Սյունիք ներխուժած և այժմ կալանավորված ադրբեջանցի երկու զինծառայողներին այս փուլում չեն արտահանձնի։ ՀՀ գլխավոր դատախազ Աննա Վարդապետյանը լրագրողների հետ զրույցում ասաց, որ մինչդատական վարույթում արտահանձնում չի լինում, կարող է լինել միայն դատապարտված անձանց նկատմամբ օրինական ուժի մեջ մտած դատական ակտերի պայմաններում։

«Արտահանձնումները կարգավորվում են մի շարք կոնվենցիաներով։ Ադրբեջանի դեպքում դրանք Մոսկվայի 1998 թվականի և Ստրասբուրգի կոնվենցիաներն են»,- նշեց նա։
Հարցին՝ գերիների վերդարձի պայման դա կարող է լինել՝ Վարդապետյանը դժվարացավ պատասխանել՝ նշելով, որ ինքը հարցի հասցեատերը չէ։
Վարդապետյանը նաև հայտնեց, որ ադրբեջանցի երկու զինծառայողներից մեկի վերաբերյալ վարույթն ավարտվել է, գործն ուղարկվել է դատարան, մյուսով, որին մեղսագրվում է սպանությունը՝ ծանրացուցիչ հանգամանքներով, դեռևս նախաքննությունը շարունակվում է։

Չորեքշաբթի գիշերը Ուկրաինան երկու անօդաչու թռչող սարքերի օգնությամբ փորձել է հարվածել ՌԴ նախագահ Վլադիմիր Պուտինի նստավայրի վրա։։ Այս մասին հայտնում է Կրեմլի մամուլի ծառայությունը։ Սարքերն անջատվել են, միջադեպի հետևանքով ոչ ոք չի տուժել։

«Երկու անօդաչու թռչող սարքեր թիրախավորել են Կրեմլը։ Ռազմական և հատուկ ծառայությունների կողմից ռադիոլոկացիոն պայքարի համակարգերի կիրառմամբ ժամանակին ձեռնարկված գործողությունների արդյունքում սարքերը շարքից հանվել են»,- ասվում է հրապարակման մեջ։

Նշվում է, որ հարձակման հետևանքով ոչ ոք չի տուժել, Վլադիմիր Պուտինի աշխատանքային գրաֆիկը չի փոխվել։

«Այս գործողությունները որակավորում ենք որպես ծրագրված ահաբեկչական գործողություն և նախագահի դեմ մահափորձ, որն իրականացվել է Հաղթանակի օրվա՝ Մայիսի 9-ի շքերթի նախօրեին, որին նախատեսվում է նաև օտարերկրյա հյուրերի ներկայությունը:

Ռուսական կողմն իրեն իրավունք է վերապահում պատասխան միջոցներ ձեռնարկել որտեղ և երբ անհրաժեշտ կհամարի»,- ասվում է հայտարարությունում։

Նախագահի խոսնակ Դմիտրի Պեսկովը «Ռիա Նովոստի»-ին ասել է, որ Պուտինը ուկրաինական անօդաչու թռչող սարքերի հարձակման պահին Կրեմլում չի եղել, այսօր նա աշխատում է մերձմոսկովյան Նովո-Օգարյովոյում գտնվող իր նստավայրում։

Նա նաև հավելել է, որ Մայիսի 9-ին Կարմիր հրապարակում շքերթ անցկացնելու պլանները մնում են ուժի մեջ։

Միջազգային իրադրությունն ուղիղ  ազդեցություն ունի մեր տարածաշրջանում ռազմավարական իրադրության  գնահատականի վրա: Այս մասին, մայիսի 3-ին, Ազգային ժողովում կառավարության հետ հարցուպատասխանի ժամանակ հայտարարությունն արեց ՀՀ վարչապետ Նիկոլ Փաշինյանը:

«Պետք է նաև ասենք, որ մեր տարածաշրջանում տեղի ունեցած իրադարձությունները որոշակի ազդեցություն են ունեցել միջազգային իրադրության հետագա զարգացման վրա: Մեր տարածաշրջանում անվտանգության ու կայունության համակարգերը դեֆորմացված են, ինչը նշանակում է, որ մենք առերեսվում ենք լրացուցիչ անվտանգային մարտահրավերների: Այսինքն՝  այն համակարգը, որն ի սկզբանե պետք է ապահովեր  անվտանգությունն ու կայունությունը մեր տարածաշրջանում, ակնհայտորեն չի գործում բավարար արդյունավետությամբ», — ընդգծեց նա:

Փաշինյանի խոսքով, մեր ռազմավարական խնդիրն է, այդ դեֆորմացիայի արդյունքում առաջացած մարտահրավերները կառավարել, կամ այդ դեֆորմացիայի բերած անհարթությունները հարթել, բայց ինչ ձևերով ու միջոցներով է հնարավոր դա անել. «Կկարող է լինել վարկած կամ առաջարկ, մոտեցում, որ պետք է նոր կոմպոնենտներ ավելացնել այդ անվտանգային ընդհանուր ճարտարապետությանը։ Դա մոտեցում է, բայց դա փաստ չէ, որ դրանով ռազմավարական անվտանգությունը կապահովվի»,-ասաց Փաշինյանը։

Նրա խոսքով, Հայաստանի անվտանգությունը կարող է ապահովել համապարփակ խաղաղությունը. «Հիմա հաջորդ հարցը. արդյո՞ք իրատեսական է կամ հնարավոր է խաղաղությունը։ Այո հնարավոր է, բայց նաեւ պետք է հնարավոր լինի ավելի դետալացված արձանագրել, թե ինչպես է հնարավոր խաղաղությունը։

Պրոբլեմն այն է, որ այստեղ կա երկու կոմպոնենտ՝ առաջինը խաղաղության հասնելու քաղաքական կամք, երկրորդը՝ խաղաղության հասնելու պարամետրերի մանրամասները։ Ակնհայտ է, որ մենք խաղաղության հասնելու քաղաքական կամք ունենք։ Խնդիրն այն է, թե ինչքանով մեզ կհաջողվի բանակցային գործընթացի արդյունքում ձևավորել խաղաղության այնպիսի պարամետրեր, որոնք կարող են ընդունելի լինել  Հայաստանի Հանրապետության կամ Հայաստանի Հանրապետության ժողովրդի համար:

Որովհետեւ, այո, կա տարբերակ, որ խաղաղությունն իրատեսորեն հնարավոր լինի այն պարամետրերով, որոնք սկզբունքորեն ընդունելի են Հայաստանի Հանրապետության կամ Հայաստանի Հանրապետության ժողովրդի համար, կարող են լինել տարբերակ, որ խաղաղությունն իրատեսորեն հնարավոր է  այն պարամետրերով, որոնք սկզբունքորեն ընդունելի չեն Հայաստանի Հանրապետության և Հայաստանի Հանրապետության ժողովրդի համար։ Հետևաբար մեր խնդիրն է՝ իրատեսությունը, ընդունելիությունն ու հարցի հետ կապված էմոցիոնալ ֆոնը հնարավորինս բալանասավորել ու բերել մի հարթության վրա։ Ինչքանո՞վ հնարավոր կլինի չեմ կարող ասել, բայց որ մենք ամեն ինչ կանենք, որ դա տեղի ունենա, դա ես կարող եմ միանշանակ ասել»,-ասաց Փաշինյանը։

Վարչապետն ասաց, թե մենք քայլում ենք ականապատ դաշտի միջով. «Ինչքան քայլում ենք այն ականապատ դաշտի միջով, այնքան ականներն ավելի խտանում են. սա մեզանից պահանջում է լրացուցիչ ջանքեր ու ճկունություն», — հավելեց Փաշինյանը:

SHAMSHYAN.com-ի տեղեկություններով՝ ապրիլի 30-ին վիճաբանություն-ծեծկռտուք է տեղի ունեցել Արարատի մարզում։ Այդ օրը, ժամը 16։00-ի սահմաններում ՀՀ Ներքին գործերի նախարարության Ոստիկանության Արարատի մարզային վարչությունում օպերատիվ տեղեկություններ են ստացվել, որ Մասիս խոշորացված համայնքի Արևաբույր գյուղում ծեծկռտուք է տեղի ունեցել։

Ինչպես հայտնում է ֆոտոլրագրող Գագիկ Շամշյանը, դեպքի վայր են ժամանել Ոստիկանության Արարատի մարզային վարչության պետ Սարիբեկ Ռուստամյանը և Ոստիականության Մասիսի բաժնի պետ Ասքանազ Դավթյանը։about:blank about:blank

Պարզվել է, որ տեղեկությունը հավաստի է։ Եվ այդ օրը, ժամը 15։50-ի սահմաններում Արևաբույր գյուղի Բաղրամյան փողոցում էլեկտրական լարերին խանգարող ծառի ճյուղերը կտրելու հարցի շուրջ վիճաբանություն է տեղի ունեցել նույն գյուղի բնակիչներ 36-ամյա Արայիկ Մելքոնյանի և 36-ամյա Տաճատ Մարգարյանի, 36-ամյա Ներսես Գասպարյանի և 26-ամյա Շավարշ Ավետիսյանի միջև, որի ընթացքում վերջիններս բռունցքներով ու ոտքերով հարվածներ են հասցրել Ա․ Մելքոնյանի մարմնի տարբեր հատվածներին։

Ոստիկանները տեղում հայտնաբերել են Տ․ Մարգարյանին, Ն․ Գասպարյանին և Շ․ Ավետիսյանին և տեղափոխել Ոստիկանության Մասիսի բաժին։

Դեպքի փաստով՝ Հայաստանի քննչական կոմիտեի Արարատի մարզային քննչական վարչության Մասիսի քննչական բաժնում նախաձեռնվել է վարույթ։

Գ․ Շամշյանի տեղեկություններով՝ բաժին տեղափոխվածներից Տ․ Մարգարյանը Մասիս խոշորացված համայնքի Արևաբույր գյուղի վարչական ղեկավարն է, իսկ ծեծված Ա․ Մելքոնյանը աշխատում է «Սպեցնազ» ՍՊԸ-ում որպես պահնորդ։

«Արցախում տարբեր մարդկանց տարբեր պրոեկտներ՝ իրենց հայրենասերի կամ սոցիալական արդարության ջատագովի տեղ դրած, ազգասերի դիմակ հագած, պառակտում են ընդդիմության ռեսուրսները։ Այլ կերպ ասած, փրկիչների անվան տակ՝ Արցախ են ներթափանցել՝ էդմոններ, արման բաբաջանյաններ, լևոն բարսեղյաններ և այլն։ Կարելի է ասել՝ նիկոլիզմն Արցախում պակաս արդյունավետ չի աշխատում, քան Հայաստանում՝ սխեման նույնն է։ Սակայն, վտանգավորն այստեղ այն է, որ ի տարբերություն Հայաստանի՝ Արցախում դրանք լավ ծպտված են, չգիտենք՝ ի՞նչ սպասենք դրանցից,- «Փաստինֆո» լրատվականի հետ զրույցում ասել է պահեստազորի սպա, արցախաբնակ Սերգեյ Համբարձումյանը՝ ավելացնելով՝ «որ մեկին քերում ես՝ տակից Արայիկ Հարությունյանն է դուրս գալիս»։

Խոսելով ստեղծված իրավիճակում՝ Արցախի իշխանությունների վարած քաղաքականության մասին, բանախոսը նկատում է՝ ձևական ստորագրահաքներ են անում, Ազգային անվտանգության խորհրդի ձևական նիստեր են անցկացնում, ամեն ինչ ձևական է արցախյան իշխանությունների մոտ, ինչն էլ հանգեցրել է այս աղետին։

Հարցին՝ չե՞ն ցանկանում, արդյո՞ք ինքնակազմակերպվել Արցախում ապրող մեր հայրանակիցները, պահեստազորի սպան պատասխանում է՝ այդ պահն, անպայման, գալու է, սակայն, այժմ Արցախ ներմուծված տարատեսակ «փրկիչներ» հենց հակառակ արդյունքը ստանալուն միտված ջանքեր են գործադրում.«Օրինակ, մինչ Ռուբեն Վարդանյանի Արցախ տեղափոխվելն, այդ կաթսան եռում էր։ Մարդկանց դժգոհությունն իր պիկին էր հասել Արցախում։ Եվ ահա, եկավ Ռուբեն Վարդանյանը և աստիճանաբար, շատ զգուշորեն, Արցախը փրկելու լոզունգներով, այսպես ասած, գոլորշին բաց թողեց և պարպեց մարդկանց զայրույթը։ Հիմա էլ Սյամոն է եկել (նկտ. ունի Սամվել Բաբայանին, «Փաստինֆո»), գոլորշին ինքն է բաց թողնում։ Այսպես է՝ երբ ժողովուրդն ուզում է ինքնակազմակերպվել և ոտքի կանգնել, միշտ գոլորշի բաց թողողներ են հայտնվում»։

Մի օր դանակը ոսկորին է հասնելու ու Արցախցին ոտքի է կանգնելու, ասում է պահեստազորի սպա Սերգեյ Համբարձումյանը և հավելում.«Արցախցին մեկ ժամվա ընթացքում ոտքի է կանգնելու։ Որևէ արցախցի իրեն Ադրբեջանի մաս չի զգում և չի պատրաստվում ադրբեջանական անձնագիր վերցնել։ Եվ, եթե կան մարդիկ, թեև դրանց մարդ անվանելն այնքան էլ տեղին չէ, այնուամենայնիվ, եթե կան այնպիսիք, ովքեր հույս ունեն, թե Արցախում լինելով կարող են ապահովել այդպիսի ապագա, ապա նրանք չարաչար սխալվում են։ Ժողովրդի տրամադրությունը բոլորովին այլ է։ Անգամ ծիլ կամ սածիլ չկա ժողովրդի մեջ՝ հանդուրժելու Ադրբեջանի մաս դառնալու, այսպես կոչված, հեռանկարը։ Ի վերջո, հազարամյանկների պատմություն գոյություն ունի, որը ո՛չ ջնջել, ո՛չ կեղծել չի հաջողվելու»։

Անդրադառնալով Արցախում խաղաղապահ առաքելություն իրականացնող ռուսական զորախմբի աշխատանքներին՝ Սերգեյ Համբարձումյանը նկատում է՝ ամեն ինչ գնում է իր բնականոն ընթացքով, շեղումներ կամ տագնապ հարուցող խնդիրներ, այստեղ չկան. «Շատ կցանկանայինք, որպեսզի ռուս խաղաղապահներին հաջողվեր՝ հանելու անցակետը, որ դրվել է Հակարիի կամրջին և շրջափակման մեջ գցել Արցախը, սակայն, մենք շատ լավ ենք հասկանում, որ խաղաղապահ զորամիավորման գործառույթներն, ինքնին, որոշակի սահմանափակումներ են ենթադրում։ Նրանք այստեղ են հումանիտար գործառույթ իրականացնելու համար և հիանալի կերպով կատարում են իրենց աշխատանքը։ Չեմ կարող ասել, թե ինչ կտա զորախմբի հրամանատարի փոփոխությունը, սակայն մի բան հստակ է՝ նախորդը բավականին թույլ կեցվածք ուներ, ինչը չի կարելի ասել նոր ղեկավարի՝ գեներալ – գնդապետ Ալեքսանդր Լենցովի մասին։ Նրանից ակնկալիքներն ավելի գործնական և շոշափելի են»։

Ամիսներ շարունակ Արցախը տոտալ շրջափակման մեջ է, ինչը, ըստ մեր զրուցակցի, բնականաբար իր բացասական հետևանքները թողել է, սակայն, եղանակների տաքացմամբ, արցախցիներն արդեն կարողանում են ինքնուրույն հոգալ մի շարք անհրաժեշտ պարագաների և մթերքների բացը. «Օրինակ, Արցախում, արդեն, այգիներ են մշակվում, դաշտերում բանջարն է դուրս եկել, որից մեր հայրենակիցներն առատորեն օգտվում են։ Այստեղ արդեն բանջարաբոստանային կուլտուրաներին պատկանող մի շարք մթերքներ են աճեցվել և, օրինակ, սեփական կարտոֆիլ, Արցախում, արդեն որոշ չափով կա։ Գիտե՞ք, արցախցին ընդունակ է հաղթահարել ամեն տեսակի դժվարություն։ Այս սահմանափակումներն, իհարկե, թողեցին իենց բացասական հետևանքը, սակայն, մեզ դրանք չկոտրեցին, այլ ավելի ուժ տվեցին՝ պայքարելու, մնալու մեր հողում։ Այդ կամքն այս ամիների ընթացքում արցախցիների մոտ առավել ընդգծվաժ և ամուր դարձավ, այնպես որ՝ ցանկացած ուժ կամ դաշինք, որ կգա սասանելու արցախցիների կամքը, հանդիպելու է մեր դիմադրությանը և սա քննարկման ենթակա հարց չէ Արցախի ժողովրդի համար»,- ամփոփելով զրույցն, ասում է պահեստազորի սպա, արցախաբնակ Սերգեյ Համբարձումյանը

Շուտով կարող է ստորագրվել Հայաստանի եւ Թուրքիայի միջեւ դիվանագիտական հարաբերությունների հաստատման եւ սահմանների բացման մասին փաստաթուղթ։ Այս մասին NEWS.am-ի հետ զրույցում ասաց ռուս քաղաքագետ, Մերձավոր Արեւելքի եւ Կովկասի երկրների հարցերով փորձագետ Ստանիսլավ Տարասովը: Նա կարծում է, որ Հայաստանն արեւմտյան ուղղության հետ մեկտեղ խաղում է նաեւ թուրքական ուղղությամբ։ Նա հիշեցրեց Հայաստանի արտգործնախարարի այցը Անկարա եւ նրա հանդիպումը Չավուշօղլուի հետ Թուրքիայում տեղի ունեցած երկրաշարժից հետո: «Կարծում եմ, որ դրանում լուրջ դեր է խաղում արեւմտյան սփյուռքը, իսկ թուրքերը խաղարկում են այդ խաղաքարտը։ Ապագայում Հայաստանում երկրորդ պետական լեզուն կարող է դառնալ թուրքերենը»,-հավելեց փորձագետը։

Տարասովը վստահեցրեց, որ Լաչինի միջանցքում առկա գործընթացները ռուսական խաղ չեն։ «Ռուսաստանն արել է ամեն ինչ․ նոյեմբերի 9-ի հայտարարություն (ընդամենը երեք հայտարարություն), սահմանազատման հարցով բանակցություններ, Պուտինի միջնորդությամբ հանդիպում։ Իսկ Երեւանը գնաց ինքնուրույն գործընթացի՝ Արեւմուտքի առաջարկություններով։ Դրանից հետո Հայաստանը չգնաց Մոսկվա եռակողմ հանդիպման՝ խաղաղության պայմանագրի պայմանները քննարկելու համար։ Այնուհետեւ Երեւանը Բաքվին ուղարկեց խաղաղության համաձայնագրի իր նախագիծը, որը քննարկվում էր Բլինքենի մասնակցությամբ Մյունխենի համաժողովում: Իսկ Ադրբեջանը չի ցանկանում անգամ օգտագործել Լեռնային Ղարաբաղ տերմինը բուն պայմանագրում, առավել եւս, եթե Հայաստանը Լեռնային Ղարաբաղը ճանաչում է որպես Ադրբեջանի ներքին խնդիր։ Երեւանը պարզապես հանձնում է Լեռնային Ղարաբաղը ինչ-որ պայմանով։ Իսկ ի՞նչ կստանա Հայաստանը դրա դիմաց։ Անհայտ է»,-նշեց քաղաքագետը։

Տիգրան Արզաքանցյանից՝ առանձնապես խոշոր չափերով գումար շորթելու մեջ մեղադրվող Արտակ Գալստյանին՝ «Վանոյի Արտակին», խոշտանգելու դեպքով իրավապահները քննություն չեն իրականացնում, Գալստյանը պնդում է՝ իրեն խոշտանգել են Նիկոլ Փաշինյանի «դաբրո»-ով, ինչի մասին հայտնել էր ՔԿ նախագահ Արգիշտի Քյարամյանը։ Տեղեկությունը «Փաստինֆո»-ի հետ զրույցում փոխանցեց փաստաբան Արսեն Մկրտչյանը։

Հիշեցնենք, որ Արտակ Գալստյանը՝ «Վանոյի Արտակը», ձերբակալվել, ապա՝ կալանավորվել է 2023թ. ապրիլի 17-ին՝ առանձնապես խոշոր չափերով շորթում կատարելու մեղադրանքով։ Քրեական գործի տվյալներով՝ «Հանրային ձայն» կուսակցության նախագահ Արտակ Գալստյանը և նույն կուսակցության պատվավոր նախագահ Վարդան Ղուկասյանը միմյանց հետ նախնական համաձայնություն են ձեռք բերել Տիգրան Արզաքանցյանից առանձնապես խոշոր չափերով շորթում կատարելու վերաբերյալ։ 2022թ. մարտի 23-ին Ա. Գալստյանը հեռախոսակապ է հաստատել Տիգրան Արզաքանցյանի հետ և պահանջել 53.806.500 ՀՀ դրամին համարժեք 110.000 ԱՄՆ դոլար գումար տրամադրել իրենց՝ հակառակ դեպքում նրա և նրա կնոջ վերաբերյալ Վ. Ղուկասյանի կողմից վարվող «Հանրային ձայն» հաղորդաշարի ընթացքում կհրապարակվեն նրանց պատիվն ու արժանապատվությունը նվաստացնող, բարի համբավն արատավորող տեղեկություններ։ Տ.Ա.-ն չի կատարել նրանց պահանջը, որի հետևանքով Վ.Ղ.-ն իր youtube.com տեսանյութերի հրապարակման կայքում բացված էջով 2022թ. հոկտեմբերից մինչև 2023թ. փետրվարն ընկած ժամանակահատվածում մի քանի անգամ հրապարակել է նման տեղեկություններ։ Քրեական վարույթով պարզվել է նաև Վարդան Ղուկասյանի կողմից քաղաքացիներից սպառնալիքով գումար շորթելու այլ դեպքեր ևս՝ շուրջ 46 դրվագ։

Քրեական վարույթի շրջանակներում ձերբակալված, ապա կալանավորված Արտակ Գալստյանի պաշտպաններն արդեն տևական ժամանակ է, ինչ ահազանգում են՝ Գալստյանին խոշտանգելու մասին, սակայն իրավապահները որևէ կերպ քննություն չեն իրականացնում այդ ուղղությամբ։ Համենայն դեպս՝ իրավապահ մարմիններից որևէ հոդաբաշխ բացատրություն չի տրվել, իսկ Գալստյանի պաշտպան Արսեն Մկրտչյանը «Փաստինֆո»-ի հետ զրույցում արձանագրեց, որ բացարձակ քննություն չի տարվել, պաշտպանության կողմը չի էլ ակնկալում։

«Խոշտանգումը կատարելու պահին, ըստ իմ վստահորդի, Արգիշտի Քյարամյանն ասել է, որ «դաբրո» ունի Նիկոլ Փաշինյանից՝ անգամ մինչև ֆիզիկական ոչնչացում։ Բնականաբար այս պարագայում ակնկալել, որ խոշտանգման փաստով կարող է նորմալ քննություն իրականացվել, միամտություն կլիներ։ Հասկանալի է, որ այս պարագայում, հաշվի առնելով Արգիշտի Քյարամյանի անձը, հատկապես, մտերմությունը Նիկոլ Փաշինյանի հետ և Փաշինյանի ուժայիններում հենարաններից մեկը լինելը, բնականաբար, չեմ ակնկալում, որ այդ ուղղությամբ ընդհանրապես կարող է քննություն իրականացվել»,- նշեց Մկրտչյանը՝ հավելելով, որ հաղորդումը ներկայացրել է ապրիլի 28-ին, սակայն առ այս պահը որևէ արձագանք չկա։ Ըստ փաստաբանի՝ անկախ նրանից, թե քննությունը ինչ կպարզեր հետագայում, առնվազն Արգիշտի Քյարամյանի պաշտոնավարումը պետք է կասեցվեր, իսկ գործը՝ ՔԿ-ից ուղարկվեր այլ կառույց, որ գոնե հանրության և իրավապաշտպան հանրության մոտ կասկած չառաջանար, որ պետությունն իր պոզիտիվ պարտականությունը փորձում է կատարել։ Արտակ Գալստյանին խոշտանգման ենթարկելը, փաստաբանի փոխանցմամբ, դրսևորվել է՝ հարվածներով, սպառնալիքներով, տեխնիկական միջոցներով կտտանքներ են կիրառվել՝ պատճառելով ֆիզիկական ցավ, ինչը զուգորդվել է հայհոյանքով։

«Այդ հայհոյախառը արտահայտությունների ներքո նաև կառույցի առաջին դեմքն արտահայտվել է, որ «իմ հասցեին հայհոյանք հնչեցնողն այս ինչն է», «դու՝ այս ինչն ես», «քեզ պաշտպանողը՝ այս ինչն է», հայհոյանք է տվել, «դու պատասխան ես տալու այն բանի համար, որ ինձ հայհոյում են»։ Այնուհետև տվել են հեռախոս, պահանջել են, որ Արտակ Գալստյանը զանգահարի Վարդան Ղուկասյանին, ինչն արվել է, խնդրել է, որ միայն Արգիշտի Քյարամյանի հասցեին հայհոյանքներ չհնչեն, սակայն, դա տեղ չի հասել, շատ ավելի վատ հայհոյանքներ են հնչել»,- նշեց փաստաբանը։

Ա. Մկրտչյանի վստահեցմամբ՝ խոշտանգված վիճակում Արտակ Գալստյանը բուժզննության ենթարկվել է, առկա են լուսանկարները, բժշկական տեղեկանքը, սակայն, նկատի ունենալով, որ դրանք անձնական տվյալներ են պարունակում, պաշտպանության կողմը չի հրապարակում։

«ՔԿՀ-ն՝ ի հեճուկս Քննչական մարմնի, չգնաց այն ճանապարհով, որ քողարկեր կատարվածը, որովհետև ես Արտակ Գալստյանից երկու րոպե ավելի շուտ արդեն ՔԿՀ-ում էի, մարդիկ ուղղակի պարզ ասեցին, որ կան մարմնական վնասվածքի հետքեր։ Միակ վտանգը, որ մենք ունեցել ենք, դա այն էր, որ ուղեկցողների վրա կարող էր հանիրավի սլաքներ ուղղվեր, դրա համար էլ րոպեների ճշգրտությամբ հայտնում եմ ժամանակը, թե երբ է մարմնական վնասվածքը պատճառվել, հրապարակայնացրել եմ իմ և ուղեկցողների խոսակցությունը, որ, եթե մի օր այս գործը քննվի, թեև կասկածում եմ, որ Նիկոլ Փաշինյանի պաշտոնավարման տարիներին այս դեպքով օբյեկտիվ քննություն կարող է իրականացվել, ուղեկցողներին հանրիավի չկասկածեն մի բանում, որն իրենք չեն արել»,- նշեց Մկրտչյանը՝ հավելելով, որ ուղեկցողներն ամբողջ ընթացքում իրենց աչքի առաջ են եղել, որևէ ավելորդություն իրենց թույլ չեն տվել։

ՔԿՀ-ում այժմ Արտակ Գալստյանի նկատմամբ օպերատիվ-հետախուզական միջոցառումներ են իրականացվում, փաստաբանի դիտարկմամբ՝ «անմակարդակ», ինչի արդյունքում չգիտի, թե ինչ տվյալներ են ցանկանում ստանալ։ Բացի այդ, ճնշումներ են իրականացվում նաև Արտակ Գալստյանի ընտանիքի անդամների նկատմամբ, այսօր առավոտյան բերման է ենթարկվել Գալստյանի որդին՝ իբրև հեռախոսն առգրավելու պատճառաբանությամբ, Գալստյանը հոր դեմ ցուցմունք չի տվել։ Փաստաբանի խոսքով՝ եթե ներպետական ատյանում ակնհայտ է, որ անձը խոշտագվում է, սակայն ոչինչ չի ձեռնարկվում, ապա միջազգային կառույցներում պետք է այդ մասին բարձրաձայնել, ըստ այդմ, պաշտպանը իրավաչափ է համարում արտերկրում ի պաշտպանություն Գալստյանի իրականացվող ակցիաները։
Անդրադառնալով Գալստյանի մեղադրանքին՝ պաշտպանը դրանք ծիծաղելի, անեկդոտիկ որակեց, ըստ նրա՝ «եթե մեղադրանք հորինողը ծանոթ լիներ Գալստյանին, շփված լիներ, կհորիներ թեորիապես լինելիք բան»։

«Նախաքննության գաղտնիքից ելնելով՝ չեմ կարող մանրամասներ ներկայացնել, թեև հազիվ եմ զսպում, որ չպատմեմ, թե ինչ անեկդոտիկ մեղադրանքի հետ գործ ունենք, զարհուրելի։ Որ ասում եմ՝ ոչ պրոֆեսիոնալ նախաքննություն, քննչական մարմին, այստեղ նաև հաղորդում տվողի մտքի թռիչքն է շատ կարևոր, քանի որ նա նկարագրում է այնպիսի բաներ, որոնք շատ հեշտ են ստուգվում, պարզվում է՝ նման բան ոչ միայն չի կարող լինել Արտակ Գալստյանի կողմից, այլև՝ ՀՀ-ում առհասարակ, քանի որ նրա մատնանշած փաստական հանգամանքներից առնվազն մեկը վերաբերում է այնպիսի տվյալի, իրի նկարագրության, որը ՀՀ-ում հայտնի չէ։ Այսինքն՝ «հեքիաթ, հեքիաթ պապս» դրվել է մեղադրանքի մեջ։ Մի քաղաքական ուժի լիդերի կարգավիճակին հավակնող անձը՝ մյուս քաղաքական ուժի քաղաքապետի թեկնածուի մասին հաղորդում է ներկայացնում՝ անհնարին իրավիճակի մասին»,- նշեց փաստաբանը՝ փակագծեր չբացելով, թե ինչ իրի մասին է խոսքը։
Կալանավորման որոշման դեմ պաշտպանության կողմը բողոք ներկայացրել է, կարծում է՝ բողոքը, գուցե, կմակագրվի Արմեն Դանիելյանին կամ վերահսկման ներքո գտնվող այլ դատավորի։

Հայաստանը ապրիլի 26-ին ՄԱԿ-ում կողմ է քվեարկել Եվրոպայի խորհրդի և Միավորված ազգերի կազմակերպության համագործակցության մասին բանաձևին, որով պայմանավորվում են ամրապնդել համագործակցությունը՝ խթանելու օրենքի գերակայությունն ու ժողովրդավարությունը, խոսքի ու մտքի ազատությունը, պայքարելու ահաբեկչության, թրաֆիկինգի դեմ և այլն։ Փաստաթղթին կողմ է քվեարկել 122 պետության ներկայացուցիչ, 18՝ ձեռնպահ, 5՝ դեմ, այդ թվում՝ Ռուսաստանը, Հյուսիսային Կորեան և Բելառուսը։

«Հայաստանը Եվրոպայի խորհրդի անդամ է, և մի շարք ինստիտուտներ, որոնք Եվրոպայի խորհրդի կազմում գործում են, շատ կարևոր նշանակություն ունեն Հայաստանի համար՝ մարդու իրավունքների պաշտպանության, ժողովրդավարության զարգացման տեսանկյունից, և այդ բանաձևը ևս այդպիսի նպատակներ է հետապնդում և այդպիսի շեշտադրումներ ունի, ուստի տարօրինակ կլիներ, որ Հայաստանը չմիանար այս բանաձևի ընդունմանը», — ասում է ԱԺ արտաքին հարաբերությունների հանձնաժողովի նախագահ Սարգիս Խանդանյանը,- գրել է «Ազատություն» ռադիոկայանը։

Հայկական և ռուսական մամուլում, նաև սոցիալական ցանցերում քվեարկությունից հետո լուրեր տարածվեցին, թե Հայաստանը միացել է մի բանաձևի, որում դատապարտվում է Ռուսաստանի ագրեսիան Ուկրաինայի և Վրաստանի դեմ, իսկ բուն բանաձևը կոչ է անում փոխհատուցել Ուկրաինային հասցված վնասը։

Անցյալ շաբաթ ընդունված այս փաստաթղթում ՄԱԿ-ի ու ԵԽ-ի համագործակցության շրջանակում իսկապես կոչ կա «փոխհատուցում տրամադրել ուկրաինական պատերազմի զոհերին և արդարության առջև կանգնեցնել նրանց, ովքեր խախտել են միջազգային իրավունքը»։

Արդյոք այսպիսով Հայաստանը փոխե՞լ է իր դիրքորոշումը և այլևս ձեռնպահ չի քվեարկում Ռուսաստանին ագրեսոր կոչող բանաձևերին, «Ազատությունը» հետաքրքրվեց ԱԺ արտաքին հարաբերությունների հանձնաժողովի նախագահից, որը խորհուրդ տվեց մանրամասները ճշտել Արտգործնախարարությունից։

«Ըստ էության, Հայաստանը միացել է ամբողջ բանաձևին, և բանաձևը պետք է ամբողջության մեջ դիտարկել և ոչ թե կենտրոնանալ մեկ պարբերության վրա, որը տարբերվող շեշտադրումներ է պարունակում», — հավելեց պատգամավորը։

Փաստահավաք աշխատանքներ ենք իրականացրել Սյունիքի Կապան համայնքի Ներքին Հանդ, Սրաշեն և Ճակատեն գյուղերում, Կապան-Ճակատեն ճանապարհին։ Այս մասին նշված է «Թաթոյան» հիմնադրամի տարածած հաղորդագրուէթյան մեջ:

«Ձեռք բերված նոր ապացույցները հաստատում են, որ ադրբեջանական զինված ծառայողները շարունակում են անօրինական ամրացման աշխատանքները, խաթարել են մարդկանց անվտանգությունն ու բնականոն կյանքը»,-ասված է  հաղորդագրության մեջ:

 «Թաթոյան» հիմնադրամի տնօրեն Արման Թաթոյանի խոսքով՝ ադրբեջանցիները կրակոցներ են արձակում գյուղի հարևանությամբ գտնվող դիրքերից՝ դրանով իսկ փորձելով ահաբեկել մարդկանց։

«Մարդիկ զրկվել են սեփականության իրավունքով իրենց պատկանող հողոտարածքները, վարելահողերը, արոտավայրերն օգտագործելու հնարավորությունից»,- շեշտեց Թաթոյանը՝ հավելելով, որ ադրբեջանցիներն ականապատում են իրենց դիրքերի հարևանությամբ գտնվող, բայց արդեն ՀՀ ինքնիշխան տարածքի հատվածները, ինչպես նաև գողություններ են անում՝ այդ թվում գողանալով խոշոր եղջերավոր կենդանիներ։

Հիմնադրամը նաեւ տեսանյութ է հրապարակել:

Թուրքիայի և Ադրբեջանի բարձրաստիճան պաշտոնյաների, հիմա էլ Բրայզայի այս հայտարարույթյունները նպատակ ունեն միջազգային հանրության, ՀՀ գործընկերների աչքին հայկական ընդդիմությանը և Սփյուռքին ապակառուցողական տարրեր ներկայացնելուն։ Այս մասին ֆեյսբուքում գրել է ԱԺպատգամավոր Քրիստինե Գրիգորյանը.

«Այսօր Ադրբեջանում ԱՄՆ նախկին դեսպան Մեթյու Բրայզն հարցազրույցում ասել է․

«‎Խաղաղության պայմանագրի ստորագրման հիմնական խնդիրը հայկական ընդդիմության և սփյուռքի հակազդեցությունն է»։

Չնայած բոլոր քննադատություներին, որերորդ անգամ այսպիսի արձագանքները հստակ ցույց են տալիս, որ Հայաստանում և Սփյուռքում մարդկանց արձագանքը զսպել է Նիկոլ Փաշինյանին իրականացնել Ալիևի հետ ձեռք բերված պայմանավորվածությունները։

Ի՞նչու են արվում այսպիսի հայտարարությունները

Թուրքիայի և Ադրբեջանի բարձրաստիճան պաշտոնյաների, հիմա էլ Բրայզայի այս հայտարարույթյունները նպատակ ունեն միջազգային հանրության, ՀՀ գործընկերների աչքին հայկական ընդդիմությանը և Սփյուռքին ապակառուցողական տարրեր ներկայացնելուն և նրանց դերակատարության աճը կանխելուն։

Մինչդեռ իրականում այս հայտարարությունները պետք է ուղենիշ դառնան բոլորիս համար, որովհետև որերորդ անգամ մատնանշվում է Թուրքիայի և Ադրբեջանի համար ամենաշատ խնդիրներ ստեղծող գործոնները, հետո արդեն սովորույթի և զարմանալի պատահականության հետևանքով Հայաստանում իշխող ուժի կողմից սկսում է սաստկանալ նույն այդ ուժերի դեմ պայքարը»։