Եվ այսպես, Ազգային ժողովի նախագահի պաշտոնում Գալուստ Սահակյանին կփոխարինի Արա Բաբլոյանը: Երկուսն էլ պատկառելի տարիք ունեն, եւ այդ իմաստով ԱԺ նախագահի պաշտոնում «սերնդափոխություն» չեղավ, թեեւ ավելի վաղ տրվում էին մի շարք երիտասարդ ՀՀԿ-ականների՝ Արմեն Աշոտյանի, Էդուարդ Շարմազանովի, Արփինե Հովհաննիսյանի անունները:

Ըստ ամենայնի, Սերժ Սարգսյանը նրանց չվստահեց այդ գործը, այն առումով, որ նոր ԱԺ-ում սերնդափոխություն որպես այդպիսին չկա, ընդամենն ավելացել է երիտասարդների թիվը: Տարիքը դեռ չի նշանակում սերնդափոխություն, քանի որ այդ երիտասարդները, նախ, մանդատ են ստացել համակարգային խաղի կանոններով, եւ երկրորդ՝ նրանք բոլորը կողմ են ԵՏՄ-ին ու Ղարաբաղը հանձնելուն: Այսինքն՝ «հին ոգու» մեջ են:

Բացի այդ, ԱԺ-ում նշանակալի ներկայություն ունեն քրեա-օլիգարխիան եւ «հին ոգին», եւ երիտասարդներն ընդունակ չէին լինի «կառավարել» նրանց: Նրանց անհրաժեշտ է ակսակալ, որպեսզի «զապադլո» չլինի նիստերին ներկայանալը, նրանց ասելով քվեարկելը եւ այլն:ԱԺ նախագահի նշանակման հարցում կա մի խիստ հատկանշական հանգամանք. Գալուստ Սահակյանը մանկավարժ է, Արա Բաբլոյանը՝ մանկաբույժ: Արդյոք նաեւ այս հանգամանքն է հաշվի առել Սերժ Սարգսյանը: Բանն այն է, որ Հայաստանում քաղաքականություն ու քաղաքական գործիչներ որպես այդպիսին չկան, կան տարբեր մարդիկ, որոնք ինքզինքը համարում են այդպիսին: Հայկական քաղաքական դաշտը խորհրդարանից խորհրդարան դեգրադացիա է ապրում, եւ Գալուստի օրոք արդեն կար մանկավարժի անհրաժեշտությունը:

Նոր խորհրդարանը հայկական քաղաքականության ու քաղաքական համակարգի դեգրադացման թվում է անվերջանալի ընթացքի հերթական հանգրվանն է, որին բնորոշ է լինելու, դասականի լեզվով ասած, «մանկական հիվանդությունը»: Եվ այստեղ անհրաժեշտ է ոչ թե պարզապես բժիշկ, այլ մանկաբույժ:

Հաջորդ խորհրդարանի նախագահի պաշտոնի համար հիմիկվանից պետք է պատրաստել հոգեբույժի, քանի որ պերմանենտ դեգրադացիայի իրավիճակում, երբ իրականում չկա սերնդափոխություն մտածողության ու մոտեցումների առումով, այլ միայն վերարտադրություն, մեծանում է մարդկանց ինքնագնահատականի ու երեւույթների արժեւորման անհամարժեքությունը:Փորձառու մանկաբույժ Արա Բաբլոյանի նշանակումը նոր խորհրդարանի որակների ու մոտիվացիայի տեսանկյունից ճիշտ էր ու համարժեք, թերեւս միակ ճիշտ որոշումը տվյալ քաղաքական իրավիճակում:

lragir.am

Սերժ Սարգսյանը, մայիսի 18-ին հանդես գալով ուղերձով վեցերորդ գումարման Ազգային ժողովի առաջին նիստին, խոսեց ԼՂ հակամարտության կարգամավորման մասին եւ անդրադարձավ ԱԺ ընտրությունների քարոզարշավի ժամանակ հնչեցված մի քանի մտքերին:

«Այսօր պիտի անդրադառնամ և հստակություն մտցնեմ միայն նախընտրական շրջանում հնչեցված մի քանի մտքերի շուրջ, որոնք, իմ կարծիքով, անպատասխան թողնել չի կարելի, քանի որ դրանք կարող են սխալ մտայնությունների ձևավորման պատճառ դառնալ մեր հասարակության մեջ։

Հասկանալի է, որ նախընտրական քարոզչության շրջանում, երբ քաղաքական ուժերը նպատակ ունեն բոլոր միջոցներով հնարավորինս բարձրացնել իրենց վարկանիշը ընտրողների շրջանում, կարող է շահարկվել և հաճախ էլ շահարկվում է գրեթե ամեն ինչ։ Այս անգամ Արցախի հիմնախնդիրն էլ չմնաց չշահարկված։

Նախ փորձ կատարվեց վերակենդանացնել Լեռնային Ղարաբաղի հակամարտության շուրջ վաղեմի առաջարկներից մեկի քննարկումը, ինչը, իհարկե, չստացվեց։ Եվ դա բնական է։ Պնդել, թե անցյալում լավագույն փաստաթուղթն է բանակցվել, որն այսօր կարող է հանգուցալուծման բանալի լինել, ուղղակի նշանակում է մեղանչել իրականության դեմ»,- ասաց Սարգսյանը՝ ըստ էության, պատասխանելով ՀԱԿ առաջնորդ Լեւոն Տեր-Պետրսյանի առաջ քաշած «Խաղաղության ծրագրին» եւ նրա պնդումներին։

Իսկ իրականությունը, ըստ նրա, այն է, որ 1997 թվականի դեկտեմբերի փաստաթուղթը չէր էլ հավակնում հիմնահարցի հանգուցալուծմանը, այլ, ինչպես իր վերնագիրն էր վկայում, ուղղված էր զինված հակամարտության դադարեցմանը։ «Այն մի տեսակ զինադադարի նոր համաձայնագիր էր նախատեսում` այս անգամ արդեն համեմված խաղաղապահ ուժերով և մի շարք այլ դրույթներով։ Հայկական կողմերը ստանում էին անվտանգության կասկածելի երաշխիքներ և հակամարտության քաղաքական կարգավորման ոչ պակաս կասկածելի ու անորոշ հեռանկար՝ փոխարենն անելով անհամաչափ զիջումներ:

Քսան տարվա վաղեմության այս առաջարկի ջատագովները թե՛ այն ժամանակ, թե՛ հիմա դրա մերժողներին մեղադրում են՝ անվանելով ստատուս-քվոյի պահպանման կողմնակիցներ։ Երբ Բաքուն է կեղծում, թե իբր մենք ցանկանում ենք պահպանել ստատուս-քվոն, դա միգուցե տեղավորվում է հակառակորդի տրամաբանության շրջանակներում, բայց Հայաստանից հնչող այդպիսի տեսակետը չի կարող ընդունելի լինել։

Ստատուս-քվոյի փոփոխությունը մեզ համար ընդունելի է, բայց միայն ու միայն հիմնահարցի համապարփակ կարգավորման դեպքում: Հայաստանը բազմիցս է կողմ արտահայտվել փոխզիջման հիման վրա հանգուցալուծման գնալու օգտին, որի էությունը Արցախի ինքնորոշման իրավունքի ճանաչումն ու իրացումն է։ Այս մոտեցումն էր արտացոլված Կազանի փաստաթղթում։ Թեև այն մերժվեց Ադրբեջանի կողմից, բայց նախորդ փաստաթղթերի նման ի պահ չհանձնվեց ԵԱՀԿ քարտուղարություն, այսինքն` շարունակում է մնալ որպես վերջին աշխատանքային փաստաթուղթ»,- նշեց նա։

Սարգսյանը պնդեց, որ այո՛, փոխզիջման հիման վրա, այլ ոչ թե միակողմանի զիջումների` տեղի տալով ադրբեջանական սպառնալիքներին, թե հակառակ դեպքում պատերազմն անխուսափելի է: «Այո՛, մենք չենք ցանկանում ստատուս-քվոյի պահպանում և ոչ մի օր ավել: Չենք ուզում հաջորդ սերունդների ուսերին դնել հիմնահարցի լուծման ծանրությունը, և հենց սրան են ուղղված համանախագահ երկրների հետ միասին հիմնահարցի կարգավորման մեր համատեղ ջանքերը։

Ես չեմ խոսի նախորդ տարբերակների համեմատ Կազանի փաստաթղթի բոլոր առավելությունների մասին, քանի որ խախտած կլինեմ բանակցությունների խորհրդապահությունը։ Միայն կրկնեմ, որ մինչև հիմա որևէ մեկը հրապարակավ չի կարողացել ճշգրտորեն ներկայացնել այն տարբերակը, որի մանրամասները մենք երկար տարիներ քննարկում ենք:

Մինչ վերջին տարիների բանակցային գործընթացի հիմնական էությանն անդրադառնալը, կցանկանայի ևս մի տեսակետի արձագանքել։ Մադրիդյան փաստաթղթի հեղինակությունն իրեն վերագրողներից մեկը նախընտրական շրջանում ճանաչեց դրա տասնչորս պարագրաֆներից միայն մեկի հայրությունը` մնացածը թողնելով որբ։ Համաձայնեք, ծնողական պարտքի արտասովոր դրսևորում է, հատկապես որ Մադրիդյան փաստաթղթի այդ պարբերությունը լուրջ հարցեր էր առաջացնում։ Ըստ դրա՝ Արցախի իրավական կարգավիճակը որոշվելու էր պլեբիսցիտի միջոցով, որի կապակցությամբ հղում էր արվում Արևմտյան Սահարայի վերաբերյալ Արդարադատության միջազգային դատարանի 1975 թվականի հոկտեմբերի 16-ի կարծիքին։ Մի եզրակացության, որը մինչ օրս չի իրականացվել, մի եզրակացության, որը զուտ խորհրդատվական կարգավիճակ ունի։

Ինչ ազդեցություն կունենար Լեռնային Ղարաբաղի հիմնահարցի կարգավորման վրա դրա կապակցումը աֆրիկյան ապագաղութացման հարցերի հետ, հանրաքվեի հավասարեցումը խորհրդատվական հարցախույզի հետ, մենք կարող ենք միայն ենթադրել, քանի որ այս վնասակար ձևակերպումը հանվեց աշխատանքային հետագա փաստաթղթերից»,- ասաց նա։

Հայաստանի Հանրապետության Նախագահ Սերժ Սարգսյանը վեցերորդ գումարման Ազգային ժողովի առաջին նիստին հանդես է եկել ուղերձով։ ՀՀ Նախագահը նշել է, որ այսօր Հայաստանն ունի պայքարի երկու ճակատ՝ արտաքին և ներքին։ Նախագահի խոսքով՝ արտաքին թշնամուց ոչ պակաս վտանգավոր է ներքին թշնամին:

«Մենք այսօր պայքարի երկու ճակատ ունենք՝ մեկն արտաքին թշնամին է, մյուսը՝ ներքին:  Արտաքին թշնամուն լավ ենք ճանաչում, գիտենք նաև նրա դեմ արդյունավետ պայքարելու ձևերն ու եղանակները: Փառք ու պատիվ մեր նահատակ զինվորներին ու սպաներին, փառք ու պատիվ այսօր սահմանին կանգնած մեր զինվորին ու սպային:

Արտաքին թշնամուց ոչ պակաս վտանգավոր է ներքին թշնամին: Ներքին թշնամին, որոշակի մտածողությունն ու որոշակի երևույթներ են: Այդ երևույթներից ամենավտանգավորը, թերևս, անարդարությունն է»,– ասել է Նախագահը:

Սերժ Սարգսյանը նշել է, որ անարդարությունը ցանկացած պետության համար չարիք է, հիվանդություն, որը հյուծում ու թուլացնում է պետությունը, որը վերացնում է ապագայի նկատմամբ հավատը, թուլացնում է պետության նկատմամբ սերը, պետությունից վանում է իր հազարավոր զավակներին:

«Ուստի մենք այսօր, առավել քան երբևէ, պայքարի մեկ այլ ճակատ ունենք, որտեղ հաղթանակը ոչ պակաս կարևոր է: Մենք այսօր պատերազմի նոր փուլ ենք հայտարարում անարդարությանը:

Դիմում եմ բոլորին. մեզնից յուրաքանչյուրը, ինչպես որ պայքարել ու պայքարում է մեր հայրենիքի անկախության, նրա սահմանների անվտանգության համար, նույնպիսի նվիրվածությամբ ու ջանասիրությամբ պիտի պայքարի արդարության համար: Արդարությունը պետք է լինի այն կենարար գաղափարը, որով պետք է սնվեն մեր մանուկները, որով պետք է առաջնորդվեն մեր պետական ծառայողները, որով պետք է ապրեն մեր դատավորները»,– նշել է Սերժ Սարգսյանը:

ՀՀ Նախագահի խոսքով՝ «մեզնից յուրաքանչյուրն արդարությունը պետք է պաշտպանի առնվազն այնպես, ինչպես մեր զինվորն է այսօր մեր սահմանը պահպանում: Սահմանը լքելը բոլոր ժամանակներում դավաճանություն է դիտարկվել: Մեր հայրենիքի վաղվա օրվա հանդեպ դավաճանություն պիտի համարենք ցանկացած մեկի, առավել ևս դատավորի թույլ տված անարդարությունը»:

«Գուցե մի փոքր էմոցիոնալ ստացվեց ասելիքս, բայց երևի այլ կերպ հնարավոր չէ. միայն լավ օրենքներով այս չարիքը մեզնից չենք կարող հեռացնել, ինչպես որ միայն լավ դեղամիջոցներով չենք կարող բուժվել, եթե չենք հավատում մեր ուժերին, մեր բուժվելուն ու ներքին ողջ լարումով դուրս չենք գալիս ներսից մեզ հյուծող չարիքի դեմ:

Վստահ եմ, որ Սահմանադրական դատարանի մասին նոր օրենքը, Դատական օրենսգիրքը, այս ոլորտին առնչվող այլ կանոնակարգումները և բոլորիս համատեղ ջանքերը նոր որակի են բարձրացնելու մեր արդարադատությունը: Այս ճանապարհին ցանկացած թուլացում անընդունելի է, այս ճանապարհից ցանկացած շեղում՝ դատապարտելի»,– ասել է նա:

Սերժ Սարգսյանը նշել է, որ ուշադրությամբ հետևել է բոլոր քաղաքական ուժերի նախընտրական քարոզարշավին։ «Շատ մտքեր հնչեցին, եղան քննադատական ելույթներ, մոտեցումների տարբերություններ։ Բայց երբ մտքում զտում ես հրապարակված կարծիքները, ապա դրանք ի վերջո հանգում են միևնույն գաղափարին. մենք պետք է կառուցենք ուժեղ Հայաստան։ Սա էր, ի վերջո, բոլորի ասածը։ Սա՛ է մեր ազգային նպատակը:

Համոզված եմ, որ այս նպատակին են ուղղված եղել նախկին և ներկա կառավարությունների ջանքերն ու աշխատանքը: Այդ նպատակին են ուղղված լինելու նաև վաղվա կառավարությունների ջանքերը: Հետևաբար, խիստ կարևորում եմ այնպիսի երկարաժամկետ նպատակային տնտեսական ցուցանիշների ամրագրումը, որոնց իրագործելը Հայաստանի կառավարությունների համար կլինի ոչ միայն պարտավորություն, այլև պատվի և արժանապատվության հարց»,– ընդգծել է նա:

ՀՀ Նախագահը նշել է, որ Հայաստանի անկախության ավելի քան 25 տարիները բավարար ժամանակ է խոր վերլուծություններ կատարելու և հետևություններ անելու համար:  Նրա խոսքով՝ ժամանակն է, որ մեր ծրագրման, թիրախների ամրագրման հորիզոնը դառնա առնվազն 20-25 տարի, արտահայտի այն ցանկություններն ու նպատակները, որոնց մենք ձգտում ենք և հասնելու ենք մեր աշխատանքի շնորհիվ՝ անկախ կուսակցական պատկանելությունից:

«Մենք չունենք ածխաջրածիններ և մեծաքանակ այլ բնական ռեսուրսներ, սակայն Հայաստանի եզակի բնակլիմայական պայմաններն ու աշխարհագրական դիրքը և ամենակարևորը՝ ստեղծագործ ու նախաձեռնող քաղաքացիները մեր տնտեսության երկարատև կայուն աճի ու մարդկանց բարեկեցության բարձրացման կարևոր և իրատեսական գրավականներն են: Բնական պաշարները սպառվելու հատկություն ունեն, մարդկային ներուժը՝ ոչ։ Ավելին, այն կարող է մեծանալ»,– ասել է Սերժ Սարգսյանը:

«ԱԺ նոր նախագահը լինելու է ՀՀԿ-ական, մասնագիտությամբ բժիշկ Արա Բաբլոյանը. երեկ նման որոշում է կայացվել ՀՀԿ ԳՄ և խորհրդի նիստերում: ՀՀԿ-ից են լինելու նաև ԱԺ փոխնախագահներից երկուսը. այդ պաշտոններում իշխող կուսակցությունն առաջադրելու է Էդուարդ Շարմազանովին ու Արփինե Հովհաննիսյանին, իսկ խորհրդարանի փոխխոսնակի՝ ընդդիմությանը բաժին հասնող աթոռը տրվելու է ԲՀԿ-ին. այս կուսակցությունն էլ երեկ որոշել է առաջադրել Միքայել Մելքումյանին:

ԱԺ նախագահի պաշտոնում Բաբլոյանի առաջադրումն իրականում անակնկալ էր. նրա անունը չէր շրջանառվում հավանական թեկնածուների շարքում, և ընդհանրապես, Բաբլոյանը չի համարվում քաղաքական կերպար, թեև 1991-97թթ. եղել է առողջապահության նախարար: Բաբլոյանն առանձնապես չի ասոցացվել նաև ՀՀԿ-ի հետ, թեև այս ընտրություններում ՀՀԿ ցուցակի չորրորդ համարն էր:

Եթե նկատի ունենանք այն հանգամանքը, որ Արա Բաբլոյանը վարկաբեկված անձ չէ, ապա նրա թեկնածության առաջադրումը միանգամայն նորմալ կարելի է համարել: Բայց մյուս կողմից նրա թեկնածությունը տարօրինակ է, քանի որ Բաբլոյանը, բացի ապաքաղաքական մարդ լինելուց, նաև տարիքով է. նա 70 տարեկան է, մեկ տարով ավելի մեծ, քան Գալուստ Սահակյանը: Այնպես որ, ՀՀԿ պնդումները, թե իրենք ԱԺ են բերել թարմ դեմքերի, ըստ էության, չի համապատասխանում իրականությանը:

Բայց մյուս կողմից, մեր աղբյուրների պնդմամբ, ե՛ւ ապագա կառավարությունը, ե՛ւ նոր խորհրդարանի ղեկավարությունը լինելու են ժամանակավոր: Իշխանության հիմնական կազմը կձևավորվի 2018թ. ապրիլից, երբ լրանա Սերժ Սարգսյանի պաշտոնավարման ժամկետը, և նա, հավանաբար որպես նոր վարչապետ, ձևավորի իր թիմը: Սպասվում է, որ այսօր նոր ԱԺ-ի կազմավորումից ու առաջին նիստից հետո հրաժարական կտա կառավարությունը: Վարչապետի պաշտոնում նորից նշանակվելու է Կարեն Կարապետյանը, և նրա հրամանագիրը, ըստ «Ժողովուրդ»-ի աղբյուրների, լինելու է շատ օպերատիվ՝ առաջիկա մի քանի օրվա ընթացքում: Հ. Գ. Նկատենք, որ ՀՀ Սահմանադրության փոփոխությունից հետո խորհրդարանական կառավարման համակարգին անցած մեր երկրում խորհրդարանի ղեկավար կազմը (բժշկի նախագահությամբ) հայտնի դարձավ մայիսի 17-ին: Հիշեցնենք, որ 1990թ. մայիսի 17-ին առողջապահության համաշխարհային կազմակերպությունը հանեց նույնասեռականությունը հոգեկան հիվանդությունների ցանկից, և այդ օրը հայտարարվեց հոմոֆոբիայի և տրանսֆոբիայի դեմ պայքարի միջազգային օր:

Առավել մանրամասն՝ թերթի այսօրվա համարում:

Զավակնե՛րս, վերջին ժամանակը հասել է։ Դուք լսել եք, որ Նեռը՝ Քրիստոսի հակառակորդը, գալու է։ Արդ, ահա Քրիստոսի բազում հակառակորդներ են երևան եկել, և դրանից էլ իմանում ենք, որ վերջին ժամանակն է։ Մեր միջից ելան նրանք, բայց մեզնից չէին. որովհետև եթե մեզնից լինեին, ապա մեզ հետ էլ կմնային։ Բայց մեզնից հեռացան, որպեսզի հայտնի լինի, թե նրանցից որևէ մեկը մեզնից չէր։ Սակայն դուք Սուրբ Հոգու պարգևն ունեք, որովհետև դրանո՛վ օծեց ձեզ Սուրբը՝ Քրիստոսը, և դուք գիտեք ամեն բան։ Այս նամակը գրում եմ ձեզ ոչ թե որովհետև ճշմարտությունը չգիտեք, այլ ընդհակառակը, գրում եմ՝ հաստատելու համար, որ գիտեք այն, և ճշմարտությունից ոչ մի ստություն չի ծնվում։ Հետևաբար, ո՞վ է ստախոսը, եթե ոչ նա, ով ուրանում է, թե Հիսուսը Քրիստոսն է։ Քրիստոսի հակառակորդն է այնպիսին, որ ուրանում է թե՛ Հորը և թե՛ Որդուն. որովհետև ով որ մերժում է Որդուն, մերժած է լինում նաև Հորը, իսկ ով որ ընդունում է Որդուն, ընդունած է լինում նաև Հորը։ Հետևաբար, ձեր սրտո՛ւմ պահեցեք Տիրոջ խոսքերը, որ լսեցիք սկզբից։ Եթե ձեր մեջ պահեք այն, ինչ որ սկզբից սովորեցիք, դուք ևս միացած կլինեք Հորը և Որդուն։ Եվ այս ինքը՝ հավիտենական կյանքն է, որ Քրիստոսը խոստացավ մեզ տալ։

(Հովհաննես առաքյալի առաջին նամակը 2:18-25)

Ռուբեն աբեղա Զարգարյան

Նախագահ Սերժ Սարգսյանը հրամանագիր է ստորագրել, որով Ալիկ Սարգսյանին ազատել է ՀՀ Նախագահի խորհրդականի պաշտոնից, այս մասին տեղեկացնում է ՀՀ Նախագահի աշխատակազմի հասարակայնության և տեղեկատվության միջոցների հետ կապերի վարչությունը։

«Հիմք ընդունելով Հայաuտանի Հանրապետության Նախագահի 2007 թվականի oգոuտոuի 17-ի ՆՀ-193-Ն հրամանագրի 1-ին կետով հաuտատված՝ Հայաuտանի Հանրապետության Նախագահի աշխատակազմի կանոնադրության 16-րդ կետի 3-րդ ենթակետը՝ ո ր ո շ ու մ ե մ.

1. Ալիկ ՍԱՐԳՍՅԱՆԻՆ ազատել Հայաuտանի Հանրապետության Նախագահի խորհրդականի պաշտոնից:
2. Սույն հրամանագիրն ուժի մեջ է մտնում ստորագրման պահից»,– ասվում է ՀՀ Նախագահի հրամանագրում:

Հիշեցնենք, որ Ալիկ Սարգսյանը Հայաստանի Հանրապետական կուսակցության ցուցակով ընտրվել է 6-րդ գումարման Ազգային ժողովոի պատգամավոր։

Ոստիկանության կողմից որպես անհայտ կորած որոնվող 21-ամյա Շուշան Ավետիսյանը, մեր տեղեկություններով, երեկ զանգահարել է ծնողներին եւ ասել, որ իրեն չփնտրեն, իր հետ ամեն ինչ լավ է:

Թե ինչու է թաքնվում Ավետիսյանը, դեռ պարզ չէ: Մեզ հաջողվեց ճշտել, որ 21-ամյա Շուշան Ավետիսյանը բնակվում է Խարբերդի ամառանոցներից մեկում, ծնողների, քրոջ եւ եղբոր հետ:

Տեղեկացանք, որ հայրը երթուղայինի վարորդ է, ապրում են սոցիալապես նորմալ պայմաններում: Շուշան Ավետիսյանը ազատություն է սիրում, համենայնդեպս այդպես են նկարագրում նրան: Երեկ, երբ տեղեկացել է, որ ոստիկանությունն իրեն փնտրում է, անծանոթ հեռախոսահամարից զանգահարել է ծնողներին, ասել, որ լավ է, իրեն չփնտրեն ու անջատել է հեռախոսը:

Շուշան Ավետիսյանը տանից դուրս է եկել ապրիլի 28-ի երեկոյան եւ մինչ այսօր չի վերադարձել: 21-ամյա աղջկան որոնում են ոստիկանության Շենգավիթի բաժնի աշխատակիցները: Նրա գտնվելու վայրը դեռ հայտնի չէ. ոստիկանությունը կոչ է անում Շուշան Ավետիսյանի մասին տեղեկություն ունեցողներին դիմել ոստիկանության Շենգավիթի կամ մոտական բաժին։

Հիշեցնենք, որ ոստիկանությունը 5 օր առաջ էլ որոնում էր 17-ամյա Ա. Հակոբյանին: Վերջինս մայիսի 8-ից դուրս էր եկել տանից եւ չէր վերադարձել: Մայիսի 12-ին Հակոբյանը ներկայացել է Քանաքեռ-Զեյթունի բաժին եւ բացատրություն տվել: Նա ոստիկաններին ասել է, որ Երեւանում զբոսելիս է եղել:

Արման Մելիքյանն իր ֆեյսբուքյան էջում գրում է․

«ՌԴ արտգործնախարարությունն ուշագրավ ու, միաժամանակ, զավեշտալի մի հատարարություն է տարածել ադրբեջանական զինուժի կողմից հայկական ռազմական մեկ միավոր տեխնիկան խոցելու կապակցությամբ: Այդ հայտարարության մեջ ասված է, որ Ռուսաստանը, որպես միջնորդ, դատապարտում է կրակի դադարեցման ռեժիմի խախտումները և կողմերին կոչ է անում ձեռնարկել բոլոր անհրաժեշտ միջոցները լարվածության հետագա աճը կանխելու համար: Այս կարգի հայտարարությունները զավեշտալի են այն պատճառով, որ խրախուսում են առաջինը հարված հասցնող կողմին: Նման հայտարարությունների տրամաբանության համաձայն լարվածության աճը գրանցվում է ոչ թե առաջին հարվածից հետո, այլ տուժած կողմի պատասխան գործողության արդյունքում: Այսինքն՝ եթե անպատասխան հարված է հասցվում, ապա ամեն ինչ կարգին է ու լարվածության աճ չկա, բայց եթե այդ հարվածին պատասխան է տրվում, ուրեմն լարվածության աճն այլևս փաստ է: Մեր իշխանություններն էլ են կարծես թե միանգամայն համաձայն են այսօրինակ տրամաբանության հետ»:

Դաոսական պրակտիկա, որի օգնությամբ կարելի է բուժել երիկամները եւ նիհարել: Բոլորը գիտեն, թե սովորական քայլելը որքան օգտակար է, բայց ծնկների վրա քայլելու օգտակարությունը քչերին է հայտնի: Դժբախտաբար դաոսական պրակտիկան այդքան էլ լայն տարածում չունի:

Ծնկների վրա քայլելը խորհուրդ է տրվում բոլորին, այս վարժությունը չունի հակացուցումներ: Նույնիսկ նրանք, ովքեր ունեն ծնկների հոդացավ, կարող են փորձել եւ զգալ չինական տեխնիկայի արդյունավետությունը: Պարզվում է՝ ծնկները հաճախ ցավում են մեջքի, ոտքերի, ողնաշարի մկանների ապաճման (արտրոֆիայի) հետեւանքով, մի խոսքով՝ ցավն առաջանում է այն մարդկանց մոտ, ովքեր վարում են նստակյաց ապրելակերպ: Ծնկների վրա քայլելու դաոսական պրակտիկան օգնում է ազատվել երիկամների եւ լյարդի հիվանդություններից: Դա կապված է նրա հետ, որ ծնկների բարձիկների վրա կան կետեր, որոնք օգտակար է խթանել ներքին օրգանների աշխատանքի խափանման դեպքում: Չինական բժշկությունն այս վարժությունը համարում է բոլոր հիվանդությունների դեղատոմս:

Իրապես, քայլելու այս տեսակն, ի տարբերություն մյուս ֆիզիկական վարժությունների, ունի մի շարք առավելություններ: Այս վարժությանը կարելի է տրամադրել օրական 15-20 րոպե, միայն այդ դեպքում արդյունքը շոշափելի կլինի: Վարժությունը պետք է անել հատակին, ծնկների տակ փռելով փափուկ ծածկոց: Պետք է շարժվել դանդաղ՝ հենվելով միայն ծնկների վրա: Եթե ցավ կունենաք ծնկների հոդերի շրջանում, որը շատ հնարավոր է սկզբնական շրջանում, փորձեք քայլել մահճակալի վրա: Երբ ոտքերի մկանները բավականաչափ ամրանան, ցավը կանցնի:

Այս վարժությունն ամեն օր կատարելով՝ հնարավոր կլինի հասնել ոտքերի նիհարեցմանը: Զարմանալի է, սակայն նման պրակտիկան նպաստում է նաեւ տեսողության լավացմանը. ծնկների ջլերում կան կետեր, որոնք պատասխանատու են լյարդի, երիկամների եւ աչքերի ճիշտ աշխատանքի համար:

Խորհուրդ է տրվում ծնկների վրա քայլել փակ աչքերով՝ արդյունքն ավելի ազդեցիկ կլինի: Փորձեք հին չինական վարժությունը եւ շատ շուտ կզգաք դրական ազդեցությունը:

galatv.am