Տեղական TOLO հեռուստաալիքը տեղեկացնում է, որ Պակիստանում սպանվել է Աֆղանստանի «Թալիբան» շարժման ղեկավար Մուլա Օմարը:

Նրա սպանությունը հաստատել է նաև Պակիստանի հատուկ ծառայությունների աղբյուրը, ըստ որի՝ Օմարը սպանվել է Քվեթա քաղաքում՝ Հյուսիսային Վազիրստանի ճանապարհին։

Մուլա Օմարը «Թալիբանի» հոգևոր առաջնորդն ու հիմնադիրն է, 1994-ին 50 ուսանող–թալիբների հետ միասին մասնակցել է քաղաքացիական պատերազմին, որի հետևանքով 1996-ին արմատականները կարողացան Աֆղանստանում իրենց ձեռքը վերցնել իշխանությունը և ստեղծել «իսլամական էմիրություն»։

Հենց Մուլա Օմարն է Աֆղանստան հրավիրել Ուսամա բեն Լադենին և  «Ալ Ղաիդան» դարձրել թալիբների գլխավոր դաշնակիցը։

Մայիսի 20-ին Բարաք Օբաման Կոնգրեսին նամակ է հղել` կապված Լիբիայում ռազմական գործողությունների շարունակման հետ: Ինչպես տեղեկացնում է Associated Press-ը, նամակում Օբաման նշել է, որ ԱՄՆ մասնակցությունը գործողություններին սկզբունքային կարևորություն ունի:

Օբամայի նամակը  կապված է Լիբիայի ռազմական գործողություններին ԱՄՆ-ն պաշտոնապես ներգրավվելու 60 օրվա հետ: Ամերիկյան օրենսդրության համաձայն, 60 օրը առավելագույն ժամկետն է, որի ընթացքում նախագահը կարող է ռազմական գործողություններ կատարել առանց Կոնգրեսի համաձայնության:

Բացի այդ, Օբամայի վարչակազմը Լիբիայի գործողությունները լիարժեք պատերազմ չի համարում, հետևաբար և անհրաժեշտ չէ Կոնգրեսի համաձայնությունը:

ՆԱՏՕ-ի ուժերը դուրս չեն գա Աֆղանստանից 2014թ.-ից հետո, հայտարարել է դաշինքի Կենտրոնական Ասիայի և Կովկասի հարցերով հատուկ ներկայացուցիչ Ջեյմս Ապպատուրայը: Deutsche Welle-ի հետ հարցազրույցում նա մասնավորապես նշել է . «Կոալիցիայի մանակից երկրների շրջանում պատկերացում էր առաջացել, թե 2015թ. հունվարի 1-ին ՆԱՏՕ-ն դուրս կգա Աֆղանստանից։ Բայց դա այդպես չէ։ Մենք չենք հեռանա, մինչև Աֆղանստանը չկարողանա ինքնուրույն ապահովել իր անվտանգությունը։ Մենք միջոցներ կձեռնարկենք նրանց  պաշտպանության համար»։

Աֆղանստանի տարածքում ՆԱՏՕ-ի գործողություններին մասնակցում է հակաահաբեկչական կոալիցիայի մեծաթիվ կոնտինգենտ, որը ղեկավորում են ԱՄՆ զինված ուժերի հրամանատարության ներկայացուցիչները, և ՆԱՏՕ-ի հրամանատարությամբ գործող ISAF-ի կոնտինգենտը։ Երկու կոնտինգենտների հիմանական խնդիրը  «Տալիբան» և «Ալ Կաիդա» շարժումների զինյալների ոչնչացումն է։

Մինչև 2014թ. վերջ ԱՄՆ-ը պետք է Աֆղանստանում անվտանգության վերահսկողությունը փոխանցեր ազգային զինված ուժերին։

Ամերիկյան հակահրթիռային  պաշտպանության  համակարգը, 2015 թվականից հետո, կարող է լրջորեն վտանգել Ռուսաստանի  միջուկային զսպման ուժերը, հայտարարել է ՌԴ գլխավոր շտաբի օպերատիվ ղեկավարման վարչության պետ Անդրեյ Տրետյակը:

Ըստ Տրետյակի, հակահրթիռային պաշտպանության համակարգերի ստեղծումը վտանգավոր է Ռուսաստանի համար, քանի որ կարող է  ոչնչացնել միջմայրցամաքային, ինչպես նաև սուզանավերի բալիստիկ հրթիռները: Տրետյակն ասել է, որ 2015 թվականից ամերիկացիները հակահրթիռային պաշտպանական համակարգը ենթարկելու են լուրջ փոփոխությունների և տեղակայելու են Լեհաստանում, որը, ի դեպ, Ռուսաստանի հարևանն է:

Ըստ ԱՄՆ պետքարտուղար Հիլարի Քլինթոնի՝ հավանական է, որ Պակիստանի  ղեկավարությունը տեղյակ է եղել «Ալ Ղաիդա»-ի ղեկավար Ուսամա բեն Լադենի գտնվելու վայրի մասին:

«Մենք ապացույցներ չունենք, որ Պակիստանի իշխանությունները գիտեին, թե որտեղ էր գտնվում բեն Լադենը, սակայն կարելի է ենթադրել, որ Իսլամաբադում ոմանք իմացել են թիվ մեկ ահաբեկչի ապաստարանի մասին»,- ասել է Քլինթոնը:

Ի դեպ, Քլինթոնը միաժամանակ ընդգծել է, որ ԱՄՆ-ն շարունակելու է համագործակցել Պակիստանի հետ, այսինքն՝ պայքարել ահաբեկչության դեմ:

Պաղեստինյան «Ֆաթհ» և «Համաս» շարժումների  ներկայացուցիչներն այսօր հանդիպելու են Մոսկվայում` բանակցելու նպատակով, «Ռիա Նովոստի»-ին հայտնել է  պաղեստինյան «Աշ Շաաբ» կուսակցության անդամ Վալիդ ալ Աուադը:

Ռուսաստանի մայրաքաղաք են ժամանելու նաև Պաղեստինի ազատագրության ժողովրդական ճակատի, «Աշ Շաաբ»-ի և դեմոկրատական կուսակցության երկայացուցիչները:

«Նրանք գալիս են բանակցություններ վարելու և հաշտեցման գործընթացը շարունակելու նպատակով: Ռուսաստանն այն երկրներից է, որոնք ցանկանում են հաշտեցնել պաղեստինցիներին»,-ասել է ալ Աուադը:

Լիբիայի իշխանությունները անհեթեթություն են որակել Բարաք Օբամայի ելույթը, ըստ որի՝ ԱՄՆ նախագահն ասել է, որ Մուամար Քադաֆին պետք է անհապաղ հրաժարվի իր զբաղեցրած պաշտոնից:

«Օբաման հավատում է իր ստերին ու կեղծիքին: Նա խաբում է թե՛ լրատվամիջոցներին, թե՛ իր կառավարությանը: Օբաման չի որոշողը Քադաֆիի հեռանալու հարցը»,- հայտարարել է Լիբիայի իշխանությունների  մամլո քարտուղար Իբրահիմ Մուսան:

Հիշեցնենք, որ Բարաք Օբաման հայտարարել է Եգիպտոսին և Թունիսին ֆինանսական աջակցություն ցուցաբերելու ԱՄՆ-ի մտադրության մասին՝ ընդգծելով, որ աջակցության ազդակը այդ երկրներում իրականացված իշխանափոխությունն է:

ԱՄՆ նախագահ Բարաք Օբաման, անդրադառնալով Մերձավոր Արևելքի խնդիրներին, կոչ է արել Իսրայելին՝ վերադառնալ 1967 թվականին հաստատված սահմաններին: Ըստ CNN  հեռուստաընկերության՝ Օբաման դարձավ առաջին ԱՄՆ նախագահը, որը հայտարարեց, որ Պաղեստինյան պետությունը պետք է ձևավորվի մինչև 1967 թվականը հաստատված սահմաններում:

«ԱՄՆ-ն վստահ է, որ բանակցությունների արդյունքում պետք է երկու պետություն ձևավորվի: Պետք է հստակեցվեն Պաղեստինի սահմանները Իսրայելի, Եգիպտոսի և Հորդանանի հետ»,-հայտարարել է Օբաման: Մեկնաբանելով ԱՄՆ նախագահ Բարաք Օբամայի Վաշինգտոնում հնչեցրած առաջարկը՝ Իսրայելի վարչապետ Բենյամին Նաթանյահուն ասել է, որ Իսրայելի վերադարձը 1967 թ. սահմաններին՝ աղետալի կլինի իր երկրի համար: Նրա կարծիքով՝ այն սահմանները, որոնք գծված են եղել մինչ 1967 թ. վեցօրյա պատերազմը, այս պահին չեն կարող պաշտպանված լինել հարձակումներից, իսկ այդ զիջումը կարող է վտանգ ներկայացնել երկրի անվտանգությանը, և Արևմտյան ափի շինությունների մեծ մասը կմնա Իսրայելի սահմաններից դուրս ։

Մայիսի 19-ին «ՌԻԱ Նովոստիի» հաղորդմամբ, ՌԴ հետաքննչական կոմիտեն հայտարարություն է տարածել, որ Ինտերպոլի գլխավոր քարտուղարությունը Պետդումայի պատգամավոր Աշոտ Եղիազարյանին (Ռուսաստանում նրան մեղադրում են առանձնապես խոշոր չափի խարդախության մեջ) ներառել է հետախուզվողների ցուցակում:

Հետաքննության տվյալներով, Եղիազարյանը մի շարք անձանց հետ ավելի քան 1,5 մլրդ ռուբլու խարդախություն է կատարել: Հետաքննությունը սկսվել է, երբ Եղիազարյանի նախկին  բիզնես-գործընկերը դիմել է դատախազություն։ Նա պետդումայի պատգամավորին մեղադրում է «Եվրոպարկ» առեւտրային համալիրի շինարարությամբ զբաղվող ընկերության բաժնետոմսերի 20 տոկոսը յուրացնելու մեջ:

Եղիազարյանը Լոս Անջելեսում ապրում է 2010 թվականի ամռանից։ Նա ասել է, որ ստիպված է լքել Ռուսաստանը՝ վախենալով կյանքի համար։ Նա հայտարարել է, որ անգամ ԱՄՆ-ում իրեն լիովին անվտանգ չի զգում: Մոսկվայի Բասմանյան դատարանը 2011 թվականի հունվարի 31-ին Պետդումայի պատգամավոր Աշոտ Եղիազարյանին հեռակա կարգով ձերբակալելու որոշում էր կայացրել:

Իսրայելի  վարչապետ Բենիամին Նաթանյահուն ԱՄՆ նախագահ Բարաք Օբամային խնդրելու է Իրանի հարցը նորից դարձնել ԱՄՆ-ի արտաքին քաղաքականության առաջնահերթ խնդիրը:

Վաղը Սպիտակ տանը կայանալիք հանդիպմանը քննարկվելու է տարածաշրջանային խնդիրների լայն շրջանակ: Չնայած Իսրայելը գիտակցում է, որ Միացյալ Նահանգները թույլ չի տա Իրանին՝ միջուկային զենք ձեռք բերել, այնուամենայնիվ Երուսաղեմը ցանկանում է, որ Վաշինգտոնը և միջազգային հանրությոնը առավել մեծ ուշադրություն դարձնեն Թեհրանի միջուկային ծրագրին:

Ի դեպ, ԱՄՆ-ն արդեն հասկացրել է, որ քաջատեղյակ է իրանական սպառնալիքին: Ազգային անվտանգության գծով ԱՄՆ նախագահի խորհրդական Թոմ Դոնիլոնը հայտարարել է, որ նախագահ Օբաման վաղուց է գիտակցում, որ Իրանը կարող է մի օր միջուկային երկիր  դառնալ: