Հանրապետության տարածքում՝ սեպտեմբերի 24-ին երեկոյան ժամերին, 28-ին շրջանների զգալի մասում սպասվում է անձրև և ամպրոպ, առանձին վայրերում հնարավոր է կարկուտ:
25-27-ին սպասվում է առավելապես առանց տեղումների եղանակ:

Քամին` հարավ–արևմտյան`  5-10 մ/վրկ, ամպրոպի ժամանակ 20-25մ/վրկ արագությամբ:

Ըստ ԱԻՆ կայքի, օդի ջերմաստիճանը 25-ին կնվազի 2-3 աստիճանով, 28-ին` ևս 2-3 աստիճանով:

Երևանում` սեպտեմբերի 24-ի երեկոյան ժամերին, 28-ին սպասվում է կարճատև անձրև և ամպրոպ: 25-27-ին սպասվում է առանց տեղումների եղանակ:

Նախաքննությամբ հիմնավորվել է, որ ՀՀ ՊՆ քննչական ծառայության երրորդ կայազորային քննչական բաժնի նախկին քննիչ Արթուր Ադամյանը չունենալով ֆինանսական միջոցներ ու բավարար եկամուտներ խոշոր չափի արժեքով գույք գնելու համար, փոխարենը` առևտրային բանկերի և մասնավոր անձանց նկատմամբ ունենալով խոշոր չափերի գումարային պարտավորություններ` խարդախություն կատարելու նախնական դիտավորությամբ ծանոթացել է ավտոմեքենայի վաճառքով զբաղվող Արթուր Ալիխանյանի հետ և ընդգծելով քննչական մարմնում զբաղեցրած իր պաշտոնը` խարդախությամբ 2011թ. սեպտեմբերի 4-ին նրանից հափշտակել է 2.394.990 ՀՀ դրամ արժողությամբ OPEL VECTRA մակնիշի ավտոմեքենան, որը հետագայում վաճառել և ստացված գումարները տնօրինել է իր հայեցողությամբ:
Բացի այդ, 2014թ. հունվարի 22-ին Արթուր Ադամյանը նույն եղանակով Յաշա Հովհաննիսյանից հափշտակել է 1.465.000 ՀՀ դրամ արժողությամբ «Ֆորդ Էսքորտ» մակնիշի ավտոմեքենան: Իրական հանցավոր մտադրությունները քողարկելու, Յաշա Հովհաննիսյանի մոտ վստահություն առաջացնելու նպատակով, Արթուր Ադամյանն այս անգամ հայտնել է, թե ինքն, իբրև, կադրերի ռեզերվում գտնվող զինծառայող է և շուտով կրկին պաշտոն է զբաղեցնելու:
Արթուր Ադամյանի կալանավորվելուց հետո ավտոմեքենան հայտնաբերվել է Վրաստանի Հանրապետության Բաթումի քաղաքում` թալանված վիճակում:
Արթուր Ադամյանին, խաբեության եղանակով ուրիշների գույքի խոշոր չափերով հափշտակություններ կատարելու համար մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով, նրա նկատմամբ որպես խափանման միջոց ընտրվել է կալանավորումը: Քրեական գործը մեղադրական եզրակացությամբ հանձնվել է քրեական գործի նախաքննության նկատմամբ հսկողություն իրականացնող դատախազին՝ այն հաստատելու և դատարան ուղարկելու համար:

Ճանապարհային ոստիկանությունը տեղեկացնում է, որ Երևան քաղաքի Աճառյան փողոցի երթևեկության կազմակերպման մեջ կատարվել է փոփոխություն:
2014 թ. սեպտեմբերի 25-ից Աճառյան և Բաբաջանյան փողոցների խաչմերուկից մինչև Մ-4 Երևան-Սևան-Իջևան-Ադրբեջանի սահման միջպետական նշանակության ավտոճանապարհի 10.3 կմ (մինչև ճանապարհային ոստիկանության անշարժ պահակետ) հատվածում երկու ուղղություններով առավելագույն արագությունը սահմանվում է 70կմ/ժ:

2015թ. ամռանը Հայաստանում` Ծաղկաձորի մարզաբազայի հենքի վրա, անցկացվելու է «Միություն 2015-հաղթանակի ժառանգորդներ» միջազգային երիտասարդական ռազմամարզական մրցույթ-հավաքը:

Սեպտեմբերի 23-ին ՀՀ ՊՆ վարչական համալիրում կայացել է ռազմամարզական մրցույթի նախապատրաստման և կազմակերպչական հարցերի պլանավորման նպատակով ՀՀ պաշտպանության նախարարի հրամանով ստեղծված հանձնաժողովի անդրանիկ նիստը, որը վարել է հանձնաժողովի նախագահ, ՀՀ պաշտպանության նախարարի առաջին տեղակալ Դավիթ Տոնոյանը:

Խորհրդակցության ընթացքում որոշվել են ռազմամարզական մրցույթի անցկացման ընդհանուր խնդիրները, միջոցառման նախապատրաստական աշխատանքների պլանավորման նպատակով տրվել են մի շարք հանձնարարականներ:

Սեպտեմբերի 24-ին Ծաղկաձորում` ռազմամարզական մրցույթի անցկացման վայրում, անցկացվել է ՀՀ պաշտպանության նախարարի հրամանով ստեղծված հանձնաժողովում ընդգրկված ՀՀ ՊՆ, ԶՈւ և ԶՈւ ԳՇ վարչությունների ներկայացուցիչների աշխատանքային խորհրդակցությունը:

Տեղազննման իրականացման և խնդիրների հստակեցման նպատակով կազմակերպված խորհրդակցության ընթացքում ՀՀ ՊՆ Մոնթե Մելքոնյանի անվան ռազմամարզական վարժարանի պետ, գնդապետ Վիտալի Ոսկանյանը ներկայացրել միջոցառման ընդհանուր գաղափարն ու կազմակերպչական առանցքային հարցերը: Քննարկվել են նաև միջազգային մրցույթ-հավաքի տեխնիկական, թիկունքային, բժշկական, տեղեկատվական, անվտանգության ապահովման հետ կապված մի շարք խնդիրներ, կազմակերպչական այլ հարցեր:

Հայրենասիրական ուղղվածության սոցիալական միջազգային նախագիծ հանդիսացող հավաքի գլխավոր նպատակն է Հայրենական Մեծ պատերազմի հաղթանակի 70-ամյակին նվիրված հայրենասիրական, ռազմամարզական միջոցառումների կազմակերպումը` ուղղված երիտասարդության շրջանում հայրենասիրության, ժողովուրդների ազգային, մշակութային և կրոնական արժեքների  ամրապնդմանը:

ՀՀ պաշտպանության նախարարություն

Կենտրոն և Նորք-Մարաշ շրջանների ընդհանուր իրավասության դատարանում այսօր հրապարակեցին «Բանդա»-ի գործով անցնողների նախկին դատվածությունները: Հրապարակմանը պաշտպանական կողմը զայրույթով վերաբերվեց՝ նշելով, որ հրապարակումը ամբաստանյալների անունները սևացնող քայլ է, որպեսզի ժողովրդի մոտ նրանց որպես հանցագործ ներկայացնեն՝ այն դեպքում, երբ այդ մեղադրանքները չեն հիմնավորվել:

Հրապարակմանը հաջորդեց հեռախոսահամարների վերծանումը, որից պարզ դարձավ, որ Արտուշ Հակոբյանի հեռախոսից տուժող կողմ Նապոլեոն Ազիզյանին զանգ չի գնացել: Պաշտպանները միջնորդություն ներկայացրեցին, որպեսզի դատարան հրավիրվի փորձագետ Արտակ Մինասյանը, որին հարցեր պետք է տրվի կապված զենքերի վրա հայտնաբերված մատնահետքերի հետ, նաև դատարան ներկայացվեն ժապավենները, որոնց վրա մատնահետքերն են:

Դատարանը միջնորդությունը բավարարեց մասնակի. հաջորդ դատական նիստին դատարան կհրավիրվի փորձագետը, բայց ժապավենները չեն բերվի: Դատական նիստը հետաձգվեց մինչև հոկտեմբերի 1-ը:

Հ.Գ. Դատական նիստի ընդմիջմանը զրուցեցինք Արտուշ Հակոբյանի կնոջ մոր հետ: Նա պատմեց, որ իր փեսային բազմաթիվ կտտանքների են ենթարկում. «Թուրքերի մասին ինչ ասես, ասում են, բայց ՔԿՀ-ի աշխատողները նրանցից վերան են. և՛դուբինկաներով ծեծում են, և՛ էլեկտրաշոկի ենթարկում»:

Հիշեցնենք, որ «Բանդա»-ի գործով անցնողները մեղադրվում են բարձրաստիճան պաշտոնատար անձանց բնակարաններում և առանձնատներում ավազակային հարցակումներ կատարելու մեջ:

ՊԱՏՄՈՒԹՅԱՆ ՄՈՒԹ, ԱՆԱՎԱՐՏ ԷՋԸ. ԱՌԱՋԻՆ ՀԱՄԱՇԽԱՐՀԱՅԻՆ ՊԱՏԵՐԱԶՄՆ ՈՒ ՀԱՅՈՑ ՑԵՂԱՍՊԱՆՈՒԹՅՈՒՆԸ

 Այսօր առավոտյան ՄԱԿ-ում ՀՀ Նախագահ Սերժ Սարգսյանի ելույթից ժամեր առաջ ամերիկյան հեղինակավոր “International New Yourk Times” պարբերականը հրապարակել է ՀՀ նախագահ Սերժ Սարգսյանի հեղինակային հոդվածը, որը ներկայացնում ենք թարգմանաբար:

 Այս տարի լրանում է իր մասշտաբների և դաժանության  մեջ աննախադեպ մարդկային մեծ աղետի` Առաջին համաշխարհային պատերազմի հարյուրամյակը: Այն խլեց մոտ 14 միլիոն մարդկային կյանք, որոնցից 5 միլիոնը քաղաքացիական անձինք էին, իսկ 9 միլիոնը՝ զինվորականներ: Միլիոնավոր մարդիկ էլ վիրավորվեցին, դարձան ռազմագերիներ կամ  տեղահանվեցին՝ ստիպված լինելով լքել իրենց հայրենի հողերը:  Վերջիններիս թվում էին նաև հայերը, ովքեր գրեթե բնաջնջվեցին երկրի երեսից:

Հաջորդ տարի հայ ժողովուրդը ոգեկոչելու է այն իրադարձությունների հարյուրամյակը, որոնք հանդիսացան Օսմանյան կայսրությունում հայ բնակչության զանգվածային տեղահանումների և սպանությունների գագաթնակետը: 1915թ. դարձավ Օսմանյան Թուրքիայի կողմից մշակված և դեռևս 19-րդ դարի վերջերից գործի դրված՝ հայերի նկատմամբ էթնիկ զտումների, կոտորածների և  ցեղասպանության քաղաքականության բարձրակետը, որը որպես  այդպիսին ճանաչվել է դեռևս այդ ժամանակ: 1915թ. մայիսի 24-ին Մեծ Բրիտանիայի, Ֆրանսիայի և Ռուսաստանի կառավարությունները հանդես եկան համատեղ հայտարարությամբ, որտեղ նշվում էր, որ «Օսմանյան իշխանությունների թողտվության պայմաններում, հաճախ նաև վերջիններիս աջակցությամբ,  մոտավորապես մեկ ամիս շարունակ Հայաստանի քուրդ և թուրք բնակչությունը կոտորում է հայերին»: Այս հայտարարությունը կարող է համարվել այն առաջին միջազգային փաստաթուղթը, որտեղ հիշյալ իրադարձությունները որակվել են որպես «մարդկության և քաղաքակրթության դեմ իրականացված Թուրքիայի նոր հանցագործություն»:

Երիտթուրքերի կառավարության կողմից իրականացված՝ մի ողջ ազգի ոչնչացմանն  ուղղված վայրագությունների չափերն ու մասշտաբները դարձնում են դրանք աննախադեպ պատմական ողբերգություն, որը խլեց 1.5 միլիոն հայի կյանք: Այն մի ողջ ազգի ոչնչացման նպատակ էր հետապնդում, և  դա գրեթե հաջողվեց: 1929թ. լույս տեսած «Համաշխարհային ճգնաժամը» գրքում Ուինստոն Չերչիլը գրելու էր. «Պատմությունն ապարդյուն է փնտրելու Հայաստան բառը»:

Իսկապես, լեհ իրավագետ Ռաֆայել Լեմկինը առաջին անգամ գործածել է «ցեղասպանություն» եզրույթը՝ բնորոշելու ինչպես Առաջին համաշխարհային պատերազմի ընթացքում հայերի զանգվածային կոտորածը Օսմանյան իշխանությունների կողմից, այնպես էլ Երկրորդ համաշխարհային պատերազմի տարիներին նացիստների կողմից հրեաների զանգվածային սպանությունները: Երկու դեպքում էլ զանգվածային սպանությունները տեղի են ունեցել առավել լայն՝ պատերազմի համատեքստում: Ըստ պատմաբան Մարկ Լևինի,  դա պատերազմ է ոչ թե պետությունն ընդդեմ պետության,     այլ պետությունն ընդդեմ ազգի: Այլ խոսքերով, ցեղասպանությունը պատերազմի տեսակ է, որը պետությունը կամ ռեժիմն իրագործում է ժողովրդի դեմ:

Հայոց ցեղասպանությունը Երկրորդ համաշխարհային պատերազմի ժամանակ իրականացված  հրեաների Ողջակիզման, Կամբոջայում, Ռուանդայում, Դարֆուրում  իրագործված ցեղասպանությունների տխրահռչակ «իրավանախորդն» էր: Պատմության մութ շրջանը  կրկնում է ինքն իրեն մասամբ նաև անցյալում անավարտ մնացած գործերի պատճառով: Հայոց ցեղասպանության անպատիժ մնալու փաստը մեծ խթան էր ապագա բռնապետերի համար: Ադոլֆ Հիտլերը, օրինակ,  եկավ այն եզրահանգման, որ միջազգային հանրությունը պատրաստ է հանդուրժելու ցեղասպանությունները, հատկապես երբ դրանք տեղի են ունենում «պատերազմի մշուշի» ներքո: Հիտլերի մտքում մեծ մասամբ հայերի կոտորածներն էին, երբ 1931թ.՝ նախքան իշխանության գալը, նա քննարկում էր ոչ գերմանացի փոքրամասնությունների տարաբնակեցման քաղաքականության անհրաժեշտության հարցը. «Մենք մտադիր ենք իրականացնել տարաբնակեցման քաղաքականություն: Մտածե՛ք աստվածաշնչյան տեղահանությունների և միջնադարյան կոտորածների մասին… և հիշե՛ք հայերի բնաջնջումը»: 1939թ. Հիտլերը կրկնեց այս խոսքերը լեհ բնակչության հանդեպ ծրագրած քաղաքականության համատեքստում. «Ես պատրաստության եմ բերել  իմ ստորաբաժանումները, առայժմ միայն արևելքում` հրամայելով նրանց, առանց գթալու և խղճահարության, անխտիր սպանել լեհ ազգին կամ լեզվին պատկանող բոլոր տղամարդկանց, կանանց և երեխաներին: Միայն այս միջոցով մենք ձեռք կբերենք մեզ անհրաժեշտ կենսական տարածքները: Ի վերջո, այսօր ո՞վ է խոսում հայերի բնաջնջման մասին»:

Հայոց ցեղասպանությունը հիշեցում է մեզ պատմության դասերը չսերտելու, ցեղասպանությունը ժխտելու վտանգների, ինչպես նաև հանցագործություններն անպատիժ և չճանաչված թողնելու երկարաժամկետ բացասական հետևանքների մասին: Նախկինում տեղի ունեցած ցեղասպանությունների ճանաչումը, ինչպիսին Հայոց ցեղասպանությունն է, ապագա ցեղասպանությունները հասկանալու և կանխարգելելու բանալին է: Չնայած 1948թ. ՄԱԿ-ի կոնվենցիայի գոյությանը, որը կոչված է կանխարգելելու հետագա ցեղասպանությունները՝ մենք վստահ ենք, որ այս կամ ցանկացած այլ փաստաթուղթ չի կարող պատշաճ կերպով իրականացվել, քանի դեռ նախորդ կոտորածները չեն , ճանաչվել: Մենք համարում ենք, որ Հայոց ցեղասպանությունը ոչ միայն մեր ժողովրդի ողբերգությունն է, այլև մարդկության դեմ համաշխարհային մասշտաբի հանցագործություն: Եթե այն արդարացիորեն ճանաչվեր, կարող էր ապագա ոճրագործությունները կանխարգելող դեր կատարել: Հայաստանը շարունակելու է ակտիվորեն աշխատել ՄԱԿ-ի շրջանակներում և այլ միջազգային հարթակներում՝ հասնելու աշխարհի  ցանկացած մասում նմանատիպ գործողությունների  համընդհանուր դատապարտմանը:

Հայոց ցեղասպանության ոգեկոչումը մշտապես շատ կարևոր է եղել աշխարհասփյուռ հայության՝  համար, որոնց հետնորդները  հազարամյակներ շարունակ, մինչև վայրենաբար արմատախիլ արվելը, ապրել են իրենց հայրենիքում: Անկախ և ազատ Հայաստանի բացակայության պայմաններում սփյուռքը և նրա հաստատությունները ձևավորվել են որպես հայկական ժառանգության պահապաններ մինչ ազատ հայ ժողովրդի վերածնունդը:

Քսաներեք տարի առաջ հայկական եռագույնը կրկին ծածանվեց Երևանում՝ խորհրդանշելով անկախ հայրենիքի վերածնունդը: Հայ ժողովուրդը ստացավ իր հայրենիքում ազատ ապրելու մի նոր հնարավորություն:

Հայաստանի վերահաստատված անկախությունը Թուրքիայի հետ հարաբերությունների նոր դարաշրջան սկսելու հնարավորություն էր: Հայաստանի դիրքորոշումն արտացոլված է տասնամյակների պատմություն ունեցող «առանց նախապայմանների» հարաբերություններ հաստատելու սկզբունքի մեջ: Այն 2008թ. Թուրքիայի հետ բանակցություններ սկսելու, ինչպես նաև  2009թ. ստորագրված արձանագրություններում ամրագրված հիմնական սկզբունքն էր: Գաղափարն  էր դրական միջավայր ստեղծել դիվանագիտական հարաբերությունների հաստատումից և սահմանների բացումից հետո երկու հասարակությունների միջև երկկողմ հարաբերությունների զարգացման, փոխըմբռնման և հաշտեցման համար:

Դժբախտաբար, Թուրքիան, հետ կանգնելով  ձեռք բերված համաձայնություններից, հրաժարվել է դիվանագիտական հարաբերություններ հաստատել, շարունակում է փակ պահել Հայաստանի հետ սահմանը, ապօրինի տնտեսական շրջափակում է իրականացնում և մերժում է անցյալում իրագործված հանցագործությունների և անարդարությունների պատմական ճշմարտությունը: Մի կողմ դնելով պատմական ճշմարտությունը՝ քանի դեռ երկաթե վարագույրի վերջին հատվածը՝ հայ-թուրքական սահմանը, շարունակում է փակ մնալ, այն խաթարելու է կովկասյան տարածաշրջանի առողջ զարգացումն ու տարածաշրջանային ինտեգրացիան՝ մշտապես անկայունություն ներարկելով աշխարհի ռազմավարական առումով այս զգայուն հատվածում:

Հայ-թուրքական երկկողմ հարաբերությունների ապագան պետք է հիմնվի երկու պետությունների միջև հարաբերությունների պատմական հաշտեցման վրա: Պատմական ճշմարտության ընդունումը կարող է օգնել հաղթահարելու հայ և թուրք ժողովուրդների միջև եղած խոր տարաձայնությունները: Մենք հավատացած ենք, որ Հայոց ցեղասպանության ճանաչումը չի կարող որևէ կերպ դիտարկվել որպես թուրք ժողովրդի արժանապատվության ոտնահարում, նրա նկատմամբ սպառնալիք կամ հարձակում: Շատ թուրք մտավորականներ, գրողներ, գիտնականներ սկսել են բացահայտ կերպով խիզախորեն և շիտակ քայլել ինքնավերլուծության և ուսումնասիրության դժվարին ուղիով: Այս համատեքստում կարևոր է, որ միջազգային հանրությունն աջակցի, խրախուսի թուրք քաղաքական առաջնորդներին արդարությանն ու պատմական ճշմարտությանը նույն նվիրվածությունը ցուցաբերելու հարցում, որ արդեն իսկ արել են հարգանք վայելող իրենց համաքաղաքացիները՝ արժանապատվորեն և մարդասիրաբար եզրափակելու մարդկային պատմության մութ, անավարտ էջերից մեկը:

Սեպտեմբերի 23-ին Նյու Յորքում ՀՀ Նախագահի գլխավորած պատվիրակության կազմում ՄԱԿ-ի Գլխավոր Ասամբլեայի 69-րդ նստաշրջանի աշխատանքներին մասնակցող Հայաստանի արտգործնախարար Էդվարդ Նալբանդյանը հանդիպեց ԵԱՀԿ Մինսկի խմբի համանախագահներ Իգոր Պոպովի, Պիեր Անդրյոի, Ջեյմս Ուորլիքի, ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրչիկի հետ: Այնուհետև հանդիպումը շարունակվեց Ադրբեջանի արտգործնախարար Էլմար Մամեդյարովի մասնակցությամբ։

Սեպտեմբերի 24-ին Արտակ Դավթյանի նախագահությամբ ՀՀ ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովը քննարկել է ՀՀ կրթության և գիտության նախարարության կողմից պետական բյուջեի միջոցներով իրականացվող ծառայությունների և ապրանքների գնումների ուղղությամբ ՎՊ իրականացրած վերահսկողության արդյունքները: Նիստին մասնակցել են ՀՀ կրթության և գիտության փոխնախարար Մանուկ Մկրտչյանը և ՀՀ Վերահսկիչ պալատի նախագահ Իշխան Զաքարյանը: Այս մասին հայտնում են Ազգային ժողովի լրատվական ծառայությունից:

ՎՊ մասնագիտական հանձնաժողովի նախագահ Մեսրոպ Հակոբյանը նշել է, որ ՎՊ կողմից ուսումնասիրվել են մի շարք ծրագրեր և վերահսկողության արդյունքներով որոշ խախտումներ ու անհամապատասխանություններ են արձանագրվել հիմնականում «Հատուկ կրթություն» և «Մասնագիտացված հանրակրթական ուսուցում» ծրագրերի մասով:

ՎՊ նախագահ Իշխան Զաքարյանը նշել է, որ վերահսկողության ընթացքում արձանագրված բոլոր խախտումների և թերությունների վերացման և հետագայում դրանց բացառման նպատակով ՀՀ կրթության և գիտության նախարարությունը, ի տարբերություն մյուս պետական մարմինների, ցուցաբերել է կառուցողական մոտեցում: Ըստ ՎՊ նախագահի՝ «Վերահսկիչ պալատ և վերահսկվող օբյեկտ» համագործակցության շնորհիվ բացահայտված շատ խնդիրներ վերահսկողության ընթացքում ստացել են իրենց լուծումները:

ՀՀ կրթության և գիտության փոխնախարար Մանուկ Մկրտչյանը անդրադարձել է ՎՊ բացահայտումներին և դպրոցներում առկա խնդիրներին:

ԱԺ պատգամավորները և ուսումնական հաստատությունների ներկայացուցիչները ևս հաշվետվության վերաբերյալ ներկայացրել են իրենց նկատառումները: Նրանք անդրադարձել են «Գնումների մասին» ՀՀ օրենքի բացթողումներին, գնումների գործընթացում առկա խնդիրներին:

Մարգարետ Թետչերի իշխանության տարիներին իրականացվող սոցիալ-տնտեսական քաղաքականությունը հետագայում կոչվեց «թետչերիզմ»։ Նա հայտնի է որպես «երկաթյա լեդի» (iron lady). առաջին և դեռևս միակ կինը, որը զբաղեցրել է Մեծ Բրիտանիայի վարչապետի պաշտոնը։

Ձեզ ենք ներկայացնում Մարգարետ Թետչերի լավագույն մտքերը.

1.Աքաղաղը գուցե բարձր ձայն ունի, բայց ձուն հավերն են ածում.

2. Եթե դուք ցանկանում եք ինչ-որ բան քննարկել, դիմե՛ք տղամարդուն: Եթե ցանկանում եք ինչ-որ բան անել, դիմե՛ք կնոջը:

3. Տունը պետք է լինի կնոջ աշխարհի կենտրոնը, բայց ոչ սահմանը.

4. Երբ բնավորությունն առաջնորդում է կնոջը, նրա մասին ասում են «կախարդ է », իսկ երբ բնավորությունն առաջնորդում է տղամարդուն, ասում են «հիանալի մարդ է »:

5. Եթե ինձ քննադատողները տեսնեն, որ ես քայլելով անցնում եմ Թեմզան, ապա նրանք կասեն, որ ես լողալ չգիտեմ:

6. Անվճար պանիր կարող է լինել միայն մկան թակարդում:

7. Այսօր կանայք իրենց դրսևորելու բազմաթիվ հնարավորություններ ունեն, մեզանից որոշները նույնիսկ երկրներ են կառավարում, բայց անկեղծ ասած, մեզ ավելի շատ ձեռքի պայուսակ է սազում, քան սվին:

8. Պետք է լավ ուսումնասիրել թշնամուն, որպեսզի մի օր նրան հնարավոր լինի վերածել ընկերոջ.

9. Հզոր լինելը նման է իսկական կնոջ լինելուն: Եթե դու ստիպված ես մարդկանց ասել, որ դու այդպիսին ես, ուրեմն դու այդպիսին չես:

10. Ես սիրում եմ փաստարկներ: Ես սիրում եմ բանավեճ: Ես ոչ մեկից չեմ ակնկալում նստել և համաձայնվել ինձ հետ. դա չէ նրանց աշխատանքը:

11. Ես ունեմ կնոջ այն հատկանիշը, որ «կպչում է» գործին և ավարտին հասցնում այն, նույնիսկ երբ բոլորը վեր են կենում եւ հեռանում են:

12. Միշտ նայիր աչքերի մեջ, այդպես մարդիկ կհիշեն քեզ:

13. Ի տարբերություն տղամարդկանց, կանայք ավելի հեշտ են «ՈՉ» ասում:

14. Ես շատ համբերատար եմ, բայց կա մի պայման. վերջում իմ ուզածով պետք է լինի:

15. Հայրս ասում էր, որ երբեք մի գնա ամբոխի հետևից, այլ առաջնորդիր նրան: Մոռացիր «դա չափազանց դժվար է», կամ  «ես դա չեմ կարող անել» բառերը:

16. Ճանապարհի մեջտեղում կանգնելը շատ վտանգավոր է: Ձեզ կարող են երկու կողմից էլ հարվածել:

17. Աշխատում եմ չհիշել, որ կին եմ, ուստի դրա համար կենտրոնանում եմ աշխատանքիս վրա:

18. Ես պետք է փոխեմ «Օգնություն տվեք խնդրում եմ» բառերը «Անենք ամեն ինչ ինքներս» արտահայտությամբ, իսկ «Նստենք ու սպասենք» մտածելակերպը` «Արթնանանք ու գործենք» գաղափարով:

19. Ցանկացած կին, ով հասկանում է ընտանիք կառավարելու խնդիրները, մոտ է նաև երկիր կառավարելու խնդիրները հասկանալուն:

20. Ծրագրիր քո օրն այսօր և ամեն օր, հետո իրագործիր պլաններդ:

Երևան Մոլում գործող Grand Pharm դեղատանը ժամկետանց դեղ են վաճառում:

Այսօր «Հայկական Վարկած»- ի խմբագրություն զանգահարած քաղաքացին վրդովված պատմեց, որ երեկ Grand Pharm  դեղատնից գնել է «Ալկոգել» հակամանրէային ախտահանիչ, որի տուփի վրա որպես պիտանելիության ժամկետ նշված է մինչև 05.16 թվականը, սակայն  ուշադիր նայելով՝ ինքը նկատել է, որ այդ ամսաթվի ներքևի հատվածում սև նյութով ինչ-որ բան է քողարկված: Ծածկույթը ջնջելիս երևացել է, որ դեղի պիտանիելության նախնական տարեթիվը 01.13թ.-ն է:

Հարցի վերաբերյալ փորձեցինք պարզաբանում ստանալ Հայաստանում նշված դեղի ներկայացուցիչ «Արսանիտ»  դեղագործական ընկերութունից, սակայն նրանց հետ կապ հաստատել չհաջողվեց:

Դիմեցինք Առողջապահության նախարարության դեղերի բաժին: Վարդուհի անունով ներկայացած աշխատակիցը, մեզ առաջարկեց դիմում գրել և դեղի ու կտրոնի հետ միասին ներկայացնել Առողջապահության նախարարին, որպեսզի ճշտումներ արվեն, քանի որ, ըստ նրա, հաճախորդները երբեմն ճիշտ չեն հասկանում: