զրկում նրան մեծ նպատակների ձգտումից՝ դրդելով միայն «իրատեսական» գոյատևման, ինչը, իմ համոզմամբ, այս տարածաշրջանում կործանարար է մեր պետության և ժողովրդի համար: Դրա վառ ապացույցն է այն, որ Լևոն Տեր-Պետրոսյանի սահմանափակ պրագմատիզմի գաղափարներով սնված շերտը, 2018-ին գալով իշխանության, երկիրը հասցրեց այս աղետին»։
 

Տպավորություն է, որ Լեւոն Տեր-Պետրոսյանը խճճվել է, նրա հայտարարությունները հակասում են իրար: Այս մասին հունիսի 16-ին լրագրողների հետ հանդիպմանը ասել է «Հայաստան» դաշինքի ներկայացուցիչ Վիկտոր Սողոմոնյանը՝ մեկնաբանելով առաջին նախագահի այն հայտարարությունը, թե ՀՀ երկրորդ նախագահ Ռոբերտ Քոչարյանը նոր պատերազմ է ցանկանում:  

«Սկզբում նա ասում է, որ թույլ չի տա, որ Քոչարյանը գա իշխանության, իսկ հետո ասում է, որ պատրաստ է նրա հետ կոալիցիա կազմել: Այժմ նա քննադատում է այն անձին, որը կյանքի է կոչել «Ղարաբաղը բեռ է» չարաբաստիկ հայեցակարգը, որին նա աջակցում է, իսկ այժմ ասում է, որ պետք է ազատվենք այդ մարդուց», — նշել է նա: Առաջին նախագահի քաղաքական տրամաբանությունը, նրա խոսքով, խեղվել է, ուստի «Հայաստան» դաշինքը գործնականում չի արձագանքում նրա հայտարարություններին:

«Մեր թիմը չի ցանկանում նոր պատերազմ», — ասել է նա՝ նշելով, որ պատերազմ կլինի, եթե այս իշխանությունները մնան պետության ղեկին: «Մենք տեսնում ենք, թե ինչպես Ադրբեջանն ու Թուրքիան մեզ չեն նկատում: Արժանապատիվ խաղաղության գաղափարը տեսանելի կդառնա ընտրություններից հետո առաջին իսկ օրերից:

1998 թվականից ի վեր Տեր-Պետրոսյանը Քոչարյանին մեղադրում է «պատերազմի կուսակցության» ղեկավար դառնալու մեջ, չնայած վերջինիս նախագահության շրջանը ամենախաղաղն է եղել: Այդպես կլինի նաեւ այս անգամ: Ցավում եմ, որ նա նման էժանագին մանիպուլյացիայի է դիմում», — հավելել է Սողոմոնյանը:

Այսօր շատ են փորձում դեմարկացիա, դելիմիտացիա տերմիններիով մեր ժողովրդին վախեցնել, բայց շատ կարևոր է արձանագրել, որ ցանկացած անկախ պետություն անխուսափելիորեն պետք է անցնի սահմանի դեմարկացիայի և դելիմիտացիայի աշխատանք, և մենք գնալու ենք այդ ճանապարհով։ Այս մասին «Քաղաքացիական պայմանագիր» կուսակցության՝ Վայոց Ձոր մարզի Արենի համայնքում կայացած քարոզարշավին հայտարարեց Նիկոլ Փաշինյանը։

Ներկաներից մեկն արձագանքեց, որ թուրքը մոտ է, ինչին ի պատասխան՝ Փաշինյանը շարունակեց․

«Որտե՞ղ է Ձեր բակում։ Մի րոպե, Դուք չեք որոշում՝ թուրքը որտեղ է գալու, նստի։ Հանգիստ մի հատ։ Ինչ վերաբերում է նրան, որ նայում է, 30 տարի թուրքը նայում է Այգեպար, Մովսես, Ներքին Կարմիրաղբյուր, Վազաշեն, Այգեհովիտ, Բերդավան, Կիրանց, Բերքաբեր համայնքներին, և պետք չէ խուճապ տարածել։ Էդ որ ասում եք՝ թուրքը գալու է, ձեր բակում նստելու է, «ղալաթ» է անելու, նստելու է, ոչ մի տեղ էլ չի նստելու»,-ասաց նա։

Մանրամասները՝ տեսանյութում։