Ռուսաստանի ղեկավարությունը Մոսկվա ժամանած Քադաֆիի ներկայացուցիչներից պահանջել է անհապաղ դադարեցնել արյունահեղությունը, կատարել ՄԱԿ-ի անվտանգության խորհրդի բանաձևերը, ինչպես նաև թույլ տալ մարդասիրական օգնության  մուտքը Լիբիա: ՌԴ  արտգործնախարար Սերգեյ Լավրովը պնդել է, որ  անհրաժեշտ է որոշել  հրադադարի ռեժիմի հայտարարման  կոնկրետ ժամկետները:

Պաշտոնական Մոսկվան նաև հայտարարել է, որ առաջիկայում պատրաստ է ընդունել նաև լիբիացի ապստամբների ներկայացուցիչներին:

Le Monde թերթը գրում է, որ նման քայլերով Մոսկվան ակնհայտ ճնշում է գործադրում Մուամար Քադաֆիի ռեժիմի վրա:

Հիշեցնենք, որ մայիսի 16-ին Միջազգային դատարանի դատախազը պահանջել է հրաման տալ Մուամար Քադաֆիի, նրա որդի Սաիֆ ալ Իսլամի և Լիբիայի հետախուզության վարչության պետ Աբդուլլահ ալ Սենուսիի ձերբակալման պահանջով:

Միացյալ Նահանգների և ԵՄ արտաքին գործերի նախարարներ Հիլարի Քլինթոնն ու Քեթրին Էշթոնը Վաշինգտոնում կայացած բանակցությունների  ժամանակ հայտարարել են, որ միջազգային հանրությունը  պատրաստվում է Սիրիայի հանդեպ նոր պատժամիջոցների փաթեթ ընդունել՝ Բաշար Ասադի գործողությունները սանձելու համար: Քլինթոնն ընդգծել է, որ Բաշար Ասադն անձամբ պատասխանատու է իր երկրում տեղի ունեցող իրադարձությունների համար:

«Ասադը խոսում է բարեփոխումների մասին, սակայն ճնշում է ընդդիմադիրներին, ինչով և ցույց է տալիս իր իրական նպատակները: Սիրիայի իշխանությունները կրկնում են Իրանի իշխանությունների վատագույն քայլերը»,-ասել է Քլինթոնը, Քեթրին Էշթոնն էլ հավելել է, որ Սիրիայի իշխանությունները պետք է անհապաղ վերանայեն իրենց գործողությունները:

Ուսամա բեն Լադենի սպանությունից հետո «Ալ Ղաիդա» ահաբեկչական կազմակերպությունում կադրային փոփոխություններ են սպասվում: Այս պահին կազմակերպությունը ղեկավարում է եգիպտացի Սաիֆ ալ Ադելը:

Ըստ CNN հեռուստաընկերության, «Ալ Ղաիդա»-յի  լիբիական մասնաճյուղի անդամ Նոմանա Բենոթմանան հայտնել է, որ ալ Ադելի թեկնածությանը դեմ չեն Աֆղանստանի և Պակիստանի սահմանի մոտ գործող ահաբեկիչները:

Քանի դեռ չի կայացել «Ալ Ղաիդա»-յի բոլոր անդամների հավաք-խորհրդակցությունը, ահաբեկիչներին կղեկավարի Սաիֆ ալ Ադելը:

Արժույթի միջազգային հիմնադրամի ղեկավար Դոմինիկ Ստրոսս-Կանի իրավապաշտպանը կարծում է, որ տուժողը համաձայն է եղել սեռական կապ ունենալ Ստրոսս-Կանի հետ: Հիշեցնենք, որ Արժույթի միջազգային հիմնադրամի ղեկավարին մեղադրում են հյուրանոցի աղախնին բռնաբարելու փորձ կատարելու մեջ:

Իրավապաշտպանի կարծիքով չկա որևէ ապացույց, որ Կանը հարձակվել է այդ կնոջ վրա: Սակայն Նյու Յորքի դատարանը չի համաձայնվել ազատ արձակել Կաննին նույնիսկ մեկ միլիոն դոլար գրավի դիմաց:

Նյու Յորքի Sifitel հյուրանոցի 32 ամյա աղախինը պնդում է, որ 2011թվականի մայիսի14-ին Ստրոսս-Կանը փորձել է բռնաբարել իրեն այն ժամանակ, երբ վերջինս մաքրել է նրա համարը:

Ստրոսս-Կանի համար կարևոր է, որպեսզի իրեն արդարացնեն, քանի որ վերջինս պատրաստվում է մասնակցել 2012 թվականի Ֆրանսիայի նախագահական ընտրություններին:

Պաղեստինի   ինքնավար վարչակազմի ղեկավար Մահմուդ Աբբասը կոչ է արել միջազգային հանրությանը սեպտեմբերին կայանալիք ՄԱԿ-ի գլխավոր ասամբլեայի նստաշրջանին աջակցել Պաղեստինին և ընդունել նրա անդամակցությունը Միավորված Ազգերի Կազմակերպությանը:

Ամերիկյան The New York Times թերթը գրում է, որ Աբբասը նաև  ընդգծել է, որ ԱՄՆ-ն որպես միջնորդ բավականին թույլ է և չի կարող  բավարար ճնշում գործադրել Իսրայելի վրա: Պաղեստինի ղեկավարի խոսքերով իրենք պատրաստ են  հանդես գալ որպես մի երկիր, որի տարածքները օկուպացվել են մեկ այլ պետության կողմից, և ոչ թե որպես պարտված ազգ, որը պատրաստ է  համաձայնվել ցանկացած պայմանների  հետ:

Իրանի Իսլամական Հանրապետությունն ամենեւին էլ ժողովրդավարական երկիր չէ:

Այստեղ գործում է պետական մարմինների մի բարդ համակարգ, որի իմաստը հոգեւոր էլիտայի իշխանության ապահովումն է:

Իշխանության էլիտայի ներսում կան տարբեր խմբավորումներ` ծայրահեղ պահպանողականներից մինչեւ չափավոր բարեփոխականներ: Նրանց շահերի համադրումն ու հակակշռումն էլ թույլ է տալիս հոգեւոր առաջնորդին` կայուն պահել համակարգը:

Երկրի նախագահը ընտրովի պաշտոնյա է, բայց ամբողջական իշխանությունը պատկանում է հոգեւոր առաջնորդին: Ավելին, իշխանությունն է արտոնում այս կամ այն թեկնածուի մասնակցությունը նախագահական կամ խորհրդարանական ընտրություններին:

Ինչքան էլ Իրանը դեմոկրատական երկիր չէ`ընտրություններն, իշխանության պատկերացմամբ, պետք է որոշակիորեն արտահայտեն հասարակական տրամադրությունները, համադրեն էլիտայի ներսում առկա խմբավորումների տարբերվող շահերը:

2009-ի նախագահական ընտրությունները ոչ միայն հասարակական հուժկու ընդվզման պատճառ դարձան, այլ նաեւ խմորումներ առաջացրեցին իշխանության ճամբարում, կասկածի տակ դրվեց անգամ հոգեւոր առաջնորդի չվիճարկվող հեղինակությունը: Հասարակությունը պահանջեց նաեւ նրա հրաժարականը` իր կողմից մերժված Մահմուդ Ահմադինեժադին նախագահի պաշտոնում պահելու համար: Էլիտայում սկսեցին խոսել երկրի առաջնորդի ոչ օբյեկտիվ, կողմնակալ պահվածքի մասին:

Ականհայտ էր, որ նախագահական վիճահարույց ընտրությունները հարուցել են լուրջ ճգնաժամ քաղաքական, պետական համակարգում:

Այսօր դա տեսանելի է շատերի համար: Համեյնեի եւ Ահմադինեժադի միջեւ լուրջ հակասություններ կան: Նախագահը փորձում է ազատվել հետախուզության նախարարից, հոգեւոր առաջնորդը դրան ընդդիմանում է: Վերջին շրջանում, տարբեր պատճառաբանություններով, նախագահի մի քանի տասնյակ կողմնակիցներ կալանավորվել են:

Այսօր արաբական մամուլում լուրեր են տարածվել, որ մոտ ժամանակներս Մահմուդ Ահմադինեժադը հրաժարական է տալու: Ասում են` այս որոշումն արդեն իսկ համաձայնեցված է հոգեւոր առաջնորդի մակարդակով:

Սակայն անկախ սցենարներից` մի բան ակնհայտ է. ԻԻՀ-ում քաղաքական ճգնաժամը խորանալու է:

Սուրեն Սուրենյանց

ԱՄՆ և Թալիբան շարժման ներկայացուցիչները ուղիղ բանակցություններ են վարել Գերմանիայում: Նրանք քննարկել են Աֆղանստանի իրավիճակի կարգավորման հարցերը:
The Washington Post-ը տեղեկացնում է, որ ԱՄՆ նախագահ Բարակ Օբաման  բանակցությունների արդյունքները կհրապարակի հուլիսին, երբ կքննարկվի ամերիկյան զորքերը Աֆղանստանից դուրս բերելու հարցը:

Որոշ լրատվամիջոցներ գրում են, որ ԱՄՆ և Թալիբների ներկայացուցիչները առնվազն երեք անգամ հանդիպել են Գերամանիայում և Քաթարում:

Բանակցությունները կազմակերպել են ոչ կառավարական կազմակերպությունները, ինչպես նաև արաբական և եվրոպական երկրների կառավարությունները: ԱՄՆ պետդեպարտամենտի մամլո քարտուղար Մայքլ. Ա Համմերը չի հաստատել  բանակցությունների մասին տեղեկությունները, սակայն ընդգծել է, որ ԱՄՆ մեծ  կապեր ունի Աֆղանստանում:

Միևնույն ժամանակ Գերմանիայի իշխանությունները նույնպես չեն   մեկնաբանել այդ նորությունները:

ՌԴ արտգործնախարար  Սերգեյ Լավրովը հայտարարել է, որ Լիբիայի  ներկայացուցիչները պատրաստ են ընդունել ՄԱԿ-ի Անվտանգության խորհրդի բանաձևը, եթե ՆԱՏՕ-ն դադարեցնի իր ռմբակոծությունները:

«Լիբիայի ներկայացուցիչների պատասխանը բացասական համարել չի կարելի: Նրանք պատրաստ են ընդունել 1973 բանաձևը, սակայն նրանք պետք է վստահ լինեն, որ ՆԱՏՕ-ն կդադարեցի ռմբակոծությունները»,- ասել է Լավրովը:

Միևնույն ժամանակ ՌԴ արտգործնախարարն ընդգծել է, որ  Ռուսաստանը չի պատրաստվում միջնորդ դառնալ Լիբիայի իշխանությունների և ապստամբների միջև:

Քիչ առաջ Հաագայի միջազգային քրեական դատարանը Լիբիայի առաջնորդ Մուամար Քադաֆիին և նրա որդուն` Սայֆ Ալ-Իսլամին ձերբակալելու սանկցիա է տվել, «մարդկության դեմ գործած հանցանքների» մեղադրանքով:

Վաղօրոք էր հայտնի, որ Քադաֆիին ձերբակալելու սանկցիան տրվելու է այսօր` մայիսի 16-ին, երբ տարածվել էր համապատասխան հաղորդագրություն:

Ըստ դատախազության` քննությունը պարզել էր, որ երեք անձինք ամենամեծ պատասխանատվությունն են կրում այս հանցագործությունների համար: Քննությանը հաջողվել էր նաև ձեռք բերել անհերքելի ապացույցներ` ներկայացնելով 11 երկրներից 50 վկաների հարցաքննության տվյալները:

Այս մասին հաղորդում է Reuters գործակալությունը:

Եգիպտոսի նախկին նախագահ Հոսնի Մուբարաքը և նրա կինը՝ Սյուզանը, որոշել են հրաժարվել իրենց ունեցվածքից և ողջ հարստությունը նվիրել պետությանը:

EGYnews գործակալության տեղեկացմամբ,Սյուզանըկարգադրել էիր փաստաբանին՝նախապատրաստել Կահիրեի արվարձաններից մեկում գտնվող իր առանձնատունը և բանկերից մեկում ունեցած 2, 8 մլն դոլարի հաշիվները պետությանը փոխանցելու համար անհրաժեշտ բոլոր   փաստաթղթերը։

ԻսկՀոսնի Մուբարաքըմտադիր է 143 մլնդոլարիհաշիվփոխանցել երկրի բյուջե։Ի դեպ, Եգիպտոսի արդարադատության նախարարության Տնտեսական հանցագործությունների հարցերով հանձնաժողովը դեռևս ունեցվածքից հրաժարվելու մասին որևէ փաստաթուղթ Մուբարաքներից չի ստացել։

Նախկին նախագահը և նրա կինը մեղադրվում են կոռուպցիայիհամար և այժմ կալանքի տակ են գտնվում: Որպես խափանման միջոց՝ Մուբարաքի և նրա կնոջ նկատմամբ կալանք է կիրառվել 15-օրյա ժամկետով, սակայնհիմա նրանք հիվանդանոցում են գտնվում։