«Մենք վերջին ճիգերն ենք գործադրում՝ կատարելու մեր նվիրական գործը՝ սրտով, սիրով ու հոգով բուժելու հիվանդին, կռիվ տալ հիվանդության դեմ ի շահ ժողովրդի։ Բայց մեր ուժերը լքում են մեզ»,- ՀՔԾ-ի դիմաց բողոքի ակցիայի ժամանակ ասաց Սամվել Սահակյանը՝ ընթերեցելով բժշկական հանրության մի շարք ներկայացուցիչների բաց նամակը՝ ուղղված ՀՔԾ պետ Սասուն Խաչատրյանին։ 

Սահակյանը հայտնեց, որ բժշկական հանրության թիվն օրեցոր ավելանում է, տեղեկացրեց, որ պրոֆեսոր Չարչյանի առողջական վիճակը վատթարացել է ու չի կարող ազդեցություն չունենալ բժշկական հանրության վրա։

«Հիվանդության դեմ պատերազմում մենք չենք ուզում պարտվել։ Պարոն Խաչատրյան, խնդրում, հորոդորում, պահանջում ենք՝ արեք ամեն ինչ, որ պրոֆեսոր Չարչյանը լինի ազատության մեջ, որ հիվանդության դեմ պատերազմում հաղթողը լինենք մենք։ Մեծահոգությունը հզորացնում է մարդուն։ Եղեք հզոր, արեք ամեն ինչ, որ Պրոֆեսոր Չարչյանը լինի մեր կողքին՝ ազատության մեջ, բուժի հիվանդին»։

Բժիշկները հավատում են ժողովրդավարությանը, հավատում արդար արդարադատությանը, մարդասիրությանը, հավատում են, որ մեծահոգություն են ցույց տալու։

«Պրոֆեսոր Չարչյանը չի խոչընդոտի գործի քննությանը՝ երաշխավորում ենք, չի խուսափի վարույթն իրականացնող մարմին ներկայանալուց՝ երաշխավորում ենք։ Մեզ զանգահարում և իրենց զորակցությունն են հայտնում արտերկրի անվանի բժիշկ, պրոֆեսորներ։

Պատասխանում ենք, որ մեր Հանրապետությունը ժողովրդավար է, մարդասիրական, փոքրոգությունը տեղ չունի մեր հայրենիքում»։

Դիմում են նաև պրոֆեսորի բուժած հիվանդները, Արցախյան պատերազմներում վիրավորված և բուժված հերոսները՝ իրենց աջակցույունն են հայտնում, բժիշկները նույն խոստումներն են հայտնում։

«Պարոն Խաչատրյան, արեք այնպես, որ խաբված չլինենք մեր խոստումներում։ Արեք այնպես, որ Պրոֆեսորը լինի ազատության մեջ, օգնեք մեզ, որ մենք հիվանդության դեմ մեր պատերազմում հաղթող լինենք»։

Բժիշկները բաց նամակը հրապարակելուց հետո հանձնեցին ՀՔԾ։

2021թ. հունիսի 28-ին՝ ժամը 11:02-ից մինչև 11:04-ն ընկած ժամանակահատվածում, առերևույթ հանցագործություն կատարած անձը, ուրիշի գույքը ավազակությամբ հափշտակելու նպատակով, մուտք է գործել Երևան քաղաքում գործող «Կրեդո Ֆինանս» ՈՒՎԿ ՓԲ ընկերության մասնաճյուղ և որպես զենք օգտագործվող, ատրճանակին նմանվող առարկայի գործադրմամբ, կյանքի համար վտանգավոր բռնություն գործադրելու սպառնալիքով, հարձակվել ընկերության աշխատակիցներ վրա, պահանջել գումար, այնուհետև պահանջել է բացել չհրկիզվող պահարանը,  որտեղից անձամբ հափշտակել է ընկերությանը պատկանող խոշոր չափերով, նախնական տվյալներով, 2.730.990 ՀՀ դրամ  գումար և դիմել փախուստի: Այս մասին հայտնում է ՀՀ  քննչական կոմիտեն։

Դեպքի առթիվ ՀՀ քննչական կոմիտեի Երևան քաղաքի քննչական վարչության Մալաթիա-Սեբաստիա վարչական շրջանի քննչական բաժնում հարուցվել է քրեական գործ՝ ՀՀ քրեական օրենսգրքի 175-րդ հոդվածի 2-րդ մասի 2-րդ և 4-րդ կետերով:

Նախաքննության ընթացքում կատարվել են անհրաժեշտ քննչական և դատավարական այլ գործողություններ՝ դեպքի վայրի զննություն, հարցաքննվել են մի շարք անձինք, քրեական գործով էական նշանակություն ունեցող հանգամանքներ պարզելու նպատակով նշանակվել է դատագենետիկական փորձաքննություն:

Նախաքննությունը շարունակվում է: Ձեռնարկվում են միջոցառումներ՝ դեպքի բոլոր հանգամանքները, ենթադրյալ հանցագործություն կատարած անձի ինքնությունը պարզելու, նրան հայտնաբերելու և վարույթն իրականացնող մարմնին ներկայացնելու ուղղությամբ: Հանձնարարություն է տրվել հետաքննության մարմնին:

Դեպքը կատարվել էր անցյալ տարվա աշնանը։ Նոյեմբերի 2-ին Ջրվեժ համայնքի մի բնակչուհի ոստիկանության Կոտայքի բաժնում հաղորդում էր տվել, որ հոկտեմբերի 31-ին, ժամը 13.00-ի սահմաններում, 35-ամյա ամուսինը Բալահովիտ գնալու նպատակով դուրս էր եկել տնից և չէր վերադարձել։ Այս մասին հայտնում է Ոստիկանության լրատվական ծառայությունը:

Որոնողական աշխատանքն արդյունք չտվեց, և նոյեմբերի 12-ին սպանության հատկանիշներով քրեական գործ հարուցվեց։

Բազմակողմանի միջոցառումների արդյունքում տեղեկություններ ստացվեցին, որ 35-ամյա տղամարդուն սպանել էր Բալահովիտ գյուղի 25-ամյա մի բնակիչ, որին հայտնաբերել չհաջողվեց։

Ապրիլի 28-ին քրեական ոստիկանության գլխավոր և Կոտայքի մարզային վարչությունների ծառայողները, փոխգործակցելով Կոտայքի բաժնի քրեական հետախույզների և նախաքննական մարմնի աշխատակիցների հետ, Հատիս գյուղի վարչական տարածքի դաշտում հայտնաբերեցին մարդու գլուխ և մարմին. հագուստը համընկնում էր անհետ կորած տղամարդու հագուստի հետ: Մինչ այդ կասկածյալի տան և ավտոտնակի խուզարկությամբ արնանման հետքեր էին հայտնաբերվել, որոնք, ըստ դատագենետիկական փորձաքննության, համընկնում էին դիակից վերցված փորձանմուշների հետ:

Հունիսի 14-ին Բալահովիտ գյուղի 25-ամյա բնակչի նկատմամբ սպանության մեղադրանքով հետախուզում հայտարարվեց։

Հարազատների հետ բացատրական աշխատանքի արդյունքում հունիսի 23-ին հետախուզվողը ներկայացավ ոստիկանության Կոտայքի բաժին։

Նա ներկայացվել է նախաքննական մարմնին։

Սպանության փաստով հարուցված քրեական գործի նախաքննությունը շարունակվում է։

Ռազմագերիների հարցով ՀՀ-ից փաստաբանների խումբ պետք է գնա, որն այնտեղ կծանոթանա ստեղծված իրավիճակին և կփորձի պարզել՝ արդյո՞ք մեր ռազմագերիների նկատմամբ տեղի չեն ունենում Եվրոպական կոնվենցիայի խախտումներ: Այս մասին Tert.am-ի հետ զրույցում ասաց փաստաբան Հայկ Ալումյանը՝ անդրադառնալով Բաքվում 14 հայ ռազմագերիների գործով դատավարության գործընթացին:

«Այդուհետ, եթե այդպիսի խախտումներ տեղի են ունենում, ապա նրանց հետ քննարկել Եվրոպական դատարան դիմելու հարցը: Խոսքը չի վերաբերում Ադրբեջանի նեպետական դատարանններում մեր ռազմագերիների պաշտպանությանը, որովհետև Ադրբեջանի դատարանները այս իրավիճակում ակնհայտորեն չեն կարող  մեր ռազմագերիներին տրամադրել արդյունավետ պաշտանության միջոց: Այդ դատավարությունները, իմ տպավորությամբ, ուղղակի լեգիտիմության շղարշ են ստեղծում, այնինչ դատավճիռները հավանաբար վաղուց արդեն համաձայնեցված են»,-ասաց Ալումյանը:

Ըստ փաստաբանի՝ ՀՀ-ից գնացող փաստաբաններն Ադրբեջանում կարող են անարգել հանդիպել մեր քաղաքացիներին, որ պարզեն՝ Եվրոպական կոնվենցիայի խախտումներ նրանց նկատմամբ տեղի ունեցե՞լ են, այս ընթացքում տեղ ունենու՞մ են, և, եթե այդպիսի խախտումներ կան, ապա քննարկեն Եվրոպական դատարան դիմելու հարցը:

«Բացի այդ, շատ կարևոր է, որ մեր ռազմագերիներն այնտեղ տեսնեն ու հասկանան, որ իրենց հայրենիքն իրենց չի մոռացել, չի թողել ադրբեջանցիների քմահաճույքին, և իրավաբանները, որոնք իրենք կարող են վստահել, պատրաստ են պաշտպանել իրենց շահերը»,-ասաց նա:

Վերջինս ընդգծեց՝ թեև Ադրբեջանում ռազմագերիներից յուրաքանչյուրին տրամադրվել է փաստաբան՝ պետության հաշվին, բայց ակնհայտ է, որ եթե նունիսկ նա ամենաբարեխիղճ փաստաբանը լինի, միևնույն է, եթե պաշտպան-պաշտպանյալ հարաբերություններում չկա լիարժեք վստահություն, արդյունավետ պաշտպանություն չի կարող լինել:

