ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցի ժամանակ անդրադարձել է նոյեմբերի 16-ին ադրբեջանական հարձակումների ֆոնին Ռուսաստանի դրսևորած միջնորդական ջանքերին:

«Ռուսաստանի արդյունավետ միջնորդական ջանքերի արդյունքում լարվածությունը սահմանին վերացվել է: Մենք շարունակում ենք հետևել սահմանին տիրող իրավիճակին՝ և՛ մեր զինվորականների, և՛ սահմանապահների գծով շփումներ իրականացնելով հայ  և ադրբեջանցի գործընկերների հետ»,- ասել է ՌԴ ԱԳՆ ներկայացուցիչը՝ պատասխանելով նոյեմբերի 16-ին սահմանային իրադարձությունների ֆոնին Հայաստանի կողմից ՀԱՊԿ-ին կամ Ռուսասանին դիմելու մասին հարցին:

Դիվանագետը չի մասնավորեցրել՝ արդյոք պաշտոնական դիմում եղել է, թե ոչ:

Զախարովա հավելել է, որ ներկա պահին մեծ ուշադրություն է դարձվում տրանսպորտային և տնտեսական կապերի ապաշրջափակմանն ուղղված խնդիրներին:

Նիկոլ Փաշինյանի երեկվա ասուլիսի մեսիջները հիմնականում ուղղված էին հայ հասարակությանը, որով նա փորձում էր նախապատրաստել մեզ նոյեմբերին և դեկտեմբերին ծանր զիջումներին։ Այս մասին Tert.am-ի հետ զրույցում ասաց ԱԺ «Հայաստան» խմբակցության պատգամավոր Արթուր Խաչատրյանը։

«Այդ զիջումները վստահաբար լինելու են, որովհետև Փաշինյանի պաշտոնավարման ողջ ընթացքում մենք միայն զիջել ու զիջել ենք, և նրա հայտարարությունները սահմանագծման և սահմանազատման, նաև Արցախի վերաբերյալ հենց դրա մասին են վկայում։ Նրա ուղերձների հիմնական հասցեատերը Հայաստանի Հանրապետությունն էր»,- ասաց Խաչատրյանը։

Խաչատրյանը նախ ներկայացրեց այն հիմնական մեսիջները, որոնք Նիկոլ Փաշինյանը փոխանցեց Արցախի վերաբերյալ. «Նիկոլ Փաշինյանը ասաց, որ երբ 1991թ.-ին Հայաստանը մտել է ԱՊՀ կազմի մեջ, ճանաչել է Ադրբեջանի անկախությունը` մոռանալով նշել, որ Հայաստանը մտել է ԱՊՀ կազմի 1991թ.-ի դեկտեմբերին, իսկ Արցախը դեռ Խորհրդային Միության ժամանակ այդ միության օրենքների համաձայն հռչակել էր իր անկախությունը։ Նույնիսկ, եթե մենք ճանաչել ենք Ադրբեջանի տարածքային ամբողջականությունը, այդ ժամանակ Արցախը այլևս Ադրբեջանի կազմում չէր»։

Արթուր Խաչատրյանի կարծիքով` Փաշինյանը նուրբ հոգեբանական գրոհ կազմակերպեց հայ ժողովրդի դեմ։

«Փաշինյանը փորձեց ներկայացնել, որ ով էլ լիներ և ինչ էլ որ լիներ,  բոլոր ջանքերն արվել են, բայց Արցախի հարցը չի լուծվել։ Նա չփորձեց ասել, որ դա չի ստացվում, աշխարհը մեր այդ որոշման հետ համաձայն չէ, ինքը որևէ մեկին չմեղադրեց, այլ ուղղակի փորձեց ցույց տալ, որ այդ խնդիրը անլուծելի է, որ պատերազմի միջոցով փորձեցին այդ հարցը լուծել, բայց չստացվեց։

Փաշինյանը ժողովրդի առջև ընտրություն դրեց` կամ պետք է նորից կռվենք, կամ Արցախը պետք է վերադարձվի, որովհետև մեր կամքից անկախ, միևնույն է, Արցախի հարցը լուծում չունի։ Քանի որ ոչ մեկը չի ցանկանա այս ծանր բարոյահոգեբանական, ֆինանսական իրավիճակում պատերազմել, մարդկանց ուղղակի նախապատրաստում էր համակերպվել, որ Արցախը մնալու է Ադրբեջանի կազմում ինչ-որ կարգավիճակով, իսկ դա կարող է լինել նույնիսկ մշակութային ինքնավարությունը»,- նշեց պատգամավորը։

Պատգամավորը շեշտում է` Փաշինյանը նույնիսկ իր` «Արցախյան խնդրի ծագումը» հոդվածում է խեղաթյուրել փաստերը.

«Այդ հոդվածում նա գրել էր, թե 2017թ.-ին հայտարարվել էր, որ Հայաստանը 7 շրջան պետք է վերադարձնի և այլն։ Դրան ի պատասխան՝ ՌԴ փոխարտգործնախարար և Մինսկի խմբի Ռուսաստանի նախկին համանախագահ Իգոր Պոպովը հայտարարեց, որ երբեք չի քննարկվել հենց այնպես ինչ-որ տարածք տալու հարցը։ Հիշենք, որ 1998թ.-ին Լևոն Տեր-Պետրոսյանը հրաժարական տվեց, քանի որ կար Արցախյան հարցի լուծման երկու մոտեցում` փուլային և փաթեթային։ Տեր-Պետրոսյանը կողմնակից էր փուլային տարբերակին, մինչդեռ ՀՅԴ-ն, այն ժամանակվա վարչապետ Ռոբերտ Քոչարյանը և այլ ուժեր կողմնակից էին փաթեթային տարբերակին, այսինքն Արցախի կարգավիճակի ճշգրտում Ադրբեջանից դուրս և ապա միայն տարածքների հարց։ Այնպես, որ երբեք չի քննարկվել մի տարբերակ, որով հենց այնպես պետք է հանձնվեն տարածքները»,- ասաց Խաչատրյանը։

Փաշինյանի փոխանցած երկրորդ մեսիջր, ըստ Արթուր Խաչատրյանի, կապված էր Արցախյան խնդրի, սահմանազատման և սահմանագծման ու կոմունիկացիաների բացման հետ։

«Փաշինյանը շատ վտանգավոր քաղաքականություն է իրականացնում` փորձելով այս հարցերը իրարից տարանջատել։ Հնարավոր չէ Հայաստանի և Ադրբեջանի միջև խաղաղ գոյակցություն, քանի դեռ Արցախի խնդիրը չի լուծվել։ Ինքը Արցախի հարցը առանձնացնում է, սահմաններ է գծում Ադրբեջանի հետ, փորձում է «նորմալացնել» հարաբերությունները Ադրբեջանի և Թուրքիայի հետ։ Իսկ, եթե հետագայում Ադրբեջանը փորձի հերթական հարձակումը գործել Արցախի նկատմամբ, ինչ է լինելու բոլոր այս պայմանավորվածությունների հետ։ Դրանք գրոշի արժեք չեն ունենա, եթե Արցախի հարցը չլուծվի։ Դեմարկացիան և դելիմիտացիան առանց Արցախյան հարցի լուծման նման է նրան, երբ բուժում ես ոչ թե հիվանդությունը, այլ հիվանդության սիմպտոմը։

Բացի այդ, Փաշինյանը անհասկանալի պնդումներ արեց այն մասին, որ տարածքներից, որտեղից մենք դուրս ենք եկել, պատկանում էն Ադրբեջանին, հղում կատարեց անհասկանալի քարտեզներին։ Եթե երկու կողմերը հարց են դնում սահմանները ճշտելու վերաբերյալ, ապա որպես ելման կետ դիտարկվում են այն տարածքներր, որոնք փաստացի գտնվում են տվյալ երկրի տիրապետության տակ, դա միջազգային ընդունված նորմ է»,- մանրամասնեց պատգամավորը:

Խաչատրյանի դիտարկմամբ՝ իր ուղերձում Փաշինյանը մեղավորներ էր փնտրում նաև մայիսյան պարտության համար, երբ ադրբեջանցիները հաստատվեցին Սև լճի տարածքում։

«Նա ասաց` բանակը, փոխանակ սահմանը պաշտպանի, քաղաքականությամբ է զբաղվում։ Հիշեցնեմ, որ մայիսի 12-ից մի քանի օր առաջ Փաշինյանը հայտարարել էր, որ մեր սահմանները հրաշալի կահավորված են, հետո երբ ադրբեջանցիները մտան Սև լիճ և Ներքին Շորժա, ասաց՝ եղանակային պայմանների պատճառով չէինք հասցրել կահավորել, սա ծիծաղելի է։ Հիմա ասում է՝ այն զինվորականները, ովքեր փետրվարին պահանջել են իմ հրաժարականը, նրանք են մեղավոր, մինչդեռ այդ սահմանագիծը առաջացել է, երբ նոյեմբերի 9-ի խայտառակ պայմանագրով հայկական զորքերը հետ են քաշվել, ու հենց այդ պահից պետք է նոր սահմանագիծը կահավորվեր։ Ուստի անտրամաբանական է Փաշինյանի այն պնդումը, որ քանի որ փետրվարին զինվորականները պահանջել են իր հաժարականը, այդ պատճառով մայիսին սահմանագիծը դեռ կահավորված չէր»։

Արթուր Խաչատրյանը ընդգծեց, որ Փաշինյանը պարադոքսալ պնդումներ արեց նաև հայ-թուրքական հարաբերությունների վերաբերյալ։

«Ասում է, եթե Թուրքիան չի հայտարարում, որ ինքը ցեղասպան է, մենք պատրաստ ենք իր հետ հարաբերությունները նորմալացնել։ Ինչ է` Թուրքիան պետք է ասի՝ ես ցեղասպան եմ և Հայաստանը պետք է ոչնչացնե՞մ, իհարկե՝ ոչ , Թուրքիան ասելու է`դեմոկրատական երկիր եմ, եկեք միասին խաղաղ ապրենք։ Փաշինյանը ժողովրդին նախապատրաստում է ընդունել թուրքական նախապայմանները, որպեսզի Թուրքիան բացի  սահմանները։

Նրա մյուս ուղերձը հերթական մանիպուլյացիան էր միջանցքի վերաբերյալ։ Եթե այդ պայմանագրով ճանապարհները ապաշրջափակվում են և նորմալ կոմունիկացիա է լինելու, այդ դեպքում ինչու է Ադրբեջանի և Նախիջևանի կապը առանձնակի շեշտվում»,- ասաց նա:

Ըստ Խաչատրյանի` կտրվի ճանապարհ, որը հայկական կողմը չի կոչի միջանցք, բայց ըստ էության, դա կլինի հենց միջանցք՝ բոլոր իմաստներով։

ԱԺ նախագահ Ալեն Սիմոնյանին սպասարկող BMW 750Li 2011 թ․ արտադրության ծառայողական ավտոմեքենան կհանձնվի Պետական գույքի կառավարման կոմիտեին։ Կառավարությունը համապատասխան որոշում է մշակել, որով մեկ անձից գնման ընթացակարգով ԱԺ նախագահ Ալեն Սիմոնյանի համար նոր ծառայողական մեքենա ձեռք կբերվի՝ BMW 750Li xDrive LCI։ Որոշման նախագիծը կառավարության նիստի օրակարգում է։ Հիմնավորման մեջ նշվում է, որ այժմյան մեքենայի ընթացիկ տեխնիկական սպասարկումը դարձել է ծախսատար և նրա շահագործման ու պահպանման համար ֆինանսական միջոցների հատկացումները այլևս արդյունավետ և նպատակահարմար չեն։ Նախագիծը մշակվել է ՀՀ Ազգային ժողովի աշխատակազմի կողմից և նշվում է, որ BMW 750LI Xdrive-ի ձեռքբերումը իրականացվելու է Ազգային ժողովին 2021 թվականի պետական բյուջեով նախատեսված հատկացումների վերաբաշխման արդյունքում տնտեսված ֆինանսական միջոցների հաշվին։

«Որոշման նախագիծը բխում է «Հայաստանի վերափոխման ռազմավարություն 2050», «Կառավարության 2021-2026թթ. ծրագիր» /կետ 6․10/ ռազմավարական փաստաթղթերի դրույթներից»,- նշված է նախագծի հիմնավորման մեջ։

Ներկայում BMW-ի հայաստանյան ներկայացուցչությունում մեքենայի գինը 107 միլիոն դրամից նվազել է 92 միլիոն դրամի՝ ակցիայի շրջանակում։

ՀՅԴ Բյուրոյի Երիտասարդական Գրասենյակը հաղորդում է, որ ստորեւ հայտարարությամբ՝ Արցախի եւ սփյուռքի ավելի քան 20 երկրներում գործող երիտասարդական, ուսանողական, մարզական, եկեղեցական, հասարակական-քաղաքական եւ մշակութային միություններ եւ կազմակերպություններ, միանում են Հայաստանի մեջ թափ առած դիմադրության շարժմանը:

Ստորագրահավաքը շարունակվում է, դիմադրության շարժման միացող կազմակերպությունները կարող են դիմել իրենց շրջանի ՀՅԴ Երիտասարդական եւ Ուսանողական Միություններին:

Հաշվի առնելով, հայկական պետության կործանման վտանգը ու Արցախի եւ Սյունիքի կորուստը կասեցնելու հրամայականը՝ Հայ Երիտասարդությունը դիմում է համազգային դիմադրության, որը հետեւողական պայքարի շնորհիվ առաջացնելու է երկար սպասված արժեհամակարգային հեղափոխությունը։

Նկատի ունենալով,

• թուրք-ադրբեջանական պանթուրանական քաղաքականությունը, որ միտում ունի մեկընդմիշտ տարածաշրջանի քարտեզից ջնջելու Արցախի ու Հայաստանի Հանրապետությունները,
• ՀՀ ապազգային, դավադիր իշխանությունների ընթացքը, որն առաջնորդվում է միակողմանի զիջումներով՝ կարծեցյալ խաղաղության հասնելու քաղաքականությամբ,
• Հայաստանի Հանրապետության ներքաղաքական փակուղին եւ այն իրականությունը, որ ՀՀ Ազգային ժողովում ընդդիմության ծավալած գործունեության կողքին անհրաժեշտ է դիմել բազմաճակատ պայքարի՝

Հայ երիտասարդությունը որոշել է չհարմարվել այս իրականությանը, այլ՝ մեկնարկել համազգային երիտասարդական դիմադրության շարժում՝ պայքարի հինգ հիմնական ճակատներով․

1. Ամենուրեք թափ հաղորդել հակաթուրք եւ հակաադրբեջանական պայքարին,
2. Գերտերություններին հասցնել այն պատգամը, որ իրենց ծրագրերը չեն կարող իրականացնել Հայաստանի եւ հայության ազգային-պետական շահերի հաշվին,
3. Կտրուկ քայլերով մերժել ՀՀ իշխանությունների պառակտող ու պետականակործան քաղաքականությունը,
4. Պայքարել Արցախը հայաթափելու, այն ՀՀ-ից ու Սփյուռքից անջատելու ադրբեջանա-թուրքական փորձերի եւ Սյունիքից արտագաղթի հոսանքի դեմ․

Սիրելի՛ երիտասարդներ,

Կոչ ենք ուղղում բոլորիդ՝ միանալ այս շարժմանը այս ճակատագրական օրերին, բոլորս՝ իրավունք չունենք մատնվելու հանցավոր անգործության։ Զարթոնքի եւ ազգային անկումը վերելքի վերածելու պահը հիմա՛ է:

Հայտարարությունը ստորագրող կազմակերպություններ:

• «Միացյալ Հայաստան» ԵՀԿ Արցախ
• ԱԺԿ Երիտասարդական թեւ Արցախ
• ՀՅԴ Արցախի «Արամ Մանուկյան» ուսանողական միություն Արցախ
• ՀՅԴ Արցախի Երիտասարդական Միություն Արցախ
• «Արդարություն» կուսակցութեան երիտ. Պատասխանատու Արցախ
• «Ապառաժ երիտասարդական միություն» ՀԿ Արցախ
• Հավասար հնարավորություն ՀԿ Արցախ
• «Դեպի Արարատ» կրթական մշակութային միության երիտասարդական գրասենյակ Ռուսաստան
• Երիտասարդ քաղաքագետների Հայկական Ասոցիացիա Ռուսաստան
• ՀՄԸՄ Ռուսաստան Ռուսաստան
• ՀՅԴ Սիրիայի Երիտասարդական Միություն Սիրիա
• ՀՅԴ Քրիստափոր Ուսանողական Միություն Սիրիա
• Համազգայինի Սիրիայի Շրջանային Վարչություն Սիրիա
• ՀՄԸՄ Սիրիայի Շրջանային Վարչություն Սիրիա
• Հայ Երիտասարդաց Միություն Սիրիա
• Ազգային Քարէն Եփփէ Ճեմարանի Շրջանավարտների Միություն Սիրիա
• Ն. Ջ. Հայ Մ. Մ. «Արարատ» միության Սկաուտական միավոր (Նոր Ջուղայի Հայ Մարզա֊մշակութային «Արարատ» միության Սկաուտական միավոր) The Scout unit of «Ararat» cultural and sports Union of Nor Jugha Իրան
• Հ.Յ.Դ «Ռուբեն» Երիտ. Միություն The Armenian Revelutionary Federation’s «Rouben» Youth Union Իրան
• ՀՅԴ Ռոստոմ երիտասարդական միություն – Ayf tehran Իրան
• ՀՅԴ Յովնան Դավթյան Ուսանողական միություն Իրան
• ՀՅԴ Զավարյան Ուսանողական Միություն – Zavarian Student Association Լիբանան
• ՀՅԴ Լիբանանի Երիտասարդական Միություն -LEM Լիբանան
• Բեյրութի Ամերիկյան Համալսարանի Հայկական Ակումբ – Lebanese Armenian Heritage Club Լիբանան
• Լիբանանի Ամերիկյան Համալսարանի Հայկական Ակումբ – Բեյրութ․ Armenian Club – Lebanese American University – Beirut Լիբանան
• Լիբանանի Ամերիկյան Համալսարանի Հայկական Ակումբ – Ժպէյլ․ Armenian Club – Lebanese American University – Jbeil Լիբանան
• «Սեն Ժոզեֆ» Համալսարանի Լիբանանահայ Ուսանողներ – Lebanese Armenian Students of Saint Joseph University Լիբանան
• Լիբանանի Միջազգային Համալսարանի Հայկական Ակումբ – Lebanese International University Armenian Club Լիբանան
• Լիբանանի Պետական Համալսարանի Հայկական Ակումբ – Lebanese University Armenian Club Լիբանան
• «Նօտր Դամ» Համալսարանի Հայկական Ակումբ -Lebanese Armenian Club – Notre Dame University Լիբանան
• Հայկազյան Համալսարանի Լիբանանահայ Ուսանողներ – Lebanese Armenian Students of Haigazian University Լիբանան
• Ռամկավար Ազատական Կուսակցության – ԵՌԱԿ Մ. – Armenian Democratic Liberal Party Youth Union Լիբանան
• Պորտուգալյան Երիտասարդական Ուսանողական Ակումբ – Portugalian Youth & Students’ Club Լիբանան
• ՀՄԸՄի Լիբանանի Սկաուտներ – Scouts of Homenetmen Lebanon Լիբանան
• Հայ Եկեղեցու Համալսարանական Ուսանողների Միություն – Armenian Church University Students’ Association Լիբանան
• ՀԲԸՄ- Հայ Երիտասարդաց Ընկերակցություն – AGBU-Armenian Youth Association Լիբանան
• ՀՅԴ Քուվեյթի Քրիստափոր Երիտասարդական Միություն Քուվեյթ
• Հ.Մ.Ը.Մ.-ի Քուվեյթի Մեկուսի Մասնաճյուղ Քուվեյթ
• Համազգայինի Քուվեյթի Մեկուսի Կազմ Քուվեյթ
• ՀՅԴ Հոլանդայի Երիտասարդական Միություն Հոլանդա
• ՀՅԴ Հունաստանի Երիտասարդական Միություն Հունաստան
• ՀՅԴ Կիպրոսի Երիտասարդական Միություն Կիպրոս
• Րաֆֆի Հայ Մշակութային Միություն – Raffi armenisk kulturförening Շվեդիա
• Արարատ Հայկական Միություն – Ararat Armeniska föreningen Շվեդիա
• Թրօլհեդդանի հայկական մշակութային միություն: Շվեդիա
• ՀՅԴ Շվեդիայի Երիտասարդական Միություն Շվեդիա
• ՀՄԸՄ Շվեդիա – HMEM Sweeden Շվեդիա
• ՀՅԴ Լոնդոնի Խանասոր Երիտասարդական Միություն – AYF London Khamasor Անգլիա
• Լոնդոնի Տնտեսագիտության հ
• Համալսարանի Հայկական Ընկերություն – London school of economics Armenian Society Անգլիա
• ՀՄԸՄ Լոնդոն – HMEM London Անգլիա
• ՀՅԴ «Նոր Սերունդ» Երիտասարդական Միություն Ֆրանսա
• ՀՅԴ Բելգիայի Երիտասարդական Միություն Բելգիա
• Յորքի Համալսարանի Հայ Ուսանողների Միություն -Armenian Student Association – York University Կանադա
• Մոնտրեալի Համալսարանի Հայ Ուսանողների Միություն – Association des Étudiants Arméniens de l’Université de Montréal Կանադա
• Կոնկորդիայի Հայ Ուսանողական Միություն -Concordia Armenian Students’ Union Կանադա
• Հ.Մ.Ը.Մ Կանադայի Շրջանային Վարչություն Կանադա
• Համազգային Կանադա – Hamazkayin Canada Կանադա
• ՀՅԴ Արմեն Գարօ Ուսանողական Միություն – Armen Karo Student Association Կանադա
• ՀՅԴ Կանադայի Երիտասարդական Միություն Կանադա
• ԱՄՆ Արեւելյան շրջանի ՀՅԴ Հայ Երիտասարդաց Դաշնակցություն ԱՄՆ
• ՀՄԸՄ ԱՄՆ Արեւելյան ԱՄՆ
• ԱՄՆ Արեւմտյան շրջանի ՀՅԴ Հայ Երիտասարդաց Դաշնակցություն ԱՄՆ
• ՀՅԴ Շանթ Ուսանողական Միություն ԱՄՆ
• Չեփմընի Հայ Ուսանողների Միություն – Chapman Armenian Student Association ԱՄՆ
• Կալիֆորնիայի Պետական Համալսարանի Լոնգ Բիչի Հայ Ուսանողների Միություն – California State University
Long Beach Armenian Student Association ԱՄՆ
• Հարավային Ամերիկայի Հայ Յեղափոխական Դաշնակցության Երիտասարդական Հարավային Ամերիկա
• Հարավային Ամերիկայի ՀՄԸՄ Շրջանային Վարչություն Հարավային Ամերիկա
• ՀՅԴ Ավստրալիայի Երիտասարդական Միություն Ավստրալիա

Apple ընկերության կողմից երեկ նախազգուշական նամակներ են ստացել ՀՀ մոտ երկու տասնյակի քաղաքացիներ, որով ծանուցվել են իրենց հեռախոսներում Pegasus լրտեսող ծրագիր ներբեռնվելու մասին։ Նրանք հասարակական-քաղաքական գործիչներ են, որոնց թվում ոչ միայն ընդդիմադիրներ են, այլև ՀՀ վարչապետ Նիկոլ Փաշինյանին մոտ կանգնած անձինք։ Սա նշանակում է, որ Փաշինյանը չի վստահում անգամ իր թիմակիցներին։ Սա մեծ իրարանցում է առաջացրել հենց թիմի ներսում, որոնք ստացել են այդ նամակները։

Հայտնի է դարձել, որ Հայաստանի իշխանությունները Pegasus լրտեսական ծրագրով փորձել են գաղտնալսել Արթուր Վանեցյանին։ Այս մասին հայտնել է անձամբ Վանեցյանը՝ հրապարակելով ստացած նամակը, որտեղ Apple ընկերությունը հեռախոսն անվտանգ պահելու խորհուրդներ է տալիս։

Նշենք, որ իսրայելական NSO Group-ը վստահեցրել էր, որ ծրագիրը տրամադրվել է միայն մարդու իրավունքները հարգող պետություններին՝ ռազմական, իրավապահ և հետախուզական մարմիններին, սակայն խումբը ունի պետական հաճախորդներ, կամ, ինչպես ասում է Apple-ը, այն «հովանավորվում է պետության կողմից»:

Տեղեկատվական անվտանգության փորձագետ Սամվել Մարտիրոսյանը հայտարարել է, որ «Pegasus-ը ծրագիրը իսրայելական NSO Group-ը վաճառում է միայն պետական կառույցներին։ «Շատ լուրջ, վատ և վտանգավոր ծրագիր է։ Դրանով հեռախոսը վարակելը շատ հեշտ է»,- ասել է նա ու ավելացրել, որ այն բավականին թանկ ծրագիր է, խոսքը վերաբերում է մեկ թիրախի համար մի քանի տասնյակ հազար դոլարներ ծախսելուն՝ կախված այն բանից, թե թիրախն ինչքան զգուշավոր է։

Ըստ նրա, այն եղած ծրագրերից ամենավտանգավորն է։ Ստանում է ամբողջական տեղեկատվություն, ինչպես նաև գաղտնալսելու, կամերան, դիկտոֆոնը միացնելու, ֆայլեր, նկարներ գողանալու հնարավորություն։

Մամուլում արդեն վաղուց է  տեղեկություններ շրջանառվում, որ Փաշինյանի իշխանությունը 7 մլն դոլար է ծախսել՝ «Pegasus» համակարգը  ձեռք բերելու համար, ինչն այսօր արդեն հաստատվում է։ Փաստացի, կառավարությունը՝ ուղղակի կամ անուղղակի ձեռք բերելով համակարգը, առաջնային է համարել գաղտնալսել որոշ անձանց կամ շրջանակի ՝ ստորադասելով ՀՀ պետական շահը։ Իշխանությունը որոշել է չկահավորել դիրքերը, կամ լուծել օրինակ՝ պատերազմի հետևանքով տեղահանվածների հարցը, փոխարենը նախընտրել է գաղտնալսել հասարակական, քաղաքական գործիչներին, անգամ իր թիմակիցներին։

Հունաստանի Սալոնիկ քաղաքում հասարակական տրանսպորտի վրա հայտնված ադրբեջանական գովազդը՝ «Շուշին Ադրբեջան է» գրառմամբ, հանվել է Հայաստանի դեսպանության, ներհամայնքային կառույցների, Հունահայկական առևտրի պալատի և Հայ դատի Սալոնիկի հանձնախմբի ջանքերով: Այս մասին «Արմենպրես»-ի հետ զրույցում ասել է Հունաստանում ՀՀ դեսպան Տիգրան Մկրտչյանը:

«Մենք կապ հաստատեցինք ու աշխատեցինք Սալոնիկի քաղաքային իշխանությունների, նաև գործադիր իշխանության հետ, բացատրեցինք, որ անհապաղ այդ գովազդները հեռացվեն, քանի որ քաղաքական բնույթ ունեն, սադրիչ են: Հաշված ժամերի ընթացքում հունական իշխանություններն արձանագրեցին, և գովազդը հեռացվեց ավտոբուսի վրայից»,- ասել է դեսպանը:  

Նա ընդգծել է, որ Ադրբեջանի կողմից նմանօրինակ գործողություններ կարելի է սպասել ոչ միայն Հունաստանում, որտեղ ադրբեջանական փոքր համայնք կա, այլև այլ երկրներում ևս:

«Ադրբեջանն ուղղակի փորձում է նման սադրիչ քայլերով որպես իրականություն ներկայացնել ու հավերժացնել ուժի կիրառման հետևանքով արձանագրված արդյունքները, մինչդեռ մենք հստակ գիտենք, որ Լեռնային Ղարաբաղի կարգավիճակի հարցը բաց է մնում: Դրա մասին ԵԱՀԿ Մինսկի խմբի համանախագահ բոլոր երկրներն էլ խոսել են: Ստացվում է՝ Ադրբեջանը նման մեթոդներով փորձում է մեկընդմիշտ «ֆիկսել», թե իբր Շուշին ադրբեջանական է, և չի կարող վերանայվել Շուշիի վերադարձ Լեռնային Ղարաբաղի կազմում: Բայց Լեռնային Ղարաբաղն ունի իր հստակ ադմինիստրատիվ սահմանները, և Շուշին, ինչպես նաև Հադրութը միանշանակ այդ սահմանների մեջ են: Շուշին և Հադրութն այս պահին օկուպացված են:

Նման քայլերով Ադրբեջանը փորձում է տպավորություն ստեղծել, թե այդ հարցը փակված է: Ադրբեջանը գնում է ընդդեմ բանակցային գործընթացի տրամաբանության: Այս քայլը ես դիտարկում եմ որպես սադրանք՝ հատկապես այնպիսի բարեկամական երկրում, ինչպիսին Հունաստանն է, որի իշխանությունները մեկ անգամ չէ, որ համերաշխություն են հայտել ՀՀ դիրքորոշումներին համահունչ: Նման սադրիչ քայլով փորձում են ինչ-որ լարվածություն մտցնել հայ-հունական հարաբերություններում, ինչը, բնականաբար, չի ստացվելու»,- եզրափակել է Հունաստանում ՀՀ դեսպան Տիգրան Մկրտչյանը:

Սպիտակ տունը վերջերս հայտարարեց, որ ավելի քան 100 երկրների հրավիրել է մասնակցելու  դեկտեմբերի 9-10-ը կայանալիք առցանց «Ժողովրդավարության  գագաթնաժողովին»: Այս մասին իր հոդվածում գրել է «Կալիֆորնիա կուրիեր» թերթի հրատարակիչ և խմբագիր Հարութ Սասունյանը:

Նա, մասնավորապես, նշել է. «Գագաթնաժողովի հրավիրվածների թվում են Հայաստանն ու Վրաստանը, բայց ոչ Ադրբեջանն ու Թուրքիան, որոնք բռնապետական երկրներ են։ Հետաքրքիրն այն է, որ վերջին երկու երկրները չէին դժգոհել գագաթնաժողովում իրենց բացակայությունից, մինչև իմանալը, որ Հայաստանը հրավիրված է։

Սպիտակ տունը հայտարարեց, որ նախագահ Ջո Բայդենն ասել է. «մեր ժամանակի մարտահրավերն է ցույց տալ, որ ժողովրդավարությունները կարող են գործել՝ «բարելավելով իրենց սեփական ժողովրդի կյանքը և լուծելով աշխարհի առջև ծառացած ամենամեծ  խնդիրները»: Նախագահը «վերականգնեց մեր դաշինքները մեր ժողովրդավար գործընկերների և դաշնակիցների հետ՝ համախմբելով աշխարհը՝ ոտքի կանգնելու մարդու իրավունքների խախտումների դեմ, լուծելու կլիմայական ճգնաժամը և պայքարելու համաշխարհային համավարակի դեմ, այդ թվում՝ պատվաստանյութերի հարյուրավոր միլիոն չափաբաժիններ նվիրաբերելով աշխարհի տարբեր երկրների»։

Սպիտակ տան հայտարարության մեջ նաև ասվում է, որ այս գագաթնաժողովին «մոտ մեկ տարի անց կհետևի երկրորդ, անձնական ներկայությանբ գագաթնաժողովը: Առցանց գագաթնաժողովը, որը տեղի կունենա [2021 թ․] դեկտեմբերի 9-10-ին,  կքաջալերի  հանձնառություններն ու նախաձեռնությունները երեք հիմնական թեմաներով՝ պաշտպանություն ընդդեմ բռնապետության, կոռուպցիայի դեմ պայքար և մարդու իրավունքների նկատմամբ հարգանքի խթանում: Մեկ տարվա խորհրդակցությունից, համակարգումից և գործողություններից հետո նախագահ Բայդենն այնուհետև կհրավիրի համաշխարհային ղեկավարներին հավաքվել ևս մեկ անգամ՝ ցուցադրելու իրենց հանձնառությունների ուղղությամբ ձեռք բերված առաջընթացը:

Երկու գագաթնաժողովները համախմբելու են պետությունների, քաղաքացիական հասարակության, բարեգործության և մասնավոր հատվածի ղեկավարներին, ինչը հնարավորություն կտա համաշխարհային ղեկավարներին լսել միմյանց և իրենց քաղաքացիներին, կիսել հաջողությունները, խթանել միջազգային համագործակցությունը և անկեղծորեն խոսել ժողովրդավարության առջև ծառացած մարտահրավերների մասին, որպեսզի միասին ամրապնդեն հիմքերը ժողովրդավարության նորացման համար»:

Սպիտակ տան այս հայտարարությունից հետո բուռն քննարկում ծավալվեց, թե ինչու որոշ երկրներ հրավիրված են գագաթնաժողովին, իսկ ուրիշները՝ ոչ: Ակնհայտ է, որ այս գագաթնաժողովի նպատակն է՝ զինակցություն ձևավորել ԱՄՆ-ի գլխավորությամբ՝ ընդդեմ իր մրցակիցների՝ Չինաստանի և Ռուսաստանի։ Արդյոք հրավիրված ղեկավարներից ոմանք ունե՞ն մտահոգություն, որ իրենց կդիտարկեն որպես «արևմտամետ» և «ընդդեմ Չինաստանի ու Ռուսաստանի»: Սա հատկապես զգայուն խնդիր է Հայաստանի համար, որն ամուր ռազմական և տնտեսական կապեր ունի Ռուսաստանի հետ և գտնվում է Չինաստանի հետ սերտ հարաբերություններ հաստատելու գործընթացում։

Ինչպե՞ս կվերաբերվեն Չինաստանն ու Ռուսաստանը Հայաստանի մասնակցությանը նման հակամարտական գագաթնաժողովին։ Վարչապետ Նիկոլ Փաշինյանը, որն ընդունել է ԱՄՆ-ի հրավերը, պետք է լրջորեն մտածի նման գագաթնաժողովին իր մասնակցության համար ռուսական բացասական արձագանքի մասին։ Սակայն մասնակցությունից հրաժարվելը ևս կարող է հետևանքներ առաջացնել Միացյալ Նահանգների հետ։

Մինչ Հայաստանը ողջունում է իր հրավերը ժողովրդավարության գագաթնաժողովին, Փաշինյանը, ցավոք, նահանջել է ի սկզբանե իր հռչակած ժողովրդավարական արժեքներից՝ հետապնդելով կամ բանտարկելով ցուցարարներին, լռեցնելով լրատվամիջոցներին և միակողմանի որոշումներ ընդունելով՝ առանց հասարակության կամ նույնիսկ իր իշխող շրջապատում գտնվողների կարծիքը հաշվի առնելու: Ինչ-որ մեկի համար, որն իշխանության եկավ ժողովրդավարական գաղափարներ պաշտպանելով, Փաշինյանը հունիսյան ընտրությունների ժամանակ տարօրինակ կերպով քարոզարշավ իրականացրեց՝ պահելով մուրճը ձեռքին և սպառնալով ջարդել իր քաղաքական հակառակորդների գլուխները։

Հայաստանին հրավիրելով գագաթնաժողովին` Միացյալ Նահանգները, հավանաբար, հրապուրում է Հայաստանի կառավարությանը մերձենալ Արևմուտքի հետ: «Գագաթնաժողովի կազմակերպման աշխատանքներում ներգրավված ամերիկացի պաշտոնյան «Ռոյթերս»-ին ասել է, որ աշխարհի բոլոր տարածաշրջաններից հրավերներ են ուղարկվել ժողովրդավարության տարբեր փորձ ունեցող երկրների: «Խոսքը չէր գնում հաստատելու, որ «Դուք ժողովրդավարական եք, դուք ժողովրդավարական չեք»: Դա այն գործընթացը չէ, որի միջով մենք անցել ենք»: Բայդենի վարչակազմի պաշտոնյաներն ասում են, որ իրենք պետք է «ընտրություն կատարեին»՝ ապահովելու տարածաշրջանային բազմազանություն և լայն մասնակցություն», հաղորդում է «Ռոյթերսը»։

Բնականաբար, Ադրբեջանը և Թուրքիային այնքան էլ գոհ չէին, որ Հայաստանին հրավիրել են գագաթնաժողովին, մինչդեռ իրենց անտեսել էին։ «ԱզերՆյուս» թերթում հրապարակված՝ «Ժողովրդավարության գագաթնաժողովը կամ երկակի ստանդարտների վառ օրինակը» վերնագրով հոդվածում Այյա Լմահամադը մեջբերում է Ադրբեջանի խորհրդարանի պատգամավոր Վուգար Իսկանդարովին, որը դժգոհել է. «Ծիծաղելի է, որ այնպիսի երկրներ, ինչպիսիք են Ադրբեջանը, Թուրքիան և Հունգարիան, չեն հրավիրվել գագաթնաժողովին, որտեղ ժողովրդավարության մակարդակը շատ ավելի բարձր է, քան հրավիրված երկրների մեծ մասը»։ Իսկանդարովը պետք է լիովին կույր լինի՝ չտեսնելու մարդու իրավունքների կոպիտ խախտումները և ժողովրդավարության բացակայությունը Ադրբեջանի և Թուրքիայի բռնապետական վարչակարգերում։

Ադրբեջանական «Դեյ.ազ» լրատվական կայքը էլ ավելի հեռուն գնաց՝ պնդելով, որ Հայաստանը հրավիրվել է շնորհիվ ԱՄՆ-ում ամերիկահայերի  ազդեցության. «Պետք չէ խորանալ նախորդ տարիների մեջ, բավական է տեսնել, թե ինչ է եղել և շարունակվում է տեղի ունենալ Վաշինգտոն-Հայկական սփյուռք հարաբերություններում վերջին մեկ տարվա ընթացքում։ Ամերիկյան դիվանագիտության խոնարհումները Երևանի նկատմամբ,  հակաադրբեջանական անվերջ քննարկումներն ու հայկական լոբբիի պնդմամբ կայացված որոշումները ինքնին խոսուն են»։

Թեև ադրբեջանական այս կայքը լիովին ուռճացված գնահատական է տվել Վաշինգտոնում ամերիկահայերի հզորությանը, այնուամենայնիվ, դա ողջունելի հաճոյախոսություն է։ Ադրբեջանն ու Թուրքիան կարող են չվախենալ Հայաստանից, բայց թվում է, որ նրանք սարսափում են ԱՄՆ-ում հայկական լոբբիի քաղաքական ազդեցությունից»:

Թարգմանությունը՝ Ռուզաննա Ավագյանի

Իրանի ԱԳՆ խոսնակ Սաիդ Ղաթիբզադեն հայտնել է, որ երկրի նախագահ Իբրահիմ Ռայիսին Դուշանբեում նոյեմբերի 28-ին կայանալիք Տնտեսական համագործակցության կազմակերպության գագաթնաժողովի շրջանակում կարող է առաջին հանդիպումն անցկացնել ադրբեջանցի գործընկեր Իլհամ Ալիևի հետ: Ղաթիբզադեն այս մասին հայտնել է Ադրբեջանի փոխվարչապետ Շահին Մուստաֆաևի՝ նախօրեին Թեհրան կատարած այցի ֆոնին: Այս մասին գրում է կովկասագետ, «Ռեգնում» գործակալության խմբագիր Ստանիսլավ Տարասովը՝ նկատելով, որ նախօրեին այցով Թեհրան ժամանած թուրք արտգործնախարար Մևլյութ Չավուշօղլուն հայտնել էր Էրդողանի՝ դեկտեմբերին Իրան կատարելիք հնարավոր այցի մասին:

Անդրադառնալով Ռայիսի-Ալիև հարաբերություններին՝ Տարասովն ընդգծում է որոշ արձանագրային նրբություններ՝ կապված քաղաքական ենթատեքստի հետ: Ղաթիբզադեն նշել է, որ «երկու երկրի ղեկավարների համար բնական են երկկողմ հանդիպումները գագաթնաժողովների շրջանակներում»: Դա այդպես է, նկատում է քաղաքագետը, չէ որ գագաթնաժողովի մասնակիցները շփվելու են միմյանց հետ, և հնարավոր է նաև ոչ պաշտոնական երկխոսություն: Սակայն «հանդիպում գագաթնաժողովի շրջանակում» եզրույթը կարևոր առանձնահատկություն ունի. դա գլխավոր իրադարձություն չէ, որի համար հավաքվել են գագաթնաժողովում, թեև չի կարելի բացառել որոշակի պայմանավորվածությունների ձեռք բերումը: 

Ըստ Տարասովի՝ խնդիրն այն է, որ Ղարաբաղյան երկրորդ պատերազմից հետո Իրան-Թուրքիա-Ադրբեջան եռանկյունում ճաքեր են ի հայտ եկել, որոնք կողմերը տարբեր պատճառներով փորձում են փակել: «Թեհրանն այժմ ստիպված է վերաիմաստավորել իր քաղաքականությունը տարածաշրջանում: Նախկինում այնտեղ ռուսական հեգեմոնիա էր, այժմ իր աշխարհաքաղաքական հավակնություններն սկսել է արտահայտել Անկարան, որը Բաքվի հետ դաշինքով գերուժի գործոն է ստեղծում իրանական հյուսիսում: Օբյեկտիվ իրականությունն այնպիսին է, որ այդ ուժը կարող է զգալի ազդեցություն ունենալ Իրանի ադրբեջանակաբնակ շրջաններում տեղի ունեցող իրադարձություններ վրա»,- ընդգծում է մասնագետը:

Ավելին, Թեհրանը հրապարակավ հայտարարում է Ադրբեջանում Իսրայելի աճող ազդեցության շուրջ իր մտահոգության մասին: Սակայն Անդրկովկասում ինքնուրույն աշխարհաքաղաքական խաղ վարելու համար Իրանը ներկա պահին անհրաժեշտ ռեսուրսներ չունի պատմական-խորհրդանշականից բացի: Այդ իսկ պատճառով՝ գործողությունների բոլոր ենթադրյալ տարբերակներից նախընտրելին Իրանի համար մեկն է՝ յուրատեսակ պաշտպանիչ գոտու կազմավորումը Ռուսաստանի հետ դաշինքում: Առավել ևս, որ Թեհրանը ներկա պահին գտնվում է երկու գործոնի ՝ միջազգային ասպարեզում իր քաղաքական մելուսացման և Անդրկովկասում զսպման լուրջ ազդեցության տակ, ինչպես նաև առանձին էթնիկ խմբերի (ադրբեջանցիների և քրդերի)՝ իրենց անհատականությունունը պահպանելու թափ հավաքող փորձերի:

Ըստ Տարասովի՝ գտնվելով նման իրավիճակում՝ Իրանն այժմ փորձում է ժամանակ շահել՝ չվանելով իրենից հարևան տարածաշրջանային խաղացողներին՝ Անկարայի և Բաքվի տեսքով, սակայն դեռևս շատ չի մտերմանում նրանց հետ:  

«Պատահական չէ, որ շատ փորձագետներ ենթադրում են իրանական քաղաքկանության ակտիվացում ռուսական ուղղությամբ: Այստեղից էլ գալիս է Իրանի դադարը Թուրքիայի և Ադրբեջանի հետ նոր հարաբերություններ կառուցելու հարցում: Ինչպես գրում է Al Bawaba հորդանանյան պարբերականը, Իրանին այժմ «հեղինակային հաղթանակ է պետք», որի նպատակը «ներքին լարվածության թուլացումն է այսպես կոչված՝ էթնոսների հետ հարաբերություններում, ինչպիսիք են արաբ-ահվազները՝ հարավ-արևելքում, քրդերը՝ հյուսիս-արևմուտքում և արդեն իրանաբնակ ադրբեջանցիները՝ երկրի հյուսիսում»: Պատահական չէ, որ իրանական տեղեկատվական օրակարգում Ադրբեջանի հետ համակարտութունն ու Թուրքիայի հետ տարաձայնությունները երկրորդ պլան են մղվել, որպեսզի «դիվանագիտական հալոցքի հնարավրություն ստեղծվի այդ երկրների հետ»: Թեհրանում «մարսում են» նոր աշխարհաքաղաքական իրողությունը, որը տարածաշրջանում ստեղծվել է Ղարաբաղյան երկրորդ պատերազմից հետո»,- եզրափակում է կովկասագտը

Արցախյան պատերազմի ավարտից մեկ տարի է անցել, սակայն Բաքուն չի կարողացել լրջորեն զարգացնել Ադրբեջանին անցած շրջանները։ Այս մասին NEWS.am-ի հետ զրույցում ասաց ռուս ռազմական փորձագետ Պավել Ֆելգենգաուերը։

«Ինչ-որ բան նրանք անում են, սակայն բնակչությունը չի վերադարձել այնտեղ, պայթուցիկ սարքերի առկայության խնդիրը մնում է։ Սա ակնհայտորեն դառնում է շատ լուրջ քաղաքական խնդիր Ալիեւի համար։ Ըստ երեւույթին, ենթադրվում է, որ հայերն ինչ-որ տեղ քարտեզներ ունեն, որոնք չեն ուզում տալ։ Բայց ես վստահ չեմ, որ նման մանրակրկիտ քարտեզներ կան: Այս տարածքներում կարող էին մնալ վայրի ականապատ դաշտեր, որոնք երկար տարիներ ոչ ոք չիսպասարկել։

Բաքվին, ըստ ամենայնի, չի հաջողվում ամբողջությամբ ականազերծել այդ տարածքները, եւ սա արդեն քաղաքականապես կարեւոր պահ է։ Քանի դեռ Ադրբեջանը չի տիրապետել դրանց, չի կարող լրջորեն զբաղվել Արցախի խնդրով։ Նախ պետք է ինտեգրել մնացած շրջանները, ինչն այնքան էլ լավ չի անում Բաքուն։ Բաքուն հրաժարվում է ճանաչել Արցախը եւ կարծում է, որ այնտեղ ապրող հայ բնակչությունը պետք է ընդունի Ադրբեջանի քաղաքացիություն կամ լքի այդ տարածքները։ Անգամ ներկայիս տեսքով Արցախը հերքում է դա։ Եվ քանի դեռ այդպես է, անորոշ իրավիճակը կպահպանվի եւս մի քանի տարի, եւ դրա փոփոխությունը կախված կլինի տարածաշրջանի սահմաններից դուրս գտնվող հանգամանքներից»,-ասաց նա։  

Իսրայելական Webiz կազմակերպությունը, որը զբաղվում է բարձր տեխնոլոգիական կադրային ռեսուրսի ապահովմամբ, որոշել է Իսրայելում առկա՝ տեղեկատվական տեխնոլոգիաների (հետայսու` ՏՏ) մասնագետների պակասը լրացնել Հայաստանի մասնագետների հաշվին. կազմակերպությունն աշխատանքի է ընդունել մի շարք մենեջերների, որոնք պետք է զբաղվեն տաղանդավոր մարդկանց հավաքագրմամբ, որոնցից մեկն էլ վարչապետ Նիկոլ Փաշինյանի որդին` Աշոտ Փաշինյանն է: Այս մասին հայտնում է Yerkir.am-ը:

«Իսրայելական Webiz կազմակերպությունը, որը զբաղվում է բարձր տեխնոլոգիական կադրային ռեսուրսի ապահովմամբ, որոշել է Իսրայելում առկա՝ տեղեկատվական տեխնոլոգիաների (հետայսու` ՏՏ) մասնագետների պակասը լրացնել Հայաստանի մասնագետների հաշվին. գրում է իսրայելական nocamels.com կայքը:

Այսպես՝ իսրայելական կազմակերպությունը դեռ այս տարվա սեպտեմբեր ամսին հայտարարել է, որ Թբիլիսիում բացում է ՏՏ անձնակազմի հավաքագրման և կրթական կենտրոն:

Ներկայումս Webiz-ն ավարտին է հասցնում Հայաստանում իր մասնաճյուղի բացման աշխատանքները և ստեղծում տեղում Webiz-ի ակադեմիա: Կազմակերպության գլխավոր տնօրեն Էյալ Բար-Օզը նշել է, որ Հայաստանում մասնաճյուղի բացումը կօգնի Իսրայելին՝ նվազեցել այդ երկրում ՏՏ մասնագետների պակասը, հատկապես՝ այնպիսի ոլորտներում, ինչպիսիք են կիբերանվտանգությունը, արհեստական բանականությունը և հսկայական տվյալների բազան:

Կազմակերպությունն աշխատանքի է ընդունել մի շարք մենեջերների, որոնք պետք է զբաղվեն տաղանդավոր մարդկանց հավաքագրմամբ: Նրանցից մեկն էլ վարչապետի պաշտոնը զբաղեցնող Նիկոլ Փաշինյանի որդին` Աշոտ Փաշինյանն է:

Այսպիսով՝ Փաշինյան կրտսերը, որն ամիսներ առաջ Երևանի կենտրոնական գարեջրատներից մեկում գարեջուր էր վաճառում և համացանցում հայտնի է թմրանյութերի նկատմամբ սիրով, զբաղվելու է ՏՏ ոլորտի հայ տաղանդավոր մասնագետների հավաքագրմամբ ու համակարգմամբ»,- գրում է աղբյուրը: