Դատախազության գործառույթների իրականացման շրջանակում պարզվել է, որ վերջին ժամանակահատվածում արձանագրված մի շարք ինքնասպանության և ինքնասպանության փորձ կատարելու դեպքեր ուղղակի առնչություն ունեն Հայաստանի Հանրապետության և Արցախի Հանրապետության դեմ 2020թ.-ին սանձազերծված պատերազմի արդյունքում անձանց մոտ առաջացած հոգեբանական խնդիրների հետ:

Գլխավոր դատախազությունից մանրամասնում են, որ մայիսի 3-ին Երևան քաղաքի Հալաբյան փողոցի շենքերից մեկում կատարված ինքնասպանության դեպքի առթիվ նախապատրաստված նյութերով պարզվել է, որ 1975թ.-ին ծնված անձը, որը պատշգամբից նետվելու միջոցով ինքնասպանություն է գործել, որպես դիպուկահար, կամավորական հիմունքներով «Աջափնյակ» ջոկատի կազմում մասնակցել է 44-օրյա պատերազմին, գտնվել Հադրութում, Մարտակերտում՝ ողնաշարի և ոտքի շրջաններում ստանալով մարմնական վնասվածքներ: Պարզվել է, որ վերջինս մարտի դաշտում բազմաթիվ զոհեր է տեսել, կորցրել ընկերներին, պատերազմից վերադառնալուց հետո գտնվել դեպրեսիոն հոգեվիճակում, անընդհատ օգտագործել ալկոհոլ և 2021թ.-ի մարտ և ապրիլ ամիսներին ինքնասպանություն գործելու փորձեր կատարել:

Մեկ այլ՝ 2021թ. մայիսի 10-ին  Երևան քաղաքի Բաբաջանյան փողոցի շենքերից մեկում բնակարանի պատուհանից նետվելու միջոցով կատարված ինքնասպանության դեպքի առթիվ նախաձեռնված քրեական վարույթի շրջանկաում պարզվել է, որ ինքնասպանություն գործած անձի որդին՝ ժամկետային զինծառայողը, մասնակցել է 44-օրյա պատերազմին՝ լինելով ամենաթեժ կետերում՝ Շուշիում, Լիսագորում, Քարինտակում: Պատերազմի ընթացքում որոշ ժամանակ որդուց որևէ տեղեկություն չունենալով, տեղյակ լինելով նրա ընկերների զոհվելու մասին, հայրն այցելել է տարբեր դիահերձարաններ՝ փորձելով որոնել ու գտնել նրա դիակը, որի արդյունքում հոգեկան ներաշխարհը խաթարվել է:

Բացի այդ, 2021թ. ապրիլի 26-ին Արտաշատ քաղաքի Իսակովի փողոցի շենքերից մեկի բնակիչ, 1993թ. ծնված անձը զանգահարել է ԱԻՆ և հայտնել, որ կյանքին վերջ տալու նպատակով գտնվում է Երևան քաղաքի «Կիևյան» կամրջի մոտ: Դեպքի առթիվ նախապատրաստված նյութերի ընթացքում նա բացատրություն է տվել այն մասին, որ կամավորական հիմունքներով մասնակցել է 2016թ. ապրիլյան և 2020թ. Արցախյան երկրորդ պատերազմի ռազմական գործողություններին: Պատերազմի ավարտից հետո չի կարողանում քնել, աչքերին զոհված զինծառայողների դիակներ են երևում, մշտապես վախի զգացողություն ունի, չի կարողանում քնել ու ապրելու ցանկություն չունի:

Դատախազությունից նշում են, որ այսինքն՝ պատերազմը, ինչպես օրինաչափորեն բնորոշ է նմանատիպ իրավիճակներին, բացասական ազդեցություն է գործում մարդկանց, հատկապես պատերազմի մասնակիցների, զոհերի և անհայտ կորած անձանց ընտանիքների անդամների՝ պատերազմի, որպես սոցիալական արհավիրքի, աղետաբեր հետևանքների անմիջական կրողների հոգեկան առողջության վրա՝ հանգեցնելով տարբեր հոգետրավմատիկ իրավիճակների, ընդհուպ՝ հոգեբանական տարբեր խանգարումների: Հոգեբանական նշված խնդրի ազդեցությունը կարող է լինել բավականին երկարատև և դժվար հաղթահարելի, եթե դրա չեզոքացման համար ձեռնարկվող միջոցառումները չլինեն բազմակողմանի և համալիր, այսինքն նշված անձինք առանձնահատուկ հոգածության կարիք ունեն:

Հոգեբանական վերոնշյալ խնդիրների պատճառների և հետևանքների վերլուծությունը, ինչպես նաև դրանց լուծմանն ուղղված գործողությունները ՀՀ դատախազության համար էական են՝ հաշվի առնելով հետպատերազմյան ողբերգական հետևանքները նվազագույնի դարձնելու անհրաժեշտությունը:

Ելնելով վերոնշյալից, խնդրի լուծման հրատապությունից և սոցիալական նշանակությունից՝ ՀՀ գլխավոր դատախազ Արթուր Դավթյանը գրությամբ դիմել է ՀՀ պաշտպանության նախարարի պաշտոնակատարին և ՀՀ աշխատանքի և սոցիալական հարցերի նախարարին՝ առաջարկելով վերը թվարկված դեպքերը քննարկման առարկա դարձնել պատերազմի հետևանքով առաջացած հոգեբանական խնդիրների լուծմամբ զբաղվող մասնագիտական շրջանակների հետ, առավել արդյունավետ և ընդգրկուն դարձնել պատերազմական գործողություններին անմիջական մասնակցություն ունեցած և նրանց ընտանիքների անդամներին տրամադրվող հոգեբանական և հոգեբուժական առաջնային օգնությունը: Առաջարկվել է նաև ընդլայնել հոգեկան առողջության պահպանմանն ուղղված ծառայությունների տրամադրումը:

ՀՀ քննչական կոմիտեի հատկապես կարևոր գործերի քննության գլխավոր վարչությունում ավարտվել է համակարգչային տեխնիկայի օգտագործմամբ առանձնապես խոշոր չափերով հափշտակություն կատարելու դեպքի առթիվ հարուցված քրեական գործից անջատված մասով նախաքննությունը: Այս մասին հայտնում է ՀՀ քննչական կոմիտեն։

«Քննությամբ պարզվել է, որ 43-ամյա տղամարդը, 2019թ. հոկտեմբերի 8-ին Հայաստանյան բանկերից մեկում բացել է ընթացիկ և քարտային հաշիվներ և 5 օր անց հոկտեմբերի 13-ին՝ ժամը 20:43-ին, ընթացիկ հաշվին կանխիկ եղանակով մուտքագրել է 9.800.000 ՀՀ դրամ, որը հաջորդ օրը ամբողջությամբ Ինտերնետ Բանկ ծառայության միջոցով փոխանցել է քարտային հաշվին, որից հետո մեկ այլ ընկերության օնլայն համակարգի միջոցով, իր քարտային հաշվին կցված վճարային քարտից իրականացրել է 9.775.025 ՀՀ դրամի չափով առցանց փոխանցում այդ ընկերության հաշվեհամարին:

Այնուհետև, նույն օրը՝ ժամը 13:42-ին, մեկ այլ բանկի բանկոմատով ծածկագրի 3 անգամյա հաջորդաբար սխալ մուտքագրմամբ դիտավորյալ բլոկավորել է իր քարտային հաշվին կցված վճարային քարտը, որից հետո, համակարգչային տեխնիկայի օգտագործմամբ ուրիշի գույքի առանձնապես խոշոր չափերով հափշտակության գործընթացն ավարտին հասցնելու նպատակով, Ինտերնետ Բանկ ծառայության միջոցով բարեհաջող իրականացրել է իր քարտային հաշվում ֆիզիկապես գոյություն չունեցող վերոհիշյալ գումարների հետ փոխանցում իր ընթացիկ հաշվին և կանխիկացրել գումարը:

Ձեռք բերված բավարար ապացույցների համակցությամբ՝ 43-ամյա տղամարդուն մեղադրանք է առաջադրվել՝ ՀՀ քրեական օրենսգրքի 181-րդ հոդվածի 3-րդ մասի 1-ին կետով: Վերջինիս նկատմամբ որպես խափանման միջոց է ընտրվել կալանավորումը:

Անջատված մասով նախաքննությունն ավարտվել է, և քրեական գործը՝ մեղադրական եզրակացությունը հաստատելու միջնորդությամբ, ուղարկվել է դատախազին»,-ասված է հաղորդագրության մեջ:

2020 թվականի 44 օրյա պատերազմի ավարտից յոթ ամիս անց ՀՀ ՊՆ-ում ձևավորվել է մարտական գործողությունների ընթացքը քննող հանձնաժողով։ Այս մասին «Փաստինֆո»-ի հարցմանն ի պատասխան հայտնել են ՀՀ պաշտպանության նախարարությունից։

Ընդ որում, հանձնաժողովն ստեղծվել ՀՀ պաշտպանության նախարարի պաշտոնակատար Վաղարշակ Հարությունյանի գաղտնի հրամանով։

«44 օրյա պատերազմի (մարտական գործողությունների) ընթացքը քննելու, և վերլուծելու նպատակով ՀՀ պաշտպանության նախարարի 10.05.2021 թվականի գաղտնի հրամանով ստեղծվել է միջգերատեսչական հանձնաժողով»,- «Փաստինֆո»-ի գրավոր հարցմանն ի պատասխան հայտնել են ՀՀ ՊՆ-ից։

Պաշտոնական հարցումը պաշտպանական գերատեսչություն ուղարկել էինք հունիսի 24-ին՝ պարզելու, թե արդյոք ՊՆ-ում ստեղծվել է 44-օրյա պատերազմի ընթացքն ուսումնասիրող հանձնաժողով, եթե այո, ապա երբ է ստեղծվել եւ ինչ խնդիր է դրվել հանձնաժողովի առաջ։ Վեց օր անց՝ հունիսի 30-ին նախարարությունից պաշտոնական նամակով հայտնեցին, թե հարցման մեջ նշված տեղեկությունները տրամադրելու համար լրացուցիչ՝ 30-օրյա ժամկետ է անհրաժեշտ, սակայն այսօր հուլիսի 2-ին ստացանք երկրորդ պատասխանը, որով միայն հայտնել են, թե մայիսի գաղտնի հրամանով հանձնաժողով է ստեղծվել՝ չմանրամասնելով, թե հանձնաժողովում ովքե՞ր են ընդգրկված, որո՞նք են լիազորությունների շրջանակներն ու անգամ քանի՞ նիստ է հրավիրվել։

Նախարարությունից միայն վստահեցրել են, որ երկու ամիս գործող հանձնաժողովը պարբերաբար նիստեր է հրավիրում։

Պատերազմի ավարտից ութ ամիս անց ռազմական գործողությունների դրվագների մասին չի բարձրաձայնվում։ Նախարարությունց փորձել էինք պարզել՝ արդյոք հանձնաժողովի արդյունքում որևէ նյութ ուղարկվել է դատախազություն կամ քննչական մարմիններ՝ գնահատական տալու համար, սակայն նախարարությունը խուսափել է կոնկրետ հարցին հստակ պատասխան տալ. «Առայժմ վաղ է դրանց արդունքների վերաբերյալ տեղեկություն տալը»,- ասված է պատասխանում։

Ասել է, թե՝ պատերազմից 8 ամիս անց անգամ ՊՆ-ն չունի ասելիք խայտառական պարտության որեւէ դրվագի վերաբերյալ։

Պետական եկամուտների կոմիտեի մաքսանենգության դեմ պայքարի վարչության կողմից իրականացված շուրջօրյա հսկողական աշխատանքների արդյունքում բացահայտվել է թմրամիջոցների մաքսանենգության հերթական խոշոր դեպքը։ Այս մասին տեղեկացանք՝ ՊԵԿ տեղեկատվության և հասարակայնության հետ կապերի բաժնից:

Օրերս Պետական եկամուտների կոմիտեի մաքսանենգության դեմ պայքարի վարչության աշխատակիցները, մասնակցությամբ` Հարավային մաքսատուն-վարչության աշխատակիցների և Ռուսաստանի Դաշնության սահմանապահ զորքերի ծառայողների, ինչպես նաև ՀՀ ազգային անվտանգության ծառայության և ՀՀ Ոստիկանության աշխատակիցների, մաքսային հսկողության են ենթարկել Իրանի Իսլամական Հանրապետությունից «Ագարակ» պետական սահմանային անցակետով Հայաստանի Հանրապետություն ժամանած Թուրքիայի Հանրապետության քաղաքացու կողմից շահագործվող բեռնատարը։

Հիշյալ բեռնատարի մաքսային զննման արդյունքում դրա կցորդի տանիքի դիմացի հատվածում թաքցված մետաղական կոնստրուկցիաների միջից հայտնաբերվել են 97կգ ընդհանուր քաշով «Հերոին» տեսակի թմրամիջոցի պարունակությամբ 119 հատ փաթեթ՝ փաթեթավորված շագանակագույն ինքնակպչուն ժապավեններով։ Հայտնաբերված 97կգ ընդհանուր քաշով «Հերոին» տեսակի թմրամիջոցը ընթացիկ տարվա երկրորդ խոշոր բացահայտումն է Մաքսանենգության դեմ պայքարի վարչության աշխատակիցների կողմից վերջերս բացահայտված շուրջ 365կգ քաշով «Հերոին» տեսակի թմրամիջոցի հայտնաբերման դեպքից հետո։ Հայտնաբերված «հերոին»-ի շուկայական արժեքը կազմում է 10-11 միլիոն ԱՄՆ դոլար:

Փաստի առթիվ ՀՀ ՊԵԿ քննչական վարչությունում հարուցվել է քրեական գործ ՀՀ քրեական օրենսգրքի 267.1 հոդվածի 4-րդ մասով և 266 հոդվածի 3-րդ մասով նախատեսված հանցագործության հատկանիշներով, որի շրջանակներում Թուրքիայի Հանրապետության քաղաքացին ձերբակալվել է։

Պետական եկամուտների կոմիտեի մաքսանենգության դեմ պայքարի վարչության, ՀՀ ազգային անվտանգության ծառայության և ՀՀ Ոստիկանության աշխատակիցների կողմից ձեռնարկվել են մի շարք անհետաձգելի օպերատիվ-հետախուզական միջոցառումներ՝ թմրամիջոցների մաքսանենգության հիշյալ դեպքով ներգրավված անձանց շրջանակը բացահայտելու ուղղությամբ։

Արմավիրի մարզում տղամարդը սպանել է ընկերոջ որդուն՝ իր 16-ամյա դստերն անարգելու և դրամից հետո նրանից գումար և ոսկյա զարդեր շորթելու համար։

«Փաստինֆո»-ի հաղորդմամբ՝ աղջկա հայրը սպանությանը պատրաստվել է 4-5 օր։ Մասնավորապես, տեղեկանալով, որ իր ընկերոջ որդին սեքսուալ բնույթի գործողություններ է կատարել իր անչափահաս՝ 16 տարեկան դստեր հետ, ապա նրանից գումար և ոսկյա զարդեր շորթել, որոշել է վրեժխնդիր լինել ։ Դեպքից 4-5 օր առաջ տղամարդը ձեռք է բերել որսորդական երկարափող հրացանը, կարճեցրել դրա փողը, խզակոթը և պահել իր տանը, այնուհետև՝ պայմանավորվածություն է ձեռք բերել երիտասարդի հետ՝ գումարային հարցերի շուրջ։ Դեպքի օրը՝ հեռախոսազանգի միջոցով կապ է հաստատել երիտասարդի հետ, պայմանավորվել հանդիպման մասին , ապա կարճեցված փողով և խզակոթով հրացանը դրել ավտոմեքենայի մեջ և ուղևորվել դեպի Արմավիրի մարզ՝ երիտասարդի հետ հանդիպման։

Պայմանավորված վայրում նկատելով, որ երիտասարդն իջնում է մեքենայից՝ աղջկա հայրը երեք անգամ կրակոց է արձակել՝ երիտասարդի ուղղությամբ՝ պատճառելով գլխի, որովայնի և կրծքավանդակի հրազենային վնասվածքներ, ինչի հետևանքով երիտասարդը մահացել է։ Դեպքի առթիվ հարուցվել է քրեական գործ, որի շրջանակներում մեղադրանք է առաջադրվել աղջկա հորը՝ ՀՀ քրեական օրենսգրքի 104-րդ հոդվածի հատկանիշներով՝ սպանության համար, վերջինս կալանավորվել է։ Հարուցված քրեական գործով նախաքննությունն ավարտվել է և քրեական գործը՝ հաստատված մեղադրական եզրակացությամբ, ուղարկվել դատարան։ Այժմ քրեական գործը գտնվում է Արմավիրի մարզի ընդհանուր իրավասության դատարանի վարույթում։

Քաղաքական պատճառներով զինվորականներին պաշտոններից ազատելը օրենքի խախտում է, հանցագործություն և դավաճանություն զինված ուժերի նկատմամբ: «Փաստինֆո»-ի հետ զրույցում ասաց ՊՆ նախկին նախարար Սեյրան Օհանյանը՝ անդրադառնալով Զինված ուժերում կադրային փոփոխություններին:

Հիշեցնենք, որ հունիսի կասեցվել էին Մեղրիի գնդի հրամանատար Արգամ Գևորգյանի լիազորությունները: Ըստ մամուլում շրջանառվող տեղեկությունների՝նա հրաժարվել է կատարել «Քաղաքացիական պայմանագրի» օգտին քվեարկելու ՊՆ հրահանգը, ինչի արդյունքում ՊՆ-ից պահանջել են դիմումներ գրել ու հեռանալ: Այսօր արդեն հայտնի դարձավ, որ նա զորացրվել է։

Տեղեկությունների կան նաեւ այն մասին, որ ԶՈՒ երրորդ բանակային կորպուսի հրամանատար, գեներալ-մայոր Գրիգորի Խաչատուրովի պայմանագիրը չի երկարաձգվի:

«Լսել եմ, որ Մեղրիի հրամանատարն ազատվել է պաշտոնից այն պատճառով, որ նրան ցուցում են տվել, որ ՔՊ-ի համար քարոզչություն իրականացնի, նա չի համաձայնվել: Գրիգորի Խաչատուրովը իմ ժամանակ է նշանակվել կորպուսի հրամանատար, նա մեր Զինված ուժերի կայացած և գրագետ հրամանատարներից մեկն է, որն իրեն ցուցադրել է դրական առումով մարտական գործողություններում»,-ասաց Օհանյանը և հավելեց, որ զինված ուժերում կադրային փոփոխությունները պետք է լինեն պլանային, իսկ քաղաքական պատճառներով զինվորականներին պաշտոններից ազատելը դա օրենքի խախտում է.

«Դա, կարելի է ասել, նաև հանցագործություն է և դավաճանություն է զինված ուժերի նկատմամբ: Սա հիմնական պատճառներից մեկն է եղել 44-օրյա պատերազմում մեր պարտության»,-ասաց Սեյրան Օհանյանը:

Ես զինվորական եմ, քաղաքականությամբ երբեք չեմ զբաղվել։ Այս մասին NEWS.am-ի հետ զրույցում ասաց Արգամ Գեւորգյանը։

Հիշեցնենք, որ Մեղրիի եւ Մեհրաբի զորամասերի հրամանատարների նկատմամբ նշանակվել է ծառայողական քննություն։ Նախարարությունը պատճառների մասին չէր հայտնել, սակայն ըստ շրջանառվող լուրերի՝ հրամանատարներին ազատել են ծառայությունից՝ Փաշինյանի օգտին ձայներ ապահովելուց հրաժարվելու համար։

Արգամ Գեւորգյանն ասաց, որ սեփական զեկուցագրի համաձայն զորացրվել է։

Նախկին հրամանատարը պատմեց, թե ինչն է իրականում հանգեցրել այսպիսի իրավիճակի. «Վերադասն ինձ տեղեկացրել է, որ ես ծառայությունից դուրս եմ գալիս, ասացին՝ նպատակահարմար չէ Մեղրիում մնալդ։ Ես էլ զեկուցագիր եմ գրել եւ զորացրվել։ Իրենք են ուզեցել աշխատանքից ազատել, ես ինքնակամ եմ դուրս եկել»։

Գեւորգյանը պնդեց, որ ինքը քաղաքականությամբ երբեք չի զբաղվել, խնդիրն այլ տեղում է.  «Կապավոր Լուսինե Մկրտչյանն ինձնից ենթասպայի հաստիք է խնդրել գաղտնի ձեւով, որ ուրիշին հանեմ, իրեն նշանակեմ, ես ասել եմ՝ ինչպե՞ս կարող եմ ուրիշին հանել, քեզ նշանակել, հաջորդ անգամ նման հարցով չգաս։ Դրանից հետո սկսել է անընդհատ թեժ գիծ զանգել, հրամանատարի անունից զանգում էին վերադասին, բողոքում, զանգում էին Պաշտպանության նախարարություն, ամեն բառը ճոխացրած ներկայացնում, թե վատ բաներ եմ ասում իշխանության հասցեին»։

Արգամ Գեւորգյանի պնդմամբ՝ այս գործընթացի պատճառներից է նաեւ այն, որ ինքը Մեղրիի քաղաքապետ Մխիթար Զաքարյանի ընկերն է։

Գեւորգյանն անդրադարձավ նաեւ իր նկատմամբ նշանակված ծառայողական քննությանը.

«Սկսվեց ծառայողական քննություն, իմ պաշտոնավարումը կասեցվեց, 80-100 մարդու հարցաքննության արդյունքում պարզվեց, որ ես անմեղ եմ։ Հունիսի 29-ի հրամանով ինձ նորից վերականգնեցին իմ պաշտոնում։ Առաջին օրը գնում եմ աշխատանքի, այդ աղջիկը նորից զանգում ու բողոքում է, որ եկել է, ես չեմ ուզում նրա հետ ծառայել, երեկոյան Գլխավոր շտաբից տեղեկացնում են, որ ինձ շտապ կանչում են Երեւան։ Նախարարությունում նորից տեղեկացնում են, որ նորից մինչեւ հուլիսի 5–ը կասեցված են նրա լիազորությունները, այդ աղջիկը նորից բողոքում է»։

Արգամ Գեւորգյանը պատմեց, որ 2 պատերազմ է անցել, վիրավորվել է, սակայն հայրենիքի հանդեպ իր պարտքը միշտ կիսատ է համարել ու շարունակել ծառայությունը. «Ես նրանց ապացուցել եմ, որ քաղաքականությամբ երբեք չեմ զբաղվում, ես զինվորական եմ։ Ես 2 պատերազմով անցել եմ, զինվորի կողքին եմ եղել։ Այն հրամանատարները, որոնք փախչել են մարտի դաշտից, հիմա պաշտոնի առաջխաղացում են ունենում. իմ 24-25 տարվա ծառայությունը ջուրն են գցում։ Մաքուր ծառայել եմ իմ ազգին ու հայրենիքին, կռվել եմ, իմ խնդիրն էլ կատարել եմ»։

Երևանի ընդհանուր իրավասության դատարանում՝ դատավոր Վահե Միսակյանի նախագահությամբ, Սերժ Սարգսյանը և մյուսների գործով դատախազը ներկայացրեց մեղադրական եզրակացության եզրափակիչ մասը: 

Առաջադրված մեղադրանքի վերաբերյալ դիրքորոշում հայտնեց նիստին ներկա ՀՀ երրորդ նախագահ Սերժ Սարգսյանը:

«Ես լսեցի մեղադրողի ընթերցածը, այն շարադրված է գործից անտեղյակ մարդկանց կողմից, մեղադրանքն ամբողջովին կեղծ է, մոգոնվել է Հատուկ քննչական ծառայության կողմից և հաստատվել է դատախազության կողմից քաղաքական պատվերի շրջանակում»,- նշեց նա։

Դատավորի հարցին՝ այսինքն կարող են արձանագրել, որ նա իրեն մեղավոր չի ճանաչում, Սերժ Սարգսյանն ասաց. «Ես մեղավոր չեմ»:

Գործով անցնող Բարսեղ Բեգլարյանն էլ նշեց, որ իրեն մեղավոր չի ճանաչում:

«Ես ընդհանրապես ոչ մեկին չեմ դրդել, ընդհանրապես այդ գումարը, որը տրամադրվել է «Ֆլեշ» ընկերությանը  որպես սուբսիդավորում, հափշտակում համարելն ուղղակի անիմաստ է ու հնարավոր չէ»:

Գործով անցնող Գևորգ Հարությունյանը նույնպես ասաց, որ իրենց մեղավոր չի ճանաչում, մեղադրանքն ամբողջովին անհիմն է:

Ըստ Սերժ Սարգսյանին առաջադրված մեղադրանքի՝ «նա 2008թ․ ապրիլի 9-ից մինչև 2018թ․ ապրիլի 9-ը ընկած ժամանակահատվածում, զբաղեցնելով ՀՀ նախագահի պաշտոնը, հանդիսանալով մշտապես իշխանության ներկայացուցչի գործառույթներ իրականացնող պաշտոնատար անձ, իր պաշտոնեական դիրքն օգտագործելով, 2013թ․ հունվարի 25-ից մինչև նույն թվականի փետրվարի 7-ն ընկած ժամանակահատվածում, կազմակերպել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489,160,310 ՀՀ դրամի հափշտակության կատարում»։

Ըստ Բարսեղ Բեգլարյանին առաջադրված  մեղադրանքի՝ «նա հանդիսանալով «Ֆլեշ» ՍՊ ընկերության սեփականատեր, 2013թ․ հունվարի 25-ից փետրվարի 7-ն ընկած ժամանակահատվածում դրդել է 2013թ․ Հայաստանի Հանրապետության գյուղատնտեսության նախարարի պաշտոնը զբաղեցնող Սերգո Կարապետյանին՝ ՀՀ հողօգտագործողներին 2013թ․ գարնան գյուղատնտեսական աշխատանքների համար մատչելի գներով դիզելային վառելանյութի ձեռքբերման նպատակով պետական աջակցության ծրագրի իրականացման ընթացքում կատարել ՀՀ կառավարությանը վստահված, պահուստային ֆոնդում գտնվող առանձնապես խոշոր չափերով պետական միջոցների՝ ընդհանուր 489,160,310 ՀՀ դրամի վատնում»։

Ըստ Գևորգ Հարությունյանին առաջադրված մեղադրանքի՝ «նա 2012թ․ հունիսի 25-ից մինչև 2015թ․ հունվարի 12-ն ընկած ժամանակահատվածում զբաղեցնելով ՀՀ գյուղատնտեսության նախարարության բուսաբուծության վարչության պետի պաշտոնը, հանդիսանալով մշտապես իշխանության ներկայացուցչի գործառույթներ իրականացնող պաշտոնատար անձ, իր պաշտոնեական դիրքն օգտագրծելով, 2013թ․ հւնվարի 25-ից մինչև նույն թվականի փետրվարի 7-ն ընկած ժամանակահատվածում, օժանդակել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489,160,310 ՀՀ դրամի հափշտակություն կատարելուն»։

Հիշեցնենք, որ այս քրեական գործով մեղադրանք էր առաջադրվել նաև ՀՀ գյուղատնտեսության նախկին նախարար Սերգո Կարապետյանին և նախարարի նախկին տեղակալ Սամվել Գալստյանին: Նրանք այս տարվա սկզբին մահացել են կորոնավիրուսից: Դատարանի որոշմամբ, նրանց նկատմամբ քրեական հետապնդումը դադարեցվել է:

Այո, ես վստահաբար ասում եմ, որ Արցախի իշխանությունները, Արցախի ժողովուրդը չեն ընդունելու որևէ նմանատիպ պայման, որ որևէ ձևով Արցախը մտնի Ադրբեջանի կազմ։ Այս մասին այսօր կայացած մամուլի ասուլիսին հայտարարեց Արցախի Հանրապետության պետական նախարար Արտակ Բեգլարյանը՝ պատասխանելով հարցին, թե կարո՞ղ է վստահաբար ասել, որ Արցախը երբեք չի լինի Ադրբեջանի կազմում։

«Իհարկե, մեր պայմանները շատ ավելի ծանր, դժվար են, քան նախապատերազմյան շրջանում, բայց դա չի նշանակում, որ մենք հնարավորություն չունենք պայքարելու․ մեր ճանապարհը ավելի երկար է հիմա մեզ թվում, բայց, մյուս կողմից, մենք ունենք լրացուցիչ, այդ թվում՝ արտաքին քաղաքական հնարավորություններ՝ մեր ինքնորոշման իրավունքի պաշտպանությունը շատ ավելի ընդգծված կերպով պաշտպանելու համար»,-ասաց նա՝ նշելով, որ գոնե փաստարկների առումով դա ընկալելի է միջազգային հանրությանը։

«Հակամարտության կարգավորման 3 հիմնական սկզբունքներից 2-ը՝ տարածքային ամբողջականության սկզբունքը և ուժի և ուժի սպառնալիքի չկիրառման սկզբունքը արդեն ժամանակավրեպ են պատերազմի հետևանքով, մնացել է մեր ինքնորոշման իրավունքի ճանաչման սկզբունքը, և սա միջազգային հանրությունը և Մինսկի խումբը շատ լավ գիտակցում են։ Մենք այս ուղղությամբ մեր պայքարը շարունակում ենք, իհարկե, պետք է ՀՀ-ն էլ այս մասով գործուն ջանքեր գործադրի, և հույս ունենք, որ առաջիկայում արդեն որոշակի դրական առաջընթաց լինելուն է այս մասով»,-ասաց Բեգլարյանը։

Ինչ վերաբերում է արտագաղթի կանխման ուղղված քայլերին, Բեգլարյանն ասաց, թե դրա համար երկու հիմնական քայլ կա՝ կայուն անվտանգության երկարաժամկետ ապահովումն ու բնակարանային խնդրի՝ հնարավորինս արագ ու էֆեկտիվ լուծումը։

«Ի տարբերություն հետպատերազմյան սկզբնական շրջանի՝ արդեն մեզ, ժողովրդի համար ակնհայտ է, որ անվտանգության պայմանները ավելի արդյունավետ են, քան շատերը սպասում էին, սա արդեն լրացուցիչ դրական հույս է տալիս հասարակությանը, որ այստեղ կարող է երկարաժամկետ կյանք պլանավորել»,-ասաց նա։

Անդրադառնալով հարցերին, թե 4,5 տարի հետո ինչ է լինելու, երբ ռուս խաղաղապահների՝ Արցախում մնալու ժամկետն ավարտվի, Բեգլարյանը նշեց, թե կարծում է, որ նրանց ներկայությունը 5 տարով չի սահմանափակելու։ «Ես համոզված եմ, որ մենք այստեղ երկար ժամանակ ունենալու ենք ռուս խաղաղապահներ, որոնք երաշխավորելու են մեր անվտանգությունը, իհարկե՝ մեր ՊԲ-ն, Զինված ուժերն իրենց մասով երաշխավորում են և ժամանակի ընթացքում շատ ավելի արդյունավետորեն են երաշխավորելու, բայց մեր օրակարգը խաղաղ, բանակցային, քաղաքական գործընթացով մեր անվտանգության երաշխավորումն է, որին, հուսանք, Ադրբեջանը պատրաստ կլինի»,-ասաց Արցախի պետնախարարը։

Ռուսաստանցի քաղաքական վերլուծաբան Ստանիսլավ Տարասովի խոսքով՝ Ռուսաստանի և Թուրքիայի արտգործնախարարների հանդիպմանը Լեռնային Ղարաբաղի մասին քննարկմանը ամենաքիչ ժամանակն է տրամադրվելու։

Նա Tert.am-ի հետ զրույցում նշեց, որ երկու երկրների օրակարգում կան բազմաթիվ ավելի կարևոր ու հրատապ քննարկման արժանի թեմաներ, իսկ այս տարածաշրջանին վերաբերող զարգացումները ամփոփված են նախորդ տարվա նոյեմբերի 9-ի եռակողմ համաձայնագրում, որտեղ Թուրքիան մասնակցություն չունի։

«Հիմա բոլորի գլխավոր նպատակը այդ համաձայնագրի կետերը իրականացնելն է»,- ասաց նա։

Հիշեցնենք, որ ՌԴ ԱԳ նախարար Սերգեյ Լավրովը այսօր  Անթալիայում բանակցություններ է վարել թուրք պաշտոնակցի` Մևլութ Չավուշօղլուի հետ, որոնց ընթացքում քննարկվել է նաև Լեռնային Ղարաբաղում իրավիճակի կարգավորմանն ուղղված հետագա քայլերը:

«Իրավիճակը Հարավային Կովկասում ևս մեկ կարևոր թեմա կդառնա ՌԴ-ի և Թուրքիայի արտաքին քաղաքական գերատեսչությունների ղեկավարների բանակցություններում»,- մինչ հանդիպումն ասվել էր հանդիպման մասին հաղորդագրության մեջ:

Թուրքիան, ըստ Ստանիսլավ Տարասովի, ցանկանում է, որ իրականան նոյեմբերի 9-ի համաձայնագրի հաղորդակցությունների ապաշրջափակմանը վերաբերող կետերը, որ գործարկվի «Զանգեզուրի միջանցքը»։ «Ուղիղ ազդեցություն Թուրքիան չի կարողանում ունենալ այս գործընթացների վրա։ Նա այստեղ Ադրբեջանի հովանավորն է։ Նրանք երկուսով են հաղթել պատերազմը»,- ասաց նա։

Նա նորից նշեց, որ պետք չէ մտածել, որ Լավրովը Չավուշօղլուի հետ հանդիպում է Ղարաբաղի պատճառով, երկու երկների օրակարգը լեցուն է բազում հարցերով։ Իսկ Թուրքիան, ըստ նրա, Ղարաբաղյան պատերազմում հաղթանակի արդյունքում հասել է այս տարածաշրջանի հետ կապված իր նպատաներին։

Ինչ վերաբերում է նրան, թե ինչ պետք է անի Հայաստանը, ապա ըստ Տարասովի, այդ հարցը պետք է տալ վարչապետ ընտրված Փաշինյանին։ «Հայերն ընտրել են Փաշինյանին, ունեք առաջորդ, թող ինքն էլ ձեզ առաջնորդի։ Թուրքիայի և Ադրբեջանի դեմ պայքարելու մասին պետք էր մտածել ավելի վաղ, ոչ թե ամբողջ երկիրը կրակի մեջ դնել։ Իսկ հիմա պետք է գլուխը կախ ստեղծել նոր պետություն։ Ես չգտեմ ինչ պետություն, դա արդեն Փաշինյանը կիմանա, նա է , ի վերջո հաղթել ընտրություններում։ Իսկ դա նշանակում էր, որ հայերը նրան հավատացել են։ Նա հավանաբար մի ծրագիր կունենա»,- ասաց նա։

Խոսելով նրա մասին, թե ինչ դիրքորոշում է ընտրել Ռուսաստանը Հայաստանի շուրջ տեղի ունեցող գործընթացների վերաբերյալ, ռուսաստանցի վերլուծաբանը նշեց. «Կողքից հետևում ենք և շատ ցավում։ Մենք շատ վախենում ենք, որ Հայաստանը կարող է ինքն իրեն վերացնել։ Եվ ոչ թե նրա համար, որ պատերազմում է պարտվել, ո՛չ, Հայաստանը չի պարտվել, նա պարզապես ինքն իրեն հիմա վերացնում է»,- ասաց նա։