«Հասկանալի է, որ ստեղծված իրավիճակում լիարժեք վստահություն չի կարող ձևավորվել պաշտպան-պաշտպանյալ հարաբերություններում: Եթե դրան էլ գումարենք, թե այնտեղ ինչ ընդհանուր մթնոլորտ է հայերի նկատմամբ, մենք հասկանում ենք, որ այնտեղի պաշտպանությունն ու դատարանները արդյունավետ միջոցներ չեն»,-ասաց նա:

Ալումյանն ընդգծեց՝ Եվրոպայի խորհրդի անդամ ցանկացած պետություն, եթե իր իրավազորության տակ գտնող որևէ անձ մտադրված է դիմել Եվրոպական դատարան, ապա պարտավոր է նրա կամ նրա հարազատների ցանկությամբ ընտրված փաստաբանին թույլատրել անարգել տեսակցել տվյալ անձի հետ, և կապ չունի՝ որ երկրի փաստաբանն է: «Դա կարող է արվել բացառապես նրանց հարազատների ցանկության դեպքում, առանց հարազատների ցանկութան որևէ փաստաբան իրավունք չունի որևէ քայլ ձեռնարկել»,-կարևորեց Հայկ Ալումյանը:

Նոր Գեղիիից Արմեն Մելքոնյանը հանրային սննդի ոլորտում էր աշխատում, երբ համավարակի պատճառով կորցրեց աշխատանքը։ Երկու ամիս էր, ինչ երեք անգամ պակաս աշխատավարձով նոր աշխատանքի էր ընդունվել, երբ լսեց պատերազմի լուրը։ Հոկտեմբերի 5-ին կամավորագրվեց ու մարտական պատրաստություն անելուց հետո՝ հոկտեմբերի 11-ին, արդեն Հադրութում էր։

Պատերազմի օրերին հանգիստ չէր տալիս առաջնագծի անկազմակերպ վիճակը, այսօր արդեն համադրելով դրվագներն ասում է՝ մի բան հասկացա՝ մեզ տարել էին սպանելու.

«Եղել է բարդակ, անկազմակերպ վիճակ։ Մի ստորաբաժանման մի մասը մի տեղ էր, մյուսները՝ մեկ այլ, ռացիային պատասխանող չի եղել։ Անտառում գիշերեցինք, մի քանի անգամ սպայական կազմին հարցրեցի՝ ինչի՞ն ենք սպասում, ասում էին՝ հլը կտենանք, չգիտեմ, սպասում ենք հրամանին։ Մի բան հասկացա՝ մեզ տարել էին սպանելու՝ մարդաքանակ ապահովելու»,- «Փաստինֆո»-ին պատմեց կամավորը։

Հադրութում մարտական գործողությունները կատարելուց հետո՝ մի քանի օր անց տեղափոխվել են Ստեփանակերտ, որտեղ տեղեկացել են, թե նոր գումարտակ է ձևավորվում՝ Աղդամի ուղղությունը պահելու համար։ 17 կամավոր անդամագրվել էր՝ անցնելու պաշտպանական գործին։

«Տանկային գրոհ էին պատրաստվում անել։ Ամսի 18-ն էր՝ 17 հոգի կամավորագրվեց, Ասկերանում մի գիշեր անց ասացին՝ գնում եք արձակուրդ։ Հայաստան եկանք 5 օրով։ Ամսի 24-ին հետ գնացինք», — ասաց Արմենը:

2 օր Բալուջայի զորամասում մնալուց հետո ստացել են հաջորդ՝ ամենաբարդ մարտական առաջադրանքը՝ մասնակցել Շուշիի ինքնապաշտպանական մարտերին։ Պատերազմի անմիջական մասնակիցը վստահեցնում է՝ Շուշիում ադրբեջանական բանակն այլևս մարտունակ չէր։

«Բոլոր գործողությունները խայտաբղետ էին, կոնկրետ առաջադրանք քիչ ենք ստացել։ Շուշիի մարտերի ժամանակ, եթե զորքի վերախմբավորում արվել, եթե հակահարձակում լիներ` կհաղթեինք։ Ադրբեջանական բանակը հյուծված էր»։

Արմենն ու զինակիցները Շուշիի ինքնապաշտպանությանն ակտիվ մասնակցություն չեն կարողացել ունենալ, որովհետև անընդհատ ստանում էին տեղափոխվելու հրամաններ։ Պատերազմում վերջին մասնակցությունը Քարին տակում էր։ Արմենն ասում է՝ ամեն ոլորտում անկազմակերպվածությունը ծանր հետևանքներ է թողնում, ռազմի դաշտում՝ առավել ևս։

«Մի տեղից տեղափոխում էինք մեկ այլ տեղ։ Դիրքավորվում էինք, հետ էին կանչում, կամազով գնում էինք ուրիշ տեղ։ Անտառում էինք դիրքավորվում։ Մնացինք հրետակոծության տակ։ Տարան Քարին Տակ նոյեմբերի 1-ի լույս 2-ի գիշերը։ Թշնամու հատուկ նշանակության ստորաբաժանման 400 հոգի պետք է գային, բայց տեղի ունեցավ հրետակոծություն»։

Ինտենսիվ հրետակոծության ժամանակ վիրավորվել է նաեւ կամավորը։ Երկու զոհ, երեք ծանր, երկու թեթև վիրավորների թվում էր նաև ինքը։ Հրետակոծությունից պաշտպանվել ամբողջովին չստացվեց՝ Արմենն այտոսկրից վիրավորում ստացավ։ Բեկորային վիրավորում ստանալուց հետո Ստեփանակերտից Երևան է տեղափոխվել ու վիրահատվել։ Այտոսկրի իմպլանտ է տեղադրվել, իսկ վիրահատությունից հետո մնացած սպին նրան ամբողջ կյանքը կհիշեցնի՝ անցած ուղին։

Պատերազմից հետո Արմենը միանվագ 500 հազար դրամ աջակցություն է ստացել։ Բայց  մինչ օրս վիրավոր կամավորին հաշմանդամության կարգ չի տրվել։

«Հայաստան» և «Պատիվ ունեմ» դաշինքների ու «Զարթոնք» ազգային քրիստոնեական կուսակցության դիմում–բողոքների քննարկման արդյունքում ԿԸՀ–ն այսօրվա նիստում որոշեց մերժել դրանք։

ԿԸՀ նախագահ Տիգրան Մուկուչյանը, ներկայացնելով հանձնաժողովի որոշումը, հայտնեց, որ ընտրության արդյունքներն անվավեր ճանաչել կարելի է միայն այն դեպքում, երբ թույլ տրված խախտումները բացառեն ընտրության իրական արդյունքները ճշգրտորեն որոշելու հնարավորությունը։

Այսինքն` խախտումների պարզ թվարկումը բավարար չէ։ Պահանջվում է ապացուցել, որ այդ խախտումների արդյունքում հնարավոր չէ  պարզել  ընտրության իրական պատկերը»,– ասաց Մուկուչյանը։

ԿԸՀ–ն միաձայն քվեարկությամբ հաստատեց երեք քաղաքական ուժերի դիմումները մերժելու որոշումը։

Նշենք, որ դիմում ներկայացրած քաղաքական ուժերը, ներկայացնելով նախընտրական քարոզչության, ընտրությունների ու քվեների հաշվարկի ընթացքում տեղի ունեցած խախտումների դեպքերն ու միջադեպերը, ինչպես նաև պետական ռեսուրսի չարաշահման վերաբերյալ իրենց դիտարկումները` ԿԸՀ–ին պահանջ էին ներկայացրել ընտրությունների արդյունքներն անվավեր ճանաչել և ԱԺ ընտրությունների վերաքվեարկություն նշանակել։

Դիմումատուներից ԿԸՀ նիստին ներկա էր ու քաղաքական ուժի դիրքորոշումը ներկայացրեց միայն «Հայաստան» դաշինքի լիազոր ներկայացուցիչ Արամ Վարդևանյանը։

Մեր կողմից ներկայացված դիմումը տարբերվում էր նրանով, որ մենք փորձել ենք ներկայացնել հարցը ոչ թե բուն քվեարկության օրվա տրամաբանության մեջ, այլ ընտրական գործընթացի ամբողջ շղթայի մեջ, քանի որ կարծում ենք՝ հենց այս ընտրություններում ամբողջ շղթայի բացահայտումն է, որ առանցքային նշանակություն ունի, թե ինչ տեսակի, այդ թվում՝ համակարգված խախտումներ են տեղի ունեցել: Այս մասին արտահերթ ընտրությունների արդյունքների ամփոփման ժամանակ ասաց «Հայաստան» դաշինքի ներկայացուցիչ  Արամ Վարդեւանյանը:

«Մենք գործ ենք ունեցել մի իրավիճակի հետ, երբ սահմանադրական կարգավորումների իմաստով անձը, որը զբաղեցնում է բարձրագույն պաշտոնը, հրաժարվում է այդ պաշտոնի կատարումից, բայց բոլոր դեպքերում շարունակում է պաշտոնավարել, այդ թվում` արտահերթ խորհրդարանական ընտրությունների ժամանակահատվածում։ Գրեթե բոլոր տեսանյութերի ուսումնասիրությունը ցույց է տալիս, որ անձինքն, մասնակցելով հանրային հավաքներին, մշտապես օգտագործում էին «հանդիպում վարչապետի հետ» եզրույթը։ Այսինքն բոլոր դեպքերում նշված պաշտոնի և դրանից բխող հետրանքների ազդեցությունը ամեն կերպ օգտագործվում էր։ Բացի այդ, ցանկանում եմ տեղեկացնել, որ ընտրական գործընթացների ողջ շրջանում առաջին անգամ Հայաստանի Հանրապետությունում որպես իրավական փաստ արձանագրվեց իշխող ուժի կողմից վարչական ռեսուրսի չարաշահման հանգամանքը՝ Վարչական դատարանի կողմից կայացված վճռով»,-ասաց նա։

Վարդեւանյանի խոսքով` մյուս հանգամանքն այն է, որ շատ կարճ ժամանակահատված կազմող արտահերթ խորհրդարանական ընտրությունների նախընտրական քարոզչության ժամանակահատվածը մի քանի օր պարունակել է բարձրագույն պաշտոն զբաղեցնող անձի կողմից ատելության խոսքի ուղղակի քարոզ։

«ԿԸՀ նախագահը չներկայացրեց այն բառապաշարը, որ օգտագործվել էր, ես ևս զերծ կմնամ դրանից, բայց փաստը մնում է փաստ, որ մի քանի օր շարունակ նման տեսակ արտահայտություններ են հնչել, դրանք ամեն կերպ տարածվել են, և պատկերացրեք՝ ընտրողների կամարտահայտության վրա դրանք ինչպիսի ազդեցություն կարող էին ունենալ և ունեցել են։ Վարչական դատարանը շատ հստակ նման հանգամանքը դիտարկել է ընտրական օրենսդրության խախտումների լույսի ներքո, այդ թվում՝ արձանագրելով ԿԸՀ անգործությունը»,-ասաց նա։

Ըստ Վարդեւանյանի` մյուս հանգամանքը վերաբերում է զինծառայողների քվեարկությանը:

«Առնվազն այն տվյալները, որ հրապարակված են, որ փորձում ենք ուսումնասիրել, վերաբերում են զինծառայողների կողմից քվեարկությանը, կարծես թե թիվը կազմում է 10933, բայց ես չեմ կարող չօգտագործել «կարծես թե» եզրույթը, քանի որ ամբողջ գործընթացը գաղտնի է պահվում, այսինքն մենք որևէ հնարավորություն պատշաճ վերահսկողության կամ կանխարգելիչ գործողությունների իրականացման չենք ունեցել։ Մինչ քվեարկության օրը ներկայացվել էր նաև գրություն ԿԸՀ նախագահին, որով փորձ էր արվել ստանալ տեղեկատվություն, թե զինծառայողները որ տեղամասերում են քվեարկելու, որը ևս գաղտնի է պահվել։ Անձինք մասնակցում են անձնագրով կամ անձնագրին հավասարեցված նույնականացման քարտով։ Բայց մենք ունենք իրավիճակ, երբ օրինակ զինծառայողները քվեարկում են զինվորականվորական գրքույկով, որը ո՛չ անձնագիր է, ո՛չ նույնականացման քարտ, չունի դրանց բնորոշ պաշտպանիչ միջոցներ, և դրան զուգահեռ մենք ունենք բազմաթիվ ահազանգեր և տեսանյութեր, երբ զինծառայողներին ոչ թե ուղղորդում, այլ հրամայում են՝ ինչպես քվեարկեն: Շատ է քնարկվել, որ պետք է բացառել ընտրական տեղամասի մոտ կուտակումները, ավտոմեքենայով մարդկանց ընտրատեղամասեր տանելը։ Իհարկե, դրա ուղղությամբ միջոցներ ձեռնարկվել են, բայց զինծառայողները հենց այդ իրավիճակում են․ ավտոմեքենայով բերվում են ընտրական տեղամաս, քվեարկում են զինվորական ավելի բարձր կոչում ունեցողի ուղեկցությամբ, ազդեցությամբ»,-ասաց նա:

Հաջորդ խնդիրը, «Հայաստան» դաշինքի ներկայացուցչի խոսքով այն է, որ ընտրություններին մասնակիցներից 100 հազարից ավելիի անձնագիրը չի աշխատել:

«Նորություն չէ, որ ընտրական ռեգիստրը և ցուցակները ուռճացված են։ Դա համակարգային խնդիր է, բայց մյուս կողմից ունենք իրավիճակ, երբ ընտրություններին մասնակցել է 49 տոկոսը և այդ մասնակիցներից 100 հազարից ավելիի անձնագիրը չի աշխատել, սա կարող է տարատեսակն ընտրակեղծարարական մեխանիզմների իրագործման գործիք լինել։Առնվազն տարակուսելի է, թե ինչպես է ստացվում, որ ընտրական տեղամասերում, որոնցից որևէ մեկում վերահաշվարկ կատարվել է, «Հայաստան» դաշինքի ձայները շատանում են։ Նաև առհասարակ ընտրական իրավունքի իրացման մասով խնդիրները, որոնք Անձնագրային և վիզաների վարչությունն առաջացրեց։ Խոսքը հատկապես գնում է Արցախի Հանրապետությունից ստիպված Հայաստանի Հանրապետություն տեղափոխված մարդկանց մասով։ 100-ավոր, հազարավոր մարդկանց պարզապես թույլ չեն տվել մասնակցել ընտրություններին, բայց որոշներին էլ թույլ են տվել»,- ասաց նա։ 

ԿԸՀ նախագահ Մուկուչյանը, արձագանքելով այն դիտարկմանը, թե զինծառայողները քվեարկությանը մասնակցել են զինգրքույկներով, նշեց, որ միշտ է այդպես եղել, և նրանց համար զինգրքույկը անձը հաստատող փաստաթուղթ է:

Վարդևանյանը պատասխանեց՝ պետության կողմից իր գործողությունների կատարման տեսանկյունից եղել է թերություն.«Պետք էր մտածել մեխանիզմներ՝ ինչպես զինծառայողների ընտրության հարցն ապահովել, որ չլինեն 100 հազարից ավելի անձնագրեր, որոնք չեն աշխատում, որ չլինի այդ աստիճան մեծ ընտրական ցուցակ: Քարոզարշավի 12 օրերից 7-ի ընթացքում խոսում էր վենդետաների, գլխից խփելու, ասֆալտին փռելու մասին, դրան զուգահեռ՝ վարչական ռեսուրսների չարշահումներ»:

Վարդեւանյանը հավելեց, որ իրենց դիրքորոշումը հստակ է Սահմանադրական դատարանում նշված հարցերը համակցության մեջ և առանձին-առանձին բարձրաձայնելու են։

ՀՀ մարդու իրավունքների պաշտպանին է դիմել միջազգային լրատվամիջոցի լրագրողը, որը ՀՀ Գեղարքունիքի մարզի Վերին Շորժա գյուղի հարևանությամբ սպառնալիքներ է ստացել ադրբեջանական զինված ուժերի ծառայողների կողմից: ՀՀ ՄԻՊ-ը տեղեկացնում է, որ դեպի ՀՀ պետական սահմանն ընկած հատվածում ադրբեջանական զինված ուժերի ծառայողները հրազենով, այդ թվում՝ դիպուկահարի կողմից սպառնացել են սպանել միջազգային լրատվամիջոցի լրագրողին։

Ահազանգի հիման վրա պարզվել է, որ միջադեպը տեղի է ունեցել 2021թ. հունիսի 15-ին, երբ միջազգային լրագրողը մեկ այլ լրագրողի հետ լուսաբանման և լրագրողական այլ աշխատանքներ է իրականացրել Հայաստանի պետական սահմանից 2 կիլոմետր հեռավորության վրա՝ դեպի երկրի ներսն ընկած տարածքում. կոնկրետ այն վայրում, որտեղ մոտ 600 մետրի տարբերությամբ տեղակայված են հայկական ու ադրբեջանական զինված ուժերը։ Այսինքն՝ խոսքը վերաբերում է ՀՀ տարածքում կատարված միջադեպին, իսկ ինքը լրագրողը գտնվել է ադրբեջանական դիրքերից մոտ 100 մետր հեռավորության վրա:

Լրագրողը մասնագիտական աշխատանք իրականացնելու պահին նկատել է, որ ադրբեջանական զինված ուժերի ծառայողներն ագրեսիվ պահվածք են ցուցաբերում, լսել է գոռգոռոցներ, այնուհետև նկատել է, որ նրանք լիցքավորում են իրենց զենքերը և պահում իր ուղղությամբ՝ սպառնալով կրակել։

Չհասցնելով արձագանքել՝ նկատել է, որ ևս մեկ ադրբեջանական զինված ծառայող սկսել է ավելի ագրեսիվ ու անկանոն վարքագիծ ցուցաբերել և իր վրա է պահել դիպուկահար հրազեն ու սպառնացել է սպանել դիմահար կրակոցով։ Անկանխատեսելի հետևանքներից խուսափելու նպատակով միջազգային լրագրողը դադարեցրել է աշխատանքը։

Միջազգային լրատվամիջոցի լրագրողը տեղեկացրել է, որ իրենք ունեցել են ադրբեջանական զինված ուժերի համար տեսանելի տարբերանշան, որ իրենք մամուլի ներկայացուցիչ են և պահպանել են լրագրողական աշխատանքի բոլոր կանոնները: Ընդ որում, Մարդու իրավունքների պաշտպանը պարզել է, որ լրագրողն ունի կոնֆլիկտային և հետկոնֆլիկտային գոտիներում մասնագիտական աշխատանքի մեծ փորձ:

Ակնհայտ է, որ ադրբեջանական զինված ծառայողների համար պարզ է եղել, որ իրենք սպառնում են սպանել մասնագիտական աշխատանք կատարող լրագրողի:

Ադրբեջանական զինված ուժերի ծառայողներն այդ կերպ ակնհայտ նպատակ են ունեցել խոչընդոտել միջազգային լրագրողի աշխատանքը և կանխել նրա կողմից Հայաստանի ինքնիշխան տարածք ադրբեջանական ապօրինի ներխուժումը հաստատող փաստերի տարածումը։ Միջադեպի առնչությամբ լրագրողը դիմել է «Լրագրողներ առանց սահմանների» միջազգային կազմակերպությանը, որն արդեն հրապարակում է արել այս փաստի մասին:

Մարդու իրավունքների պաշտպանը բազմիցս է նշել, որ ՀՀ Գեղարքունիքի և Սյունիքի մարզերի գյուղերի անմիջական հարևանությամբ, Սյունիքի մարզի համայնքների միջև ճանապարհներին, իսկ մայիսի 12-ից նաև ՀՀ ինքնիշխան տարածքում ադրբեջանական զինված ծառայողների ակնհայտ ապօրինի ներկայությունը, նրանց բացահայտ հանցավոր արարքները կոպտորեն խախտել են ՀՀ սահմանային գյուղերի բնակիչների իրավունքները, լրջորեն վտանգել են նրանց կյանքն ու առողջությունը, ամբողջությամբ խաթարել մարդկանց բնականոն կյանքը: Ադրբեջանական զինծառայողների անօրինական արարքներից մարդկանց պաշտպանելու համար Ադրբեջանի հետ սահմանային բոլոր հատվածներով պետք է ստեղծվի անվտանգության գոտի:

Այս կոնկրետ միջադեպի հետ կապված՝ միջազգային լրագրողի անձնական պաշտպանության անհրաժեշտությունից ելնելով՝ ՀՀ մարդու իրավունքների պաշտպանը նրա վերաբերյալ տվյալներ չի հրապարակում, բայց դրանք Պաշտպանին ահազանգ ներկայացրած միջազգային լրագրողի հետ համատեղ քննարկմամբ կներկայացվեն միջազգային համապատասխան մարմիններին:

Քաղաքական վերլուծաբան Վարդան Բալյանը ֆեյսբուքյան գրառմամբ ուշադրություն է հրավիրել Հայաստանում արտահերթ խորհրդարանական ընտրություններին հետևած իրադարձություններին.

«Ընտրությունների ավարտից անմիջապես հետո տեղի ունեցավ հեռախոսազրույց Ալիևի և Պուտինի միջև, որի ընթացքում կողմերը ընդգծեցին տարածաշրջանային տնտեսական կապերի վերականգնման և զարգացման կարևորությունը և կոմունիկացիաների ապաշրջափակման անհրաժեշտությունը` հղում անելով նոյեմբերի 9֊ի եռակողմ հայտարարությանը։

Հունիսի 26֊ից հուլիսի 1֊ը Մոսկվա կմեկնի հայկական պաշտոնական պատվիրակություն։ Առկա տեղեկատվական հոսքերը վկայում են ռուսներին նոր ռազմական բազայի տեղակայման համար հողատարածքների փոխանցման մասին, ըստ որում, Զանգեզուրից բացի ռուսները ամենայն հանավանականությամբ կտեղակայվեն Գեղարքունիքի մարզում։

Կառավարությունը օրերս միջոցներ հատկացրեց դեպի Թուրքիայի սահման ճանապարհի վերանորոգման համար։ Ավելի վաղ, հաստատվել էր Մ֊2 մայրուղուց դեպի Սիսիանի շրջանի Անգեղակոթ գյուղ ավտոճանապարհի վերանորոգման ծրագիրը, որի համար ֆւնանսական հատկացումները նախատեսված են ընթացիկ տարվա պետական բյուջեով։ Սա այն ճանապարհն է, որ Ադրբեջանը կապելու է Նախիջևանին Սիսիանի տարածքով։

Առաջիկայում սպասվում է Էրդողանի այցը Մոսկվա, որի նախապատրաստության ընթացքում կողմերը վերահաստատում են իրենց միասնական դիրքորոշումը տարածաշրջանային խնդիրների, առաջին հերթին Արցախի հարցի լուծմանը երրորդ երկրների ակտիվ ներգրավման դեմ։

Թուրքական, ադիբեջանական և ռուսական տեղեկատվական ռեսուրսները հայտարարում են, որ հայկական կառավարության ձևավորումից անմիջապես հետո Մոսկվայում տեղի է ունենալու Հայաստանի, Ադրբեջանի և Ռուսաստանի մասնակցությամբ միջկառավարական հանձնաժողովի նիստ, որի ընթացքում պետք է լուծվեն տրանսպորտային կոմունիկացիաների ապաշրջափակման խնդիրը, այդ թվում` Զանգեզուրի միջանցքի։ Ըստ որում, բաց տեքստով Զանգեզուրի միջանցքի թեման փոխկապակցում են Լաչինի միջանցքի հետ։

Ադրեջանցիները չեն թաքցնում իրենց ոգևորությունը սեպտեմբերի 27֊ին ընդառաջ Հայաստանի և Ադրբեջանի միջև խաղաղության պայմանագրի մաս հանդիսացող սահմանների խնդրի կարգավորման կապակցությամբ, որով ենթադրվում է Հայաստանի կողմից Ադրբեջանի տարածքային ամբողջականության ճանաչում։

Ահա այս ամենի համատեքստում Փաշինյանը հանրային֊քաղաքական կոնսենսուսի ձևավորման իմիտացիոն գործընթաց է մեկնարկել քաղաքականության հետ կապ չունեցող անկապ կուսակցությունների և գործիչների հետ»։

Ադրբեջանի նախագահ Իլհամ Ալիեւը հայտարարել է, որ ղարաբաղյան հակամարտությունը կարգավորված է, հաղորդում է Ինտերֆաքսը:

«Ներկայում մենք գտնվում ենք հետկոնֆլիկտային զարգացման փուլում: Լեռնային Ղարաբաղի հակամարտությունը լուծված է եւ անհրաժեշտություն չկա բանակցել այդ հարցի շուրջ»,-ուրբաթ Բաքվում Ռումինիայի, Ավստրիայի եւ Լիտվայի ԱԳՆ ղեկավարների հետ հանդիպման ժամանակ ասել է Ալիեւը:

Նա նշել է, որ 2020 թվականի նոյեմբերի 10-ին Ադրբեջանի, Հայաստանի եւ Ռուսաստանի առաջնորդների կողմից ստորագրված եռակողմ հայտարարությունը, ինչպես փորձում են այն ներկայացնել միջազգային քաղաքական գործիչները, միայն հրադադարի մասին չէ:

«Նա, ով կկարդա այդ փաստաթուղթը, կտեսնի, որ այն անդրադառնում է մի շարք այլ հարցերին: Մենք պետք է մտածենք հետկոնֆլիկտային իրավիճակի մասին: Մենք շրջել ենք այդ էջն ու պատրաստ ենք առաջ գնալ եւ մեր ներդրումն ունենալ տարածաշրջանային կայունության գործում»,-հավելել է Ալիեւը:

«Հայաստանի կառավարությունն անտեսում է իրենց հետ խաղաղ համաձայնագրի հարցով բանակցություններ սկսելու մասին մեր ցանկացած հայտարարությունները: Սակայն չի բացառվում, որ նախընտրական իրավիճակն է, որ չի նպաստել այդ հայտարարություններին: Բայց այժմ՝ Հայաստանում ընտրություններից հետո, մենք հույս ունենք, որ դրական պատասխան կստանանք»,-ասել է Ալիեւը:

Ադրբեջանի նախագահն ընդգծել է, որ պաշտոնական Բաքուն բազմիցս հայտարարել է հետպատերազմական իրավիճակից Հարավային Կովկասում խաղաղ զարգացմանն անցում կատարելու ցանկության մասին:

«Ցավոք, մենք երբեք չենք լսել այդօրինակ որեւէ արձագանք Հայաստանի կառավարությունից: Եթե մենք չունենք Հայաստանի հետ խաղաղ համաձայնագիր, նշանակում է չունենք նաեւ խաղաղություն: Չկա խաղաղություն ոչ միայն երկու երկրների միջեւ, այլ նաեւ ամբողջ Հարավային Կովկասում: Մեզ խաղաղություն է անհրաժեշտ եւ կայուն զարգացում, կանխատեսում, պատերազմի զրոյական ռիսկ, մեզ պատերազմ պետք չէ: Մեզ նախկինում եւս պատերազմ պետք չէր»,-ընդգծել է Ալիեւը:

Նախագահը նաեւ հույս է հայտնել, որ ԵՄ երկրների ԱԳՆ ղեկավարները կքննարկեն այդ հարցը Հայաստանի ղեկավարության հետ Երեւան կատարվելիք նրանց հաջորդող այցի ժամանակ:

«Որքանով ես հասկանում եմ, ձեր այցը տարածաշրջան նվիրված է Հայաստանի եւ Ադրբեջանի միջեւ հետկոնֆլիկտային իրավիճակին: Այլ խոսքով՝ հետպատերազմական իրավիճակը կարեւոր է, քանի որ ես կարծում եմ, որ այս տարի եւ հաջորդ տարի կմշակվեն հիմնարար մոտեցումները հետպատերազմական իրավիճակի շուրջ: Ադրբեջանի դիրքորոշումը շատ հստակ է ու պարզ»,-ասել է Ալիեւը:

Ռումինիայի ԱԳ նախարար Բոգդան Աուրեսկուն պատասխանել է, որ տարածաշրջանում ԵՄ երեք երկրների արտաքին գործերի նախարարների այցի նպատակն է «վճռորոշ ուղերձ հղել տարածաշրջանի կայունության ու անվտանգության ապահովման հարցում աջակցության մասին, ինչպես նաեւ մտածել, թե ինչպես է հնարավոր աջակցություն ցուցաբերել հետպատերազմական շրջանում ծառացած բոլոր խնդիրների համապարփակ լուծման համար»:

Նա հայտարարել է, որ ԵՄ-ն շահագրգռված է շատ ավելի սերտ համագործակցություն հաստատել տարածաշրջանի հետ, մասնակցել հակամարտությունների կարգավորման հարցում, իսկ ղարաբաղյան հակամարտության դեպքում ակտիվացնել ջանքերը հետպատերազմական ընթացքում զարգացման գործընթացներում ներգրավվելու համար: