Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարանը՝ նախագահությամբ դատավոր Արտուշ Գաբրիելյանի, նախօրեին անպարտ է ճանաչել և արդարացրել է վեց անձի:

Դատավոր Գաբրելյանի վարույթում քննվող ՀՀ ոստիկանության անձնագրային և վիզաների վարչության Էրեբունու անձնագրային բաժանմունքի պետի, նույն բաժանմունքի առաջին կարգի մասնագետի, առաջատար մասնագետի, մեկ այլ առաջին կարգի մասնագետի, ինչպես նաև Էրեբունու բաժնի համայնքային ոստիկանության բաժանմունքի տեսուչի և մի քաղաքացու վերաբերյալ գործով վեց ամբաստանյալների նկատմամբ խափանման միջոց էր ընտրված չհեռանալու մասին ստորագրությունը:

Այսպիսով, ՀՀ ոստիկանության անձնագրային և վիզաների վարչության Էրեբունու անձնագրային բաժանմունքի պետ Արտյոմ Սեդրակյանին մեղադրանք է առաջադրվել ՀՀ-ից բացակայող Ա.Սլոյանի օգտին ակնհայտ ապօրինի գործողություն կատարելու` անձամբ անձագրային բաժանմունք չներկայանալու պայմաններում, վերջինիս կորցրած անձնագրի փոխարեն նոր անձնագիր հատկացնելու համար պահանջել է 5000 ԱՄՆ դոլոր, ապա սակարկելուց հետո 2013թ. օգոստոսին ստացել է առանձնապես խոշոր չափերով` 1.833.035 ՀՀ դրամի համարժեք` 4500 ԱՄՆ դոլոր կաշառք:

Այուհետև, Ա.Սլոյանի օգտին գործողություն կատարելու, այն է` վերջինիս անձամբ անձնագրային բաժանմունք չներկայանալու պայմաններում նրա անունից կեղծ դիմում լրացնելու և անձնագրի կորստյան կեղծ գործ կազմելու համար պաշտոնատար անձ չհանդիսացող, հանրային ծառայող Ս.Ունուսյանին անձամբ տվել է խոշոր չափերով` 500 ԱՄՆ դոլար ապօրինի վարձատրությոն և շահադիտական նպատակով անձամբ, ինչպես նաև իր ենթակայության տակ գտնվող պաշտոնատար անձ չհանդիսացող, հանրային ծառայողների օժանդակությամբ կազմակերպել է պաշտոնեական կեղծիք՝ Ա.Սլոյանի ՀՀ-ում գտնվելու, անձամբ անձնագրային բաժանմունք ներկայանալու և Էրեբունու զինկոմիսարիատում հաշվառվելու վերաբերյալ ակնհայտ կեղծ տեղեկություններ և գրառումներ է մտցրել պաշտոնեական փաստաթղթերում, կազմել կեղծ փաստաթղթեր, որոնց հիման վրա «Բնակչության պետական ռեգիստրի մասին» ՀՀ օրենքով ՀՀ կառավարության 2005թ. օգոստոսի 14-ի թիվ 1231-Ն որոշումով «ՀՀ քաղաքացու անձնագրի մաին» ՀՀ օրենքով և ՀՀ կառավարության 1998թ. դեկտեմբերի 25-ի թիվ 821 որոշմամբ հաստատված ՀՀ անձնագրային համակարգի կանոնադրության սահմանված կարգի խախտմամբ Ա.Սլոյանը հաշվառվել է բնակչության պետական ռեգիստրում, նրա անվամբ ՀՀ քաղաքացու կեղծ անձնագիր է կազմվել, տպագրվել ու հանձնվել:

Ըստ Աիդա Սարգսյանին առաջադրված մեղադրանքի՝ նա, աշխատելով ՀՀ ոստիկանության անձնագրային և վիզաների վարչության Էրեբունու անձնագրային բաժանմունքում՝ որպես առաջին կարգի մասնագետ, օժանդակել է նշված բաժանմունքի պետ, մշտապես իշխանության ներկայացուցչի գործառույթներ իրականացնող պաշտոնատար անձ, Ա.Սեդրակյանի կողմից Ն.Սլոյանից 5000 ԱՄՆ դոլոր կաշառք պահանջելու, առանձնապես խոշոր չափերով 4500 ԱՄՆ դոլոր կաշառք ստանալու և պաշտոնական կեղծիք կատարելու, ինչպես նաև իր ներկայացրած անձի` Ա.Սլոյանի օգտին լիազորությունների շրջանակում ակնհայտ ապօրինի գործողություն կատարելու համար, 3000 ՀՀ դրամ ապօրինի վարձատրություն է տվել նույն բաժանմունքի առաջին կարգի մասնագետ, պաշտոնատար անձ չհանդիսացող հանրային ծառայող Գոհար Զարգարյանին:

Ըստ Սոֆիա Ունուսյանին առաջադրված մեղադրանքի՝ նա, աշխատելով Էրեբունու անձնագրային բաժանմունքում որպես առաջատար մասնագետ, նշված բաժանմունքի պետ Ա.Սեդրակյանի հանձնարարությամբ Ա.Սլոյանի օգտին իր լիազորությունների շրջանակներում կատարել է ակնհայտ ապօրինի գործողություններ, որի համար, Ա.Սեդրակյանից ստացել է խոշոր չափերով 500 ԱՄՆ դոլոր ապօրինի վարձատրություն, նաև օժանդակել է մշտապես Ա.Սեդրակյանի կողմից շահադիտական նպատակներով պաշտոնեական կեղծիք կատարելուն:

Ըստ Էրեբունու անձնագրային բաժանմունքում առաջին կարգի մասնագետ Գոհար Զարգարյանին առաջադրված մեղադրանքի նա բաժանմունքի պետ Ա.Սեդրակյանի հանձնարքարությամբ Ա.Սլոյանի օգտին իր լիազորությունների շրջանակներում կատարել է ակնհայտ ապօրինի գործողություններ, որի համար նույն բաժանմունքի առաջին կարգի մասնագետ Ա.Սարգսյանից ստացել է 3000 ՀՀ դրամ ապօրինի վարձատրություն, նաև օժանդակել է Ա.Սեդրակյանի կողմից շահադիտական նպատակով պաշտոնեական կեղծիք կատարելուն:

Էրեբունու բաժնի համայնքային ոստիկանության բաժանմունքում որպես տեսուչ Վահագն Մելքոնյանին էլ մեղադրանք է առաջադրվել անձնական դրդումներով պաշտոնեական կեղծիք կատարելու համար:

Ըստ Նավո Սլոյանին առաջադրված մեղաառաջադրանքի՝ նա թոռան` Ալբերտ Սլոյանի օգտին լիազորությունների շրջանակներում ակնհայտ ապօրինի գործողություն կատարելու, այն է` վերջինիս ՀՀ-ում չգտնվելու և անձամբ անձնագրային բաժանմունք չներկայանալու պայմաններում ՀՀ քաղաքացու անձնագիր հատկացնելու Էրեբունու անձնագրային բաժանմունքի առաջատար մասնագետ, Ա.Սարգսյանի միջոցով նշված բաժանմուքնի պետ Ա.Սեդրակյանին տվելէ առանձնապես խոշոր չափերով` 4500ԱՄՆ դոլոր կաշառք և իրացրել է ակնհայտ կեղծ պաշտոնեական փաստաթուղթ կեղծ հիմքերով 2013թ. օգոստոսի 22-ին Ա.Սլոյանի անվամբ տպագրված AN սերիայի թիվ 0621102 կեղծ անձնագիրը:

Արտյոմ Սեդրակյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով, 312.1-րդ հոդվածի 2-րդ մասով և 314-րդ հոդվածի 1-ին մասով, Աիդա Սարգսյանին՝ 38-311-րդ հոդվածի 4-րդ մասի 2-րդ կետով, 312.1-րդ հոդվածի 1-ին մասով և 38-314 -րդ հոդվածի 1-ին մասով, Սոֆիա Ունուսյանին՝ 311.1-րդ հոդվածի 3-րդ մասի 2-րդ կետով և 38-314-րդ հոդվածի 1-ին մասով, Գոհար Զարգարյանին՝ 311.1-րդ հոդվածի 2-րդ մասով և 38-314-րդ հոդվածի 1-ին մասով, Վահագն Մելքոնյանին՝ 314-րդ հոդվածի 1-ին մասով, իսկ Նավո Սլոյանին՝ 312-րդ հոդվածի 3-րդ մասի 1-ին կետով և 325-րդ հոդվածի 1-ին մասով:

ԱՄՆ-ի բնակիչների մեծ մասը տարին կավարտի՝ առերեսվելով արկտիկական ջերմաստիճանի և կտրող քամիների հետ: 2018 թվականի սկիզբը ավելի մեղմ եղանակ չի խոստանում: Այս մասին տեղեկացնում է «Ամերիկայի ձայնը»:

Ուոթերֆորդ ապակե գունդը պատրաստ է Նյու Յորքի Թայմս Սքուերում ազդարարել նոր տարվա գալուստը, սակայն նրանք, ովքեր ցանկանում են մասնակցել 110 տարվա այս ավանդույթին և բացօթյա համերգին պետք է տաք հագնվեն: ԱՄՆ-ի կենտրոնական և հյուսիսարևելյան 2Օ նահանգներ արդեն իսկ ծածկված են ձյան շերտով:

Ցածր ջերմաստիճանը բարդացնում է փողոցների մաքրման աշխատանքները և դանդաղեցնում երթևեկությունը:

Իսկ արտակարգ իրադրությունների ծառայությունները անօթևան մարդկանց փողոցներից տեղափոխում են հասարակական կացարաններ։

Կացարաններից մեկի աշխատակիցն ասում է,-«Մենք գիտենք, որ այստեղ բերված մարդկանցից ոմանք կարող էին 15-30 րոպեների ընթացքում ցրտից մահանալ»:

Սակայն այս եղանակը ոչ բոլորին է վհատեցրել։ Շատերն ուրախությամբ դուրս են եկել փողոց, օրինակ չմշկասահքով զբաղվելու համար։ Նրանց խոսքերով պարզապես պետք է տաք հագնվել:

Հյուսիսային քաղաքներում ինչպես Չիկագոյում, Սեինթ Լյուիսում, Նյու Յորքում, Վաշինգտոնում ու Աթլանթայում Նոր Տարվա գիշերը ջերմաստիճանը սովորականից կիջնի մոտ տասը աստիճանով: 2018 թվականի առաջին շաբաթը նույնպես ծայրահեղ սառը կլինի։ Ձնաբուք կարող է սկսվել նաև հարավային ափամերձ նահանգներում։

Ամանորի և Սուրբ Ծննդի կապակցությամբ շատերն են տոնածառեր դնում իրենց տներում, բնակարաններում, աշխատավայրերում և այլն…Ուրիշներից հետ չի մնում նաև Շիրակի Մայր բուհը…Սակայն,ինչպես շատ բնագավառներում,այնպես էլ տոնածառ դնելուց ՇՊՀ-ն առանձնացավ իրեն բնորոշ շռայլությամբ՝սարսափելի թանկ տոնածառով…
Ամիսներ առաջ ՀՀ վարչապետ Կարեն Կարապետյանը, որոշ նախարարների կարգի հրավիրելու նպատակով, կառավարության նիստի ժամանակ հասկացրեց,որ շատ լավ ծանոթ է պետական գումարները գրպանելու նրանց կողմից կիրառվող սխեմաներին…Պետական գումարները գրպանողներին վարչապետն անվանեց «պրիմիտիվ գողեր»…Շիրակի պետհամալսարանի պարագայում խոշորամասշտաբ և պրիմիտիվ գողությունները սերտաճած են,քանի որ դրանք իրականացնողը ռեկտոր Սահակ Միանսյանն է…Բազմիցս անդրադարձել եմ ՇՊՀ դահլիճին և բուֆետին,որոնք բուհի վրա նստել են համապատասխանաբար 118 միլիոն(կահավորումը և տեխնիկան այս գումարի մեջ չեն մտնում) և 25 միլիոն դրամ,այն դեպքում,երբ Գյումրիի կենտորնում 118 միլիոն դրամով կարելի է գնել 3-4 հատ նորակառույց երկհարկանի և բավական լավ վերանորոգված տներ,իսկ Գյումրու քաղաքպետարանը 32 միլիոն դրամով բավական մեծ երկհարկանի շենք է վերանորոգեց…Սա ՇՊՀ-ի թալանի խոշորամասշտաբ դրսևորումներից է…ՀՀ վարչապետի բնութագրած «պրիմիտիվ» գողությունների շարքին կարելի է դասել մի քանի միլիոն դրամանոց ֆուրշետների կազմակերպումը,էժանագին երաժշտական խմբերի հրավիրումը և նրանց բարձր հոնորարներ տալը,յուրայիններին և մտերիմներին բուհ բերելն ու 350-400 հազար դրամ աշխատավարձ վճարելը, գարադարանի 15 տոննա գրքերի մակուլատուրա հանձնելը և այլն…»Պրիմիտիվ» գողություն է նաև սեփական անձին 785 հազար դրամ (700 հազար ռեկտորի աշխատավարձն է,85 հազարն էլ որպես դասախոս է ստանում) աշխատավարձով ինքնապարգևատրելը…
Ամանորի նախաշեմին ևս մեկ պրիմիտիվ գողության փաստ արձանագրվեց ՇՊՀ-ում…Ռեկտորի մտերիմները բարձրաձայնում են,որ բուհում տեղադրված տոնածառի և դրա զարդարանքի համար արդեն ծախսվել է 800 հազար դրամ գումար (տե´ս լուսանկարը)…Որևէ բանիմաց մարդ կարո՞ղ է պատկերացնել,որ այս տոնածառի և նրա խղճուկ զարդարանքի վրա ծախսված է 800 հազար դրամ… Հավատացողը կա´մ դեմագոգ է,կա´մ ռեկտորի կամակատարը…Պարոն Մինասյանը շարունակում է բուհի գումարների յուրացման և փոշիացման քաղաքականությունը…Բացարձակ կապ չունի,այդ 800 հազարը բուհի բյուջեից է,թե, այսպես կոչված, արհկոմի գումարներն են…Երկու պարագայում էլ դա համալսարանի աշխատակիցների միջոցների հաշվին է, քանի որ նույն արհկոմի հսկայական գումարները կարող են ուղղվել դասախոսների սոցիալական վիճակի բարելավմանը…Բացի այդ, տոնածառի և վերջինիս զարդարանքի վրա 800 հազար գումար ծախսված չէ..Սա «պրիմիտիվ» գողության հերթական դրսևորումներից մեկն է ՇՊՀ-ում…
Համոզված եմ,որ ոչ մի հայաստանյան բուհում 800 հազար դրամանոց տոնածառ դրված չէ…Այդպիսի գումար նույնիսկ նախագահի նստավայրի տոնածառը չարժի…Սակայն ՇՊՀ ռեկտոր Սահակ Մինասյանը սիրում է շռայլ ծախսեր, որովհետև իմաստը հենց թանկ ծախսերի մեջ է…Բայց նա չի սիրում այդ ամենն իր գրպանից վճարել…Նրա նախասիրությունները վճարվում են բուհի աշխատակիցների և 2500 ուսանողների կողմից. դասախոսներին ցածր է վարձատրում,իսկ ուսանողների էլ զեղչերն է կրճատում…

Գագիկ Համբարյան

Հիսուսը Երիքով մտավ և անցնում էր քաղաքի միջով։ Զակքեոս անունով մի մարդ, որ մաքսապետ էր և հարուստ, ուզում էր տեսնել, թե ո՛վ է Հիսուսը, բայց ամբոխի պատճառով չէր կարողանում, քանի որ կարճահասակ էր։ Ուստի առաջ վազեց, բարձրացավ մի ժանտաթզենու վրա, որպեսզի տեսնի, որովհետև Հիսուսն այդ տեղով էր անցնելու։ Հիսուսը երբ հասավ այդ տեղը, վեր նայեց և ասաց.
-Զակքեո՛ս, շտապի՛ր, ցա՛ծ իջիր, որովհետև այսօր ես պետք է քո տանը գիշերեմ։
Զակքեոսը շտապ ցած իջավ և ուրախությամբ ընդունեց Հիսուսին։ Բոլոր նրանք, ովքեր այս տեսան, սկսեցին մրթմրթալ և ասել.
-Այս մարդը գնաց մի մեղավորի տուն և հյուր եղավ։
Զակքեոսը եկավ կանգնեց և ասաց Տիրոջը.
-Տե՛ր, ահա իմ ունեցածի կեսը կտամ աղքատներին, և եթե որևէ մեկին անիրավել եմ, քառապատիկ կհատուցեմ նրան։
Հիսուսը նրան ասաց.
-Այսօր փրկություն եկավ այս տան վրա, քանի որ այս մարդն էլ Աբրահամի որդի է, որովհետև Մարդու Որդին եկավ փնտրելու և փրկելու կորածին։
(Ղուկասի ավետարան 19:1-10)

Ռուբեն աբեղա Զարգարյան

Բոլորն են լսել «օրենքով գող» բառակապակցությունը: Սակայն հանցագործ աշխարհից հեռու մարդկանց այս խոսքի իմաստն այնքան էլ հասկանալի չէ:

Ո՞վ կարող է դառնալ «օրենքով գող»

«Օրենքով գողը» քրեական աշխարհի էլիտան է, իսկ բանտում այդ մարդը լիդեր է դառնում: Սակայն այդ կոչմանն արժանանալու համար թագադրման թեկնածուն պետք  է համապատասխանի որոշ պահանջների:

Առաջին հերթին` նա պետք է հանցագործ աշխարհում հարգանք և պատիվ վայելի, մի քանի դատվածություն ունենա: Շատ քիչ հանդիպող երևույթ է այն, որ թեկնածուն երբևէ բանտում հայտնված չի լինում:

Ավելի կատարյալ է համարվում այն, որ թեկնածուն հանցագործ կյանքում է հայտնվում դեռևս շատ վաղ տարիքից:

«Օրենքով գողը» երբեք չպետք է որևէ կերպ առնչվի կառավարության կամ իշխանության հետ, անգամ բանակում չպետք է ծառայի: Եղել են դեպքեր, երբ նրանք կարգալույծ են արվել` զինվորական ծառայության փաստը թաքցնելու փորձերի պատճառով:

Իսկական օրենքով գողը չպետք է կին, երեխաներ ունենա, թեև թույլատրվում են համատեղությամբ ապրելու պայմանները: Սա բացատրվում է հետևյալ կերպ` կալանքի դեպքում օրենքով գողի կինը կարող է յուրացնել նրա ունեցվածքը և հեռանալ ուրիշի մոտ, իսկ երեխաները օրենքով գողին խոցելի են դարձնում․ չէ՞ որ հակառակորդները նրան կարող են իրենց պայմանները թելադրել` սպառնալով հաշիվ մաքրել մտերիմներից:

Սրանից բացի՝ օրենքով գողն իրավունք չունի բիզնես սկսել կամ քաղաքականությամբ զբաղվել:

Ինչի՞ համար կարող են կարգալույծ անել 

Ամենածանր հանցանքը, որը կարող է անել օրենքով գողը, փողերը թաքցնելն է, ուրիշի ունեցածը յուրացնելն ու «օբշյակից» թալանելը: Եթե սա բացահայտվի, հատուկ «սխոդկա» կկազմակերպվի, որի ժամանակ որոշում կկայացվի բառի ուղիղ և փոխաբերական իմաստով ականջները ձգել` նրան զրկել կարգավիճակից:

Արգելվում է նաև զբաղվել հասարակական գործունեությամբ, ոստիկանությունում ցուցմունք տալ, որոշ դեպքերում անգամ թերթ կարդալ:

Օրինակ՝ 2014 թվականին կարգալույծ արվեց սլավոնացի Սաշա Սեվերնին, ով մեղադրվեց հարցազրույց տալու մեջ:

Օրենքով գողն իրավունք ունի սպանություն գործելու միայն իր կյանքը փրկելու նպատակով կամ օրենքով գողերի սկզբունքները պաշտպանելու համար: Մնացած բոլոր դեպքերում նա կզրկվի տիտղոսից: Ամենածանր հանցանքը բռնաբարությունն է: Նման քայլի դիմելու դեպքում նա ոչ միայն կզրկվի տիտղոսից, այլև դաժան կտտանքների կենթարկվի, այդ թվում` ցմահ աքսոր այդ շրջանից:

Ինչպիսի՞ դաջվածքներ են անում նրանց մարմնի վրա 

Երբ գողական «սխոդկան» թագադրման որոշում է կայացնում, նրա մարմնին, ի նշան նոր կարգավիճակի, դաջվածքներ են անում: Այդպիսիք են ծնկներին դաջված աստղերը, որը ենթադրում է, որ օրենքով գողը երբեք ծնկի չի գա օրենքի առաջ:

Թագը գլխին թռչող արծիվը խորհրդանշում է ուժը և ուրիշներին չենթարկվելու ցանկությունը: Երբեմն այս նպատակով նաև զոհի վրա հարձակվող արծիվ է դաջվում:

Եվ վերջապես, ամենատարածված դաջվածքներից մեկը սիրտն է` թրով խոցված, որի իմաստը հետևյալն է` դավաճանությանը մահ: Սա արվում է, որպեսզի օրենքով գողը միշտ հիշի, թե ինչ է սպառնում նման դեպքերում:

Բանն այն է, որ հանցագործ աշխարհն ապրում է իր օրենքներով` հասարակության մյուս շերտերից տարբերվող, այնպես, ինչպես նրանք, ովքեր իրենց կյանքը տվել են եկեղեցուն ծառայելուն:

Հոգևորականները ևս հեղափոխությունից հետո կարող էին աքսորվել և կալանավորվել: Եվ քանի որ եկեղեցու նվիրյալները հարգանք էին վայելում, ուստի օրենքով գողերը նրանց ընդունում էին որպես իրենց եղբայրներ:

Օրինակ՝ աստվածածինը խորհրդանշում է բանտի զավակ. մարդը հանցագործ կյանքը սկսել է վաղ տարիքից:

Այսպիսով՝ որքան շատ են կրոնական դաջվածքները մարդու վրա, այնքան նրա կարգավիճակն ավելի բարձր է:

Ինչպե՞ս են հուղարկավորում օրենքով գողերին 

Քրեական հեղինակություններին ծաղիկներով, մեծ հուշարձաններով և հանդիսավորությամբ հուղարկավորելը տարածվել է վերջերս: Նախկինում օրենքով գողերի վերջին հանգրվանը բանտն էր, որտեղ նրանք մնում էին տասնյակ տարիներ, ուր մնաց թե թանկարժեք կոստյումներ լինեին:

Իրավիճակը փոխվեց 1990-2000-ականներին, երբ հեղինակությունները կյանքից հեռանում էին ոչ թե բանտում, այլ` ազատության մեջ: Հիմնականում նրանց հուղարկավորությունը բավականին ավանդական ձևով է ընթանում, իսկ մարմինը հիմնականում չեն հերձում:

Դագաղը պատրաստում են ծառերի թակարժեք փայտից: Սկզբում հրաժեշտի համար մոտենում են միջին խավի ներկայացուցիչները, ապա` հարազատները, վերջում` օրենքով գողերը: Եթե ընթացքին հետևում են իրավապահները, ապա օրենքով գողերը կարող են հրաժեշտ տալ նախապես, որպեսզի ոստիկանությանը չբախվեն:

Պատմում են, թե Յապոնչիկի հուղարկավորությունը շատ բազմամարդ ու հիշարժան էր, քանի որ քրեականները մտավախություն ունեին, որ օրենքով գողերի դարաշրջանը կարող էր նրանով ավարտվել:

Ըստ նույն խոսակցությունների` Յապոնչիկը միակն էր, ով գոնե պատվի ու արժանապատվության ինչ-ինչ կարևոր նախադրյալներ էր թողել ժառանգություն:

Աշխարհի և Եվրոպայի եռակի չեմպիոն, Օլիմպիական խաղերի ոսկե մեդալակիր Արթուր Ալեքսանյանի  եղբայրը՝ Հունահռոմեական ոճի ըմբշամարտի մինչև 71 կգ քաշային կարգում Հայաստանի չեմպիոն Ռաֆայել Ալեքսանյանը, ֆեյսբուքյան իր էջում անդրադարձել է օրերս որոշված Հայաստանի լավագույն մարզիկների տասնյակին:
Ըմբշամարտիկը նաև իր տասնյակն է առաջարկել:

«Ծիծաղելի է նայել Հայաստանի տաս լավագույն մարզիկների ցանկին։ Նրանցից շատերը արժանի չէին գտնվելու տասնյակի մեջ, ավելին քան Օլիմպիական խաղերի մեդալակիր, ծանրամարտիկ Գոռ Մինասյանը, ով այս տարի նվաճեց ծանրամարտի Եվրոպայի առաջնության արծաթե մեդալ և մինչև 23 տարեկանների աշխարհի առաջնության չեմպիոնի կոչումը, կամ Լևան Բերիանիձեն և Գեորգի Կետոևը, որոնք ըմբշամարտի Եվրոպայի և Աշխարհի առաջնություններում նվաճեցին բրոնզե մեդալներ։ Այսպես կարող եմ թվել ևս մի քանի Եվրոպայի և Աշխարհի մեդալակիրների՝ Վոլոդյա Ֆրանգուլյան, Գրիգոր Գրիգորյան, Ռուբեն Ալեքսանյան։ Վերը թվարկած մեր արժանի մարզիկները, ի տարբերություն տասնյակում գտնվող մի քանիսի, իրենց թույլ չտվեցին ընկնել դռնեդուռ և խնդրել, որ քվեարկեն իրենց օգտին։ Ստացվում է, որ տասնյակում ընդգրկվել են «sms հավաքողներ», այլ ոչ թէ մարզիկներ, որոնք արժանի էին գտնվելու լավագույն տասնյակում։

Ինչ վերաբերվում է Հայաստանի լավագույն մարզիկին, կասեմ, որ Արթուր Ալեքսանյանը այս չորս տարիների ընթացքում եղել է լավագույնը և այս տարի ևս արժանի էր լավագույնը լինելու։ Զարմանալի է, որ չորս տարի անընդմեջ UWW — ի համաշխարհային վարկանիշային աղյուսակում լինելով առաջինը՝ իր երկրում երկրորդն է։ Ես շատ հարգում եմ Հենրիկ Մխիթարյանին, բայց նա չպետք է գտնվեր այս տասնյակում։ Նա, անկասկած, Հայաստանի պատմության լավագույն ֆուտբոլիստն է, բայց իր երկրի համար ոչինչ չի նվաճել, որ արժանանար լավագույն տասնյակում գտնվելուն։ Այն, որ նա ճանաչում է բերել մեր երկրին, չի նշանակում, որ պետք է հայտնվեր Հայաստանի տաս լավագուն մարզիկների ցանկում։ Այս նույն տրամաբանությամբ տասնյակում կարող են ընդգրկվել աշխարհահռչակ նկարիչներ, դերասաններ, շոու-բիզնեսի աստղեր, ինչպես նաև մարզիկներ Գեղարդ Մուսասին ու Դավիթ Խաչատրյանը և անգամ Դան Բիլզիրյանը, չէ՞ որ նա պոկերի աշխարհի չեմպիոն է։ Նրանք նույնպես ճանաչում են բերել մեր երկրին տարբեր ոլորտներում։ Կատակը կատակ, բայց Հայաստանի տաս լավագույն մարզիկների ցանկը, ըստ նվաճած մեդալների պետք է ունենար հետևյալ տեսքը.

1. Արթուր Ալեքսանյան
2. Մաքսիմ Մանուկյան
3. Հովհաննես Բաչկով
4. Սիմոն Մարտիրոսյան
5. Գոռ Մինասյան
6. Լեվան Բերիանիդզե
7. Գեորգի Կետոև
8. Արթուր Թովմասյան

Իսկ վերջին 2 տեղերը չեմ նշում, քանի որ մեր մոտ կան Եվրոպայի առաջնություններում մեդալ նվաճած 3-4 մարզիկներ, ովքեր արժանի հավակնորդներ էին այդ տեղերին»,- գրել է Ռաֆայել Ալեքսանյանը:

ՀՀ քննչական կոմիտեի հատկապես կարևոր գործերի քննության գլխավոր վարչությունում քննվող քրեական գործով ձեռնարկված անհրաժեշտ քննչական և դատավարական այլ գործողությունների արդյունքում բացահայտվել են քաղաքացուց առանձնապես խոշոր չափերով շորթում կատարելու դեպքի մի շարք հանգամանքներ. երկու անձ ներգրավվել է որպես մեղադրյալ։

Նախնական քննությամբ իրականացված մեծածավալ քննչական և օպերատիվ-հետախուզական գործողությունների արդյունքում փաստական տվյալներ են ձեռք բերվել, որ ՀՀ քաղաքացուց 2016 թվականի մարտին կատարվել է առանձնապես խոշոր չափերով շորթում՝ քրեական հեղինակությունների մասնակցությամբ։

Նախնական քննության տվյալներով՝ ՀՀ քաղաքացին իր ծանոթի հետ ունեցել է անձնական, գումարային խնդիրներ, ինչին միջամտել են քրեական հեղինակություններ համարվող Մ.Դոլոյանը, Վ.Ավդիանին և ճնշում գործադրելու միջոցով քաղաքացուց պահանջել են առանձնապես խոշոր չափերի գումար, որն, իբր, նա պարտք է մեկ ուրիշին։

2016 թվականի մարտի 25-ին՝ Երևանում, Մ.Դոլոյանը զանգահարել և հանդիպման է հրավիրել քաղաքացուն։ Ձեռք բերված պայմանավորվածության համաձայն՝ հաջորդ օրը՝ ժամը 14:00-ի սահմաններում, նրանք հանդիպել են, որին ներկա են եղել նաև այլ անձինք, նրանց թվում՝ Վ.Ավդիանին:

Օբյեկտիվ քննությամբ հիմնավորվել է, որ վերջիններս պարզաբանումներ են պահանջել 2013-2014թթ. Վրաստանում ենթադրյալ պարտված «գրազի» վերաբերյալ, ինչը քաղաքացին հերքել է։ Այնուհետև քաղաքացու նկատմամբ բռնություն է գործադրվել՝ պահանջելով իրենց հանձնել 20.000 ԱՄՆ դոլար։ Քննությամբ պարզվել է նաև, որ հեղինակությունները սպառնալիքով վերցրել են վերջինիս «Range Rover Sport» մակնիշի ավտոմեքենան, որով նա գնացել էր հանդիպման:

2017թ. նոյեմբերի 17-ին Մ.Դոլոյանը հայտնաբերվել է և ձեռք բերված ապացույցների հիման վրա՝ նրան մեղադրանք է առաջադրվել՝ ՀՀ քրեական օրենսգրքի 182-րդ հոդվածի 3-րդ մասի 2-րդ կետով, վերջինիս մասով քրեական գործը անջատվել է առանձին վարույթ և մեղադրական եզրակացությամբ ուղարկվել նախաքննության օրինականության նկատմամբ հսկողություն իրականացնող դատախազին:

Վ.Ավդիանին ներգրավվել է որպես մեղադրյալ՝ ՀՀ քրեական օրենսգրքի 182-րդ հոդվածի 3-րդ մասի 2-րդ կետով, և նրա նկատմամբ հայտարարվել է հետախուզում: Վերջինիս մասով նախաքննությունը շարունակվում է, միջոցներ են ձեռնարկվում դեպքի բոլոր հանգամանքները պարզելու, օբյեկտիվ, լրիվ և բազմակողմանի քննությունն ապահովելու ուղղությամբ:

Քանի որ այս օրերին շատ շատերն են ժամանակ ծախսում ամանորյա գնումների ցուցակ կազմելու վրա, մեր փորձագետները կազմել են գնումների վերջնական ցուցակը ռազմահայրենասիրական Նոր Տարվա համար։ Ներբեռնեք, քոփիփեյսթեք և վայելեք։ Վերջնական ցուցակը թարմացվում է։ 

1. Բուդ (խոզի) 1 հատ. 2 եթե հյուրերը շատ են։ 3 եթե լավ պաշտոն ունեք։
2. Բուդ (խոզի) սա մի անգամ էլ հիշեցնենք, որովհետև առանց սրա ձեր սեղանը խայտառակություն է։
3. Հնդկահավ, եթե դուք մի փոքր ձև տված եք։
4. Բադ։ Եթե դուք ահագին ձև տված եք։
5. Բլինչիկ։ Որ մասնակցես «ասա որ մե՛ր բլինչիկն ամենահամովնա» համայկական մրցույթ-փառատոնին։
6. Բլինչիկ սնկով։ Որովհետև դու չար կատակներ ես սիրում։
7. Խավիար կարմիր։ Որովհետև ԽՍՀՄ-ում սա համարվում էր լավ սեղանի առաջին հատկանիշը։
8. Խավիար սև։ 48%անոց սպառողական վարկ և դու Ամանորյա սեղանների թագավորն ես։
9. Բաստուրմա։ Գնել այնքան բաստուրմա, որքան ուտում ես 5 տարվա ընթացքում։
10. Սուջուխ մսային։ Բաստուրմայի ավելի համով, բայց գեշո ընկերը։
11. Սուջուխ քաղցր։ Եթե ուտելուց ուշադիր նայես փորիդ, կարող ես նկատել, ոնց ես չաղանում։
12. Ֆիլե։ Դե իրոք համեղա։
13. Անհասկանալի սալյամի։ Որովհետև ֆիլեն առաջինն ա վերջանում։
14. Ինչ-որ ձուկ։ Որը հաստատ թարմա։ Բերվելա 1 տարի առաջ Կամչատկայից ու իր վերջին 7 օրերը կանցկացնի ձեր սեղանին։
15. Աղցան, մայոնեզախեղդ արած, 1-2 օրում փչացող։ Որ արկածախնդիր հյուրերը բավարարություն ստանան։
16. Դոլմա։ Որովհետև դոլման մերն ա, ու թող ադրբեջանցին մռմռա։
17. Պասուց դոլմա։ Որ վերջում զարմացած դեմքով թափեք ու ասեք «շատ լավն էր է, ի՞նչի չկերան»։
18. Խորոված։ Եթե ֆանտազիա հեչ չունեք։
19. Իշլի քուֆա։ Որովհետև Սահմանադրությունը արգելումա այս ուտեստը փորձել տարվա մյուս օրերին։
20. Պանրեղեն։ Որովհետև 3 խառնած ախցաններից առաջացած գազերը հայ մարդու համար դեռ լուրջ մարտահրավեր չեն։
21. Ռոկֆոր (էն բորբոսով պանիրը)։ Կա հյուր որ մտածում է «կարողա էս տարի դուրս գա՞»։ Նա անպայման կփորձի։
22. Ձու։ Արի անկեղծ լինենք, առավոտը հո բուդ չես ուտելու՞։
23. Կոլաներ։ Մեկա տոներից հետո գնալու եք մարզասրահ։ Պլյուս մի արկղ գնելու դեպքում ինչ-որ անորակ խաղալիք են տալիս, ԱՅՈ՛։
24. Ջերմուկեղեն։ Նոր տարվա օրերին հայ մարդը պարտավոր է ընդունել միջին վիճակագրական մարդուն հասնող միներալների ու աղերի 1800%-ը։
25. «Բնական» հյութ։ Որ կոլաներին առարկող հյուրին լուրջ դեմքով առաջարկեք 100% բանանաի, մանգոյի, անանասի, նարնջի ու պապայայի խառնուրդ «մուլտիֆրուտ» կոչվող զանգվածը։
26. Լիմոնաթ։ Նոստալգիկ հյուրերի համար։
27. Խոլոդեց։ Ավանդույթները պահողների համար։
28. Սուշի։ Եթե աննորմալ եք։
29. Ալկոհոլ։ Ամեն տեսակից։ Շատ։ Որ հյուրի մտքով ինչ անցնի, հաղթական դեմքով, հանեք դնեք դեմը՝ ան։
30. Թթու։ Դե թթուն իրոք պետքա։
31. Բողկ։ Որովհետև դուք լավ մարդ եք։
32. Սացիվի։ Որովհետև ձեր տատը Վրաստանից էր։
33. Ձիթապտուղ։ Որ 20 հյուրերից մեկը, ով գժվումա դրա համար, զբաղմունք ունենա։
34. Տղեմալի, որ թաքցնես անհաջող խոզի բդի համը։
35. Անհավանական քանակի պոպոկեղեն։ Հայու գենը տարվա սպիտակուցների չափաբաժնի 65% ստանում է հենց Ամանորին։
36. Խմորողեն։ Իհարկե ոչ մի հյուր այնքան երկար չի մնա, որ հասնի աղանդերին, բայց չորացած միկադոն ուրիշ է էլի։
37. Միրգ։ Միրգ գնելիս պետք է հաշվարկը կատարել հետևալ բանաձևով X*2+5կգ: Որտեղ X=թե դուք ու ձեր հյուրերը ռեալ որքան միրգ կուտեք։
38. Չիր։ Որ մրգի էլ ավելի մեծ մասը թափեք։
39. Ռուսական կոնֆետ։ Իբր թե հայկականից լավնա, որովհետև դուք մտածում եք որ այն արտադրվելա Լեոնիդ Բրեժնևի ժամանակ ու մինչև թարմա մնացել։
40. Լավաշ։ Որ հունվարի 4-ին, երբ բոլոր խանութները բաց են, ապահովված լինեք չորացած և/կամ բորբոսնած լավաշով։
41. Կոկորդիլոս։ Եթե 2015թ. հուշերը դեռ վառ են։
42. Խաշ։ Եթե իսան չեք։
43. Բուդ (խոզի) երբեք ավելորդ չի երրորդ անգամ հիշացնել, որովհետև առանց սրա ամոթա։

Կիսվեք ձեր տառապող ընկերների հետ։

Շնորհավոր Ամանոր։

Ամանորյա տոներն ուրախ, բարձր տրամադրությամբ և առանց պատահարների անցկացնելու համար անհրաժեշտ է, որ խստագույնս պահպանվեն Ամանորի խորհրդանիշը հանդիսացող տոնածառի հրդեհային անվտանգության կանոնները:

Մասնավորապես.

— Տոնածառը տեղադրեք ամուր հիմքի վրա այնպես, որ ճյուղերը չդիպչեն պատերին, առաստաղին և գտնվեն էլեկտրասարքերից ու կենցաղային վառարաններից անվտանգ հեռավորության վրա.

— Տոնածառը թույլատրվում է տեղադրել 1-ին (ծայրահեղ դեպքում` 2-րդ) հարկում, ընդարձակ սենյակում, որն ունենա մեկից ավելի տարհանման ելք.

— Տոնածառի բունը դրեք թաց ավազով լցված դույլի (տարայի) մեջ և չորանալուն զուգընթաց՝ թրջեք ավազը.

— Եթե եղևնին չորացել է՝ դեն նետեք, քանի որ այն կարող է բռնկել ինչպես ջահը.

— Լուսավորության համար պետք է օգտագործել 12Վտ-ից ոչ ավելի հզորության էլեկտրալամպեր, իսկ դրանց ու լարերի միացման տեղերն անպայման զոդել և հուսալիորեն մեկուսացնել.

— Ամանորյա հանդիսությունների համար նախատեսված տեղերում անհրաժեշտ է մշտապես ունենալ հրդեհաշիջման սկզբնական միջոցներ` կրակմարիչ, ջուր, ավազ, ծածկոց և այլն, ինչպես նաև էլեկտրական լապտեր.

— Տոնածառների հսկողությունը պետք է իրականացնեն նախօրոք հրահանգավորում անցած անձինք:

Չի թույլատրվում`

— տոնածառը տեղադրել անցումների վրա, միջանցքներում, դռան առջև.

— օգտագործել աղեղնավոր լուսարձակներ, տարատեսակ հրդեհապայթյունավտանգ հրավառություններ, ճայթռուկներ, լուսավորել մոմերով, վառել հրավառելիք, ստեղծել այլ լուսային հրդեհավտանգ էֆեկտներ, որոնք կարող են հրդեհի պատճառ դառնալ.

— օգտագործել գնդակներ, փուչիկներ, խաղալիքներ և զարդարանքի միջոցներ, որոնք պատրաստված են հրդեհավտանգ, ինչպես նաև ինքնայրման հակում ունեցող կամ միմյանց հետ շփվելիս այրում կամ պայթյուն առաջացնող նյութերից և պարունակում են հրդեհապայթյունավտանգ գազեր.

— տոնածառը զարդարել հրապաշտպան բաղադրություններով չտոգորված ցելուլոիդե խաղալիքներով, թանզիֆով, բամբակով.

— միջոցառումների անցկացման տեղերը մթնեցնելու համար պատուհանները փակել ծածկոցափեղկերով, փոքրացնել կարգերի միջև եղած հեռավորությունները, ինչպես նաև անցումներում լրացուցիչ բազկաթոռներ տեղադրել, միջոցառումների ժամանակ դահլիճում լույսը մարել.

— ելքի նախամուտքերում, տարհանման ուղիներում պահել որևէ տեսակի գույք և նյութեր, խցանել տարհանման ելքերը, տարհանման ճանապարհներին ստեղծել մարդկանց ազատ տարհանմանը խոչընդոտող հարմարանքներ:

Հիշե՛ք. Հատկապես վտանգավոր են արծաթափայլ, ոսկեգույն զանազան «անձրևները» (նույնիսկ՝ գործարանային արտադրության), որոնք պատրաստված են ալյումինե նրբաթիթեղից: Դրանք կարող են միակցել էլեկտրական զարդաշարանները, եթե լամպի կոթառը դուրս է ընկել բնիկից:

Մի՛ մոռացեք. Չի կարելի երեխաներին թողնել տոնածառների մոտ առանց հսկողության, դա կարող է դժբախտ պատահարների պատճառ դառնալ:

Իսկ եթե այնուամենայնիվ հրդեհ է առաջացել, անհրաժեշտ է իրականացնել հետևյալ գործողությունները.

• Երբ այրվում է էլեկտրական զարդաշարանը՝ անմիջապես անջատեք այն էլեկտրական շղթայից կամ հոսանքազրկեք տեղամասը ընդհանուր էլեկտրական վահանակի անջատիչներով.

• Ահազանգեք 911 կամ 112 և երեխաներին դուրս բերեք սենյակից.

• Տոնածառը շրջեք հատակի վրա, որպեսզի կրակը չտարածվի վերև (կարող են բռնկվել պաստառներն ու վարագույրները), ծածկեք ծածկոցով, կրակի վրա ավազ ցանեք կամ ջուր լցրեք (եթե դա բնական եղևնի է).

• Սինթետիկ (արհեստական) տոնածառը շատ արագ է այրվում, ընդ որում այն հալվում ու հոսում է՝ այրման ժամանակ արտազատելով թունավոր նյութեր (ածխածնի օքսիդ, սինիլաթթու, ֆոսգեն): Այրվող պոլիմերները ջրով հանգցնելը վտանգավոր է, քանի որ հնարավոր է կայծերի ու հալված զանգվածի ցրում (ցրվածք): Անպաշտպան ձեռքերով մի դիպչեք այրվող տոնածառին, վրան գցեք խիտ գործվածքից ծածկոց և ավազ լցրեք.

• Մի՛ բացեք դռներն ու պատուհանները, քանի որ միջանցիկ քամին էլ ավելի կբորբոքի կրակը.

• Եթե հրդեհը մարելն անհնար է, ապա պինդ փակեք այրվող սենյակի դուռը և դրսի կողմից ջուր ցանեք վրան.

• Զանգվածային միջոցառումների ժամանակ, երբ առկա է երեխաների մեծ կուտակում, տարհանման ժամանակ հրմշտոցի հետևանքով հնարավոր ծանր հետևանքներից խուսափելու համար անհրաժեշտ է նախատեսել խուճապը կանխելու գործողությունների ծրագիր: Այդ իսկ պատճառով նմանօրինակ միջոցառումների ժամանակ տոնածառների հսկողությունը պարտադիր պետք է իրականացնեն նախօրոք հրահանգավորում անցած անձինք:

Կարևոր է հասկանալ, որ անվտանգության կանոնների պահպանումը մեծ ջանքեր չի պահանջի, փոխարենը կապահովի անվտանգությունն ու բարձր տրամադրությունն Ամանորյա հանդիսությունների ժամանակ:

ՇՆՈՐՀԱՎՈՐ ԱՄԱՆՈՐ ԵՎ ՍՈՒՐԲ ԾՆՈՒՆԴ