ՀԱՊԿ երկրների նախագահները նախօրեին Բիշքեկում տեղի ունեցած ոչ պաշտոնական գագաթնաժողովի ընթացքում վերջապես կայացրել են Հայաստանի ներկայացուցչին այդ կազմակերպության գլխավոր քարտուղարի պաշտոնում ներկայացնելու որոշումը, որի մասին խոսվում էր արդեն մեկ տարի և ավելի ժամանակահատված: Այդ պաշտոնը կզբաղեցնի Հայաստանի ԶՈՒ գլխավոր շտաբի նախկին պետ, ԱԱԽ քարտուղար Յուրի Խաչատուրովը: Նա պաշտոնը կստանձնի մայիսի 2-ից:

Այս նշանակումը առաջացնում է մի շարք հարցեր, այն հարցադրումների կոնտեքստում, որ կային ՀԱՊԿ գործունեության և Հայաստանի նկատմամբ ՀԱՊԿ վերաբերմունքի, մասնավորապես հայ-ադրբեջանական կոնֆլիկտում ՀԱՊԿ դիրքորոշման, Ադրբեջանի հանդեպ ՀԱՊԿ անդամների վերաբերմունքի մասով: Ի՞նչ է փոխելու Հայաստանի ներկայացուցչի պաշտոնավարումը գլխավոր քարտուղարի կարգավիճակում: ՀԱՊԿ-ը դրանից ավելի՞ պարտաճանաչ է դառնալու իր պարտավորությունները Հայաստանի հանդեպ կատարելու մասով: Բելառուսը, Ղազախստանը դադարելո՞ւ են Հայաստանից ավելի ջերմ լինել Բաքվի հանդեպ, Ռուսաստանը դադարելո՞ւ է Ադրբեջանին սպառազինություն մատակարարելը: Երբ Ադրբեջանը դիվերսիաներ իրականացնի Հայաստանի հանդեպ, ՀԱՊԿ դադարելո՞ւ է լռել և անելո՞ւ է քաղաքական հայտարարություններ, գոնե:

ՀԱՊԿ-ը Հայաստանի մասով այն աստիճան է անհավատարիմ եղել դաշնակցային պարտավորություններին, որ պաշտոնական Երևանը Սերժ Սարգսյանի մակարդակով անգամ արտահայտվել է դրա կապակցությամբ, մի քանի անգամ մտահոգություն հայտնելով այդ իրողությամբ:

Ի՞նչ է փոխվելու այդ հարցում, երբ ՀԱՊԿ գլխավոր քարտուղարի պաշտոնում նշանակվում է Հայաստանի ներկայացուցիչը: ՀԱՊԿ դրանից ավելի՞ սերտ դաշինք կդառնա, թե՞ ընդամենը Հայաստանին արվում է այսպես ասած բարոյական ժեստ, որով էլ ՀԱՊԿ առանձին անդամներ իրենց այսպես ասած էլ ավելի մեծ բարոյական իրավունք կվերապահեն Ադրբեջանի հետ սիրախաղերի հարցում: Հարցերն իսկապես շատ են:

Մի բան հստակ է, որ ՀԱՊԿ գլխավոր քարտուղարի պաշտոնը գործադիր պաշտոն է, այսինքն ոչ թե որոշումներ կայացնող, այլ կայացված որոշումների հիման վրա աշխատող: Որոշումներ կայացնելու են ՀԱՊԿ անդամ պետությունները: Իսկ նրանք որոշում կայացնելու են իրենց ազգային-պետական շահերից ելնելով: Այդ շահերի փոխարեն Հայաստանի ներկայացուցիչ չի նշանակվել, այդ շահերը մնում են անփոփոխ:

Հետևաբար, առերևույթ բավական հնչեղ իրադարձությունը պրակտիկ քաղաքականության իմաստով մեծ հաշվով արարողակարգային է: Մյուս կողմից, իհարկե պետք չէ բացառել կուլիսային գործոնների առկայությունը, որոնք գուցե նպաստեին, որ Հայաստանի ներկայացուցչի հարցը ի վերջո լուծվեց՝ մի քանի հետաձգումից հետո:

Բայց այդ հանգամանքը առավել ևս առաջացնում է հարցեր և գուցե մտահոգություններ, որովհետև եթե խնդիրը լուծվում է կուլիսային հանգամանքների ազդեցությամբ, ապա հարց է առաջանում, թե որն է գինն ու ով է այն վճարելու, կամ ով ինչ գին է վճարելու:

Միով բանից, Հայաստանի ներկայացուցչի անունը հայտնվել է բավական պատասխանատու մի դիրքում: Բայց պարզ չէ, թե այդ դիրքում որն է Հայաստանի շահը և ինչ դիրքում է Հայաստանը:

1in.am

ՀԱՊԿ գլխավոր քարտուղարի պաշտոնը մայիսի 2-ից  կստանձնի Յուրի Խաչատուրովը:

Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը, ԳԱԼԱ-ի հետ զրույցում անդրադառնալով այս նշանակմանը, նշեց.

«Հայաստանի կողմից Յուրի Խաչատուրովի թեկնածությունն ի սկզբանե էր առաջադրված ՀԱՊԿ-ի գլխավոր քարտուղարի պաշտոնում, դեռ այն ժամանակ, երբ որ Սեյրան Օհանյանին եւ Խաչատուրովին ազատեցին ՀՀ պաշտպանության նախարարի եւ ՀՀ ԶՈՒ գլխավոր շտաբի պետի պաշտոններից: Նշանակում պետք է լիներ դեռեւս անցած տարի, սակայն գործընթացը հետաձգվեց եւ  պաշտոնական որեւէ դիրքորոշում չներկայացվեց, թե ինչու: Բայց ԶԼՄ-ների տարածած տեղեկությունների համաձայն՝ կարելի էր ենթադրել, որ դա կապված էր ապրիլյան պատերազմից հետո ստեղծված իրավիճակով, երբ որ Ադրբեջանի եւ ՀԱՊԿ-ի անդամ մյուս պետությունների միջեւ սերտ հարաբերությունները որոշակի առումով խոչընդոտ հանդիսացան Խաչատուրովի պաշտոնի նշանակմանը: Այդ շրջանում դա կարող էր ոչ ճիշտ ընկալվել Ադրբեջանի իշխանությունների կողմից, որպես ուղղակի աջակցություն Հայաստանին»:

Այժմ, երբ արդեն հրապարակվեց Խաչատուրովի նշանակման մասին լուրը, Արթուր Սաքունցը հետաքրքրական է համարում հետեւյալ հարցը. արդյո՞ք այդ տարաձայնությունները հարթվել են Ադրբեջանի եւ ՀԱՊԿ-ի մյուս անդամ պետությունների միջեւ: Թեեւ երեւույթը համարում է արտառոց, որ ՀԱՊԿ-ի անդամ պետությունները  փոխանակ միմյանց հետ հարցերը լուծեն եւ նշանակումները պայմանավորված լինեն միմիայն ՀԱՊԿ-ի շահերով, ստիպված  են հաշվի նստել Ադրբեջանի հետ, որը ՀԱՊԿ անդամ չէ:

«Հաշվի առնելով, որ կա իրողություն, որ ՀԱՊԿ-ն, որպես այդպիսին, միասնական չէ եւ ակնհայտ  հակասություններ կան  անդամ պետությունների միջեւ, պետք է ենթադրել, որ ուրեմն Ադրբեջանի կողմից ստացել են հավանություն, որ Խաչատուրովը նշանակվի ՀԱՊԿ գլխավոր քարտուղարի պաշտոնում: Հակառակ պարագայում ինչո՞ւ պետք է  ավելի շուտ չնշանակվեր: Դա նշանակում է, որ Ադրբեջանն առնվազն դեմ չի եղել կամ հավանություն է տվել Խաչատուրովի նշանակմանը»,- նշում է Արթուր Սաքունցը՝ հավելելով. «Ուրիշ ո՞վ, եթե ոչ Խաչատուրովն է իր բնույթով, իր մոտեցմամբ, իր տեսակով առավել քան համապատասխանում ՀԱՊԿ-ի գլխավոր քարտուղարի պաշտոնում: Ինքը հենց հանդիսանում է ռուսական մշակույթի տիպիկ ներկայացուցիչն իր ամբողջ կոռումպացված էությամբ, հակաժողովրդավարական, հակաիրավական մտածելակերպով եւ գործելակերպով, ով ապրիլյան պատերազմի զոհերի ուղղակի  պատասխանատուներից մեկն է, իր գլխավոր հրամանատարի հետ միասին, պաշտպանության նախարարի հետ միասին: Լրատվամիջոցներն էլ հրապարակեցին այն տեղեկությունները, որ չնայած ահազանգերին, որ կա հարձակման վտանգ, այնուամենայնիվ, նա համարժեք չի գործել ժամանակին: Դրա մասին որեւէ  հերքում չի տրվել ո՛չ Խաչատուրովի կողմից, ո՛չ գերագույն գլխավոր հրամանատար կոչեցյալ անձի կողմից եւ ոչ էլ որեւէ պաշտոնական հերքում,  որ այդ լուրերը չեն համապատասխանում իրականությանը:

Խաչատուրովը ՀԱՊԿ-ում  Հայաստանի ներկայացուցիչը չէ, դա ձեւական է, ինքն ինչպես եղել է Ռուսաստանի Դաշնության զինվորականության ներկայացուցիչը, այնպես էլ շարունակում է մնալ:

Նա ընդհանրապես դուրս էլ չէր եկել այդ համակարգից»:

Արթուր Սաքունցի կարծիքով, միամտություն  է որեւէ ակնկալիք ունենալ Խաչատուրովի նշանակման հետ կապված: Ասենք մտածել, որ կլինի համարժեք արձագանք, երբ Ադրբեջանը գնդակոծի Հայաստանի սահմանները:

«Ինչպես չի եղել, չի էլ լինելու արձագանք ՀԱՊԿ-ի կողմից: Այնտեղ Խաչատուրովը շատ փոքր անձ է, որ կարողանա ինչ-որ իրավիճակ փոխել, հատկապես, որ այդ անձից որեւէ ակնկալիք չէինք էլ կարող ունենալ: Սկզբունքային մեկին այնտեղ, բնականաբար, չէին էլ նշանակի: Բայց եթե ինչ-ինչ ենթադրությունների հիման վրա նշանակվեր որեւէ սկզբունքային մարդ, բնականաբար նա պետք է գործեր ՀԱՊԿ-ի կանոնադրությունից ելնելով, համաձայն որի պետք է անդամ պետության անվտանգության հարցերով մտահոգված լինեին: Բայց ես ինչքան հասկանում եմ, ՀԱՊԿ-ի շրջանակներում քննարկվող հիմնական հարցերից մեկը դա կանխել գունավոր հեղափոխություններն անդամ երկրներում: Բառացիորեն մի քանի օր առաջ Պուտինն իր հերթական հարցազրույցներից մեկում դրա մասին բարձրաձայնեց: Ժամանակին դրա մասին հայտարարում էր նաեւ Բորդյուժան՝ նախկին գլխավոր քարտուղարը: Իսկ Խաչատուրովն այդ տեսակետից նաեւ առավել քան  հարմար թեկնածու է, որովհետեւ ինքը ողջ էությամբ հակաժողովրդավարական է: Եվ նա լավագույն տարբերակն է Ռուսաստանի ձեռքին,  ով ամեն ջանք կգործադրի՝ ձգտելով լինել ավելի կաթոլիկ, քան Հռոմի պապը:

Խաչատուրովը լավագույն  գործիքն է Կրեմլի ձեռքին Հայաստանում ժողովրդավարության դեմ պայքարի առումով, այնպես որ, միանշանակ ես այս նշանակումը համարում եմ մարտահրավեր: Ոչ թե արտաքին անվտանգության ապահովման, այլ հենց ներքին ավտորիտար ռեժիմի շահերից բխող, հասարակական ըմբոստ շարժումները վերացնելու, կանխելու եւ հպատակեցնելու տեսակետից է դա լուրջ մարտահրավեր»,- ընդգծում է Արթուր Սաքունցը:

Անդրադառնալով հարցին, թե, այնուամենայնիվ, կան մարդիկ, ովքեր ոգեւորվել են, որ ՀԱՊԿ-ն գլխավորում է Հայաստանի ներկայացուցիչը, Սաքունցը նշեց.

«Ես չգիտեմ ովքեր են ոգեւորվել, հաստատ Եվրասիական ուղղվածության կրեմլահպատակներն են, որոնք իրենց ողջ էությամբ դեմ են Հայաստանում ժողովրդավարության եւ իրավական պետության հաստատմանը եւ շատ լավ հասկանում են, որ հանձինս Խաչատուրովի ստացանք գեներալ-գուբերնատոր, եւ այդ առումով Սերժ Սարգսյանը պետք է մտածի՝ հիմա ի՞նքն է Հայաստանի   գուբերնատորը, թե՞ Խաչատուրովը»:

galatv.am

https://www.youtube.com/watch?v=gbk_4DmsCVs

lragir.am-ի րուցակիցն է Արցախի հերոս, գեներալ-մայոր Արկադի Տեր-Թադևոսյանը (Կոմանդոս)

Պարոն Տեր-Թադևոսյան, նշվում է, որ առաջնագծի պաշտպանությունն անճանաչելի է դարձել, «Վերբա» զենիթահրթիռային համալիր ենք ձեռք բերել։ Սա ի՞նչ է տալիս մեր պաշտպանությանն ու անվտանգությանը։

Այո, մենք ստացել ենք «Վերբա» զենիթահրթիռային համալիր, դա ունեն Ռուսաստանն ու Հայաստանը։ Ինչ վերաբերում է առաջնագծին, ապա պետք է նշեմ, որ շատ լավ ինժեներական աշխատանքներ են իրականացվում, նոր համակարգեր ու սարքավորումներ են տեղադրվում։ Բացի դրանից, կան նաև պաշտպանության ամրապնդման այլ տարբերակներ, որոնք հիմա մենք մշակում ենք և կառաջարկենք պաշտպանության նախարարությանը։

Փաստորեն քառօրյա պատերա՞զմը պատճառ դարձավ, որ սկսենք առաջնագծի ամրացման աշխատանքները։

Պարզապես մի փոքր կորցրել էինք զգոնությունը։ Ինչ գիծ էլ լինի, այն կարելի է անցնել, ինչ տեխնիկա էլ տեղադրես։ Այստեղ ամենագլխավոր դերը մարդն է խաղում, մարդկային գործոնը, ու մենք տեսանք, որ մեր հասարակ զինվորները հակառակորդի հատուկջոկատայիններին ինչպես հաղթեցին։ Անգամ օտարերկրյա մասնագետներն էին զարմացած, թե դա ինչպես է հնարավոր եղել։ Հիմա մեր սահմանն էլ ավելի ամուր է, այն ամրապնդվում է, ամերիկյան համակարգեր են նաև տեղադրվում։ Դա ապագայի զենք է, որը շատ քիչ երկրներ ունեն։ Այդ համակարգը միանգամից մոտ 10 գործառույթ է իրականացնում, որոշում է հակառակորդի գտնվելու վայրը, նաև թե ինչով է զբաղված հակառակորդը։ Դա իրականացվում է գիշեր-ցերեկ։ Ամենակարևորը, այդ համակարգը տեղեկացնում է և օգնում հրամանատարությանը որոշումներ կայացնելիս։ Այն բոլոր տեղաշարժերը, որոնց մասին նախկինում շատ դժվար էր տեղեկանալ, հիմա հեշտությամբ իրականացվում է։Այդ համակարգը ամերիկացիները մեզ են տվել, մենք էլ փոխանցել ենք Արցախին։ Իհարկե, Ադրբեջանն աղմուկ է բարձրացրել, թե ինչու իրենց էլ չեն տալիս։ Այնպես որ, սահմանին մենք շատ հետաքրքիր սպառազինություն ունենք։ Այդ համակարգը թույլ է տալիս պարզել, թե որտեղ է հակառակորդի տեխնիկան, նրա հեռավորությունը, տեղաշարժը խորությամբ, իսկ դա օգնում է հրամանատարներին որոշել, թե ինչ միջոցներով կարելի է ոչնչացնել հակառակորդի տեխնիկան։ Սա շատ հզոր համակարգ է։

Ձեր կարծիքով՝ սահմանին ու շփման գծում այս հարաբերական անդորրը որքա՞ն կպահպանվի։

Ես չեմ կարող ասել, բայց ենթադրում եմ, որ լարվածություն մոտ ժամանակներս չի լինի։ Բոլոր դեպքերում, մենք պետք է էլ ավելի ամրապնդենք պաշտպանությունը և քայլեր անենք, որպեսզի քիչ զոհեր ունենանք։ Ալիևի վարչակազմն այսօր ոչ թե Ղարաբաղի մասին է խսում, այլ Հայաստանի մասին, Երևանն էլ են ուզում վերցնել, բայց դա քարոզչության համար է միայն։ Իսկ լարվածություն միշտ էլ լինելու է, ուստի մենք միշտ պետք է ամրացնենք մեր սահմանը։

Armradio.am-ն գրում է. Արցախա-ադրբեջանական հակամարտ զորքերի շփման գծում ապրիլի 13-ի և լույս 14-ի գիշերը կրկին անհանգիստ է եղել. հակառակորդը տարբեր տրամաչափի հրաձգային զինատեսակներից, հրադադարի պահպանման ռեժիմը խախտել է ավելի քան 45 անգամ՝ հայ դիրքապահների ուղղությամբ արձակելով շուրջ 620 կրակոց:

Այս մասին հաղորդել է Արցախի Հանրապետության Պաշտպանական բանակի լրատվական ծառայությունը՝ շեշտելով, որ հակառակորդի նախահարձակ ակտիվությունը ճնշելու համար ՊԲ առաջապահ զորամասերը դիմել են պատասխան գործողությունների և շարունակել վստահորեն իրականացնել մարտական հերթապահություն: Այսօր ադրբեջանական լրատվամիջոցները հայտնել են, որ Ադրբեջանը պատրաստվում է ապրիլի 16-ից լայնամասշտաբ զորավարժություններ անցկացնել: Սահմանային լարվածության եւ զորավարժություններ անցկացնելու Ադրբեջանի մտադրության շուրջ մեր գործընկերը զրուցել է ԼՂՀ նախագահի խոսնակ Դավիթ Բաբայանի եւ ՀՀ պաշտպանության նախարարի խոսնակ Արծրուն Հովհաննիսյանի հետ:

Հերթական անգամ սրելով արցախա-ադրբեջանական սահմանային իրավիճակը՝ հակառակորդը տարբեր տրամաչափի հրաձգային զինատեսակներ է կիրառել: Անդրադառնալով փաստին՝ ԼՂՀ նախագահի մամուլի խոսնակ Դավիթ Բաբայանը նկատեց, որ Ադրբեջանն իր բնույթին հավատարիմ է մնում: Պետք է հաշվի առնել, որ երբ տոն օրեր են մոտենում հակառակորդն ընդգծված ձեւով իր սեւ գործն է փորձում անել՝ լարել իրավիճակը: Հիմա էլ Սուրբ Զատկի տոնին ընդառաջ է նույնը անում:

«Ստեփանակերտը մոտ 10 տարի առաջ համանախագահներին առաջարկել է՝ որպես փոխվստահության և կայունության պահպանման մեխանիզմ, ներդնել այն գաղափարը, որ տոն օրերին՝ կրոնական, ազգային, զինադադարի ռեժիմը չխախտվի: Համանախագահները սա ընդունել են որպես կարևոր առաջարկ, բայց Ադրբեջանը ոչ միայն մերժել է, այլև ի հակառակ դրան՝ հատուկ ընդգծվածությամբ հենց տոն օրերի ժամանակ խախտում է զինադադարի ռեժիմը։ Որևէ արմատական փոփոխություն չկա, պարզապես նման աննորմալ, անմարդկային քաղաքականություն են վարում՝ յյուրովին են փորձում «շնորհավորել» մեզ՝ այդ սուրբ տոնի կապակցությամբ»:

Սահմանները վերահսկվում են, և մեր բանակը, ինչպես միշտ, ռազմավարական նախաձեռնողականությունն իր ձեռքն է պահում՝ շեշտեց ԼՂՀ նախագահի մամուլի խոսնակը։

Ինչ վերաբերում է ապրիլի 16-ից լայնամասշտաբ զորավարժություններ անցկացնելու Ադրբեջանի քայլին: Հայաստանի պաշտպանության նախարարի մամուլի խոսնակ Արծրուն Հովհաննիսյանը մեզ հետ զրույցում նախ շեշտեց, որ Արդրբեջանն այդ զորավարժություններն, ըստ էության, անցկացնում է Վիեննայի փաստաթղթի հետ կապված որոշակի պայմանների խախտմամբ:

«9 հազար զինծառայող եւ ավելի ներգրավվածություն ունեցող զորավարժությունները կանխավ, Վիեննայի փաստաթղթի 41.1-ի համաձայն, պետք է վաղուց իրազեկվեին ԵԱՀԿ-ին, բայց չեն իրազեկվել»:

Փասթաթղթով սահմանված դրույթի խախտման մասին հայկական կողմն արդեն տեղեկացրել է ԵԱՀԿ-ին եւ սպասում է պատշաճ արձագանքի՝ տեղեկացրեց Արծրուն Հովհաննիսյանը՝ հավելելով.

«Ինչ վերաբերում է ընդհանուր առմամբ զորավարժության անցկացմանը, ապա մենք ամեն միջոցներով, մեր բոլոր հնարավորություններով հետեւում ենք հակառակորդի ամեն մի քայլին եւ, հետեւաբար, լուրջ մտահոգության առիթ չենք տեսնում»:

ԼՂՀ նախագահի մամուլի խոսնակ Դավիթ Բաբայանի գնահատմամբ՝ հատկապես հենց ապրիլին զորավարժություններ անցկացնելը հակառակորդի համար նաեւ որոշակի խորհուրդ ունի: 2016-ի ապրիլը նրանց համար կատարյալ ձախողում էր եւ հիմա փորձում են ինչ-որ զորավարժություններով ոտնահարված արժանապատվությունն ինչ-որ ձեւով բարձրացնել: ԼՂՀ-ում նույնպես լուրջ մտահոգության առիթ չեն տեսնում:

«Մենք, իհարկե, ուշի-ուշով հետեւում ենք այդ ամենին: Համապատասխան քայլեր էլ ձեռնարկվում են՝ խաղաղությունն ու կայունությունը պահպանվելու է այսուհետ եւս, որովհետեւ մեր բանակն ի վիճակի է ցանկացած պահի պաշտպանել այդ խաղաղությունն ու կայունությունը»:

Ադրբեջանը, ըստ էության, չի հրաժարվում իր ահաբեկչական քաղաքականությունից: Դավիթ Բաբայանը վստահ է, որ նման պայմաններում երբ այդ երկիրն անցկացնում է զորավարժություններ՝ համանախագահող երկրներն էլ տարբեր խողողակներով իրենց կարծիքները հայտնում են՝ եւս մեկ անգամ հստակորեն ընդգծելով, որ ԼՂ հակամարտության կարգավորման որեւէ ռազմական ճանապարհ չկա: Հետեւաբար, ըստ ԼՂՀ նախագահի խոսնակի, այդ զորավարժություններով Ադրբեջանը ներքին հոգեբանական խնդիր է լուծում: Վերջին հաշվով էլ, խնդիրներ ունեցող ցանկացած երկիր զորավարժություններ անցկացնում է եւ դրանում որեւէ տարօրինակ զարգացումներ դիտարկել պետք չէ՝ եզրափակեց ԼՂՀ նախագահի մամուլի խոսնակ Դավիթ Բաբայանը:

ԱՎԱԳ ՈՒՐԲԱԹ (Խաչելություն)

Նրանք առան Հիսուսին և տարան։ Հիսուսը խաչը շալակած ելավ այն տեղը, որ կոչվում էր Գանգի տեղ, եբրայերեն՝ Գողգոթա։ Այնտեղ խաչեցին նրան և նրա հետ՝ երկու հոգու ևս՝ երկու կողմերից, իսկ Հիսուսին՝ նրանց մեջտեղում։ Պիղատոսը խաչի վրա դնել տվեց մի ցուցատախտակ, որի վրա գրված էր. «Հիսուս Նազովրեցի՝ հրեաների թագավոր»։ Հրեաներից շատերը կարդացին այդ գրությունը, որովհետև այն տեղը, որտեղ Հիսուսը խաչվեց, քաղաքին մոտ էր։ Արձանագրությունը գրված էր եբրայերեն, լատիներեն և հունարեն։
Հրեաների ավագ քահանաներն ասացին Պիղատոսին.
-Մի՛ գրիր՝ «Հրեաների թագավոր», այլ գրի՛ր. «Այս մարդն ասաց՝ ես հրեաների թագավորն եմ»։
Պիղատոսը պատասխանեց. -Ինչ որ գրեցի՝ գրեցի։
Զինվորները Հիսուսին խաչելուց հետո վերցրին նրա հագուստները և չորս մասի բաժանեցին, յուրաքանչյուրին՝ մեկ մաս։ Իսկ քանի որ պատմուճանը առանց կարի էր, վերևից ներքև միակտոր հյուսված, ուստի ասացին միմյանց.
-Չպատռենք դա, այլ եկե՛ք վիճակ գցենք և տեսնենք, թե ո՞ւմ կընկնի։
Այս բանը պատահեց, որպեսզի իրականանա Սուրբ գրքում գրվածը. «Հագուստներս բաժանեցին իրար միջև և պատմուճանիս վրա վիճակ գցեցին»։
Արդ, զինվորները գրվա՛ծն էր, որ կատարեցին։

Առաջիկա հինգ օրերին Հայաստանում եղանակի վատացում է սպասվում։

Այսպես, ապրիլի 14-15–ին հանրապետության մարզերի մեծամասնությունում և Երևանում կանխատեսվում են անձրևներ և ամպրոպներ, որոնք կշարունակվեն նաև ապրիլի 16–18–ը` օրվա առավելապես երկրորդ կեսին։

Քամին կլինի հարավ–արևմտյան` 3-8 մետր վայրկյան արագությամբ, առանձին վայրերում` քամու ուժգնացում մինչև 18-23 մետր վայրկյան։

Նախօրեին Լոս Անջելեսում կայացել է Հայոց ցեղասպանության մասին՝ ռեժիսոր Թերի Ջորջի «Խոստում» ֆիլմի փակ ցուցադրությունը, որին մասնակցել են համաշխարհային մի շարք աստղեր՝ Շառլոտ Լե Բոն, Շեր, Ջեյմս Օլիվեր Կրոմվել, Սիլվեստր Ստալոնե, Սերժ Թանկյան, Օրլանդո Բլում, Քրիստիան Բեյլ, Քիմ և Քորթնի Քարդաշյաններ և այլք:

Ֆիլմի ցուցադրությունից հետո աշխարհահռչակ ամերիկացի դերասան, ռեժիսոր Ջեյմս Օլիվեր Կրոմվելը հայտարարել է՝ մեծ է հավանականությունը, որ ԱՄՆ նախագահ Դոնալդ Թրամփի օրոք ճանաչվի Հայոց ցեղասպանությունը, քանի որ վերջինս «աննորմալ է»: Այս մասին հաղորդում է Variety պարբերականը:

«Մենք որպես Միացյալ Նահանգների նախագահ ընտրել ենք աննորմալ մարդու, և նա նշանակել է մարդկանց, որոնք, իմ կարծիքով, հոգեպես մեռած են երկիրը կառավարելու համար, այսպիսով ամերիկացիները կարող են նայել իրենց իշխանություններին և ասել, որ այն չի աշխատում»,- ասել է Կրոմվելը:

Կրոմվելի խոսքով՝ «մենք պետք է հետ վերցնենք դա»: «Դա կոչվում է՝ մենք մարդիկ ենք, ոչ թե 1%: Մենք արդյունաբերողներ չենք: Մենք ժողովուրդ ենք»,- հավելել է ռեժիսորը:

Կրոմվելի կարծիքով՝ ամերիկացիները պետք է դուրս գան փողոց՝ պահանջելով արդարադատություն, ինչպես նաև պիկետ կազմակերպել Թուրքիայի դեսպանատան մոտ՝ մինչև որ Ցեղասպանությունը ճանաչվի, իսկ փոխհատուցումները վճարվեն:

Քաղաքագետ Սերգեյ Մինասյանի կարծիքով՝ նախորդ տարվա ապրիլյան լարվածության պատճառներից մեկը ռուս-թուրքական լարվածությունն էր, բայց ըստ նրա՝ այդ իրավիճակում Ադրբեջանին  զսպելու միջոցները ոչ միայն դիվանագիտական մեթոդներն են, այլ նաև ռազմական միջոցները, որ կողմերն ունեն։

«Ոչ ոքի համար գաղտնիք չէ, որ ապրիլյան իրադարձություններից հետո ավելի ակտիվացավ ՀՀ-ի ու Արցախի տեխնիկական վերազինման գործընթացը։ Հետևաբար, Ադրբեջանի համար տեխնիկական առումով ավելի դժվար կլինի գնալ նոր ավանտյուրայի։ Ադրբեջանն ապրիլյան լարվածությունից հետո կորցրել է ռազմավարական հանկարծակիության գործոնը, որը բավականին կարևոր դեր պետք է խաղար և խաղաց մեկ տարի առաջ»,- պարզաբանեց նա։

Ինչ վերաբերում է Թուրքիային, ապա, ըստ նրա՝ այս պահին Էրդողանը կենտրոնացած է սահմանադրական փոփոխությունների վրա. «Ես չեմ կարծում, որ այդ գործընթացում ու մոտակա երկու-երեք շաբաթվա ընթացքում, երբ Էրդողանի հետագա քաղաքական ապագայի հարցն է լուծվելու, ինքն ինչ-որ խնդիրներ պետք է լուծի ոչ միայն Հարավային Կովկասում, այլև իր համար կարևոր նշանակություն ունեցող Մերձավոր Արևելքում։

Մյուս կողմից՝ չմոռանանք, որ ռուս-թուրքական հերթական սիրախաղի էտապն է, որը կարող է յուրաքանչյուր պահի ավարտվել ատելության նոր շղթայով, բայց համենայնդեպս, այս պահին Թուրքիայի համար բավականին կարևոր է ՌԴ դիրքորոշումը, և չի ներգրավվի մի խնդրի մեջ, որը չի հանդիսանում Թուրքիայի անվտանգության սպառնալիք, կամ ազդի ռուս-թուրքական հարաբերությունների վրա»։

168.am