Լիբիայի իշխանությունները պաշտոնապես հերքել են այն լուրը, ըստ որի՝ Մուամար Քադաֆիի դուստրն ու կինը փախել են երկրից:

Los Angeles Times թերթը գրում է, թե Լիբիայի արտաքին գործերի փոխնախարար Հալիդ Քաիմը հայտարարել է, որ Սաֆիա և Աիշա Քադաֆիները տվյալ պահին գտնվում են Տրիպոլիում:

Քաիմը հերքել է նաև տեղեկությունն այն մասին, որ երկրի նավթային արդյունաբերության նախարարության ղեկավար Շուքրի Հանեմը անցել է ապստամբների կողմը: Քաիմը հավաստիացրել է, որ Հանեմը կնոջ հետ Վիեննայում է, իսկ նրա երկու դուստրերը մնացել են Տրիպոլիում:

Agence France-Presse գործակալությունը տեղեկացնում է, որ Իրաքի Քիրքուկ քաղաքում այսօր եռակի ահաբեկություն է տեղի ունեցել: Տարբեր լրատվամիջոցներ զոհերի և վիրավորների մասին տարբեր տվյալներ են հրապարակել: Տեղական առողջապահական հանձնաժողովը հաղորդել է  27 զոհերի և 89 վիրավորների մասին, իսկ ներքին գործերի նախարարության տվյալներով՝ զոհվել է 29 մարդ, վիրավորվել են՝ 80-ը:

Զոհվածների մեծ մասը ոստիկանության աշխատակիցներ են եղել: Պայթյունների հետևանքով վնասվել են նաև մերձակայքում գտնվող բնակելի շենքերը:

Երեք պայթյուններն էլ տեղի են ունեցել գրեթե կես ժամվա ընթացքում: Տեղական ժամանակով ժամը 9.20-ին  ոստիկանության շենքի մոտ որոտացել է առաջին պայթյունը: Երբ դեպքի վայր են ժամանել իրավապահ մարմինները և փրկարարները, որոտացել է երկրորդ պայթյունը: Երրորդ ռումբը պայթել է տեղական ժամանակով ժամը 10.30-ին: Հիշեցնենք, որ երեկ Իրաքի իշխանությունները հայտարարել են, որ իրենց հաջողվել է ձերբակալել «Ալ Ղաիդայի» անդամներից մեկին:

Պայթյունները, հավանաբար, այդ տեղեկության արձագանքներն են:

ՄԱԿ-ի գլխավոր քարտուղար  Պան Գի Մունը խոսել է Իսրայելի ղեկավարության հետ իր վերջին հանդիպման մասին:

Հանդիպման ընթացքում Պան Գի Մունը պահանջել է, որպեսզի իսրայելցիները  ավելի «ճկուն» լինեն պաղեստինյան ղեկավարության հետ բանակցությունների ընթացքում:
Ըստ ֆրանսիական լրատվամիջոցների, Պան Գի Մունը հայտարարել է, որ Իսրայելը պետք է Պաղեստինյան Ինքնավարությանը հստակ հիմնավորումներ ներկայացնի, որպեսզի ինքնավարության ղեկավարները վերսկսեն բանակցություններն առանց նախապայմանների:

ՄԱԿ-ի գլխավոր քարտուղարի կարծիքով, ՀԱՄԱՍ-ի և ՖԱԹՀ-ի հաշտեցման գործընթացը ճիշտ քայլ կլինի այն դեպքում, եթե ՀԱՄԱՍ-Ը հրաժարվի ահաբեկչական պայքարից:

ԱՄՆ նախագահ Բարաք Օբաման այսօր վերանայելու է արաբական երկրների ժողովրդավարացման տնտեսական աջակցության բազմամիլիարդավոր ծրագիրը: Agence France-Presse  գործակալությունը տեղեկացնում է, որ առաջնահերթ օգնություն կստանան Եգիպտոսն ու Թունիսը, քանի որ այնտեղ իշխանություններն արդեն փոխվել են:

Ծրագիրը նախատեսում է վարկեր հատկացնել այդ երկրների զարգացման և նոր աշխատատեղերի բացման համար, ինչպես նաև՝ ստեղծել ներդրումային հիմնադրամներ:

Ըստ գործակալության տեղեկությունների, ամերիկյան պաշտոնյաները կարծում են, որ նմանօրինակ աջակցությունը կնպաստի ժողովրդավարության հաստատմանը այդ երկրներում:

Ծրագրի մանրամասները ներկայացնելու է Բարաք Օբաման:

Այսօր հրաժարական է տվել Արժույթի միջազգային հիմնադրամի նախագահ Դոմինիկ Ստրոս Կանը, որը մայիսի 14-ին ձերբակալվել էր Նյու Յորքի օդանավակայանում: Նրան առաջադրվել է սեռական բնույթի ոտնձգություն իրականացնելու մեղադրանք:
The Daily Telegraph թերթը գրում է, որ Ստրոս Կանի պաշտոնի ամենահավանական թեկնածուներն են Ֆրանսիայի ֆինանսների նախարար Քրիստին Լագարդը և Գերմանիայի կենտրոնական բանկի նախկին նախագահ Աքսել Վեբերը: Թերթի տեղեկություններով, այդ պաշտոնը կցանկանար զբաղեցնել նաև Մեծ Բրիտանիայի նախկին վարչապետ Գորդոն Բրաունը, սակայն գործող վարչապետ Դեյվիդ Քեմերոնն արդեն հասկացրել է, որ դեմ է նրա թեկնածությանը:

Քրիստին Լագարդի թեկնածությունն արդեն պաշտպանել են մի շարք քաղաքական գործիչներ, նրանց թվում՝ Շվեդիայի ֆինանսների նախարար Անդերս Բորգը: Եթե Լագարդի թեկնածությունը հաստատեն, ապա ԱՄՀ-ն առաջին անգամ կին կղեկավարի:
Իսկ Աքսել Վեբերը Եվրոպական կենտրոնական բանկի ղեկավարի ամենահավանական թեկնածուն էր, սակայն 2011 թ. սկզբին հրաժարական տվեց Գերմանիայի կենտրոնական բանկի ղեկավարի պաշտոնից: Սպասվում է, որ Աքսել Վեբերին կաջակցի Անգելա Մերկելը:

Արժույթի միջազգային հիմնադրամի (ԱՄՀ) ղեկավար Ստրոս Կանը հրաժարական է տվել, սակայն պնդում է իր անմեղությունը: «Ես կտրականապես դեմ եմ ներկայացրած բոլոր մեղադրանքների», հայտարարել է նա:

Իր գրությունում Ստրոս Կանն ասել է, որ «ցանկանում է պաշտպանել այն կազմակերպությունը, որտեղ աշխատել է»:

Հիշեցնենք, որ Ստրոս Կանը ձեռբակալվել է շաբաթ օրը Նյու Յորքի Սոֆիտել հյուրանոցի աշխատողի հայտարարության հիման վրա` բռնաբարության մեղադրանքով:

ԱՄՀ ղեկավարի ժամանակավոր պաշտոնակատարն է Ջոն Լիպսկին:

Ռուսական քաղաքական էլիտան սպասման ու անորոշության մեջ էր:

Նախագահ Դմիտրի Մեդվեդևն իր եռամյա պաշտոնավարման ընթացքում առաջին անգամ մեծ ասուլիս էր հրավիրել: Ասուլիսին մասնակցում էին ռուսաստանցի և օտարերկրացի 800-ից ավելի լրագրողներ:

Եթե նախկին նախագահ Վլադիմիր Պուտինի համար նման ասուլիսները պարբերական բնույթ էին կրում, ապա գործող նախագահը ավելի հաճախ գերադասում է մարդկանց հետ շփվել փորձագիտական շրջանակներում, տարբեր էլիտար հարթակներում, սոցցանցերում:

Այս անգամ նա հրապարակային արտահայտման նոր ձևաչափ էր ընտրել, ու շատերը սպասում էին էական հայտարարությունների, որոնք կարող էին որոշակիացնել Ռուսաստանի քաղաքական կյանքը, հարաբերություններն իշխող տանդեմում:

Սակայն Մեդվեդևը չարդարացրեց սպասելիքները, հստակ չպատասխանեց այն հարցին, թե ով է լինելու իշխանության թեկնածուն գալիք տարի նշանակված նախագահական հերթական ընտրություններում: Նրա պատասխանից պարզ դարձավ, որ Մեդվեդև-Պուտին զույգն առայժմ վերջնական որոշում չի կայացրել կամ առնվազն որոշել է առայժմ չբարձրաձայնել կայացված որոշման մասին:

Պուտինի սիրած «կայունությանը» Մեդվեդևը սիրում է հակադրել իր սիրած «մոդեռնիզացիան»: Իր սիրած գաղափարով էլ բլոգեր-նախագահը ներկայացել էր ասուլիսին:

Այնուամենայնիվ, երկար սպասված ասուլիսում մի հետաքրքիր միտք հնչել է: Դմիտրի Անատոլևիչն ասել է, որ ազատազրկված գործարար Միխայիլ Խոդորկովսկուն վտանգավոր չի համարում հասարակության համար: Հիշեցնենք, որ վարչապետ Վլադիմիր Պուտինը տրամագծորեն հակառակ կարծիքն ունի:

Ինչևէ, անդրադառնանք գործող նախագահի հնչեցրած մտքին: Այս հայտարարությունն անելով` նա, թերևս, հասկացնել տվեց, որ այս հարցում տարաձայնություններ ունի Պուտինի հետ: Այսպես կարելի է, իհարկե, շահել լիբերալ էլեկտորատի համակրանքը:

Սակայն այս հայտարարությունը կարող է նաև բումերանգի նման հարվածել հենց Մեդվեդևին: Եթե նա համարում է, որ Խոդորկովսկին վտանգավոր չէ, ապա ինչո՞ւ է մարդն ազատազրկված: Եվ մի՞թե այս հայտարությունը սեփական անզորության խոստովանություն չէր: Համենայնդեպս, այդպես կընկալվի, եթե հայտարարությանը չհետևեն կոնկրետ գործողություններ:

Մի խոսքով, ասուլիսի շուրջ եղած աղմուկն ավելին էր, քան` բուն ասուլիսը:

Սուրեն Սուրենյանց

The New York Post-ը տեղեկացնում է, որ Արժույթի միջազգային հիմնադրամի նախագահ Դոմինիկ Ստրոս Կանին մեղադրանք ներկայացրած կինը բնակարան էր վարձել ՄԻԱՎ-ՁԻԱՀ-ով վարակված հիվանդների համար նախատեսված շենքում:

Վերոնշյալ տանը թույլ են տալիս բնակվել միայն ՄԻԱՎ-ով հիվանդներին: Շենքի կառավարիչ Harlem United ընկերության ներկայացուցչի խոսքով, այնտեղ կարող են բնակարան վարձել միայն նրանք, ում ընտանիքում առնվազն մեկը հիվանդ է ՄԻԱՎ-ՁԻԱՀ-ով, իսկ լիովին առողջ մարդիկ այնտեղ չեն կարող բնակվել:
Հիշեցնենք, որ Դոմինիկ Ստրոս Կանին ձերբակալել են շաբաթ օրը՝ նյույորքյան հյուրանոցներից մեկի սպասուհու նկատմամբ սեռական ոտնձգություն կատարելու մեղադրանքով:

Նյու Յորքի Sifitel հյուրանոցի 32-ամյա աշխատակցուհին պնդում է, որ 2011 թվականի մայիսի14-ին Ստրոս Կանը փորձել է բռնաբարել իրեն՝ նրա վարձակալած համարը կարգի բերելու ժամանակ:

Այսօր Լիբիայի և Թունիսի սահմանին բախումներ են տեղի ունեցել, որոնց հետևանքով զոհվել են առնվազն 4 զինվոր և մեկ սահմանապահ: Reuters  գործակալությունը տեղեկացնում է, որ մի խումբ ահաբեկիչներ հարձակվել են թունիսցիների վրա, իսկ վերջիիներս պատասխան կրակ են բացել նրանց ուղղությամբ:

Տեղական իշխանությունները ենթադրում են, որ հարձակվողները «Ալ Ղաիդա»-ի անդամներ են եղել:

Բախումները տեղի են ունեցել երկու երկրների սահմանի հյուսիսային հատվածում, որը դեռևս Լիբիայի իշխանություների վերահսկողության տակ է գտնվում:
Ըստ վերջին տեղեկությունների՝ սպանվածները Թունիսի, Ալժիրի և Լիբիայի քաղաքացիներ են եղել:

Եգիպտոսի իշխանությունները հերքել են այն տեղեկությունը, ըստ որի՝ երկրի նախկին նախագահ Հոսնի Մուբարաքին ներում են շնորհելու, տեղեկացնում է Agence France-Presse գործակալությունը:

Եգիպտոսի զինված ուժերի Գերագույն խորհրդի հրապարակած հայտարարության մեջ մասնավորապես ասված է, որ Մուբարաքը և իր ընտանիքի անդամները ոչ մի դեպքում ներման չեն  արժանանալու, և երկրի իշխանությունները դատավարությանը չեն խառնվելու:
Ավելի վաղ լրատվամիջոցները հաղորդել են, որ Հոսնի Մուբարաքը պատրաստվում է ներողություն խնդրել  Եգիպտոսի ժողովրդից: